Përmbajtja:

• Presidenti Rugova, Kryeministri Rexhepi dhe Kryeparlamentari Daci kanë miratuar mbrëmë një deklaratë të përbashkët

• Presidenti Rugova ka anuluar vizitën e paraparë në SHBA për shkak të zhvillimeve të fundit në Kosovë

• Nesër bëhet varrimi i dy fëmijëve të Çabrës të mbytur në lumin Ibër

• Nga ushtarët e KFOR-it është arrestuar kryetari i KMLDNJ-së për Mitrovicë Halit Barani

• LDK në Mitrovicë është kundër çdo forme të dhunës

• Në Viti vazhdon ndalim qarkullim i qytetarëve

• Sot janë hapur dy akset rrugore nga Prishtina për në Gjilan dhe në Shkup

• Shkrimtari Kadare kritikoi ashpër shqiptarët e Kosovës për aktet e dhunës

• Në Kosovë mbërrijnë forca shtesë të NATO-s

• Mbrëmë u dogj një shtëpi në fshatin Brainë

• Snajperistët serbë në veri të Mitrovicës kanë plagosur një shqiptar dhe një boshnjak

• Kryesia e Degës së LDK-së për Beneluks dënon ashpër sulmet ndaj KFOR-it dhe institucioneve ndërkombëtare në Kosovë

• LDK në Nju Jork: Konfrontimi me forcat e KFOR-it dhe të policisë është rrezik për të ardhmen e Kosovës

• Gjenerali Mishel ka thënë se situata në Mitrovicë është buzë shpërthimit

• Ushtarët francez qëlluan për vdekje një demonstrues shqiptar në Mitrovicë

• Fisher dhe Anan u kanë bërë thirrje shqiptarëve dhe serbëve të Kosovës të ndalin menjëherë dhunën

• "Hjuman Raits Uoç" u ka bërë thirrje paqeruajtësve të mbrojnë pakicat në Kosovë

• Riçard Hollbruk thotë se trazirat e fundit në Kosovë përfaqësojnë dështim për politikën ndërkombëtare ndaj Kosovës

• UNMIK-u thotë se numri i të vrarëve në protesta nuk është 31, por 28 veta

• Rupert Nojdek konsideron se Kosova duhet të bëhet shtet i pavarur

• Shefi i NATO-s ka refuzuar kërkesën e bashkësisë Serbi- Mali i Zi për dërgimin e ushtarëve serbë në Kosovë

• V. Petriç: Pas dhunës së fundit në Kosovë duhet të qartësohet statusi i Kosovës

• Koshtunica u ka thënë protestuesve serbë se Serbia nuk do ta japë Kosovën

• Në Zrenjanin protestuesit dëmtojnë shtëpitë dhe dyqanet e shqiptarëve

• Pakistani ka arrestuar mbi 100 të dyshimtë në sulmet pesëditëshe kundër militantëve të Al Kaidës

• Persona të armatosur kanë vrarë një polic irakian në Kirkuk

• Presidenti Bush u bëri thirrje aleatëve që të bashkohen për të luftuar terrorizmin

Presidenti Rugova, Kryeministri Rexhepi dhe Kryeparlamentari Daci kanë miratuar mbrëmë një deklaratë të përbashkët

 

Prishtinë, 20 mars 2004 - Tre udhëheqësit e institucioneve më të larta të Kosovës: Presidenti Ibrahim Rugova, Kryeministri Bajram Rexhepi dhe Kryeparlamentari Nexhat Daci kanë miratuar mbrëmë një deklaratë të përbashkët, me të cilën kanë vlerësuar se situata e sigurisë në Kosovë po përmirësohet.

 

Ata njëkohësisht kanë kërkuar që të shtohen përpjekjet për të kthyer gjendjen në suazat e normalitetit në Kosovë. Në një deklaratë të përbashkët të cilën e lexoi Presidenti Rugova thuhet se sulmet ndaj pjesëtarëve të pranisë ndërkombëtare janë në kundërshtim me interesat e Kosovës, sikurse edhe akte të tjera të dhunës dhe të rrënimeve, që kanë ndodhur ditët e fundit në Kosovë.

"E përsërisim se sulmet ndaj pranisë ndërkombëtare civile dhe ushtarake janë krejtësisht të papranueshme dhe në kundërshtim të drejtpërdrejtë me interesat jetike të Kosovës. Me këtë rast edhe njëherë theksojmë se shkatërrimet e objekteve fetare dhe kulturore, pasurisë publike dhe të shtëpive janë të papranueshme për popullin e Kosovës dhe të dënueshme", thuhet në deklaratë.

Ndërkaq, kryeparlamentari Nexhat Daci tha se nuk do të ketë gjendje të jashtëzakonshme, që të shpallet nga dikush për shumë arsye. "Nuk mundet një vend që nuk i kontrollon vetë kufijtë, që nuk e ka ushtrinë e vet të shpallë gjendjen e jashtëzakonshme, por këtë e kishim në shqyrtim", ka thënë Daci. Ai shtoi se admirali Xhonson e bëri të qartë para gazetarëve që ngritet shkalla e masave të ndërmarra dhe ishim në pajtueshmëri të plotë.

 

 

Presidenti Rugova ka anuluar vizitën e paraparë në SHBA për shkak të zhvillimeve të fundit në Kosovë

 

Prishtinë, 20 mars 2004 - Për shkak të zhvillimeve të jashtëzakonshme të këtyre ditëve në Kosovë, Presidenti i Kosovës Ibrahim Rugova, ka anuluar një vizitë të paraparë për javën e ardhshme në SHBA.

Presidenti Rugova ka pasur një ftesë nga guvernatori i Pensilvanisë për të vizituar këtë shtet, ndërsa qëndrimi i tij në SHBA përfshinte edhe takime të nivelit shumë të lartë në Uashington D.C. dhe takime të rëndësishme në Nju Jork, njofton Zyra e Presidentit të Kosovës.

 

 

Nesër bëhet varrimi i dy fëmijëve të Çabrës të mbytur në lumin Ibër

 

Çabër, 20 mars 2004 - Nesër, më 21 mars, në orën 13.00, në fshatin Çabër të Zubin Potokut do të zhvillohet ceremonia e varrimit të dy fëmijëve që u mbytën më 17 mars në lumin Ibër. Pra nesër do të bëhet varrimi i Avni Veselit (11) dhe i Egzon Deliut (12).

 

Ndërkaq, fëmija tjetër Florent Veseli (8), të cilin po atë ditë poashtu e kanë rrëmbyer valët e lumit Ibër, ende konsiderohet i zhdukur. Sipas njoftimeve nga fshati Çabër, edhe sot kanë vazhduar kërkimet për gjetjen e tij përgjatë lumit Ibër.

 

 

Nga ushtarët e KFOR-it është arrestuar kryetari i KMLDNJ-së për Mitrovicë Halit Barani

 

Mitrovicë, 20 mars 2004 - Sot rreth ores 10. 30 në afërsi të Qendrës së Kulturës në Mitrovicë, nga ushtarët e KFOR-it francez është arrestuar kryetari i KMLDNJ-së për Mitroicë Halit Barani, bëhet e ditur nga dëshmitarët në zonën e sigurisë.

 

Burime ndërkombëtare anonime bëjnë të ditur se KFOR, UNMIK dhe CIVPOL dyshojnë se z.Hali Barani ka qenë i involvuar në trazirat që ndodhon ditët e kaluara në Mitrovicë. Ky dyshim është i bazuar në atë se z. Barani tërë kohën ka qenë në vendin e ngjarjes, duke harruar se ky ai si zakonisht mbante shenime elektronike për KMLDNJ-në.

Ky është edhe një tentim i fajsimit të personave të pafajshëm për qëllim të konfiskimit të filmimeve të tij të bëra këto ditë, nga ana e ndërkombëtarëve me qëllim të mbulimit të punës së dobët të bërë nga vetë ata, thuhet në një njoftim të OJQ "ART&MEDIA" në Mitrovicë.

 

 

LDK në Mitrovicë është kundër çdo forme të dhunës

 

Mitrovicë, 20 mars 2004 - Dega e LDK-së në Mitrovicë vlerëson se gjendja në Mitrovicë ishte shumë e rëndë me tendenca të përshakllëzimit të dhunës dhe si e tillë është e papranushme.

LDK në Mitrovicë u shpreh ngushëllime familjeve të të vrarëve, dhe të lendurve u uron shërim të shpejtë.

LDK-ja dega në Mitrovicë është kundër çdo forme të dhunës, kundër shkatërrimit të institucioneve të dala nga zgjedhjet dhe është kundër shkatërrimit të pasurisë të qytetarve.

LDK në Mitrovicë përkrah punën e institucioneve ndërkombëtare: KFOR-it, UNMIK-ut dhe OSBEBsë.

LDK në Mitrovicë kërkon që SHPK-ja të funksionojë në kuadër të kapaciteteve dhe autorizimeve të saja. Po ashtu kërkon që roli dhe angazhimi i TMK-së të rritet e të jetë në funksion të popullit dhe qetsisë, lirisë dhe demokracisë.

 

 

Në Viti vazhdon ndalim qarkullim i qytetarëve

 

Viti, 20 mars 2004 - Edhe sot të gjitha hyrje-daljet e qytetit të Vitisë janë të bllokuara. Të gjitha hyrjet në qytet i kontrollon KFOR-i në bashkëpunim me pjesëtarët e TMK-së, ndërkaq në qytet vërehet një numër i shtuar i pjesëtarëve të SHPK-së të cilët po patrullojnë.

 

Situata në përgjithësi gjatë ditës së djeshme dhe sot, është e qetë dhe nuk është raportuar për ndonjë incident. Megjithatë, ky bllokim i qytetit të Vitisë, do të vazhdojë deri të hënën, në ndërkohë që ora policore në këtë komunë është aplikuar nga ora 21 e deri në orën 6 të mëngjesit.

Ndërkohë të gjiha shërbimet funksionojnë, ndërkaq gjendja në fshatrat e komunës së Vitisë është e qetë.

 

 

Sot janë hapur dy akset rrugore nga Prishtina për në Gjilan dhe në Shkup

 

Prishtinë, 20 mars 2004 - Që nga orët e sotme të mëngjesit dy akset rrugore nga Prishtinë për një Gjilan dhe në Shkup janë hapur për trafik. Qarkullimi i njerëzve dhe i automjeteve po bëhet me një kontroll të rreptë të forcave të KFOR-it, të cilat kontrollojnë njerëzit dhe makinat.

 

Mirëpo, për shkak të kontrollit të hollësishëm nga ana e KFOR-it qarkullimi është shumë i ngadalshëm, madje nga dy anët pritet rreth një orë. Lejohen të lëvizin nga dhjetë vetura në dy drejtimet.

Të përkujtojmë se për disa ditë me radhë këto dy akse rrugore kanë qenë të bllokuara nga serbët lokalë dhe ishin arenë e përplasjeve të fuqishme mes serbëve dhe shqiptarëve me disa viktima dhe shumë të plagosur.

 

 

Shkrimtari Kadare kritikoi ashpër shqiptarët e Kosovës për aktet e dhunës

 

Tiranë, 20 mars 2004 - Shkrimtari Ismail Kadare nuk i ka kursyer termat dhe kritikën e ashpër ndaj shqiptarëve të Kosovës për aktet e dhunës që shpërthyen atje tre ditë më parë. Për të ajo që ka ndodhur është diçka shumë e rëndë dhe ai pranon se nuk ka arsye përse t'i kursejë fjalët.

Në një intervistë telefonike të dhënë për televizionin Klan, zoti Kadare shprehet se pas çlirimit të Kosovës gjëra të tilla nuk duhet të ndodhnin pasi i kanë sjellë një dëm të madh çështjes shqiptare në Ballkan:

"Mendoj se është goditur më rëndë fitorja më e madhe që ka arritur populli shqiptar, afrimi me perëndimin, krijimi i aleancave me botën perëndimore, për fat të keq kjo është shkelur me këmbë këto dy tre ditë, domethënë Shqipëria dhe Kosova bashkë me shqiptarët ka rrezik të kthehen prapë në izolim si më parë dhe kjo ka qenë ëndrra e Serbisë dhe ëndrra e Enver Hoxhës. Pra me këtë që u bë në mënyrë të verbër u godit liria e Kosovës, e ardhmja e saj, u goditën aleatët tanë në mënyrë të pabesë", tha ai.

Shkrimtari i njohur thotë se i kupton problemet që kanë shqiptarët dhe pakënaqësitë e tyre dhe se ata kanë të drejtë në shumë gjëra, në radhë të parë trajtim të barabartë më të gjithë të tjerët, apo të pushojnë provokimet e shëmtuara nga Beogradi, por të gjithë këto saktëson zoti Kadare nuk mund të justifikojnë atë që ata të binin në këtë kurth dhe të luanin praktikisht lojën e serbëve.

Zoti Kadare thotë se e vetmja gjë që duhet të bëjnë tani shqiptarët është që ata të riparojnë dëmin e madh duke kuptuar se kanë bërë gabim kur sulmuan shtëpitë serbe, kur dogjën kishat serbe duke menduar se kështu po i sillnin ndonjë të mirë kauzës shqiptare:

"Duhet ta kuptojnë këtë gjë. Duhet ta kuptojnë kur sulmuan pallatet e tyre, kur sulmuan bashkësinë ndërkombëtare, kur sulmuan aleancën atlantike, kur dogjën flamurin e aleancës. Të gjitha këto ata duhet ti kptojnë thellë se kanë bërë një gjë të palejueshme, dhe të pandreqshme gati I vetmi riparim që mund të bëjnë është të vënë mësim se kokat e nxehta nuk duhet kurrë të vënë zemërimin e vet përpara interesave të kombit, përpara interesave të lirisë".

Shqiptarët ka vazhduar zoti Kadare në intervistën e tij për televizionin Klan, duhet të distancohen nga të gjitha ato pjesë të errta të Kosovës që janë përzier në këtë histori. Sipas tij në këtoi ngjartje janë përfshirë njerëz naivë por edhe njerëz të fajshëm, shërbimet e fshehta të huaja apo dhe aventurierë shqiptarë e ndoshta dhe nostalgjikë të komunizmit.

 

Shqiptarët vazhdoi zoti Kadare duhet të ndahen nga kjo e keqe në mënyrë që më pas të rivendosin një fytyrë tjetër, që të tregojnë se janë një popull i qytetëruar gjë që këto ditë siç u shpreh ai nuk e treguan aspak, njofton Z.A.

 

 

Në Kosovë mbërrijnë forca shtesë të NATO-s

 

Prishtinë, 20 mars 2004 - Në Kosovë po mbërrijnë përforcime për paqeruajtësit e NATO-s dhe aleanca është zotuar të vërë në kontroll dhunën që shpërtheu mes shqiptarëve dhe serbëve.

Më shumë se 2 mijë ushtarë amerikanë, britanikë, francezë, gjermanë, italianë dhe finlandezë, u dërguan për të ndihmuar 17 mijë trupat e alenacës që ndodhen në Kosovë.

Ushtarët britanikë po vendosen në pikat strategjike për të ndihmuar në vendosjen e rendit, pas shpërthimiet të dhunës etnike që la të paktën 31 njerëz të vrarë dhe 500 të tjerë të plagosur, duke përfshirë edhe 61 paqeruajtës.

Komandanti i NATO-s për Evropën Juglindore, admirali Gregori Xhonson, i përshkroi përleshjet e përgjakshme jo shumë të ndryshme nga spastrimi etnik dhe tha se ato duhet të marrin fund sa më parë.

 

 

Mbrëmë u dogj një shtëpi në fshatin Brainë

 

Podujevë, 20 mars 2004 - Mbrëmë rreth orës 19.00 në fshatin Brainë të Podujevës ka ndodhur një incident, në të cilin persona të panjohur ia kanë dhënë flakën shtëpisë së Mehmet Salihut. Banorët nga frika kanë braktisur fshatin, ndonëse atje kishin shkuar menjeherë pjesëtarët e SHPK-së dhe zjarrfikësit.
 

Fshatarët për këtë sulm kanë akuzuar bandat serbe, ngase fshati ndodhet afër kufirit me Serbinë.

 

 

Snajperistët serbë në veri të Mitrovicës kanë plagosur një shqiptar dhe një boshnjak

 

Mitrovicë, 20 mars 2004 - Disa shpërthime kanë ndodhur dje pasdite në pjesën veriore të Mitrovicës. Njoftohet se dy persona janë plagosur me të shtëna snajperiste në "Lagjen e Boshnjakëve" në veri të Mtirovicës, e cila është e banuar kryesisht me shqiptarë dhe boshnjak, kanë bërë të ditur disa zyrtarë lokalë nga vendi i ngjarjes.

 

Bëhet e ditur se nga snajperistët janë plagosur Nermin Maliqi, 40 vjeçar i përkatësisë boshnjake dhe Bedri Sahiti i përkatësisë shqiptare.

Zyrtarët e KFOR-it kanë konfirmuar se forcat e tyre kanë vrarë parmbrëmë një snajperist në pjesën veriore të Mitrovicës.

Trupat franceze të KFOR-it kanë bërë bastisje në kërkim të armëve në pjesën veriore të Mitrovicës.
 

Po ashtu bëhet e ditur se ushtarët e KFOR-it i janë përgjigjur dje pasdite zjarrit të demonstruesve shqiptarë, të cilët kanë zënë pritë mbi një pallat në Mitrovicë.

Për shkak të gjendjes së rëndë që ende po vazhdon të mbretërojë në pjesën veriore të këtij qyteti, personeli i UNMIK-ut është mbyllur brenda bazës ushtarake të KFOR-it afër Vushtrrisë.

 

 

Kryesia e Degës së LDK-së për Beneluks dënon ashpër sulmet ndaj KFOR-it dhe institucioneve ndërkombëtare në Kosovë

 

Bruksel, 20 mars 2004 - Kryesia e Degës së LDK-së për Beneluks dënon ashpër politikën luftënxitëse të Beogradit në Kosvovë, duke e akuzuar me fakte të njohura ekstremizmin e Koshtunicës dhe Qeverinë e Serbisë, që në bashkëpunim të ngushtë me grupet kriminele serbe në Mitrovicë, Graçanicë e gjetiu i mbytën në lumin Ibër tre fëmijët shqiptarë dhe i vranë me dhjeta qytetarë shqiptarë e të tjerë.

Duke u bazuar në deklaratat e shpeshta luftënxitëse të Koshtunicës, Çoviqit dhe liderëve të manipuluar serbë të Kosovës, ky destabilizim i Kosovës është bërë me paraljmërime direkte në masmediat e Beogradit. Fatkeqësisht, disa institucione ndërkobëtare, janë duke i mbyllur sytë dhe nuk e kanë dënuar me kohë këtë politikë të rrezikshme destabilizuese jo vetëm për Kosovën, por për tërë Evropën Juglindore.

Kryesia e Degës së LDK-së për Beneluks, kërkon nga UNMIK-u që të arrestohen grupet kriminele serbe në Mitrovicë e gjetiu, që të cbllokohen rrugët e Kosovës, për qarkullim të lirë dhe jetë normale të të gjithë qytetarëve të Kosovës.

Kryesia e Degës së LDK-së për Beneluks, shpreh mbështetjen e madhe të mërgimtarëve tanë për Presidentin, Parlamentin dhe Qeverinë e Kosovës dhe kërkojnë prej tyre që në bashkëpunim me UNMIK-un, KFOR-in dhe SHPK-në, të vendosin qetësinë dhe rendin në Kosovë.

Kryesia e Degës së LDK-së për Beneluks, dënon ashpër sulmet ndaj KFOR-it dhe Institucioneve Ndërkombëtare në Kosovë dhe i fton të gjithë qytetarët tanë që mbrojnë kishat, xhamiat, manastiret, sepse ato janë Shtëpi të Zotit, janë shtëpitë tona që i kemi mbrojtur me shekuj, - thuhet në një deklaratë të kësaj dege të LDK-së.

 

 

LDK në Nju Jork: Konfrontimi me forcat e KFOR-it dhe të policisë është rrezik për të ardhmen e Kosovës

 

Nju Jork, 20 mars 2004 - Çmimi, të cilin po e paguan Kosova nga zhvillimet e fundit në Kosovë, të cilat u kurorëzuan me mbi 30 të vdekur e mbi 600 të plagosur, si dhe me dëme të mëdha materiale e pronësore, është një çmim tragjik për Kosovën dhe për përpjekjet e saj në ndërtimin e demokracisë e të pavarësisë.

 

Apelojmë te qytetarët e Kosovës, - thuhet në një deklaratë të Degës së LDK-së në Nju Jork me rrethe, duke shtuar se po rrezikohet e tashmja dhe e ardhmja e Kosovës dhe duke apeluar për gjakftohtësi dhe të përfillen kërkesat e institucioneve të Kosovës.

"E kuptojmë thellësisht shqetësimin dhe revoltën e qytetatëve të Kosovës pas ngjarjes tragjike të fëmijëve në lumin Ibër në Mitrovicë dhe solidarizohemi me dhembjen e tyre.

 

Poashtu e kuptojmë pakënaqësinë e tyre të thellë me bllokimin e rrugëve nga bandat e ekstemistëve serb dhe inskenimet e tyre të ndyta, por, në të njëjtën kohë, kërkojmë që pakënaqësitë e dhe protestat e qytetarëve me zhvillimet e kohëve të fundit në Kosovë të shqiptohen me rrugë paqësore dhe përmes institucioneve legjitime të Kosovës", thuhet më tutje në këtë deklaratë dhe theksohet se "manifestimet e dhunshme, mbi të gjitha konfrontimi me forcat e KFOR-it dhe të policisë së UNMIK-ut e të SHPK-së si dhe aktet e djegieve e të shkatërrimit të shtëpive e të pronave sjellin para rrezikut të ardhmen e Kosovës".

"Këto ditë, kur Kosova është duke kaluar nëpër ethet e rënda të një gjendjeje të jashtëzakonshme, mbi të gjitha duhet të mbretërojë arsyeja dhe veprimet e matura, vetëpërmbajtja nga aktet dhe manifestimet e dhunës. Sepse veprimet e dhunshme krijojnë imazhin për Kosovën si për një vend të dhunës, imazh ky për të cilin mbi të gjitha janë të interesuar armiqtë e popullit shqiptarë", thuhet në deklaratë.

Në fund të kësaj deklarate, Dega e Lidhjes Demokratike të Kosovës për Nju Jork me rrethe, edhe njëherë i bëb apel qytetarëve tanë që të udhëhiqen nga udhëzimet e lëshuara nga institucionet legjitime të Kosovës, në krye mer Presidentin Ibrahim Rugova dhe që në bashkëpunim me organet e rendit e të sigurisë, me ato vendore dhe ndërkombëtare, t'i kontribuojnë normalizimit të situatës e të gjendjes së sigurisë në Kosovë dhe që kërkesat e tyre t'i shqiptojnë me anë të rrugëve institucionale.

 

 

Gjenerali Mishel ka thënë se situata në Mitrovicë është buzë shpërthimit

 

Mitrovicë, 20 mars 2004 - Në drejtim të Mitrovicës mbrëmë kanë shkuar një numër i konsiderueshëm tankesh. Komandanti i Brigadës Shumkombëshe Verilindje, gjenerali Ksavier Mishel ka thënë se situata në Mitrovicë është buzë shpërthimit.

 

"Situata ka qenë shumë shumë e vështirë dhe tash jemi në një pikë ku çdo gjë mund të jetë shpërthyese, sa herë që dikush i drejtohet lumit Ibër", tha gjenerali Mishel. Ai përgënjeshtëroi njoftimet për një ushtar të vrarë të KFOR-it. "Asnjë ushtar i KFOR-it nuk ka vdekur", tha Mishel.

 

 

Ushtarët francez qëlluan për vdekje një demonstrues shqiptar në Mitrovicë

 

Mitrovicë, 20 mars 2004 - Ushtarët italian të forcave speciale kanë nisur dje kontrcollin e dy urave mes lumit Ibër në Mitrovicë. Ura e kontrolluar nga ushtarët italian të forcave të KFOR-it është larg nga zona ku dje ushtarët francez qëlluan për vdekje një demonstrues shqiptar, i cili sipas agjencive të lajmeve, kishte hapur zjarr në ushtarët nga një pallat.

 

 

Fisher dhe Anan u kanë bërë thirrje shqiptarëve dhe serbëve të Kosovës të ndalin menjëherë dhunën

 

Berlin -Nju-Jork, 20 mars 2004 - Ministri i Jashtëm gjerman Joshka Fisher, duke shfaqur qëndrimin e tij rreth zhvillimeve të fundit tragjike në Kosovë u ka bërë thirrje shqiptarëve dhe serbëve të Kosovës, që të ndalin menjëherë dhunën.

 

"Trupat e KFOR-it dhe policia do të kenë mbështetjen tonë të plotë në ndërmarrjen e çdo hapi të nevojshëm për ndaljen e dhunës", ka thënë ministri gjerman, Joshka Fisher në takimin që pati me sekretarin e përgjithshëm të OKB-së, Kofi Anan.

 

Kësaj thirrjeje të ministrit të jashtëm gjerman iu bashkangjit shprehimisht me deklaratën e tij edhe Këshilli i Sigurimit i OKB-së.

Edhe sekretari i përgjithshëm i OKB-së Kofi Anan, i dënoi përleshjet midis grupeve të popullësisë në Kosovë. "Sulmimi i qëllimshëm i objekteve të kultit si kishat, varrezat dhe manastiret është turpërues dhe i pafalshëm", ka thënë Anan.

 

 

"Hjuman Raits Uoç" u ka bërë thirrje paqeruajtësve të mbrojnë pakicat në Kosovë

 

Uashington, 20 mars 2004 - Organizata për mbrojtjen e të drejtave të njeriut "Hjuman Raits Uoç" u ka bërë thirrje paqeruajtësve të NATO-s dhe policisë së Kombeve të Bashkuara që të përqëndrohen në mbrojtjen e pakicave në Kosovë.

 

 

Riçard Hollbruk thotë se trazirat e fundit në Kosovë përfaqësojnë dështim për politikën ndërkombëtare ndaj Kosovës

 

Uashington, 20 mars 2004 - Ish i dërguari i Shteteve të Bashkuara në Ballkan, Riçard Hollbruk, thotë se trazirat e fundit në Kosovë përfaqësojnë dështim për politikën ndërkombëtare ndaj Kosovës. "Ngjarjet në Kosovë ishin të pashmangshme.

 

Kur isha atje në tetor i paralajmërova njerëzit, përfshirë edhe personelin amerikan dhe atë të OKB-së se nëse nuk merrnin masa të shpejta për të filluar zgjidhjen e çështjes së statusit përfundimtar situata do të keqësohej.

 

Më vjen keq të them se administrata e presidentit Bush nuk ra dakord me këtë vlerësim dhe për mendimin tim ndoqi një drejtim krejt të ndryshëm. Departamenti i Shtetit ishte i mendimit se koha do t'i bënte gjërat më të lehta.

 

Unë nuk jam dakord me këtë pikëpamje. Ajo që po ndodh sot në Kosovë është rezultati i dështimit të politikës së komunitetit ndërkombëtar përfshirë Shtetet e Bashkuara dhe OKB-në për të filluar zgjidhjen e statusit përfundimtar". Ish-ambasadori Hollbruk i bëri këto komente mbrëm derisa po merrte pjesë në në veprimtari të organizuar nga Shoqata Aziatike.

 

Po ashtu ai tha se planet e Shteteve të Bashkuara për të tërhequr 12 mijë trupat amerikan nga Bosnja janë të parakohëshme.

 

 

UNMIK-u thotë se numri i të vrarëve në protesta nuk është 31, por 28 veta

 

Prishtinë, 20 mars 2004 - Zëdhënësi i policisë së UNMIK-ut Derek Çapell dje për të parën herë ka bërë një prezentim të pasojave të protestave të fundit në Kosovë shprehur në shifra. Ai ka nënvizuar se numri i të vrarëve në këto protesta nuk është 31 siç është publikuar më parë, por 28 veta.

 

Ai ka pohuar se janë shkatërruar 16 kisha serbe, duke përfshirë këtu edhe manastire. Janë shkatërruar 110 shtëpi serbe. Zëdhënësi Çapell tha se deri më tash janë evidencuar 600 të plagosur, prej të cilëve 22 janë të plagosur rëndë. Të lënduar janë edhe 100 policë, njëri prej të cilëve është qëlluar me armë zjarri në këmbë tri netë më parë, mirëpo gjendja e tij është stabile.

 

 

Rupert Nojdek konsideron se Kosova duhet të bëhet shtet i pavarur

 

Bon, 20 mars 2004 - Kryetari i Shoqatës humanitare "Capanamur" Rupert Nojdek konsideron se Kosova duhet të bëhet shtet i pavarur dhe nëpërmjet marrëveshjes së asociim-stabilizimit të lidhet me Bashkimin Evropian.

 

Ai tha se konfliktet e fundit kanë dëshmuar se gjendja e tanishme nuk mund të mbahet. Duhet thënë shumë qartë se policët serbë më nuk mund të kthehen kurrë në Kosovë, ka thënë kryetari i kësaj shoqate humanitare Robert Nojdek.

 

 

Shefi i NATO-s ka refuzuar kërkesën e bashkësisë Serbi- Mali i Zi për dërgimin e ushtarëve serbë në Kosovë

 

Bruksel, 20 mars 2004 - Sekretari i përgjithshëm i NATO-s Jap de Hoop Shefer e ka refuzuar kërkesën e bashkësisë Serbi e Mali i Zi për dërgimin e ushtarëve serbë në Kosovë. Gjatë ditës se djeshme shefi i NATO-s Shefer lidhur me ecurinë e ngjarjeve në Kosovë ka deklaruar:

"Kemi parë shumë dhunë në Kosovë dhe kjo është arsyeja për kërkesën time, kërkesë që i drejtohet drejtuesve të gjitha bashkësive etnike, që i drejtohet udhëheqësve të shqiptarëve që të bindin popullin e tyre të qëndrojë i qetë pasi nuk dëshiron të shohë se si digjen shtëpitë e kishat ashtu siç nuk dua të shoh si digjen xhamitë në Beograd", theksoi Shefer. Më tej ai ka shtuar:

"KFOR-i po bën çfarë është e mundur për të krijuar siguri dhe stabilitet në Kosovë dhe mendoj se përgjegjësia kryesore, ndonëse të gjitha grupet etnike kanë përgjegjësi, bie mbi shumicën shqiptare në Kosovë".

 

 

V. Petriç: Pas dhunës së fundit në Kosovë duhet të qartësohet statusi i Kosovës

 

Vjenë, 20 mars 2004 - Pas dhunës së fundit në Kosovë duhet të ndërmerren hapa vendimtarë dhe të qartësohet statusi i Kosovës. Kjo është detyrë e Kombeve të Bashkuara dhe bashkësisë ndërkombëtare, ka thënë ish-përfaqësuesi i lartë i OKB-së në Bosnje Volfgang Petriç.

 

Sipas tij, gjendja në Kosovë është bërë më e ndjeshme pas formimit të qeverisë së re në Beograd, e cila mund të funksionojë vetëm me mbështetjen e partisë së Millosheviqit.

 

 

Koshtunica u ka thënë protestuesve serbë se Serbia nuk do ta japë Kosovën

 

Beograd, 20 mars 2004 - Në Beograd u mbajt dje një protestë të cilën e organizoi qeveria e Serbisë. Në këtë protestë ku morën pjesë rreth 10 mijë beogradas, foli edhe kryeministri serb Vojisllav Koshtunica, i cili në fjalimin e tij tha se "Serbia nuk do ta japë Kosovën sepse serbët pa Kosovën nuk janë askush dhe asgjë. Ne nuk do të ekzistonim sikur të mos e kishim ruajtur Kosovën", u ka thënë protestuesve Koshtunica.

 

 

Në Zrenjanin protestuesit dëmtojnë shtëpitë dhe dyqanet e shqiptarëve

 

Zrenjanin, 20 mars 2004 - Në Zrenjanin njoftohet për protesta të nxënësve dhe studentëve serbë si dhe për dëmtimin e shtëpive dhe të dyqaneve të shqiptarëve, që jetojnë në këtë qytet. Edhe në Mal të Zi u mbajtën protesta kundër trazirave të fundit në Kosovë.

 

 

Pakistani ka arrestuar mbi 100 të dyshimtë në sulmet pesëditëshe kundër militantëve të Al Kaidës

 

Vana, Pakistan, 20 mars 2004 - Pakistani ka arrestuar mbi 100 të dyshimtë në sulmet pesëditëshe kundër militantëve, të cilët besohet të jenë kurthuar në malet përgjatë kufirit së bashku me numrin 2 të Al Kaidës, Ajman al Zavahri, ka deklaruar sot (e shtunë) një komandant ushtarak, njofton AP.

 

Ndër të arrestuar ka të jashtëm dhe pjesëtarë të fisit lokal pashtun, të cilët i kishin strehuar militantët, ka shtuar ai. Rreth 400 deri në 500 militantë besohet të jenë fortifikuar dhe ende vazhdojnë të luftojnë me mortaja, me AK-47, raketa dhe granata dore.

 

 

Persona të armatosur kanë vrarë një polic irakian në Kirkuk

 

Kirkuk, Irak, 20 mars 2004 - Persona të armatosur kanë vrarë sot (e shtunë) një polic irakian në perendim të qytetit verior Kirkuk, vetëm disa orë pasi trupat amerikane kanë arrestuar një oficer policie të dyshimtë për organizimin e sulmeve kundëramerikane, ka thënë policia irakiane, njofton AFP.

 

Muhamed Omer Abdullah, 42-vjeçar, është vrarë kur tre persona kanë hapur zjarr me pushkomitraloz në një pikë kontrolli në rrugë jashtë Kirkukut, ka thënë policia.

 

 

Presidenti Bush u bëri thirrje aleatëve që të bashkohen për të luftuar terrorizmin

 

Uashington, 20 mars 2004 - Presidenti Bush u bëri thirrje aleatëve që të lënë mënjanë mosmarrëveshjet lidhur me luftën në Irak dhe të bashkohen për të luftuar terrorizmin. Zoti Bush tha se "është detyrë e çdo qeveria të luftojë dhe të shkatërrojë këtë kërcënim për popujt tanë".

Ai tha se çdo shenjë dobësie ose sprapsjeje i jep vlerë dhunës terroriste dhe nxit akte të mëtejshme dhune në të gjitha vendet. Presidenti Bush e mbajti këtë fjalim me rastin e një vjtorit të pushtimit të Irakut nga koalicioni i udhëhequr nga Shtetet e Bashkuara.

  |  KULTURË  |  HISTORI  |   POLITIKË  |  OPINIONE  |  ADRESARI  |  ARKIVI  |