|  KULTURË  |  HISTORI  |   POLITIKË  |  OPINIONE  |  ADRESARI  |  ARKIVI  | 

Kronikë nga Gjilani

FHK ndihmoi parashkollorët e IP “Ardhmëria” me 500 €uro

Gjilan, 26 mars/TN/ Ilmi MUSLIU - Parashkollorët e qerdhes “Ardhmëria 2” në Gjilan janë ndihmuar me 500 €uro nga Federata e hendbdollit të Kosovës. Kryetari i kësaj federate, Mexhid Devaja tha se mjetet janë grumbulluar nga ndeshja miqësore e zhvilluar në Gjermani, ndërmjet përfaqësueses së Kosovës dhe ekipit vendor të komunës së Essenit.

Duke dorëzuar donacionin z. Devaja tha se vullneti për t`i përkrahur këta fëmijë është më i madh se kjo ndihmë, të cilën ai e vlerësoi modeste. “Ne bëmë diçka të vogël për ju dhe do të jem i lumtur nëse kjo ide jona fiton përkrahje edhe nga institucionet dhe organizatat tjera”, tha Kurtesh Devaja.

Drejtoresha Tylaj Hasanaj, duke shprehur falënderim në emër të parashkollorëve të “Ardhmëria” tha se ky është një investim në të ardhmen dhe veçmas ka falënderuar përgjegjësin e sportit të komunës së Essenit në Gjermani, z. Rudolf Jelinek.

Ajo ka shprehur dëshirën që ”Ardhmëria 2” të binjakëzohet me ndonjë nga qerdhet e komunsës së Essenit dhe kjo iniciativë u përkrahë edhe nga kryetari i FHK, i cili premtoi se do ta përcjellë atë te përgjegjësit e atjeshëm.

Fëmijtë e qerdhes, edukatoret, përfaqësuesi i bordit të prindërve dhe drejtoresha kanë falënderuar z. Kurtesh Devaja dhe atij i kanë dhuruar një punim të parashkollorëve të këtij institucioni.

 

  

Pastrohet ambenti i kishës ortodokse, shkollës dhe ambulancës serbe në Gjilan

Gjilan, 26 mars/TN/ Ilmi MUSLIU - Të rinj shqiptarë, serbë e turq, anëtarë të OJQ-së "Lansdowne" në Gjilan, kanë punuar të premten bashkarisht në pastrimin e ambientit të kishës ortodokse, shkollës dhe ambulancës serbe në Gjilan, duke dhënë kështu një shemull të mirë të anagzhimit për krijimin e një klime mirëbesimi e tolerance mes komuniteteve, pas ngjarjeve të 17 marsit.

Prifti, por edhe serbët lokalë kanë shprehur admirim për aksionin që ka ndërmarrë kjo organizatë multietnike për pastrimin e hapësirës së kishës ortodokse, e cila ka shpëtuar e padëmtuar, shkollës dhe ambulancës, që gjenden në rrugën e Prishtinës, e njohur si lagja «Varosh», ku është i
përqendruar komuniteti serb.

Majori Stiv Kramer nga kampi ushtarak amerikan, "Monteith", në Gjilan tha se "Lansdowne", me këtë aksion po bën një punë të mrekullueshme për ndryshime pozitive pas asaj që ndodhi javën e kaluar. KFOR-i është këtu për sigurinë e të gjithëve dhe fatmirësisht nga java e kaluar, nuk ka pasur ndonjë
incident, tha ai.

Do të bëjmë çdo gjë që njerëzit të jenë të sigurtë këtu dhe me ndihmen e qytetarëve e të komunës, të zhvendosurit të kthehen në shtëpitë e tyre. Ndonëse situata duket më e qetë, ne do të vazhdojmë të jemi prezent këtu, që qytetarët serbë të ndjehen të sigurtë, tha majori Kramer.

Prifti i kishës ortodokse serbe në Gjilan, Svetislav Trajkoviq, duke shprehur përkrahje për aksionin tha se është iniciativë e mirë, por duhet të ndërmiren edhe hapa tjerë për përmirësimin dhe normalizimin e jetës së serbëve këtu. Të zhvendosurit duan dhe duhet të kthehen në shtëpitë e tyre. "Besoj në angazhimin e udhëheqjes komunale për normalizimin e situatës ", tha ai.

Përgjegjësi i OJQ "Lansdowne", Shaban Terziu, tha se kemi ndërmarrë këtë aksion në bashkpunim me përfaqësues të shoqërisë civile, partitë politike, komunën, KFOR-in dhe SHPK-në. Duam t'i dëshmojmë bashkësisë ndërkombëtare dhe të gjithë popujve që jetojnë këtu se ne do të punojmë që ky vend të jetë i të gjithëve dhe ku mund të jetojnë të gjithë në liri dhe pa frikë.

 
Në Zhegër u hapë qendra trajnuese

Gjilan, 26 mars/TN/ Ilmi MUSLIU - Në fshatin Zhegër të komunës së Gjilanit, të premten është hapur qendra trajnuese, ku të rinjtë e atjeshëm do të kenë mundësi për ngritje të aftësive të tyre në disa lëmi. Projekti, në vlerë prej 17 mijë e 272 €uro, është financuar nga KFOS (Fondacioni për shoqëri të hapur), Organizata kanadeze KLIP dhe komuna e Gjilanit. Qendra ëhtë e pajisur me 10 kompjuterë dhe ka rrjet të internetit.

Alban Rrahmani, ushtrues i detyrës së menaxherit të shtëpisë së kulturës «Idriz Seferi» në Zhegër, në një fjalë rasti para të pranishmëve tha se qendra do të jetë një vatër e rëndësishme e aftësimit dhe e përgatitjes profesionale për të rinjtë e Zhegrës dhe të rrethinës, ku ata do të mund të përfitojnë njohuri përmes kurseve në lëmi të ndryshme, që nga informatika, kontabiliteti, mësimi i gjuhëve të huaja e të tjera.

Ndërkaq, Muhamet Haliti nga «Dardanica» tha se qendra ka për qëllim të ndihmojë në ngritjen e komunitetit të Zhegrës, duke përgatitur të rinjtë për tregun e punës. Sipas tij në këtë qendër sivjet parashihet t`i ndjekin trajnimet rreth 400 vijues.

Edhe Luan Shllaku, përgjegjës i KFOS-it tha se shpresojmë që në këtë mënyrë mund t`i ndihmojmë më së miri të rinjtë që ata të kenë një ambient të përshtatshëm për punë dhe trajnim në profesione të ndryshme.

Bali Sahiti drejtor për kulturë, rini e sport premtoi se komuna do të ndihmojë në hapjen e qendrave të këtilla edhe nëpër fshatrat tjera më të mëdha si në Cërrnicë, Pogragjë, Bresalc e të tjera.

Qendra trajnuese në Zhegër, është përuruar nga Bujar Haziri, zyrtar për rini dhe Luan Shllaku, përfaqëseus i KFOS-it. Z. Haziri ka theksuar se ndihma për rininë nuk do të mungojë asnjëherë dhe komuna nuk do të kursehet ta bëjë këtë sa herë që është e nevojshme.