|  KULTURË  |  HISTORI  |   POLITIKË  |  OPINIONE  |  ADRESARI  |  ARKIVI  | 

Mitrovicë: Caktohen komisionet shqiptaro-serbe, për vlerësimin e dëmeve, në pronat e serbëve dhe të shqiptarëve

Mitrovicë, 25 mars 2004 /TN/ H. SYLA - Zëvendëskryetari i Kuvendit të Komunës, Mursel Ibrahimi  dhe kryeshefi i Ekzekutitvit të Kuvendit të Komunës, me bashkëpunëtorë, të shoqëruar nga administratori rajonal i UNMIK-ut në Mitrovicë, Davide Michales, komandanti i BSHVL-së, gjenerali Xavier Michel dhe komandanti i policisë rajonale të UNMIK-ut në Mitrovicë, Barry Pollyn, kanë vizituar fshatin Frashër dhe kishën ortodokse serbe në qytet, për të parë për së afërmi shkatërrimet dhe dëmet që janë bërë gjatë trazirave më 17.03.2004.   Zëvendëskryetari i Kuvendit të Komunës, Mursel Ibrahimi, në emër të Kuvendit të Komunës, ka shprehur keqardhje në Frashër për shkatërrimet e shtëpive të serbëve në këtë fshat dhe u ka thënë përfaqësuesve ndërkombëtarë se aktet e këtilla janë të papranueshme dhe se Kuvendi i Komunës i dënon ato dhe çarëdo akti tjetër të dhunës.

 

Ai i ka njoftuar  ndërkombëtarët se Bordi i Drejtorëve ka caktuar komisionet përkatëse, në të cilat do të angazhohen edhe pjestarët e minoritetit serb, për vlerësimin e dëmeve, si  në pronat e serbëve, ashtu edhe në ato të shqiptarëve dhe propozimin e masave për tejkalimin e gjendjes.

 

Zëvendësëryetari i Kuvendit të Komunës, Mursel Ibrahimi, ka falendëruar administratorin Michales, komandantin e BSHVL-së, Michel dhe komandantin e policisë, Pollyn, për bashkëpunim të sinqertë dhe ndihmën e dhënë për të qetësuar situatën dhe stabilizimin e gjendjes në komunë.

 

Komandanti i BSHVL-së, Xavier Michel, duke parë se çarë shkatërrimesh janë bërë në shtëpitë e serbëve në Frashër, është shprehur se një gjë e tillë është shumë e keqe. Ai ka thënë se tek udhëheqëja komunale po sheh vullnet të mirë për rindërtimin e shtëpive të djegura, me qëllim që banorët e zhvendosur të kthehen në to.

 

Mirëpo, gjenerali Michel ka shtuar se duhet të bëhet edhe më shumë për të krijuar ambient të sigurtë për kthimin e serbëve dhe se përgjegjësia kryesore për këtë bie mbi përfaqësuesit e popullatës dhe të vetë banorëve që jetojnë aty.

 

Administratori rajonal i UNMIK-ut, Davide Michales, pasi ka thënë se shkatërrimet janë plotësisht të papranueshme dhe se vështirë është të paramendosh se ndokush mund të bëjë diç të tillë, është shprehur të jetë i impresionuar me përpjekjet dhe vendosmërinë e udhëheqëjes së pushtetit lokal për të krijuar kushte për rindërtimin e shtëpive të djegura dhe për kthimin e serbëve për të jetuar në to.

 

Michaels ka patur mirëkuptim për mundësitë materiale të komunës, por ka sygjeruar që mjetet të gjenden tek Qeveria e Kosovës, e cila ka premtuar se do të krijojë një fond për këtë qëllim.

 

Ndërkaq, kryeshefi i Ekzekutivit, Mustafë Pllana, ua ka paraqitur përfaqësuesve ndërkombëtarë edhe njëherë kërkesat për kthim në banesat e tyre të banorëve shqiptarë të zhvendosur me dhunë këto ditë nga pjesa veriore e qytetit.  

 

Gjenerali Michel ka shprehur gadishmërinë të ndihmojë në këtë drejtim dhe është pajtuar që nesër të organizohet një takim me kta banorë, ku do të merrnin pjesë, përveq struktuarve komunale, edhe përfaqësuesit e  KFOR-it, në të cilën do të bisedohej për realizimin e kërkesave të paraqitura.