Kryetari i komunës dhe liderët politikë të Gjilanit apelojnë te qytetarët që të tërhiqen nga protestat

Gjilan, 18 mars 2004 - Kryetari i komunës së Gjilanit, Lutfi Haziri, gjatë një konference të përbashkët me liderët e tri subjekteve më të mëdha politike që përfaqësohen në Kuvend, që mbajtën të enjten pasdite, ka kërkuar nga të gjithë qytetarët e këtushëm që të angazhohen në uljen e tensioneve dhe kthimin e qetësisë, pas protestave të djeshme, të cilat morën një viktimë, lanë 31 të lënduar, disa shtëpi dhe automjete të djegura si dhe pasoja të tjera, tani kur Gjilani ishte bërë një shembull i mirë progresi edhe për pjesët tjera të Kosovës.

Duke përkujtuar qytetarët se përdorimi i dhunës në protesta mund të provokojë përshkallëzime të rrezikshme në Kosovë dhe në Gjilan, Haziri u bëri apel atyre që të tërhiqen nga kjo rrugë dhe t`iu krijojnë mundësi institucioneve dhe shoqërisë civile që të punojnë në qetësimin e situatës.

Dhunën e manifestuar në protestat e djeshme e ka dënuar edhe kryetari i Degës së LDK, Xhemajl Hyseni, i cili njëkohësisht është edhe zëvendëskryetar i komunës. Hyseni u ka bërë apel qytetarëve si dhe anëtarësisë së LDK-së që të përmbahen nga çdo akt i dhunshëm, të jenë gjakftohtë dhe të dëshmojnë maturi në veprimet e tyre në situata të këtilla dhe të mos vihen në pikëpyetje të gjitha të arriturat e pesë viteve të kaluara. “Dhuna asnjëherë nuk ka dhënë fryte”, ka thënë Xhemajl Hyseni.

Lideri i PDK-së për Gjilan, Ismail Kurteshi tha se ne nuk mund ta kontestojmë të drejtën e qytetarëve për të shprehur revoltën e tyre në mënyrë paqësore, por shprehu keqardhje për dhunën që ka ndodhur dje. Edhe Kurteshi vlerësoi se është e rrugës që qytetarët t`iu krijojnë mundësi institucioneve dhe liderëve të tyre politikë që të veprojnë dhe kurrsesi të mos përdoret dhuna, as nga protestuesit e as nga segmentet përgjegjëse të sigurisë.

Atë që ndodhi dje në Gjilan, pas një periudhe të qetë dhe progresit të arritur, Fadil Gashi, kryetar i AAK në këtë komunë e ka cilësuar një fatkeqësi për Gjilanin. Ngjarjet çfarë ishin dje dhe mbrëmë në Gjilan si dhe nëpër disa qendra tjera, janë hap prapa për Kosovën dhe Gjilani, i cili nga dje e ka humbur epitetin e mirë që e kishte.

Kryetari i komunës dhe liderët e tri subjekteve politike në Gjilan, duke apeluar te qytetarët për ndërprerje të protestave, theksuan se vazhdimi i akteve të dhunshme mund të jetë i rrezikshëm për Kosovën dhe të ardhmen e saj.