|  KULTURË  |  HISTORI  |   POLITIKË  |  OPINIONE  |  ADRESARI  |  ARKIVI  | 

Kuvendi i Komunës konsideron se vazhdimi i mëtutjeshëm i protestave i dëmton interesat e qytetit dhe të qytetarëve të Mitrovicës

Mitrovicë, 18 mars 2004 / TN / H. SYLA - Kuvendi i Komunës, në mbledhjen e vet të jashtëzakonshme, mbajtur më, 18.03.2004, kryesuar nga zëvendëskryetari Mursel Ibrahimi, ka  shqyrtuar gjendjen e krijuar, si pasojë e protestave që i filluan nxënësit e shkollave të mesme për shkak ngjarjes tragjike, kur tre fëmijë shqiptarë të Çabrës, duke ikur nga disa ekstremistë serbë që po i ndiqnin me qenë, gjetën vdekjen në lumin Ibër.

 

Kuvendi i Komunës, vlerëson se protestat e nxënësve të Gjimnazit “Frang Bardhi” dhe të punonjësve të shëndetësisë në mëngjes, ishin të qeta. Situata mori një rrjedhë tjetër, rreth orës 10,00, për shkak të reagimit të papërshtatshëm të pjestarëve të KFOR-it dhe të policisë, ndaj një grupi të vogël nxënësish që ishin tubuar afër urës kryesore, duke përdor gaz lotësjellës me koncentrim të fortë.

 

Anëtarët e Kuvendit të Komunës, poashtu kanë konstatuar se pezmi i qytetarëve është grumbulluar edhe para ngjarjes tragjike në Çabër, për shkak të mosveprimit të UNMIK-ut për të ushtruar pushtetin e vet të mirëfilltë në tërë territorin e komunës dhe të tolerimit të veprimeve të ekstremistëve serbë në pjesët tjera të vendit, prandaj edhe ka ardhur deri tek zhvillimet e këtilla destabilizuese me pasoja të rënda për qytetarët dhe qytetin.

 

Kuvendi i Komunës bënë të ditur se edhe përkundër masave që ka ndërmarrë dhe apelit drejtuar qytetarëve përmes mediave, nuk ka arritur që t’i ndërpres protestat, për shkak se KFOR-i dhe policia nuk ofruan mundësinë e bashkëpunimit me institucionet legjitime të pushtetit lokal dhe arritjen eventuale të ndonjë marrëveshjeje për ndërprerjen e trazirave.

 

Në mbledhjen e Kuvendit të Komunës u konstatua se në protestat e dhunshme, për shkak të përdorimit të armëve të zjarrit nga ekstremistët serbë dhe të përdorimit të gazit lotsjellës e të plumbave të gomës nga KFOR-i dhe policia, kanë vdekur gjashtë qytetarë, janë plagosur rëndë 15, lehtë rreth 100 sish, kurse ndihmën e mjekut e kanë kërkuar edhe mbi 200 të tjerë.

 

Kuvendi i Komunës, poashtu bënë të ditur se për të qetësuar gjendjen në komunë, ka kërkuar ndihmën e institucioneve të vendit, të Presidencës, Parlamentit, Qeverisë dhe të TMK-së, duke i lutur këto që të jenë në kontakt edhe me kryeadministratorin e Kosovës Hari Hollkeri dhe komandantin e KFOR-it, Kamerhof.

 

Anëtarët e Kuvendit të Komunës, kanë kërkuar nga faktorët ndërkombëtarë përgjegjës për siguri në komunë, që të shtojnë masat për mbrojtjen me vendosmëri të popullatës joserbe në pjesën veriore të qytetit, me qëllim që të mos ndodhin masakra sikur ato të viteve të mëparme të paslutës.

 

Kuvendi i Komunës konsideron se vazhdimi i mëtutjeshëm i protestave i dëmton interesat e qytetit dhe të qytetarëve të Mitrovicës, prandaj apelon që qytetarët të përmbahen nga protestimi i  mëtutjeshëm dhe të kthehen në shtëpitë e tyre. Me kwtw u  ofrojnë rastin organeve legjitime të pushtetit lokal dhe kompetentëve, që të ndërmarin masa të duhura për  stabilizim të plotë të gjendjes së krijuar, por edhe për zgjidhjen e problemit të qytetit, brenda një afati të caktuar kohor.