Faruk Spahija u takua me udhëheqës të Degës së LDK-së në Gjermani

Në Oberhausen të Gjermanisë

Faruk Spahija u takua me udhëheqës të Degës së LDK-së në Gjermani

26 mars 2004 / TN

Hazir Krasniqi, kryetar i Degës së LDK-së në Gjermani, në emër të delegacionit që e vizitoi atë dhe të anëtarësisë së gjërë të LDK-së në Gjermani, i dëshiroi Faruk Spahisë shërim të suksesshëm e kthim të shpejt në detyrat e përditshme në Kosovë.

M. HALILI

Faruk Spahija, kryetar i KK të Mitrovicës dhe anëtar i Kryesisë qendrore të LDK-së, ka ditë që po qëndron në Gjermani, ku iu ka nënshtruar disa analizave shëndetësore. Gjendja e tij shëndetësore është dukshëm më e mirë se sa ajo kur ai erdhi këtu. Gjatë kohës së qëndrimit të tij në Gjermani ai vazhdimisht po vizitohet nga bashkatdhetarë dhe aktivistë të LDK-së që veprojnë në Gjermani.

Një vizitë atij i bëri edhe një delegacion i Kryesisë së Degës së LDK-së në Gjermani i përbërë nga Hazir Krasniqi, kryetar, Myftar Halili (ish-Dragidella), sekretar, Isa Shabani , anëtar të Kryesisë së Degës së LDK-së në Gjermani, Qazim Bajgoraliu, kryetar i nëndegës së LDK-së në Nordrhein-Westfalen dhe Behxhet Krasniqi, vëllai i ish-ministrit të mbrojtjes së Republikës së Kosovës, Ahmet Kransiqi.

Gjatë kësaj vizite udhëheqësit e Degës së LDK-së në Gjermani e njoftuan Faruk Spahinë me aktivitetet që po i zhvillon Dega e këtushme e LDK-së për ruajtjen e tempos së aktivitetit që kishte ajo në dekadën e fundit, kur ishte forca motorike e levizjes sonë kombëtare në diasporë.

Gjatë bisedës u konstatua se ishte shumë i arsyeshëm organizimi partiak i shqiptarëve edhe në diasporë, ngase ai ndihmoi në rend të parë institucionet shtetërore, siç ishte Qeveria e Kosovës me ndarjen e mjeteve në shumë prej 3 për qind nga të ardhurat e tyre, pastaj partinë e vet si dhe institucionet tjera të Kosovës dhe të viseve tjera të banuara me shqiptarë.

Faruk Spahija, kryetar i KK të Mitrovicës dhe anëtar i Kryesisë qendrore të LDK-së falënderoi delegacionin e Degës së LDK-së për vizitën dhe shprehu gatishmërinë që gjatë qëndrimit të tij në Gjermani të ndihmojë aktivitetet e Degës së LDK-së në Gjermani duke marrë pjesë aktive dhe duke i përkrahur ato për aktivitetin e zhvilluar deri më tash dhe atë që do ta zhvillojnë në të ardhmën.

Në këtë bisedë, Faruk Spahija nuk arriti të fshehë emocionet e krijuara pas gjendejs së krijuar në Kosovë dhe sikur ndiente keqardhje të madhe që në këto momente të vështira atij i mungoi Mitrovica dhe ai i mungoi Mitrovicës. Mëgjithatë ai shprehu besimin se përkundër ngjarjeve të manifestuara me 17 e 18 mars, në disa komuna të Kosovës, shqiptarët do të dijnë të udhëheqin Kosovën drejt pavarësisë së plotë të saj.