|  KULTURË  |  HISTORI  |   POLITIKË  |  OPINIONE  |  ADRESARI  |  ARKIVI  | 

Gjilan: Askush që sot e do një Kosovë më të mirë se dje, nuk mund ta mbështet dhunën

Gjilan, 18 mars 2004 - Pas protestës së djeshme në Gjilan, e cila përfundoi me një të vdekur, 31 të plagosur dhe disa objekte të djegura dhe të dëmtuara, Komiteti për Siguri dhe Emergjencë i kësaj komune ka mbajtur të enjtën paradite mbledhje të jashtëzakonshme për të shqyrtuar sitautën dhe për të koordinuar aktivitetet me subjektet tjera për parandalimin e shkallëzimit të mëtejmë të dhunës.

Lutfi Haziri, kryetar i komunës tha se protestat e djeshme në Gjilan, të cilat filluan nga nxënës të shkollave të mesme, si reagim ndaj rastit tragjik të fëmijëve në Qabër të Mitrovicës, ndërsa më vonë atyre iu bashkua edhe një numër i qytetarëve, sollën vdekjen e një personi në Gjilan, Sllobodan Qeriq si dhe plagosjen e 31 të tjerëve, në qytet dhe në udhëkryqin e fshatit Shillovë.

Dy të lënduar të rëndë janë dërguar për trajtim në spitalin e Prishtinës, ndërsa katër të tjerë janë operuar në spitalin regjional të Gjilanit dhe janë jashtë rrezikut për jetë. Lëndimet tjera janë shkaktuar kryesisht nga hudhja e gurëve, përveç 13 protestuesve që janë goditur me veturë në udhëkryqin e Shillovës, nga një banor i këtij fshati. Gjatë protestave janë lënduar lehtë edhe dy policë si dhe janë djegur 11 shtëpi në qytet.

Lutfi Haziri, i cili njëherit është edhe kryetar i Komitetit për Siguri dhe Emergjencë ka shprehur keqardhje për rastin tragjik që ndodhi në Gjilan si dhe për të lënduarit tjerë gjatë përshkallëzimit të djeshëm të protestës, pas së cilës, siç tha ai, është dëmtuar progresi i arritur në Gjilan gjatë pesë viteve të kaluara.

Komiteti dënoi dhunën e protestuesve, ndërsa falënderoi policinë për përmbajtje në përdorimin e dhunës ndaj masës, e cila përbëhej kryesisht nga nxënës të shkollave të mesme dhe të rinj tjerë.

Nënkoloneli i SHPK-së, Reshat Maliqi tha se policët e SHPK-së kanë qenë të angazhuar kryesisht në rrugën e Prishtinës dhe përreth kishës ortodokse, për të penguar depërtimin e masës së qytetarëve në këtë pjesë të qytetit, ku banojnë një numër i familjeve serbe.

Protesteusit pastaj janë drejtuar nga selia e UNMIK-ut dhe e ka sulmuar atë me gurë, ndërsa janë djegur edhe 3 automjete të UNMIK-ut, janë dëmtuar 4 të tjera si dhe 10 automjete me targa GL. Një qytetar ka vdekur dhe sipas njoftimeve tona ai quhet Slobodan Periq, ndërkaq një grua e lënduar më rëndë është dërguar në spitalin e Prishtinës.

Sipas kolonelit Reshat Maliqi, gjatë protestave janë lënduar 31 qytetarë, një numër i tyre në udhëkryqinn e Shillovës si dhe lëndime të lehta kanë marrë edhe dhe 4 policë (tre nga ta të SHPK-së). Ka qenë fat i madh që nuk janë përdorur armë gjatë protestës, përndryshe pasojat do të mund të ishin më të mëdha, ka thenë Maliqi.

Ai ka thenë se nga dita e sotme, orari i punës së policisë është zgjatur në 12 orë dhe shpreson se, në bashkëpunim me policinë e UNMIK-ut dhe KFOR-in do të arrijnë të mbajnë rendin dhe nuk do të lejojnë të përsëritet dita e djeshme.

Koloneli Jonson nga kampi “Montith” në Gjilan, pasi iu bëri një përshkrim zhvillimeve të ditës së mërkurë në Gjilan, të cilat eskaluan në manifestim të dhunës, tha se ka përshtypjen që ngjarja e djeshme ka qenë e planifikuar dhe kjo e brengos më së shumti.

Që nga dita e sotme KFOR-i ka rritur praninë e tij në qytet dhe kjo mund të vërehet si për nga numri dhe automjetet ushtarake, ashtu edhe për nga ngjyra e uniformës së pjesëtarëve të KFOR-it dhe pajimet që mbajnë ata.

Koloneli Jonson tha se KFOR-i do të bashkëpunoj me policinë dhe paralajmëroi edhe mundësinë për reagim të përbashkët si dhe arrestime, nëse ndodhë të përsëriten protestat. “Ushtarët e mi kanë marrë urdhër për reagim, nëse ata kërcënohen, ose edhe në rast të kërcënimit të përfaqësueve tjerë ndërkombëtar që ndodhen këtu”, ka thenë Jonson.

Ai lavdëroi angazhimin e SHPK-së, e cila, siç tha koloneli Jonson, ka bërë punë të shkëlqyshme në mbrojtjen e kishës ortodokse, duke e mbajtur masën larg këtij objekti, deri sa atje kanë arritur forcat e KFOR-it. Nuk është momenti të ngritet gishti në drejtim të askujt. Demonstratat duhet të ndalohen dhe çdo kush duhet të jetë i angazhuar në qetësimin e situatës, ka kërkuar koloneli Jonson.

Përfaqësuesi i UNHCR-it tha se për këtë organizatë dje ka qenë një ditë jo e mirë, pasiqë iu është dashur t`i evakuojnë disa familje serbe nga qyteti, por ka shprehur brengosjen për disa persona tjerë të këtij komuniteti, të cilët ende kanë mbetur në qytet.

Nënkrytari i komunës, Bozhidar Periq i ka gjykuar, siç ka thënë ai, aktet kriminale, vandalizimin dhe ekstremizmin shqiptar ndaj serbëve, që sipas tij ishte i planifikuar dhe i organizuar.

Zëvendëskryetari Xhemajl Hyseni, pasi ka shprehur keqardhje për ngjarjen e djeshme, ka tërhequr vëmendjen e anëtarëve të Komitetit duke theksuar se janë të papranueshme kualifikimet e nxituara. Problemet nuk mund të zgjidhen duke i identifikuar fajtorët në përmasa kolektive. Asnjëri që e do një Kosovë të qetë dhe më të mirë se dje, nuk mund të mbështet dhunën. Ata që do ta bënin këtë, janë kundër Kosovës dhe kundër popullatës shumicë në Kosovë, tha ai.

Këshilltari rajonal i UNMIK-ut, Marsel Qintelen dhe ai komunal në Gjian, Charles Messier kanë fajsëuar SHPK-në se nuk është angazhuar për të mbrojtur objektin e tyre si dhe 25 punëtorët e tij, të cilët ndodheshin në ndërtesën, e cila po sulmohej me gurë nga protestuesit.

Ismail Kurteshi u angazhua për të mos dhënë vlerësime të ngutshme, tani kur nuk dihet nëse protestat mund të vazhdojnë, sepse mund të ngriten tensionet, por kërkoi që bashkarisht të planifikohen masat për qetësimin e situatës. Nëse vlerësohet e nevojshme, duhet të ndërpritet për 1-2 ditë edhe mësimi në qytet, ka thenë Kurteshi, ndërsa ka propozuar që në vendbanimet e përziera të rriten masat e sigurisë.

Keqardhje për viktimat dhe të lënduarit ka shprehur edhe koloneli i TMK-së, Shaban Musliu, i cili tha se Trupat Mbrojtëse të Kosovës janë të gatshme të punojnë bashkarisht me institucionet vendore e ndërkombëtare në normalizimin e gjendjes, nëse kjo kërkohet prej tyre. “Ne jemi të gatshëm të përmbushim obligimin tonë ndaj të gjithë qytetarëve të Kosovës, nëse vlerësohet e nevojshme për momentin ndihma jonë” tha Musliu.

Komiteti formoi dy grupe punuese për arsim dhe shëndetësi, të cilat do të angazhohen në këto sfera për të parandaluar tentimet e mundshme për protesta, përkatësisht për të vlerësuar nevojat emergjnete nëse ndodhë të përsëriten protestat e dhunshme.

Komiteti i kërkoi nënkryetarit të dytë të komunës, Bozhidar Periq që të angazhohet në vendbanimet serbe për të mos lejuar aktivitete revanshiste, siç ka ndodhur dje në Shillovë.

Komiteti u ka sugjeruar segmenteve përgjegjëse për siguri që të përmbahen edhe më tutje nga përdorimi i dhunës ndaj nxënësve protestues, sepse kjo do të mund të nxiste përshkallëzime më të rreziskhme, siç ndodhi në disa qendra tjera të Kosovës.

Komiteti për Siguri dhe Emergjencë është takuar edhe në orët e pasditës për të përcjellur dhe shqyrtuar gjendjen e krijuar pas protestave të djeshme.