Përmbajtja:

• Grosman tha se dhuna është një kthim prapa në procesin për implementimin e standardeve

• Presidenti Rugova: SHBA-të kërkojnë që ta tejkalojmë këtë situatë dhe të vazhdojmë progresin

• Grosman: "Dhuna në Kosovë nuk duhet të ndodhë kurrë më"

• Italiani Xhentilini, i dërguar special i Solanës në Kosovë

• Qeveria e Holandës ka ndarë 2,5 milionë dollarë për planifikimin hapësinor të Kosovës

• Novicki thotë se "dhuna e marsit ka qenë përpjekje e spastrimit etnik të serbëve anembanë Kosovës"

• Në Gjilan arrestohen pesë persona

• Është gjetur trupi i pajetë i një fëmije afër Lipjanit

• Nënsekretari amerikan i Shtetit për Çështje Politike Mark Grosman po viziton Prishtinën

• Në Prishtinë ka mbërritur edhe komandanti i NATO-s për Evropën Jugore, gjenerali Gregori Xhonson

• Podujevë: Tre zyrtarë të LDK-së kërcënohen me vdekje

• Ushtarët e KFOR-it francezë kanë liruar urën për kalim për banorët e tre rrokaqiejve në Mitrovicë

• Në Prishtinë përfundoi punimet konferenca triditore për transformimin e arsimit në Kosovë

• Zëdhënësi i UNMIK-ut thotë qytetarët e Kosovës nuk do të lejojnë që keqbërësit të ndryshojnë shoqërinë

• Policia vazhdon aksionin e arrestimeve të të dyshimtëve në protestat e dhunshme të javës së kaluar

• Pas rebelimit të të burgosurve gjendja në burgun e Dubravës raportohet e qetë

• Statitistikat e Bankës Botërore tregojnë se në Kosovë 50 për qind e popullatës jetojnë në varfëri

• Karate: U mbajt Kampionati i Kosovës në nëntë kategori

• Tre anëtarët e Grupit të Kontaktit vizitojnë sot Beogradin për të biseduar për Kosovën

• Në një shpërthim në Uzbekistan janë vrarë 2 persona dhe 20 të tjerë janë plagosur

• Një gjykatë e Lituanisë ka dënuar yllin e rokut francez me 8 vjet burg për vrasjen mikes së tij

• Qeveria Kongos ka arrestuar të pakten 15 persona pas grushtetit të dështuar

• Një ministre irakiane i shpëton atentatit, vriten një civil britanik dhe një civil kanadian

• Kryeministri izraelit mund të akuzohet për korrupsion

• Komisioni që heton sulmet e 11 shtatorit vazhdon punën në një atomosferë polemikash

• Pakistan: Esktremistët myslimanë lirojnë pengjet

• Humbje e partisë së Shirakut

• Plani i ri i Ananit për Qipron

• Në qytetin Mosul janë vrarë 4 kryengritës irakianë

• Në Napoli mafia ka vrarë me armë zjarri një vajzë 14-vjeçare

• Stuhia e fuqishme në Brazil ka shkaktuar vdekjen e dy personave

• Vdiq aktori britanik, Piter Ustinov

• Një shef i inteligjencës së rrjetit të Al Kaidës është vrarë gjatë ofensivës kundër militantëve

• Trupat amerikane në Afganistan kanë vrarë një sulmues vetëvrasës me autobombë

Grosman tha se dhuna është një kthim prapa në procesin për implementimin e standardeve

 

Prishtinë, 29 mars 2004 - Nënsekretari amerikan i Shtetit, Mark Grosman, pati sot edhe një takim të përbashkët me krerët UNMIK-ut dhe me udhëheqësit e institucioneve e me liderët politikë të Kosovës. Pas takimit, Grosman në një konferencë me gazetarë shprehu mbështetjen e Qeverisë amerikane për implementimin e planit standardet për Kosovën, i cili do të publikohet këtë javë.

Ai tha se dhuna e ditëve të fundit është një kthim prapa në procesin për implementimin e standardeve dhe shtoi se realizimi i planit për standardet tani është shumë më i vështirë se sa para dy javësh. Viti 2005 mbetet vit i rivlerësimit të plotësimit të standardeve, por tha se tani është shumë më vështirë se para dy javësh të thuhet nëse rivelësrimi do të jetë pozitiv.

"Dhuna e fundit na ka kthyer prapa për vizionet, të cilat i kemi dhe për shpresën që duhet ta arrijmë në vitin 2005", tha Grosman, duke pyetur: "Çka më tutje? A jemi ngujuar në këtë pikë? Ku është bota?" Për shkak të njrëzve këtu, tha Grosman, duhet vazhduar më tutje dhe duhet zbatuar vizionet e Kombeve të Bashkuara, duke shtuar se gjithçka është në duart e njerëzve të Kosovës.

"Erdha në Kosovë ngase njerëzit këtu duhe të ecin përpara dhe SHBA-të janë të gatshme për të ndihmuar me pjesëmarrjen e NATO-s, të BE-së të OKB-së, e cila është e gatshme të ndihmojë dhe duhet të gjejmë mënyrat sesi mund ta bëjmë këtë", tha ai.

"Duhet të fokusohemi në fushat e prioritetet, në qeverisjen vendore, në mënyrë që komunitetet të kenë më shumë siguri, të ketë më shumë vende të punës përmes privatizimit dhe të fukosohemn në ekonomi", nënvizopi nënsekretari amerikan.

Ai tha se pesë vjet më parë NATO veproi për t'u sjellë paqe njerëzve në Kosovë, për të ndërtuar një shoqëri demokratike dhe paqësore dhe sot njerëzit dhe liderët duhet të veprojnë në mënyrë vendimmarrëse dhe efektive për të krijuar një shoqëri e cila i plotëson këto standarde. Njerëzit këtu janë të gatshëm për ta bërë këtë dhe SHBA-të angazhohen për këtë, tha Grosman.

 

 Zoti Grosman dënoi fuqishëm aktet e dhunshme që ndodhën gjatë trazirave të 17 e 18 marsit. Njëherit ai u shprehu ngushëllime familjarëve të të gjithë atyre që e humbën jetën dhe të atyre që u lënduan në këto trazira, duke theksuar se kjo dhunë nuk guxon të përsëritet kurrë më në Kosovë.

Grosman bëri të qartë se ata që janë përgjegjës për vdekjet, lëndimet dhe shkatërrimet duhet të nxirren para organeve të drejtësisë, ndërkohë që mbështeti përpjekjet e KFOR-it dhe të UNMIK-ut për vendosjen e qetësisë dhe për normalizimin e gjendjes në Kosovë.

Gjithashtu nënsekretari amerikan tha se Qeveria amerikane mbështet qëndrimin e Këshillit të Sigurimit të Kombeve të Bashkuara për ndërtimin e një shoqërie multietnike, të qetë, të sigurtë e tolerante për të gjithë qytetarët e Kosovës, pavarësisht prej përkatësisë etnike.

Grosman theksoi se SHBA-të qëndrojnë pas përcaktimit se çështja e statusit final të Kosovës të hapet pas përmbushjes së standardeve, në afatin që ishtë parashikuar apo edhe më heret, nëse këto standarde plotësohen.

 

 

Presidenti Rugova: SHBA-të kërkojnë që ta tejkalojmë këtë situatë dhe të vazhdojmë progresin

 

Prishtinë, 29 mars 2004 - Presidenti i Kosovës Ibrahim Rugova priti sot paradite nënsekretarin amerikan të Shtetit Mark Grosman, me të cilin bisedoi për situatën aktuale në Kosovë, pas trazirave të ditëve të kaluara. Pas takimit Presidenit Rugova tha se me nënsekretarin Grosman kishte biseduar për gjendjen dhe ngjarjet tragjike që ndodhën ditë më parë në Kosovë. "SHBA-të janë mjaft të brengosura për këto ngjarje dhe kërkojnë që ta tejkalojmë këtë situatë dhe të vazhdojmë progresin", theksoi Presidenti Rugova, duke shtuar se do të ketë një angazhim të vazhdueshëm të SHBA për Kosovën.

 

Gjithashtu në këtë takim, tha zoti Rugova, është biseduar edhe për sanimin gjendjes nga dëmet që janë bërë gjatë trazirave dhe për fondin që ka krijuar qeveria e Kosovës për rindërtimin e monumenteve kulturore-historike, si dhe të objekteve të tjera publike e të shtëpive. "Ne së bashku me UNMIK-un, bashkësinë ndërkombëtare, do të vazhdojmë progresin tonë dhe do të kemi përkrahjen e SHBA-ve", tha ai.

Presidenti Rugova dhe rithekosi se njohja se më e shpejtë e pavarësisë së Kosovës do ta qetësonte këtë pjesë të Evropës dhe të botës, pra një Kosovë demokratike, paqësore, e integruar në NATO, në BE dhe në miqësi të përhershme me SHBA-të, dhe në fund e falenderoi nënsekretarin Grosman për vizitën dhe për përkrahjen e SHBA-ve.

Nënsekretari Grosman me këtë rast nuk u prononcua për media.

 

 

Grosman: "Dhuna në Kosovë nuk duhet të ndodhë kurrë më"

 

Prishtinë, 29 mars 2004 - Nënsekeretari amerikan i Shtetit Mark Grosman është takuar sot edhe shefin e UNMIK-ut Haro Holkeri dhe kryeministrin e Kosovës Bajram Rexhepi. "Unë kam ardhur për t'ia shtuar zërin tim atyre që gjatë ditëve të kaluara kanë vlerësuar se dhuna në Kosovë nuk duhet të ndodhë kurrë më", tha Grosman pas takimir me Holketrin, duke shtuar se dhuna është e papranueshme. "Fola gjithashtu për hapat që duhet ndërmarrë në të ardhmen", tha Grosman pas takimit shefin e UNMIK-ut Hari Holkeri.

 

Grosman në mesditë do të mbajë një konferencë me gazetarë dhe do të vizitojë Fushë Kosovën, e pastaj udhëton për në Beograd.

 

 

Italiani Xhentilini, i dërguar special i Solanës në Kosovë

 

Bruksel, 29 mars 2004 - Shefi i diplomacisë së Bashkimit Evropian Havier Solana ka emëruar sot të dërguarin e tij special për Kosovën italianin Fernando Xhentilini (Gentilini). Këtë vendim Solana e ka marrë pas përkeqësimit të situatës në Kosovë dhe në shenjë përkushtimit të BE-së për përmirësimin e gjendjes në Kosovë.

 

Xhentilini në Kosovë do të ketë rolin e përfaqësuesit special të Havier Solanës, i cili deri më tani ka punuar në Zyrën e Solanës për krijimin e politikës së jashtme të BE-së.

Menjeherë pas luftës në Kosovë, Xhentilini ka qenë një nga këshilltarët e kryeadministratorit Bernan Kushner. Xhentilini do të arrijë në Prishtinë brenda disa ditësh.

 

 

Qeveria e Holandës ka ndarë 2,5 milionë dollarë për planifikimin hapësinor të Kosovës

 

Prishtinë, 29 mars 2004 - Qeveria e Holandës ka ndarë 2,5 milionë dollarë për fazën e re të programit dyvjeçar të planifikimit hapësinor të Kosovës. Kështu u bë e ditur sot në një konferencë me gazetarë në Prishtinë në mes të ministrit të Mjedisit dhe Planifikimit Hapësinor Ethem Çeku dhe UN-HABITAT.

Ky program do të ofrojë projekte në planifikimin hapësinor të komunave dhe ndihma për Ministrinë e Planifikimit Hapësinor dhe për subjektet e tjera.

 

 

Novicki thotë se "dhuna e marsit ka qenë përpjekje e spastrimit etnik të serbëve anembanë Kosovës"

 

Beograd, 20 mars 2004 - "Jam i bindur se dhuna e marsit ka qenë përpjekje e spastrimit etnik të serbëve anembanë Kosovës", tha Obudspersoni i Kosovës Marek Antoni Novicki. Sipas tij, tani më e rëndësishme është që dhuna është ndalur, por zhvillimi i situatës do të varet nëse do ketë ndryshime në qëndrimin e shqiptarëve dhe në politikën e bashkësisë ndërkombëtare, tha Novicki për gazetën "Politika" të Beogradit.

 

 

Në Gjilan arrestohen pesë persona

 

Gjilan, 29 mars 2004 - Policia e UNMIK-ut ka bërë të ditur se sot në mëngjes ka arrestuar 5 persona në rajonin e Gjilanit në kuadër të një operacioni të përbashkët me forcat e KFOR-it kundër krimit të organizuar.

Gjatë operacionit, që ka filluar në orën 4 të mëngjesit të sotëm, policia ka konfiskuar edhe substanca narkotike, armatim të paligjshëm dhe valuta të huaja.

Në komunikatën e policisë thuhet se operacioni i sotëm bazohet në hetimet e filluara para 18 muajsh.

 

 

Është gjetur trupi i pajetë i një fëmije afër Lipjanit

 

Lipjan, 29 mars 2004 - Të dielën pasdite është gjetur trupi i pajetë i një fëmije në bregun e lumit në një fshat afër Lipjanit. Policia ka thënë se bëhet fjalë për një fëmijë shqiptar, i cili ishte zhdukur më 27 mars, por nuk dyshohet për vdekje të dhunshme.

 

 

Nënsekretari amerikan i Shtetit për Çështje Politike Mark Grosman po viziton Prishtinën

 

Prishtinë, 29 mars 2004 - Nënsekretari amerikan i Shtetit për Çështje Politike Mark Grosman ka arritur mbrëmë në Prishtinë. Sot në orën 9.30 nënsekretarin e Shtetit Grosman do ta presë Preisenti i Kosovës Ibrahim Rugova.

 

Ndërkaq gatë ditës Grosman do të takohet me përfaqësuesit e tjerë të institucioneve të Kosovës dhe ato ndërkombëtare.

Nënsekretari Grosman herën e fundit ka qëndruar në Kosovë më 5 nëntor të vitit të shkuar, kur edhe ka lansuar afatizimin e standardeve para statusit, duke përcaktuar mesin e fitit 2005 si kohën kur duhet përmbushur standardet në mënyrë që të fillojë përcaktimi i statusit përfundimtar të Kosovës.

 

 

Në Prishtinë ka mbërritur edhe komandanti i NATO-s për Evropën Jugore, gjenerali Gregori Xhonson

 

Prishtinë, 29 mars 2004 - Në Prishtinë ka mbërritur mbrëmë edhe komandanti i NATO-s për Evropën Jugore, gjenerali Gregori Xhonson. Ai me këtë rast ka thënë se qëllimi i vizitës së tij është të punojë me intensitet në sanimin e gjendjes dhe mendon se në këtë ka një mundësi të mirë që të gjithë të punojë së bashku.

 

 

Podujevë: Tre zyrtarë të LDK-së kërcënohen me vdekje

 

Podujevë, 29 mars 2004 - Njoftohet se dje në oborrin e shtëpisë së anëtarit të Kryesisë së LDK-së në Podujevë dhe drejtor i Drejtorisë për Marrëdhënie me Publikun dhe Demokratizim Ahmet Ahmetit, janë gjetur tri letra kërcënuese.

Këto letra kërcënuese janë të shkruara me dorë dhe u janë adresuar sekretarit të Degës së LDK-së dhe zv/kryetar i komunës së Podujevës Agim Kikaj, drejtorit të DMPD-së Ahmet Ahmeti dhe kordinatorit për shëndetësi Liman Zeqirit, të dy anëtarë të Kryesisë së LDK-së në Podujevë.

Letrat kërcënuese kërkojnë nga tre anëtarët e kryesisë që të largohen sa më shpejt nga të gjitha funksionet politike dhe nga LDK-ja dhe atë publikisht, ngase kërcënuesit do të ndërmarrin masa deri në vrasje.

Në këto letra akuzohet treshja e LDK-së në Podujevë që gjoja po dëmton veprimtarinë për bashkimin kombëtar, po dëmtojnë politikën e çështjes kombëtare, thuhet në këto letra, të nënshkruara nga AKSH-SHIK.

Kryetari i Degës së LDK-së dhe kryetar i komunës së Podujevës Agim Veliu si dhe zv/kryetari Agim Kikaj në korrik të vitit të kaluar kanë marrë kërcënime anonime në telefonat celularë po nga kërcënuesi i njëjtë - AKSH.

 

 

Ushtarët e KFOR-it francezë kanë liruar urën për kalim për banorët e tre rrokaqiejve në Mitrovicë

 

Mitrovicë, 29 mars 2004 - Ushtarët e KFOR-it francezë kanë liruar urën për kalim për banorët e tre rrokaqiejve në Mitrovicë. Sipas zyrtarëve të policisë ura do të jetë e lirë për kalim që nga ora shtatë të mëngjesit deri në orën 19.00.

Banorët shqptarë të tre rrokaqiejve nuk kanë mundur të kalojnë në këtë urë që pas trazirave të 17 marsi në Mitrovicë. Mirëpo lëvizja e qytetarëve bëhet me përcjelljen e ushtarëve të KFOR-it.

 

 

Në Prishtinë përfundoi punimet konferenca triditore për transformimin e arsimit në Kosovë

 

Prishtinë, 29 mars 2004 - Pas hartimit të planit strategjik të zhvillimit të arsimit nga Ministria e Arsimit, Shkencës dhe Teknologjisë dje pasdite në Prishtinë përfundoi punimet konferenca triditore për transformimin e arsimit në Kosovë.

Dy prej temave kryesore në këtë konferencë ishin organizimi i rrjetit shkollor dhe arsimit profesional.

 

Në përfundim të konferencës, ministri i Arsimit, Rexhep Osmani tha se të gjithë ata që shfaqin mendime për ndryshimin e procesit mësimor, duhet të jenë të vetëdijshëm se vendi ku përgatiten njerëzit është shkolla. Ai shtoi se shkolla duhet të reformohet për të pasur një shoqëri të transformuar moderne dhe demokratike.

 

 

Zëdhënësi i UNMIK-ut thotë qytetarët e Kosovës nuk do të lejojnë që keqbërësit të ndryshojnë shoqërinë

 

Prishtinë, 29 mars 2004 - Zëdhënësi i UNMIK-ut Sunil Narula ka thënë se pavarësisht nga ngjarjet e fundit, qytetarët e Kosovës nuk do të lejojnë që keqbërësit të ndryshojnë shoqërinë ku do të mbretëronte paqja dhe siguria çfarë synohet të arrihet nëpërmjet standardeve. Ai shtoi se procesi i standardeve gjithësesi do të vazhdojë.

"Ne, UNMIK-u dhe institucionet e Kosovës, po përpiqemi të ndërtojmë një shoqëri të qytetëruar dhe kriminelët nuk mund të jenë pjesë e saj. Standardet, pavarësisht çka ka ndodhur, janë më të rëndësishme se çdo gjë tjetër dhe ne mbesim të përkushtuar në këtë proces", tha zëdhënësi i UNMIK-ut Sunil Narula.

 

 

Policia vazhdon aksionin e arrestimeve të të dyshimtëve në protestat e dhunshme të javës së kaluar

 

Prishtinë, 29 mars 2004 - Policia vazhdon aksionin e arrestimeve të të dyshimtëve në protestat e dhunshme të javës së kaluar. Njoftohet se deri më tass janë arrestuar rreth 200 persona të dyshimtë për vrasje dhe shkatërrime.
Zëdhënësi Neraj Sing ka thënë se ndaj një numri të arrestuarve do të niset procedimi penal.

 

Ndonëse akuzat tash për tash nuk janë përcaktuar, por sipas zëdhënësit të UNMIK-ut të arrestuarit mund të akuzohen për prishje të rendit publik, për vrasje, tentativë për vrasje, grabitje apo vjedhje.

 

 

Pas rebelimit të të burgosurve gjendja në burgun e Dubravës raportohet e qetë

 

Istog-Dubravë, 29 mars 2004 - Gjendja në burgun e Dubravës pas barrikadimit të 62 të burgosurve në pavijonin e pranimit dje ishte e qetë dhe nën kontrollin e plotë të autoriteteve.

 

Zyrtarët e policisë ndërkombëtare theksojnë se rebelimi i të burgosurve ka shpërthyer pardje pas dite, kur njëri prej të burgosurve të mitur kishte në dorë një granatë dhe ka mbajtur peng për disa orë dy burgosur të tjerë në njërin nga pavijonet të këtij burg.

 

Ai ka kërkuar përmirësimin e kushteve në burg, por pas negociatave disaorësh i është dorëzuar policisë. Si pasojë e rebelimit të të burgosurve një polic ndërkombëtar ka pësuar lëndime të lehta trupore, si dhe janë demoluar pjesërisht objektet e pavijonit të pranimit në këtë burg.

Zyrtarët e administratës ndërkombëtare në Kosovë nuk mund ta shpjegojnë faktin e pranisë së granatës së dorës në mesin e të burgosurve. Zëdhënësi i UNMIK-ut thotë se tashmë kanë filluar hetimet lidhur me këtë incident për t'i hetuar rrethanat se si është sjell granata e dorës në burg kur dihet se burgu i Dubravës cilësohet si burg me nivel të lartë të sigurisë.

 

 

Statitistikat e Bankës Botërore tregojnë se në Kosovë 50 për qind e popullatës jetojnë në varfëri

 

Prishtinë, 29 mars 2004 - Gjatë këtyre viteve varfëria në Kosovë është shtuar për pesë apo gjashtë për qind, ka thënë ministri i Punës dhe i Mirëqenies Sociale Ahmet Isufi. Ai ka tërhequr vërejtjen se ngritja e përqindjes së varfërisë mund të jetë e rrezikshme dhe mund të pasojë me protesta sociale.

"Statitistikat e vitit 2001 të Bankës Botërore tregojnë se në Kosovë 50 për qind e popullatës jetojnë në varfëri", thotë Idriz Gashi përgjegjës për marrëdhënie me media i Komitetit Ndërkombëtar i Kryqit të Kuq.

 

 

Karate: U mbajt Kampionati i Kosovës në nëntë kategori

 

Pejë, 29 mars 2004 - Në organizim të Federatës së Karatesë të Kosovës, në Pallatin e sporteve "Karagaç" në Pejë u mbajt Kampionati i karatesë në kategori i Kosovës, në të cilin morën pjesë 66 garues nga dhjetë klube kosovare.
Pas dueleve interesante, të cilat u përcollën nga referimi korrekt, u shpallën kapionët e Kosovës në nëntë kategori për vitin 2004.

 

Përshtypjet më të mira i lanë karateistët e Klubit të karatesë "Iliria" nga Prishtina, të cilët i fituan 17 madalje: 5 të arta, 4 të argjendta dhe 8 të bronzta dhe ata të Klubit të karatesë "Ippon" nga Peja, të cilët i fituan 3 medalje të arta, 2 të argjendta dhe 3 të brozta.

 

Në këtë mes duhet veçuar sportistët e rinj: Ermira Statovci, Besart Vitia, Flamur Thaçi të KK "Iliria" dhe Agon Agani i "Ipponit" të Pejës, të cilët sivjet për herë të parë morën pjesë në kampionatin e Kosovës në kategori në konkurrencën e seniorëve.

 

Përfundimi i dueleve dha këtë renditje tabelare:

Femrat:

-53 kg:

1.Fatmire Rexhepi-Iliria

2.Kaltrina Krasniqi-Vajzat e Dardanisë

3.Bleta Smajli-Ippon Pejë

3.Besa Bajgora-Iliria

 

-60 kg:

1.Shqipe Zogiani-Vajzat e Dardanisë

2.Kaltrina Smajli-Ippon Pejë

3.Valbona Neziri-Iliria

3.Ardiana Rexhepi-Iliria

+60 kg:

1.Ermira Statovci-Iliria

2.Florentina Gashi-Vajzat e Dardanisë

3.Valmira Jupolli-Vajzat e Dardanisë

3.Marigona Beadini-Iliria

Meshkujt:

-60 kg

1.Flamur Thaqi-Iliria

2.Fixhri Makolli-Iliria

3.Rexhep Haliti-Rinia-Sekiraçë

3.Besnik Panxha-Ippon Pejë

-65 kg:

1.Valon Çelaj-Ippon Pejë

2.Besim Ilazi-Iliria

3.Naim Arifi-Iliria

3.Hajdin Salihu-Sharri H.Elezit

-70 kg:

1.Besart Vitia-Iliria

2.Blerim Osmani-Rinia Sekiraçë

3.Irfan Suma-Sharri H.Elezit

3.Faruk Kadriu-Besa Cola

-75 kg:

1.Agon Agani-Ippon Pejë

2.Ardian Muhadri-Iliria

3.Fidan Bahtiri-Ippon Prishtinë

3.Daluk Haliti-Iliria

-80 kg:

1.Egzon Agani-Ippon Pejë

2.Asdren Myrtaj-Iliria

3.Ejup Ahmeti-Fituesi

3.Skender Zeqiri-Iliria

+80 kg:

1.Feim Hasani-Iliria

2.Demush Shasha-Ipponi Pejë

3.Flamur Shasha-Ippon Pejë

3.Naim Duraku-Iliria

 

 

Tre anëtarët e Grupit të Kontaktit vizitojnë sot Beogradin për të biseduar për Kosovën

 

Beograd, 29 mars 2004 - Drejtorët e drejtorive të Gjermanisë, Francës dhe Italisë shkojnë sot në Beograd për të biseduar me krerët e Serbisë për gjendjen në Kosovë. Gjermania, Franca dhe Italia janë anëtare të Grupit të Kontatktit, një forum joformal i gjashtë vendeve kryesore të botës i formuar gjatë krizës në Jugosllavi.

 

 

Në një shpërthim në Uzbekistan janë vrarë 2 persona dhe 20 të tjerë janë plagosur

 

Tashkent, 29 mars 2004 - Dy persona janë vrarë sot (e hënë) dhe 20 të tjerë janë plagosur kur një shpërthim, të cilin auitoritetet e kanë quajtur "akt terrorist", në kryeqytetin e Uzbekistanit, ka bërë të ditur policia, njofton Rojter. Zëdhënësi i Ministrisë së Jashtme ka thënë se shpërthimi është një nga aktet terroriste, që kanë ndodhur disa herë kohëve të fundit.

 

 

Një gjykatë e Lituanisë ka dënuar yllin e rokut francez me 8 vjet burg për vrasjen mikes së tij

 

Vilnius, Lituani, 29 mars 2004 - Një gjykatë e Lituanisë ka dënuar yllin e rokut francez me tetë vjet burg për vrsjen mikes së tij aktore gjatë një grindjeje, njofton BBCnews. Bertran Kantat, 40-vjeçar, është akuzuar se e ka rrahur artisten Mari Trintinjan, 41-vjeçare, në vitin e kaluar në një dhomë të hotelit në Vilnius.

 

Kantat ka pranuar vrasjen e znj. Trintinjan, por ka thënë se ka qenë një aksident. Nuk dihet nëse Kantat do të vuajë burgun në Francë apo në Lituani.

 

 

Qeveria Kongos ka arrestuar të pakten 15 persona pas grushtetit të dështuar

 

Kinshasa, 29 mars 2004 - Qeveria e Republikës së Kongos ka thënë se ka arrestuar të pakten 15 persona pas grushtetit të dështuar në kryeqytetin Kinshasa, njofton BBCnews. Personat në fjalë, disa syresh të plagosur, janë ekspozuar para gazetarëve në një konferencë shtypi.

 

Pas sulmeve të puçistëve në bazat ushtarake dhe në stacionin televiziv, policia kuifitare është vënë në gjendje të lartë alarmi. Zyrtarët kanë thënë se prapa sulmeve qendrojnë pjesëtarët e ish-gardës së diktatorit Mobutu Sese Seko.

 

 

Një ministre irakiane i shpëton atentatit, vriten një civil britanik dhe një civil kanadian

 

Bagdad, 29 mars 2004 - Guerilët irakianë kanë vrarë dje një civil britanik dhe një civil kanadian, kurse sot (e hënë) kanë sulmuar në pritë një autokolonë, që transportonte ministren e Shërbimeve Publike afër qytetit irakian Mosul, njofton Rojter.

 

Zyrtarët e policisë dhe të spitalit kanë thënë se tre truproje të ministres janë vrarë dhe katër të tjerë janë plagosur në këtë atentat kundër ministres Nesrin Barvari. Ajo po kthehej në Mosul nga zonat veriore të Kurdistanit. Z. Barvari ka shpëtuar e palënduar.

Dëshmitarët kanë thënë se civilët britanik dhe kanadian janë sulmuar në pritë derisa po shkonin në punë në Mosul. Zyrtarët btritanik dhe kanadian kanë konfirmuar nacionalitetin e viktimave.

 

 

Kryeministri izraelit mund të akuzohet për korrupsion

 

Tel Aviv, 29 mars 2004 - Prokurori i Përgjithshëm i Izraelit pritet të vendosë brënda disa javësh në se kundër kryeministrit Ariel Sharon, do të ngrihen zyrtarisht akuza për korrupsion.

Dje, prokurori shtetror Edna Arbel i paraqiti një projekt-padi prokurorit të përgjithshëm, Meni Mazuz dhe rekomandoi që kryeministri të përballet me akuzat.

Çështja për ryshfet përqendrohet te akuzat se në vitin 1991 djalit të zotit Sharon, Gilad, i cili në atë kohë shërbente si ministër i jashtëm, i ishin paguar qindra mijëra dollarë për ndihmën në përpjekjet për të caktuar një zonë të territorit izraelit për një projekt grek turizmi. Sharon ka mohuar në mënyrë të përsëritur të ketë kryer ndonjë shkelje.

 

 

Komisioni që heton sulmet e 11 shtatorit vazhdon punën në një atomosferë polemikash

 

Uashington, 29 mars 2004 - Hetimet ishin tema e ditës, ndërkohë që rrjetet kryesore televizive u përqëndruan në konfliktet ndërmjet administratës së presidentit Bush dhe ish-bashkërenduesit të presidentit për përpjekjet anti-terroriste, Riçard Klark.

Në një libër të tij të ri si dhe në një seancë publike para komisionit ai ngriti akuza se administrata e presidentit Bush nuk i kushtoi vëmendje të mjaftueshme kërcënimit terrorist para sulmeve të 11 shtatorit, pjesërisht pasi ishte e fiksuar tek Iraku.

Administrata e presidentit Bush vazhdoi kundërpërgjigjen, duke dërguar Sekretarin e Mbrojtjes Donald Ramsfeld për të paraqitur argumentat e tyre në një numër intervistash, përfshirë edhe një intervistë me rrjetin televiziv Fox News.

 

 

Pakistan: Esktremistët myslimanë lirojnë pengjet

 

Islamabad, 29 mars 2004 - Në Pakistan, ekstremistët myslimanë po lirojnë pengjet dhe forcat qeveritare po tërhiqen, duke i dhënë fund një operacioni 12 ditësh në afërsi të kufirit me Afganistanin.

Zyrtarë ushtarakë pakistanezë thanë sot se të dyshuarit si ekstremistë të al-Kaidës dhe simpatizantët e tyre vendorë kanë liruar 11 ushtarë të kapur që nga fillimi i luftimeve më 16 mars. Sipas njoftimeve, ushtari i 12-të iku mbrëmë nga vendi ku mbahej peng.

 

 

Humbje e partisë së Shirakut

 

Paris, 29 mars 2004 - Partia e krahut të djathtë në qeveri e presidentit francez, Zhak Shirak, ka përjetuar humbje të thellë në raundin e dytë dhe përfundimtar të zgjedhjeve rajonale.

Opozita e majtë ka vënë kontrollin në pothuaj të gjitha rajonet, pas fitores me më shumë se gjysmën e votave, në krahasim me tridhjetë e shtatë për qind të votave për qeverinë.

E djathta ekstreme Fronti Kombëtar mori rreth trembëdhjetë përqind të votave.

Socialistët morën më shumë se pesëdhjetë përqind të votave duke i lënë partisë së Shirakut përgjegjësinë për vetëm një nga njëzet e gjashtë këshillat rajonale.

 

 

Plani i ri i Ananit për Qipron

 

Nju Jork, 29 mars 2004 - Sekretari i përgjithshëm i OKB-së, Kofi Annan, pritet që t'ua paraqesë planin e plotësuar të OKB-së për bashkimin e Qipros, udhëheqësve të grekëve qipriotë dhe atyre turq, në bisedimet që pritet të zhvillohen sot (e hënë) në Zvicër.

Sipas BBC-së, është pritur gjatë dhe janë bërë ndryshime të shumta duke e bërë kështu një dokument prej mijëra faqesh, por udhëheqësit e bashkësive greke dhe turke duhet që brenda tre ditësh të pajtohen me propozimet e hollësishme të zotit Annan për bashkimin e Qipros.

Pas kësaj nuk do të ketë ndryshime të mëtejme dhe të gjitha palët duhet të pajtohen për t'ia paraqitur planin popullit të Qipros, në një votim të thjeshtë referendumi në muajin prill.

 

 

Në qytetin Mosul janë vrarë 4 kryengritës irakianë

 

Bagdad, 29 mars 2004 - Ushtarët amerikanë kanë shtënë me armë zjarri dhe kanë vrarë sot (e hënë) në qytetin verior Mosul katër kryengritës të dyshimtë të përzier në sulmet në rajon, ka bërë të ditur ushtria, njofton AP.

 

Gjatë luftimeve janë plagosur dy ushtarë amerikanë. Incidenti ka ndodhur vetëm disa orë pas atentatit të dështuar në ministren kurde në Qeverinë e Bagdadit.

 

 

Në Napoli mafia ka vrarë me armë zjarri një vajzë 14-vjeçare

 

Napoli, 29 mars 2004 - Një vajzë 14-vjeçare është qëlluar me armë zjarri në kokë dhe kështu është vrarë sot (e hënë) pasi ishte rrëmbyer nga mafia në një pritë në qytetin italian, Napoli, njofton BBCnews. Analiza Durante, siç quhej vajza, po bisedonte me një kushërirë afër shtëpisë së saj. Mendohet se në shënjestër të vrasësve ka qenë anëtarëja e familjes së klanit që kontrollon rajonin.

 

 

Stuhia e fuqishme në Brazil ka shkaktuar vdekjen e dy personave

 

Rio de Zheneiro, 29 mars 2004 - Stuhia e fuqishme, që ka përfshirë bregdetin jugor të Brazilit ka shkatërruar mijëra shtëpi, ka shkaktuar vdekjen e dy personave dhe ka tmerruar banorët, të cilët nuk kishin përjetuar një stuhi kaq të fuqishme asnjëherë në jetën e tyre, njofton AP.

 

Stuhia ka përfshirë që prej djeshit brigjet e Shën Katarinës dhe të Rio Grandes me shira dhe erëra të fuqishme dhe pastaj është zgjeruar ehhe në pjesët tokësore.

 

 

Vdiq aktori britanik, Piter Ustinov

 

Gjenevë, 29 mars 2004 - Aktori britanik, Piter Ustinov, ka vdekur në shtëpinë e tij në Zvicër në moshën 82-vjeçare, kanë bërë të ditur miqtë e tij, njofton AFP. Ustinov ka vdekur mbrëmë vonë në një klinikë afër qytetit perendimor zviceran, Nion. Aktori britanik ka jetuar tash sa vjet në Zvicër dhe ka qenë ambasador i mirënjohur i UNICEF-it që nga viti 1971.

 

 

Një shef i inteligjencës së rrjetit të Al Kaidës është vrarë gjatë ofensivës kundër militantëve

 

Islamabad, 29 mars 2004 - Një shef i inteligjencës së rrjetit të Al Kaidës së Osama bin Ladenit është vrarë gjatë ofensivës 12-ditëshe kundër militantëve përgjatë kufirit afgan, ka bërë të ditur sot (e hënë) armata pakistaneze, njofton Rojter. Zëdhënësi i armatës pakistaneze e ka identifikuar të vrarin si "z. Abdullah". Gjatë kësaj ofensive janë vrarë mbi 100 njerëz në rajonin e Vaziristanit jugor, ka thënë ai.

 

 

Trupat amerikane në Afganistan kanë vrarë një sulmues vetëvrasës me autobombë

 

Xhalalabad, 29 mars 2004 - B Trupat amerikane në Afganistan kanë vrarë sot (e hënë) një sulmues të dyshimtë vetëvrasës, pasi ai kishte depërtuar me autotaksinë e tij të ngarkuar me mjete shpërthyese në një autokolonë ushtarake amerikane, kanë bërë të ditur dëshmitarët, njofton Rojter.

 

Sulmuesi kishte dalë nga makina me armë në dorë dhe është qëlluar pasi kishte përplasur atë në autokolonë që gati po hynte në bazën ushtarake amerikane në qytetin liindor Xhalalabad. Lëndët shpërthyese nuk kishin shpërthyer për shkak të ndonjë defekti teknik. Ushtria amerikane ka konfirmuar sulmin e dështuar dhe vrasjen e sulmuesit vetëvrasës.

  |  KULTURË  |  HISTORI  |   POLITIKË  |  OPINIONE  |  ADRESARI  |  ARKIVI  |