Komisioni për vlerësimin e dëmeve fillon punën nesër, Periq thotë se gjendja momentale e sigurië është stabile në vendbanimet serbe

Gjilan, 25 mars 2004 /TN/ Ilmi MUSLIU - Komiteti për Siguri dhe Emergjencë, në takimin e sotëm ku mori pjesë edhe zëvendëskryetari i dytë i komunës Bozhidar Periq, ka vlerësuar se gjendja e sigurisë është dukshëm më e mirë dhe tash duhet të punohet në saninimin e pasojave.

Lutfi Haziri, kryetar i komunës, i cili së bashku me liderët tjerë lokalë ka vizituar gjatë dy ditëve të kaluara serbët në Kufcë si dhe kishën ortodokse në qytet, duke shprehur kënaqësinë që edhe z. Periq është kthyer në Komitet,
tha se shpresoj që bashkarisht do të punojmë në normalizimin e gjendjes.

Koloneli Richard Jonson nga KFOR-i tha se me vendim të Brigadës Shumëkombëshe të Lindjes, në këtë sektor do të jetë në fuqi edhe më tutje ora policore, nga 21:00 deri në 6:00 të mëngjesit dhe në rivendosja e kësaj mase është bërë dje pas vrasjes së dy policëve në veri të Prishtinës.

Edhe për SHPK-në, nata e mbrëmshme ka qenë e qetë, ka thenë kapiteni Izet Azizi. Ndoshta për shkak të ndryshimit të kohëzgjatjes së orës policore, qytetarët nuk kanë mundur të informohen me kohë dhe në katër raste është thyer ndalesa e lëvizjes, tha Azizi.

Zëvendëskryetari i dytë i komunës, Bozhidar Periq e vlerësoi si mjaft stabile situatën momentale në vendbanimet serbe, por këtë nuk e tha edhe për fshatrat e përziera, ku kërkoi nga KFOR-i dhe policia që t`i shtojnë patrullimet. Periq tha se ende nuk ka filluar mësimi në shkollat serbe dhe, sipas tij kjo nuk mund të bëhet nëse KFOR-i dhe policia nuk bëjnë sigurimin e shkollave dhe nuk garantojnë përcjellje për nxënësit.

Askush nga ne nuk ka guxim të marrë përgjegjësinë për vazhdimin e mësimit, nëse nuk plotësohet kjo kërkesë e drejtuesve të shkollave dhe prindërve, ka thenë Periq.

Enver Muja ka njoftuar se është formuar komisioni profesional për vlerësimin e dëmeve në objekte dhe që nga nesër do të fillojë punën, prandaj duhet të jenë prezentë pronarët e shtëpive në momentin e vizitës.

Lutfi Haziri ka prezentuar në fund edhe planin aksional për veprim i cili parashehë kthimin e të zhvendosurve në shtëpitë e padëmtuara, mbështetje financiare për ta, biseda me fqinjtë për të siguruar ambient të qëndrueshëm për kthim, regjistrimin e dëmeve dhe sanimin e pasojave si dhe ofrimin e sigurisë nga KFOR-i dhe SHPK-ja.

Nuk ka ushtar e as polic që mund të kthejë ndjenjën e sigurisë më shumë se sa vetë fqinjët dhe duke qenë të vetëdijshëm për këtë, ne do të punojmë më shumë në këtë drejtim që të sigurojmë një ambient të sigurtë për të gjithë, tha Haziri.