|  KULTURË  |  HISTORI  |   POLITIKË  |  OPINIONE  |  ADRESARI  |  ARKIVI  | 

Gjilan / Daci: Askush të mos mendojë se Kosova është e gatshme të heqë dorë nga pavarësia

Gjilan, 30 mars 2004 /TN/ Ilmi MUSLIU - Kryesia e Parlamentit të Kosovës, e prirë nga kryetari Nexhat Daci, ka vizituar të marten Gjilanin dhe në një takim me Komitetin për Siguri dhe Emergjencë, ku kanë marrë pjesë edhe përfaqësues të komuniteteve, është njoftuar për pasojat e ngjarjeve të 17 e 18 marsit si dhe masat që janë ndërmarrë për normalizimin e gjendjes, ndërsa gjatë një takimi me komunitetin serb, në kishën ortodokse, i ka ftuar ata që të kthehen nëpër shtëpitë e veta dhe të qëndrojnë këtu.

 

Lutfi Haziri, kryetar i komunës, Xhemajl Hyseni, zëvendëskryetar, Enver Muja, kryeshef ekzekutiv, Richard Jonson, komandant i KFOR-it në Gjilan, Reshat Maliqi, këshilltar i komandantit rajonal të policisë, Izet Azizi, komandant i stacionit të policisë, Shaban Musliu, zëvendëskomandant i TMK-së dhe Marsel Qintelan, këshilltar rajonal i UNMIK-ut e kanë njoftuar kryeparlamentarin Nexhat Daci dhe kryesinë e Parlamentit të Kosovës, me aktivitetetet që janë ndërmarrë për qetësimin e situatës dhe përballimin e krizës.

Pasi tha se është i kënaqur me angazhimet që janë bërë në komunën e Gjilanit për tejkalimin e situatës dhe mënyrën si është vepruar këtu bashkarisht me strukturat ndërkombëtare në kuadër të Komitetit për Siguri dhe Emergjencë, z. Nexhat Daci tha se është qëndrim unanim i institucioneve të Kosovës që pasojat të riparohen shpejt.

Askush nga ne nuk e justifikon dhunën ndaj komunitetit serb. Është mendim yni se edhe bashkësia ndërkombëtare në Kosovë u sulmua në mënyrën më brutale dhe pa asnjë arsye. U sulmuan edhe ashkalinjtë, të cilët asnjëherë nuk i kanë bërë dëm Kosovës, u sulmua edhe KFOR-i, përkatësisht NATO-ja, e cila na ndihmoi të fitojmë lirinë dhe të ndërtojmë paqen dhe demokracinë, ka thenë z. Daci.

Kryeparlamentari Daci ka qenë kategorik në pohimin e tij se Kosova nuk do të ketë shmangie nga përcaktimet e saj për pavarësi, sikundër e tha me bindje se Kosova është vend i të gjithë atyre që e duan atë dhe që dëshirojnë të jetojnë me ne.

Nexhat Daci tha se nuk duhet të mendojë askush në rruzullin tokësor se Kosova është e gatshme të heqë dorë nga qëllimet e veta shekullore për pavarësi. Asnjë vendim i Parlamentit të Serbisë nuk është i vlefshëm për Kosovën dhe kosovarët, tha ai.

Edhe z. Grosman e bëri të ditur gjatë vizitës së djeshme në Prishtinë se Kosova duhet të vazhdojë me realizimin e standardeve, tha Daci dhe ai e vlerësoi këtë mbështetje si një lloj freskie për institucionet e Kosovës, pas krizës së 17 e 18 marsit.

“Po kthehem në Prishtinë shumë më i qetë seç kam ardhur këtu. Gjilani është formula më e mirë se si mund të administrohen situatat e këtilla dhe si duhet të punohet në tejkalimin e krizave. Unë mendoj se Kosova e prillit nuk do të ketë asgjë të përbashkët me Kosovën e para 17 marsit, është shprehur z. Daci gjatë një takimi të shkurtër me gazetarë.

Më pas, Kryesia e Parlemantit të Kosovës dhe kryetari saj Nexhat Daci kanë vizituar kishën ortodokse serbe në qytet, e cila falë përkujdesjes së forcave të sigurisë ka shpëtuar e padëmtuar dhe aty është takuar edhe me disa nga pjesëtarët e këtij komuniteti, nga të cilët ka kërkuar që të kthehen nëpër shtëpitë e tyre dhe të qëndrojnë këtu, pasiqë janë ndërmarrë të gjitha masat që gjithçka të riparohet shpejt.

Duke kërkuar nga serbët lokalë të mos i dëgjojnë ata që i ftojnë të vepronjnë ndryshe, sepse të tillët, siç është shprehur Daci, mund t`iu bëjnë vetëm një shërbim arushe, ai tha se komunitetet në Kosovë duhet të kenë mbrojtjen e fqinjve, sepse këtë nuk mund ta bëjë askush më mirë dhe bëri apel te shqiptarët dhe bizneset që të dëshmojnë shpirtin solidar dhe t`i ndihmojnë fqinjtë e tyre serbë në këtë situatë.