|  KULTURË  |  HISTORI  |   POLITIKË  |  OPINIONE  |  ADRESARI  |  ARKIVI  | 

Apel i Myftiut të Kosovës mr. Naim Tërnava i lexuar në xhamitë e Kosovës në hytben e namazit të xhumasë

Prishtinë 19 mars 2004 / TN / BIK

Kryesia e Bashkësisë Islame të Kosovës, e vetëdijshme për situatën e nderë dhe të tendosur që po mbretëron këto ditë anekënd Kosovës, me pasojat mbi 31 të vrarë e disa qindra të tjerë të plagosur, apelon te popullata e gjerë që të përmbahet nga çdo akt i dhunës që do ta destabilizonte edhe më situatën në rajon.

Nisur nga këto fakte dhe me qëllim të ruajtjes së qetësisë e të paqes, me qëllim të mosderdhjes së gjakut edhe më tej, sepse edhe ashtu ky popull ka derdhur mjaft gjak, ftojmë qytetarët tanë për gjakftohtësi dhe të angazhohen tej mundësive të tyre për të kontribuar në stabilizimin e gjendjes.

Kryesia e Bashkësisë Islame të Kosovës kërkon nga organet kompetente të rendit, në veçanti nga policia e UNMIK-ut dhe KFOR-i, që të jenë në nivel të detyrës, të kryejnë misionin e tyre–t’u ofrojnë qytetarëve siguri dhe qetësi në tërë vendin dhe të apelojmë tek ata që të gjithë qytetarët t’i trajtojnë në mënyrë të njëjtë dhe të barabartë. Kërkojmë, gjithashtu, nga Policia e UNMIK-ut, KFOR-i dhe SHPK-ja që sa më parë të ndërmarrin masat e duhura për lirimin dhe zhbllokimin e menjëhershëm të të gjitha rrugëve të Kosovës

Kryesia e Bashkësisë Islame të Kosovës kërkon nga institucionet tona më të larta: nga Presidenti, nga Qeveria dhe nga Kuvendi që në këto momente të vështira e të rënda të jenë maksimalisht vigjilente.

Kryesia e Bashkësisë Islame të Kosovës apelon tek të gjithë qytetarët që të mos konfrontohen më KFOR-in dhe policinë e UNMIK-ut, në mënyrë që nga aleatët tanë të mos krijojmë armiq, sepse konfrontimi me Bashkësinë Ndërkombatëre, do të thoshte destabilizim i vazhdueshëm i gjendjes, dhe largim nga synimet e objektivat tanë.

Kryesia e Bashkësisë Islame të Kosovës po ashtu dënon djegien e xhamive nëpër disa qytete të Serbisë, ashu siç dënon ashpër edhe djegien e kishave, të objekteve të tjera fetare dhe pronave private në Kosovë.

Kryesia e Bashkësisë Islame të Kosovës u shpreh ngushëllimet më të thella familjeve të viktimave të pafajshme për humbjen e më të dashurve të tyre, duke e lutur Allahun e Plotfuqishëm që ata t’i ketë mëshiruar me Mëshirën e Tij, kurse të plagosurve dhe të lënduarve u dëshirojmë shërim sa më të shpejtë.