|  KULTURË  |  HISTORI  |   POLITIKË  |  OPINIONE  |  ADRESARI  |  ARKIVI  | 

Mitrovicë: Bordi i Drejtorëve të Administratës Komunale, konstaton se situata në komunë, ka filluar të stabilizohet 

Mitrovicë, 25 mars 2004 / TN / H. SYLA -  - Bordi i Drejtorëve të Administratës Komunale, në mbledhjen e mbajtur të enjtën, më 25.03.2004, kryesuar nga Mustafë Pllana, kryeshef, ka shqyrtuar situatën e përgjithshme në komunë dhe disa çështje nga fushëveprimi i vet. Bordi i Drejtorëve, ka konstatuar se situata në komunë, pas trazirave të javës së kaluar, ka filluar të stabilizohet  dhe se qytetarët po i  kthehen jetës normale.

 

Bordi i Drejtorëve, poashtu, ka konstatuar se janë konsoliduar të gjitha institucionet e pushtetit lokal dhe ato po i kryejnë punët dhe përgjegjësitë e parashtruara, me përjashtim të Qerdhës së Fëmijve, Qendrës së Kulturës dhe Palestrës Sportive, të cilat gjenden në “zonën e besimit” dhe për të cilat akoma nuk është dhënë leja për fillimin e punës nga KFOR-i.

 

U vlerësua se administrata lokale është duke  ofruar ashtu si duhet shërbime për qytetarët. Sektori i gjendjes civile është duke funksionuar me sukses dhe kërkesat e qytetarëve për dokumentacion të nevojshëm dhe shërbime të tjera, kryhen në afatin optimal.

 

Poashtu, që nga data 24.03.2004, është aktivizuar edhe administrata komunale e UNMIK-ut për dhënjen e dokumentave personale dhe të udhëtimit për qytetarë. Anëtarët e Bordit konstatuan se për shkak të problemeve në identifikimin e shtëpive dhe të disa problemeve tjera përcjellëse, ende nuk është saktësuar numri i shtëpive serbe të shkatërruara në Frashër, por kjo pritet të bëhet gjatë ditës së sotme.

 

Anëtarët e Bordit u njoftuan se   në organet e administratës së Kuvendit të Komunës, deri tash janë paraqitur 21 familje shqiptare që kanë qenë të detyruara nga ekstremistët serbë të zhvendosen nga pjesa veriore e qytetit, në ate jugore.

 

Këto familje kryesisht janë zhvendosur nga lagja “7 Shtatori” dhe nga ndërtesat e matanë Ibrit, karshi Palestrës së Sporteve. Në Bord u konstatua se në lagjen “Kodra e Minatorëve”, ku jetojnë 85 familje shqiptare, nuk ka patur të zhvendosur.

 

Në mbledhejn e sotme, Bordi i Drejtorëve ka formuar komisionet përkatëse për identifikimin, kategorizimin dhe vlerësimin e dëmeve në kishën ortodokse dhe në shtëpitë e shkatërruara në trazirat e fundit, si të sërbëve në pjesën jugore, ashtu edhe të shqiptarëve në pjesën veriore të qytetit.

 

Anëtarët e Bordit të Drejtorëve, u njoftuan nga drejtori i Drejtorisë për Shëndetësi dhe Mirëqenje Sociale, se ka filluar shpërndarja e ndihmave në artikuj ushqimorë për banorët e lagjes “Kodra e Minatorëve” dhe  për tetë familje në lagjen “7 Shtatori”.

 

Ndërkaq, në fshatin Vidimriq, është duke u bërë identifikimi i familjeve me gjendje të rëndë ekonomiko-sociale, në mënyrë që t’u dërgohen ndihmat e nevojshme. Drejtorira përkatëse e Administratës Komunale ka bërë edhe koordinimin e ndihmave dhe të përkujdesjes shëndetësore për banorët e tri fshatarve shqiptare në komunën e Albanikut.