Deklaratë e PReK-ut lidhur me ngjarjet e fundit tragjike në Kosovë

OPINIONE

Deklaratë e PReK-ut lidhur me ngjarjet e fundit tragjike në Kosovë

Prishtinë, 18 mars 2004 / TN - Partia e Re e Kosovës sot ka lëshuar një deklaratë për opinionin e gjërë lidhur me ngjarjet e fundit në Kosovë. Në deklaratë thuhet:

Lidhur me zhvillimet tragjike në vendin tonë, që filluan pas mbytjes së tre fëmijve në fshatin Çabër nga serbët fqinj dhe vazhduan me vrasjen e 22 personave dhe plagosjen e lëndimin e mbi 600 qytetarëve, Partia e Re e Kosovës familjeve dhe të afërmëve të viktimave u shpreh ngushëllimet më të thella. Ajo konstaton me keqardhje degradimin e klasës politike dhe institucioneve të Kosovës.

Ata janë duke e humbur me të madhe besueshmërinë dhe nuk e dhanë provimin në mbrojtjen e interesave të të gjithë qytetarëve të Kosovës. Ata politikisht nuk janë kurrkund dhe përveç demagogjisë dhe deklaratave në tym që tani i bëjnë, nuk kanë asgjë në dorë.

Partia e Re e Kosovës është e bindur se me këtë klasë politike pasive dhe të papërgjegjshme dhe me injorimin e të drejtave demokratike të njerëzve në Kosovë nga ana e UNMIK-ut, ky vend nuk mund të ecën përpara. Këtë e shprehin edhe qytetarët e Kosovës, duke kërkuar tani përfundimisht një perspektivë të qartë për vendin tonë. Qytetarët e Kosovës meritojnë dhe duan një qeverisje më të mirë.

Partia e Re e Kosovës përsërit konstatimin se UNMIK-u është i ngarkuar me mandatin edhe për sigurinë në Kosovë. Ky mandat nuk është ushtruar asnjëherë plotësisht dhe as në tërë territorin e Kosovës, por është ndarë me shtetin serb. Është e padurueshme, që një pjesë e Kosovës dhe Mitrovica e ndarë të qeverisen faktikisht nga Beogradi, ndërsa statusi i ardhshëm i Kosovës të mbetet peng i zhvillimeve në Serbi dhe negociatave obstruktive me Beogradin.

UNMIK-u, në kundërshtim me mandatin e qartë të tij, për së tepërmi toleroi strukturat serbe dhe formacionet kriminale serbe të yshtura nga Beogradi. Nga ana tjetër, disa elemente brenda UNMIK-ut kishin prirje që përgjegjësinë gjithnjë ta kërkonin nga pala shqiptare dhe bënin politikë proserbe në Kosovë.

Partia e Re e Kosovës insiston që urgjentisht të ndalet dhuna sepse ajo është murtaja e Kosovës. Kosova ka nevojë urgjente për normalitet dhe problemet nuk mund të zgjidhen në rrugë, as me dhunë. Partia e Re e Kosovës kërkon nga z. Holkeri që të rivejë rend në mënyrë të balansuar dhe adekuate.

Me këtë rast PReK-u dënon me termat më të ashpra rrënimet e kishave ortodokse, që fatkeqësisht nga turma u identifikuan me politikën retrograde serbe, si edhe konfrontimet me ndërkombëtarët dhe trupat e KFOR-it.

Partia e Re e Kosovës përkujton qendrat e vendosjes se një shtet i këtillë si Serbia, që po trashëgon dhe ndjek politikën e Millosheviqit dhe që ende nuk po denacifikohet, nuk bën dhe nuk mund të jetë partner i bashkësisë ndërkombëtare që të pyetet për fatin e mëtejmë të Kosovës dhe të gjithë qytetarëve të saj sepse, pas veprimeve gjenocidale në Kosovë, atë të drejtë ajo përfundimisht e ka humbur.

Fati i Kosovës do të vendoset me vullnetin e popullit të saj dhe me ndihmën e bashkësisë ndërkombëtare. Partia e Re e Kosovës konsideron se çdo zvarritje në organizimin e shtetësisë së Kosovës është e dëmshme dhe komplikon zhvillimet në Kosovë dhe rajon." përfundon deklarata e PReK-ut.