|  KULTURË  |  HISTORI  |   POLITIKË  |  OPINIONE  |  ADRESARI  |  ARKIVI  | 

Kuvendi shprehu keqardhje për atë që ndodhi më 17 e 18 mars

Gjilan, 23 mars 2004 /TN / Ilmi MUSLIU -  Kuvendi i Komunës së Gjilanit ka mbajtur të marten seancë të jashtëzakonshme, ku këshilltarët janë njoftuar me protestat e 17 e 18 marsit, nga kryetari i komunës, Lutfi Haziri, komandanti i KFOR-it, koloneli Richard Jonson si dhe komandanti i policisë, Izet Azizi. Kuvendi miratoi edhe një deklaratë për këto ngjarje.

 

Edhe në komunën tonë, më 17 e 18 mars 2004, u mbajtën protesta, të cilat u organizuan si reagim ndaj rastit tragjik të tre fëmijëve në Çabër të Mitrovicës, fillimisht nga disa nxënës të dy shkollave të mesme, ndërsa më vonë atyre iu bashkangjit një numër më i madh i qytetarëve dhe ky manifestim përshkallëzoi në dhunë, tha fillimisht Lutfi Haziri.

 

Si pasojë e këtyre protestave, humbi jetën një qytetar (Sllobodan Periq), ndërsa u lënduan rëndë e lehtë 63 të tjerë, nga të cilët 59 ishin shqiptarë dhe 4 serbë. Disa prej tyre ndodhen ende në spitalin e Gjilanit dhe të Prishtinës.

 

Gjatë protestave dyditëshe janë lënduar edhe 15 policë (një prej tyre më rëndë), janë djegur 18 shtëpi dhe 19 automjete, nga të cilat 3 vetura të UNMIK-ut dhe një është dëmtuar.

 

Komiteti për siguri dhe emergjencë ngriti menjëherë shkallën e gatishmërisë dhe u angazhua vazhdimisht që ta qetësojë situatën. Me vendimin e këtij Komiteti, më datën 19 mars, u pezullua mësimi në shkollat e mesme dhe u anulua dita e tregut, më 20 mars.

 

Masat e ndërmarra si dhe paraqitja e udhëheqësve komunalë e politikë në mediat qendrore dhe lokale ndihmuan që situata të qetësohet gradualisht dhe të mos ndodhin incidente gjatë ditëve vijuese.

 

Haziri vlerësoi se kontribut të jashtëzakonshëm në qetësimin e situatës kanë dhënë KFOR-i, SHPK-ja, policia e UNMIK-ut si dhe TMK-ja, e cila u angazhua në ruajtjen e disa pronave.

 

Ai tha se ka kontaktuar me liderët e komunitetit serb, përmes telefonit dhe ka kërkuar prej tyre që të kthehen nëpër shtëpitë e veta dhe të kontribuojnë edhe ata në rikthimin e besimit dhe të tolerancës, për çka Gjilani ishte

shembulli më i mirë deri tani në Kosovë.

 

Haziri e vlerësoi inkurajues faktin se disa nga serbët e zhvendosur janë të gatshëm të kthehen nëpër shtëpitë e tyre në qytet, sikundër edhe punëtorët e shërbimit civil komunal, por ata kërkojnë t`iu garantohet siguria.

 

Nga këshilltarët komunalë, por edhe nga qytetarët u kërkua që të ndihmonjnë në qetësimin e gjendjes dhe kthimin e normalitetit. Eshtë interes yni i përbashkët që sa më parë t`i kthehemi jetës normale dhe të ardhmes sonë, tha Haziri.

 

Koloneli Richard Jonson nga kampi “Montith” në Gjilan, fjalimi i të cilit është përkthyer në gjuhët shqip e serbisht, pavarësisht se munguan këshilltarët serbë, tha se ai dëshiron në këtë mënyrë të përcjellë mesazhin se për KFOR-in janë të njëjtë dhe të barabartë të gjithë qytetarët dhe të gjithë ata duhet të kuptojnë se çka është folur këtu.

 

Pas kësaj që ndodhi më 17 e 18 mars, KFOR-i ka rritur numrin e ushtarëve dhe të teknikës në terren dhe nuk do të lejojë të përsëriten aktet e dhunës. Tani, së bashku me SHPK-në po punohet në identifikimin dhe arrestimin e keqbërësve. “Ne po punojmë që t`i arrestojmë ata që manifestuan dhunë si dhe të tjerët që qëndruan pas tyre”, ka thenë Jonson.

 

Ky zyrtar i lartë ushtarak amerikan tha se ngjarjet e javës së kaluar do të mbeten gjatë në mendjet e qytetarëve, por është e domosdoshme tani që njerëzit këtu të kthehen nga e ardhmja dhe ardhmëria. KFOR- i do t`i vështrojë lëvijzet në qytet dhe nuk do të lejojë grupime më të mëdha se dhjetë persona. “Për fat të keq, ne duhet ta bëjmë këtë”, ka pohuar koloneli Jonson.

 

Ngjarjet e 17 e 18 marsit, nga kapiteni Izet Azizi, u vlerësuan sfida më e madhe për Shërbimin Policor të Kosovës, që nga formimi i tij. Ne po kryenin detyrat tona rutinore dhe nuk kishim pritur se mund të ndodhte një përshkallëzim i këtillë i dhunës, tha komandanti i stacionit policor në Gjilan.

 

Megjithkëtë ai beson se SHPK-ja ka arritur të mobilizohet shpejt dhe të orientohet në mbrojtjen e objekteve vitale nga protestuesit, përkundër faktit se pjesëtarëve të SHPK-së u mungojnë pajimet e nevojshme për situata të këtilla. Ai tha se policia po punon në zbulimin dhe kapjen e keqbërësve dhe ishte kategorik se çdo kush që ka kryer dhunë, do të sillet para drejtësisë.

 

Në fund, Kuvendi ka miratuar edhe një deklaratë, përmes së cilës shprehet shqetësimi për ngjarjet e 17 e 18 marsit, të cilat filluan si reagim ndaj rastit të mbytjes së tre fëmijëve në Çabër dhe më vonë u përshkallëzuan në një manifestim të dhunshëm, me ç`rast u humb jeta e një qytetari, u lënduan dhjetra të tjerë, u dëmtua prona private dhe publike si dhe u sulmuan organet e rendit dhe të sigurisë.

 

Deklarata u plotësua më vërejtet e Qemajl Mustafës (PDK) se “protestat kanë qenë spontane dhe të ligjshme” dhe të Shaban Rexhepit (AAK) se “duhet të hulumtohen shkaqet e protestave”.