Dy lajme nga Mitrovica

Dy lajme nga Mitrovica

Mitrovicë: Nesër bëhet varrimi i katër viktimave nga trazirat e javës së kaluar

Mitrovicë, 22 mars 2004 / TN / Hysni. Syla - Të martën, më 23.03.2004, do të bëhet varrimi i katër viktimave nga komuna e jonë, që u vranë në trazirat e javës së kaluar.

Sikur jeni njoftuar edhe më parë, në trazirat në qytetin e Mitrovicës, u vranë nga ekstremistët serbë, Ferit Gitaku (1980), Fatmir Abdullahu (1966), Isak Ibrahimi (1965) dhe Ajvaz Shatrolli (1942).

Varrimi i të ndjerëve, do të bëhet në orën 14,00, në varrezat e dëshmorëve në Shipol.

Prej orës 13 e 30 minuta deri në orën 14,00, qytetarët mund të bëjnë homazhe para arkivoleve që do të vendosen në vendin e varrimit.



Pllana dhe gjenerali Michel kanë apeluar tek qytetarët e komunës e më gjerë, që të tregojnë vetëdije të lartë dhe pjekuri edhe me rastin e varrimit të katër viktimave

Mitrovicë, 22 mars 2004 / TN / Hysni. Syla - Kryeshefi i Ekzekutivit të Kuvendit të Komunës, Mustafë Pllana, ka patur një takim në orët e mbrëmjes të së hënës, me komandantin e BSHVL-së, gjeneralin Xavier Michel.

Në takim u bisedua për gjendjen e sigurisë në komunë pas trazirave të javës së kaluar, për të cilën u tha se është në përmisim e sipër.

Bashkëbiseduesit kanë vlerësuar se varrimi i tre fëmijve të Çabrës, që tragjikisht u mbytën javën e kaluar në Ibër, ka qenë mirë i organizuar dhe është bërë në mënyrë dinjitoze dhe pa asnjë eksces, për çka ata kanë falënderuar pjesëmarrësit dhe organizatorët, por edhe pjestarët e organeve të rendit, ata të KFOR-it dhe të gjithë ata që në ndonjë mënyrë kanë kontribuar për këtë.

Pllana dhe gjenerali Michel kanë apeluar tek qytetarët e komunës e më gjerë, që të tregojnë vetëdije të lartë dhe pjekuri edhe me rastin e varrimit të katër viktimave që humbën jetën në trazirat e fundit, në mënyrë që edhe varrimi të bëhet në mënyrë dinjitoze.

Kryeshefi i Ekzekutivit të Kuvendit të Komunës e ka njoftuar komandantin e BSHVL-së për ndjekjet dhe kërcnimet e ekstremistëve serbë që po bëjnë ndaj familjeve shqiptare në lagjet veriore, duke i dhënë atij edhe një listë me emra konkret të familjeve që gjatë ditës janë dëbuar dhunshëm nga banesat e tyre, apo ju është uzurpuar banesa.

Komandanti i BSHVL-së, gjenerali Xavier Michel, i ka premtuar kryeshefit Pllana se ushtarët e tij do të dalin në vendin e ngjarjes dhe do t’i verifikojnë inormatat që iu ofruan dhe se do të marrë masa përkatëse, për çka do të informojë udhëheqëjen komunale.