Përmbajtja:

• Presidenti Rugova dënon fuqishëm vrasjen e policëve

• Moisiu i ka dërguar një mesazh Rugovës në pesëvjetorin e bombardimeve të NATO-s

• Kofi Anan dënon vrasjen e dy policëve në Kosovë

• Shtefan Feler thotë se vrasja e dy policëve nuk duhet të lidhet me trazirat e fundit në Kosovë

• Holkeri pranon se misioni i Kombeve të Bashkuara në Kosovë ka bërë gabime

• Kryeparlamentari Daci priti kryeadministratorin Holkeri

• Solana: BE do të vazhdojë ta ndihmojë zhvillimin e Kosovës, por pakicat duhet të mbrohen

• Holkeri takoi Dacin dhe Rexhepin

• Kuvendi i Kosovës: Nuk do të ketë sukses asnjë tendencë e ndarjes, kantonizimit apo e copëtimit të Kosovës

• Bastali në Gjilan: Ngjarjet e 17 e 18 marsit ishin një fatkeqësi që duhet të tejkalohet

• Komisioni për vlerësimin e dëmeve fillon punën nesër

• Dega e LDK-së në Viti u shpreh përkrahje të paluhatshme institucioneve të Kosovës

• Mbrëmë në pjesën veriore të Mitrovicës një serb ka plagosur me granatë dy pjëstarë të KFOR-it

• Ombudspersoni i Kosovës korrigjon deklaratën e djeshme për ngjarjet e fundit në Mitrovicën veriore

• F.Hartman: Tribunali i Hagës nuk është kompetent për krimet e ditëve të fundit në Kosovë

• Administrata komunale e Prishtinës u bëjnë thirrje qytetarëve të pajisen me dokumente udhëtimi

• Zhbllokohet rruga Prishtinë-Gjilan

• NATO-ja ndërpret përpilimin e planeve për reduktimin e Misionit të KFOR-it në Kosovë

• Presidenti Bush falënderon kancelarin gjerman për dergimin e 600 trupave në Kosovë

• Komandanti i KFOR-it u ka dhënë përgjegjësi trupave paqeruajtëse që të imponojnë orë policore

• Data e 24 marsit të vitit 1999 ishte një ditë e shpresës për qytetarët e Kosovës

• Situata në Mitrovicë ka filluar të stabilizohet

• Një delegacion i FR të LDK-së vizitoi dje SHP të TMK-së

• Milosheviq ka vazhduar të mos pranojë ndërrimin e kryegjykatësit të Tribunalit të Hagës

• Ministri i jashtëm slloven thotë se vendi i tij është i gatshëm ta ndihmojë Kosovën

• Gjykata komunale në Gjilan u ka shpallur masën e paraburgimit prej 30 ditësh 26 protestuesve

• Ndihmëssekretari i OKB-së thotë se mospërcaktimi i statusit final të Kosovës ka penguar zhvillimin ekonomik

• Departamenti amerikan i Shtetit dënon dhunën e ditëve të fundit në Kosovë

• Pentagoni mund të tërheqë gjysmën e 71 mijë trupave të veta nga bazat në Gjermani

• Tri pikturat në hollin e Kuvendit të e Kosovës janë mbuluar me perde

• Interpretime kundërthënëse për shkarkimin e zëdhënësve Izabela Karlovic dhe Derek Çapell

• Ftohen të rinjtë shqiptarë në Zvicër të zbulojnë talentin e tyre në muzikë dhe në art

• Në një sulm në veri të Bagdadit, është vrarë një ushtar amerikan

• Dëshmi publike për sulmet e 11 shtatorit

• KS dënont vrasjen e sheikut Ahmed Jasin

• Pol Bremer: Iraku ka filluar rrugën e demokracisë në paqe me fqinjët e tij

• Bler shkon në Libi

• Në Pakistan janë vrarë mbi 50 militantë të Al Kaidës

• Forcat e sigurimit kanë vrarë 11 demonstrues në Bregun e Fildishtë

Presidenti Rugova dënon fuqishëm vrasjen e policëve

 

Prishtinë, 25 mars 2004 - Presidenti i Kosovës Ibrahim Rugova e dënoi dje fuqishëm vrasjen e dy policëve dhe plagosjen e përkthyesit të tyre, që ndodhi të martën mbrëma në rrugën Prishtinë-Podujevë.

Presidenti Rugova thekson se ky është akt i rëndë kriminal i drejtuar kundër policisë së Kosovës dhe policisë ndërkombëtare. Ky krim duhet të hetohet dhe përgjegjësit të nxirren para drejtësisë.

Vënia në shënjestër e cilitdo në Kosovë, e sidomos e organeve për zbatim të ligjit, të rendit dhe të sigurisë, është kundër rendit demokratik dhe perspektivës së vendit tonë, Kosovës, nënvizoi Presidenti Rugova.

Presidenti i Kosovës ngushëllon familjet e policëve të vrarë, ndërsa i uron shërim të shpejtë përkthyesit të plagosur.

 

 

Moisiu i ka dërguar një mesazh Rugovës në pesëvjetorin e bombardimeve të NATO-s

 

Tiranë, 25 mars 2004 - Në një mesazh dërguar Presidentit të Kosovës Ibrahim Rugova me rastin e pesëvjetorit të bombardimeve të NATO-s, Presidenti i Shqipërisë Alfred Moisiu, pos tjerash ka thënë se NATO-ja me aktin e vet historik i dha goditjen përfundimtare njërit prej regjimeve kriminale në botë, ndali gjenocidin ndaj shqiptarëve dhe parandaloi katastrofën humanitare më të madhe që ka njohur Evropa nga Lufta e Dytë Botërore.

Në këtë mesazh të presidentit Moisiu, mëtutje thuhet, se respekti i thellë dhe mirënjohja e lartë e të gjithë shqiptarëve i adresohet NATO-s, Shteteve të Bashkuara dhe vendeve të tjera anëtare.

 

Në fund të këtij mesazhi të presidentit Moisiu, dërguar presidentit Rugova theksohet se ngjarjet e fundit tregojnë edhe njëherë se sa i rëndësishëm dhe i nevojshëm është përshpejtimi i procesit për përcaktimin e statusit të ardhshëm të Kosovës.

 

 

Kofi Anan dënon vrasjen e dy policëve në Kosovë

 

Nju Jork, 25 mars 2004 - Sekretari i përgjithshëm i OKB-së Kofi Anan ka dënuar vrasjen e dy policëve në Kosovë.
Anani sulmet kundër nëpunësve të policisë i ka dënuar me termet më të ashpra të mundshme. "Dhuna më e re dhe jostabiliteti në Kosovë nuk guxon të tolerohet", ka thënë Anani në Nju Jork.

 

 

Shtefan Feler thotë se vrasja e dy policëve nuk duhet të lidhet me trazirat e fundit në Kosovë

 

Prishtinë, 25 mars 2004 - Policia e Misionit të OKB-së nuk dëshiron që të lidhë vrasjen e dy policëve me trazirat e javës së kaluar. Zyrtarët e policisë thanë se sulmuesit kanë ikur nga vendi i ngjarjes, pasi që policia kishte shtënë në drejtim të tyre me armë.

 

Megjithatë, në ikje e sipër njëri nga të dyshimtit është plagosur dhe më vonë policia e ka gjetur të vdekur në një fshat afër Podujevës. Identiteti i të vrarëve nuk është bërë i ditur ende.

Komesioneri i policisë ndërkombëtare në Kosovë, Shtefan Feller ka thënë se vrasja e dy policëve nuk duhet të lidhet me trazirat e fundit në Kosovë.

 

Ai ka shtuar se përpjekja e një grupi të caktuar për ta çrregulluar rendin dhe ligjin në ditët e kaluara kanë kontribuar në krijimin e një ambienti ku inkurajohen aktivitetet kriminale. Feler ka theksuar se vdekja e dy policëve duhet të jetë një thirrje për popullin e Kosovës.

 

 

Holkeri pranon se misioni i Kombeve të Bashkuara në Kosovë ka bërë gabime

 

Paris, 25 mars 2004 - Kryeadministratori i Kosovës Hari Holkeri në një deklaratë për agjencinë franceze të lajmeve AFP ka thënë se misioni i Kombeve të Bashkuara në Kosovë ka bërë gabime. Megjithatë, ai ka kërkuar nga të dyja komunitetet më të mëdha në Kosovë që të përpiqen të jetojnë së bashku në mënyrë paqësore.

Në të njëjtën deklaratë, Holkeri ka theksuar se është i vetëdijshëm për fustrimin dhe për përparimin e ngadalshëm që është bërë në Kosovë.

"Misioni i UNMIK-ut ka bërë gabime, por ne do të reflektojmë në mënyrë që t'i përmirësojmë ato", ka thënë shefi i UNMIK-ut.

 

 

Kryeparlamentari Daci priti kryeadministratorin Holkeri

 

Prishtinë, 25 mars 2004 - Në takimin e sotëm të PSSP të OKB-së në Kosovë, Harri Holkeri, me kryetarin e Kuvendit të Kosovës, Nexhat Daci është shqyrtuar bashkëpunimi ndërmjet institucioneve të vendit dhe mekanizmave ndërkombëtarë, në funksion të sanimit të pasojave dhe mbarëvajtjes së aktiviteteve për qytetarët.

Kryeparlamentari Daci e ka njoftuar zotin Holkeri me programin e Kuvendit të Kosovës për mbështetje të Qeveerisë lidhur me meremetimet e shtëpive dhe të objekteve të djegura të kultit dhe për vizitat kuvendeve komunale, për të nxitur mbështetjen gjithpërfëshirëse të aftësimit të objekteve të dëmtuara.

 

Profesor Daci ka kërkuar që të luftohet kriminaliteti dhe të veprojë drejtësia. Ai njëkohësisht ka kërkuar që të mbyllen kufinjtë e Kosovës për kriminelët dhe të mos lejohet të veprojnë njerëz të uniformuar dhe të armatosur në pjesën veriore të Kosovës.

Numri një i legjislativit të Kosovës e ka lutur kryeadministratorin e Kosovës që mekanizmat ndërkombëtarë të vendosur në Kosovë, të respektojnë institucionet legjitime të vendit dhe të bëjnë dallimin ndërmjet liderëve politikë dhe të zgjedhurve nga vota e popullit.

PSSP të OKB-së në Kosovë, Hari Holkeri është pajtuar që në funksion të sanimit të sukseshëm të gjendjes së krijuar dhe të avancimit të proceseve në Kosovë, duhet të krijohet partneriteti i vërtetë ndërmjet ndërkombëtarëve dhe institucioneve të vendit, thuhet në një njoftim nga ky takim.

 

 

Solana: BE do të vazhdojë ta ndihmojë zhvillimin e Kosovës, por pakicat duhet të mbrohen

 

Bruksel, 25 mars 2004 - Shefi i diplomacisë së BE Havier Solana tha sot në Bruksel se ngjarjet e javës së kaluar në Kosovë kanë qenë të organizuara, duke kërkuar nga liderët e Kosovës që të thonë qartë se kush qëndron pas akteve të dhunës dhe autorët e dhunës të nxirren para drejtësië.

Solana para gazetarëve ka theksuar se 15 evropiane mbështet politikën "standardet para statusit", por ai shtoi se aktet e dhunës nuk janë standarde të Bashkimit Evcropian.

Gjithashtu Solana ka thënë se Bashkimi Evropian do të vazhdojë ta ndihmojë zhvillimin e Kosovës, por se pakicat, tha ai, duhet të mbrohen. Askush sa BE nuk ka dhënë para për kokë banori në Kosovë, tha ai.

Në pyetjen se kush qendron pas dhunës së javës së kaluar në Kosova, Solana ka thënë se ajo nuk ka qenë spontane duke shtuar se "kjo ka qenë dhunë e orkestruar".

I pyetur nëse BE është fajtor për ngjarjet tragjike, ai e mohoi këtë, duke thënë se UNMIK-u dhe KFOR-ia janë të ngarkuar për sigurinë në Kosovë, ndërkaq BE jep përkrahje ekonomike dhe të tjera, ka thënë Solana.

 

 

Holkeri takoi Dacin dhe Rexhepin

 

Prishtinë, 25 mars 2004 - Shefi i UNMIK-ut Hari Holkeri ka takuar sot kryeparlamentarin Nexhat Daci dhe kryeministrin Bajram Rexhepi. Në qendër të bisedave kanë qenë ngarjet në vend pas trazirave të javës së kaluar.
Holkeri pas takimit me Dacin tha se se "kanë pasur një takim konstruktiv".

 

 

Kuvendi i Kosovës: Nuk do të ketë sukses asnjë tendencë e ndarjes, kantonizimit apo e copëtimit të Kosovës

 

Prishtinë, 25 mars 2004 - Kuvendi i Kosovës në seancën e sotme diskutoi për rrjedhat aktuale në Kosovë dhe dënoi dhunën në trazirat e ditëve të kaluara, ndërkohë që nuk miratoi asnjë vendim. Kuvendi njëherit kërkoi edhe analizën e rrethanave të cilat bënë që protestat e ligjshme të shndërrohen në ato të dhunshme. Fillimisht kryeparlamentari Nexhat Daci tha par deputetëve se nga vlerësimet që i bën ky kuvend ngjarjeve "ne do të dalim më shpejt apo më ngadalë nga kjo gjendje dhe të mund t'i kthehemi normalitetit dhe partnerizmit të njëmend me bashkësinë ndërkombëtare në realizimin e qëllimeve tona".

 

Edhe pse kemi tërhequr vërejtjen tash sa kohë, - tha Daci - demosratat e 17 e 18 marsit na zunë në befasi - edhe neve si institucione kosovare edhe institucionet ndërkomëbtare.

Ai tha se hetimet do të tregojnë se si një demostratë me norma demokratike, krejtishit të ligjshme, me një motiv krejt të qartë, për të protestuar kundër mbytjes në lumin Ibër të tre fëmijëve dhe kundër bllokimit të magjistrales Prishtinë-Shkup, u shndërrua në demostratë të dhunshme me pasoja shumë të rënda.

Sipas Dacit, këto ngjarje sa të rënda që janë "nuk do të na largojnë nga rruga jonë e trasuar sa kohë, nga qëllimet tona në interes të popullit të Kosovës, të rajonit dhe të Evropës".

"Nuk do të ketë sukses asnjë tendencë përçarëse, asnjë tendencë e ndarjes së Kosovës, e enklavizimit, kantonizimit apo e copëtimit të saj", tha Daci duke shtuar se "Kosova mbetet një dhe e tërë dhe të drejtat dhe liritë do t'i realizojnë të gjithë qytetarët e saj pa dallim". Ai tha se Kuvendi do të vazhdojë me punën e rregullt për miratimin e ligjeve.

Daci bëri të ditur se në kryesi dhe në bisedë me shefat e grupeve parlamentare është ndërtuar një plan operativ për të vizituar disa komuna për të sanuar gjendjen dhe për të marrë vërejtje dhe propozime konkrete.
Alush Gashi, në emër të deputetëve të LDK-së, tha se "duke e riafirmuar të drejtën për protestë e kundërshtojmë dhunën".
Ai theksoi se dhuna nuk është përcaktim i shumicës së qytetarëve të Kosovës dhe se "përcaktim yni është paqja, barazia dhe shansa e njetë për të gjithë".

"Jemi përfaqësues të shumicës, andaj shprehim gatishmërinë dhe angazhimin tonë për mbrojtje të pakicave dhe pronës se tyre", tha ai, duke shtuar se nevojitet edhe vullneti i pakicës që të angazhohet në të mirë të Kosovës e jo kundër saj.

Në vazhdim deputeti Gashi, pasi konstatoi se sot po diskutohet për gjendje në në Kosovë pa analizë, kërkoi të formohet një komision parlamentar Ad-Hoc për hulumtimin e shkaqeve për tragjedinë e ditëve të shkuara.
Ai tha se njollosja e tërë popullit të Kosovës nga qarqe të ndryshme është e papranueshme dhe kontraproduktive.
"Paqja dhe demokracia është shansa jonë. Ne e riafirmojme përcaktimin për bashkëpunim vendor dhe ndërkombëtar në të mirë të paqes dhe prosperitetit për të gjithë qytetaret e Kosovës...në të mirë të përcaktimit tonë të fuqishëm politik për një Kosovë të pavarurë dhe demokratike sipas vlerave euro-atlantike", tha në fund Alush Gashi.
Sabri Hamiti, shef i Grupit parlamentar të LDK-së, tha se protestat në fillim ishin spontane, por në vazhdim morën karakter organizimi. Ai tha se nuk është mirë të krijohet efekti i dhunës për kërkesa politike dhe për këtë të derdhet përsëri gjak.

Deputeti Hamiti kritikoi deklaratat e disa politikanëve evropianë që ditëve të fundit qëndruan në Kosovë. "Personalietet e mëdha politike kanë ardhur në Kosovë dhe kanë diktuar qysh do të sillen institucionet e Kosovës", duke i quajtur ato diktat.

"Nëse institucionet e Kosovës pranojnë diktat nuk janë të pjekura ta kryejnë punën e vet", tha ai, duke shtuar: "Bashkëpunim po, por diktat jo"!

Sipas tij nuk mundet kurrfarë figure politike evropiane të vijë t'i mbledhë pesë vetë, që e quajnë veten udhëheqës të Kosovës dhe t'u diktojë si duhet të sillen publikisht. Ai tha se fuqia e institucioneve të Kosovës është të marrin qëndrime të veta, duke bashkëpunuar edhe me të tjerët, por jo të sillen sipas diktatit.

Deputeti i PDK-së Hashim Thaçi kërkoi që për ngjarjet e fundit të bëhet një analizë e hollësishme, bashkarisht me UNMMIK-un. Ai kërkoi nga qytetarët që të mos përsëriten ato që u kanë ndodhur vetë shqiptarëve pesë vjet më parë. Thaçi tha se qytetarët e Kosovës nuk do të pajtohen me ndarjen e Kosovës apo me kantonizimin e saj. Aktet e dhunës në mesin e protestuesve, tha ai, kanë qenë individuale dhe i quajti të papranueshme.

Bajram Kosumi, deputet i AAK-së tha se nuk mund të jipet kurrfarë vlerësimi për ngjarjet e kaluara për mengesë të një informacioni zyrtar nga përgjegjësit për siguri në Kosovë. Ai tha se nuk ka asnjë informacion zyrtar dhe vetëm di nga mediat për ato që kanë ndodhur. Kosumi theksoi se administrata e UNMIK-ut ka bërë gabime të mëdha, duke toleruar funksionimin luftënxitës të infrastrukurës së qeverisë serbe në Kosovë.

Ndonëse që më herët Kuvendi kishte ftuar shefin e UNMIK-ut Hari Holkeri, shefin e policisë së UNMIK-ut Shtefan Feler dhe komandantin e KFOR-it Holger Kamerhof për të raportuar në këtë senacë për situatën e sigurisë, por të gjitha ata kanë injoruar ftesën e Kuvendit të Kosovës.

 

 

Bastali në Gjilan: Ngjarjet e 17 e 18 marsit ishin një fatkeqësi që duhet të tejkalohet

 

Gjilan, 25 mars 2004 - Françesko Bastali, ndihmës i përfaqësuesit special të sekretarit të përgjithshëm, vizitoi sot Gjilanin dhe në një takim të përbashkët me udhëheqjen komunale, KFOR-in, SHPK-në dhe të tjerë, ka biseduar për gjendjen pas protestave të javës së kaluar.

Lutfi Haziri, kryetar i komunës, e njohu z. Bastali me masat që ka ndërmarrë komuna për qetësimin e situatës.

Komuna ka përcaktuar masat që do t`i ndërmarrë për kthimin e normalitetit dhe në bashkëpunim me Qeverinë e Kosovës, e cila tashmë ka ndarë 5 milionë euro për sanimin e pasojave, do të fillojë që nga nesër vlerësimin e dëmeve dhe riparimin e tyre, në mënyrë që të zhvendosurit të mund të kthehen sa më parë nëpër shtëpitë e veta.

Si mbështetje momentale për të zhvendosurit, komuna ka ndarë nga buxheti i saj 10 mijë euro, ka thënë Haziri.
Duke shprehur keqardhje për atë që ndodhi në Kosovë, ku humben jetën disa qytetarë dhe u lënduan shumë të tjerë, z. Bastali tha se është e domosdoshme që të kthehet mirëbesimi dhe të krijohen kushte për jetë normale të të gjithëve në Kosovë.

Ngjarjet e 17 e 18 marsit ishin një fatkeqësi që duhet të tejkalohet me angazhim të të gjithëve, ndërsa ata që kanë kryer akte të dhunës, duhet të përballen me drejtësinë, ka thenë Bastali.

 

 

Gjilan: Komisioni për vlerësimin e dëmeve fillon punën nesër

 

Gjilan, 25 mars 2004 - Komiteti për Siguri dhe Emergjencë, në takimin e sotëm ku mori pjesë edhe zëvendëskryetari i dytë i komunës Bozhidar Periq, ka vlerësuar se gjendja e sigurisë është dukshëm më e mirë dhe tash duhet të punohet në saninimin e pasojave.

Lutfi Haziri, kryetar i komunës, shprehu kënaqësinë që edhe z. Periq është kthyer në Komitet, tha se shpreson që bashkarisht do të punojnë në normalizimin e gjendjes.

Koloneli Riçard Xhonson nga KFOR-i tha se me vendim të Brigadës Shumëkombëshe të Lindjes, në këtë sektor do të jetë në fuqi edhe më tutje ora policore, nga 21:00 deri në 6:00 të mëngjesit dhe në rivendosja e kësaj mase është bërë dje pas vrasjes së dy policëve në veri të Prishtinës.

Edhe për SHPK-në, nata e mbrëmshme ka qenë e qetë, ka thenë kapiteni Izet Azizi. Ndoshta për shkak të ndryshimit të kohëzgjatjes së orës policore, qytetarët nuk kanë mundur të informohen me kohë dhe në katër raste është thyer ndalesa e lëvizjes, tha Azizi.

Zëvendëskryetari i dytë i komunës, Bozhidar Periq e vlerësoi si mjaft stabile situatën momentale në vendbanimet serbe, por këtë nuk e tha edhe për fshatrat e përziera, ku kërkoi nga KFOR-i dhe policia që t`i shtojnë patrullimet.

 

Periq tha se ende nuk ka filluar mësimi në shkollat serbe dhe, sipas tij kjo nuk mund të bëhet nëse KFOR-i dhe policia nuk bëjnë sigurimin e shkollave dhe nuk garantojnë përcjellje për nxënësit.

Enver Muja ka njoftuar se është formuar komisioni profesional për vlerësimin e dëmeve në objekte dhe që nga nesër do të fillojë punën, prandaj duhet të jenë prezentë pronarët e shtëpive në momentin e vizitës.

Lutfi Haziri ka prezentuar në fund edhe planin aksional për veprim i cili parashehë kthimin e të zhvendosurve në shtëpitë e padëmtuara, mbështetje financiare për ta, biseda me fqinjtë për të siguruar ambient të qëndrueshëm për kthim, regjistrimin e dëmeve dhe sanimin e pasojave si dhe ofrimin e sigurisë nga KFOR-i dhe SHPK-ja.

 

 

Dega e LDK-së në Viti u shpreh përkrahje të paluhatshme institucioneve të Kosovës

 

Viti, 25 mars 2004 - Ngjarjet e fundit në Kosovë, të cilat përfshinë edhe komunën e Vitisë rrezikuan paqen dhe lirine e Kosovës, ato kërcënuan rendin demokratik, degraduan proceset pozitive dhe progresin e arritur, dëmtuan raportet me miqtë tanë dhe si të tilla ndikuan që të zbehet imazhi pozitiv per Kosoven dhe qytetarët e saj, thuhet në një komunikatë të degës së LDK-së në Viti.

- Megjithë mirëkuptimin dhe solidarizimin tonë me revoltën spontane dhe të aresyeshme dhe konsideratën për pakënaqësitë e qytetarëve, - thuhet më tutje në komunikatë - jemi te tronditur me eskalimin e dhunës dhe dënojme ashper aktet kriminale që u manifestuan gjatë këtyre protestave.

Dega e LDK-se në Viti shpreh përkrahjen e vendosur dhe të paluhatshme ndaj institucioneve të Kosovës dhe fton qytetarët që me veprimet, aktivitetet dhe angazhimet e tyre te kontribuojne ne kthimin e normalitetit dhe stabilizimin sa më të shpejtë të situates, duke u shprehur ngusheëlimet e thella familjeve të femijëve të mbytur në mënyrë mizore në lumin Ibër si dhe të gjithë atyre qe humben më të dashurit e tyre gjate trazirave në Kosove.

 

 

Mbrëmë në pjesën veriore të Mitrovicës një serb ka plagosur me granatë dy pjëstarë të KFOR-it

 

Mitrovicë, 25 mars 2004 - Një serb ka plagosur mbrëmë dy pjesëtarë francezë të KFOR-it në pjesën veriore të Mitrovicës, kanë njoftuar burimet e policisë ndërkombëtare në Mitrovicë. Njoftohet se sulmuesi është arrestuar dhe bëhet fjalë për një serb nga Prishtina, i cili kishte ikur nga burgu i Kurshumlisë dhe fshihej në Mitrovicë.

 

 

Ombudspersoni i Kosovës korrigjon deklaratën e djeshme për ngjarjet e fundit në Mitrovicën veriore

 

Prishtinë, 25 mars 2004 - Ombudspersoni nëpërmjet një njoftimi për media informon opinionin në Kosovë që informatat në të cilat ai e bazoi deklaratën e tij të djeshme rreth largimit me forcë nga ana e serbëve të një numri të madh të familjeve shqiptare, boshnjake dhe turke që jetojnë në Mitrovicën veriore, kishin qenë të pasakta.

Edhe pse gjatë ditëve të fundit mund të ketë pasur incidente të vetmuara ku individët janë larguar nga shtëpitë e tyre, nuk kishte pasur largim të shkallës së madhe të organizuar nga pjesëtarët e bashkësisë serbe në Mitrovicën veriore.

Në këto rrethana, nuk është e vendit të flitet për "pastrim etnik" apo çfarëdo lloji të ngjashëm të ngjarjeve në Mitrovicën veriore, thuhet në këtë njoftim të Ombudspersonit të Kosovës.

 

 

F.Hartman: Tribunali i Hagës nuk është kompetent për krimet e ditëve të fundit në Kosovë

 

Hagë, 25 mars 2004 - Prokuroria e Tribunalit të Hagës nuk është kompetente të bëjë hetime dhe të ndjekë penalisht përgjegjësit për krimet që ditëve të fundit janë bërë në Kosovë, ka deklaruar përgfaqësuesja për shtyp e prokurorisë Florans Hartman.

 

Me përjashtim të gjenocidit, thotë Hartman, të gjitha krimet e tjera të cilat janë në kompetencë të Tribunalit janë të kushtëzuara me ekzistimin e "konfliktit të armatosur", i cili në Kosovë ka pushuar me nënshkrimin e Marrëveshjes së Kumanovës, me vendosjen e trupave të NATO-s dhe me vendosjen e administratës së OKB-së.

Ndërkaq, zëdhënësi i Tribunalit Xhim Lendejl ka thënë se pas ndërprerjes së konflikteve të armatosura në Kosovë për hetimet dhe ndjekjen penale kompetentë janë gjykatat e UNMIK-ut dhe ato lokale.

 

 

Administrata komunale e Prishtinës u bëjnë thirrje qytetarëve të pajisen me dokumente udhëtimi

 

Prishtine, 25 mars 2004 - Pajisja e qytetarëve me dokumente udhëtimi të UNMIK-ut tashmë është bërë një problem jo i thjeshtë. E para, sepse numri i atyre që aplikojnë në administratën e shërbimit civil për këto dokumente është tepër i madh dhe nga ana tjetër pengesë tepër e vështirë për të kapërcyer aplikuesit është Urdhëresa administrative që pat lëshuar ish administratori i Kosovës vitin e kaluar e ku thuhej se qytetarët duhet të sjellin bashkë me aplikacionin edhe një dokument me fotografi të lëshuar më parë nga ish-pushteti serb në Kosovë për të dëshmuar se aplikuesi ka qenë banor i Kosovës edhe para luftës.

Andaj, udhëheqësit e këtij shërbimi, ndërkombëtarë dhe vendorë, u bëjnë thirrje qytetarëve që ende nuk janë pajisur me këto dokumente ta bëjnë këtë sa më parë gjatë ditëve vijuese, sepse gjatë muajve të verës do të jetë shumë më vështirë, për faktin se numri i aplikuesve do të jetë shumë më i madh se deri më tani, thuhet në një njoftim të administratës së komunës së Prishtinës.

 

 

Zhbllokohet rruga Prishtinë-Gjilan

 

Prishtinë, 25 mars 2004 - Prej sot është e hapur rruga Prishtinë-Gjilan për të gjitha llojet e automjeteve përveç autobusëve që nga ora 6.00 e mëngjesit e deri në orën 20.00, bëri të ditut zëdhënësi i SHPK-së Refki Morina.
Prej disa ditësh kjo rrugë ka qenë e bllokuar nga serbët lokalë në Graçanicë, fshat i banuar me serbë, nëpër të cilin kalon kjo rrugë që çon në Gjilan.

 

 

NATO-ja ndërpret përpilimin e planeve për reduktimin e Misionit të KFOR-it në Kosovë

 

Bruksel, 25 mars 2004 - Për shkak të dhunës në javën e kaluar në Kosovë, NATO-ja tash është detyruar jo vetëm të dërgojë forcime ushtarake që mbërrijnë në tre mijë ushtarë shtesë nga rezervat speciale, por edhe të ndërpresë përpilimin e planeve për racionalizimin dhe transformimin e misionit të KFOR-it në Kosovë që ishte paraparë të ndodhte në këtë verë, thanë zyrtarët e NATO-s në Bruksel pas takimit të Këshillit të Aleancës.

 

"Tash për momentin i kemi ndërprerë ato plane dhe do të presim e të shohim rrjedhën e situatës në ditët që vijnë për të parë kah duhet të vazhdojmë, tha një zyrtar i NATO-s". Fokusi i NATO-s në Kosovë tash është të identifikojë, të arrestojë dhe të dënojë nxitësit dhe organizatorët e dhunës së javës së shkuar dhe të krijojë kushte për kthimin e të zhvendosurëve, u tha gazetarëve në selinë e NATO-s një zyrtar ushtarak i kësaj Aleance.

 

 

Presidenti Bush falënderon kancelarin gjerman për dergimin e 600 trupave në Kosovë

 

Berlin, 25 mars 2004 - Presidenti amerikan Xhorxh Bush në një bisedë telefonike mbrëmë vonë e falënderoi kancelarin gjerman Shrëder për pozicionimin e tij të qartë në luftën e përbashkët kundër terrorizmit.

Siç njofton agjencia gjermane DPA në bisedën telefonike që zgjati 15 minuta, presidenti Bush e falënderoi kancelarin gjerman për dërgimin e 600 trupave paqeruajtëse shtesë në Kosovë, duke e ngritur numrin e trupave gjermane këtu në 3800.

 

 

Komandanti i KFOR-it u ka dhënë përgjegjësi trupave paqeruajtëse që të imponojnë orë policore

 

Prishtinë, 25 mars 2004 - Në kuadër të masave shtesë që janë ndërmarrë nga KFOR-i komandanti i KFOR-it Holger Kamerhof u ka dhënë përgjegjësi komandandantëve të brigadave shumëkombëshe që të imponojnë orë policore në zonat ku ata operojnë, aty ku duhet për aq gjatë sa ata e ndjejnë se ekziston kërcënimi, ka bërë të ditur zëdhënësi i KFOR-it Xhim Moran.

 

 

Data e 24 marsit të vitit 1999 ishte një ditë e shpresës për qytetarët e Kosovës

 

Prishtinë, 25 mars 2004 - Në manifestimin e Forumit Rinor të LDK-së "Ditët e shpresës" me rastin e shënimit të pesëvjetorit të bombardimeve të NATO-s, të mbajtur në hotelin "Grand" në Prishtinë, kryetari i këtij forumi, Lulzim Zeneli tha se 24 marsi i vitit 1999 ishte një ditë e shpresës për qytetarët e Kosovës.

"Jemi këtu për të dëshmuar më shumë se kurrë kjo gjendje aktuale dhe kjo moto është më se domosdoshme edhe në këtë manifestim tradicidonal, sepse kjo ditë, 'Dita e shpresës' është për të gjithë ata që përjetuan tmerr, hiç më larg se para pesë vitesh", tha Zeneli.

Të gjithë pjesëmarrësit e manifestimit, shprehën mirënjohjen e falënderimin e thellë për Aleancën Veriatlantike, e cila e kishte marrë në mbrojtje popullin e Kosovës.

Fatmir Sejdiu, deputet në Parlamentin e Kosovës, tha se kjo është një datë shumë e rëndësishme për popullin e Kosovës. Ai tha se populli i Kosovës do të kujtojë jo vetëm këtë pesëvjetor, por edhe gjithë përvjetorët e ardhshëm, për një ndërhyrje të mrekullueshme të forcave ndërkombëtare për të shpëtuar popullin e Kosovës nga gjenocidi që i kanosej.

Në manifestimin "Dita e shpresës" morën pjesë edhe përfaqësues të partive të tjera politike të Kosovës dhe përfaqësues të zyrave të huaja diplomatike në Prishtinë.

Në këtë përvjetor të rëndësishëm, pjesëtarëve të KFOR-it dhe të policisë ndërkombëtare në shumë mjedise të Kosovës iu dhuruan lule.

 

 

Situata në Mitrovicë ka filluar të stabilizohet

 

Mitrovicë, 25 mars 2004 - Bordi i Drejtorëve të administratës komunale, në mbledhjen e sotme të kryesuar nga Mustafë Pllana, kryeshef, ka shqyrtuar situatën e përgjithshme në komunë dhe disa çështje nga fushëveprimi i vet.

Bordi i Drejtorëve ka konstatuar se situata në komunë, pas trazirave të javës së kaluar, ka filluar të stabilizohet dhe se qytetarët po i kthehen jetës normale. Bordi i Drejtorëve, poashtu ka konstatuar se janë konsoliduar të gjitha institucionet e pushtetit lokal dhe ato po i kryejnë punët dhe përgjegjësitë e parashtruara, me përjashtim të Çerdhës së Fëmijëve, Qendrës së Kulturës dhe Palestrës Sportive, të cilat gjenden në "zonën e mirëbesimit" dhe për të cilat akoma nuk është dhënë leja për fillimin e punës nga KFOR-i.

U vlerësua se administrata lokale është duke ofruar ashtu si duhet shërbime për qytetarët. Sektori i gjendjes civile është duke funksionuar me sukses dhe kërkesat e qytetarëve për dokumentacion të nevojshëm dhe shërbime të tjera, kryhen në afatin optimal.

Poashtu, që nga data 24 marsi është aktivizuar edhe administrata komunale e UNMIK-ut për dhënjen e dokumentave personale dhe të udhëtimit për qytetarë.

Anëtarët e Bordit konstatuan se për shkak të problemeve në identifikimin e shtëpive dhe të disa problemeve tjera përcjellëse, ende nuk është saktësuar numri i shtëpive serbe të shkatërruara në Frashër, por kjo pritet të bëhet gjatë ditës së sotme.

Anëtarët e Bordit u njoftuan se në organet e administratës së Kuvendit të Komunës, deri tash janë paraqitur 21 familje shqiptare që kanë qenë të detyruara nga ekstremistët serbë të zhvendosen nga pjesa veriore e qytetit, në ate jugore.

 

 

Një delegacion i FR të LDK-së vizitoi dje SHP të TMK-së

 

Prishtinë, 25 mars 2004 - Një delegacion i Kryesisë qendrore të Forumit të Rinisë të LDK-së, i kryesuar nga nënkryetari Sejdë Tolaj, gjatë ditës së djeshme, ka vizituar Shtabin e Përgjithshëm të Trupave Mrojtëse të Kosovës.

 

Ata u pritën nga kolonel Arif Muçolli - shef i Departamentit për marrëdhënie ushtarako-civile, me bashkëpunëtorë. "Kjo është një ditë e veçantë për tërë Kosovën. Prandaj, ju falenderoj që na e bëni këtë vizitë", tha z.Muçolli, i cili më pastaj shpalosi para delegacionit të FR të LDK-së punën që është duke e bërë TMK-ja. Ai tha se TMK-ja është një vazhdimësi e UÇK-së, e cila sot në liri ka për qëllim ndërtimin dhe mbrojtjen e vendit.

 

"Ne jemi neutral në politikë, por se është e nevojshme të përkrahim çdo qëndrim politik të popullit", tha ai.
Ndërsa Sejdë Tolaj, nënkryetar i FR të LDK-së, tha se kjo vizitë është pjesë e agjendës, që është përcaktuar për këtë ditë. "Ne kemi respekt të veçantë për TMK dhe institucionet tjera të Kosovës", shtoi z.Tolaj.

 

"Meqë kjo është vazhdimësi e UÇK-së, ne jemi të interesuar që të avancohet, dhe se rinia dëshiron që këtë ta shohë si ushtri të përgatitur për ta mbrojtur integritetin territorial dhe kufijtë e Kosovës"- nënvizoi z.Tolaj.

Në vazhdim, ai potencoi se si FR i LDK-së e viziton TMK-në për arsye se e çmon për të gjitha përpjekjet e saj në ndërtimin e Kosovës. Nënkryetari Tolaj porositi TMK-në që të ruajë neutralitetin e vet politik.

Kah përfundimi i këtij takimi, erdhi edhe gjenerallejtnant Agim Çeku, i cili u përshëndet ngrohtësisht me delegacionin e të rinjve të LDK-së. Pasi u tregoi këtyre se ishte në një vizitë në familjet e fëmijëve në Çabër, dhe se për këtë nuk kishte mundur të vinte me kohë në këtë takim, gjeneral Çeku tha se është i nderuar me këtë vizitë që po ia bëjnë të rinjtë e LDK-së. Ai u shfaqi atyre edhe shqetësimin e vet për ngjarjet e fundit që kanë ndodhur në Kosovë.

"24 marsi është dita e bashkëpunimit të mirë me NATO-n, dhe këtë bashkëpunim duhet ta ruajmë edhe në të ardhmen", u tha të rinjve të LDK-së gjeneral Çeku. Delegacioni, pas përfundimit të takimit, u dhuroi lule pjesëtarëve të TMK-së.

 

 

Milosheviq ka vazhduar të mos pranojë ndërrimin e kryegjykatësit të Tribunalit të Hagës

 

Hagë, 25 mars 2004 - Ish-presidenti jugosllav, Slobodan Milosheviq, ka vazhduar të kundërshtojë të pranojë ndërrimin e kryegjykatësit të Tribunalit të Hagës, ku po gjykohet për krime lufte kundër njerëzimit, njofton BBCnews. Riçard Mej, i cili e ka udhëhequr Tribunalin qëkur e ka filluar punën në shkurt 2002, e ka lënë postin për shkaqe shëndetësore.

 

Tash, dy gjykatësit e mbetur të Tribunalit, Patrik Robinson nga Xhamajka dhe O-gon Kuon nga Koreja e Jugut, duhet të marrin vendim për të zëvendësuar gjykatësin Mej dhe të vazhdojnë gjykimin. Rekomandimi i tyre duhet të aprovohet nga Kombet e Bashkluara.

 

 

Ministri i jashtëm slloven thotë se vendi i tij është i gatshëm ta ndihmojë Kosovën

 

Prishtinë, 25 mars 2004 - Ministri i jashtëm slloven, Dimitrije Rupel tha se vendi i tij është i gatshëm ta ndihmojë Kosovën në forma të ndryshme, në veçanti për tejkalimin e situatës së krijuar kohët e fundit. Gjatë qëndrimit në Prishtinë, Rupel pati takime të ndara me kryeadministratorin e Kosovës Hari Holkeri dhe me kryeministrin Bajram Rexhepi.

Rupel ka thënë se Qeveria sllovene do të bashkëpunojë ngushtë me me Qeverinë e Kosovës. Ndërkaq kryeministri Rexhepi çmoi gatishmërinë e Qeverisë sllovene për ta ndihmuar Kosovën pas situatës së krijuar.

 

 

Gjykata komunale në Gjilan u ka shpallur masën e paraburgimit prej 30 ditësh 26 protestuesve

 

Gjilan, 25 mars 2004 - Gjykata komunale në Gjilan u ka shpallur masën e paraburgimit prej 30 ditësh 26 protestuesve të arrestuar nga 17 marsi për shkak të manifestimit të akteve të dhunshme gjatë protestave të 17 dhe 18 marsit, ka konfirmuar gjykatësi hetues në këtë gjykatë Abdullah Ahmeti.

 

Ai tha se gjatë fazës së paraburgimit ndaj tyre do të zhvillohen hetimet në bazë të dyshimit të bazuar dhe kjo në bazë të kërkesës nga Prokuroria publike komunale. Sipas këtij gjykatësi, një të mituri të arrestuar i është caktuar paraburgimi prej 8 ditësh.

 

 

Ndihmëssekretari i OKB-së thotë se mospërcaktimi i statusit final të Kosovës ka penguar zhvillimin ekonomik

 

Tiranë, 25 mars 2004 - Ndihmëssekretari i përgjithshëm i OKB-së dhe drejtori i Zyrës rajonale për Evropën Kalman Mishel, gjatë vizitës në Tiranë, ka deklaruar se mungesa e përcaktimit të qartë të statusit përfundimtar të Kosovës ka penguar edhe zhvillimin ekonomik të saj.

 

Kjo është një nga arsyet e nivelit shumë të lartë të papunësisë dhe papunësia e lartë shërben si lëndë zjarri për të çuar në sjellje shoqërore, që nuk janë konstruktive. Ai tha se për të gjithë Ballkanin duhet të ketë paqe dhe të gjenden zgjidhje që të kemi një qetësi, tha ndihmëssekretari i përgjithshëm i OKB-së.

 

 

Departamenti amerikan i Shtetit dënon dhunën e ditëve të fundit në Kosovë

 

Uashington, 25 mars 2004 - Departamenti amerikan i Shtetit e ka dënuar dhunën e ditëve të fundit në Kosovë dhe ka kërkuar që përgjegjësit për këtë të dalin para drejtësisë.

 

Drejtori i Zyrës për Çështje të Evropës Jugore dhe Qendrore në Departamentin amerikan të Shtetit, Çarls Inglish tha se Shtetet e Bashkuara do të mbetën të përkushtuara për një shoqëri demokratike dhe tolerante në Kosovës dhe se përpjekjet amerikane do të vazhdojnë të reflektojnë me përkushtim.

 

 

Pentagoni mund të tërheqë gjysmën e 71 mijë trupave të veta nga bazat në Gjermani

 

Uashington, 25 mars 2004 - Pentagoni mund të tërheqë gjysmën e 71 mijë trupave të veta nga bazat në Gjermani, siç është planifikuar me riorganizimin e forcave amerikane jashtë në periudhën e pasluftës së ftohtë, bën të ditur në një shkrim të sotëm (e enjte) "Uashington Post", duke cituar zyrtarët amerikanë, njofton Rojter.

 

Sipas këtij plani, baza më të vogla do të vendosen në Rumani dhe ndofta edhe në Bullgari, kurse vendtrajnimet do të hapen në Poloni. Bazat në Uzbekistan, në Taxhikistan dhe në Kirgizistan, që u formuan më 2001 për mbështetje të luftës në Afganistan, do të mbesin si vende trajnimi dhe si zona që do të përdoren për raste emergjente.

 

 

Tri pikturat në hollin e Kuvendit të e Kosovës janë mbuluar me perde

 

Prishtinë, 25 mars 2004 - Tri pikturat në hollin e Kuvendit të e Kosovës janë mbuluar me perde dhe deputetët nuk janë në dijeni se kush e ka marrë këtë vendim. As Kryesia e Parlamentit ende nuk e ka shfaqur qëndrimin e saj se kush e ka marrë këtë vendim.

Ndërkaq UNMIK-u e ka përshëndetur këtë vendim, duke mohuar të këtë bërë ndonjë kërkesë të re për heqjen e këtyre pikturave.

Me heqjen e këtyre pikturave është plotësuar kërkesa e deputetëve të komunitetit serb, të cilët ishin ankuar te Holkeri se pikturat paraqesin në mënyrë të njëanshme vetëm pjesë të historisë shqiptare.

 

 

Interpretime kundërthënëse për shkarkimin e zëdhënësve Izabela Karlovic dhe Derek Çapell

 

Prishtinë, 25 mars 2004 - Nga burimet brenda UNMIK-ut merret vesh se zëdhënëses së UNMIK-ut Izabela Karlovic dhe zëdhënësit të policisë ndërkombëtare Derek Çapell janë shkarkuar nga detyra që kanë ushtruar deri më tash si zëdhënës të këtyre dy institucioneve.

 

Thuhet se një vendim i tillë është marrë pasi që të dy zëdhënësit kanë dhënë deklarata të paqarta në mediat serbe, të cilat sipas UNMIK-ut kanë shkaktuar konfuzion në opinion.

Mirëpo, shefi i Zyrës për Informim të UNMIK-ut Sunil Narula tha sot në mëngjes se është shkarkuar zëdhënësi Derek Çapelli.

Izabela Karlovic ka thënë se nuk është në dijeni për një vendim të tillë dhe ajo po e kryen detyrën normalisht.

 

 

Ftohen të rinjtë shqiptarë në Zvicër të zbulojnë talentin e tyre në muzikë dhe në art

 

Cyrih, 25 mars 2004 - Forumi Rinor i LDK-së së bashku me personalitete të kulturës, artit, sportit që veprojnë në Zvicër ka filluar një nismë për të zbuluar talente të reja në lëmin e artit. Andaj i fton të gjithë të rinjtë shqiptarë nga të gjitha viset shqiptare (vajza e djem nga mosha 15-vjeçare e sipër) pa dallim orientimi politik që kanë talent në muzikë apo art të shfrytëzojnë rastin dhe të tregojnë talentin e tyre.

Në kontakt me disa artistë dhe kompozitorë shqiptarë, si dhe institucione kulturore në atdhe kjo nsimë ka hasur në përkrahje dhe është premtuar ndihma e tyre, duke shpresuar që këtë projekt ta përkrahë edhe Ministria e Kulturës së Kosovës së bashku me njërin nga TV shqiptare dhe mjetet e tjera të informimit.

Konkurrimet do të bëhen në këto fusha muzikore: në këngë folklorike, në këngë popullore, në muzikën e lehtë, në pop muzikë, në pop-rok, në rep-muzikë, vallëzim të të gjitha arteve, në aktrim, dhe humor si dhe skeçe të shkurtra 2-3 minutshe.

 

Paraqitja mund të bëhet deri në fund të prillit 2004 në këto adresa:

 

Talentët e Rinj/Postfach 355/ 3072 Ostermundingen 2 (BE)

Mob.: 078/8717467 dhe 076/3492186

E-Mail: fr_zvicer@ldk-kosova.org

 

 

Në një sulm në veri të Bagdadit, është vrarë një ushtar amerikan

 

Bagdad, 25 mars 2004 - Një ushtar amerikan është vrarë në një sulm kundër një autokolone në veri të Bagdadit, ka bërë të ditur sot (e enjte) ushtria amerikane, njofton Rojter. Gjeneral brigade, Mark Kimit, ndihmësdrejtor i operacioneve të ushtrisë amerikane në Irak, ka thënë se ushtari është vrarë dje afër Taxhit. Ky sulm ngre në 397 numrin e ushtarëve amerikanë të vrarë në aksione që kur ka filluar ndërhyrja amerikane në Irak para një viti.

 

 

Dëshmi publike për sulmet e 11 shtatorit

 

Uashington, 25 mars 2004 - Bashkëkryetarët e komisionit që hetoi sulmet terroriste të 11 shtatorit kundër Shteteve të Bashkuara, folën me gazetarët në përfundim të një seance 2-ditore dëshmish nga zyrtarë dhe ish zyrtarë amerikanë.

Ish guvernatori Thomas Keane e filloi deklaratën për mjetet e informimit në këtë mënyrë.

"Ne mësuan rreth dështimeve sistematike. Pati komunikim të dobët midis agjencive të rendit dhe atyre të zbulimit. Madje pati komunikim të dobët brënda FBI-së".

Ish-anëtari i Kongresit amerikan, Li Hamilton, tha se Departamenti i shtetit dhe Departamenti i mbrojtjes në administratën e presidentit Klinton dhe në administratën e tanishme të presidentit Bush morën shumë masa kundër terrorizmit. Megjithatë, shtoi ai, është e qartë se vemendja nuk u përqëndrua aty ku duhej.

 

 

KS dënont vrasjen e sheikut Ahmed Jasin

 

Nju Jork, 25 mars 2004 - Këshilli i Sigurimit i Kombeve të Bashkuara pritet të votojë sot mbi një rezolutë që dënon vrasjen nga Izraeli të udhëheqësit shpirtëror të grupit ekstremist Hamas, Sheikut Ahmed Jasin. Diplomatët kanë debatuar mbi këtë çështje që prej të martës.

Projektrezoluta e paraqitur nga algjerianët dënon vrasjen e Sheikut Jasin si dhe të gjitha sulmet terroriste kundër civilëve. Por ajo nuk u përgjigjet kërkesave të Shteteve të Bashkuara që të përfshijë një masë, e cila do të dënonte specifikisht terrorizmin palestinez.

 

 

Pol Bremer: Iraku ka filluar rrugën e demokracisë në paqe me fqinjët e tij

 

Bagdad, 25 mars 2004 - Administratori civil amerikan i Irakut, Pol Bremer, tha se ndërsa mbetet ende shumë punë për t'u bërë, Iraku ka filluar rrugën e demokracisë në paqe me fqinjët e tij.

Në një fjalim me rastin e fillimit të 100 ditëve të fundit deri në kalimin e pushtetit tek irakianët, zoti Bremer tha se sigurimi është një nga përparësitë kryesore për irakianët. Ai tha se këtë javë do të krijojë një ministri mbrojtjeje dhe një këshill të sigurimit kombëtar.

 

 

Bler shkon në Libi

 

Londër, 25 mars 2004 - Kryeministri britanik Toni Bler shkon në Libi dhe takohet me udhëheqësin libian, Muammar Gaddafi.
Bleri pritet t'i japë dorën Kolonel Gadafit në një tendë beduine diku në periferi të Tripolit.

Bler, i cili po ndjek shembullin e homologëve të tij italianë e spajollë, është udhëheqësi i parë britanik që viziton Libinë që në vitin 1943, kur këtë gjë e bëri Uinston Çërçilli.

Bler e ka lavdëruar Gadafin që ka dënuar me kurajë terrorizmin dhe ka eliminuar këto programe.

Si shkëmbim, Bler do ta sigurojë Gadafin se Britania do të përpiqet të bindë Shtetet e Bashkuara të heqin sanksionet tregtare ndaj Libisë.

 

 

Në Pakistan janë vrarë mbi 50 militantë të Al Kaidës

 

Islamabad, Pakistan, 25 mars 2004 - Në operacionin më të madh të deritashëm kundër luftëtarëve të Al Kaidës, që kanë ndërmarrë forcat qeveritare pakistaneze në zonën kufitare me Afganistanin, janë vrarë mbi 50 militantë dhe simpatizantë të forcave të tyre, ka bërë të ditur sot (e enjte) një zyrtar i lartë, njofton AP. Ai ka shtuar, gjithashtu, se ky operacion ka filluar para 10 ditësh dhe do të vazhdojë deri sa të "eliminohen krejtësisht" forcat e tyre.

 

 

Forcat e sigurimit kanë vrarë 11 demonstrues në Bregun e Fildishtë

 

Abixhan, Bregu i Fildishtë, 25 mars  2004 - Forcat e sigurimit kanë vrarë sot (e enjte) 11 demonstrues në Bregun e Fildishtë, njofton AP. Demonstruesit kishin organizuar një marsh masiv për të kërkuar zbatimin e marrëveshjes paqësore, që ishte arritur në Abixhan, të mbrojtur me tanke, ka thënë një zëdhënës i partisë kryesore opozitare.

 

Demonstruesit ishin vrarë në pjesë të ndryshme të qytetit gjatë përpjekjeve për shpërndarjen e tyre. Demonstruesit do të vazhdojnë demonstrimin derisa të plotësohen kërkesat, ka thënë ai.

  |  KULTURË  |  HISTORI  |   POLITIKË  |  OPINIONE  |  ADRESARI  |  ARKIVI  |