Sot ditë zie në Kosovë në nderim të qytetarëve që humbën jetën gjatë trazirave të fundit

 

Prishtinë, 22 mars 2004 - Presidenti i Kosovës Ibrahim Rugova ka shpallur ditën e sotme ditë zie në Kosovë për nderim dhe kujtim të qytetarëve që humbën jetën gjatë trazirave të fundit në Kosovë.

   Përmbajtja:

• Presidenti Rugova vlerësoi sot para gazetarëve se gjendja ka filluar të normalizohet në Kosovë

• Holkeri dhe Rexhepi vizituan lagjen Ulpiana në Prishtinë ku banojnë serbët

• Gjilan: Serbët janë të gatshëm të kthehen nëpër shtëpitë e tyre, por kërkojnë siguri

• "Indipendet": Fuqitë e mëdha duhet patjetër të caktojnë datën për pavarësinë e Kosovës

• Shefer tha se shqiptarët nuk guxojnë të përdorin dhunën për realizimin e qëllimeve të tyre politike

• Në protestat e fundit në Kosovë kanë humbur jetën 24 persona dhe 551 janë plagosur

• Llavrov tha se situata në Kosovë është jashtëzakonisht e tensionuar

• Mbrëmë në veri Mitrovicës janë lënduar dy shqiptarë

• Ombudspersoni bën thirrje të ndihmohen personat e zhvendosur të nacionalitetit serb

• Në Çabër me nderime të mëdha u bë varrimi i dy fëmijëve Egzon Veliut dhe Avni Veselit

• Sekretari i Përgjithshëm i NATO-s Shefer viziton sot Kosovën

• Policia e UNMIK-ut ka bërë të ditur se ka arrestuar disa persona për trazirat e fundit në Kosovë

• Ministri gjerman i Mbrotjes thotë se as që mund të bëhet fjalë për një tërheqje të trupave të KFOR-it nga Kosova

• Në Klinikën Universitare të Prishtinës gjatë trazirave kanë arritur 229 persona, prej tyre 100 veta me armë zjarri

• Gjendja në Kosovë është e qetë dhe në të gjitha rrugët e saj është rivendosur liria e lëvizjes

• U lirua kryetari i KMDLNJ-së në Mitrovicë Halit Barani

• Solana dhe Anan kanë biseduar në Nju-Jork për zhvillimet e fundit në Kosovë

• LDK në Gjermani: Dënojmë ato forca dhe individë që vepruan kundër interesave të popullit shqiptar

• Studentët shqiptarë në Hmaburg: aktet e dhunës të ditëve të fundit janë shumë shqetësuese dhe trishtuese

• Komuniteti shqiptaro-amerikan në Çikago apelon të ruhet miqësia e krijuar me mund me SHBA-të

• Shefi i policisë kufitare të Malit të Zi cilësoi situatën në kufirin shtetëror me Kosovën si të qetë

• Në Bagdad është vrarë një ushtar amerikan dhe një përkthyes irakian

• Është vrarë udhëheqësi shpirtëror i Hamasit, sheiku Ahmed Jasin

• Shtëpia e Bardhë bëhet objekt kritikash

• Në Nepal besohet të jenë vrarë 500 maoistë gjatë përleshjeve të fundit

• Në Irak katër të vrarë si pasojë e shpërthimeve

• Vrasja e një ministri nxit luftime në Afganistan

• Presidenti Bush zhvilloi tubimin e parë në kuadër të fushatës së tij në këtë vit zgjedhjesh

Presidenti Rugova vlerësoi sot para gazetarëve se gjendja ka filluar të normalizohet në Kosovë

 

Prishtinë, 22 mars 2004 - Presidenti i Kosovës Ibrahim Rugova pati sot një takim me gazetarë të vendit dhe të huaj në të cilën foli për situatën aktuale në vend.   Pasi përkujtoi se sot është ditë zie në Kosovë për të kujtuar dhe nderuar viktimat e trazirave të javës së kaluar, Presidenti Rugova vlerësoi se gjendja ka filluar të normalizohet, duke thënë se ishte më qetë gjatë këtyre ditëve në gjithë Kosovën.   "Ne do të fillojmë shqyrtimin e shkaqeve dhe të pasojave që u paraqitën në këto trazira.

  

Do t'i shqyrtojmë raportet me UNMIK-un që të jenë më produktive dhe më efikase", tha më tutje ai. Presidenti theksoi se objektet e dëmtuara kulturore e historike, ato publike, si dhe shtëpitë e qytetarëve do të rindërtohen dhe në lidhje me këtë përkujtoi se Qeveria tashmë ka marrë një nismë në këtë drejtim.

 

Duke pasur parasysh progresin që ka arritur Kosova gjatë pothuajse pesë vjetëve të kaluara, Presidenti Rugova tha se vazhdimisht ka kërkuar të bëhet njohja formale e pavarësisë së Kosovës, duke nënvizuar se pavarësia është një çështje vitale për të gjithë qytetarët e Kosovës. "Pra një Kosovë e pavarur, demokratike e integruar në BE, në NATO dhe në miqësi të përhershme me SHBA-të, si dhe në marrëdhënie të mira me të gjitha fqinjët", theksoi ai.

 

"Pavarësia i duhet Kosovës për të përshpejtuar zhvillimin e saj demokratik dhe ekonomik, sepse do të qetësonte popullin e Kosovës dhe këtë pjesë të Evropës dhe të botës", tha Presidenti Rugova, duke shprehur optimizëm se do të kapërcehet gjendja e krijuar në vend pas trazirave.

"Jam optimist se do të tejkalojmë shpejt këtë gjendje dhe do të vazhdojmë progresin dhe afirmimin e Kosovës në botë", u shpreh zoti Rugova.

Duke u përgjegjur në një pyetje nëse pas ngjarjeve të fundit, pavarësia e Kosovës është vënë në rrezik, Presidenti Rugova e mohoi këtë pikëpamje, duke thënë se shtypi ndërkombëtar dhe personalitetet e ndryshme pohojnë se është e domosdoshme dhe është urgjente pavarësia e Kosovës, por edhe vetë këtë e thekson vazhdimisht. "Këto ngjarje mund të dobësojnë imixhin e progresin e Kosovës, por të gjithë e kanë kuptuar se pavarësia është e domosdoshme", nënvizoi zoti Rugova.

Në pyetjen tjetër në lidhje me përpjekjet për ndërtimin e një Kosove multietnike dhe nëse pas ngjarjeve të fundit mund të ketë reperkusione, Presidenti Rugova tha se Kosova është si çdo vend tjetër në Evropë. Është një vend ku ka shumicën shqiptare dhe grupet etnike, minoritetet...

 

Koncepti multietnik do të thotë komunikim brenda shoqërisë, kurrsesi një inxhiering i popullsië të një vendi, tha ai. "Pra, unë kam thënë shpesh se edhe sot Kosova është multietnike, ka shumicën shqiptare, ka minoritetet, ato që ekzistojnë në Kosovë, prandaj perspektiva është që do të ketë komunikim mes të grupeve etnike, popullit të Kosovës, qytetarëve të saj".

Duke komentuar raportet me UNMIK-un dhe ndërkombëtarët, Presidenti tha se këto çështje shpesh i ka theksuar, dhe UNMIK-u është dakord që këto raporte të shyrtohen, për të pasur marrëdhënie më produktive, më efikase, siç tha, në kuptimin normal të fjalës dhe jo në kontekst të këtyre ditëve. "Pra çështja e kompetencave, pastaj e institucioneve dhe autoriteteve të Kosovës dhe çështjet e tjera që të kemi një efikasitet më të madh të dy palët".

I pyetur për 24 marsin, për bilancin e pesë vjetëve të kaluara në Kosovë, Presisdenti Rugova tha se është një bilanc pozitiv dhe është shënuar progres i madh në të gjitha fushat e jetës vazhdimisht. Pra 24 marsi është një datë e shënuar, tha ai, duke shtuar se të rinjtë e Kosovës e kanë quajtur "ditën e shpresës". "Një respekt dhe një nderim i madh për NATO-n, për focat e KFOR-it, të cilat prej pesë vitesh që ndodhen në Kosovë po bëjnë sigurinë e vendit", tha ai.

Në pyetjen tjetër, rreth pohimeve për ndarjen e Kosovës, dhe nëse bashkësia ndërkokmbëtare mund të bëjë ndonjë kompromis për pavarësinë dhe ta ndajë Kosovën, Presidenti Rugova u përgjegj:
"Këto janë spekulime të ndryshme, të cilat nuk vijnë në konsiderim as për bashkësinë ndërkombëtare as për ne.

 

Pra kufijtë e Kosovës janë të paprekshëm. Dhe askund nuk janë prekur kufijtë e mëparshëm. Çdo lëvizje në këtë drejtim do të shkaktonte probleme të reja dhe çështje të reja", tha Presidenti Rugova, duke ritheksuar se kufijtë janë të paprekshëm dhe të pandryshuar.

 

 

Holkeri dhe Rexhepi vizituan lagjen Ulpiana në Prishtinë ku banojnë serbët

 

Prishtinë, 22 mars 2004 - Shefi i UNMIK-ut, Hari Holkeri dhe kryeministri Bajram Rexhepi vizituan ndërtesën e banuar me minoritarë serbë në lagjen Ulpiana në Prishtinë, e cila gjatë trazirave të javës së shkuar është sulmuar dhe disa banesa janë demoluar.

Holkeri dhe Rexhepi dënuan dhunën dhe premtuan se do të bëjnë çdo gjë për ta tejkaluar gjendjen e tanishme. Bashkësia ndërkombëtare, tha Holkeri, do të bëjë çmos që shtëpitë dhe kishat e djegura të riparohen.

 

Aktet e tilla janë vandaliste, tha kryeministri dhe se aktet e dhunës nuk kanë kurrfarë justifikimi. "Të gjithë ne jemi humbës", tha Rexhepi, dhe shtoi se në këto trazira shumë njerëz kanë humbur jetët dhe janë shkaktuar shumë dëme materiale.

 

Rexhepi tha se qeveria ka marrë vendim që të krijohet një fond për riparimin e kishave dhe pronës private të djegur, duke shtuar se duhet të riparohet edhe gatishmëria e njerëzve që të jetojnë së bashku. Ndërkaq për faktin sesa do të ndikojnë këto dëme në të ardhmen e Kosovës dhe statusin e saj, Rexhepi tha se është heret të bëhen analiza të tilla.

Holkeri vizitoi edhe Kuvendin Komunal të Lipjanit ku u takua me udhëheqjen komunale dhe u njoftua për situatën e atjeshme.

 

 

Gjilan: Serbët janë të gatshëm të kthehen nëpër shtëpitë e tyre, por kërkojnë siguri

 

Gjilan, 22 mars 2004 - Pas protestave të 17 e 18 marsit, situata në rajonin e Gjilanit ka qenë e qetë dhe nuk janë regjistruar akte tjera të dhunës, ka thënë të hënën Izet Azizi, komandant i Stacionit Policor në Gjilan, në takimin e Komitetit për Siguri dhe Emergjencë.

Azizi tha se nga SHPK-ja në Artanë është njoftuar se dje ka qëndruar atje Momçillo Trajkoviq, i cili ka biseduar edhe me pjesëtarët e këtij shërbimi dhe atyre u ka pohuar se e ka vizituar tërë Kosovën si dhe kishën ortodokse në Gjilan.

Disa pjesëtarë të komunitetit serb kanë kërkuar nga SHPK-ja që t`u ndihmojë në bashkimin e familjes në fshatin Pasjan, pasiqë disa nga ta situata i kishte zënë në një vendbanim tjetër dhe ne e kemi bërë këtë, tha kapiteni Azizi.

Ai ka prezentuar sot edhe shifrat e pasojave të ngjarjeve të 17 e e 18 marsit, në të cilat humbi jetën një qytetar, u lënduan 15 policë (një prej tyre më rëndë), janë djegur 18 shtëpi, ndërsa 9 të tjera janë dëmtuar, janë djegur 3 vetura të UNMIK-ut dhe 4 janë dëmtuar. Është dëmtuar edhe objekti i administratës ndërkombëtare. Janë dëmtuar 9 vetura të serbëve.

Sipas të dhënave që ka policia, në qytet jetojnë 11 serbë dhe 52 shtëpi të këtij komuniteti nuk janë prekur nga protestat, nga gjithsej 79 prona të serbëve në qytet, ka thenë Azizi.

Koloneli Riçard Xhonson, komandant i kampit "Montith" në Gjilan e vlerësoi të qetë natën e mbrëmshme dhe e çmoi bashkëpunimin e deritashëm të të gjitha subjekteve në këtë komunë, i cili duhet të vazhojë edhe në të ardhmen, bashkë me përfaqësuesin e komunitetit serb Periq, që shpresoj se do të kthehet sa më shpejt, ka thënë Jonson.

Gjendja sot është normalizuar edhe në shkollat e mesme, në shërbimet publike si dhe në administratën komunale. Enver Muja, kryeshef ekzekutiv tha se vetëm një serb ka ardhur sot në punë, por në bazë të informacioneve që ka marrë, të tjerët janë paraqitur në zyrat lokale të komuniteteve.

Koloneli Shaban Musliu ka shprehur gatishmërinë e TMK-së që të ndihojë në ndërtimin dhe renovimin e objekteve të dëmtuara, nëse vlerësohet e nevojshme.

Përfaqësuesja e UNMIK-ut për komunitete Zehra Allmaz tha se shumica e serbëve të zhvendosur nga qyteti ndodhen nëpër fshatrat e këtushme, ndonëse disa prej tyre kanë udhëtuar tanimë edhe për Serbi. "Ata dëshriojnë të kthehen nëpër shtëpitë e tyre, por kanë frikë", ka thenë ajo.

 

Këtë gjë janë të gatshëm ta bëjnë edhe punëtorët serbë në shërbimin civil komunal, por kërkojnë t`iu garantohet siguri.

Lutfi Haziri ka shprehur drojën se lufta mediale që po zhvillohet në Serbi rreth asaj që ndodhi në Kosovë, do t`i mbajë peng serbët e këtushëm dhe do t`i dëmtojë përpjekjet e faktorit vendor dhe ndërkombëtar për të rikthyer normalitetin.

 

 

"Indipendet": Fuqitë e mëdha duhet patjetër të caktojnë datën për pavarësinë e Kosovës

 

Londër, 22 mars 2004 - Gazeta "Indipendent" e Londrës ka botuar një koment në të cilin përkujtohen fjalët e Riçard Hollbrukut që kishte paralajmëruar serbët se duhet të zgjedhin Kosovën apo Evropën, duke konkluduar se nëse zgjedhin Kosovën do të humbin të dyjat.

Në tekstin e Markus Tanerit, i cili më herët ka qenë korrespondent nga Ballkani i kësaj gazete, e tani bashkëpunëtor i Institutit për Luftën dhe Paqen, theksohet se politikanët e Beogradit nuk po tregojnë publikisht kurrfarë shenje se ky paralajmërim i Hollbrukut ka arritur deri në veshët e tyre.

Të gjithë druajnë, shkruan "Indipendent", madje edhe nëse paralajmëroni diçka të tillë, Kosova me të vërtetë do të jetë e humbur. Tani Serbia rrezikon sërish të karakterizohet si vend jostabil, ngapak tmerrues dhe i pasigurt për investime.

Dhe, siç pritet, nëse në zgjedhjet presidenciale në Serbi fiton partia ultranacionaliste, e cila angazhohet për kthimin e të gjitha territoreve serbe të humbura gjatë viteve nëntëdhjetë, atëherë sheqetësimi vetëm sa do të rritet.

Autori në "Indipendent" përfundon se fuqitë e mëdha duhet patjetër të caktojnë datën për pavarësinë e Kosovës dhe të punojnë në këtë drejtim se si të sigurojnë autonomi për bashkësinë serbe në Kosovë, ose të ofrojnë ndonjë alternativë madje edhe nëse do të nënkuptonte ndarjen në vija etnike.

 

 

Shefer tha se shqiptarët nuk guxojnë të përdorin dhunën për realizimin e qëllimeve të tyre politike

 

Budapest, 22 mars 2004 - Sekretari i përgjithshëm i NATO-s Jap de Hop Shefer ka deklaruar në Budapest se shqiptarët në Kosovë nuk guxojnë të përdorin dhunën për realizimin e qëllimeve të tyre politike.

 

"Në Kosovë askush nuk guxon të mendojë, e kjo para së gjithash ka bëjë me bashkësinë shumicë shqiptare, që me provokimin e dhunës të shpejtohet realizimi i ambicieve politike", ka thënë Shefer para gazetarëve

 

 

Në protestat e fundit në Kosovë kanë humbur jetën 24 persona dhe 551 janë plagosur

 

Prishtinë, 22 mars 2004 - Sipas bilancit më të ri të KFOR-it në Kosovë në protestat e fundit kanë humbur jetën 24 persona dhe 551 janë plagosur, prej tyre 22 në gjendje të rëndë. Në mesin e të plagosurve janë edhe 98 pjesëtarë të policisë së UNMIK-ut dhe SHPK-së, si dhe 55 pjesëtarë të KFOR-it.

Ndërkaq, anembanë Kosovës janë djegur 27 makina të UNMIK-ut, 19 makina të SHPK-së dhe 24 makina të civilëve. Kështu kanë theksuar burimet e administratës së UNMIK-ut në Kosovë.

 

 

Llavrov tha se situata në Kosovë është jashtëzakonisht e tensionuar

 

Moskë, 22 mars 2004 - Ministri i jashtëm rus Sergej Llavrov ka vlerësuar se situata në Kosovë është jashtëzakonisht e tensionuar. Kriza mund të zgjidhet "vetëm me zbatimin gjithëpërfshirës të planit për Kosovën, të miratuar në rezolutën 1244 të Këshillit të Sigurimit", ka thënë ministri rus Llavrov.

 

 

Mbrëmë në veri Mitrovicës janë lënduar dy shqiptarë

 

Mitrovicë, 22 mars 2004 - Sipas njoftimeve nga Mitrovica, mbrëmë vonë në Spitalin e Mitrovicës kanë arritur dy qytetarë të lënduar afër Tre Rrokaqiejve. Qytetarët e lënduar janë: Syrja Koshi, i lindur më 1924. dhe Shyhret Koshi, e lindur më 1928.

 

Pacientët gjendën nën monitorim në Spitalin e Mitrovicës.

Në spitalet e Kosovës janë gjithsej 112 pacientë të hospitalizuar. Gjendja e të gjithë pacientëve të hospitalizuar është stabile, thuhet në një njoftim të Ministrisë së Shëndetësisë.

 

 

Ombudspersoni bën thirrje të ndihmohen personat e zhvendosur të nacionalitetit serb

 

Prishtinë, 22 mars 2004 - Instituti i Ombudspersonit në Kosovë urgjentisht u bën thirrje të gjitha organizatave humanitare qoftë atyre ndërkombetare apo lokale që janë duke operuar në Kosove t'i ndihmojnë të gjithe personat e nacionalitetit serb apo minoritetet tjera te cilët janë evakuar nga shtëpitë e tyre dhe janë strehuar në kampet e KFOR-it dhe ne vendet e tjera të perkohshme në tërë Kosoven.

 

Atyre u nevojitet ndihma elementare si ushqim, veshje, medikamente dhe plafe. Ju lusim qe kesaj kërkesë t'i japni rëndësi prioritare pasi është e domosdoshme që t'u ndahen keto ndihma sa më parë, thuhet në një apel të Ombudspersonit të Kosovës.

 

 

Në Çabër me nderime të mëdha u bë varrimi i dy fëmijëve Egzon Veliut dhe Avni Veselit

 

Çabër - Mitrovicë, 22 mars 2004 - Dje pasdite në fshtatin Çabër të Zubin Potokut me nderime të mëdha, në prani të mijëra qytetarëve anembanë Kosovës, u bë varrimi i dy fëmijëve Egzon Veliut, 12-vjeç dhe Avni Veselit, 11 vjeç, të cilët humbën jetën tragjikisht më 17 mars në ujërat e lumit Ibër.

 

Ndërkaq, trupi i fëmijës së tretë Florent Veseli 8 vjeç, nuk është gjetur ende. KFOR-i dhe policia e UNMIK-ut kanë siguruar pjesëmarrje të qetë të mijëra njerëzve në varrim, ku përveç familjarëve, kanë marrë pjesë përfaqësuesit e institucioneve dhe jetës politike të Kosovës.

Një grup fëmijësh mbanin parulla në të cilat shkruhej: "Duam paqen", "Stop dhunës" dhe "Mjaft gjakderdhje".

Ne varrim morën pjesë edhe shefja e Zyrës amerikane në Prishtinë Marsi Ris, shefi i Zyrës britanike Mark Dikenson, kryeministri Bajram Rexhepi.

 

Ndërkaq Presidenti i Kosovës Ibrahim Rugova ka dërguar një mesazh ngushëllimi, të cilin e lexoi këshilltari i tij, Salih Cacaj, i cili i quajti fëmijët martirë të rinj. "Ata do të mbesin në kujtimin tonë të përjetshëm si lule të çelura në dritën e lirisë, të pavarësisë dhe të demokracisë të vendit tonë - Kosovës.

 

Në këto momente të rënda për ju bëhuni të fortë, sepse ne qëndrojmë pranë jush. Do t'i bëjmë të gjitha përpjekjet për të gjetur trupin e Florentit të vogël", ka thënë presidenti Rugova në mesazhin e tij të ngushëllimit.

Ndërkaq, Kryeministri Bajram Rexhepi në fjalën e tij ka theksuar se familjarët e fëmijve të mbytur me qëndrimin e tyre dinjitoz në këto çaste të vështira nëpër të cilat po kalon Kosova, janë bërë shembull për Kosovën. Ai ka shtuar se me një qëndrim të tillë të familjarëve të viktimave të gjithë ne mund të krenohemi.

 

 

Sekretari i Përgjithshëm i NATO-s Shefer viziton sot Kosovën

 

Prishtinë, 22 mars 2004 - Sekretari i Përgjithshëm i NATO-s Jap de Hop Shefer do të vizitojë sot Kosovën për t'u njoftuar më hollësisht me situatën në vend, është bë e ditur në selinë e KFOR-it në Prishtinë. Shefer në Prishtinë do të bisedojë me kryeadministratorin, Hari Holkeri, komandantin e KFOR-it Holger Kamerhof dhe me përfaqësuesit e institucioneve të Kosovës.

Temë e bisedimeve do të jenë zhvillimet e fundit në Kosovë.

 

 

Policia e UNMIK-ut ka bërë të ditur se ka arrestuar disa persona për trazirat e fundit në Kosovë

 

Prishtinë, 22 mars 2004 - Zëdhënësi i policisë së UNMIK-ut Derek Çapell tha se një numër personash janë arrestuar në ndërlidhje me aktet e dhunshme gjatë trazirave të fundit në Kosovë, por hetimet e mirëfillta do të bëhen pasi të jetë krijuar një mjedis i sigurt.

 

Ai ka thënë se po përpiqet që të marrë një listë të plotë nga stacionet rajonale të policisë, duke mos dhënë detaje të tjera. Po ashtu njoftohet se një prokuror ndërkombëtar është caktuar për të hetuar mbytjen në lumin Ibër të tre fëmijëve shqiptarë, mbytja e të cilëve nxiti shpërthimin e trazirave.

 

 

Ministri gjerman i Mbrotjes thotë se as që mund të bëhet fjalë për një tërheqje të trupave të KFOR-it nga Kosova

 

Hanover, 22 mars 2004 - Ministri gjerman i Mbrotjes Peter Shtruk tha se në kushte të reja në Kosovë as që mund të bëhet fjalë për një tërheqje të trupave të KFOR-it në vitin 2006 sikurse që ishte parashikuar.

 

Tashmë në Kosovë nga Hanoveri kanë arritur njësitë e para shtesë të tupave gjermane, përkatësisht kuadrot e pararojës për të përgatitur stacionimin e 600 ushtarëve shtesë nga Gjermania. Njoftohet se 600 ushtarët e tjerë do nisën për në Kosovës kah mesi i kësaj jave. Kështu numri i përgjithshëm i ushtarëve gjermanë do të arrijë pas kësaj në 3.800.

Ministri Shtruk mendon se përfundimi i misionit të trupave të KFOR-it në vitin 2006 sikurse ishte parashikuar më nuk është realist. Ai shtoi se trupat e KFOR-it nevojiten të qëndrojnë shuëm më gjatë në Kosovë.

 

 

Në Klinikën Universitare të Prishtinës gjatë trazirave kanë arritur 229 persona, prej tyre 100 veta me armë zjarri

 

Prishtinë, 22 mars 2004 - Nga data 17 deri më 21 mars në Klinikën Universitare të Prishtinës kanë arritur 229 persona, prej të cilëve me armë zjarri janë plagosur 100 veta. Dr. Salih Ahmeti, drejtor i kësaj klinike pohon se organizimi i Qendrës Klinike Universitare ishte dhe është shumë i lartë falë edhe gatishmërisë së gjithë stafit mjekësor dhe atij jomjekësor të kësaj qendre.

 

 

Gjendja në Kosovë është e qetë dhe në të gjitha rrugët e saj është rivendosur liria e lëvizjes

 

Prishtinë, 22 mars 2004 - Në Kosovë dje ka mbretëruar një situatë e qetë, ndërkaq në të gjitha rrugët e saj është rivendosur liria e lëvizjes thanë zyrtarët e forcave paqeruajtëse, të udhëhequra nga NATO-ja.

 

Ata u shprehën të vendosur për të krijuar një mjedis të sigurtë për të gjithë, ndërkaq kanë paralajmëruar se KFOR-i do të përdorë forcën e nevojshme për të mbrojtur veten dhe qytetarët e Kosovës. Njoftohet se brenda 24 orëve të fundit nuk është shënuar asnjë incident.

 

 

U lirua kryetari i KMDLNJ-së në Mitrovicë Halit Barani

 

Mitrovicë, 22 mars 2004 - Dje u lirua kryetari i Këshillit për të Mbrojtjen e Drejtave dhe Lirive të Njeriut në Mitrovicë, Hali Barani, i cili u arrestua pardje nga forcat e KFOR-it danez për shkak se kishte hyrë në "Zonën e mirëbesimit" pa autorizim.

 

 

Solana dhe Anan kanë biseduar në Nju-Jork për zhvillimet e fundit në Kosovë

 

Nju-Jork, 22 mars 2004 - Zëdhënësja e përfaqësuesit të lartë për Politikë të Jashtme djhe Siguri Kristina Galah ka thënë se Havier Solana është takuar në Nju-Jork me sekretarin e përgjithshëm të OKB-së, Kofi Anan me të cilin ka biseduar për zhvillimet e fundit në Kosovë. Sipas saj, Solana dhe Anan kanë kërkuar të shtohen përpjekjet për ndaljen e dhunës dhe vendosjen e qetësisë dhe paqes në Kosovë.

 

 

LDK në Gjermani: Dënojmë ato forca dhe individë që vepruan kundër interesave të popullit shqiptar

 

Frankfurt, 22 mars 2004 - Kryesia e Degës së LDK-së në Gjermani, në një deklaratë për ngjarjet e fundit në Kosovë thotë se me kohë ka tërhequr vëmendjen për veprimtarinë e dyshimtë të grupeve e grupacioneve të caktuara në Kosovë, që qëllim kanë pasur gjithmonë destabilizimin e Kosovës dhe zhagitjen e proceseve, që Kosovën e çojnë kah pavarësia e plotë.

- Kryesia e Degës së LDK-së, që nga largimi i forcave okupuese serbe nga Kosova dhe zgjedhja e organeve të para legjitime në Kosovë me votën e popullit, i ka përkrahur ato dhe fuqishëm i ka mbështetur, sepse ka besuar se ato janë të vetmet organe që mund të çojnë përpara proceset pozitive në Kosovë, sepse ato vet janë shprehja e vullnetit të popullit.

 

Prandaj edhe Kryesia e Degës së LDK-së ka përkrahur rrugën e zgjedhur nga Presidenca, Kuvendi e Qeveria e Kosovës për pavarësinë e saj.

Kryesia e Degës së LDK-së në Gjermani ka dënuar çdo akt antikushtetues dhe antiinstitucional që ka ndodhur në Kosovë.

Kryesia e Degës së LDK-së në Gjermani ka dënuar dhe ka shprehur reagimin e saj të ashpër për sulmin që është bërë ndaj rezidencës së presidentit të Kosovës, dr. Ibrahim Rugova, duke e cilësuar atë si një nga veprat më të shëmtuara kriminale të forcave antishqiptare që veprojnë në Kosovë.

Kryesia e Degës së LDK-së në Gjermani ka dënuar dhe dënon sjelljet vandaliste të serbëve të Kosovës, që sa herë të shkaktohen ekcese, edhepse të pa ndriçuara bllokojnë rrugët dhe veprojnë në kundërshtim me çdo rregull, të një shteti demokratik.

Kryesia e Degës së LDK-së në Gjermani ka përkrahur edhe protestën e qytetarëve shqiptarë për tragjedinë e tre fëmijëve shqiptarë në Çabër të Mitrovicës, por njëkohësisht ka shprehur mospajtimin me mënyrën e të demostruarit të disa grupeve që si pasojë e sjelljes së tyre të papërgjegjshme humben jetën dhjetëra shqiptarë.

Kryesia e Degës së LDK-së në Gjermani nuk pajtohet dhe asnjëherë nuk është pajtuar që të sulmohet pasuria e Kosovës e aq më pak pjesëtarët e insitucioneve që janë të thirrura për mbajtjen e rendit dhe të qetësisë në Kosovë. Nuk mund të pajtohemi që të sulmohen pjesëtarët e policisë së UNMIK-ut apo ushtarët e KFOR-it si dhe pasuria e tyre e sjellë në Kosovë për të mirën e popullit që jeton aty.

 

Ata që bëjnë vepra të tilla nuk ia duan të mirën Kosovës e as popullit shqiptar, porse kryejnë vetëm atë pjesë të punës që nuk arritën dhe nuk do të arrijnë kurrë ta kryejnë forcat kriminale serbe.
Dënojmë të gjitha ato forca dhe individë që gjatë trazirave të fundit në Kosovë vepruan kundër interesave të popullit shqiptar dhe janë fajtorët kryesor për humbjen e jetës së 28 personave, për çka duhet të përgjigjen para organeve të drejtësisë.

Kryesia e Degës së LDK-së ndjen dhimbje të madhe për viktimat, që kryesisht janë të rinj. U shpreh ngushëllime familjeve të tyre dhe poashtu u dëshiron shërim atyre që pësuan lëndime.

Kryesia e Degës së LDK-së në Gjermani kërkon nga populli shqiptar i Kosovës që të ruajë gjakftohtësinë dhe t'u bindet urdhërave të udhëheqësve të tyre legjitimë dhe të subjekteve ndërkombëtarë që deri më sot kanë kontribuar për paqen dhe rehatinë në Kosovë.

 

Populli i Kosovës duhet të jetë i vetëdijshëm se pa ndihmën e UNMIK-ut e të KFOR-it që përbëhen nga policë e ushtarë të vendeve të ndryshme të botës të udhëhequra nga NATO dhe SHBA-të, Kosova nuk do të kishte këtë zhvillim që e ka sot, prandaj ata duhet t'u jenë mirënjohës atyre e jo të rrezikojnë jetën e tyre dhe të asgjësojnë pasurinë e tyre.

 

Sepse jemi në rrezik që të humbim përkrahjen e aleatëve që i kemi fituar me shumë mund e sakrifica, - thuhet mes tjerash në këtë deklaratë të Kryesisë së Degës së LDK-së në Gjermani.

 

 

Studentët shqiptarë në Hmaburg: aktet e dhunës të ditëve të fundit janë shumë shqetësuese dhe trishtuese

 

Hamburg, 22 mars 2004 - Në një deklaratë të Unionit të Studentëve Shqiptarë Illyria thuhet se situata jashtëzakonisht e rëndë e krijuar në Kosovë dhe aktet e dhunës që po i përcjellim ditëve të fundit janë shumë shqetësuese dhe trishtuese.

"Vrasjet e plagosjet, djegjet, shkatërrimet e objekteve të kultit, konfrontimi me forcat ndërkombëtare, janë ngjarje komplet të papërgjegjshme dhe të papranueshme. Duam të ngushëllojmë të gjithë të afërmit e viktimave dhe duam të theksojmë se është dëshira jonë që këto të jenë viktimat e fundit.

 

Humbësi më i madh i kësaj vale dhune është populli i Kosovës. Ngjarje si ato të ditëve të fundit jo vetëm rrisin pasigurinë dhe përbëjnë hap prapa për Kosovën por edhe e dëmtojnë tepër imazhin ndërkombëtar të saj dhe shqiptarëve të Kosovës.

 

Ato janë pengesë serioze në rrugën drejt pavarësisë aq të dëshiruar. Kushdo që kryen veprime të tilla direkt ose indirekt, me dashje a pa dashje u ndihmon synimeve të mbrapshta të politikës antikosovare", thuhet në këtë deklaratë të studentëve shqiptarë nga Hamburgu.

 

 

Komuniteti shqiptaro-amerikan në Çikago apelon të ruhet miqësia e krijuar me mund me SHBA-të

 

Çikago, 22 mars 2004 - Kryesia e Komunitetit Shqiptaro-Amerikan i Illinois-it, me seli në Çikago, në bashkëpunim me partitë politike dhe organizatat që veprojnë në këtë shtet, denon ashpër përshkallëzimin e dhunës dhe prishjen e rendit dhe qetesisë publike në Kosovë, kurse familjeve të viktimave u shpreh ngushellimet më të thella.

Ky komunitet, ka qenë, është dhe do të jetë gjithmonë me Kosovën dhe me popullin e saj. Prandaj, ai apelon te populli i Kosovës që të mos bjerë në provokimet dhe kurthat e sherbimeve të huaja të cilat gjatë kohe janë të përgatitura dhe planifikuara nga qeveria serbe në Beograd që me çdo kusht të pengohet Pavarësia e Kosovës.

Ky komunitet apelon te populli i Kosoves që institucioneve te saj dhe atyre ndërkombetare t'u japë përkrahje të plotë në zgjidhjen e problemeve dhe në normalizimin e situates.

Ky komunitet denon ashper sulmet ndaj forcave ndërkombetare te KFOR-it dhe te UNMIK-ut si dhe djegjet e monumenteve fetare ne Kosove dhe fton popullin e Kosoves të jetë me tolerant ne situata të vështira.

Ne i kuptojmë veshtiresitë dhe pengesat e popullit te Kosoves, por, jemi të bindur se ekzistojne forma tjera demokratike per realizimin e qellimeve kombetare, te cilat , nuk kane kurgje te perbashket me dhunen.

Populli i Kosoves është i vetëdijshem për kontributin e Shteteve te Bashkuara te Amerikes dhe të aleatëve të saj në çlirimin e Kosoves. Prandaj, ky popull duhet të jetë i përgatitur të sakrifikojë edhe durimin. Populli i Kosoves, me institucionet vendore dhe ndërkombetare duhet të bashkëpunojë maksimalisht me qëllim që të ruhet miqësia e krijuar me mund, sidomos me ShBA-të.

 

 

Shefi i policisë kufitare të Malit të Zi cilësoi situatën në kufirin shtetëror me Kosovën si të qetë

 

Podgoricë, 22 mars 2004 - Shefi i policisë kufitare të Malit të Zi Millan Paunoviq e cilësoi situatën në kufirin shtetëror me Kosovën si të qetë ku sipas tij nuk është shënuar asnjë incident. Ai i hedhi poshtë disa zëra se kinse në Mal të Zi kanë arritur refugjatë nga Kosova.

 

Paunoviq nënvizoi se në Mal të Zi deri më sot nuk ka arritur asnjë refugjat në Kosova. Sidoqoftë trazirat e fundit në Kosovë nuk patën ndonjë jehonë të veçantë në Mal të Zi. Ngjarjet e Kosovës kryesisht u shfrytëzuan nga opozita proserbe në Mal të Zi për ta sulmuar pushtetin aktual në këtë republikë për heshtje ndaj situatës së krijuar në Kosovë.

Në anën tjetër kisha ortodokse serbe e cila gjendet në një armiqësi të hapur me kishën autoqefale malazeze organizoi protesta antishqiptare, të cilëve iu bashkangjitën një numër i vogël i nxënësve të disa shkollave të mesme në Podgoricë, kryesisht fëmijë të refugjatëve serbë nga Kosova dhe Bosnja.

 

 

Në Bagdad është vrarë një ushtar amerikan dhe një përkthyes irakian

 

Bagdad, 22 mars 2004 - Një kryengritës ka vrarë një ushtar amerikan dhe një përkthyes irakian me një bombë skaj rrugës derisa ata po po patrullonin në perendim të Bagdadit, ka bërë të ditur sot ( e hënë) ushtria amerikane, njofton Rojter.

 

Incidenti ka ndodhur të shtunën në mbremje derisa një grup ushtarësh lëviznin në distriktin Abu Graib në periferi të kryeqytetit. Kjo vreasje ngre në 396 numrin e ushtarëve amerikanë të vrarë në aksione që kur forcat amerikane kanë ndërhyrë në Irak një vit më parë.

 

 

Është vrarë udhëheqësi shpirtëror i Hamasit, sheiku Ahmed Jasin

 

Gaza, 22 mars 2004 - Dëshmitarë palestinezë në Gaza thonë se udhëheqësi shpirtëror i grupit ekstremist Hamas, sheiku Ahmed Jasin, u vra në një sulm ajror, i kryer nga helikopterë luftarakë izraelitë.
Vdekja e udhëheqësit shpirtëror u njoftua sot pak pasi të paktën 2 shpërthime të fuqishme u dëgjuan në qytetin e Gazës.

Kohët e fundit, zyrtarë izraelitë kishin thënë se udhëheqësit ekstremistë palestinezë do të ishin mes objektivave të sulmeve ushtarake izraelite, pasi një shpërthim i dyfishtë vetëvrasës në portin izraelit Ashdod më 14 mars shkaktoi 10 të vrarë.

 

 

Shtëpia e Bardhë bëhet objekt kritikash

 

Uashington, 22 mars 2004 - Shtëpia e Bardhë u bë dje objekt kritikash si rrjedhojë e njoftimeve se mund të mos i ketë kushtuar vëmendjen e duhur kërcënimit global të terrorizmit dhe është përqëndruar tek Iraku pas sulmeve terroriste të 11 shtatorit ndaj Shteteve të Bashkuara.

Senatori demokrat Xhozef Bajden tha dje në një program të rrjetit televiziv ABC se mendon që lufta në Irak ka zhvendosur vëmendjen nga përpjekjet e Shteteve të Bashkuara për të luftuar rrjetin terrorist al-Kaida në Afganistan.

"Angazhimi për Irakun bëri që të mos dërgoheshin forca të tjera në Afganistan. Administrata synonte t'i mbante këto forca për Irakun. Në Afganistan duhet të ishin dërguar shumë më tepër trupa", tha ai.

 

 

Në Nepal besohet të jenë vrarë 500 maoistë gjatë përleshjeve të fundit

 

Katmandu, 22 mars 2004 - Armata e Nepalit ka thënë se kanë vrarë dhjetëra kryengritës maoistë gjatë përleshjeve në perendim të vendit, njofton BBCWorld. Luftimet janë zhvilluar në qytetin Beni, 300 km nga kryeqyteti Katmandu, kanë thënë zyrtarët. Numri i viktimave vlerësohet i ndryshëm.

 

Autoritetet në Katmandu thonë se janë vrarë dhjetëra kryengritës, 18 ushtarë dhe policë dhe janë plagosur 60 të tjerë. Armata jep shifra më të larta. ANë bazë të pohimeve të popullit dhe të dëshmitarëve, ne besojmë se janë vrarë 500 maoistë dhe janë plagosur edhe 200 të tjerë@, thotë zëdhënësi i armatës. Rreth 9,000 njerëaz janë vrarë gjatë tetë vjetëve të kaluar.

 

 

Në Irak katër të vrarë si pasojë e shpërthimeve

 

Bagdad, 22 mars 2004 - Katër veta u vranë si pasojë e shpërthimeve në Irakun qendror. Dëshmitarët thonë se një person humbi jetën dhe të paktën 10 të tjerë u plagosën në Bagdad nga një goditje me raketë në një rrugë shumë të frekuentuar në një zonë të banuar jo larg nga selia e koalicionit.

Të paktën një raketë tjetër ra pranë selisë së koalicionit, që ndodhet në të ashtuquajturën Zonë e Gjelbër në Bagdadin qendror, por nuk pati njoftime për ndonjë plagosje serioze.

Ndërkohë, pranë qytetit Baquba në veri të kryeqytetit, si pasojë e një shpërthimi pranë një stacioni policie, të dielën u vra një polic irakian dhe u plagosën dy të tjerë.

 

 

Vrasja e një ministri nxit luftime në Afganistan

 

Kabul, 22 mars 2004 - Në Afganistan, të dielën u vra Ministri i Aviacionit Civil Mirwais Sadik dhe ka njoftime se një numër i madh njerëzisht janë vrarë në luftimet që shpërthyen pas atentatit.

Autoritetet në qytetin perëndimor Herat thonë se zoti Sadik, i biri i guvernatorit me peshë të provincës Herat, Ismail Khan, u vra të dielën në kryeqytetin krahinor.

Një zëdhënës i guvernatorit Khan tha se zoti Sadik ishte vrarë nga forca të kontrolluara nga komandanti i lartë qeveritar, Zaher Naib Zada. Dëshmitarë dhe zyrtarë në Herat thonë se pas atentatit, luftimet shpërthyen mes trupave të komandantit qeveritar dhe atyre besnike të guvernatorit Khan.

Komandanti Zada thotë se deri në 100 njerëz mund të jenë vrarë në luftime. Ai u tha agjencive perëndimore të lajmeve se zoti Sadik ishte vrarë gjatë një konfrontimi në shtëpinë e komandantit.

 

 

Presidenti Bush zhvilloi tubimin e parë në kuadër të fushatës së tij në këtë vit zgjedhjesh

 

Uashington, 22 mars 2004 - Presidenti Bush e filloi fushatën e tij për t'u rizgjedhur para përkrahësve të tij, që valvisnin flamurë dhe thërrisnin edhe 4 vjet të tjerë.

I shoqëruar në podium nga vëllai i tij, guvernatori i Floridës, Xheb Bush, presidenti tha se votuesit kanë një zgjedhje të qartë për të bërë në nëntor midis vazhdimit të rolit të tij udhëheqës ose kandidatit të partisë demokrate, senatorit nga shteti Masaçusets, Xhon Keri.

"Kemi të bëjmë me një zgjedhje midis shkurtimit të taksave, që po i japin shtytje ekonomisë, ose rikthimin e barrës së taksave më të larta tek populli amerikan. Kemi të bëjmë me një zgjedhje midis një Amerike që udhëheq botën me vendosmëri dhe bindje ose një Amerike që është e pasigurtë përballë rrezikut", tha Bush.

  |  KULTURË  |  HISTORI  |   POLITIKË  |  OPINIONE  |  ADRESARI  |  ARKIVI  |