|  KULTURË  |  HISTORI  |   POLITIKË  |  OPINIONE  |  ADRESARI  |  ARKIVI  | 

OPINIONE

STOP DHUNËS NË KOSOVË!

22 mars 2004 / TN

Ilir PURELLKU

 

Deklaratë e Unionit të Studentëve Shqiptarë 'Illyria' në Hamburg drejtuar popullit të Kosovës, rinisë kosovare, partive politike, shoqatave dhe mediave.

Të nderuar qytetarë të Kosovës,

të dashur motra e vëllezër,

situata jashtëzakonisht e rëndë e krijuar në Kosovë dhe aktet e dhunës që po i përcjellim ditëve të fundit janë shumë shqetësuese dhe trishtuese.

 

Vrasjet e plagosjet, djegjet, shkatërrimet e objekteve të kultit, konfrontimi me forcat ndërkombëtare, janë ngjarje komplet të papërgjegjshme dhe të papranueshme.

Duam të ngushëllojmë të gjithë të afërmit e viktimave dhe duam të theksojmë se është dëshira jonë që këto të jenë viktimat e fundit.

Humbësi më i madh i kësaj vale dhune është populli i Kosovës. Ngjarje si ato të ditëve të fundit jo vetëm rrisin pasigurinë dhe përbëjnë hap prapa për Kosovën por edhe e dëmtojnë tepër imazhin ndërkombëtar të saj dhe shqiptarëve të Kosovës. Ato janë pengesë serioze në rrugën drejt
pavarësisë aq të dëshiruar. Kushdo që kryen veprime të tilla direkt ose indirekt, me dashje a pa dashje i ndihmon synimeve të mbrapshta të politikës antikosovare.

Prandaj i bëjmë thirrje popullit të Kosovës dhe sidomos rinisë kosovare që

 

- të mos dëmtojë fizikisht dhe materialisht anëtarët e minoritetit serb në Kosovë;

- të mos marrë pjesë në demonstrata e manifestime me akte të dhunshme;

- të mos konfrontohet me forcat e policisë kosovare dhe asaj ndërkombëtare;

- të mos manipulohet nga ekstremistë dritëshkurtër që nuk punojnë për një të ardhme pozitive në Kosovë.

I bëjmë thirrje partive politike shqiptare, shoqatave të ndryshme dhe mediave shqiptare që

- të mos i fryjnë zjarrit e të kontribojnë me sa munden për qetësimin e situatës;

- deri në qetësimin e situatës të mos bëjnë asnjë deklaratë që acaron situatën as kundra minoritetit serb dhe as kundra ndërkombëtarëve në Kosovë;

- të reflektojnë mbi atë që ndodhi me qëllim të korrigjimit të pjesës eventuale të fajit mbi këto ngjarje të papërgjegjshme.

Ne si studentë shqiptarë në perëndim kemi mbështetur gjithmonë çështjen e Kosovës dhe do vazhdojmë ta mbështesim. Kushti themelor që bashkësia ndërkombëtare ka ndaj Kosovës është respektimi i minoriteteve, veçanërisht i atij serb. Çdo dhunë ndaj minoritetit serb dhe çdo konfrontim me ndërkombëtarët e rëndon shumë të ardhmen e Kosovës.

Shpresojmë që situata e tanishme të qetësohet sa më parë dhe njerëzit t'i kthehen normalitetit. Vazhdimi i kësaj situate ose, akoma më keq, përshkallëzimi i saj mund të jetë fatal.

Unioni i Studentëve Shqiptarë në Hamburg.

Në emër të kryesisë së unionit,

Kryetari,

Ilir Purellku