Përmbajtja:

• Këshilli i Sigurimit ka dënuar mbrëmë vrasjen e dy policëve në Kosovë

• Janë arrestuar katër persona të dyshuar për vrasjen e policëve afrë Podujevës

• Në Krasniqe të Vushtrrisë u varros oficeri i SHPK-së Arsim Rustolli

• Incident në Bellopojë të Pejës

• Gjukanoviq me zyrtarët serbë bisedon për shpërbërjen e Unionit Serbi-Mali i Zi

• Filloi meremetimi i banesave të serbëve në Prishtinë, për të cilat qeveria ka dhënë 75 mijë euro

• Gjenerali Xhons thotë se bota duhet të merret me statusin përfundimtar të Kosovës

• Presidentit francez thotë se situata në Kosovë sot paraqitet dramatike

• Presidenca irlandeze po punon që të mos ndryshohet Rezoluta 1244

• UNMIK-u dhe institucionet e Kosovës reagojnë ndaj rezolutës së parlamentit të Serbisë

• Solana do të dërgojë në Kosovë përfaqësuesin e tij special

• Bleri i dërgoi një letër mbështetëse kryeministrit Rexhepi

• Spahija u takua me udhëheqës të Degës së LDK-së në Gjermani

• Shqipëria ka propozuar ngritjen e një qendre rajonale të Ballkanit për të goditur krimin e organizuar

• Rreth 100 ushtarë amerikanë nga Kosova u kthyen në bazat e tyre në Bosnje

• Policia bastisi zyrat e Komitetit të Helsinkit në Beograd dhe konfiskoi librin "Sekreti ushtarak"

• Ndihma për rindërtimin e objekteve fetare në Kosovë

• Vdiq Branko Bullatoviq

• Izraelitët vranë sot një fëmijë shtatëvjeçar palestinez

• Gjatë votimeve në Nigeri dhuna mori jetën e mbi 20 njerëzve

• Të paktën 13 veta u vranë në dy përleshje në Irak

• Militantët e Al Kaidës kanë ekzekutuar 8 ushtarë pakkistanezë

• Në qendër të Bagdadit ka shpërthyer një bombë dhe ka plagosur një udhëtar

• Bush takohet me Sharonin, Mubarakun dhe mbretin Abdullah

• BE premton marrëveshje për kushtetutën

Këshilli i Sigurimit ka dënuar mbrëmë vrasjen e dy policëve në Kosovë

 

Nju Jork, 27 mars 2004 - Këshilli i Sigurimit të Kombeve të Bashkuara ka dënuar mbrëmë vrasjen e dy policëve në Kosovë, një vendor dhe një tjetër ndërkombëtar.

 

Anëtarët e Këshillit kanë ritheksuar se kurrfarë sulmi mbi bashkësinë ndërkombëtare dhe forcat policore në Kosovë nuk mund të tolerehet, theksohet në një komunikatë të KS, dhe kërkohet që përgjegjësit për këto vrasje të nxirren para drejtësisë.

Më herët edhe sekretari i përgjithshëm i OKB-së Kofi Anan ka dënuar ashpër vrasjen e këtyre dy policëve në Kosovë.

 

 

Janë arrestuar katër persona të dyshuar për vrasjen e policëve afrë Podujevës

 

Prishtinë, 27 mars 2004 - Zyrtarët e policisë ndërkombëtare njoftuan se kanë arrestuar katër persona të dyshuar të jenë të përfshirë në vrasjen e policëve në magjistralen Prishtinë - Podujevë në fillim të kësaj jave.

"Shumë prova tregojnë se këta persona të arrestuar janë të përfshirë në vrasje", ka thënë zëdhënësi i policisë ndërkombëtare Neraj Sing, mirëpo përgjegjësia e të arrestuarve, shtoi ai, nuk mund të konfirmohet për faktin që hetimet janë duke vazhduar.

 

 

Në Krasniqe të Vushtrrisë u varros oficeri i SHPK-së Arsim Rustolli

 

Vushtrri, 27 mars 2004 - Me nderime të larta në fshatin Krasniqe të Vushtrrisë u varros oficeri i Shërbimit Policor të Kosovës Arsim Rustolli, i cili tri ditë më parë u vra në krye të detyrës në afërsi të Podujevës. Në ceremoninë e varrimit morën pjesë përfaqësues të institucioneve vendore dhe ndërkombëtare, pjesëtarë të SHPK-së dhe shumë qytetarë.

 

 

Incident në Bellopojë të Pejës

 

Pejë, 27 mars 2004 - Në Bellopojë të Pejës ka ndodhur dje një incident i vogël, ku disa persona kanë vënë një mjet shpërthyes në një shtëpi të këtij lokaliteti. Trupat paqeruajtëse kanë hetuar këtë veprim dhe janë përgjigjur me zjarr, mirëpo nuk njoftohet të ketë pasur të plagosur apo të arrestuar në këtë incident.

 

 

Gjukanoviq me zyrtarët serbë bisedon për shpërbërjen e Unionit Serbi-Mali i Zi

 

Londër, 27 mars 2004 - Gazeta britanike "Fajnenshëll tajms" shkruan në numrin e sotëm se kryeministri malazez Milo Gjukanoviq me zyrtarët serbë i ka filluar bisedimet për shpërbërjen e mundshme të Unionit Serbi-Mali i Zi.

Sipas gazetës në fjalë diplomatët konsiderojnë se kjo nimsë do t'i jepte një grusht të rëndë shpresave të Bashkimit Evropian që në rojonin e Ballkanit të nxitet integrimi ekonomik dhe politik.

"Fajnenshëll tajms" thekson se ekziston rreziku që shpërbërja e Serbisë dhe e Malit të Zi të nxitë tendenca secesioniste në Kosovë, si dhe në Bosnjë e Hercegovinë.

 

 

Filloi meremetimi i banesave të serbëve në Prishtinë, për të cilat qeveria ka dhënë 75 mijë euro

 

Prishtinë, 27 mars 2004 - Sot në lagjen Ulpiana të Prishtinës filloi meremtimi i apartamenteve të serbëve të cilat u dëmtuan gjatë traziarve të javës së kaluar. Për këtë qëllim Qeveria e Kosovës ka dhënë 75 mijë euro të cilat do të përdoren për meremetimin e tyre.

 

Po sot kryeministtri Bajram Rxhepi dhe ndihmëskryeadministratori Françeko Bastali vizituan këtë lagje ku ka filluar meremetimi i banesave të serbëve.

 

 

Gjenerali Xhons thotë se bota duhet të merret me statusin përfundimtar të Kosovës

 

Uashington, 27 mars 2004 - Komandanti i Komandës amerikane në Evropë, gjenerali Xhejms Xhons ka deklaruar dje në Uashington se shpërthimi i dhunës ndëretnike këtë muaj është dëshmi se bota duhet të merret me statusin përfundimtar të Kosovës, pasi sulmet ajrore të NATO-s i dhanë fund shtypjes serbe ndaj lëvizjes për pavarësi të shumicës shqiptare më 1999.

 

Gjenerali Xhons ka thënë se është evidente që ekzistojnë shkaqe për pakënaqësi etnike në Kosovë.

 

 

Presidentit francez thotë se situata në Kosovë sot paraqitet dramatike

 

Bruksel, 27 mars 2004 - Presidenti francez Zhak Shirak ka deklaruar se situata në Kosovë sot paraqitet dramatike. Në rrethana të tilla është prioritare të qetësohet situata dhe jo t'i vëhet benzinë zjarrit, tha Shirak.

 

Ai shtoi se Franca po ndihmon në qetësimin e situatës, duke dërguar në Kosovë edhe trupa shtesë, duke ruajtur gjakftohtësinë e nevojshme dhe pa u ndikuar nga pasionet do të shikojë se çfarë duhet të bëhet pa u nxituar të japë tani ndonjë mendim mbi statusin përfundimtar të Kosovës, ka thënë presidenti Shirak.

 

 

Presidenca irlandeze po punon që të mos ndryshohet Rezoluta 1244

 

Bruksel, 27 mars 2004 - Ministri i jashtëm i Irlandës, Brajan Koen, vendi i të cilit kryeson Bashkimin Evropian, ka thënë se kryetarët e qeverive në samitin e djeshëm kanë diskutuar rreth ngjarjeve të fundit në Kosovë dhe mbi mënyrat se si mund të forcojnë bashkëpunimin me OKB-në për të përcaktuar përgjegjësitë që rrjedhin nga këto zhvillime.

 

Ai tha se ngjarjet e fundit "na detyrojnë që të dyfishojmë përpjekjet që standardet evropiane të jenë parakusht për çdo zhvillim të mëtutjeshëm".

 

Koen tha se presidenca irlandeze është duke punuar në këtë aspekt në mënyrë që Rezoluta 1244 e OKB-së si dhe politika e BE-së e standardeve para statusit të mos ndryshojë. "Duhet të vazhdojmë të punojmë që këto shpërthime në zona të ndryshme t'i kemi nën kontrollë në mënyrë që t'i ruajmë vlerat demokratike evropiane", deklaroi ministri i jashtëm irlandez, Koen.

 

 

UNMIK-u dhe institucionet e Kosovës reagojnë ndaj rezolutës së parlamentit të Serbisë

 

Prishtinë, 27 mars 2004 - UNMIK-u dhe institucionet e Kosovës e cilësuan si të paqëndrueshme Rezolutën për Kosovën, të miratuar nga Parlamenti i Serbisë. Zyrtarët e UNMIK-ut i hodhën poshtë kritikat e këtij Parlamenti, duke nënvizuar se përkushtimi për ndërtimin e një Kosove paqësore e demokratike nuk do të pengohet nga aktet e dhunës që përshkuan trazirat e javës së shkuar.

 

Zëdhënësi i këtij Misioni Sunil Narula tha se përparësi e UNMIK-ut dhe forcave paqëruajtëse të udhëhequra nga NATO-ja është rivendosja e rendit e ligjit, stabilizimi i gjendjes dhe vënia para drejtësisë e autorëve të akteve të dhunës. Ai tha se UNMIK-u mbetet i përkushtuar për krijimin e shoqërisë shumetnike, demokratike e tolerante në Kosovë.

Muhamet Hamiti, zëdhënës i Presidentit të Kosovës, tha se Kosova është tërësi e mëvetësishme me kufij të garantuar prandaj Rezoluta e Parlamentit të Serbsië është e pavlefshme. "Entitetet apo autonomitë territoriale, janë vetëm fjalë të tjera për ndarjen e Kosovës, që nuk do të ndodhë assesi. Rezolutat si kjo e Parlamentit të Serbisë apo deklaratat e (Vojislav) Koshtunicës nuk çojnë peshë në rrafshin kushtetues, por shtojnë tensionet politike e etnike në vendin tonë që sic po shihet është synim i Beogradit", thotë zoti Hamiti.

Qeveria e Kosovës vlerëson se Rezoluta e Parlamentit të Serbisë është një hap tjetër i dëmshmën i cili nuk i kontribuon qetësimit të situatës në Kosovë. Zëdhënësja e qeverisë Mimoza Kusari tha se "kjo rezolutë nxit përshkallzim të mëtutjeshëm të gjendjes dhe e thellon hendekun ndërmjet komuniteteve në Kosovë. Si qeveri e Kosovës e kemi për detyrë t'i rikujtojmë institucionet e Serbisë, se ato nuk janë kompetente për të propozuar apo vendosur për qytetarët e Kosovës.

 

Tani për tani përparësi e qeverisë së Kosovës është rehabilitimi I dëmeve të shkaktuara gjatë dhunës së javës së kaluar, përmirësimi I komunikimit dhe dialogu ndërmjet institucioneve dhe komunitetit serb në Kosovë me qëllim të gjetjes së zgjidhjeve për cfarëdo shqetësimi legjitim të këtij komuniteti", tha zëdhënësja Kusari.

 

Institucionet e Kosovës pohojnë se qëndrimet e tilla dëshmojnë sërish për ndërhyrjen e Beogradit në punët e Kosovës dhe ndikimin e tyre ndaj pakicës serbe duke e penguar këisoji procesin e integrimit të tyre në institucionet dhe jetën politike e publike në Kosovë.

 

 

Solana do të dërgojë në Kosovë përfaqësuesin e tij special

 

Bruksel, 27 mars 2004 - Kryeministri i Luksemburgut Zhan Klod Junker ka bërë të ditur se kryetarët dhe ministrat e jashtëm të vendeve anëtare të BE-së kanë rënë në ujdi që Havier Solana të dërgojë përfaqësuesin e tij special në Kosovë, i cili duhet të mendojë për t'u dhënë zgjidhje problemeve të këtushme.

 

 

Bleri i dërgoi një letër mbështetëse kryeministrit Rexhepi

 

Prishtinë, 27 mars 2004 - Kryeministri Rexhepi mori dje një letër përkrahjeje nga kryeministri britanik Toni Bler për angazhimet e tij në stabilizimin e situatës pas ngjarjeve të fundit në Kosovë. Në letër thuhet se dhuna e ditëve të fundit në Kosovë ka qene e tmerrshme për gjithë njerëzit atje dhe i ka përkujtuar botës se paqeja dhe stabiliteti në rajon ende nuk janë të sigurta.

 

"Sikur edhe liderët tjerë ndërkombëtar unë e dënoj dhunën dhe apeloj për paqe", thekson Bler. "Është qenësore që t'i lëmë prapa këto ngjarje dhe të punojmë së bashku drejt një zgjidhjeje të qëndrueshme për të mirën e të gjithë njerëzve të Kosovës", thekson Toni Bler në letrën dërguar kryeministrit Rexhepi.

 

 

Spahija u takua me udhëheqës të Degës së LDK-së në Gjermani

 

Frankfurt, 27 mars 2004 - Faruk Spahija, kryetar i KK të Mitrovicës dhe anëtar i Kryesisë qendrore të LDK-së, i cili ka ditë që po qëndron në Gjermani për disa analizave shëndetësore. Gjatë kohës së qëndrimit të tij në Gjermani ai vazhdimisht po vizitohet nga bashkatdhetarë dhe aktivistë të LDK-së që veprojnë në Gjermani.

Një vizitë atij i bëri edhe një delegacion i Kryesisë së Degës së LDK-së në Gjermani, i udhëhequr nga Hazir Krasniqi, kryetar.

Udhëheqësit e Degës së LDK-së biseduan me Faruk Spahinë për aktivitetet që po i zhvillon kjo degë Në Gjermani.

Gjatë bisedës u konstatua se ishte shumë i arsyeshëm organizimi partiak i shqiptarëve edhe në diasporë, ngase ai ndihmoi në rend të parë institucionet shtetërore, siç ishte Qeveria e Kosovës me ndarjen e mjeteve në shumë prej 3 për qind nga të ardhurat e tyre, pastaj partinë e vet si dhe institucionet tjera të Kosovës dhe të viseve tjera të banuara me shqiptarë.

Faruk Spahija falënderoi delegacionin për vizitën dhe shprehu gatishmërinë që gjatë qëndrimit të tij në Gjermani të ndihmojë aktivitetet e Degës së LDK-së në Gjermani duke marrë pjesë aktive dhe duke i përkrahur ato për aktivitetin e zhvilluar deri më tash dhe atë që do ta zhvillojnë në të ardhmën.

 

Në këtë bisedë, Faruk Spahija nuk arriti t'i fshehë emocionet pas gjendjes së krijuar në Kosovë dhe ndiente keqardhje të madhe që në këto momente të vështira atij i mungoi Mitrovica dhe ai i mungoi Mitrovicës.

 

Mëgjithatë ai shprehu besimin se përkundër ngjarjeve të manifestuara me 17 e 18 mars, në disa komuna të Kosovës, shqiptarët do të dijnë të udhëheqin Kosovën drejt pavarësisë së plotë të saj.

 

 

Shqipëria ka propozuar ngritjen e një qendre rajonale të Ballkanit për të goditur krimin e organizuar

 

Tiranë, 27 mars 2004 - Shqipëria u ka propozuar vendeve të rajonit të Ballkanit ngritjen e një qendre rajonale për kualifikim dhjetëditor që Agjencia amerikane antidrogë DEA ka zhvilluar me ekspertët antidrogë në Tiranë.

 

Është paraparë që policët e këtyre vendeve të kenë dy ose më shumë qendra për të koordinuar veprimet e tyre në parandalimin dhe goditjen e trafikut të drogës si dhe grupeve kriminale të krimit të organizuar në përgjithësi në Ballkan.

 

 

Rreth 100 ushtarë amerikanë nga Kosova u kthyen në bazat e tyre në Bosnje

 

Sarajevë, 27 mars 2004 - Rreth 100 ushtarë amerikanë, të cilët përkohësisht qenë dislokuar në Kosovë gjatë trazirave të fundit janë kthyer dje në bazat e tyre në Bosnje, kanë bërë të ditur zyrtarë të NATO-s që udhëheqin forcën stabilizuese SFOR. Zëdhënësi i SFOR-it ka thënë se kthimi i trupave vërteton përmirësimin e gjendjes në Kosovë, ku rreth 360 ushtarë të SFOR-it ishin dërguar në ndihmë të forcës paqeruajtëse KFOR.

 

 

Policia bastisi zyrat e Komitetit të Helsinkit në Beograd dhe konfiskoi librin "Sekreti ushtarak"

 

Beograd, 27 mars 2004 - Policia e Serbisë ka bastisur zyrat e Komitetit të Helsinkit për të Drejtat e Njeriut në Beograd dhe kanë konfiskuar librin që kjo organizatë ka botuar në të cilin jepen detajet e operacioneve të ish-ushtrisë jugosllave dhe të aksioneve të saj në Kosovë. Sonja Biserko presidente e grupit ka thënë se autori i librit "Sekreti ushtarak", Vlladan Vllajkoviq është mbajtur në arrest që nga 18 marsi.

 

 

Ndihma për rindërtimin e objekteve fetare në Kosovë

 

Tiranë, 27 mars 2004 - Kisha Ortodokse autoqefale e Shqipërisë bëri të ditur dje se ka vendosur të ofrojë një shumë prej 600 mijë dollarësh për restaurimin e një kishe dhe të një xhamie në Kosovë, ose për ndërtimin e një qendre rinore që do të inkurajojë bashkë-ekzistencën paqësore. Kjo shumë do të merret nga fondet që janë mbledhur për ndërtimin e katedrales së Tiranës.

Kryepeshkopi i Tiranës, Durrësit dhe gjithë Shqipërisë, Anastasi, tha se shuma e ofrur do të ndahet në mënyrë të barabartë për të dy komunitetet fetare dhe do të jenë përfaqësuesit e tyre që do të vendosin për cilat objekt do të perdoret financimi.

Djegia e kishave dhe xhamive, sipas kryepeshkopit Anastasi, nuk inkurajon drejtësinë dhe paqen dhe as progresin, përkundrazi rikthen në kohë dhe praktika të cilat lanë Ballkanin në prapambetje, në përçarje dhe tragjedi.

 

 

Vdiq Branko Bullatoviq

 

Beograd, 27 mars 2004 - Sekretari i përgjithshëm i Lidhjes së Futbollit të serbisë e Malit të Zi Branko Bullatoviq ka vdekur mbrëmë në spital nga plagët e rënda në kokë. Kundër tij dje në mesditë ishte bërë një atentat me armë zjarri në qendër të Beogradit.

 

 

Izraelitët vranë sot një fëmijë shtatëvjeçar palestinez

 

Nablus, 27 mars 2004 - Një djalë shtatëvjeçar palestinez është vrarë sot gjatë shkëmbimit të zjarrit midis ushtarëve izraelitë dhe palestinezëve në një kamp refugjatësh në Breguin Perëndimor, kanë bërë të ditur burimet spitalore.

Djaloshi Khaled Valvel ndodhej në shtëpinë e tij në kampin Ballata kur është qëlluar nga një plumb në kokë, thanë mjekët në spitalin Rafidijah në qytetin Nablus.

 

 

Gjatë votimeve në Nigeri dhuna mori jetën e mbi 20 njerëzve

 

Lagos, 27 mars 2004 - Gjatë votimeve lokale, që filluan sot (e shtunë) në Nigeri, ka shpërthyer dhuna, e cila mori jetën e mbi 20 njerëzve, njofton BBCWorld. Përleshjet kanë shpërthyer në qytetin Uase të shtetit qendror Plato ndërmjet ithtarëve të rivalëve politikë, Tarok dhe Hausa Fulani. Mijëra trupa janë shpërndarë para zgjedhjeve në mbarë Nigerinë. Në zgjedhjet e përgjithshme të vjetme kanë humbur jetën mbi 100 njerëz.

 

 

Të paktën 13 veta u vranë në dy përleshje në Irak

 

Bagdad, 27 mars 2004 - Nga dy përleshje në Irak humbën jetën të paktën 13 veta, përfshirë edhe një marins amerikan. Ushtria amerikane njoftoi se marinsi u vra në një betejë me kryengritësit irakianë në qytetin e Falluxhës. Zyrtarë të spitaleve lokale thonë se të paktën një fëmijë ishte mes të vrarëve dhe se disa persona të tjerë u plagosën. Njoftohet se në luftime u vra edhe një kameraman irakian që punonte për rrjetin televiziv amerikan ABC.

Në një përleshje tjetër midis Korpusit Irakian të Mbrojtjes dhe kryengritësve të armatosur në qytetin e lindjes së Sadam Huseinit, Tikrit, u vranë katër paraushtarakë irakianë dhe tre kryengritës.
Ndërkaq, në afërsi të qytetit të Kirkukut, policia lokale njoftoi se nga shpërthimi i një mine u vranë 2 veta dhe u plagosën mbi 10 të tjerë.

 

 

Militantët e Al Kaidës kanë ekzekutuar 8 ushtarë pakkistanezë

 

Vana, Pakistan, 27 mars 2004 - Militantët e Al Kaidës kanë ekzekutuar tetë ushtarë pakkistanezë, të cilët ishin marrë peng afër kufirit afgan, kanë bërë të ditur sot (e shtunë) zyrtarët, njofton Rojter. Ky akt ka ngritur temperaturën e ofensivës kundër radikalëve islamikë. Ushtarët e vrarë janë gjetur në një hendek afër qytetit Vana, kryeqytet i zonës së Varizistanit jugor në territorrin gjysmautonom të fiseve.

 

 

Në qendër të Bagdadit ka shpërthyer një bombë dhe ka plagosur një udhëtar

 

Bagdad, 27 mars 2004 - Një bombë ka shpërthyer sot në mëngjes (e shtunë) në qendër të Bagdadit dhe ka shkatërruar një automjet dhe ka plagosur të pakten një udhëtar, kanë bërë të ditur dëshmitarët, njofton Rojter. Fill pas shpërthimit ka filluar një shkëmbim zjarri i fuqishëm, që ka shkatuar thyerjen e xhamave të shtëpive përreth.

 

 

Bush takohet me Sharonin, Mubarakun dhe mbretin Abdullah

 

Uashington, 27 mars 2004 - Shtëpia e Bardhë ka bërë publike një përpjekje të re të sajën për paqen në Lindjen e Mesme. Kryeministri izraelit, Ariel Sharon, do të vizitojë Uashingtonin për bisedime me Presidentin Bush në 14 prill.

Presidenti po ashtu do të takohet me presidentin e Egjiptit, Mubarak dhe mbretin e Jordanisë, Abdullah. Presidenti do të takohet me udhëheqësin egjiptian, Hosni Mubarak, një nga aleatët më të ngushtë të Uashingtonit në botën arabe në fermën e vet në Teksas në 12 prill.

Dy ditë më pas, kryeministri izraelit, Ariel Sharon, do të vizitojë Uashingtonin, i ndjekur nga mbreti i Jordanisë, Abdullah.

Tema kryesore për diskutime do të jetë plani i Izraelit për t'u tërhequr nga Rripi i Gazës dhe pjesë të Bregut Perëndimor.

 

 

BE premton marrëveshje për kushtetutën

 

Bruksel, 27 mars 2004 - Udhëheqësit e vendeve të Bashkimit Evropian kanë rënë dakord që të rihapin negociatat për arritjen e një marrëveshjeje për kushtetutën e parë të organizatës.

Vendimi u mor në Bruksel, ku udhëheqës të 25 vendeve që janë aktualisht anëtare dhe që do të bëhen anëtare të BE-së në maj, po takohen për një samit dyditor.

Qëllimi është që organizata të funksionojë pa probleme me pranimin e dhjetë anëtarëve të rinj.
Udhëheqësit e BE-së ranë dakord njëzëri se negociatat, duhet të prëfundojnë, në afatin më të largët, në mes të qershorit.

  |  KULTURË  |  HISTORI  |   POLITIKË  |  OPINIONE  |  ADRESARI  |  ARKIVI  |