|  KULTURË  |  HISTORI  |   POLITIKË  |  OPINIONE  |  ADRESARI  |  ARKIVI  | 

Dega e LDK-së në Gjermani: Dënojmë të gjitha ato forca dhe individë që gjatë trazirave të fundit në Kosovë vepruan kundër interesave të popullit shqiptar

Frankfurt (GJERMANI), 22 mars 2004 - Kryesia e Degës së LDK-së në Gjermani në mbledhjen e saj të mbajtur në Frankfurt, më 20 mars 2003, ku morën pjesë edhe kryetarët e nëndegëve të LDK-së dhe disa aktivistë të tjerë, lidhur me situatën e krijuar në Kosovë lëshon këtë:

Deklaratë

Kryesia e Degës së LDK-së në Gjermani me kohë ka tërhequr vëmendjen për veprimtarinë e dyshimtë të grupeve e grupacioneve të caktuara në Kosovë, që qëllim kanë pasur gjithmonë destabilizimin e Kosovës dhe zhagitjen e proceseve, që Kosovën e çojnë kah pavarësia e plotë.

Kryesia e Degës së LDK-së, që nga largimi i forcave okupuese serbe nga Kosova dhe zgjedhja e organeve të para legjitime në Kosovë me votën e popullit, i ka përkrahur ato dhe fuqishëm i ka mbeshtetur, sepse ka besuar se ato janë të vetmet organe që mund të çojnë përpara proceset pozitive në Kosovë, sepse ato vet janë shprehja e vullnetit të popullit.

Prandaj edhe Kryesia e Degës së LDK-së ka përkrahur rrugën e zgjedhur nga Presidenca, Kuvendi e Qeveria e Kosovës për pavarësinë e saj.

Kryesia e Degës së LDK-së në Gjermani ka dënuar çdo akt antikushtetues dhe antiinstitucional që ka ndodhur në Kosovë.

Kryesia e Degës së LDK-së në Gjermani ka dënuar dhe ka shprehur reagimin e saj të ashpër për sulmin që është bërë ndaj rezidencës së presidentit të Kosovës, dr. Ibrahim Rugova, duke e cilësuar atë si një nga veprat më të shëmtuara kriminale të forcave antishqiptare që veprojnë në Kosovë.

Kryesia e Degës së LDK-së në Gjermani ka përkrahur mbajtjen e protestës gjithpopullore të organizuar nga Kryesia qendrore e LDK-së, në shenjë të dënimit të sulmit kriminal ndaj objektit të presidencës së Kosovës dhe kryetarit të saj, dr. Ibrahim Rugova.

Kryesia e Degës së LDK-së në Gjermani ka dënuar dhe dënon sjelljet vandaliste të serbëve të Kosovës, që sa herë të shkaktohen ekcese, edhepse të pa ndriçuara bllokojnë rrugët dhe veprojnë në kundërshtim me çdo rregull, të një shteti demokratik.

Kryesia e Degës së LDK-së ka dënuar shtyrjen për vrasje të tre të miturve në fshatin Çabër të Mitrovicës dhe ka kërkuar nga organet përgjegjëse që të dënohen autorët e këtij krimi makabër që ka marrë jetën e tre fëmijëve shqiptarë.

Kryesia e Degës së LDK-së në Gjermani ka përkrahur edhe protestën e qytetarëve shqiptarë ndaj detyrimit për vrasje të tre fëmijëve shqiptarë në Mitrovicë, por njëkohësisht ka shpreh mospajtimin me mënyrën e të demostruarit të disa grupeve që si pasojë e sjelljes së tyre të papërgjegjshme humben jetën dhjetëra shqiptarë.

Kryesia e Degës së LDK-së në Gjermani nuk pajtohet dhe asnjëherë nuk është pajtuar që të sulmohet pasuria e Kosovës e aq më pak pjesëtarët e insitucioneve që janë të thirrura për mbajtjen e rendit dhe të qetësisë në Kosovë. Nuk mund të pajtohemi që të sulmohen pjesëtarët e policisë së UNMIK-ut apo ushtarët e KFOR-it si dhe pasuria e tyre e sjellë në Kosovë për të mirën e popullit që jeton aty. Ata që bëjnë vepra të tilla nuk ia duan të mirën Kosovës e as popullit shqiptar, porse kryejnë vetëm atë pjesë të punës që nuk arritën dhe nuk do të arrijnë kurrë ta kryejnë forcat kriminale serbe.

Dënojmë të gjitha ato forca dhe individë që gjatë trazirave të fundit në Kosovë vepruan kundër interesave të popullit shqiptar dhe janë fajtorët kryesor për humbjen e jetës së 28 personave, për çka duhet të përgjigjen para organeve të drejtësisë.

Kryesia e Degës së LDK-së ndjen dhimbje të madhe për viktimat, që kryesisht janë të rinj. U shpreh ngushllime familjeve të tyre dhe poashtu u dëshiron shërim atyre që pësuan lëndime.

Kryesia e Degës së LDK-së në Gjermani mendon se një kontribut të keq në eskalimin e dhunës në këto protesat e kanë bërë mjetet e informimit në Kosovë e sidmos RTK dhe Radio Kosova. Ato duhet të përgjigjen për rolin e tyre destruktiv dhe nxitjen e protestuesve ne përdorimin e dhunës.
Kryesia e Degës së LDK-së në Gjermani kërkon nga populli shqiptar i Kosovës që të ruajë gjakftohtësinë dhe t´u bindet urdhërave të udhëheqësve të tyre legjitimë dhe të subjektëve ndërkombëtarë që deri më sot kanë kontribuar për paqen dhe rehatinë në Kosovë.

Populli i Kosovës duhet të jetë i vetdijshëm se pa ndihmën e UNMIK-ut e të KFOR-it që përbëhen nga policë e ushtarë të vendeve të ndryshme të botës të udhëhequra nga NATO dhe SHBA-të, Kosova nuk do të kishte këtë zhvillim që e ka sot, prandaj ata duhet t´u jenë mirënjohës atyre e jo të rrezikojnë jetën e tyre dhe të asgjësojnë pasurinë e tyre. Sepse jemi në rrezik që të humbim përkrahjen e aleatëve që i kemi fituar me shumë mund e sakrifica.

Kryesia e Degës së LDK-së në Gjermani, është e bindur se grupet e tilla që nuk ia duan të mirën Kosovës janë në zvogëlim dhe se shumë shpejt Kosova, me ndihmen e miqëve të saj, në radhë të parë SHBA-ve, do të jetë shtet i pavarur, për çka dhanë jetën shumë shqiptarë.

Pa dyshim se këto ngjarje do të ndikojnë në aspekte shumëdimenzionale dhe do të ngadalsojnë proceset e filluara në Kosovë, që çojnë drejt konsolidimit, zhvillimit dhe pavarësisë. Është më se e domosdoshme të tregohet toleranca, dija, orientimi për demokraci dhe prosperitet, sepse në të kundërtën rrezikohet të dështojmë në çështjen tonë dhe pasojat do të jenë të pakalueshme për gjenerata të tëra.