Akuzat për plagjiat e godasin Universitetin e Prishtinës

Në 13 vjetët e fundit nga UP janë "nxjerrë" 201 doktorë shkence dhe 414 magjistra

19 mars 2004 / TN

"Më problematikët janë doktorët dhe magjistrat e pas vitit 1991, kur nuk ka pasur kontroll të jashtëm, kurse gjërat kanë degjeneruar totalisht pas luftës", tha Enver Hasani, duke shtuar se fitimi i ndershëm i titujve pas vitit 1999 është përjashtim i rrallë

Gjergj Filipaj / Botuar në: KOHA ditore dhe Tjetërqysh (faqe e studentëve të UP)

Prishtinë, mars 2004 - Plagjiatura dhe vjedhja e mendimeve origjinale shkencore e kanë mbërthyer Universitetin e Prishtinës, në të cilin institucion prej vitit 1990 e deri në fund të vitit 2003 janë prodhuar jo më pak se 201 doktorë shkence dhe 414 magjistra, pa ndonjë kontroll mbi mënyrën e dhënies së titujve shkencorë.

Mesatarisht për një vit UP ka nxjerrë 15 doktorë dhe 31 magjistra. Në vitin 1990 në krejt UP-në kanë doktoruar vetëm 2 kandidatë kurse 13 vjet më pas në UP kanë doktoruar 40 kandidatë.

Fakulteti Juridik bashkë me atë Ekonomik janë ndër fakultetet më të prekura nga fenomeni i akuzave për plagjiate dhe mospërdorim të drejtë të citateve në shkrimin e doktoraturave, sidomos në periudhën e pasluftës, kur edhe është dhënë numri më i lartë i doktoraturave.

"Doktorët e pas vitit 1999 janë më problematikët", thotë ligjeruesi Enver Hasani

Profesori i së drejtës ndërkombëtare Hasani, pranon se fenomeni i plagjiaturave është tej mase i përhapur në Universitetin e Prishtinës.

"Ka pasur dhe ka mjaft plagjiate, por tani besoj se ka marrë përmasa dramatike, pas luftës", tha ai, duke shtuar se pas luftës, ndryshe nga para saj, për të kamufluar plagjiatin kandidatët kanë përfshirë nëpër komisione edhe disa të huaj.

Ai tha se gjatë bisedave me kolegë ka konstatuar një gjendje të mjerë në Fakultetin Juridik dhe atë Ekonomik. "Më problematikët janë doktorët dhe magjistrat e pas vitit 1991, kur nuk ka pasur kontroll të jashtëm, kurse gjërat kanë degjeneruar totalisht pas luftës", tha ai, duke shtuar se fitimi i ndershëm i titujve pas vitit 1999 është përjashtim i rrallë.

"Të huajt që janë në komisione as që e imagjinojnë se titujt akademikë në UP mirren në mënyrë të pandershme dhe nuk e dinë se janë futur në makinacionet administrative të vendorëve, të cilat kanë shërbyer si paravan për mbulesë të plagjiaturave dhe mënyrave të tjera të fitimeve të pandershme të titujve shkencorë", tha Hasani, profesor i së drejtës ndërkombëtare.

Edhe pas një viti Fakulteti Juridik nuk krijon komision për shqyrtimin e akuzave për plagjiat

Në këtë fakultet që një vit vazhdon të jetë në qendër të vëmendjes magjistrimi i mr.Naser R. Ademit, dekanit aktual të Fakultetit Juridik në Universitetin e Tetovës. Rasti i të cilit është duke u diskutuar nga Këshilli Mësimor-Shkencor i Fakultetit Juridik në Prishtinë që nga maji i vitit 2003. Ankesat në magjistraturën e Ademit kanë mberritur deri tek Ministria e Arsimit, Shkencës dhe Teknologjisë (MASHT).

"Kemi informacione se një pjesë e punimit të magjistraturës së Naser Ademit është botuar pas disa kohe si punim autorial i njërit nga tre anëtarët e komisionit të mbrojtjes së punimit të magjistraturës të kandidatit Ademi", thuhet në letrën e dërguar nga MASHT Universitetit të Prishtinës ku kërkohen që të sqarohen akuzat e bëra.

Në vitin 2000 Ademi ka magjistruar me temën "Vepra penale e mjekimit të pandërgjegjshëm të të sëmuarit", ndërsa dy vjet më vonë prof.dr.Fadil Batalli e ka botuar monografinë e tij "Probleme deontologjike te shkeljet mjekësore". Këto dy botime kanë afro 18 faqe identike, për të cilat Batalli thotë se pjesët e njëjta janë vepër e tij, kurse Naser Ademi mbrohet duke thënë se punimi është punë origjinale e shkruar nga ai. Batalli ka qenë anëtar i komisionit para të cilit ka magjistruar Ademi.

Kapitujt "Marrëdhëniet mjek-mjek punonjës tjerë shëndetësorë", "Koncepti etiko-juridik i ekspertit", "Koncepti etiko-juridik i gabimit dhe fatëkeqësisë mjekësore", "Aspekti etiko-juridik i fshetësisë mjekësore", janë disa nga pjesët që janë identike fjalë për fjalë në të dy botimet.

Në magjistraturën e tij Naser Ademi në faqen 110 ku ndodhet literatura e përdorur e ka shënuar librin "Mjekësia ligjore" të autorit Batalli, ndërkohë që në asnjë vend nuk ka shënuar se cilën pjesë e ka cituar, gjë që është qartësuar në përdorimin e librave tjerë, ku veçmas emrit të autorit janë shënuar edhe faqet të cilat janë cituar.

"Ai nuk më ka cituar mua edhepse ka përdorur veprën time", thotë profesor Batalli

"Unë ia kam dhënë shënimet e mia në dorëshkrim të monografisë që e kam botuar dhe kam menduar se më ka cituar dhe është kryer puna, atëherë i pata bërë disa pyetje lidhur me veprën e tij por nuk ia kam parë magjistraturën", tha profesor Batalli duke shtuar se "ai nuk më ka cituar mua edhepse ka përdorur veprën time". Batalli tregon se ai ka vetëm pjesë të monografisë por jo edhe rastet e studimit.

Poashtu ai pohoi se ka reaguar duke bërë një ankesë me shkrim, të cilën e ka parë "Koha Ditore", ku janë të shënuara vërejtjet lidhur me shënimet se ku janë marrë të dhënat. "Kur ma ka sjellë dorëshkrimin, ia kam dhënë vërejtjet", thotë Fadil Batalli, duke shtuar se monografinë e ka shkruar duke e zgjerurar një kapitull të librit "Mjekësia ligjore" të botuar në vitin 1987.

Ndërsa mr.Naser Ademi, dekan i Fakultetit Juridik në Tetovë, tregon se "unë po të tregoj se Fadil Batalli nuk ka temë, ai ka botuar një tekst pas 1 a 2 viti pasiqë që unë e kam mbrojtur temën time të magjistraturës" dhe shtoi se "unë para tij e kam bërë, sigurisht që ai e ka marrë prej meje se unë jam autori i parë". Ademi tha se profesor Batalli kur ka qenë anëtar i komisionit nuk ka reaguar fare, kurse tani e bën këtë. "E kam cituar nga libri dhe jo nga monografia", tha Ademi.

Ndërsa një ligjerues i Fakultetit Juridik thotë se askush nuk guxon ta akuzojë Naser Ademin për plagjiat ngase "ai i ka ata të UÇK që i rrijnë afër, është shumë rrezik kjo punë, asnjëri nga profesorët nuk ka pranuar që të reagoj atëherë, as dekani, askush nuk ka guxuar të flasë për rastin e tij në këshill", thotë ai duke sqaruar rrthanat në të cilat ka magjistruar Ademi.

Ky profesor nuk pranon të flasë me emër ngase frikësohet nga pasojat që mund ti ketë nga ana e Naser Ademit. Ai pohon se në vijë zyrtare është munduar të zbulojë diçka. "Për shkak të frikës është bërë kjo, këtu është problemi se ia ka punuar Fadil Batalli veprën atij dhe unë e kam pa njeriun duke e shtypur dhe kur e kam pyetur, ai person më ka thënë se është duke shtypur punimin seminarik të profesor Fadil Batallit që ka për ta lexuar në një simpozium", sqaroi ky ligjerues, duke shtuar se "se ky material është dorëzuar si punim magjistrature në Fakultetin Juridik". Sipas këtij profesori "vetë Fadili ka thënë se ky ma ka marrë mua, ai i ka premtuar Fadilit se do ta kompensojë".

Ai tha se në magjistraturën e Ademit ka hasur në pjesë identike me monografinë e prof.dr.Fadil Batallit. "Naser Ademi po përiqet që të doktorojë në Tiranë me një vepër të përkthyer të Vlado Kambovskit", tha ai. Ndërsa prof.dr.Beqir Sadikaj, dekan i Fakultetit Juridik në Prishtinë, thotë se e ka marrë një shkresë në të cilën insistohet që të zbardhet çeshtja se a ka qenë e rregullt magjistratura e Naser Ademit. "Këtu nuk ka çeshtje procedurale, por nga ana tjetër është ajo se a ka kopjuar kandidati në shkrimin e magjistraturës", tregon Sadikaj, duke shtuar se procedura ende ka mbetur e hapur. Dekani Sadikaj that se se duhet të krijohet komisioni, gjë që sipas tij ende nuk ka ndodhur, edhe pse kjo çeshtje është duke u zvarritur që nga viti 2003.

Akuzat për plagjiaturë shkëmbehen edhe në Fakultetin Ekonomik

Akuza dhe kundër akuza për vjedhje të mendimeve dhe gjetjeve intelektuale në veprat e doktoravë të Universitetit të Prishtinë janë duke u bërë edhe në Fakultetin Ekonomik. Prof.dr.Mejdi Bekteshi pohon se ligjeruesi prof.dr.Musa Limani është një ndër disa që veprat i kanë plotë me plagjiate. "Librat flasin vetë", thotë Bekteshi duke treguar librin "Makroekonomia aplikative", të botuar në vitin 2003 nga Limani, ku sipas tij, në faqet 51-52 ka pjesë nga faqet 94-95-96 nga libri "Ekonomska politika", të një grupi të autorëve kroatë. "Ka plotë pjesë tjera të pacituara në librin 'Makroekonomia aplikative'", pohon Bekteshi. Sipas tij Limani këtë libër e ka në bibliografi por askund nuk ka fusnota se cilat pjesë janë mendime të tija dhe cilat janë citate.

Bekteshi thotë se Limani e ka ftuar në një debat publik në KTV për të sqaruar këtë çesthje, por ky i fundit ka refuzuar. Ndërsa prof.dr.Musa Limani ligjerues në Fakultetin Ekonomik i kthen fjalët e kolegut prof.dr.Mejdi Bekteshi duke thënë se vetë Bekteshi është plagjiator. "Unë si mentor pasi e kam lexuar punimin i kam bërë vërejtjet që kanë pasur të bëjnë me atë se nuk ka ditur të citoj pastaj ka edhe plotë plagjiat të literaturës profesionale, thuajse i ka ba të gjitha vetë", tha Limani duke theksuar se më pas Bekteshi ka vajtur në Rektorat ku pastaj është shkelur procedura standarde e doktorimit. "Ai ka doktoruar pa mentor, dhe këtë e ka bërë përmes rektoratit, çka është shkelje e mbrojtjes së doktoraturës", tha Musa Limani.

Në Rektorat pohojnë se plagjiatura është shkelje e rëndë

Destan Halimi, sekretar i Universitetit të Prishtinës pranon se në Rektorat ka mbërritur një letër ankese për magjistraturën e NAser Ademit, e cila është dërguar nga Ministria e Arsimit. "Letra, siç shkruan në të, ka ardhur nga Fakulteti Juridik, ku në rradhë të parë janë bërë akuzat", tha Halimi. Ai thotë se nëse konstatohet plagjiatura, atëherë kjo është shkelje e rëndë. "Nëse një profesor e ka të kopjuar faqe për faqe krejt ose një pjesë, atëherë kjo duhet hulumtuar", tha Destan Halimi.

Kërkesa, sipas tij, duhet të bëhet në fakultetin përkatës, pastaj duheh hetuar provat mbi pjesën e diskutueshme. "Fakulteti është i obliguar të nisë çeshtjen", këmbëngul ai. Fenomeni i kopjimit, moscitimit të duhur dhe i plagjiaturës sanksionohet në nenin 61 të Statutit të Përkoshëm të Universitetit të Prishtinës. "Titujt akademik do të jepen sipas dispozitave të këtij statuti kurse akademikët mund të privohen nga ata tituj nëse bordi me rekomandimin e senatit dhe pasi ta ketë dëgjuar individin konsideron se ka arsye të forta për një veprim të tillë", thuhet në këtë nen.

Statuti i Përkohshëm i UP-së si shkelje të rëndë nënkupton mashtrimin ose hilenë në vlerësimin e provimit ose gradës duke përfshirë plagjiatin, shkeljen e së drejtës së autorit ose diçka tjetër joetike gjatë përgatitjes së disertacionit ose ndonjë punimi tjetër. Gjatë vitit 2003 në lëminë e historisë pranë Universitetit të Prishtinës kanë magjistruar edhe dy ministra të Qeverisë së Kosovës. Et'hem Çeku (AAK) ministër i Ambientit dhe planifikimit Hapësinor ka magjistruar me temën "Mendimi politik i lëvizjes ilegale në Kosovë 1945-1981, kurse Jakup Krasniqi (PDK) ka magjistruar me temën "Lëvizja politike dhe qëndresa e armatosur në Kosovë (1991-1999).


Faqe e studentëve të Universitetit të Prishtinës
http://www.tjeterqysh.com/skandaloze.html