Donniana e këpucëve shqiptare

20 mars 2004 / TN

Rita Loloçi

Federated Department Store INC. është rrjeti më i madh i supermarketeve të veshjeve dhe këpucëve të modës në Shtetet e Bashkuara të Amerikës.

Kompania kontrollon sot 450 supermarkete në 34 shtete të Shteteve të Bashkuara të Amerikës si dhe në Porto Riko.

Ajo vepron nëpërmjet markave shumë të njohura si: Bloomingdale’s, The Bon Marchè, Burdines, Goldsmith’s, Lazarus, Macy’s dhe Rich’s–Macy’s. Ajo shet gjithashtu edhe në internet nëpërmjet markave Macy’s.com dhe Bloomingdale’s. Prodhimet e kompanisë Donianna nën markën Made In Albania janë të destinuara për rrjetin e supermarketeve në qytetin e New York-ut.

Filozofitë kryesore të saj janë përfshirja e bashkësisë, angazhimi social dhe veshjet e ndryshme për çdo klient. Ajo është e angazhuar për të gjetur prodhues cilësorë dhe veçanërisht punon për të nxitur zhvillimin e kompanive nën pronësinë e grave. Fabrikat e zotëruara nga gratë në shumë vende të botës kanë furnizuar gjatë vitit të kaluar Federated me produkte të ndryshme veshjeje dhe këpucësh me vlerë të përgjithshme prej 343 milionë dollarësh amerikanë. Stafi ekzekutiv i kompanisë përbëhet në 67 për qind nga gra dhe në masën 24 për qind nga minoritete të rracave të ndryshme.

Federated Department Store INC. realizoi shitje të përgjithshme në masën 15 miliardë dollarë gjatë vitit 2003 dhe rreth 800 milionë dollarë fitim neto.

Doniana, kompaninë më të mirë për 2003

Presidentja e kompanisë Donianna, znj. Donika Mici u shpall “The Most Innovative Entrepreneur of the Year”, (Sipërmarrësja më e Suksesshme e Vitit), për vitin 2002 nga Komisioni Ekonomik i Organizatës së Kombeve të Bashkuara për Europën, (UNECE). Çmimet u shpërndanë në shtator të vitit të kaluar. UNECE është një agjenci e Kombeve të Bashkuara që punon për rritjen e bashkëpunimit ekonomik mes vendeve anëtare. Në faqen web të organizatës jepet edhe një përshkrim i shkurtër i kompanisë Donianna dhe eksperiencës së zonjës Mici. Sipërmarrësja më e Suksesshme e Vitit, është një nga gjashtë çmimet që jepen nga UNECE për gratë biznesmene dhe për rolin e tyre të rritjen ekonomike dhe reduktimin e varfërisë.

Profili zyrtar i Donianna.sh.p.k

E nisur si një biznes i vogël italo-shqiptar në vitin 1992, Donianna zotëron sot dy fabrika me gjithsej 1168 punëtorë. Ajo ka një kapacitet prodhimi prej 10 mijë palësh në ditë nga të cilat, rreth 4000 palë janë produkt final ndërsa pjesa tjetër përbëhet nga mall i përpunuar pjesshëm në Shqipëri (95 për qind) dhe i rieksportuar në Itali.

Ajo zotëron kapital me vlerë 2.7 milionë euro në pajisje dhe 1.6 milionë euro prona të palëvizshme. Gjatë vitit 2003, të dyja fabrikat, Donianna dhe Roximpex, patën shitje totale me vlerë 7 milionë euro.

“Gjatë vitit 2003, ne kryem investime të përgjithshme prej 3 milionë eurosh për të ndërtuar kapanone të reja, për të blerë pajisje të reja industriale dhe për të plotësuar kuadrin teknik, me qëllim që të arrinim të realizonim produktin final”, - thotë Donika Mici, presidente e kompanisë. “Ne duhej të investonim shumë që të arrinim të realizonim produkte duke respektuar standartet e Bashkimit Europian”.

Gjatë vitit 2003 janë ndërtuar kapanone me sipërfaqe të përgjithshme prej 6 mijë metrash katrore si dhe u rinovua teknologjia e përdorur. Pas kësaj mbërritën ekspertët e kompanisë amerikane “Federated Dept. Store Inc.” (www.fds.com), të cilët kryen të gjitha inspektimet para se të jepnin miratimin për fillimin e importeve. Këpucët për sezonin dimëror 2004-2005 me destinacion SHBA-në kanë filluar sakaq të prodhohen në Tiranë.

Klienti dhe partneri më i rëndësishëm i Donianna sh.p.k është kompania e mirënjohur italiane Adelchi.

Që nga viti 1998 deri në vitin 2003, Donianna sh.p.k arriti të realizonte 95 për qind të produktit në Shqipëri. Këto ishin produkte që komercializoheshin në Europën Perëndimore dhe Amerikë nën markat “Timberland”, “Clarks” etj, nëpërmjet Italisë. Vetëm gjatë këtij viti është arritur që në Tiranë të realizohet produkti final, i cili eksportohet si produkt shqiptar dhe komercializohet në SHBA nga “Federated Inc” nën markën “Alfani”.

Donianna parashikon të investojë 2.3 milionë euro të tjera gjatë këtij viti për ndërtimin e një fabrike të re si dhe të rrisë numrin e punëtorëve me 450 vetë. Por projekti i saj më i rëndësishëm është krijimi i një kompanie të re të quajtur “AlbImportExport Shoes”. Kjo do të jetë kompania që do të realizojë shitblerjen e lëndës së parë dhe të produktit final drejtpërsëdrejti. Nën bashkëpronësi mes kompanive “Donianna” dhe “Adelchi”, kompania e re synon ta ngrejë këtë sipërmarrje nga një kompani në Grup Tregëtaro-Prodhues.

Keshtu, për herë të pare që nga viti 1990, industria e lehtë ka tashmë një kompani që do të eksportojë produkte të markës “Made in Albania”.