Policia njofton se janë arrestuar 17 pjesëmarrës të protestës në Gjilan

Gjilan, 19 mars 2004 / TN / Ilmi MUSLIU - Komiteti për Siguri dhe Emergjencë i komunës së Gjilanit, në takimin e paraditës, ku mori pjesë edhe KFOR-i, SHPK-ja, TMK-ja, përgjegjësit e UNMIK-ut për rajon dhe komunë si dhe përfaqësues të organizatave tjera ndërkombëtare në Kosovë, vlerësoi se nata e mbrëmshme ka qenë relativisht e qetë.

Drejtoria për siguri civile dhe emergjencë është njoftuar se mbrëmë në Cërnicë ka ndodhur një shpërthim ku janë lënduar 4 serbë dhe siç tha Hazir Mustafa, pas marrjes së ndihmës së parë në spitalin e Gjilanit, ata janë lëshuar në shtëpitë e tyre.

Nga infromacionet e mëvonshme është marrë vesh se në mesin e të lënduarve nuk ka qenë asnjë fëmijë, siç është ishte raportuar në disa media, por që të gjithë kanë qenë mbi 22 vjeç e më tepër.

Duke i komentuar zhvillimet e fundit në Kosovë, të cilat kanë tërhequr vëmendjen edhe të mediave ndërkombëtare, koloneli Jonson nga kampi “Montith” në Gjilan tha se kjo që ka ndodhur në dy ditët e fundit, nuk është e mirë për Kosovën.

Koloneli i SHPK-së, Reshat Maliqi ka raportuar se mbrëmë gjatë natës ka ndodhur një sulm me granatë dore ndaj patrullës së policisë në fshatin Boston të Artanës, por nuk ka patur të lënduar. Sipas tij, pjesëtarët e SHPK-së po dëshmohen të vendosur për të rikthyer rendin dhe qetësinë, pavarësisht se atyre u mungojnë të gjitha pajimet mbrojtëse për intervenim në rrethana të këtilla.

Vetëm dje në drejtim të policëve të SHPK-së janë hudhur një kamion gurë e drunj nga protestuesit, me ç` rast janë lënduar 15 pjesëtarë, por të gjithë ata kanë thënë se janë të aftë të vazhdojnë punën, pos një police, e cila ndodhet e shtrirë në spital, tha Maliqi.

Policia e Gjilanit, tashmë ka filluar të ndërmarrë masa ndaj një numri të protestuesve dhe dje ka arrestuar 17 persona dhe ndaj tyre ka bërë fletëparaqitje për prishje të rendit dhe të qetësisë. Për mosrrespektim të ores policore, ndërkaq natën e mbrëmshme janë mbajtur në stacionin e policisë 24 qytetarë, ka thenë komandanti i stacionit të policisë në Gjilan, Izet Azizi.

“Nëse përsëriten protestat edhe sot, reagimet e policisë do të jenë më të shpejta dhe më të ashpra se deri tani” ka thenë ai.

Komiteti tha se duhet gjetur mënyrën për t`i larguar nga rruga njerëzit që po protestojnë dhe në mesin e të cilëve gjenden edhe persona të panjohur.

Ismail Kurteshi ishte i mendimit se, meqë organizimin e protestave nuk e ka marrë përsipër askush deri tani, ndoshta do të duhej që këtë rol ta marrë kryetari i komunës dhe liderët e tri subjekteve më të mëdha politike në Gjilan, të cilët duhet t`i drejtohen masës, e cila do të lejohej të grumbullohej para teatrit në një protestë të qetë dhe pas një ore të kërkojnë shpërndarjen dhe ndërprerjen e mëtutjeshme të protestave.

Kryetari Haziri tha se nuk mund të marrë mbi vete protesta të këtilla dhe nuk dëshiron të identifikohet me ata persona, të cilët gjatë dy ditëve të kaluara kanë ushtruar dhunë dhe kanë hudhur gurë kundër strukturave ndërkombëtare dhe policëve të SHPK-së.

Edhe koloneli i TMK-së, Shaban Musliu ka shprehur shqetësimin e tij për gjithë atë çka ka ndodhur në dy ditët e fundit. Nuk mund të kuptoj se kjo dhunë po derdhet mbi uniformat, që këtu janë për të krijuar rendin, ose mbi qytetarët dhe pasurinë e tyre. Ne jemi të gatshëm që bashkarisht me institucionet tona dhe ndërkombëtare të ndihmojmë në qetësimin e situatës, tha Musliu.

Komandanti i gardës së TMK, Afrim Mehmeti tha se pjesëtarët e Zonsë së 6-të janë angazhuar në ruajtjen e kishës ortodokse, sipas marrëveshjes me KFOR-in dhe SHPK-në.

Në bazë të vendimit të këtij Komiteti, sot nuk po mbahet mësimi në shkollat e mesme, ndërsa nesër nuk do të mbahet as dita e tregut, ka thenë kryeshefi ekzekutiv, Enver Muja.

Ndërsa Fadil Gashi ka kërkuar që grupi për arsim të bashkëpunojë më shumë me shkollat, sepse është fat i keq që në ballë të protestave kanë qenë edhe një numër i filloristëve. Edhe Gashi tha se në mesin e pjesëmarrësve të protestave ka njerëz të panjohur dhe të dyshimtë.

Në 72 orët e fundit, Kosova përbëhet prej dy botërave dhe ne jemi përqëndruar vetëm në njërën prej saj, ka thenë këshilltari rajonal i UNMIK-ut, Marsel Qintelan. Sipas informacioneve që kam marrë sot, një numër i serbëve nga Kosova kanë filluar përmes pikave 3 dhe 5 të kufirit të futen në Serbi dhe unë dyshoj se ata do të kthehen përsëri.

“Kemi shpenzuar shumë energji në tri-katër vitet e fundit që Gjilani të jetë qytet multietnik dhe të gjitha këto të arritura janë shkatërruar për 24 orë”, ka thenë Qintelan.

Komiteti për Siguri dhe Emergjencë ka kërkuar që të ketë një mbikëqyrje më të madhe të strukturave të sigurisë në fshatrat serbe, në vendbanimet e përziera si dhe në lagjet ku jetojnë romët në qytet, ka theksuar Lutfi Haziri.

KFOR-i i jep përgjegjësi TMK-së për mbrojtjen e kishës ortodokse dhe të shtëpive serbe në këtë pjesë, që mund të jenë cak i sulmit, tha kolonlei Jonson, i cili e vlerëson këtë si një mundësi për TMK-në për të dëshmuar tolerancën ndëretnike.

Komiteti do të takohet edhe në mbrëmje për të vlerësuar gjendjen.

Përndryshe, sot është vërejtur një numër më i madh i KFOR-it dhe policisë në qytet dhe deri në orët e pasditës nuk ka patur protesta, me gjithë lëvizjet e shtuara të njerëzve që kanë mundur të vërehen gjatë ditës.