|  KULTURË  |  HISTORI  |   POLITIKË  |  OPINIONE  |  ADRESARI  |  ARKIVI  | 

Zëvendësi i PSSP, Francesko Bastali vizitoi Gjilanin

Gjilan, 25 mars 2004/TN/ Ilmi MUSLIU - Francesko Bastagli, zëvendës i përfaqësuesit special të sekretarit të përgjithshëm e vizitoi të enjten Gjilanin dhe në një takim të përbashkët me udhëheqjen komunale, KFOR-in, SHPK-në dhe të tjerë, ka biseduar për gjendjen pas protestave të javës së kaluar.

 

Lutfi Haziri, kryetar i komunës e njohu z. Bastagli me masat që ka ndërmarrë komuna për qetësimin e situatës dhe me këtë rast falënderoi KFOR-in, SHPK-në, TMK-në, liderët lokalë dhe të tjerët që ndihmuan në uljen e tensioneve dhe qetësimin e situatës.

 

Komuna ka përcaktuar masat që do t`i ndërmarrë për kthimin e normalitetit dhe në bashkëpunim me Qeverinë e Kosovës, e cila tashmë ka ndarë 5 milionë €uro për sanimin e pasojave, do të fillojë që nga nesër vlerësimin e dëmeve dhe riparimin e tyre, në mënyrë që të zhvendosurit të mund të kthehen sa më parë nëpër shtëpitë e veta.

 

Si mbështetje momentale për të zhvendosurit, komuna ka ndarë nga buxheti i saj 10 mijë €uro, ka thenë Haziri.

 

Duke shprehur keqardhje për atë që ndodhi në Kosovë, ku humben jetën disa qytetarë dhe u lënduan shumë të tjerë, z. Bastagli tha se është e domosdoshme që të kthehet mirëbesimi dhe të krijohen kushte për jetë normale të të gjithëve në Kosovë.

 

Ngjarjet e 17 e 18 marsit ishin një fatkeqësi që duhet të tejkalohet me angazhim të të gjithëve, ndërsa ata që kanë kryer akte të dhunës, duhet të përballen me drejtësinë, ka thenë ai.

 

Gjatë vizitës në Gjilan, zëvendësi i përfaqësuesit të sekretarit të përgjithshëm është shoqëruar edhe nga Marsel Qintelan, këshilltar rajonal dhe Charles Messier, këshilltar komunalë të UNMIK-ut.