Përmbajtja:

• Presidentit Rugova i jipet Çmimi i Evropës 2004

• Akademia e Shkencave dhe Arteve të Kosovës bëhet anëtare e Federatës së Akademive Nacionale të Evropës

• BE-ja është e përkushtuar të shohë një Kosovë stabile, demokratike dhe multietnike

• Daci tha në Prizren se nuk ka lëkundje nga përcaktmet strategjike të Kosovës

• Shefat e shteteve dhe të qeverive të BE-së sot diskutojnë për situatën në Kosovë

• Eliot Engëll thotë se Serbia nuk mund të pretendojë më se ka ndonjë të drejtë mbi Kosovën

• Këshilli i Evropës kë kërkuar që përgjegjësit e dhunës në Kosovë të dalin para drejtësisë

• Udhëheqja komunale dhe ato ndërkombëtare vizituan fshatin Frashër të Mitrovicës

• KFOR-i dhe UNMIK-u pranojnë se kanë përgjegjësi për shpërthimin e dhunës në Kosovë

• Zëdhënësi i KFOR-it thotë se ka përfunduar zbarkimi i 2000 trupave shtesë të NATO-s në Kosovë

• KFOR-i arrestoi kryetarin e degës së Aleancës së Rinisë në Viti për involvim në protestat e 17 dhe 18 marsit

• Një delegacion i Ministrisë ruse për situata emergjente ka vizituar Graçanicën

• U zbulua një kontigjent i barnave me afat të skaduar

• Në Prishtinë u përkujtua pesëvjetori i vrasjes së avokatit Bajram Kelmendi dhe dy djemve të tij

• Zyra amerikane në Prishtinë përgënjeshtron dy gazeta

• Kryqi i Kuq Ndërkombëtar ka evidentuar rreth 600 persona të zhvendosur nga pjesa veriore e Mitrovicës

• Milosheviq është në vendin e pestë të listës nga dhjetë liderët më të korruptuar në botë

• Kompania ajrore gjermane "Lufthansa" anulon fluturimet për në Shqipëri

• Parlamenti i Serbisë ka miratuar sot një rezolutë për Kosovën

• Atentat në Beograd ndaj seketarit të përgjithshëm të Lidhjes së Futbollit të Serbisë e Malit të Zi

• Komisioni i Zgjedhjeve në Maqedoni nuk ka pranuar kandidaturën për president të ish-ministrit Boshkovski

• Serbia akuzon se Gjermania po mbështet pavarësinë e Kosovës

• Gjashtë speleologë britanikë kanë shpëtuar në Meksiko

• Tërmet i fuqishëm në Turqi humbën jetën 9 persona

• Ushtarët izraelitë kanë vrarë dy militantë palestinezë

• Në përleshjet me protestuesit e opozitës në Abixhan, kanë humbur jetën 25 njerëz

• Policia gjermane ka bastisur një banesë në Darmstad në lidhje me sulmet me bombë në Madrid

• Shtetet e Bashkuara dërgojnë edhe 2,000 mijë marinsa në Afganistan

• Një përkthyes irakian ka vdekur nga plagët e marra

• Tetë ushtarë rusë janë vrarë në Çeçeni

• Al-Xhazira transmeton një kasetë ku mendohet se flet zëvendësi i Bin Ladenit

• Shtëpia e Bardhë kërkon një takim privat mes komisionit për hetime të sulmeve të 11 shtatorit

• Udhëheqësit e BE-së do të rifillojnë bisedimet mbi kushtetutën e e parë

• Në Falluxha janë vrarë 8 civilë janë plagosur edhe 25 të tjerë

• Në Nablus është vrarë një militant palestinez me makinë bombë

• Në Falluxha është vrarë një civil e janë plagosur edhe 4 të tjerë

Presidentit Rugova i jipet Çmimi i Evropës 2004

 

Prishtinë, 26 mars 2004 - Fondacioni panevropian Coudenhove-Kalergi i ka ndarë Presidentit të Kosovës, Dr. Ibrahim Rugova, Çmimin e Evropës për vitin 2004.

Kryetari i Fondacioni panevropian Coudenhove-Kalergi, Dr. Aloiz Mok (Alois Mock), ish-ministër i Jashtëm i Austrisë, ka njoftuar përmes një letre dërguar Presidentit Rugova ditën e enjte se bartës të mëhershëm të Çmimit të Evropës janë Mbreti i Spanjës Huan Karlos, Helmut Kol, Ronald Regan-i, Oto fon Habsburg dhe Emil Konstantinesku.

Koha dhe vendi i dhënies së çmimit për Presidentin Rugova do të bëhen të njohura më vonë.

 

 

 

  

Akademia e Shkencave dhe Arteve të Kosovës bëhet anëtare e Federatës së Akademive Nacionale të Evropës

 

Bruksel, 26 mars 2004 - Akademia e Shkencave dhe Arteve të Kosovës është pranuar anëtare me të drejta të plota në Federatën e Akademive Nacionale të Evropës.

 

Kështu u vendos sot (diçka pas orës 13.00) në një takim dyditor të Asamblesë së kësaj federate që po i zhvillon punimet në Bruksel. Vendimi është marrë njëzërit dhe pa asnjë kundërshtim.

Anëtarësimi i Akademisë së Kosovës në Federatën e Akademive Nacionale të Evropës është një mirënjohje e rëndësishme për institucionin më të lartë të shkencave dhe të arteve të Kosovës.

 

 

BE-ja është e përkushtuar të shohë një Kosovë stabile, demokratike dhe multietnike

 

Bruksel, 26 mars 2004 - Shefat e shteteve dhe të qeverive të vendeve të Bashkimit Evropian, në një takim të sotëm në Bruksel, dënuan dhunën etnike që ndodhi javën e kaluar në Kosovë, duke u bërë thirrje udhëheqësve të Kosovës që të marrin përsipër përgjegjësinë për situatën dhe duke apeluar që kërcënimet dhe dhuna të mos përsëriten më.

Në fillim të takimit, shefi i diplomacisë së BE-së Havier Solana dhe komesioneri evropian Kris Paten raportuan për vizitën e tyre në Kosovë dy ditë më parë. Në projektkonkluzionet e këtij takimi thuhet se institucionet e Kosovës duhet të demonstrojnë përkushtimin për një Kosove multietnike, ndërkohë që si hap urgjent, shefat e shteteve dhe të qeverive porositën që institucionet e Kosovës duhet të ndajnë fonde për rindërtimin e objekteve të shkatërruara, sidomos atyre fetare e kulturore.

 

Njëherit kërkohet kthimi i personave të zhvendosur në shtëpitë e tyre. Ata dhunën e javës së kaluar e konsiderojnë si kthim prapa ngase e tërë kjo mund të rrezikojë progresin e arritur në Kosovë gjatë viteve të fundit.

Gjithashtu Bashkimi Evropian, theksohet më tutje, është i përkushtuar të shohë një Kosovë stabile, demokratike dhe multietnike, e cila do ta kishte vendin e saj në Evropë, thuhet në këtë takim të Brukselit.

 

 

Daci tha në Prizren se nuk ka lëkundje nga përcaktmet strategjike të Kosovës

 

Prizren, 26 mars 2004 - Kryeparlamentari Nexhat Daci, në krye të një delegacioni të Kuvendit të Kosovës, vizitoi sot Prizrenin dhe zhvilloi një takim me kryetarin e komunës Eqrem Kryeziu, si dhe me këshilltarët e partive politike në Asamblenë komunale.

Pas takimeve Daci tha se delegacioni ndodhet sot në Prizren për të pasur informacione të duhura për analizën që po përgatit Kuvendi i Kosovës për ngjarjet e javës së kaluar.

Daci theksoi se nuk ka lëkundje nga përcaktmet strategjike të Kosovës dhe të kosovarëve për pavarësi, për liri, qetësi dhe demokraci. "Vlerësimi i të gjitha institucioneve të Kosovës janë unike - i Presidentit, Kryeministrit dhe i kryetarit të Parlamentit - janë që në këtë rast, në këtë periudhë, në erupcionin e ndodhur, është atakuar një kulturë që është pjesë e historisë së Prizrenit, është atakuar monoriteti serb dhe kjo është e papranueshme nga të gjitha nivelete në Kosovë, nga të gjithë qytetarët e saj", tha Daci.

Ai tha se interesi i Kosovës është që procesi mëparshëm të kthehet në binarë. "Minoritet serb dhe ashkali meriton përkrahjen e mazhorancës në Kosovë.

 

Mazhoranca në Kosovë duhet ta tregojë shpirtin e vet të natyrshëm, të dalë në mbrojtje të pakicave, të ndihmojë pakicat dhe me një solidaritet edhe më të madh t'i tregojë pakicave se është e mirëseardhur në shtëpitë e veta".

Daci tha se insitucionet janë të përcaktuara njëzërit dhe ajo që është me rëndësishme, në asnjë mënyrë jashtë rrugës demokratike nuk guxon të atakohet bashkësia ndërkombëtare.

Delegacioni vizitoi pastaj objektet e djegura në Prizren.

 

 

Shefat e shteteve dhe të qeverive të BE-së sot diskutojnë për situatën në Kosovë

 

Bruksel, 26 mars 2004 - Shefat e shteteve dhe të qeverive të Bashkimit Evropian në takimin e sotëm në Bruksel do të diskutojnë për situatën në Kosovë. Shefi i dplomacisë së BE-së Havier Solana ka deklaruar dje se dhunën e javës së kaluar në Kosovë e kanë organizuar personat që i takojnë ndonjërës nga organizatat lokale partiake.

 

Liderët e vendeve të BE-së mbrëmë kanë miratuar "planin antiterrorist", i cili nënkupton forcimin e bashkëpunimit të shteteve-anëtare të BE-së në eliminimin e terrorizmit.

 

 

Eliot Engëll thotë se Serbia nuk mund të pretendojë më se ka ndonjë të drejtë mbi Kosovën

 

Uashington, 26 mars 2004 - Në një takim në Uashington me përfaqësuesit e Këshillit Shqiptaro-Amerikan në mjediset e Kongresit amerikan, ligjvënësi Eliot Engëll ka kritikur Qeverinë e Serbisë e cila përpiqet ta shfrytëzojë gjendjen në Kosovë për të larguar vëmendjen e opinionin nga problemet e saj të brendshme.

 

Por Serbia, tha Engëll, nuk mund të pretendojë më se ka ndonjë të drejtë mbi Kosovën, duke shtuar se e vetmja e drejtë i takon popullit të Kosovës, shqiptarëve, serbëve dhe pakicave të tjera që jetojnë në Kosovë.

Ai gjithashtu këmbëngul se që Kosova të bëhet e pavarur të gjitha pakicat etnike duhet të gëzojnë të drejta të plota dhe të barabarta.

 

 

Këshilli i Evropës kë kërkuar që përgjegjësit e dhunës në Kosovë të dalin para drejtësisë

 

Bruksel, 26 mars 2004 - Këshilli i Evropës ka kërkuar që përgjegjësit e dhunës në Kosovë të dalin para drejtësisë. Komiteti i Këshillit të Ministrave të BE-së ka dënuar me forcë aktet e dhunës me motive etnike gjatë të cilave ka pësuar një numër i madh i popullatës së Kosovës, theksohet në komunikatën e Këshillit të Evropës.

 

Po ashtu theksohet se zyrtarët politikë shqiptarë në Kosovë duhet ta marrin përgjegjësinë për respektimin e plotë të të drejtave të njeriut në Kosovë.

 

 

Udhëheqja komunale dhe ato ndërkombëtare vizituan fshatin Frashër të Mitrovicës

 

Mitrovicë, 26 mars 2004 - Zëvendëskryetari i Kuvendit të Komunës, Mursel Ibrahimi dhe kryeshefi i Ekzekutitvit të Kuvendit të Komunës, me bashkëpunëtorë, të shoqëruar nga administratori rajonal i UNMIK-ut në Mitrovicë, Dejvid Majkëll, komandanti i BSHVL-së, gjenerali Ksavier Mishel dhe komandanti i policisë rajonale të UNMIK-ut në Mitrovicë, Berri Pollin, kanë vizituar fshatin Frashër dhe kishën ortodokse serbe në qytet, për të parë për së afërmi shkatërrimet dhe dëmet që janë bërë gjatë trazirave më 17 mars.

Zëvendëskryetari i Kuvendit të Komunës, në emër të Kuvendit të Komunës, ka shprehur keqardhje në Frashër për shkatërrimet e shtëpive të serbëve në këtë fshat dhe u ka thënë përfaqësuesve ndërkombëtarë se aktet e këtilla janë të papranueshme dhe se Kuvendi i Komunës i dënon ato dhe çfarëdo akti tjetër të dhunës.

 

Ai i ka njoftuar ndërkombëtarët se Bordi i Drejtorëve ka caktuar komisionet përkatëse, në të cilat do të angazhohen edhe pjestarët e minoritetit serb, për vlerësimin e dëmeve, si në pronat e serbëve, ashtu edhe në ato të shqiptarëve dhe propozimin e masave për tejkalimin e gjendjes.

Komandanti i BSHVL-së, duke parë se çfarë shkatërrimesh janë bërë në shtëpitë e serbëve në Frashër, është shprehur se një gjë e tillë është shumë e keqe. Ai ka thënë se tek udhëheqëja komunale po sheh vullnet të mirë për rindërtimin e shtëpive të djegura, me qëllim që banorët e zhvendosur të kthehen në to.

 

Mirëpo, ai ka shtuar se duhet të bëhet edhe më shumë për të krijuar ambient të sigurtë për kthimin e serbëve dhe se përgjegjësia kryesore për këtë bie mbi përfaqësuesit e popullatës dhe të vetë banorëve që jetojnë aty.

Administratori rajonal i UNMIK-ut, Davide Michales, pasi ka thënë se shkatërrimet janë plotësisht të papranueshme dhe se vështirë është të paramendosh se ndokush mund të bëjë diç të tillë, është shprehur të jetë i impresionuar me përpjekjet dhe vendosmërinë e

udhëheqëjes së pushtetit lokal për të krijuar kushte për rindërtimin e shtëpive të djegura dhe për kthimin e serbëve për të jetuar në to.

 

 

KFOR-i dhe UNMIK-u pranojnë se kanë përgjegjësi për shpërthimin e dhunës në Kosovë

 

Prishtinë, 26 mars 2004 - Administrata e OKB-së në Kosovë dhe forcat e KFOR-it kanë pranuar përpara gazetarëve pjesën e tyre të përgjegjësisë lidhur me shpërthimin e dhunës së javës së që rezultojë më 28 të vdekur dhe me qindra të plagosur.

 

Por njëkohësisht përfaqësuesit e këtyre institucioneve kanë tërhequr vërejtjen se përgjegjësinë së bashku me ta e ndajnë edhe qytetarët e Kosovës. Kështu zëdhënësi i UNMIK, Sunil Narula ka thënë se për trazirat e javës së kaluar përgjegjës janë të gjithë, populli i Kosovës, përfshirë këtu edhe UNMIK-un dhe KFOR-in.

Gjërat kanë ndodhur, por tani situata po përmirësohet. Kjo ka qenë brengosëse, ka thënë zëdhënësi Narula. Ai shtoi se edhe administratori Hari Holkeri në një letër dërguar popullit të Kosovës ka pranuar se misioni i OKB-së ka bërë gabime, por sipas Narulës, tani duhet të gjendet mënyra se si të shkohet përpara.

Edhe zëdhënësi i KFOR-it Xhim Moran pranon se përgjegjës për shpërthimin e dhunës janë të gjithë, përfshirë edhe KFOR-in.

 

 

Zëdhënësi i KFOR-it thotë se ka përfunduar zbarkimi i 2000 trupave shtesë të NATO-s në Kosovë

 

Prishtinë, 26 mars 2004 - Zëdhënësi i KFOR-it Xhim Moran bëri të ditur se ka përfunduar zbarkimi i 2000 trupave shtesë të NATO-s që u sollën në Kosovë si përforcim i kontigjentit prej 17 mijë trupave të KFOR-it. Ai ka shtuar se trupat e ashtuquajtuar "Përtej horizontit" tashmë janë vendosur në tërë Kosovën.

 

 

KFOR-i arrestoi kryetarin e degës së Aleancës së Rinisë në Viti për involvim në protestat e 17 dhe 18 marsit

 

Viti, 26 mars 2004 - Në valën e arrestimeve për shkak të involvimit në protestat e javës së kaluar në Viti, pjesëtarë e KFOR-it kanë arrestuar edhe kryetarin e degës së Aleancës së Rinisë së Kosovës për këtë komunë, Visar Demiri. KFOR-i konstaton se ky arrestim mbështetet në faktin se Demiri ishte i involvuar drejtpërdrejt në protestat e 17 dhe 18 marsit.

 

 

Një delegacion i Ministrisë ruse për situata emergjente ka vizituar Graçanicën

 

Prishtinë, 26 mars 2004 - Një delegacion i Ministrisë për situata emergjente që udhëhiqet ka vizituar dje Graçanicën për të vërtetuar nevojat konkrete të popullatës serbe në mënyrë që ndihmat që i dërgon Rusia të jenë adekuate.
"Rusia kurrë nuk i ka harruar serbët e Kosovës, prandaj ne jemi këtu me urdhër të Presidentit Putin", ka thënë udhëheqësi i delegacionit.

 

 

U zbulua një kontigjent i barnave me afat të skaduar

 

Prishtinë, 26 mars 2004 - Agjencia e Kosovës për Produkte Medicinale ka zbuluar disa barna me afat të skaduar të cilat janë të rrezikshme dhe të dëmshme për shëndetin e njeriut. Kjo u bë e ditur gjatë një takimi me gazetarë nga ana e këtij Agjencioni dhe Ministrisë së Shëndetësisë së Kosovës.

Kryeshefi ekzekutiv i Agjencisë së Kosovës për Produkte Medicionale Adnan Bozalia ka thënë se tabletat e zbuluara janë prodhuar nga "Zorka Farma" e Shabacit të Serbisë dhe përmbajnë datat e prodhimit të vitit 2006 që do të thotë se ky është produkt i falsifikuar.

 

 

Në Prishtinë u përkujtua pesëvjetori i vrasjes së avokatit Bajram Kelmendi dhe dy djemve të tij

 

Prishtinë, 26 mars 2004 - Në prani të përfaqësuesve të institucioneve të Kosovës dje në pesëvjetorin e vrasjes u përkujtua avokati Bajaram Kelemendi me dy djemtë e tij Kastriotit dhe Kushtrimit.

Avokati Bajram Kelmendi gjatë veprimtarisë së tij ka shpjeguar pozitën e shqiptarëve në ish-Jugosllavi dhe shkeljet që u bëheshin shqiptarëve nga regjimi i atëhershëm i Beogradit, tha avokati Fazli Balaj, duke folur për jetën dhe veprimtarinë e Bajram Kelmendit të vrarë para pesë vjetësh.

 

Balaj tha se avokati Kelmendi kishte hartuar akuzën kundër Millosheviqit për gjenocid e cila u dorëzua në Prokurorinë e Qarkut të Prishtinës dhe në Prokurorinë e Republikës së Serbisë një Beograd. Më vonë bashkë me tre kolegë përgatiti akuzën kundër Millosheviqit dhe bashkëpuntorëve të tij.

Në emër të familjes të pranishmit në këtë akademi i përshëndeti bashkëshortja e të ndjerit Nekibe Kelmendi.
Pas akademisë, të pranishmit bënë homazhe dhe vendosën kurora lulesh mbi varrin e Bajram Kelmendit dhe dy djemve të tij, Kastriot dhe Kushtrim Kelmendit.

 

 

Zyra amerikane në Prishtinë përgënjeshtron dy gazeta

 

Prishtinë, 26 mars 2004 - Majkëll Mekllellen, zëdhënësi i Zyrës së SHBA-ve në Prishtinë, deklaroi se pjesët e raporteve në numrat e djeshëm të "Zërit" dhe "Epokës së re" që kanë të bëjnë me kontaktet e supozuara mes përfaqësuesve të Zyrës së SHBA-ve në Prishtinë dhe përfaqësuesve të PDK-së për heqjen e gjendjes së jashtëzakonshme në komunëne Vitisë, janë plotësisht të pavërteta.

 

 

Kryqi i Kuq Ndërkombëtar ka evidentuar rreth 600 persona të zhvendosur nga pjesa veriore e Mitrovicës

 

Prishtinë, 26 mars 2004 - Komiteti i Kryqit të Kuq Ndërkombëtar ka evidentuar rreth 600 persona të zhvendosur nga pjesa veriore e Mitrovicës në pjesën jugore të qytetit si pasojë e trazirave të fundit në Kosovë. Idriz Gashi nga ky Komitet thotë se procesi i evidentimit të nevojave të të zhvendosurëve në tërë Kosovën ende nuk ka përfunduar.

 

 

Milosheviq është në vendin e pestë të listës nga dhjetë liderët më të korruptuar në botë

 

Berlin, 26 mars 2004 - Ish-diktatori serb Slobodan Milosheviq është në vendin e pestë të listës nga dhjetë ish-liderët më të korruptuar në botë, sepse gjatë sundimit të tij ka abuzuar një miliardë dollarë, thuhet në një raport të organizatës ndërkombëtare për përcjelljen e korrupsionit "Transparens Intereshënell" me seli në Berlin.

I pari në listë është Suharto, president i Indonezisë prej vitit 1967 deri më 1998, i cili ka abuzuar midis 15 dhe 35 miliardë dollarë, thekson kjo organizatë nga Berlini, njofton AP.

 

 

Kompania ajrore gjermane "Lufthansa" anulon fluturimet për në Shqipëri

 

Berlin, 26 mars 2004 - Kompania ajrore gjermane "Luthansa" anulon fluturimet për në Shqipëri. Këtë e konfirmoi zëdhënësi i kësaj kompanie Mihael Lamberti. Shkak për anulimin e fluturimeve kanë qenë standardet e pamjaftueshme të sigurisë në aeroportin e Tiranës. Sipas Lambertit "Lufthansa" kishte kërkuar që të dërgonte personelin e vet të sigurisë në aeroportin e Tiranës, por këtë nuk e kishte pranuar pala shqiptare.

 

 

Parlamenti i Serbisë ka miratuar sot një rezolutë për Kosovën

 

Beograd, 26 mars 2004 - Parlamenti i Serbisë ka miratuar sot një rezolutë për Kosovën, në të cilën dënohet "terrorizmi" shqiptar, ndërkaq nga bashkësia ndërkombëtare këkohet që të ndalë, siç thuhet "pastrimin etnik" të serbëve dhe të popullsisë joshqiptare në Kosovë.

Në rezolutë poashtu thuhet se Kosova është "pjesë e patjetërsueshme e Serbisë dhe e Unionit Serbi-Mali i Zi".
Për këtë rezolutë kanë votuar 220 deputetë dhe vetëm një ka abstenuar.

Rezoluta më e re e parlamentit serb me siguri edhe më tepër do ta përshkallëzojë situatën në Kosovë dhe do të nxisë zemërimin në Kosovë.

 

 

Atentat në Beograd ndaj seketarit të përgjithshëm të Lidhjes së Futbollit të Serbisë e Malit të Zi

 

Beograd, 26 mars 2004 - Në qendër të Beogradit sot ka ndodhur një atentat ndaj seketarit të përgjithshëm të Lidhjes së Futbollit të Serbisë e Malit të Zi, Branko Bullatoviq, i cili ka marrë plagë të rënda.

Bullatoviq urgjentisht është transferuar në spital dhe ndodhet në gjendje kome. Sipas mediave serbe, Bullatoviqin e ka goditur në kokë me armë zjarri një person i moshës 40-vjeçare, i cili menjeherë është larguar nga vendi i ngjarjes.

 

 

Komisioni i Zgjedhjeve në Maqedoni nuk ka pranuar kandidaturën për president të ish-ministrit Boshkovski

 

Shkup, 26 mars 2004 - Komisioni Shtetëror i Zgjedhjeve në Maqedoni nuk ka pranuar kandidaturën për president të ish-ministrit të vendit Lube Boshkovski. Ai nuk e plotëson kushtin ligjor, i cili thotë se një kandidat brenda 15 viteve të fundit duhet të ketë vendbanim 10-vjeçar të rregullt në Maqedoni. Boshkovski që më herët ka jetuar në Kroaci tha se i plotësonte kushtet për të qenë kandidat presidencial dhe se do të ankohet në Gjykatën e lartë.

Boshkovski në konfliktin e fundit në Maqedoni akuzohet nga shqiptarët se ka bërë krime lufte dhe se duhet të përgjigjet para Tribunalit të Hagës.

 

 

Serbia akuzon se Gjermania po mbështet pavarësinë e Kosovës

 

Berlin - Beograd, 26 mars 2004 - Ministri i jashtëm i Serbisë dhe Malit të Zi Goran Svilanoviq ka thënë se Gjermania po ndjek një politikë në favor të pavarësisë së Kosovës. Ai mëtej ka shtuar se Gjermania nuk është e vetme në mesin e vendeve perëndimore që kërkon shkëputjen e Kosovës nga Serbia.

 

Svilanoviq ka thënë se Beogradi dëshironte një rezolutë për të dënuar përpjekjet e shqiptarëve për spastrim etnik të Kosovës, mirëpo konkretisht Gjermania e ka bllokuar atë.

 

 

Gjashtë speleologë britanikë kanë shpëtuar në Meksiko

 

Meksiko, 26 mars 2004 - Gjashtë speleologë britanikë kanë shpëtuar nga shpella në Meksiko, pasi që kanë qenë ngujuar në të mbi një javë, por sipas deklaratës së tyre ata asnjherë nuk kanë qenë në rrezik. Zhytësit e Britanisë së Madhe, me anë të mjeteve zhytëse, i kanë nxjerrë speleologët që andej nga ujërat e shtuara. Në këtë operacion janë ndihmuar nga specialistët meksikanë të nën ujërave.

 

 

Tërmet i fuqishëm në Turqi humbën jetën 9 persona

 

Ankara, 26 mars 2004 - Një tërmet i fuqishëm i shkallës 5.1 të Rihterit ka tronditur dhe shkatërruar gjatë natës rajonin lindor të Turqisë dhe ka shkaktuar vdekjen e të pakten 9 personave, ndër të cilët të pakten 4 fëmijë dhe plagosjen e dhjetra të tjerëve, ka bërë të ditrur sot (e premte) Ministria e shërbimeve publike, njofton Rojter. Njoftohet se fshatrat në tri provinca dhe afër qytetit Erzurum kanë pësuar dëme të konsiderueshme. Rrethi Askale ka qenë epiqendër e termetit.

 

 

Ushtarët izraelitë kanë vrarë dy militantë palestinezë

 

Gaza, 26 mars 2004 - Ushtarët izraelitë kanë vrarë dy militantë palestinezë, të cilët po përpiqeshin të depërtonin në vendbanimin ebrait Tel Katifa në Gaza dhe kanë hapur zjarr në një postbllok ushtarak, kanë bërë të ditur sot (e premte) burimet ushtarake, njofton Rojter. Krahu i armatosur i Hamasit e ka marrë përgjegjësinë për sulmin e militantëve të vrarë, të cilët i quan martir të rënë në luftimet me trupat izraelite.

 

 

Në përleshjet me protestuesit e opozitës në Abixhan, kanë humbur jetën 25 njerëz

 

Abixhan, 26 mars 2004 - Policia e Bregut të Fildishtë ka thënë sot (e premte) se në përleshjet me protestuesit e opozitës në Abixhan, kanë humbur jetën 25 njerëz, njofton BBCWorld. Burimet e tjera thonë se shifrat janë më të larta. Presidenti Loran Gbagbo i ka quajtur demonstratat "përpjekje për revoltë të armatosur".

 

 

Policia gjermane ka bastisur një banesë në Darmstad në lidhje me sulmet me bombë në Madrid

 

Darmstad, Gjermani, 26 mars 2004 - Policia gjermane ka bastisur një banesë në qytetin perendimor Darmstad në lidhje me sulmet me bombë në Madrid, njofton BBCWorld. Autoritetet gjermane thonë se në këtë banesë ka banuar një maroken, i cili është arrestuar në Spanjë lidhur me sulmet e Madridit. Policia spanjolle ka arrestuar deri tash 18 persona në lidhje me bombëvëniet e 11 marsit në Madrid. Detaje të tjera nuk janë dhënë për këtë bastisje.

 

 

Shtetet e Bashkuara dërgojnë edhe 2,000 mijë marinsa në Afganistan

 

Uashington, 26 mars 2004 - Shtetet e Bashkuara do të dërgojnë edhe 2,000 mijë marinsa të specializuar për operacione. Ata do t=u bashkohen 11, 000 trupave amerikane në Afganistan si përforcim për të intensifikuar ndjekjen e mëtejshme të militantëve të Al Kaidës dhe të talibanëve, ka bërë të ditur Ministria e amerikane e Mbrojtjes, njofton Rojter.

 

 

Një përkthyes irakian ka vdekur nga plagët e marra

 

Bagdad, 26 mars 2004 - Një përkthyes irakian, i cili punonte për revsitën "Tajm" në Bagdad ka vdekur sot (e premte) pasi ishte qëlluar me armë zjarri dhe kishte marrë plagë të rënda në fillim të kësaj jave, ka bërë të ditur selia e këtij magazini në Nju Jork, njofton Rojter. Gjatë këtij muaji janë bërë një sërë sulmesh në përfaqësuesit e organizatave të mediave në Irak, të cilët nga kryengritësit antiamerikanë kanë qenë në shënjestër njësoj si të punësuarit për kompanitë perendimore.

 

 

Tetë ushtarë rusë janë vrarë në Çeçeni

 

Grozni, 26 mars 2004 - Tetë ushtarë rusë janë vrarë të enjtën në mbrëmje nga shpërthimi i një kamioni ushtarak në Çeçeninë qendrore, pasi kishte shkelur në një minë, njofton Ministria ruse e Mbrojtjes.

Kamioni ishte në përmbërje të një kolone ushtarake e cila ishte duke u larguar nga qyteti Shali, 25 km në jugperendim të Groznit.

 

 

Al-Xhazira transmeton një kasetë ku mendohet se flet zëvendësi i Bin Ladenit

 

Dubai, 26 mars 2004 - Rrjeti televiziv satelitor arab Al-Xhazira transmetoi një kasetë ku thuhet se flet Ajman al-Zavahiri, zëvendësi kryesor i Osama bin Ladenit në rrjetin terrorist al-Kaida.

Zëri në kasetë u bën thirrje pakistanezëve që të përmbysin nga pushteti presidentin pakistanez Pervez Musharraf, të cilin zëri e quan tradhëtar sepse punon për amerikanët.

Al-Xhazira e transmetoi kasetën dje, një ditë pasi zyrtarë ushtarakë pakistanezë thanë se Ajman al-Zavahiri mund të jetë mes luftëtarëve të Al-Kaidës të rrethuar nga trupat qeveritare afër kufirit me Afganistanin.

Zyrtarë të zbulimit nuk e kanë verifikuar ende vërtetësinë e zërit as edhe nuk kanë thënë se kur mund të jetë regjistruar kaseta. Por shumë analistë thonë se zëri tingëllon si regjistrimet e mëparshme të Ajman al-Zavahirit.

 

 

Shtëpia e Bardhë kërkon një takim privat mes komisionit për hetime të sulmeve të 11 shtatorit

 

Uashington, 26 mars 2004 - Shtëpia e Bardhë po kërkon një takim privat midis këshilltares së presidentit për sigurimin kombëtar, Kondoliza Rajs, dhe komisionit, që po bën hetime rreth sulmeve terroriste të 11 shtatorit 2001.

Kryeavokati i presidentit Bush i dërgoi një letër dje komisionit, ku kërkonte një takim në të cilin zonja Rice synon të sqarojë ato që avokati i cilëson si karakterizime të gabuara. Këshilltarja e presidentit për sigurimin kombëtar Rice nuk ka pranuar të dëshmojë publikisht para komisionit.

 

 

Udhëheqësit e BE-së do të rifillojnë bisedimet mbi kushtetutën e e parë

 

Bruksel, 26 mars 2004 - Kryeministri i Irlandës, Berti Ahern, tha se udhëheqësit e 25 vendeve, anëtare aktuale dhe të ardhshme të Bashkimit Evropian, vendosën njëzëri të rifillojnë bisedimet, që dështuan vjet, mbi kushtetutën e parë ndonjëherë të Bashkimit Evropian.

Ahern tha dje vonë në një takim të Bashkimit në Bruksel se udhëheqësit ranë dakord të përfundojnë bisedimet mbi kushtetutën para fillimit të takimit të nivelit të lartë më 17 qershor. Bisedimet dështuan në dhjetor të vitit të kaluar për shkak të të drejtave të votimit.

Po dje, udhëheqësit e Bashkimit Evropian miratuan një numër masash të reja për të luftuar terrorizmin.

 

 

Në Falluxha janë vrarë 8 civilë janë plagosur edhe 25 të tjerë

 

Falluxha, Irak, 26 mars 2004 - Forcat amerikane kanë zhvilluar sot ( e premte) luftime kundër kryengritësve në qytetin irakian Falluxha, ku janë vrarë 8 civilë, ndër të cilët tre fëmijë dhe janë plagosur edhe 25 të tjerë, kanë thënë zyrtarët vendorë dhe spitalorë, njofton Rojter. Ndër të plagosur ka gra dhe pleq. Viktimat janë dërguar në spitalin e qytetit. Armata amerikane ende nuk e kanë komentuar incidentin.

 

 

Në Nablus është vrarë një militant palestinez me makinë bombë

 

Nablus, 26 mars 2004 - Në qytetin Nablus të Bregut Perendimor ka shpërthyer sot (e premte) një makinë bombë dhe kështu është vrarë një militant palestinez, i cili si duket përgatitej për një sulm vetëvrasës, kanë thënë dëshmitarët dhe policia vendore, njofton Rojter. Armata izraelite ka thënë se s'ka operuar në atë zonë në momentin e shpërthimit. Dëshmitarët kanë identifikuar militantin 22-vjeçar, Ahmed al-Abed, pjesëtar i Brigadave të Martirëve Al Aksa, fraksion i armatosur i Al Fatahut të presidentit Arafat. Dëshmitarët thonë se ai është ndarë në dysh nga shpërthimi.

 

 

Në Falluxha është vrarë një civil e janë plagosur edhe 4 të tjerë

 

Falluxha, Irak, 26 mars 2004 - Forcat amerikane kanë zhvilluar sot ( e premte) luftime kundër kryengritësve në qytetin irakian Falluxha, ku është vrarë një civil dhe janë plagosur edhe katër të tjerë, kanë thënë zyrtarët vendorë dhe spitalorë, njofton Rojter. Viktimat janë dërguar në spitalin e qytetit. Armata amerikane ende nuk e kanë komentuar incidentin.

  |  KULTURË  |  HISTORI  |   POLITIKË  |  OPINIONE  |  ADRESARI  |  ARKIVI  |