Përmbajtja:

• Debati në Kuvend: Nuk ka zgjidhje tjetër pos pavarësisë së Kosovës

• NATO ka dërguar 100 deri në 150 trupa shtesë në Kosovë dhe mohon të jetë vrarë një ushtar i KFOR-it

• Sot në Kosovë situata duket më e qetë, ndërkaq KFOR-i, policia e UNMIK-ut po e mbajnë në kontroll

• Në përplasjet e djeshme ndërmjet serbëve dhe shqiptarëve janë vrarë 22 njerëz

• Drejtorati i Emergjencës të Prishtinës thotë se lagjja Ulpiana mbrëmë ka qenë në shenjestër të protestuesve

• Mbi 16 të vrarë e me qindra të plagosur është bilanci tragjik në protestat e djeshme në Kosovë

• Zyrtarët e NATO-s mendojnë të dërgojnë përforcime paqeruajtëse në Kosovë

• Në shkollat e Kosovës mësimi po zhvillohet, përveç në Mitrovicë

• Ministria e Arsimit thotë se sot duhet të vazhdojë puna normale në të gjitha institucionet arsimore

• UNMIK-u, institucionet e Kosovës dhe diplomatët kërkuan të merren të gjitha masat për zbulimin e aktorëve të akteve të dhunës

• Departamenti amerikan i Shtetit dënon dhunën në Kosovë

• Tirana zyrtare thotë se situata e krijuar bie ndesh me frymën e përgjithshme të zhvillimeve në Kosovë

• Novicki shpreh pikëllimin dhe shqetësimin e tij pas ngjarjeve të fundit në Kosovë

• Zyra e SHBA-ve dënon dhunën ndëretnike në Kosovë

• Mbrëmë është sulmuar me gurë Ambasada amerikane në Beograd

• Beogradi shpreh gatishmërinë që ushtria serbo-malazez të angazhohet në stabilizimin e situatës në Kosovë

• Ushtria serbe në gjendje gatishmërie në kufi me Kosovën

• Kofi Anan u bën thirrje të gjitha palëve që t'i japin menjëherë fund dhunës

• Kreu i NATO-së tha se sulmet e djeshme në Kosovë janë mizore dhe duhet të ndalen menjëherë

• Gjatë ditës së djeshme protesta pati anembanë Kosovës

• Në Mitrovicë u plagosën 11 pjesëtarë të KFOR-it dhe ka vdekur një polic i KFOR-it francez

• Këshilli i Evropës ka shprehur shokimin për shkak të humbjes së jetërave të njerëzve të pafajshëm

• Gjenerali Ksavier Mishel është shprehur i shqetësuar me sasinë e madhe të armatimit

• Sipas zëdhënësit Çapell, në Kosovë ekziston një shkallë koordinimi në shpërthimin e dhunës

• Njëzet e shtatë të vdekur në Irak

• Përleshje në kufirin pakistanez

• Në Irak është vrarë një marins amerikan dhe 3 të tjerë janë plagosur

• Policia spanjolle ka arrestuar edhe 4 të dyshimtë në lidhje me sulmet me bombë në Madrid

• Në shpërthimin në qendër të Bagdadit, janë vrarë 6 dhe jo 27

Debati në Kuvend: Nuk ka zgjidhje tjetër pos pavarësisë së Kosovës

 

Prishtinë, 18 mars 2004 - Kuvendi i Kosovës është mbledhur sot paradite dhe ka diskutuar për gjendjen aktuale në Kosovë, pas protestave të djeshme anembanë vendit. Në fillim, kryeparlamentari Nexhat Daci, në emër të parlamentit u shprehu ngushëllime të gjitha familjeve të të vrarëve në dy ditët e fundit në Kosovë.

 

Ai shprehu qëndrimin unik të Kubendi që rinia dhe qytetarët e Kosovës duhet të jenë në punët e rregulta e jo në rrugë dhe në protesta në mënyrë që institucionet e Kosovës, subjektet politike t'i kryejnë përgjegjësitë në bashkëpunim me bashkësinë ndërkombëtare dhe përgjegjësit të japin përgjegjësitë e veta.

Në emër të parlamenntit, Daci konstatoi se të vrarët ishin për demokraci dhe për liri. Në emër të respektit ndaj tyre, duke shpresuar që te jenë viktimat e fundit në Kosovë. Kosova t'i kthehet punëve të përditshme, ndërtimit të shtetësisë së saj, tha Daci duke i ftuar deputetët që me një minutë heshtje të nderojnë të gjithë të vrarët gjatë tri ditëve të fundit.

Daci tha se është arritur koncesusi që parlameanti t'i përkushtohet me seriozitet normalizimit të gjendjes në Kosovë.

Shefi i Grupit parlamentar të LDK-së, Sabri Hamiti, tha se ditën e djeshme ka ndodhur ngjarje tronditëse në Kosovë, duke filluar në Mitrovicë e duke krijuar një hartë thuajse në gjithë Kosovën. Për protestën e djeshme Sabri Hamiti tha se në zhvillimin e saj dramatik ka kaluar nga protestat e qeta në konfrontime për të pasur si pasojë vdekjen e dhjetra njerëzve dhe plagosjen me qindra.

 

Kjo, tha ai, është një situatë prekoupuese për të gjithë qytetarët dhe institucionet e Kosovës. "Ne mendojmë që protestat sidomos në variantin e zhvillimeve të tyre të egërsuara dramatike që përfundojnë me dhunë, nuk ofrojnë zgjidhje politike në Kosovë", tha duke shtuar se "ashiqare artikulojnë probleme, të cilat janë të natyrës së fortë dhe shumë të rëndësishme për Kosovën".

"Meqë kemi mendimin që çështjet e mëdha nuk mund të zgjidhen me këtë formë, ne mendojmë se kjo natyrë e protestave të mos vazhdojë dhe mendojmë që tensionet të ulen dhe idetë të kthehen në formën e realizimit të tyre në institucione", tha Hamiti. Ai theksoi se kjo është sprovë për institucionet, e cila jep një mësim dhe që institucionet ta shtrojnë statusin demokratik. Institucionet vendore dhe ato ndërkombëtare, theksoi ai, janë vënë në pozitën që ta redifinojnë raportin mes tyre.

 

Ai tha se institucionet e Kosovës në të gjitha fushat që u përkasin të marrin përgjegjësitë veta. "Ne ritheksojmë edhe njeherë që, ky vend që ka kaluar nëpër përgjakje e viktmizime të pafund, nuk ka zgjidhje tjetër pos pavarësisë së vet. Nuk do të ketë zgjidhje demokratke përderisa të pavarësohet", tha në fund të fjalës së tij deputeti Sabri Hamiti.

Arsim Bajrami në emër të PDK-së tha se ngjarjet janë pasojë e shumë problemeve të akumuluara tashmë në Kosovë. Duke e kuptuar revoltën e arsyeshme të qytetarëve të Kosovës, ai tha se PDK gjykon aktet të cilat cënojnë sigurinë e përgjithshme. Ai tha se UNMIK-u nuk ka marrë masa të duhura për parandalimin e shkallëzimit të gjendjes. Por njëherit apeloi te qytetarët që të kthehen në shtëpitë e tyre që të mos tensionet më tutje situata.

Ramush Haradinaj, në emër të AKK, ngjarjet e djeshme i cilsoi si revoltë apo si përgjigje ndaj problemeve të shumta që po ndodhin në Kosovë. Ai tha se kjo ishte revoltë kundër statuskuosë, duke pyetur nëse institucionet janë të gatshme t'i kryejnë obligimet e tyre dhe se, sipas tij, disa gjëra po zhagiten.

Parlamenti edhe sot i ndërpreu punimet për të vazhduar një ditë tjetër me procedurë të rregullt.

 

 

NATO ka dërguar 100 deri në 150 trupa shtesë në Kosovë dhe mohon të jetë vrarë një ushtar i KFOR-it

 

Bruksel, 18 mars 2004 - NATO ka deklaruar sot (e enjte) se ka dërguar 100 deri në 150 trupa shtesë në Kosovë nga Bosnja, për të ndihmuar të shuhet dhuna etnike dhe ka vënë në gjendje gatishmërie edhe qindra të tjerë. NATO ka konfirmuar se të merkurën janë vrarë 22 njerëz dhe përleshjet ndërmjet serbëve dhe shqiptarëve ishin më të ashprat që kur NATO me luftën ajrore bëri të largohen trupat jugosllave nga Kosova.

Zëdhënësi i selisë së NATO-s ka thënë se një kompani amerikane prej 100 deri në 150 trupa tashmë është në rrugë për në Kosovën e protektuar nga Kombet e Bashkuara dhe dy kompani të tjera, njëra e udhëhequr nga Britania, kurse tjetra nga Italia, do të jenë të gatshme të shkojnë nëse trazirat përshkallëzohen mëtej.

Aktualisht NATO ka 17 mijë trupa paqeruajtëse në Kosovë dhe 12 mijë sosh në Bosnjë. NATO mohon raportet se një ushtar i KFOR-it është vrarë, ndonëse të pakten 12 ushtarë janë lënduar. "Unë shpreh keqardhjen e thellë për sulmet në ushtarët e KFOR-it, që operonin me rrezik të madh personal për të ndalur dhunën dhe për të vënë rendin dhe ligjin", ka thënë Sekretari i përgjithshëm i NATO-s gjenerali Jap de Hop Shefer në një deklaratë të dhënë dje vonë. "Këto sulme janë mizore dhe duhet të ndalen menjëherë", ka thënë Shefer.

 

 

Sot në Kosovë situata duket më e qetë, ndërkaq KFOR-i, policia e UNMIK-ut po e mbajnë në kontroll

 

Prishtinë, 18 mars 2004 - Gjatë ditës së sotme situata në Kosovë duket më e qetë, ndërkaq KFOR-i, policia e UNMIK-ut dhe SHPK-ja po orvatet ta mbajnë nën kontroll gjendjen e sigurisë. Në disa rajone të Kosovës është shpallur gjendja e jashtëzakonshme, për hir të sigurisë së qytetarëve.

 

Njoftohet se gjatë protestave të djeshme janë vrarë 22 persona dhe ka rreth 500 të tjerë të plagosur, 22 prej tyre kanë lëndime serioze. Sipas zëdhënësit të SHPK-së Refki Morina, 14 pjesëtarë të SHPK-së janë të lënduar, 25 të policisë së UNMIK-ut, një me lëndime serioze.

Sipas Morinës situata në përgjithësi është nën kontroll të vazhdueshëm të KFOR-it, policisë ndërkombëtare dhe SHPK-së. Ai tha se kufiri me Serbinë e Malin e Zi është i mbyllur, ndërkaq me Shqipërinë e Maqedoninë është i hapur.

 

 

Në përplasjet e djeshme ndërmjet serbëve dhe shqiptarëve janë vrarë 22 njerëz

 

Prishtinë, 18 mars 2004 - Në përplasjet e djeshme në rrugë ndërmjet serbëve dhe shqiptarëve janë vrarë 22 njerëz dhe janë plagosur rreth 500 sish, ka thënë zëdhënësja e policisë së UNMIK-ut, Anxhela Xhozef.

 

Ajo tha se s'ka njoftime për trazira të reja sot paradite, por pasojat e dhunës së djeshme ende janë të dukshme. Gjatë përleshjeve janë lënduar 61 policë, ndër të cilët edhe 40 pjesëtarë të njësitit special të policisë së UNMIK-ut, ka thënë Anxhela Xhozef.

 

 

Drejtorati i Emergjencës të Prishtinës thotë se lagjja Ulpiana mbrëmë ka qenë në shenjestër të protestuesve

 

Prishtine, 18 mars 2004 - Bordi i Drejtorëve i KK të Prishtinës në mbledhjen e vet të jashtëzakonshme të cilën e kryesoi kryeshefi i Ekzekutivit, Sami Hamiti, ka vlerësuar nga të gjitha aspektet situaten e krijuar me rastin e shpërthimit të protestave të qytetarëve në komunën e Prishtinës.

Drejtori i Drejtoratit për Emergjence dhe Siguri Zaim Berisha tha se ky drejtorat së bashku me shtabin e krizës ka qenë i angazhuar gjatë gjithë kohës duke përcjellë të gjitha ngjarjet në territorin e komunës së Prishtinës.

 

Sipas rapoprtit të hartuar nga ky drejtorat reth 12 automjete të UNMIK-ut janë djegur nga protestuesit. Lagjja "Ulpiana" ka qenë në shenjester të protestuesve për shkak se në këtë pjesë të qytetit jeton një numër i caktuar i qytetarëve serbë si dhe disa pjesëtarë të UNMIK-ut.

Sipas të dhënave nga terreni në teritorin e komunës së Prishtinës jane vrarë mbrëmë 4 qytetarë prej tyre 3 në Çagllavicë dhe një në qytet.

Shërbimi i Emergjencës gjatë gjithë kohës ka qenë në nivel të lartë të detyres dhe konform situatës janë angazhuar 12 automjete dhe 12 ekipe mjekësore.

Rrustem Buzhala, drejtor i Drejtoratit të Arsimit tha se numri i nxënësve sot është më i vogel në shkolla për shkak të ndjenjës së pasigurise, por mësimi po zhvillohet në të gjitha shkollat e kesaj komune.

Bordi i Drejtorëve vendosi që t'u japë ndihme materiale të gjitha familjeve që kanë humbur familjarët e tyre në trazirat e djeshme.

 

 

Mbi 16 të vrarë e me qindra të plagosur është bilanci tragjik në protestat e djeshme në Kosovë

 

Prishtinë, 18 mars 2004 - Mbi 16 të vrarë e me qindra të plagosur është bilanci tragjik në protestat e djeshme në Kosovë. Në morgun e Prishtinës ndodhen pesë kufoma të paidentifikuara, ndërkaq në Qendrën Klinike Universitare janë paraqitur 154 persona të lënduar, 55 prej tyre të hospitalizuar.

 

Në Mitrovicë ka 293 të lënduar dhe gjashtë të vrarë, në Çagllavicë tre të vrarë, në Gjilan 31 të lënduar, një i vrarë, në Prizren 18 të lënduar, në Pejë një i vrarë dhe 19 të lënduar, në Vushtrri nëntë të lënduar, në Ferizaj 46 të lënduar, një i vrarë dhe dy të transferuar nga Lypjani, në Lypjan tre të lënduar dhe tre të vrarë, në Fushë Kosovë një i vdekur dhe dy të lënduar.

 

Në Prishtinë mbrëmë është vrarë një person.

 

 

Zyrtarët e NATO-s mendojnë të dërgojnë përforcime paqeruajtëse në Kosovë

 

Bruksel, 18 mars 2004 - Zyrtarët e NATO-s mendojnë të dërgojnë përforcime paqeruajtëse në Kosovë pas shpërthimit të përleshjeve më të ashpra etnike brenda pesë vjetëve të fundit. Trazirat filluan në qytetin e ndarë Mitrovicë, ku serbët e shqiptarët kanë shkëmbyer zjarr amësh dhe granatash dhe u vranë disa njerëz.

 

Pas përhapjes së luftimeve në qytetet e tjera, u raportua për të pakten 18 njerëz të vrarë. Përhapja e lajmeve provokoi protestat në Beograd dhe në qytetet e tjera të Serbisë, njofton BBCWorld.

 

 

Në shkollat e Kosovës mësimi po zhvillohet, përveç në Mitrovicë

 

Prishtinë, 18 mars 2004 - Sipas informatave të zyrtarëve rajonal dhe drejtorive komunale të arsimit, sot mësimi ka filluar dhe po zhvillohet normalisht në të gjitha komunat e Kosovës, me përjashtim në shkollat e qytetit në Mitrovicë. Në Mitrovicë është pezulluar ndërrimi i paradites nga strukturat rajonale dhe komunale të arsimit për shkaqe sigurie.

Numër më të vogël të nxënësve ka në dy shkolla në Fushë-Kosovë, Obiliq në dy shkolla dhe në dy shkolla në Lipjan.

Ministria e Arsimit edhe njëherë kërkon nga subjektet arsimore në regjione, komuna dhe shkolla që mësimi të vazhdohet normalisht.

 

 

Ministria e Arsimit thotë se sot duhet të vazhdojë puna normale në të gjitha institucionet arsimore

 

Prishtinë, 18 mars 2004 - Ministria e Arsimit, Shkencës dhe Teknologjisë, i njofton të gjithë nxënësit, studentët dhe mësimdhënësit, se sot duhet të vazhdojë puna normale në të gjitha institucionet arsimore të Kosovës.

Prej të gjithë drejtuesve të arsimit dhe mësimdhënësit e personeli tjetër kërkohet angazhim maksimal që gjendja të normalizohet kudo që janë shfaqur probleme.

 

 

UNMIK-u, institucionet e Kosovës dhe diplomatët kërkuan të merren të gjitha masat për zbulimin e aktorëve të akteve të dhunës

 

Prishtinë, 18 mars 2004 - Kryeadministratori i Kosovës Hari Holkeri për shkak të krijimit të një situate të rëndë në Kosovë është takuar mbrëmë me udhëheqësit më të lartë të Kosovës dhe me shefat e zyrave të vendeve anëtare të Kuintit, të akredituar në Prishtinë.

Pas këtij takimi Holkeri ka lexuar një deklaratë të përbashkët, që është miratuar në këtë takim urgjent. Në këtë deklaratë theksohet: - Dy ditët e fundit kanë qenë tmerruese dhe shokuese për popullin e Kosovës.

 

Dënojmë dhunën e përdorur dhe kërkojmë ndërprerjen e menjëherëshme e protestave të dhunshme. Protestuesve u bëhet thirrje që të mos i sulmojnë fqinjët e tyre por të kthehen nëpër shtëpi dhe t'u japin rast KFOR-it dhe policisë që të qetësojnë gjendjen.

Në fund të kësaj deklarate thuhet se do të ndërmerren të gjitha masat për zbulimin e aktorëve të këtyre akteve të dhunës që e shkaktuan vdekjen e disa qytetarëve të Kosovës.

Ndërkohë shefi i UNMIK-ut Hari Holkeri tha se dita e djeshme për Kosovën ishte një ditë e zezë. Duke u apeluar qytetarëve që të kthehen nëpër shtëpitë e tyre, Holkeri ka pohuar se e ardhmja e Kosovës mvaret nga sjellja e saj dhe nga zbatimi i standardeve.

Në emër të Kuintit shefi i Zyrës britanike në Prishtinë Mark Dikenson tha se e drejta e protestës nuk mund t'i mohohet askujt, duke shtuar se megjithatë protestat e përgjakshme janë të papranueshme. Ai nënvizoi se ardhmja nuk mund të ndërtohet me gjak.

Nga përfaqësuesit vendorë pas këtij takimi është prononcuar Nexhat Daci kryetar i Kuvendit të Kosovës, i cili përveç thirrjeve për uljen e tensioneve tha se administrata e UNMIK-ut si dhe përfaqësuesit vendorë duhet të pyesin veten se cilat janë arsyet që e kanë nxitur popullin që të dalë në rrugë.

 

Ai shtoi se shumë shpejt duhet të ulët ana kosovare me bashkësinë ndërkombëtare dhe të shihet se "çka është ajo që tash një vjet i është tërhequr vërejtja, e cila ka sjellë në gjendje, që këto dy ditët e fundit që ne të turpërohemi prej qytetarëve tanë".

Me dekklaratën e UNMIK-ut, vendeve të Kuintit dhe institucioneve vndore nuk është pajtuar Jakup Krasniqi, i cili prezentonte në takim në emër të PDK-së dhe në shenjë revolte ai e lëshoi këtë takim.

 

 

Departamenti amerikan i Shtetit dënon dhunën në Kosovë

 

Uashington, 18 mars 2004 - Departamenti amerikan i Shtetit dënoi të mërkurën dhunën në Kosovë, si pasojë se së cilës në Mitrovicë u vranë të paktën 7 vetë dhe të paktën 200 të tjerë u plagosën gjatë përleshjeve mes shqiptarëve dhe serbëve. Mes të plagosurve ishin edhe 11 paqeruajtës të NATO-s.

Në një njoftim për shtypin, Departamenti i Shtetit u bëri thirrje gjithë banorëve të Kosovës të rivendosin qetësinë, t'i japin fund bllokimit të rrugëve dhe të ndërpresin çdo lloj veprimi të dhunshëm.
Departamenti i Shtetit u bën thirrje udhëheqësve të Kosovës të ushtrojnë ndikimin e tyre që banorët të shmangin dhunën dhe t=i shprehin pikëpamjet e tyre përmes rrugëve paqësore.

Banorët e Kosovës, thuhet më tej në njoftimin e Departamentit të Shtetit, duhet të respektojnë KFOR-in, policinë ndërkombëtare, Shërbimin Policor të Kosovës dhe të bashkëpunojnë me përpjekjet ndërkombëtare për hetimin e rastit të mbytjes së të rinjve shqiptarë në Mitrovicë, si dhe plagosjen e të riut serb dje në Çagllavicë.

Departamenti i Shtetit u bën thirrje udhëheqësve rajonalë dhe organeve të shtypit të reagojnë me përgjegjshmëri, të raportojnë me saktësi dhe të mbështesin rikthimin e rendit në Kosovë.
Qeveria amerikane u shpreh ngushëllimet e saj familjeve të tre fëmijve shqiptarë që u mbytën në lumë. Po ashtu qeveria amerikane shpreh keqardhje për plagosjen e të riut serb të hënën dhe uron shërimin e tij të shpejtë.

Shkallëzimi i dhunës, thuhet në njoftimin e Departamentit të Shtetit, duhet të përfundojë. Dhuna kërcënon procesin e demokratizimit dhe pajtimit në Kosovë dhe vë në rrezik vetë të ardhmen e Kosovës.

 

 

Tirana zyrtare thotë se situata e krijuar bie ndesh me frymën e përgjithshme të zhvillimeve në Kosovë

 

Tiranë, 18 mars 2004 - Ministria e Punëve të Jashtme po ndjek me shqetësim zhvillimet e sotme në qytetin e Mitrovicës dhe shpreh keqardhjen për përshkallëzimin e ri të situatës atje, duke patur parasysh që sipas të dhënave të para ka patur dhe humbje jetë njerëzish.

Duke marrë shkas nga kjo ngjarje e rëndë, Ministria e Punëve të Jashtme gjen rastin të ritheksojë qëndrimin e saj të vendosur kundër dhunës dhe veprimeve të dhunshme pavarësisht motiveve nga të cilat marrin shkas ato.

 

Ministria e Punëve të Jashtme vlerëson se situata të tilla kategorikisht bien ndesh me frymën e përgjithshme të zhvillimeve në Kosovë, ecurinë e reformave dhe proceseve demokratike, konsolidimin e institucioneve vendore, zhvillimin dhe përparimin e dialogut dhe përpjekjet për krijimin e klimës së përshtatshme për bashkëjetesë multietnike në një Kosovë europiane dhe ngrenë edhe një herë me forcë domosdoshmërinë e respektimit të ligjit dhe institucioneve.

Ministria e Punëve të Jashtme shpreh besimin se të gjithë qytetarët e Kosovës do të dinë të tregojnë pjekuri gjykimi dhe veprimi, të ruajnë qetësinë dhe të bashkëpunojnë me besim të plotë me autoritetet legjitime vendore, ato ndërkombëtare dhe UNMIK, duke demonstruar se janë të aftë të përballojnë me maturi ngjarje të tilla.

 

 

Novicki shpreh pikëllimin dhe shqetësimin e tij pas ngjarjeve të fundit në Kosovë

 

Prishtinë, 18 mars 2004 - Ombudspersoni i Kosovës Marek Antoni Novicki shpreh pikëllimin dhe shqetësimin e tij pas ngjarjeve të fundit që kulminuan me demonstratat e djeshme të dhunës në Mitrovicë dhe pjesët tjera të Kosovës. Ai shpreh ngushëllimet e tij më të sinqerta familjeve të të gjitha viktimave të krimeve të fundit.

 

Në të njejtën kohë, ai shpreson që kryerësit e këtyre krimeve, si dhe të gjithë ata që ishin përgjegjës për gjakderdhjen e sotme, do të zbulohen dhe sjellen para drejtësisë.

Sido që të jetë, Ombudspersoni apelon si te pala shqiptare, ashtu edhe te ajo serbe, që menjëherë t'i dhënë fund dhunës në mënyrë që të evitohet keqësimi i mëtutjeshëm i situatës. Një dhunë e tillë do të krijojë vetëm shqetësime të mëtutjeshme dhe do të jetë e dëmshme ndaj gjetjes së çfarëdo zgjidhje të problemeve që ekzistojnë sot në Kosovë.

 

 

Zyra e SHBA-ve dënon dhunën ndëretnike në Kosovë

 

Prishtinë, 18 mars 2004 - Duke folur nga Zyra e SHBA-ve në Prishtinë, zonja Mars Ris, shefe e Misionit, e përshkroi dhunën në Mitrovicë dhe Çagllavicë si "thellësisht zhgënjyese dhe shumë e dëmshme për marrëdhëniet ndërmjet komuniteteve në Kosovë".

"Askush në Kosovë nuk përfiton nga këto akte, dhe është shumë e rëndësishme që të gjithë liderët politikë, shoqërorë, fetarë dhe lokalë të të gjitha komuniteteve të bëjnë gjithçka që është në mundësitë e tyre për të qetësuar situatën".

"Prapëseprapë, ajo që është më shqetësuese është se qytetarët si duket po e marrin situatën në duart e tyre duke u bazuar në supozimet dhe raportet e pakompletuara mbi sulmet që supozohen të jenë etnikisht të motivuara. Vdekja e tre fëmijëve nga fundosja është tragjike dhe unë thellësisht e bashkëndiej dhembjen e familjeve të tyre.

 

Megjithatë, pa marrë parasysh se a vdesin fëmijët shqiptarë në lumin Ibër, apo fëmijët serbë në Gorazhdec, humbja për Kosovën është e tmerrshme. Por qytetarët e Kosovës nuk duhet t'i rrisin këto humbje duke i marrë çështjet në duart e tyre dhe duke kërkuar hakmarrje në vend se të mbështeten në institucionet e Kosovës në gjetjen e zgjidhjes.

Gjithashtu, askush nuk duhet të bëj akuza ndaj grupeve tjera etnike kur të gjitha faktet për incidentet janë të panjohura apo të pakonfirmuara. Një retorikë e tillë nxitëse aspak nuk kontribuon në përmirësimin e situatës apo në qetësimin e emocioneve, mu atëherë kur kjo më së shumti nevojitet.

 

T'i kushtohet vëmendje thirrjeve për dhunë iu shkon për shtati vetëm ekstremistëve të cilët nuk veprojnë konform me interesat afatgjate të Kosovës", thuhet në këtë deklaratë.

 

 

Mbrëmë është sulmuar me gurë Ambasada amerikane në Beograd

 

Beograd, 18 mars 2004 - Para Ambasadës së SHBA-ve në Beograd mbrëmë pas orës 1,00 është shkaktuar një përplasje midis demonstruesve dhe policisë gjatë së cilës mbi pjesëmarrësit është hedhur gaz lotsjellës. Pjesëmarrësit e protestës kanë gjuajtur me gurë kundër ambasadës dhe i kanë thyer xhamat në ndërtesën dhe në shtëpizën e rojës e cila gjendet në afërsi.

 

 

Beogradi shpreh gatishmërinë që ushtria serbo-malazez të angazhohet në stabilizimin e situatës në Kosovë

 

Beograd, 18 mars 2004 - Këshilli Suprem i Mbrojtjes së Unionit Serbi-Mali i Zi i ka bërë thirrje mbrëmë UNMIK-ut, KFOR-it dhe institucioneve tëtjera ndërkombëtare që ta sigurojnë mbrojtjen e jetës së serbëve dhe të malazezëve dhe pronën e tyre në Kosovë.

 

Në seancën e jashtëzakonshme ka kërkuar nga bashkësia ndërkombëtare që të kryejë edhe obligimet e tjera të marra me Rezolutën 1244 të KS të KB për Kosovën.

KSM shpreh gatishmërinë që Ushtria e SMZ të angazhohet në ndihmën në forcat ndërkombëtare për stabilizimin e situatës në Kosovë në kudër të Rezolutës 1244, dhe këtë në kuadër të misionit të KFOR-it dhe të UNMIK-ut, thuhet në një njoftim nga Beogradi.

 

 

Ushtria serbe në gjendje gatishmërie në kufi me Kosovën

 

Beograd, 18 mars 2004 - Ministri i Mbrojtjes së Unionit Serbi-Mali i Zi, Boris Tadiq ka deklaruar se ushtria është në gatishmëri të plotë, dhe ka vlerësuar se në Kosovë po ndodh "një akt masiv terrorist". Tadiq ka thënë se në kufirin me Kosovën ushtria serbo-malazeze është në gjendje gatishmërie "për çdo eventualitet, për çdo skenar të keq".

 

Por ai ka shtuar se nuk do të ndërmerret asgjë pa u konsultuar me institucionet ndërkombëtare në Kosovë.

"Ajo që është e tmerrshme në këtë moment është se ata nuk kanë forca të mjaftueshme. Para një kohe e kam pasur rastin të insistojë që të mos zvogëlohet numri i pjesëtarëve të KFOR-it, dhe sipas informacioneve tona, një numër i njësive të SFOR-it është transferuar nga BeH në Kosovë", tha Tadiq.

 

 

Kofi Anan u bën thirrje të gjitha palëve që t'i japin menjëherë fund dhunës

 

Nju-Jork, 18 mars 2004 - Sekretari i përgjithshëm i OKB-së Kofi Anan nëpërmjet zëdhënësit të tij ka dënuar dhunën e djeshme në Kosovë dhe ka kërkuar që fajtorët të nxirren para drejtësisë. Anan ka dënuar fuqishëm këtë dhunë ndërmjet shqiptarëve dhe serbëve të Kosovës.

Kofi Anan u bënë thirrje të gjitha palëve të përfshira që t'i japin menjëherë fund dhunës, e cila rrezikon qëndrueshmërinë e Kosovës dhe sigurinë e të gjithë qytetarëve të saj. Sekretari i përgjithshëm i OKB-së i jep përkrahje të plotë përfaqësuesit e tij Hari Holkeri dhe gjithë bashkësisë ndërkombëtare në Kosovë dhe u bënë thirrje autoriteteve vendore që të ndihnojnë në kthimin e situatës në gjendje normale dhe të sjellin para drejtësisë përgjegjësitë e dhunës.

 

 

Kreu i NATO-së tha se sulmet e djeshme në Kosovë janë mizore dhe duhet të ndalen menjëherë

 

Bruksel, 18 nëntor - Sekretari i përgjithshëm i NATO-s Jap de Hop Shefer me një deklaratë të veçantë dënoi dhunën e djeshme ndëretnike në Kosovë në të cilën janë vrarë mbi 10 veta dhe janë plagosur me qindra të tjerë. Ai shprehu keqardhje për sulmet ndaj ushtarëve të KFOR-it të cilët po veprojnë në një rrezik të madh personal për të ndaluar dhunën dhe për të ruajtur ligjin dhe rendin.

 

Sipas tij këto sulme janë mizore dhe duhet të ndalen menjëherë. Shefer ka theksuar se ky shpërthim i fundit i dhunës dhe i këtyre vdekjeve të pakuptimta vetëm sa do ta bëjë më të vështirë për Kosovën përmbushjen e standardeve që komuniteti ndërkombëtar ka parashtrua për krijimin e një Kosove të qëndrueshme, multietnike dhe demokratike.

Sekretari i përgjithshëm i NATO-s ka kërkuar nga të gjitha komunitetet etnike në Mitroicë dhe në gjithë Kosovën të shmangin përshkallëzimin e mëtejshëm, të veprojnë me qetësi dhe të tregojnë vetëpërmbajtje për të mos marrë pjesë në demonstrime dhe bllokime rrugësh.

 

 

Gjatë ditës së djeshme protesta pati anembanë Kosovës

 

Prizren, 18 mars 2004 - Protestuesit në Prizren të revoltuar me të ngjarjet e hidhura që kanë ndodhur në Mitrovicë kanë sulmuar ndërtesën e UNMIK-ut në këtë qytet dhe kanë djegur liceun ortodoks dhe kanë djegur disa shtëpi dhe disa vetura të UNMIK-ut.

Pejë - Të indinjuar me ngjarjet tragjike në Mitrovicë edhe në këtë qytet dje u organizuan protesta masive. Të revoltuar nga mosefikasiteti i UNMIK-ut protestuesit kanë djegur një makinë të policisë së UNMIK-ut, kurse tri të tjera i kanë demoluar. Ata kanë djegur edhe flamurin e OKB-së që valonte para selisë së Kuvendit komunal të Pejës.

 

Mijëra protestues shqiptarë janë nisur në drejtim të enklavës serbe Bjellopojë të Pejës, ku i kanë djegur disa shtëpi të sapondërtuara të minoritarëve serbë. 30 familjarë të minoritetit serb që jetojnë në këtë fshat janë në mbrojtje të forcave të mëdha të KFOR-it, të policisë së UNMIK-ut dhe SHPK-së të cilat nuk kanë lejuar depërtimin e protestuesve në këtë fshat. Gjatë përleshjeve me forcat e mëdha ndërkombëtare është vrarë në qytetar shqiptar, ndërkaq pesë janë të plagosur.

Fushë - Kosovë: - Protestuesit shqiptarë në Fushë - Kosovë kanë djegur disa shtëpi serbe dhe ambulancën, ndërkaq është djegur edhe shkolla "Hivzi Sylejmani", në të cilën vijojnë mësimin nxënësit e minoritetit serbë. Turma e shprehu revoltën e saj edhe në pjesëtarët e KFOR-it dhe të policisë ndërkombëtare duke i gjuajtur me gurë dhe me gjësende të tjera. Njoftohet se në Fushë - Kosovë është vrarë një person, por identiteti nuk është bërë i ditur.

Çagllavicë: - Janë djegur disa shtëpi. Ka pasur shkëmbim zjarri dhe shpërthime bombash. Në Çagllavicë janë vrarë tre persona dhe dhjetëra janë plagosur. Në këtë pjesë të Prishtinë janë djegur edhe shumë vetura të policisë dhe administratës së OKB-së.

Ferizaj: - Një numër i madh i protestuesve shqiptarë ishte tubuar mbrëmë ka protestuar deri vonë dhe kanë sulmuar kishën orthdokse në qendër të Ferizajt.

 

 

Në Mitrovicë u plagosën 11 pjesëtarë të KFOR-it dhe ka vdekur një polic i KFOR-it francez

 

Mitrovicë, 18 mars 2004 - Njoftohet edhe për 11 pjesëtarë të plagosur të KFOR-it dhe disa oficerë të policisë ndërkombëtre dhe vendore, ndërkaq një polic i KFOR-it francez është i vdekur.

Zëdhënësi i policisë ndërkombëtare Derek Çapell tha se të paktën 6 apo 7 veta janë vrarë gjatë përleshjes së sotme në Mitrovicë dhe mbi 200 të tjerë janë plagosur. Shumica e të vrarëve janë shqiptarë, tha ai, duke shtuar se policia pas gjashtë orë trazirash ka arritur më në fund të vendosë një lloj kontrolli.

"Kemi arritur të ndajmë veriun nga jugu dhe kemi rivendosur zonën e mirëbesimit. Është një qetësi e tensionuar në Mitrovicë. Në pjesën veriore të qytetit qytetarët serbë janë shpërndarë".
Çapell pohoi se për ta qetësuar situatën në Mitrovicë, forcat ndërkombëtare kanë vendosur ndalim-qarkullimin, i cili ka hyrë në fuqi mbrëmë nga ora 19.00.

 

 

Këshilli i Evropës ka shprehur shokimin për shkak të humbjes së jetërave të njerëzve të pafajshëm

 

Bruksel, 18 mars 2004 - Presidenti i Asamblesë Parlamentare të Këshillit të Evropës Peter Shrider shprehu tronditjen dhe pikëllimin e tij për humbjen e jetëve gjatë dhunës së djeshme në Kosovë. Ai po ashtu u shprehu ngushëllime familejve të të ndjerëve. Shrider u bëri thirrje liderëve shqiptarë dhe atyre serbë të shfrytëzojnë influencën e tyre që menjëherë ta ndalin dhunën.

 

Ai ka vlerësuar vlerësuar se ngjarjet në Mitrovicë dëshmojnë se sa i domosdoshëm është sundimi i ligjit, me anë të të cilit, do të garantohej siguria e të gjithë qytetarëve të Kosovës dhe respektimit të drejtave të njeriut.

 

 

Gjenerali Ksavier Mishel është shprehur i shqetësuar me sasinë e madhe të armatimit

 

Mitrovicë, 18 mars 2004 - Komandanti i KFOR-it për Kosovën veriore, gjenerali Ksavier Mishel e përshkoi ditën e djeshme si të jashtëzakonshme, ndërkaq është shprehur i shqetësuar me sasinë e madhe të armatimit që ishte përdorur nga popullata civile.

 

"Ka qenë një ditë shumë e keqe për Mitrovicën dhe për Kosovën, por ka qenë një ditë e vështirë edhe për trupat franceze të KFOR-it. Kemi dhjetë viktima, dy prej tyre me plagë serioze. Ushtarët janë qëlluar derisa po përpiqeshin të mbronin popullatën civile", ka thënë gjenerali Mishel.

 

 

Sipas zëdhënësit Çapell, në Kosovë ekziston një shkallë koordinimi në shpërthimin e dhunës

 

Prishtinë, 18 mars 2004 - Zëdhënësi i policisë së UNMIK-ut Derek Çapall, duke shfaqur qëndrimin e tij rreth ngjarjeve të djeshme tragjike në Kosovë ka thënë se ekziston një shkallë koordinimi në shpërthimin e dhunës. Sipas tij kjo ka të bëjë me një planifikim të caktuar të një organizate të caktuar.

 

 

Njëzet e shtatë të vdekur në Irak

 

Bagdad, 18 mars 2004 - Një makinë bombë ka shpërthyer jashtë një hoteli në Bagdad. Autoritetet ushtarake amerikane në vendngjarje thonë se së paku 27 vetë kanë vdekur dhe 45 janë plagosur.

Sulmi ndodhi në orët e para të mbrëmjes dje në rajonin komercial të qytetit.

Dy kate të hotelit prej 5 katesh, Mount Lebanon që përdorej kryesisht nga irakianë dhe arabë u shkatërruan.
Hoteli ishte i vogël dhe nuk kishte mbrojtjen që kanë hotelet më të mëdha në qytet.

Një zëdhënës i Këshillit qeverisës irakian i quajti sulmuesit, armiq të njerëzimit. Shpërthimi erdhi tre ditë pas përvjetorit të parë të fillimit të luftës në Irak.

 

 

Përleshje në kufirin pakistanez

 

Islamabad, 18 mars 2004 - Zyrtarët në Pakistan thonë se ka pasur një numër të lartë viktimash në përleshjet midis rojeve kufitare dhe luftëtarëve lokalë që mbështesin Al-Kaidan dhe talibanët në një rajon kufitar me Afganistanin.

Ato thonë se janë vrarë 15 roje kufiri dhe 24 luftëtarë klanorë. Megjithatë nuk ka konfirmim të pavarur për numrin e të vrarëve.

Numri i viktimave nga të dy palët po rritet për shkak të përleshjeve ku luftëtarët lokalë po përdorin mortajat dhe mitralozët.

 

 

Në Irak është vrarë një marins amerikan dhe 3 të tjerë janë plagosur

 

Bagdad, 18 mars 2004 - Një marins amerikan është vrarë dhe tre të tjerë janë plagosur në një sulm mortaje në qytetin irakian, Kusajba, në kufi me Sirinë, njofton Rojter. Zëdhënësi ushtarak ka thënë se sulmi kaq ndodhur të mërkurën rreth orës 10,55.

Ndërkaq AFP njofton për dy ushtarë të vrarë amerikanë në këtë incident.

 

Policia spanjolle ka arrestuar edhe 4 të dyshimtë në lidhje me sulmet me bombë në Madrid

 

Madrid, 18 mars 2004 - Policia spanjolle ka arrestuar edhe katër të dyshimtë, të pakten dy syresh me origjinë marokene, në lidhje me sulmet me bombë në trenat e Madridit, ku u vranë 201 njerëz, kanë bërë të ditur sot (e enjte) burimet gjyqësore, njofton Rojter. Ata janë arrestuar në veri të Spanjës, në qytetin Alkala de Henares.

 

 

Në shpërthimin në qendër të Bagdadit, janë vrarë 6 dhe jo 27

 

Bagdad, 18 mars 2004 - Ministri i brendshëm i Irakut ka deklaruar sot (e enjte) se makina bombë, që shpërtheu në qendër të Bagdadit, vetëm tri ditë para përvjetorit të intervenimit amerikan, ka shkaktuar vrasjen e gjashtë personave dhe jo 27, siç kanë vlerësuar amerikanët, kurse janë plagosur rreth 40 njerëz.

Po kështu, njoftohet se në një tjetër sulm me bombë në Bakuba, në veri të Bagdadit, janë vrarë tre persona dhe janë plagosur edhe 10 të tjerë afër zyrës së stacionit lokal televiziv, të financuar nga amerikanët, kanë thënë zyrtarët spitlorë dhe dëshmitarët. Nga të vrarët, janë 5 irakianë dhe një britanik.

  |  KULTURË  |  HISTORI  |   POLITIKË  |  OPINIONE  |  ADRESARI  |  ARKIVI  |