Pesë millionë €uro të tërmetit të 24 prillit 2002 ende nuk janë shpërndarë

Pesë millionë €uro të tërmetit të 24 prillit 2002 ende nuk janë shpërndarë

Gjilan, 29 mars 2004 / TN / Ilmi MUSLIU - Pesë millionë €uro, të cilat iu ndanë komunave Gjilan, Viti dhe Kamenicë për t’i sanuar pjesërisht dëmet që ua shkaktoi tërmeti i 24 prillit të vitit 2002 , ende nuk janë ndarë.

Shkaku kryesor i mosshpërndarjes është vonesa në realizimin e vendimit të Kuvendit të Kosovës për bartjen e këtyre mjeteve në kontot e këtyre komunave, prej organeve kompetente dhe të një procedure të ndërlikuar e cila, fatmirësisht u tejkalua në nëntor të vitit 2003, në një kohë bukur të papërshtatshme për shfrytëzimin e tyre, ngase mbyllja e viti fiskal ishte shumë afër.

Mjetet, ndërkohë u zotuan nga komunat gjegjëse me mirëkuptimin e Ministrisë për Ekonomi dhe Financa si dhe u bë ndarja e tyre për tri komunat në fjalë.

Komunës së Gjilanit, nga kjo shumë iu ndanë 3 milionë e 700 mijë €uro, nga të cilat, 1 milion e 250 mijë €uro u dedikuan për sanimin e pasojave në objektet private.

Kuvendi i Komunës, në seancën e fundit të dhjetorit, formoi Komisionin për verifikimin e dëmeve të tërmetit, i cili pritet që këto ditë të del me listën përfundimtare të përfituesve pasi më parë të bëhet shqyrtimi i saj në Komitetin për Pronë, Banim dhe Rindërtim si dhe më pastaj në Grupin implementues, ku bëjnë pjesë udhëheqja komunale dhe përfaqësuesi I UNMIK-ut.

Kjo listë e përfituesve do të ishte publikuar deri më tash sikur në ndërkohë të mos ushtroheshin edhe 156 ankesa të cilat komisioni gjegjës i ka në shqyrtim.

Në anën tjetër që përfituesit të mos presin edhe më gjatë rreth këtyre mjeteve, Kuvendi i komunës, kohë më parë pati shpallur tenderin për material ndërtimor që do t’ju jepet përfituesve, tender ky që është mbyllur dhe pritet gjithashtu që këto ditë të shpallet edhe firma fituese.

Nga gjithsejt 11 firma konkuruese, vetëm dy nga to vazhdojnë garën, ngase i kanë përmbushur të gjitha kushtet që kërkohen sipas tenderit. Komisioni për vlerësimin e këtij tenderi ende nuk e ka thënë fjalën përfundimtare.

Pronarët e dëmtuar nga tërmeti do të përfitojnë prej 1000 deri në 4000 € por në vlerë të materialit ndërtimor. Kryekëput, përfitues do të jenë personat, objektet e të cilëve kanë qenë më të dëmtuarat si dhe nuk kanë pasur mundësi t’i riparojnë. Përparësitë do të përcaktohen sipas gjendjes ekonomike.

Natyrisht do të merren parasysh familjet në asistencë sociale si dhe ato familje që rrisin jetimë. Të gjitha shpjegimet tjera rreth këtyre mjeteve janë të pavërteta.