Përmbajtja:

• Holkeri vizitoi komunën e Kastriotit

• Kreu i NATO-s Shefer akuzoi ekstremistët shqiptarë për orkestrimin e dhunës në Kosovë

• Viti: KFOR-i amerikan nuk do të lejojë askend që të marrë në duart e veta ligjin

• Belgjika dërgon trupa shtesë në Kosovë

• Brajshou kërkoi që ata të cilët kanë akte dhunë të dalin para drejtësisë

• Daci vizitoi fshatin Çabër

• Rexhepi bisedoi me përfaqësuesit e tri partive kryesore

• Në 5-vjetorin e fsuhatës ajrore të NATO-s, nesër fillon manifestimi "Ditët e shpresës"

• Sabri Hamiti: Pavarësia për Kosovën është çështje ekzistenciale, demokratike e politike

• Derek Çapell thotë se lidhur me dhunën e fundit në Kosovë janë arrestuar 163 persona

• Sot do të bëhet varrimi i katër viktimave nga komuna e Mitrovicës

• Varrimi i fëmijëve të Çabrës ka qenë mirë i organizuar dhe është bërë në mënyrë dinjitoze

• Të enjten Kuvendi debaton për gjendjen në Kosovë

• Solana dhe Paten të mërkurën do ta vizitojnë Kosovën

• Kushner thotë se Rezoluta 1244 nuk mund të shërbejë më si bazë për të ruajtuar qëndrueshmërinë në Kosovë

• Në zyrën e Kryqit të Kuq në Mitrovicë janë paraqitur mbi 100 familje shqiptare të zhvendosura nga veriu i Mitrovicës

• Bordi i Drejtorëve ka vlerësuar se Prizreni është qyteti më i dëmtuar nga trazirat e javës së kaluar

• Erhard Busek angazhohet për pavarësinë e Kosovës hap pas hapi

• K.Bild: Kosova duket si Palestina e Evropës

• Ministri i jashtëm rus Llavrov thotë se në samitin NATO-Rusi duhet të analizohet çështja e dhunës në Kosovë

• Mbrëmë në Prishtinë në shenjë nderimi për viktimat e trazirave të fundit janë ndezur qirinj para Tetrit Kombëtar

• Ambasadori i Beogradit në Moskë thotë se largimi i ushtarëve rus nga Ballkani ishte diçka e logjikshme

• Kisha autoqefale malazeze kritikon kishën ortodokse serbe se po i shfrytëzon trazirat në Kosovë për manipulime politike

• Kryeministri maqedonas ka paraqitur kërkesën zyrtare për anëtarësimin e vendit të tij në BE

• Vullnetarët e Arkanit në veriun e Mitrovicës?

• Ekstremistët palestinezë zotohen të hakmerren për vrasjen e Jasinit

• Vrasja e Jasinit shqetëson Uashingtonin

• Takim i ministrave të jashtëm të BE mbi luftën kundër terrorizmit

• Në një pritë afër kufirit afgan janë vrarë 12 ushtarë pakistanezë

• Në një sulm raketor janë vrarë 3 ushtarë pakistanezë

• Në Bagdad janë vrarë 2 biznismenë finlandezë

• Autoritetet spanjolle kanë arrestuar edhe 4 persona në lidhje me sulmet në Madrid

• Në Tailandë ka ndodhur një shpërthim dhe është vrarë një polic

• Kanë mbetur të ngujuar 6 shkencëtarë britanikë në një shpellë në Meksiko

• Vrasësi i ministres suedeze, Ana Lind, është dënuar me burg të përjetshëm

• Një anije ruse me reaktor bërthamor mund të shpërthejë në çdo kohë

Holkeri vizitoi komunën e Kastriotit

 

Kastriot, 23 mars 2004 - Shefi i UNMIK-ut Hari Holkeri vizitoi sot komunën e Kastriotit (Obiliq) dhe me udhëheqjen komunale bisedoi për rrjedhat aktuale në këtë komunë pas trazirave të ditëve të kaluara.

 

Holkeri ka inkurujuar pushtetin lokal për të hartura politikat strategjike financiare për të filluar riparimin e të gjitha dëmeve të shkaktuara. Ai bëri të qartë se donatorët nuk do të mund të ndihmojnë në riparimin e dëmeve, ndërkohë që mundësitë e institucioneve vendore janë të kufizuara.

 

Andaj njerëzit brenda komunës, tha ai, duhet të ndihmojnë fqinjët e tyre dhe të vendosin fillimin e ri të bashkëjetesës dhe të fqinjësisë së mirë.

 

 

Viti: KFOR-i amerikan nuk do të lejojë askend që të marrë në duart e veta ligjin

 

Viti, 23 mars 2004 - Në një takim e gazetarë, udhëheqja komunale dhe komandanti i KFOR-it për Viti, vlerësuan situatën e sigurisë në komunën e Vitisë të qetë, pas trazirave të fundit që përfshinë edhe këtë komunë. Kryetari i Kuvendit komunal Musa Misini, tha se ngjarjet e javës së kaluar kanë qenë të dëmshme për të gjithë.

Mbi të gjitha nuk mund të kuptohet se si njeriu me gjykim të shëndoshë mund të dëmtojë apo të djegë monumentet fetare. "Imazhin e zbehur të Vitisë dhe Kosovës, në bashkëpunim me forcat e KFOR-it amerikan, pjesëtarët e TMK-së, SHPK-së udhëheqjes komunale, por edhe banorëve të kësaj komune të cilët kanë treguar gatishmëri të ofrojnë ndihma, do ta rikthejmë", tha Misini dhe shtoi se nga buxheti i komunës për të dëmtuarit janë siguruar ndihma ushqimore por edhe mjete me të cilat do të meremetohen dhe adaptohen objektete e banimit.

 

Një pjesë e serbëve këto ndihma i kanë pranuar, por për fat të keq ata të cilët ende mbeten të instrumentalizuar në duar të Beogradit, këto ndihma nuk i kanë pranuar, tha Misini.

Misini tha se janë djegur 10 shtëpi të minoritarëve serbë dhe 16 të tjera janë demoluar, në mesin e të cilave 3 shtëpi të pronarëve shqiptarë. Protestuesit kanë djegur 6 automjete të serbëve, 1 kombibus i cili ishte pronjë e Kuvendit të Vitisë me të cilin transportoheshin nxënësit serb nëpër shkolla, si dhe 1 motokultivator.

Komandanti i KFOR-it amerikan koloneli Poll Zimerman tha se ushtria dhe KFOR-i amerikan e kanë vënë ligjin dhe sigurinë në komunën e Vitisë. Që nga e marta në këtë komunë mbetet në fuqi vetëm ora policore duke filluar nga ora 21 e deri 06, si dhe nuk lejohet mbajtja e asnjë lloj tubimi.

 

Koloneli Zimerman, pasi dënoi protestat dhe i vlerësoi si të dëmshme për vetë komunën e Vitisë dhe Kosovën, përkujtoi se KFOR-i amerikan nuk do të lejojë askend që të marrë në duart e veta ligjin. Të gjithë ata të cilët nxitën dhe i organizuan këto protesta do të arrestohen, tha ai, duke njoftuar se në këtë komunë tani më janë arrestuar personat e parë, duke mos saktësuar numrin e tyre.

 

 

Belgjika dërgon trupa shtesë në Kosovë

 

Bruksel, 23 mars 2004 - Qeveria e Belgjikës ka vendosur që kontigjentti të saj në kuadër të KFOR-it t'i dërgojë një përforcim prej 226 ushtarësh, të cilët duhet të arrijnë që nesër në Kosovë. Sipas mediave belge, trupat shtesë do të sistemohen në Mitrovicë, duke mos saktësuar se në cilën pjesë të qytetit.

 

 

Brajshou kërkoi që ata të cilët kanë akte dhunë të dalin para drejtësisë

 

Prizren, 23 mars 2004 - Çarlls Brajshou, zv/kryeadministrator i Kosovës qëndroi sot në Prizren ku është takuar me kryetarin e komunës Eqrem Kryeziu dhe me administratorin rajonal Gream Uilliams.

 

Pas bisedave që pati, Brajshou bëri thirrje për bashkëpunim të të gjithë qytetarëve dhe institucioneve të Kosovës në mënyrë që, siç u shpreh, kriminelët të cilët kanë bërë akte dhune të dalin para drejtësisë.

 

Brajshou gjithashtu ka thënë se ekzistojnë elementë kriminalë të cilët nuk ia duan të mirën Kosovës dhe qytetarëve të saj dhe ata kanë plane për minimin e marrëdhënieve të mira mes Kosovës dhe bashkësisë ndërkombëtare. Ai nuk saktësoi se kush janë ata kriminelë për shkak të hetimeve që po zhvillohen.

 

Gjithashtu ai tha se janë qytetarët e Kosovës janë ata të cilët duhet të përgjigjen nëse gjatë trazirave të ditëve të kaluara pati apo jo pastrim etnik.

Brajshou falenderoi autoritetet e komunës së Przirenit dhe Qeverinë e Kosovës për gatishmërinë për riparimin e dëmeve të shkaktuara.

 

 

Daci vizitoi fshatin Çabër

 

Çabër/Mitrovicë, 23 mars 2004 - Kryetari i Kuvendit të Kosovës Nexhat Daci, i shoqëruar nga disa anëtarë të Kryesisë së Kvendit, vizioti sot familjet e fëmijëve të mbytur në lumin Ibër, duke u shprehur ngushëllime për tragjedinë që u ka ndodhur. Daci tha se trazirat më së shumti e kanë dëmtuar Kosovën.

 

Me këtë rast Daci tha se ajo që ka ndodhur ditëve kaluara nuk është traditën e shqiptarëve dhe se ajo më shumë i përngjante futjes së strukturave paralele, por edhe elementëve destabilizues. Daci tha se kërkon me këmbëngulje që të sillen para drejtësisë kriminelët e të gjitha llojeve.

 

 

Rexhepi bisedoi me përfaqësuesit e tri partive kryesore

 

Prishtinë, 23 mars 2004 - Sot me ftesë të kryeminstrit të Kosovës Bajram Rexhepi, u takuan përfaqësuesit e tri subjekteve politike nënshkruese të marrëveshjes për Qeverinë e koalicionit. Të pranishëm ishin: nga LDK-ja, Kolë Berisha, PDK-ja, Hashim Thaçi dhe AAK-ja, Ramush Haradinaj.

Qëllimi i takimit ishte koordinimi i subjekteve politike në situatën në të cilën gjendet Kosova dhe ndërmarrja e hapave të mëtutjeshëm për dalje nga kriza.

Përfaqësueist e tri partive shprehën përkrahje të plotë për Qeverisë për themelimin e Fondit emergjent për riparimin e dëmeve të shkaktuara nga trazirat e javës së kaluar. Ata cekën si të domosdoshme nevojën për planifikim dhe koordinim të aktiviteteve të mëtutjeshe dhe shprehën se Qeveria dhe institucionet e kanë përkrahjen e plotë nga partitë kryesore politike në Kosovë.

Në mesin e aktiviteteve të ardhshme u përmendën: analiza e shkaqeve të asaj çka ndodhi javën e kaluar, rifillimi i angazhimit rreth punës për standarde dhe definimi i hapave të tjerë për të ardhmen.

 

 

Në 5-vjetorin e fsuhatës ajrore të NATO-s, nesër fillon manifestimi "Ditët e shpresës"

 

Prishtinë, 23 mars 2004 - Me rastin e 5-vjetorit të fillimit të fushatës ajrore të NATO-s, Forumi i Rinisë së LDK-së organizon manifestimin e "Dita e shpresës - 24 marsi", e cila krahas 12 Qershorit, Ditës së Lirisë së Vendit, është një ndër datat më e rëndësishme në historinë më të re të Kosovës.

Kjo datë nga të rinjtë e LDK-së do të shënohet me një varg akivitetesh dhe manifestimesh të ndryshme në të gjitha qendrat e Kosovës, tha Sejdë Tolaj, nënkryetar i FR të LDK-së.

Manifestimet fillojnë nesër në orët e hershme të mëngjesit, për të vazhduar gjatë tërë ditës dhe për t'u përmbyllur me manifestimin qendror, i cili do të mbahet në Prishtinë.

Ndër aktivitetet e tjera duhet veçuar vizitat në varrezat e dëshmorëve dhe familjeve të tyre, vizita trupave të KFOR-it, vizita TMK-së, SHPK-së etj.

Po ashtu në kuadër të kësaj dite organizohen edhe një varg aktivitetesh kulturore, ku të rinjtë kanë mundësinë të shprehin dhe shpalosin talentin e tyre, nga lëmi i kulturës, artit, publicistika etj.

 

 

Sabri Hamiti: Pavarësia për Kosovën është çështje ekzistenciale, demokratike e politike

 

Bruksel, 23 mars 2004 - Sabri Hamiti, kryetar i Komisionit për Bashkëpunim Ndërkombëtar të Kuvendit të Kosovës, foli sot para Komisionit për Politikë Jashtme dhe të Mbrojtjes në Senatin belg për situatën aktuale në Kosovë.

Fillimisht Sabri Hamiti tha se zhvillimet dramatike në Kosovë në javën e fundit treguan qartë që çështja e Kosovës nuk është zgjidhur, as në pesëvjetorin e intervenimit të NATO-s për shpëtimin e shqiptarëve nga gjenocidi serb. Zhvillimet e fundit dramatike në Kosovë, tha ai, treguan që ky vend që ka kaluar nëpër përgjakje të mëdha e viktimizim mund të ekzistojë vetëm si vend i lirë e i pavarur.

"U dëshmua që pavarësia për Kosovën është çështje ekzistenciale, demokratike e politike, me një fjalë një domosdo për qetësimin e shqiptarëve në Evropën Juglindore dhe për çështjen e gjithë rajonit", tha Hamiti, duke shtuar se është "evidente që të gjitha zhvillimet e ardhshme në Kosovë do të jenë të determinuara nga saktësimi i statusit të saj politik. Pavarësia është determinuese për zhvillimet politike, demokratike, sociale e politike".

Ai tha se "vendi i dalë nga lufta e shkatërrimi është mbajtur për pesë vite me vullnetin për ta rindërtuar jetën. Por, dinamika e zhvillimeve ka qenë jo e kënaqshme", duke përkujtuar se një vend me 50% të popullsisë në gjendje varfërie të skajshme, me 70% të papunë dhe me një popullsi krejt të re, nëse nuk duken shpresat e zgjidhjet, është i gatshëm të eksplodojë.

Sabri Hamiti tha në vazhdim se Kosova sot administrohet nga UNMIK-u, që ka pushtet, thuaja, të pakufishëm, në legjislacion, në siguri, në gjyqësi, në ekzekutiv. Në anën tjetër, tha ai, institucionet e Kosovës, të dala nga vota e lirë e qytetarëve, kanë përgjegjësi të mëdha, por kompetenca tepër të vogla.
"Në këtë ndeshje të raporteve të qeverisjes, nuk është arritur dinamika e domosdoshme e veprimit, ndërsa nevojat janë rritur dhe pritjet janë bërë më të mëdha", tha Hamiti.

Sipas tij, mungesat apo dobësitë e administratës së UNMIK-ut janë se nuk e ka shtrirë pushtetin në tërë territorin e Kosovës dhe ndonëse janë kritikuar, tha ai, deri më sot janë lejuar strukturat paralele serbe politikës administrative e paramilitare, të cilat janë instrumente të politikës shkatërruese të Beogradit kundrejt Kosovës.

"Mungesat e institucioneve të Kosovës janë se nuk kanë kompetenca për veprim dhe shumë herë fuqia e tyre është koncentruar në rrafshin e ndikimit me atë që do të mund të quhej pushtet moral. Institucionet e Kosovës janë dobësuar më tej nga sistemi zgjedhor që ka dizajnuar një përbërje të habitshme të Kuvendit, ku është vështirë të ndërtohet shumica qeverisëse, qoftë edhe me fitoren e mbi 50% të votave. Janë falur 20 karrike në Kuvendin prej 120 karrikash për minoritetin serb", tha Hamiti.

Kur institucionet nuk i përcjellin kërkesat e qytetarëve, tha ai, kërkesat shtrohen në rrugë, duke marrë formën e agresivitetit.

"Kështu, mbytja e tmerrshme e tre fëmijëve shqiptarë në lumë, të ndjekur nga serbët, në katundin e vetëm të banuar me shqiptarë në veri, ishte moment për fillimin e protestave në Mitrovicë", tha Hamiti.

Ai theksoi se deri sot, askush nuk e ka marrë mbi vete organizimin e këtyre protestave. "As anketat e UNMIK-ut deri më sot nuk kanë thënë asgjë. Qofshin këto zhvillime spontane a të organizuara, këto kanë dhënë një leksion për administratën ndërkombëtare e për institucionet e Kosovës që duhet të ridefinojnë relacionet e tyre për të zgjidhur problemet, kurse problemet zgjidhen me punë e jo me dhunë", nënvizoi Hamiti.

Ai në vazhdim sqaroi se shqiptarët nuk i kanë sulmuar kurrë objektet e popullit, as në luftë as në paqe. "Sulmi i fundit, i pajustifikueshëm mbi kishat, lidhet me të dhënën që kishat serbe në Kosovë, duke u identifikuar me nacionalizmin radikal të Beogradit, janë bërë shenja të pushtuesit agresiv, andaj edhe shenja të kundërshtimit e të sulmit", tha ai.

Ndërkaq, duke folur për standardet, Sabri Hamiti tha se populli i Kosovës dhe institucionet e saj i kanë pranuar "Standardet për Kosovën" si program zhvillimi në të gjitha fushat, por, jo si kusht për zgjidhjen e statusit politik. Pikësëpari, tha ai, mbasi gati të gjitha fushat që hapin standardet, janë në kompetencë të rezervuar për UNMIK-un.

 

"Por, jo si program i shpallur retorik për të blerë kohën, në pavendosmëri për të pranuar statusin politik të Kosovës", tha Hamiti dhe shtoi se kjo mënyrë e blerjes së kohës, në të vërtetë është humbje e kohës. "Kjo u vërtetua edhe me zhvillimet dramatike të kohës së fundit.

 

Pritjet mund të sjellin edhe zhvillime të tjera", tha ai, duke shtuar se UNMIK-u duhet t'i kalojë kompetencat qeverisëse tek institucionet e Kosovës, e vetë të marrë rolin e këshilltarit a të mbikqyrësit.

Në vazhdim ai foli për zgjedhjet e përgjithshme të vjeshtës që duhet të jenë zgjedhje demokratike e të lira me përfaqësim të vërtetë, për të zgjedhur institucione të përgjegjshme e efektive.

"Shtetet e Bashkuara të Amerikës e Bashkimi Evropian duhet të njohin pavarësinë e Kosovës, sepse në rrethanat ballkanike, pa u pavarësuar Kosova, nuk mund të bëhet demokratike, kurse ky është kusht i qetësimit të shqiptarëve e të rajonit", theksoi Sabri Hamiti.

"Kosova e pavarur e demokratike me të drejta të plota qytetare e kombëtare për të gjithë, pa diktizim të askujt, as pozitiv as negativ, duhet të nisë procesin e stabilizim-asocimit në Bashkimin Evropian e në NATO", tha ai, duke shtuar se me një zhvillim të lirë e demokratik, Kosova është vend që mund ta mbajë veten dhe të krijojë stabilitet për rajonin.

Ndërkaq, duke folur për procesin e kthimit, ai tha se "kthimi në Kosovë duhet të bëhet për të gjithë, jo vetëm për serbët, se atëherë po dëshmohet që po merremi me pakicën, duke harruar shumicën".

Në lidhje me bisedat me Serbinë, Sabri Hamiti tha se ato nuk mund të bëhen duke i quajtur "teknike". "Secila bisedë me Serbinë është politike. Me Serbinë nuk mund të bisedohet për statusin politik të Kosovës", tha ai.

UNMIK-u ka ndalë privatizimin, shtoi ai, dhe nuk ka nxjerrë para gjyqit kriminelët e luftës (mbi 30 serbë të akuzuar kanë ikur nga burgu i Mitrovicës). Po ashtu nuk ka ndriçuar asnjë vrasje politike që janë bërë kundër udhëheqësve të LDK-së, tha ai.

Sabri Hamiti tha se serbët në luftë kanë djegur mbi 200 xhamia, kanë djegur të gjitha bibliotekat. Kurse tani në Çagllavicë, kanë djegur atelenë dhe skulpturat e skulptorit më të madh shqiptar, Agim Çavdarbasha.

Pushteti në Kosovë, tha ai, nuk mund të merret me dhunë, por me votë të lirë të qytetarëve, ndërkaq integrimi i Kosovës është i mundur vetëm me të gjithë qytetarët dhe si shtet ligjor, tha Hamiti.

Pa status të zgjidhur politik në Kosovë, tha Hamiti, nuk do të ketë zhvillim ekonomik, nuk do të ketë siguri, as investime të jashtme, nuk do të ketë qasje në Fondin Monetar Ndërkombëtar, as në Bankën Botërore, tha në fund të fjalës së tij Sabri Hamiti, duke folur para Komisionit për Politikë të Jashtme të Senatit belg.

Pastaj Sabri Hamiti u përgjegj edhe në shumë pyetje të shtruara nga senatorët belgë.

 

 

Kreu i NATO-s Shefer akuzoi ekstremistët shqiptarë për orkestrimin e dhunës në Kosovë

 

Prishtinë, 23 mars 2004 - Sekretari i përgjithshëm i NATO-së Jap de Hop Shefer ka theksuar se dhuna e përshkallëzuar javën e kaluar në Kosovë, ka qenë e orkestruar dhe e organizuar nga ekstremistët e komunitetit shqiptarë. Shefer tha se kjo është e papranueshme dhe duhet të dënohet, andaj ka humbur besimi dhe se duhet të bëhet gjithçka për ta rikthyer atë.

 

Kjo nuk duhet të ndodhë përsëri, si ndodhi djegia e shtëpive, djegia e kishave dhe zhvendosja e njerëzve, tha ai. Shefer ka thënë se KFOR-i është në Kosovë dhe do të qëndrojë këtu dhe ka nënvizuar se nuk duhet të ketë iluzione se me veprime kriminale mund të arrihen ambiciet politike dhe ka një përgjegjësi të madhe për udheheqësit shqiptarë të Kosovës që të dënojnë dhunën, duke shtuar se kjo ditë është ditë zie në Kosovë dhe të gjithë duhet të përmbahen nga dhuna e mëtutjeshme përfshirë edhe komunitetin serb.

Ai theksoi mbështetjen e NATO-s për KFOR-in, komandantin Kamerhof dhe njerëzit e tij, duke shtuar se KFOR-i duhet të mbrojë çdonjërin që jeton në Kosovë.

Ndërkaq, kryetari i radhës i OSBE-së, ministri i jashtëm bullgar Sollomon Pasi, i cili e shoqëronte Sheferin në Prishtinë, tha se ajo çka ka ndodhur në Kosovë javën e kaluar është serioze dhe shqetësuese për të gjithë fqinjët. Sipas tij duhet të ulen retorika, tensionet dhe se OSBE-ja do të bëjë gjithëçka që është e mundur për të siguruar zgjedhje të lira dhe demokratike në Kosovë.

Shefi i UNMIK-ut Hari Holkeri tha se kishte pasur bisedime të gjata me kreun e NATO-së dhe shtoi se ai ishte zhgënjyer dhe çuditur shumë me dhunën që ndodhi në javën e kaluar. Holkeri ka kërkuar nga kryeministri dhe partitë shqiptare që të mbajnë përgjegjësitë e tyre. Ai tha se tash për partitë në Kosovë janë rivendosja e ligjit dhe rendit, stabilizimi i gjendjes dhe nxjerrja e fajtorëve para drejtësisë.

Presidenti Rugova pas këtij takimi ka thënë do të analizohet puna së bashku me UNMIK-un dhe ka shtuar se institucionet e Kosovës në të ardhmen do të jenë më efikase, si dhe do të angazhohen për qetësimin e situtës, përkatësisht që dhuna të mos përsëritet më, ka theksuar presidenti Rugova, sepse kjo është kundër Kosovës, kundër lirisë, kundër pavarësisë dhe kundër fëmijëve tanë.

Ndërkaq, sipas kryeministrit Rexhepi, Shefer ka përcjellë tek institucionet e Kosovës një kritikë të përgjithshme. KFOR-i ka qenë e vetmja strukturë efektive në gjithë këtë situatë, ka thënë kryeminstri Rexhepi dhe ka shtuar se në Kosovë duhet vendosur rendi dhe ligji, duhet të rikthehet besimi ndërmjet komuniteteve dhe duhet të riparohen dëmet që janë shkaktuar gjatë trazirave të fundit. Megjithatë kryeministri Rexhepi ka pranuar se institucionet e Kosovës në të ardhmen duhet të punojnë më tepër.

 

 

Derek Çapell thotë se lidhur me dhunën e fundit në Kosovë janë arrestuar 163 persona

 

Prishtinë, 23 mars 2004 - Zëdhënësi i policisë ndërkombëtare në Kosovë, Derek Çapell thotë se lidhur me dhunën e fundit në Kosovë janë arrestuar 163 persona. Ai ka shpjeguar se ata janë arrestuar për posedim ilegal të armëve, për zjarrëvënie dhe për plaçkitje.

 

 

Sot do të bëhet varrimi i katër viktimave nga komuna e Mitrovicës

 

Mitrovicë, 23 mars 2004 - Sot, më 23 mars 2004, do të bëhet varrimi i katër viktimave nga komuna e Mitrovicës që u vranë në trazirat e javës së kaluar. Në trazirat në qytetin e Mitrovicës u vranë nga ekstremistët serbë, Ferit Çitaku (1980), Fatmir Abdullahu (1966), Isak Ibrahimi (1965) dhe Ajvaz Shatrolli (1942).

Varrimi i të ndjerëve, do të bëhet në orën 14,00, në varrezat e dëshmorëve në Shipol.

Prej orës 13 e 30 minuta deri në orën 14,00, qytetarët mund të bëjnë homazhe para arkivoleve që do të vendosen në vendin e varrimit.

 

 

Varrimi i fëmijëve të Çabrës ka qenë mirë i organizuar dhe është bërë në mënyrë dinjitoze

 

Mitrovicë, 23 mars 2004 - Kryeshefi i Ekzekutivit të Kuvendit të Komunës, Mustafë Pllana, ka patur një takim në orët e mbrëmjes të së hënës, me komandantin e BSHVL-së, gjeneralin Ksavier Mishel.

Në takim u bisedua për gjendjen e sigurisë në komunë pas trazirave të javës së kaluar, për të cilën u tha se është në përmisim e sipër. Bashkëbiseduesit kanë vlerësuar se varrimi i fëmijëve të Çabrës, që tragjikisht u mbytën javën e kaluar në Ibër, ka qenë mirë i organizuar dhe është bërë në mënyrë dinjitoze dhe pa asnjë eksces, për çka ata kanë falenderuar pjesëmarrësit dhe organizatorët, por edhe pjesëtarët e organeve të rendit, ata të KFOR-it dhe të gjithë ata që në ndonjë mënyrë kanë kontribuar për këtë.

Pllana dhe gjenerali Mishel kanë apeluar tek qytetarët e komunës e më gjerë, që të tregojnë vetëdije të lartë dhe pjekuri edhe me rastin e varrimit të katër viktimave që humbën jetën në trazirat e fundit, në mënyrë që edhe varrimi të bëhet në mënyrë dinjitoze.

Kryeshefi i Ekzekutivit të Kuvendit të Komunës e ka njoftuar komandantin e BSHVL-së për ndjekjet dhe kërcënimet e ekstremistëve serbë që po bëjnë ndaj familjeve shqiptare në lagjet veriore, duke i dhënë atij edhe një listë me emra konkret të familjeve që gjatë ditës janë dëbuar dhunshëm nga banesat e tyre, apo ju është uzurpuar banesa.

Komandanti i BSHVL-së, gjenerali Mishel, i ka premtuar kryeshefit Pllana se ushtarët e tij do të dalin në vendin e ngjarjes dhe do t'i verifikojnë inormatat që iu ofruan dhe se do të marrë masa përkatëse, për çka do të informojë udhëheqëjen komunale.

 

 

Të enjten Kuvendi debaton për gjendjen në Kosovë

 

Prishtinë, 23 mars 2004 - Deputetët e Kuvendit të Kosovës, të enjten më 25 mars, do të takohen në seancë plenare për të debatuar për gjendjen në Kosovë dhe për të nxjerrë një mesazh të qartë për qytetarët e vendit për përballimin e situatës së krijuar pas protestave të grupeve të qytetarëve më 17 dhe 18 mars, të motivuara nga vdekja tragjike e tre fëmijëve të fshatit Çabër në lumin Ibër dhe bllokimi i rrugëve magjistrale Prishtinë Shkup dhe Prishtinë-Gjilan.

 

Kështu ka vendosur Kryesia e Kuvendit të Kosovës në konsultim me shefat e grupeve parlamentare.

 

 

Solana dhe Paten të mërkurën do ta vizitojnë Kosovën

 

Bruksel, 23 mars 2004 - Përfaqësuesi i lartë i BE-së për Politikë të Jashtme dhe Siguri, Havier Solana së bashku me komesionerin Kris Paten të mërkurën do të vizitojë Kosovën.

 

Në prag të kësaj vizite Solana ka shprehur brengosjen e thellë për shkak të ngjarjeve tragjike të javës së kaluar. Ai ka theksuar se pesë vite më parë kishin ndërhyrë, që të lirojmë popullin e Kosovës e sot nuk mund të pranohet që shqiptarët t'i bëjnë të njëjtat gjëra, që i bënë të tjerët ndaj tyre.

 

 

Kushner thotë se Rezoluta 1244 nuk mund të shërbejë më si bazë për të ruajtuar qëndrueshmërinë në Kosovë

 

Paris, 23 mars 2004 - Rezoluta 1244 e Këshillit të Sigurimit të OKB-së nuk mund të shërbejë më si një bazë e vlefshme për të ruajtuar qëndrueshmërinë në Kosovë, ka deklaruar Bernard Kushner, drejtuesi i parë i Misionit të OKB-së në Kosovë.

 

Ai ka theksuar se Këshilli i Sigurimit duhet të miratojë një rezolutë të re për Kosovën. Kushner ka thënë se tash janë të nevojshme përpjekje të reja diplomatike dhe politike të Grupit të Kontaktit, mbajtja e një konference ndërkombëtare.

 

 

Në zyrën e Kryqit të Kuq në Mitrovicë janë paraqitur mbi 100 familje shqiptare të zhvendosura nga veriu i Mitrovicës

 

Mitrovicë, 23 mars 2004 - Në jug të qytetit të Mitrovicës ende po vazhdon regjistrimi i familjeve të evakuara për shkaqe sigurie ne veriu i qytetit i disa fshatrave të komunës së Albanikut. Deri më tash në zyrën e Kryqit të Kuq Komunal në Mitrovicë janë paraqitur mbi 100 familje shqiptare, kryesisht të zhvendosura nga lagjet që gjenden në veri të Mitrovicës, bëri të ditur Salih Preteni zyrtar në zyrën e Kryqit të Kuq në Mitrovicë.

 

Ndërkaq, Adem Nura, kryetar i Kryqit të Kuq Komnunal i Mitrovicë nëpërmjet një apeli ka kërkuar nga të gjithë qytetarët që kanë mundësi t'u dalin në ndihmë këtyre familjeve si në mjete financiare në gjëra ushqimore, si dhe me veshmbathje.

 

 

Bordi i Drejtorëve ka vlerësuar se Prizreni është qyteti më i dëmtuar nga trazirat e javës së kaluar

 

Prizren, 23 mars 2004 - Në një takim të jashtëzakonshëm Bordi i Drejtorëve të Komunës së Prizrenit ka shqyrtuar gjendjen në komunë dhe gjithashtu ka formuar një komision për vlerësimin e dëmeve. Bordi i Drejtorëve ka vlerësuar se Prizreni është qyteti më i dëmtuar nga trazirat e javës së kaluar.

 

 

Erhard Busek angazhohet për pavarësinë e Kosovës hap pas hapi

 

Bruksel, 23 mars 2004 - Koordinatori i Paktit të Stabilitetit për Ballkanin Erhard Busek ka deklaruar se negociatat lidhur me statusin politik të Kosovës duhet të fillojnë shumë shpejt, duke shprehur pikëpamjen e tij për pavarësi.

 

"Unë personalisht mendoj se ajo duhet të jetë diku rreth pavarësisë jo të menjëherëshme, por hap pas hapi", ka thënë Busek. Ai ka theksuar se anëtarët e Bashkimit Evropian nuk kanë vizion të qartë se çfarë do të duhej të ndodhte me Kosovën.

 

 

K.Bild: Kosova duket si Palestina e Evropës

 

Londër, 23 mars 2004 - Në një shkrim që e botonë "Fajnenshëll tajms" Karl Bild, ish i dërguari i OKB-së për Ballkanin, shkruan se nuk është adresuar thelbi i konflikitit në Kosovë. Kur të ndërtohet mbi standardet përcaktuara vetëm atëherë mund adresohet statusi final i Kosovës, e cila tani ka ndryshuar në mënyrë dramatike, ndërkaq rreziku e kërcënon gjithë rajonin.

 

Bild mëtej shkruan se Kosova duket si Palestina e Evropës me mbi 70 për qind të popullatës të moshës nën 30 vjeç me papunësi me mbi 50 për qind, ekonomi në agoni dhe emigracion të vështirësuar.

 

 

Ministri i jashtëm rus Llavrov thotë se në samitin NATO-Rusi duhet të analizohet çështja e dhunës në Kosovë

 

Moskë, 23 mars 2004 - Shefi i diplomacisë ruse Sergej Llavrov ka thënë se në samitin ndërmjet Rusisë dhe NATO-s që është parashikuar të mbahet më 2 prill të këtij viti të analizohet çështja e dhunës në Kosovë. Llavrov i ka kritikuar drejtuesit perëndimorë për shkak se sipas tij nuk i kanë detyruar shqiptarët e Kosovës që të respektojnë kërkesat e Këshillit të Sigurimit të OKB-së, gjë që shkaktoi përshkallëzimin e dhunës.

 

 

Mbrëmë në Prishtinë në shenjë nderimi për viktimat e trazirave të fundit janë ndezur qirinj para Tetrit Kombëtar

 

Prishtinë, 23 mars 2004 - Mbrëmë në platonë para Teatrit Kombëtar në ditën e zisë, rinia studentore dhe qytetarët e Prishtinës kanë ndezur qirinj në shenjë nderimi për viktimat e trazirave të fundit dhe i kanë vendosur ata në shkallët e këtij teatri. Këtë hap e ka ndërmarrë UPS të Universitetit të Prishtinës.

 

 

Ambasadori i Beogradit në Moskë thotë se largimi i ushtarëve rus nga Ballkani ishte diçka e logjikshme

 

Moskë, 23 mars 2004 - Ambasadori i Serbisë dhe Malit të Zi në Rusi ka deklaruar se largimi i ushtarëve rusë nga Ballkanin, përfshirë edhe Kosovën ishte diçka e logjikshme nga këndvështrimi rus. Prania e ushtarëve rusë mund të ketë pasur ndoshta vetëm rëndësi psikologjike për serbët e Kosovës, por asgjë më shumë se kaq, ka thënë Milan Rocer, ambasadori i Beogradit në Moskë.

 

 

Kisha autoqefale malazeze kritikon kishën ortodokse serbe se po i shfrytëzon trazirat në Kosovë për manipulime politike

 

Podgoricë, 23 mars 2004 - Kisha autoqefale malazeze kritikoi ashpër kishën ortodokse serbe në Mal të Zi se po i shfrytëzon trazirat në Kosovë për manipulime politike.

 

Kisha autoqefale malazeze vuri në dukje se kryepeshkopi i kishës ortodokse serbe në Mal të Zi i organizoi dhe udhëhoqi protestat e nxënësve në Podgoricë, duke nxitur urrejtje fetare dhe etnike si dhe duke i frymëzuar ata për vandalizëm ndaj objekteve fetare të besimit islam në këtë republikë.

Kisha autoqefale malazeze thekson se kisha ortodokse serbe nuk përmban asgjë të shenjtë në vetvete përveç ëndrrës për një Serbi të madhe, duke sakrifikuar për qëllime politike edhe fëmijët e pafajshëm.

Ndërkaq Këshilli i Bashkëisë Islame të Tivarit kërkoi dje policia dhe gjyqësia malazeze që të angazhohen seriozisht për arrestimin e aktorëve që të shtunën e sulmuan ndërtesën e komunitetit mysliman në këtë qytet.

 

 

Kryeministri maqedonas ka paraqitur kërkesën zyrtare për anëtarësimin e vendit të tij në BE

 

Dublin-Bruksel, 23 mars 2004 - Kryeministri i Maqedonisë Branko Cërvenkovski ka paraqitur në Dublin kërkesën zyrtare për anëtarësim në Bashkimin Evropian. Shefi i diplomacisë evropiane Havier Solana e ka vlerësuar si një arritje të jashtëzakonshme dhe mesazh pozitiv për gjithë rajonin kërkesën e Shkupit zyrtar për anëtarësim në Bashkimin Evropian.

 

Solana ka nënvizuar se dita e djeshme shënon fillimin e një rruge të vështirë e cila nëpërmjet zbatimit të Marrëveshjes paqësore të Ohrit dhe një numër reformash do të çojë këtë proces përpara ka nënvizuar z. Solana.

 

 

Vullnetarët e Arkanit në veriun e Mitrovicës?

 

Beograd, 23 mars 2004 - "Tërë Këshilli për siguri i Partisë së Unitetit Serb në përbërje të zgjeruar ditëve të fundit ndodhet në në pjesën veriore të Mitrovicës. Kush dëshiron mund të na bashkohet", ka deklaruar lideri i kësaj partie Borislav Peleviq, themelues i së cilës është krimineli i njohur serb Zhelko Razhnjatoviq-Arkan.

Siç shkruan gazeta "Danas" e Beogradit, Peleviq ka refuzuar të përgjigjet në pyetjen nëse kjo parti po mbledh njësitet e veta vullnetare për t'i dërguar në Kosovë.

 

Por, sipas gazetës në fjalë tërë rekrutimi i vullnetarëve dhe stërvitja e tyre po zhvillohet në fshehtësi të madhe. "Si një nga mundësitë për transportin e armëve dhe të pajisjeve të njësiteve të tilla bëhet me kamionë të ndihmave humanitare për popullsinë joshqiptare", shkruan gazeta "Danas" në numrin e sotëm.

 

 

Ekstremistët palestinezë zotohen të hakmerren për vrasjen e Jasinit

 

Gaza, 23 mars 2004 - Dhjetra mijëra palestinezë marshuan në qytetin e Gazës duke u zotuar të hakmerren kundër Izraelit gjatë ceremonisë së varrimit të themeluesit dhe udhëheqësit shpirtëror të Hamasit, Sheikut Ahmed Jasin, i cili u vra rë hënën nga forcat izraelite.

Luftëtarë të armatosur të Hamasit shoqëruan arkivolin e Sheik Jasinit në rrugët e qytetit. Protesta u zhvilluan në mbarë Rripin e Gazës dhe Bregun Perendimor, gjatë të cilave të paktën 4 palestinezë u vranë në përleshje me trupat izraelite.

Sheiku Jasin u vra nga raketat e helikopterëve izraelitë kur po dilte nga një xhami e Qytetit Gaza në karriken e tij të invalidit pas lutjeve të pasdites. Palestinezët thonë se edhe 7 persona të tjerë humbën jetën, përfshirë 2 truproje të sheikut.

 

 

Vrasja e Jasinit shqetëson Uashingtonin

 

Uashington, 23 mars 2004 - Departamenti amerikan i Shtetit shprehu shqetësim të thellë për vrasjen nga Izraeli të udhëheqësit të Hamasit, Sheikut Ahmed Jasin. Zëdhënësi Riçard Bouçer nuk e dënoi hapur vrasjen, por tha se ky veprim nuk do të ndihmojë përpjekjet për arritjen e paqes në Lindjen e Mesme.

 

Në një deklaratë të veçantë, Shtëpia e Bardhë tha se të gjitha palët në konfliktin izraelito palestinez duhet të tregohen të përmbajtura.

Ndërkohë, faqja islamike e internetit Al-Ansar botoi një deklaratë, për të cilën pretendon se ishte nga një grup i lidhur me al-Kaidën, i cili zotohet të hakmerret për vrasjen e Sheikut Jasin.

 

 

Takim i ministrave të jashtëm të BE mbi luftën kundër terrorizmit

 

Bruksel, 23 mars 2004 - Ministrat e jashtëm të Bashkimit Evropian janë mbledhur në Bruksel për të hartuar një plan të bashkërenduar për të luftuar terrorizmin pas shpërthimeve terroriste të 11 marsit ndaj trenave të pasagjerëve në Madrid.

Ministrat kanë në plan të diskutojnë një projekt-deklaratë në të cilën terrorizmi cilësohet një Akërcënim kryesor ndaj Bashkimit Evropian. Projekt-deklarata kërkon nga të gjitha vendet anëtare që të veprojnë në frymën e solidaritetit, nëse ndonjë prej tyre goditet nga terrorizmi.

Po sot, shefat e policisë evropiane po takohen në Dublin për të diskutuar ndër të tjera edhe përgjigjen ndaj terrorizmin. Takimet e sotme janë të fundit në serinë e përgatitjes për një takim dy-ditor të nivelit të lartë që do të zhvillojnë këtë javë në Bruksel.

 

 

Në një pritë afër kufirit afgan janë vrarë 12 ushtarë pakistanezë

 

Vana, Pakistan, 23 mars 2004 - Sulmuesit e armatosur ia kanë zënë pritën një autokolone të ushtrisë pakistaneze, e cila shkonte në një operacion kundër militantëve të Al Kaidës afër kufirit afgan dhe gjatë luftimeve kanë vrarë 12 ushtarë pakistanezë, kurse kanë plagosur edhe 15 të tjerë, kanë bërë të ditur sot (e martë) zyrtarët, njofton AP.

 

Sulmuesit kanë shkrepur raketa dhe kanë goditur të paktën gjashtë kamionë ushtarakë. Sulmi ka ndodhur afër Sarvakait, rreth 30 mila në lindje të qytetit Vana, kryeqytet i rajonit fisnor Vaziristan.

 

 

Në një sulm raketor janë vrarë 3 ushtarë pakistanezë

 

Paraçinar, Pakistan, 23 mars 2004 - Sulmuesit e armatosur kanë shkrepur sot ( e martë) raketa në një kamp ushtarak pakistanez afër kufirit afgan dhe kështu kanë vrarë tre ushtarë pakistanez, kurse kanë plagosur edhe katër të tjerë, kanë bërë të ditur zyrtarët, njofton Rojter. Zëdhënësi ushtarak ende nuk e ka komentuar sulmin e fundit. Në javën e fundit, ka pasur disa sulme në pikat ushtarake dhe përgjatë kufirit.

 

 

Në Bagdad janë vrarë 2 biznismenë finlandezë

 

Bagdad, 23 mars 2004 - Dy biznismenë finlandezë janë vrarë në Bagdad. Ata ishin pjesë e një delegacioni që vizitoi kryeqytetin irakian dhe kur u qëlluan ishin duke shkuar në Ministrrinë e energjetikës, njofton BBCWorld. Në një njoftim të parë thuhej se ata ishin ulur në makinën e tyre kur i kishte goditur një snajper. Ata ishin finlandezët e parë të vrarë që kur ka filluar ndërhyrja amerikane në Irak.

 

 

Autoritetet spanjolle kanë arrestuar edhe 4 persona në lidhje me sulmet në Madrid

 

Madrid, 23 mars 2004 - Autoritetet spanjolle kanë arrestuar edhe katër persona në lidhje me sulmet me bombë më 11 mars në trenat e Madridit, ku u vranë 2002 njerëz. Tash në burg gjenden gjithsej 13 persona.

 

 

Në Tailandë ka ndodhur një shpërthim dhe është vrarë një polic

 

Taipeh, 23 mars 2004 - Një bombë ka shpërthyer në jug të Tailandës afër lokalit, ku po mbahej një takim i zyrtarëve të ministrive të Mbrojtjes dhe asaj të brendshme me zyrtatrët lokalë. Nga shpërthimi është plagosur vetëm një grua.

Njoftohet se në një incident tjetër është vrarë një polic në qytetin Jala. Fajësohen militantët islamikë.

 

 

Kanë mbetur të ngujuar 6 shkencëtarë britanikë në një shpellë në Meksiko

 

Meksiko, 23 mars 2004 - Një ekip po bën sot (e martë) përpjekje për të shpëtuar gjashtë shkencëtarë britanikë të ngujuar tash pesë ditë në një shpellë në Meksiko, e cila është shembur mbi ta, ka bërë të ditur zëdhënësi i shërbimit të shpëtimit, njofton BBCWorld. Njoftohet se shkencëtarët kanë folur me mobil dhe janë mirë me shëndet.

 

 

Vrasësi i ministres suedeze, Ana Lind, është dënuar me burg të përjetshëm

 

Stokholm, 23 mars 2004 - Serbi Mijajlo Mijajloviq që ka pranuar vrasjen me thikë të ministres suedeze të Jashtme, Ana Lind, në Stokholm, është dënuar sot (e martë) me burg të përjetshëm. Mijajlo Mijajloviq, ka mohuar vrasjen, duke insistuar se ai e ka kryer këtë sulm, për shkak "të zërave në kokën e tij".

 

Por, testet psikiatrike kanë treguar se kur e ka kryer sulmin në shtatorin e vjetmë, ka qenë në gjendje normale. Gjykata në Stokholm ka konstatuar se ai është fajtor për vrasje. Ai do t'i vuajë të pakten 10 vjet para se të mund të rishqyrtohet dënimi i tij.

 

 

Një anije ruse me reaktor bërthamor mund të shpërthejë në çdo kohë

 

Moskë, 23 mars 2004 - Kreu i marinës ruse ka urdhëruar sot (e martë) anijen kryesore të Flotës veriore "Petri i Madh", që është e pajisur me reaktor bërthamor, të ankorojë në port, me motivacion se gjendja e saj është e keqe dhe mund të shpërthejë në çdo kohë, bën të ditur agjencia Interfax, njofton Rojter.

 

Më 2003, kjo anije shpesh ka qenë mikpritëse e zyrtarëve të lartë rusë, përfshirë edhe vetë Putinin dhe ka qenë shpallur si anije model e Flotës.

  |  KULTURË  |  HISTORI  |   POLITIKË  |  OPINIONE  |  ADRESARI  |  ARKIVI  |