Përmbajtja:

• Këshilli i Sigurimit i OKB-së dënoi aktet e dhunës në Kosovë

• Presidenti Rugova u bëri thirrje qytetarëve të Kosovës të ndalin protestat

• Admirali Xhonson tha se në veprimet e grupeve protestuese nuk kishte asgjë trimërore dhe as patriotike

• Xhek Strou ka dënuar dhunën në Kosovë

• Ministri i jashtëm irlandez ka kërkuar nga drejtuesit e Kosovës t'i japin fund konfliktit ndëretnik

• Erhard Busek ka dënuar shpërthimin e dhunës në Kosovë

• Mitrovicë: Apel qytetarëve që të jenë shumë të matur në veprimet e tyre

• Situatë më e qetë në Kosovë

• Policia njofton se janë arrestuar 17 pjesëmarrës të protestës në Gjilan

• Italia është e shqetësuar me situatën në Kosovë; 130 parashutistë janë nisur si ndihmë KFOR-it

• Në Kosovë edhe gjatë ditës se djeshme pati të plagosur dhe u dogjën disa shtëpi e objekte fetare ortodokse

• Kampi amerikan "Bondstill" dënon dhunën dhe aktet e dhunshme në Kosovë

• NATO-ja paralajmëron dërgimin e 1000 trupave shtesë në Kosovë për shkak të trazirave të fundit

• Franca dërgon 400 ushtarë shtesë në Kosovë

• Novicki: Jo të gjithë shqiptarët në Kosovë dëshirojnë të ardhme të mbarë

• Rexhepi takohet me udhëheqësit komunalë në Mitrovicë

• Tri shoqatat e dala nga lufta kërkuan që të ndërpriten të gjitha protestat sot pasdite

• F. Spahija: Ekstremistët serbë gjithmonë janë të gatshëm të provokojnë dhe ata kanë përparësi ndaj situatës në Mitrovicë

• Del Ponte thotë se KFOR-i dhe forcat e tjera duhet të marrin masa që situata të mos përshkallëzohet

• Del Ponte thotë se ajo ka prova të mjaftueshme për ta gjetur fajtor Millosheviqin

• Demonstruesit serbë sulmuan Ambasadën e Shqipërisë në Beograd

• Çoviq deklaroi se serbët do të jenë të gatshëm të mbrohen ndaj sulmeve eventuale

• Të hënën diplomatët e BE-së diskutojnë për Kosovën

• Gjermania dërgon në Kosovë edhe 600 ushtarë

• Ministria e Mbrojtjes e Britanisë ka dërguar grupin prej 750 ushtarësh në Kosovë

• Në shumicën e shkollave procesi mësimor zhvillohet normalisht, përveç në disa komuna

• SHBA-të punojnë me NATO-n për t'i dhënë fund dhunës në Kosovë

• K.Stivens: U bëjmë thirrje qytetarëve të Kosovës të bashkëpunojnë me UNMIK-un, KFOR-in dhe SHPK-në
  D.Server: Serbia nuk dëshiron t'i zgjidhë problemet, por i krijon ato vetë

• Deklaratë e Kuvendit të Shqipërisë lidhur me ngjarjet e ditëve të fundit në Kosovë

• Qeveria shqiptare bën thirrje për uljen e tensioneve në Kosovë

• Edhe nata e mbrëmshe ka qenë e tensionuar në Kosovë

• Pauell paparalajmërim në Bagdad, vdes një gazetar nga plagët e marra

• Një marins amerikan ka vdekur nga plagët e marra në Irak

• Në një aksident trafiku në Finlandë, kanë humbur jetën 24 persona, kryesisht tineixherë

• Trupat pakistaneze mund të kenë rrethuar zëvëndësin e Osama bin Ladenit

• Presidentja tajvaneze është qëlluar me armë zjarri

• Mbreti i Jordanit i ka bërë një vizitë të befasishme kryeministerit izraelit

Këshilli i Sigurimit i OKB-së dënoi aktet e dhunës në Kosovë

 

Nju Jork, 19 mars 2004 - Këshilli i Sigurimit i OKB-së u mblodh në një sesion urgjent pasi dhuna në Kosovë dhe në Sërbi shkaktoi 31 të vrarë dhe më shumë se 500 të plagosur.

Të 15 vendet anëtare të Këshillit të Sigurimit dënuan përleshjet dhe u bënë thirrje udhëheqësve kosovarë që të sigurojnë zbatimin e shtetit juridik. Ata i cilësuan sulmet kundër personelit të OKB-së në Kosovë si "sulm kundër komunitetit ndërkombëtar".

Sekretari i Përgjithsëm i OKB-së Kofi Annan i cilësoi shkatërrimet dhe djegiet e kishave dhe të xhamive si akte "të turpshme dhe të pafalshme".

Ministri i Jashtëm i Serbisë dhe Malit të Zi Goran Svilanoviq t ha para Këshillit të Sigurimit të OKB-së se se dy ditët e fundit të dhunës janë provë e fushatës së spastrimit etnik nga ekstremistët shqiptarë në Kosovë.

Në një fjalim emocional para Këshillit të Sigurimit, Svilanoviq fajësoi NNAT0-n dhe forcat e Kombeve të Bashkuara që nuk arritën të ndalin atë që ai e cilësoi si dhunën më të ashpër etnike në Kosovë që pas përfundimit të luftës afro 5 vjet më parë.

Sekretari i Përgjithshëm i Kombeve të Bashkuara Kofi Annan u bëri thirje të dyja palëve të mos kalojnë në akte të dhunshme. Por ai e vuri theksin mbi shumicën shqiptare në Kosovë.

"Më lejoni që në veçanti t'u kujtoj udhëheqësve të komunitetit shqiptar në Kosovë se, si grupi më i madh etnik, ata kanë përgjegjësinë të mbrojnë dhe të forcojnë të drejtat e popullsisë në Kosovë, dhe veçanërisht të pakicave të saj."

 

Zoti Annan i përshkroi sulmet kundër kishave dhe varrezave në Kosovë si dhe sulmet hakmarrëse ndaj xhamive në zona të ndryshme në Serbi dhe Mal të Zi si akte të turpshme.

Në takim foli edhe ministri i jashtëm gjerman Joshka Fisher, i cili u bëri thirje të dyja palëve të tregojnë guxim politik dhe të ndalin dhunën. Nuk do të ketë falje për autorët e këtyre akteve. Ka ardhur koha që politikanët shqiptarë dhe serbë në Kosovë të dalin para popullit të Kosovës dhe të mbrojnë vlerat demokratike kundër anarkisë dhe dhunës, tha ai.

Këshilli i Sigurimit nëpërmjet një deklarate e cilësoi dhunën në Kosovë si të papranueshme dhe kërkon që autorët e këtyre akteve të nxirren para drejtësisë. Këshilli dënon gjithashtu sulmet ndaj personelit të NAT0-s dhe OKB-së.

Deklarata përkon me njoftimet nga Mitrovica se personeli i Kombeve të Bashkuara është evakuuar nga ky qytet.

 

 

Presidenti Rugova u bëri thirrje qytetarëve të Kosovës të ndalin protestat

 

Prishtinë, 19 mars 2004 - Presidenti i Kosovës Ibrahim Rugova mbrëmë në një takim me gazetarët iu drejtua qytetarëve të Kosovës dhe u bëri thirrje që menjëherë t'i ndalin veprimet e dhunshme ndaj policisë së UNMIK-ut dhe KFOR-it. Këto protesta, ku është përdorur dhuna, e prishin imazhin e progresit të Kosovës dhe janë kundër procesit pozitiv të lirisë e pavarësisë.

Presidenti Rugova më tej tha se pakënaqësitë e ndryshme dhe raportet me UNMIK-un e bashkësinë ndërkombëtare që është e pranishme, pasi të qetësohet gjendja, do t'i shqyrtojmë të gjitha këto pakënaqësi, duke i zgjidhur brenda institucioneve të Kosovës së bashku me UNMIK-un dhe me KFOR-in. Presidenti i Kosovës ka shprehur indinjatën e tij lidhur me sulmet që janë bërë ndaj trupave të KFOR-it dhe policisë së UNMIK-ut.

 

Ata që e dinë një pjesë të historisë shqiptare, u është drejtuar Presidenti Rugova, gazetarëve, se sa i përket historisë së Shqipërisë në vitin 1913 kur Evropa ka dërguar në Shqipëri Princ Vidin, që ka qenë njëlloj protektorati, "armiqtë e shqiptarëve i kanë shtyrë njerëzit që ta përzënë Prind Vidin nga Shipipëria, prandaj në këtë situatë që është krijuar në Kosovë, ne duhet të mendojmë seriozisht".

"Prandaj, edhe njëherë u drejtohem të gjithë qytetarëve të Kosovës se ne të gjitha problemet do t'i shtrojmë dhe do t'i zgjidhim, mirëpo pa institucione ne nuk mund të zgjidhim asgjë, edhe për faktin se gjatë dhjetë vjetëve të dominimit të pushtetit të huaj, kemi pasur sukses, pastaj lufta dhe ndërhyrja e NATO-s dhe 5 vjetët në liri, që bëmë një progres të madh", tha z.Rugova.

Prandaj, deklaroi presidenti Rugova, nuk duhet të "dehemi", të kënaqemi nga progresi, por duhet të punojmë dhe të veprojmë brenda institucioneve dhe rendit demokratik. Ky vit është i rëndësishëm pasi mbahen zgjedhjet dhe pas zgjedhjeve bëhen institucionet e tjera, por ne duhet gjithsesi të punojmë që të mbahen këto zgjedhje dhe të vazhdojë jeta demokratike.

Njëra nga pyetjet që u shtrua gjatë konferencës së presidentit Rugova, ishte se çfarë po bëjnë institucionet e Kosovës për zhbllokimin e dy nga rrugëve më kryesore të cilat po vazhdojnë të mbahen të bllokuara nga minoriteti serb.

Presidenti Rugova u përgjigj se institucionet e Kosovës po punojnë me UNMIK-un dhe këto rrugë duhet të zhbllokohen. Unë kam kërkuar dhe kërkoj që të zhbllokohen nga forcat e KFOR-it, të policisë së UNMIK-ut dhe asaj të Kosovës. "Prandaj, nuk do të tolerojmë këto veprime të dhunshme, dhe duhet të mësohemi të logjikojmë si shtet. Edhe ata të cilët i bllokojnë këto rrugë do të kenë pasoja që do të përballen me ligjin.

Pyetja tjetër ishte lidhur me zbehjen e imazhit të përfaqësuesve të institucioneve gjatë kësaj periudhe të krizës që po kalon Kosova.

 

Presidenti Rugova u përgjigj se "nuk është zbehur imazhi i liderëve të institucioneve të Kosovës, por këto lloj zhurmash që po bëhen, qe një periudhë të gjatë, këto na kanë sjellë në këtë gjendje ku jemi, derisa kanë gjuajtur edhe në shtëpinë time dhe tani i gjuajnë shtëpitë e të gjithëve, prandaj ne do t'i ndalim këto grupe ekstreme, të cilat janë kundër demokracisë, kundër lirisë, pavarësisë dhe prosperitetit të Kosovës".

 

 

Admirali Xhonson tha se në veprimet e grupeve protestuese nuk kishte asgjë trimërore dhe as patriotike

 

Prishtinë, 19 mars 2004 - Komandanti i krahut jugor të NATO-s Gregori Xhonson, sapo kishte qnëdroi dje pasdite në Kosovë dhe bëri të ditur se kishte dhënë urdhër që në Kosovë të dislokohen rreth 1000 trupa nga forcat strategjike rezervë e NATO-s. Ai mori pjesë në një takim me krerët e bashkësisë ndërkombëtare, të komandantit të KFOR-it, të institucioneve dhe partive politike të Kosovës, si dhe me shefat Kuintit diplomatik në Prishtinë.

Në deklaratën e përbashkët nga ky takim, të cilën e ka lexuar në emër të pjesëmarrësve, shefi i UNMIK-ut Hari Holkeri, thuhet se "nuk ka arsyetim për dhunën dhe ajo duhet ndërprerë menjëherë.

 

Ata që janë të angazhuar në këtë dhunë po e tradhtojnë gjithë popullin e Kosovës". Në deklaratë thuhet se progresi i arritur gjatë viteve të fundit është rrezikuar dhe se është rrezikuar edhe prospekti për një të ardhme më të mirë, ndërkaq tash është koha për qetësi, tha z. Holkeri.

Ndërkaq komandanti i Krahut Jugor të NATO-s, admirali Gregori Xhonson konfirmoi se në Kosovë ka filluar ardhja e trupave nga forcat sttrategjike rezervë të NATO-s me qëllim të rivendosjes së rendit. Ai shtoi se tri kompani nga forcat strategjike rezervë të NAT0-s kanë arritur dhe po arrijnë sot në Kosovë, ndërkaq më shumë trupa do të vijnë në ditët e ardhshme, tha admirali Xhonson, duke e vlerësuar situatën shumë të rrezikshme.

Admirali Xhonson tha se forcat paqeruajtëse po punojnë këtu tash e pesë vjet me radhë dhe shtoi se është prekur shumë nga fakti se miqtë më të mirë që shqiptarët e Kosovës kanë pasur ndonjëherë - ushtarët e NATO-s, të UNMIK-u dhe bashkësia ndërkombëtare, po sulmohen. Kjo tha ai, duhet të ndërpritet menjëherë.

Admirali Xhonson tha se në veprimet e grupeve protestuese nuk kishte asgjë trimërore dhe as patriotike. Thjesht ishte një krim dhe shkurtimi i trupave të NATO-s tha ai nuk kanë ndikuar në situatën e krijuar në Kosovë. Kjo çfarë ka ndodhur çon një kthim prapa, tha admirali Xhonson, duke u bërë thirrje të gjithëve që të punojnë së bashku për zgjidhjen e situatës.

 

 

Xhek Strou ka dënuar dhunën në Kosovë

 

Londër, 19 mars 2004 - Ministri i jashtëm britanik, Xhek Strou ka dënuar dhunën në Kosovë, por ka përsëritur faktin se ndërhyrja në ish-Jugosllavi ka qenë e domosdoshme dhe se zgjidhja e problemeve merr kohë.

"Ka ndarje të thella etnike, ndarje të cilat vazhdojnë prej shekujsh në të gjithë Ballkanin dhe shumë nga këto mosmarrëvshje historike i shohim edhe në ndarjet ekzistuese ndërmjet komuniteteve në Kosovë. Ndërtimi i vendeve nuk ëshë një çështje e lehtë", ka thënë Strou.

 

Ai ka nënvizuar se çfarë do të kishte ndodhur nëse ne do të lejonim që në oborrin tonë të ndodhte pastrimi etnik e gjenocidi brutal dhe kasaphanja pa u ndëshkuar. Nuk ka pasur alternativë tjetër veçse të ndërhynim në Kosovë. Ka qenë e drejtë ndërhyrja dhe ne do të qëndrojmë atje,tha Strou, duke mbrojtur politikën e ndjekur nga bashkësia ndërkombëtare në Kosovë.

 

 

Ministri i jashtëm irlandez ka kërkuar nga drejtuesit e Kosovës t'i japin fund konfliktit ndëretnik

 

Bruksel, 19 mars 2004 - Ministri i jashtëm irlandez, Brajen Koen si kryesues i radhe së BE-së ka kërkuar nga drejtuesit vendor të Kosovës që të ndikojnë për t'i dhënë fund konfliktit ndëretnik në vend. Sipas tij përparësia kryesore është rivendosja e qetësisë. Ai ka shtuar se përgjësit për këto akte duhet të nxirren para drejtësisë.

 

 

Erhard Busek ka dënuar shpërthimin e dhunës në Kosovë

 

Bruksel, 19 mars 2004 - Koordinatori i posaçëm i Paktit të Stabilitetit Erhard Busek ka dënuar shpërthimin e dhunës në Kosovë.

 

Ai ka thënë se autorët e këtyre akteve duhet ta dinë se rrethi i tyre i pashpresë po reflekton negativisht mbi Kosovën dhe është një kthim pas në zhvillimet politike në Kosovë.

 

Busek gjithashtu ka dënuar edhe dhunën në Serbi dhe Mal të Zi e cila rezultoi me djegien e disa objekteve të fesë islame.

 

 

Mitrovicë: Apel qytetarëve që të jenë shumë të matur në veprimet e tyre

 

Mitrovicë, 19 mars 2004 - Bordi i Drejtorëve të administratës së Kuvendit të Komunës, drejtuar nga kryeshefi Mustafë Pllana, ka mbajtur sot një mbledhje të jashtëzakonshme, në të cilën ka diskutuar për gjendjen e krijuar në komunë dhe ka përcaktuar masat nga fushëveprimi i vet për stabilizimin sa më të shpejtë të kësaj gjendje.

Bordi i Drejtorëve vlerësoi se situata në komunë është shumë e rëndë, prandaj u ka bërë apel qytetarëve që të jenë shumë të matur në veprimet e tyre, të jenë gjakftohtë dhe të bëjnë gjithçka që është e mundur që është e mundur për të dhënë kontribut në qetësimin e gjendjes dhe normalizimin e jetës në komunë.

Kryeshefi i Ekzekutivit, Mustafë Pllana ka caktuar obligime dhe përgjegjësi të veçantë për të gjithë drejtorët e drejtorive të Administratës Komunale, duke kërkuar nga ata që të kenë një bashkëpunim sa më të ngushtë me instiucionet publike, sikur janë ato të shndetësisë, zjarrëfiksat etj, si dhe t'i mobilizojnë të gjithë segmentet e duhura për ofrimin e shërbimeve të nevojshme për qytetarët, në mënyrë që jeta të mos paralizohet.

 

 

Situatë më e qetë në Kosovë

 

Prishtinë, 19 mars 2004 - Duket se në të gjitha qytetet e Kosovës situata sot paraqitet më e qetë, përveç ndonjë incidenti të izoluar, si ai që ka ndodhur sot në lagjen e Boshnjakëve në veri të Mitrovicës ku është plagosur një shqiptar.

Ndryshe protesta janë mbajtur vetëm në Pejë, ku është protestuar në mënyrë të qetë dhe pa incidente dhe në Prizren ku kanë në sheshin Shadërvan kanë protestuar disa qindra të rinj. Nga liceu ortodoks në Prizren sot është nxjerrë një kufomë e karbinizuar dhe është dërguar në morgun e Rahovecit.

 

Ndërkaq, siç mësohet jozyrtarisht, dje është vrarë Gazmend Shala nga fshati Zoqishtë i Rahovecit.

 

 

Policia njofton se janë arrestuar 17 pjesëmarrës të protestës në Gjilan

 

Gjilan, 19 mars 2004 - Komiteti për Siguri dhe Emergjencë i komunës së Gjilanit, në takimin e sotëm ku mori pjesë edhe KFOR-i, SHPK-ja, TMK-ja, përgjegjësit e UNMIK-ut për rajon dhe komunë si dhe përfaqësues të organizatave tjera ndërkombëtare në Kosovë, vlerësoi se nata e mbrëmshme ka qenë relativisht e qetë.

Drejtoria për siguri civile dhe emergjencë është njoftuar se mbrëmë në Cërnicë ka ndodhur një shpërthim ku janë lënduar 4 serbë dhe, siç tha Hazir Mustafa, pas marrjes së ndihmës së parë në spitalin e Gjilanit, ata janë lëshuar në shtëpitë e tyre.

Nga informacionet e mëvonshme është marrë vesh se në mesin e të lënduarve nuk ka qenë asnjë fëmijë, siç është ishte raportuar në disa media, por që të gjithë kanë qenë mbi 22 vjeç e më tepër.
Duke i komentuar zhvillimet e fundit në Kosovë, të cilat kanë tërhequr vëmendjen edhe të mediave ndërkombëtare, koloneli Xhonson nga kampi "Montith" në Gjilan tha se kjo që ka ndodhur në dy ditët e fundit, nuk është e mirë për Kosovën.

Koloneli i SHPK-së, Reshat Maliqi ka raportuar se mbrëmë gjatë natës ka ndodhur një sulm me granatë dore ndaj patrullës së policisë në fshatin Boston të Artanës, por nuk ka patur të lënduar.
Vetëm dje në drejtim të policëve të SHPK-së janë hudhur një kamion gurë e drunj nga protestuesit, me ç`rast janë lënduar 15 pjesëtarë, por të gjithë ata kanë thënë se janë të aftë të vazhdojnë punën, pos një police, e cila ndodhet e shtrirë në spital, tha Maliqi.

Policia e Gjilanit, tashmë ka filluar të ndërmarrë masa ndaj një numri të protestuesve dhe dje ka arrestuar 17 persona dhe ndaj tyre ka bërë fletëparaqitje për prishje të rendit dhe të qetësisë. Për mosrrespektim të ores policore, ndërkaq natën e mbrëmshme janë mbajtur në stacionin e policisë 24 qytetarë, ka thenë komandanti i stacionit të policisë në Gjilan, Izet Azizi.

Kryetari i komunës Lutfi Haziri tha se nuk mund të marrë mbi vete protesta të këtilla dhe nuk dëshiron të identifikohet me ata persona, të cilët gjatë dy ditëve të kaluara kanë ushtruar dhunë dhe kanë hudhur gurë kundër strukturave ndërkombëtare dhe policëve të SHPK-së.

Edhe koloneli i TMK-së, Shaban Musliu ka shprehur shqetësimin e tij për gjithë atë çka ka ndodhur në dy ditët e fundit.

 

 

Italia është e shqetësuar me situatën në Kosovë; 130 parashutistë janë nisur si ndihmë KFOR-it

 

Romë, 19 mars 2004 - Ministri italian i Punëve të Jashtme Franko Fratini ka deklaruar se Italia është e shqetësuar me situatën në Kosovë dhe do të shtojë përpjekjet për gjetjen e zgjidhjeve.

Ndërkaq, ministri italian i Mbrojtjes Antonio Martino ka thënë se Italia duhet të shtojë praninë në Kosovë, duke transferuar disa forca të saj nga Bosnja dhe Italia në Kosovë.

Sot nga qyteti italian Piza janë nisur për në Kosovë 130 parashutistë italianë, si përforcim për forcat paqeruajtëse në Kosovë.

Ndryshe Italia ka 2400 ushtarë në Kosovë.

   

  

Në Kosovë edhe gjatë ditës se djeshme pati të plagosur dhe u dogjën disa shtëpi e objekte fetare ortodokse

 

Prishtinë, 19 mars 2004 - Numri i të vrarëve në trazirat e dy ditëve të fundit sipas zëdhënëses së UNMIK-ut Izabela Karlovic ka arritur në 31. Dje janë plagosur 127 vetë. Përveç në Mitrovicë edhe në Gjilan e Ferizaj është vendosur ora policore prej orës 21.00 deri në orën gjashtë të mëngjesit.

Protestuesit në Skënderaj i kanë vënë zjarrin një manastiri ortodoks në Skënderaj ku edhe në këtë qytezë u organizuan protesta. Edhe në Podujevë ka pasur protesta. Po kështu në Viti i është vënë zjarri katër shtëpive të minoritetit serb. Edhe në Prishtinë vazhduan problemet.

 

Në periferi të Prishtinës në Çagllavicë ka pasur tre të plagosur me plumba plastikë. Në Prizren, janë plagosur shtatë anëtarë të SHPK-së janë plagosur, ndërkaq në Gjilan dy pjesëtarë të këtij shërbimi. Vetëm gjatë ditës së djeshme janë plagosur 14 protestues.

Rrugët që lidhin Prishtinë e Çagllavicën dhe Graçanicën dhe në fakt që lidhin Prishtinën me Shkupin janë ende të bllokuara.

Zëdhënësi i SHPK-së Refki Morina konfirmon se është përforcuar kufiri me Kosovën nga ana e Serbisë dhe Malit të Zi,por edhe nga ana e Maqedonisë pas zhvillimeve të fundit në Kosovë.

 

 

Kampi amerikan "Bondstill" dënon dhunën dhe aktet e dhunshme në Kosovë

 

Ferizaj, 19 mars 2004 - Në reagimin e Kampit amerikan "Bondstill" dënohet dhuna dhe aktet e dhunshme në Kosovë dhe thuhet se së bashku duhet të punohet për të rivendosur paqen dhe për t'iu kthyer punës që Kosova të shkojë drejtë së ardhmes.

 

Në këtë reagim theksohet gjithashtu se veprimet e ushtarëve të Brigadës së Lindjes në Kosovë janë bazuar gjithmonë në shpirtin e paanashmërisë dhe se do të veprohet dhe do të reagohet ndaj çdo grupi, i cili do të veprojë në atë mënyrë që është vepruar dje.

 

 

NATO-ja paralajmëron dërgimin e 1000 trupave shtesë në Kosovë për shkak të trazirave të fundit

 

Bruksel, 19 mars 2004 - NATO-ja ka paralajmëruar për dërgimin e 350 trupave shtesë në Kosovë për shkak të trazirave që po ndodhin këtu. Një njësi me 150 amerikanë tashmë është në rrugë drejt Kosovës. Po ashtu në Kosovë do të vijnë edhe ushtarët britanik dhe italianë.

 

Njëherësh edhe Parlamenti i Austrisë ka miratur rritjen e numrit të ushtarëve austriak në misionet paqeruajtëse në Kosovë dhe Bosnje. Ministri i Mbrotjes së Austrisë ka deklaruar se ky hap dëshmon se përparësi në misionet e ardhshme ndërkobëtare do të ketë Evropa Juglindore.

Britania e Madhe ka thënë se do të dërgojë edhe 750 trupa të tjera në Kosovë.

 

 

Franca dërgon 400 ushtarë shtesë në Kosovë

 

Paris, 19 mars 2004 - Edhe Franca dërgon trupa shtesë në Kosovë dhe tashmë një kontigjent ushtarësh francezë janë nisur nga Tuluzi për në Prishtinë, deklaroi ministrja franceze e Mbrojtjes Mishel Alio-Mari.

 

Më herët AFP njoftonte se Franca do të dërgojë në Kosovë 400 ushtarë shtesë, ku në kuadër të forcave paqeruajtëse tashmë ndodhet një kontigjent paqeruajtësish francezë prej 2500 njerëzish.

 

 

Novicki: Jo të gjithë shqiptarët në Kosovë dëshirojnë të ardhme të mbarë

 

Prishtinë, 19 mars 2004 - Obudspersoni i Kosovës Marek Antoni Novicki ka lëshuar një deklaratë dreejtuar shqiptarëve të Kosovës, në të cilën, siç thotë, "apelon te pjesa shqiptare e popullit në Kosovë, jo vetëm si Ombudsperson në Kosovë, por edhe si një njeri që ka jetuar dhe punuar në mesin e kosovarëve katër vitet e fundit".

"Gjatë këtyre viteve, jam përpjekur t'ju ndihmoj duke ngritur problemet dhe çështjet tuaja me përgjegjësit e UNMIK-ut dhe strukturave administrative vendore. Jam përpjekur të jem avokat i popullit dhe në të njejtën kohë mik i të gjithë kosovarëve", thotë Novicki.

"I kam bërë të gjitha këto sepse kam supozuar që ju, populli i Kosovës, keni zgjedhur rrugën që shpie drejt një të ardhme të mbarë për ju dhe familjet tuaja, një të ardhme në të cilën do të jetonit në një shoqëri që është e mbështetur në mendjegjerësi, tolerancë dhe mbrojtjen e të drejtave të tjerëve", thotë ai. Por sipas tij, "përkundër kësaj, zhvillimet e kohës së fundit dhanë një mendim që jo të gjithë pjesëtarët e bashkësisë shqiptare në Kosovë e dëshirojnë këtë të ardhme të mbarë".

"Në vend të saj, pamjet e tashme të dhunës së tmerrshme dhe krimeve të urryera kundër pjesëtarëve të bashkësisë serbe dhe forcave ndërkombëtare të sigurisë krijojnë bindjen brenda dhe jashtë Kosovës që ekziston një qëllim për ta pastruar këtë vend nga prezenca e të gjithë serbëve, që është në kundërshtim të plotë me idenë e bashkëjetesës multietnike në Kosovë", thekson Novicki në deklaratën e tij, duke kërkuar nga kosovarët ta rishqyrtojnë qëndrimin e tyre, "me shpresë që edhe nëse nuk pajtoheni të dëgjoni të tjerët, së paku do të merrni në konsiderim brengat dhe vërejtjet serioz të Ombudspersonit", thotë Marek Antoni Nowicki.

 

 

Rexhepi takohet me udhëheqësit komunalë në Mitrovicë

 

Mitrovicë, 19 mars 2004 - Kryeministri i Kosovës Bajram Rexhepi po e viziton sot qytetin e Mitrovicës për t'u njohur për së afërmi me gjendjen atje.

 

Mes të tjerash kryeministri Rexhepi u takua edhe me përfaqësuesit e komunës së Mitrovicës, të cilëve u ka kërkuar që të bëjnë çmos që të vijë deri të qetësimi i situatës. Ndërkohë trupat paqëruajtse të KFOR-it kanë marrë një aksion të gjerë në kërkim të armëve në Mitrovicë.

Rexhepi akuzoi UNMIK-un për fillimin e dhunës në Kosovë dhe degradimin e situatës, pasi, siç tha, nuk veproi me kohë dhe në mënyrë efikase.

 

 

Tri shoqatat e dala nga lufta kërkuan që të ndërpriten të gjitha protestat sot pasdite

 

Prishtinë, 19 mars 2004 - Tri shoqatat e dala nga lufta e UÇK-së kërkuan që të ndërpriten të gjitha protestat sot më 19 mars në orën 16.00. Në një takim me gazetarë, përfaqësuesit e këtyre shoqatave kanë akuzuar UNMIK-un si gjenerator të krizave të cilat, sipas tyre, shkaktuan gjakderdhjen në Kosovë.

 

Si pasojë e pakënaqësive të akumuluara gjatë pesë vjetëve, në protesta masa e revoltuar nuk kishte mundësi të kontrollohej, tha Afrim Kuleta nga Shoqata e Veteranëve të Luftës së UÇK-së.

Ndërkaq, Faik Fazilu, kryetar i Këshillit organizativ të protestave bëri thirrje për ndëprerjen e protestave përkohëshisht nga data 19 marsi, që edhe njeherë t'i jipet shans institucioneve të Kosovës dhe ndërkombëtare që të merren seriozsht me kërkesat e tyre.

Organizatorët kërkuan që të ndryshohet politika nënçmuese dhe e gabuar e UNMIK-ut ndaj Kosovës, të ndryshohet politika e institucioneve të Kosovës, të barten të gjitha kompetencat nga UNMIK-u tek vendorët, të lirohen të gjithë luftëtarët e UÇK-së nga burgjet e UNMIK-ut, të bashkohet qyteti i Mitrovicës, të kthehen 2500 hektarë dhënë Maqedonisë, të deenklavizohet Kosova, të njihet e drejta për vetëvendosje e popullit të Kosovës etj.

 

 

F. Spahija: Ekstremistët serbë gjithmonë janë të gatshëm të provokojnë dhe ata kanë përparësi ndaj situatës në Mitrovicë

 

Kelln, 19 mars 2004 - Kryetari i Komunës së Mitrovicës Faruk Spahija i cili për shkaqe objektive gjendet Gjermani, i lutur që të shfaq qëndrimin e tij lidhur me ngjarjet e fundit në Mitrovicë, ka thënë se Mitrovica është një vend vazhdimisht i tensionuar.

 

Ai thotë se për faktin se ky qytet është i ndarë dhe mbahet i bllokuar nga ekstremistët serbë, me incidentin që ndodhi në afërsi të Mitrovicës në fshatin Çabër, u krijua një situatë në të cilën njerëzit e panë të udhës të protestojnë, sigurisht shumica prej tyre qëllimirë për të ndikuar në opinionin kosovar, që ngjarje të tilla të mos ndodhin më këso tragjedish me fëmijë, por që situata rrëmbeu ndoshta edhe aty këtu veprimi i ndonjë ekstremisti, që ka nxitur qytetarët të dalin në protesta.

 

Ekstremistët serbë gjithmonë janë të gatshëm të provokojnë dhe ata kanë përparësi ndaj situatës në Mitrovicë. Kështu situata eskaloi dhe bilanci është tejet tragjik për Mitrovicën.

 

 

Del Ponte thotë se KFOR-i dhe forcat e tjera duhet të marrin masa që situata të mos përshkallëzohet

 

Gjenevë, 19 mars 2004 - Kryeprokurorja e Tribunalit të Hagës, Karla del Ponte ka reaguar nga Gjeneva, ku ajo ndodhet duke shprehur shqetësimin për gjendjen e krijuar në Kosovë. "Sigurisht që jam e shqetësuar nga ajo që po ndodhë në Kosovë sepse është një përsëritje e asaj se çfarë kemi parë edhe në të shkuarën", ka deklaruar Del Ponte.

 

Ajo shpreson se KFOR-i dhe forcat e tjera të mund të marrin masa që gjendja të mos përshkallëzohet, që do të përbënte një rrezik vërtet të madh. Njëherësh ka theksuar se ky është një sinjal alarmi se konflikti etnik ende vazhdon.

 

 

Del Ponte thotë se ajo ka prova të mjaftueshme për ta gjetur fajtor Millosheviqin

 

Gjenevë, 19 mars 2004 - Kryeprokurorja e gjykatës së Kombeve të Bashkuara për krimet e luftës në ish Jugosllavi, Karla del Ponte, tha se ajo ka prova të mjaftueshme për ta gjetur fajtor ish presidentin jugosllav, Sllobodan Millosheviç, për krime lufte.

Zonja Del Ponte tha dje në Zvicër se është shumë vështirë të provohet fajësia nën akuzën për gjenocid, të cilën ajo e përkufizoi si një synim për të shkatërruar një grup ose pjesë të një grupi.

Ajo shprehu bindjen se ka prova të mjaftueshme për të provuar gjetjen fajtor të të pandehurit, megjithëse ekipit të saj i mungojnë, siç u shpreh ajo, prova të pakundërshtueshme ndaj Millosheviqit.
Millosheviqi përballet me 60 akuza për krime lufte për rolin e tij në konfliktet në Kroaci, Bosnje-Hercegovinë dhe në Kosovë gjatë viteve 90-të.

 

 

Demonstruesit serbë sulmuan Ambasadën e Shqipërisë në Beograd

 

Beograd, 19 mars 2004 - Në Beograd, Novi Sad, Kragujevc, Nish, Jagodinë dhe disa qytete të tjera të Serbisë edhe dje kanë vazhduar demonstratat për shkak të gjendjes në Kosovë. Gjatë protestave në Beograd janë sulmuar edhe disa ambasada të huaja ndër të cilat e ajo e Shqipërisë, Gjermanisë dhe Kroacisë.

 

 

Çoviq deklaroi se serbët do të jenë të gatshëm të mbrohen ndaj sulmeve eventuale

 

Mitrovicë, 19 mars 2004 - Në pjesën veriore të Mitrovicës ka qëndruar dje edhe kryetari i "Qendrës koordinuese serbe" Nebojsha Çoviq, i cili sipas burimeve serbe të informacionit po merret me organizimin e "rojeve të urës" në fshatrat serbe.

 

Njoftohet se Çoviq është takuar dje edhe më kryeadministratorin e Kosovës Hari Holkeri me të cilin kanë rënë dakord për një komunikim të shpeshtuar në çdo orë. Mirëpo, menjëherë pas takimit Çoviq deklaroi se serbët do të jenë të gatshëm të mbrohen ndaj sulmeve eventuale siç kanë bërë edhe më parë gjatë Luftës së Dytë Botërore.

 

Sipas tij UNMIK-u dhe KFOR-i nuk mund të vendosin rendin dhe paqen në Mitrovicë, duke shtuar se ka dështuar koncepti i një Kosove multietnike. Çoviq theksoi se ushtria dhe policia serbe janë në gjendje që së bashku me forcat ndërkombëtare të sigurojnë serbët e Kosovës.

 

 

Të hënën diplomatët e BE-së diskutojnë për Kosovën

 

Bruksel, 19 mars 2004 - Shefat e diplomacive të Bashkimit Evropian do të takohen në hënën në Bruksel për të miratuar konkluzionet për Ballkanin Perëndimor. Në këto konkluzione vend qendror do të ketë situata më e re në Kosovë pas valës së dhunës që ndodhi ditëve të fundit, ka bërë të ditur Kristina Galak, zëdhënëse e përfaqësuesit të lartë për politikë të jashtme dhe siguri të BE, Havier Solana.

 

 

Gjermania dërgon në Kosovë edhe 600 ushtarë

 

Berlin, 19 mars 2004 - Me kërkesë të NATO-s Gjermania do të dërgojë në Kosovë edhe 600 ushtarë për të ndihmuar në qetësimin e situatës, ka bërë të ditur sot në Berlin ministri gjerman i Mbrojtjes, Peter Shtruk.

Kontigjenti i parë i trupave gjermane prej 350 ushtarëve do të niset të shtunën për në Kosovë.

 

 

Ministria e Mbrojtjes e Britanisë ka dërguar grupin prej 750 ushtarësh në Kosovë

 

Londër, 19 mars 2004 - Ministria e Mbrojtjes e Britanisë ka dërguar grupin e parë prej 750 ushtarësh të trupave britanike plotësuese në Kosovë me detryra paqeruajtëse dhe këta ushtarë kanë arritur në vend, njofton BBSCWorld.

 

Kërkesa e NATO-s për dërgimin e trupave shtesë është bërë pas shpërthimit të dhunës në Kosovë, ku u vranë 31 njerëz. Përleshjet ndërmjet serbëve dhe shqiptarëve filluan në Mitrovicën e ndarë. Ministri britanik i Mbrojtjes, Gjef Hjun, ka thënë se këto trupa dërgohen vetëm "për një periudhë të shkurtër".

 

 

Në shumicën e shkollave procesi mësimor zhvillohet normalisht, përveç në disa komuna

 

Prishtinë, 19 mars 2004 - Sipas Ministrisë së Arsimit në shumicën e shkollave të Kosovës procesi mësimor është duke u zhvilluar normalisht, përveç në disa komuna ku përkohësisht është pezulluar për shkak të gjendjes së tensionuar. Procesi mësimor është pezulluar në komunën e Mitrovicës, të Ferizajit, të Gjilanit, të Vitisë dhe Dardanës.

Ndërkaq në shkollat e larta dhe në Universitetin e Prishtinës mësimi po zhvillohet normalisht, ndonëse me një numër më të vogël studentësh.

 

 

SHBA-të punojnë me NATO-n për t'i dhënë fund dhunës në Kosovë

 

Uashington, 19 mars 2004 - Sekretari për media i Shtëpisë së Bardhë, Skot Mekllellen, gjatë shoqërimit të presidentit Bush në një vizitë njëditëshe në Kentaki ka folur në një takim të djeshëm me përfaqësues të mediave për aksionet e ndërmarra nga qeveria amerikane lidhur me dhunën e shpërthyer në Kosovë, njofton Shtëpia e Bardhë.

"Ne po punojmë me NATO-n për të transferuar atje trupa shtesë si masë paraprake. Një kompani amerikane prej 350 ushtarësh tashmë është në rrugë, si pjesë e një force të NATO-s prej 350 trupash.

 

Ne vazhdojmë t'u bëjmë thirrje të gjitha grupeve t'i japin fund dhunës dhe të përmbahen nga dhuna", ka thënë Mekllellen. Sipas njoftimeve të mediave, dhuna në Kosovë ka shpërthyer më 17 mars kur shqiptarët u përleshen me serbët për shkak të përmbytjes së dyshimtë të dy fëmijëve shqiptarë.

 

 

K.Stivens: U bëjmë thirrje qytetarëve të Kosovës të bashkëpunojnë me UNMIK-un, KFOR-in dhe SHPK-në

 

Uashington, 19 mars 2004 - Komisioni i Dhomës së Përfaqësuesve për Marrëdhëniet me Jashtë zhvilloi dje një seancë dëshmish lidhur me gjendjen në Serbi pas zgjedhjeve të dhjetorit.

 

Në diskutim dëshmuan, zëvendësndihmëse Sekretare e Shtetit për Evropën dhe Euroazinë Kethlin Stivens, e cila tha se Uashingtoni është i vendosur të bashkëpunojë me Kombet e Bashkuara, për realizimin e një të ardhmeje të sigurtë dhe demokratike për të gjithë qytetarët e Kosovës.

Zonja Stivens tha se ndihmat amerikane për Serbinë do të varen nga bashkëpunimi i Beogradit me gjykatën e Hagës.

Lidhur me Kosovën, zonja Stivens tha se Shtetet e Bashkuara po i përqëndrojnë përpjekjet në përmbushjen e 8 standarteve të caktuara nga OKB-ja, si tepër të rëndësishme për zhvillimin demokratik të Kosovës.

"Nëse kur të bëhet rishikimi i standarteve në mes të vitit 2005, ato do të vlerësohen si pozitive, atëhere bashkësia ndërkombëtare duhet të jetë e përgatitur të fillojë procesin për statusin përfundimtar të Kosovës. Nëse arritjet vlerësohen si negative,- tha zonja Stevens,- atëhere do të caktohet një afat tjetër për rishikimin e tyre."

"Ne u bëjmë thirrje të gjithë qytetarëve të Kosovës të bashkëpunojnë plotësisht me UNMIK-un, KFOR-in dhe Shërbimin Policor të Kosovës, në mënyrë që personat që kanë kryer krime të nxirren para drejtësisë dhe që të gjithë banorët e Kosovës të gëzojnë të drejtën për të jetuar në një vend të sigurtë", - tha zonja Stevens.

 

 

D.Server: Serbia nuk dëshiron t'i zgjidhë problemet, por i krijon ato vetë

 

Uashington, 19 mars 2004 - Daniel Server, drejtor i Iniciativës Ballkanike në Insitutin e Paqes tha se pas zgjedhjeve të dhjetorit, Serbia ka hyrë në një rrugë të papëlqyeshme, e cila nuk i shërben interesave të saj. Është në interesin e Serbisë, tha zoti Server, që të mbajë përgjegjësi për krimet e kryera në të kaluarën.

"Një Serbi, e cila nuk pranon të bashkëpunojë me Hagën, nuk mundet të hyjë në NAT0 dhe në Bashkimin Evropian. Një Serbi, e cila nuk pranon autoritetin e OKB-së në rajonet e banuara nga serbët e Kosovës, siç e kërkon rezolurta 1244, një Serbi e cila i kufizon serbët e Kosovës të marrin pjesë në procesin për përmbushjen e standarteve do të thotë se nuk dëshiron t'i zgjidhë problemet, por i krijon ato vetë",- tha zoti Server.

Ai tha se Shtetet e Bashkuara kanë ndjekur një politikë të butë me Serbinë, por kjo politikë, tha ai, ka dështuar. Uashingtoni, tha zoti Server, duhet ta gjykojë Serbinë jo nga qëllimet, apo premtimet, por nga veprimet e saj.

Daniel Server këto komente i bëri dje në një seancë dëshmish në Ushington.

 

 

Deklaratë e Kuvendit të Shqipërisë lidhur me ngjarjet e ditëve të fundit në Kosovë

 

Tiranë, 19 mars 2004 - Kuvendi i Shqipërisë Kuvendi në senacën e djeshme ka miratuar një deklaratë për ngjarjet në Kosovë, në të cilën thuhet.

Kuvendi i Republikës së Shqipërisë ndjek me vëmendje të plotë dhe shqetësim të thellë ngjarjet e dhunshme të ditëve të fundit në Kosovë, të cilat çuan në humbjen e jetës së dhjetra qytetarëve, në lëndimin e qindra të tjerëve dhe djegie e dëme të tjera materiale të cilat janë pasuri e Kosovës.

 

Kuvendi vlerëson se kjo situatë duhet të kapërcehet sa më parë, në emër të paqes, stabilitetit dhe bashkëpunimit, në emër të interesave të sotme dhe të së ardhmes evroatlantike të Kosovës dhe të rajonit tonë.

Kuvendi i Republikës së Shqipërisë ka besim se të gjihtë qytetarët e Kosovës do të tregojnë durimin, gjakftohtësinë vetpërmbajtje dhe respektim të të gjitha institucioneve të saj. Gjithashtu ai ka besim se Kuvendi, Presidenti dhe Qeveria e Kosovës, në bashkëpunim të ngushtë më UNMIK-un dhe KFORI-in, do të gjejnë shumë shpejt dhe do të vënë para ligjit provokatorët, organizatorët dhe shkaktarët e gjakderdhjes e të shkatërrimeve, kudo qofshin këta, brenda ose jashtë Kosovës, për ta kthyer sa më parë në normalitet jetën në vend dhe vazhdimin e proceseve evropianizuese dhe integruese në Kosovë.

 

Në këtë kuadër, Kuvendi i Republikës së Shqipërisë vlerëson interesimin dhe kontributin konkret që po japin edhe zyrtarë të lartë të strukturave qendrore evropiane dhe evroatlantike.

Njeherësh Kuvendi i Republikës së Shqipërisë shpreh besimin se edhe partitë politike kosovare dhe faktorët e tjerë shoqërore, me ndikim në jetën e qytetarëve të Kosovës, do të dëshmojnë pjekurinë e tyre dhe ndjenjën e lartë të përgjegjësisë, për përballimin me mençuri dhe gjakftohtësi të situatës së rëndë, për rikthimin e të gjithëve në punën e përbashkët për demokratizim të mëtejshëm dhe zhvillim të gjithanshëm të Kosovës shumëetnike.

Kuvendi i Republikës së Shqipëerisë shpreh bindjen se edhe të gjithë faktorët politikë e shoqërorë, i gjithë opinioni publik i vendit tonë, do të mbajnë të njëjtin qëndrim, në interes të një Kosove evro-atlantike, në interes të paqes dhe të stabilitetit në rajon.

 

 

Qeveria shqiptare bën thirrje për uljen e tensioneve në Kosovë

 

Tiranë, 19 mars 2004 - Në mbledhjen e Qeverisë shqiptare kryeministri Fatos Nano tha se veprimet në Kosovë bien ndesh me ecurinë pozitive dhe progresin e arritur në drejtim të bashkëjetesës në paqe e demokraci.

 

Ato janë veprime që pengojnë e vonojnë procesin e pakthyeshëm të përmbushjes së standarteve për përcaktimin e statusit përfundimtar dhe janë shans më shumë për të rizgjuar nacionalizmat ekstreme të cilat veçanërisht shqiptarët, tha ai, i kanë paguar shtrenjtë.

Kryeministri Nano u shpreh dhe një herë kundër qëndrimeve zyrtare të Beogradit për ndarje të Kosovës: "Ne ridënojmë me forcë çdo shfaqje apo nxitje qendrimesh që rinxjerrin dhe riaktivizojnë skenarët anakronikë të ndarjes midis komuniteteve apo njerëzve përmes parcelizimeve të Kosovës apo më gjërë në kantone, krahas dënimit të artikulimit të pretencave të paragjykuara që kërkojnë të ekstremizojnë me çdo kusht shqiptarët si elementë tërroristë a separatistë".

 

 

Edhe nata e mbrëmshe ka qenë e tensionuar në Kosovë

 

Prishtinë, 19 mars 2004 - Edhe nata e mbrëmshme në Prishtinë dhe në disa qendra të Kosovës, ishte mjaft e tensionuar.

Burimet e policisë kanë njoftuar se protestuesit në Prishtinë, janë përleshur me policinë ndërsa është raportuar edhe për të lënduar.

Ata kanë arritur që t'ia vënë zjarrin një kishe orthodokse serbe në lagjen "Taslixhe", të Prishtinës, ndërsa policia e ndihmuar nga njësitë e KFOR-it, ka arritur që t'i shpërndajë protestuesit pas përdorimt të forcës. Ajo ka përdorur gazin lotësjellës për shpërndarjen e protestuesve.

Është njoftuar se ka patur edhe demolime të disa dyqaneve përreth, ndërsa gjatë natës janë dëgjuar të shtëna armësh.

Herë pas here mbi kryeqendrën e Kosovës kanë fluturuar helikopterë të KFOR-it, kurse patrollimi i tyre mbi qiellin e Prishtinës ka zgjatur deri pas mesnatës.

Informacionet që vijnë nga terreni kanë bërë të ditur se një situatë e nderë ka mbretërurar edhe në disa qytete të tjera të Kosovës.

 

Në disa fshatëra të Ferizajt, rreth ores 22:00 (me orën lokale) të natës së kaluar, janë djegur edhe tri kisha orthodokse serbe ndërsa policia ka shpërndarë protestuesit duke ndërhyrë me gaz lotësjellës.
Burimet e policisë njoftojnë për të lënduar.

Për shkak të gjendjes së rëndë në disa qendra të Kosovës është shpallur ndalim qarkullimi.
Sipas të dhënave të policisë deri me tash numri i të vrarëve ka arritur në rreth 31 persona, ndërsa numri i të lënduarve ka kaluar shifrën prej 500 personave.

Burimet zyrtare të policisë së UNMIK-ut kanë bërë të ditur se në mesin e të lënduarve janë edhe rreth 60 policë dhe 11 ushtarë të KFOR-it.

 

 

Pauell paparalajmërim në Bagdad, vdes një gazetar nga plagët e marra

 

Bagdad, 19 mars 2004 - Sekretari amerikan i Shtetit, Kolin Pauell, ka mbërritur në një vizitë të paralajmëruar në kryeqytetin irakian, Bagdad, njofton BBCWorld. Ai ateroi në Bagdad në prag të përvjetorit të parë të fillimit të luftës për rrëzimin e Sadam Hyseinit. Me afrimin e këtij përvjetori ka pasur një përshkallëzim të dhunës.

Gjithashtu bëhet e ditur se një gazetar irakian, me emrin Ali al-Katib, që punonte për televizioonin satelitor të Dubait dhe për të cilin qe njoftuar se ishte plagosur, ka vdekur sot (e premte) në mengjes në spital.

 

 

Një marins amerikan ka vdekur nga plagët e marra në Irak

 

Bagdad, 19 mars 2004 - Një marins amerikan ka vdekur nga plagët e marra në një sulm me mortaja dy ditë më parë në Irak, ka thënë sot (e premte) zëdhënësi ushtarak amerikan, njofton Rojter. Vdekja e tij ngre në 392 numrin e ushtarëve të vrarë në aksione që kur ka filluar intervenimi amerikan në Irak para një viti.

 

 

Në një aksident trafiku në Finlandë, kanë humbur jetën 24 persona, kryesisht tineixherë

 

Helsinki, 19 mars 2004 - Njëzet e katër persona, kryesisht tinejxherë, kanë humbur jetën, kur një kamion i rëndë ka rrëshqitur në rrugën me akull në një vend malor në pjesën qendrore të Finlandës dhe pastaj është përplasur në një autobus, kanë bërë të ditur ekipet e shpëtimit, njofton Rojter. Në këtë aksident janë lënduar edhe 15 të rinj.

 

Në autobus ishin 40 udhëtarë. Shoferi i autobusit ka shpëtuar i gjallë, por i lënduar rëndë. Për këtë fatkeqësi trafiku, më të madhen që ka ndodhr ndonjëherë në Finlandë, qeveria finlandeze ka shpallur ditë zie dhe ka urdhëruar uljen e flamujve në gjysmështizë.

 

 

Trupat pakistaneze mund të kenë rrethuar zëvëndësin e Osama bin Ladenit

 

Islamabad, 19 mars 2004 - Zyrtarë të lartë pakistanezë thonë se trupat e ushtrisë mund të kenë rrethuar një anëtar të lartë të rrjetit terrorist Al-Kaida në një zonë të largët në kufi me Afganistanin.

Zyrtarët thanë se trupat, të mbështetur nga helikopterë dhe artileri e rëndë, mund të kenë rrethuar zëvëndësin e Osama bin Ladenit, Ayman al-Zavahiri.

Në një intervistë të transmetuar dje nga rrjeti televiziv CNN, presidenti pakistanez Pervez Musharaf tha se rezistenca e fortë që po bëhet nga njerëzit që po luftojnë me trupat qeveritare tregon se një person i shumë-kërkuar duhet të jetë midis ektremistëve.

 

Ky operacion përkon me një operacion të forcave të udhëhequra nga Shtetet e Bashkuara në Afganistan, për të kapur përkrahësit e ish regjimit taleban dhe luftëtarë të Al-Kaidës.

 

 

Presidentja tajvaneze është qëlluar me armë zjarri

 

Taipeh, 19 mars 2004 - Presidentja tajvaneze, Çen Shuibian, është qëlluar sot (e premte) me armë zjarri në stomak gjatë një fushate për zgjedhjet presidenciale, që mbahen të shtunën, por nuk është në gjendje kritike, njofton Rojter. Çen nuk barte jelek për mbrojtje nga plumbat dhe është dërguar shpejt në spital në qytetin jugor Tainan. Nsdërkaq, nënpresidentja Anet Lu, 59 vjeç, është qëlluar po kështu me armë zjarri në gjurin e djathtë, por gjendja e saj nuk është serioze.

 

 

Mbreti i Jordanit i ka bërë një vizitë të befasishme kryeministerit izraelit

 

Jerusalem, 19 mars 2004 - Mbreti Abdullah i Jordanit i ka bërë një vizitë të befasishme kryeministerit izraelit, Ariel Sharon, në rançin e tij për të diskutuar rrethojat dhe planet për mosangazhim me palestinezët, ka bërë të ditur sot (e premte), ka bërë të ditur një burim i lartë polirtik, njofton Rojter. Monarku jordanez ka fluturuar të enjten në Izrael me helikopter dhe ka kaluar disa orë në bisedime me Sharonin dhe pastaj është kthyer në shtëpi.

  |  KULTURË  |  HISTORI  |   POLITIKË  |  OPINIONE  |  ADRESARI  |  ARKIVI  |