E mërkure, 17 mars 2004

E mërkure, 17 mars 2004

Përmbajtja:

Presidenti Rugova bën thirrje për qetësi në Kosovë
Holkeri deklaroi se do ta mbështesë policinë për zbulimin e aktorëve të dhunës në rastin e tre fëmijëve në Çabër
Vazhdojnë kërkimet për Florent Veselin, është identifikuar viktima e dytë e fshatit Çabër
Njoftohet për të paktën 6 vrarë në në Mitrovicë
Deklaratë e Kuvendit të Kosovës në lidhje me zhvillimet e 16 dhe 17 mars 2004it në Mitrovicë
BE-ja dënon dhunën ndëretnike në Kosovë
Situatë e tensionuar dhe jashtë kontrollit në Çagllavicë, ka edhe të plagosur
Situatë e tensionuar edhe afër fshatit Çagllavicë
Në Mitrovicën veriore janë vrarë një grua dhe një burrë serb
Mitrovicë: Njoftohet për tre të vdekur dhe mbi 250 të plagosur
Protestë në Prishtinë: Aktet kriminale dëmtojnë lirinë, paqen dhe sigurinë e qytetarëve të Kosovës
Sot po i zhvillon punimet seanca e rregullt e Kuvendit të Kosovës
Degët e LDK-së në Perëndim dënojnë ashpër çdo akt të dhunës dhe të krimit në Kosovë dhe përkrahin protestën e sotme në Prishtinë
Udhëheqja komunale e Mitrovicës shpreh indinjatë të thellë për vdekjen tragjike të dy fëmijëve në Çabër
Sot në Pejë është vrarë Smajl Elezaj
Sot në Prishtinë mbahet një protestë paqësore kundër dhunës
Dy fëmijë shqiptarë nga fshati Çabër janë mbytur në lumin Ibër një tjetër ende konsiderohet i zhdukur
Koordinatori i Kosovës në Paktin e Stabilitetit tha se Maqedonia duhet të shikojë Kosovën si partner ekonomik
Përfaqësues të Kosovës dhe të vendeve të Ballkanit Perëndimor do të takohen më 26 dhe 27 mars në Lucern të Zvicrës
Zëvendësministri i jashtëm i Rusisë të enjtën viziton Kosovën
SP e Pensionistëve dhe Invalidëve të Punës nënshkroi një marrëveshje për kthimin e borxhit nga Serbia
Mbrëmë në veri të Mitrovicës ndodhi një shpërthim i fuqishëm, i cili nuk shkaktoi viktima në njerëz
UNMIK-u është i vetëdijshëm për shkallëzimin e situatës së sigurisë pas incidenteve të fundit në Kosovë
Në Termocentralin Kosova A ka shpërthyer një zjarr, për fat nuk është lënduar askush
Komisioni Parlamentar për Tregti dhe industri prezentoi pakon e tri projektligjeve për energjetikën
Krimineli serb Sasha Cvjetan është dënuar me 20 vjet burg për krime lufte në Kosovë
Një ish-ushtar afrikanojugor është vrarë afër shtëpisë së Nelson Mendeles në Kejptaun
39 të vrarë në kufirin pakistano-afgan
Një civil është vrarë dhe 17 të tjerë janë plagosur në një shkëmbim zjarri në Gaza
Pauell ka arritur në kryeqytetin afgan për një vizitë njëditëshe
Forcat izraelite kanë vrarë 3 palestinezë në dy sulme raketore në Rafah
Irak: 11 të vrarë brenda 24 orësh
Sipas një ankete në Irak, 56% jetojnë më mirë
32 të vrarë në kufirin pakistano-afgan
Bush bën thirrje për unitet

Presidenti Rugova bën thirrje për qetësi në Kosovë


"Kërkojmë nga të gjithë qytetarët e Kosovës që të punojnë së bashku për forcimin e sigurisë dhe ruajtjen e rendit për prosperitetin e vendit tonë, Kosovës. Institucionet e Kosovës me bashkësinë ndërkombëtare me UNMIKU-n do t'i ndërmarrin të gjitha masat e duhura që Mitrovica të bëhet një qytet i integruar i qetë dhe i sigurtë për të gjithë qytetarët dhe së bashku me UNMIK-un të ushtrojmë pushtetin në tërë territorin e Kosovës, or edhe në territorin e Mitrovicës".
Presidenti tha se duhet të elimonohen strukturat paralele, të bëhet çarmatosja e popullatës në pjesën veriore dhe të ndalohet inflitrimi i ekstremistëve të dirigjuar nga Beogradi që qarkullojnë sidomos në Mitrovicë", u shpreh Presidenti Rugova para gazetarëve, duke thënë se për fat të keq edhe udhëheqja e re e Beogradit po vazhdon të krijojë shqetësime etnike në Kosovë dhe ta destabilizojë Kosovën.
Presidenti nënvizoi se është e pamundur që Kosova të ndahet në vija etnike. "Është qëndrim i fortë i institucioneve ndërkombëtare dhe i bashkësisë ndërkombëtare se kufijtë e Kosovës janë të paprekshëm dhe serbët duhet t'i çmojnë të mirat e Kosovës dhe të jenë pjesëtarë të shoqërisë dhe të shtetit të Kosovës që po e ndërtojmë së bashku", tha Presidebnti Rugova duke folur para gazetarëve për situatën e krijuar në Kosovë.


Holkeri deklaroi se do ta mbështesë policinë për zbulimin e aktorëve të dhunës në rastin e tre fëmijëve në Çabër

Prishtinë, 17 mars 2004 - Shefi i UNMIK-ut Hari Holkeri deklaroi se do ta mbështesë policinë për zbulimin e aktorëve të dhunës në rastin e tre fëmijëve shqiptarë të fshatit Çabër që humbën jetën mbrëmë në lumin Ibër. Holkeri tha se çdo jetë e humbur është një brengë e madhe për Kosovën. "Ne duhet të bëjmë çmos që të gjenden shkaktarët e këtyre incidenteve. Do ta përkrah plotësisht policinë.

Gjithashtu edhe KFOR-i do të asistojë në kapërcimin e gjendjes.
I pyetur nëse UNMIK po e humb kontrollin në Kosovë, Holkeri u përgjegj: "Jo. Absolutisht jo! Nëse është nevoja ne mund të jemi më të fortë. Kemi metoda, por nevojitet mirëkuptimi i popullsisë civile dhe të ecet pëpara", duke u shprehur ngushëllime familjeve që humbën fëmijët e tyre. "I shpehim ngushëllime të thella familjeve", tha Holkeri.

A u bëri thirrje mediave dhe qytetarëve që ta ruajnë qetësinë dhe të thyejnë murin e heshtjes dhe të bashkëpunojnë me policinë për zbardhjen e këtyre rasteve.


Vazhdojnë kërkimet për Florent Veselin, është identifikuar viktima e dytë e fshatit Çabër

Çabër/Mitrovicë, 17 mars 2004 - Fëmija i dytë i gjetur sot në mëngjes në lumin Ibër është Avni Sheremet Veseli (11), ndërkahë ende vazhdojnë kërkimet për fëmijën tjetër të zhdukur - Florent Çerkin Veseli 8-vjeçar.

Ndërkaq trupi i pajetë i Egzon Zaim Deliut (12) është gjetur mbrëmë në lumin Ibër.
Aktivisti politik i fshatit Çabër Gazmend Rama i deklaroi QIK-ut rreth orës 15,30 se situata në fshat sot është e qetë, por mbretëron një pikëllim i thellë i të gjithë banorëve për tragjedinë me tre fëmijët e Çabrës.


Njoftohet për të paktën 6 vrarë në në Mitrovicë

Mitrovicë, 17 mars 2004 - Njoftimet më të reja bëjnë të ditur se të paktën gjashtë persona janë vrarë dhe rreth 200 janë plagosur në përleshjet midis serbëve dhe shqiptarëve në qytetin e ndarë të Mitrovicës.
Zëdhënësi i KFOR-it në Mitrovicë, Xhorxhi Kakuk, i ka deklaruar BBC-së se sipas disa burimeve të pakonfirmuara deri tani në përleshje janë vrarë gjashtë persona, katër shqiptarë dhe dy serbë.

Të dy palët kanë shkëmbyer zjarr armësh dhe granadash kur u përleshën në një urë që ndan qytetin e Mitrovicës.

Paqeruajtësit e NATO-s kanë përdorur gaz lotsjellës dhe plumba plastikë në përpjekje për të kontrolluar dhunën.
Njoftimet bëjnë të ditur se autoblinda janë nisur drejt asaj zone.


Deklaratë e Kuvendit të Kosovës në lidhje me zhvillimet e 16 dhe 17 mars 2004it në Mitrovicë

Prishtinë, 17 mars 2004 - Kuvendi i Kosovës e ndërpreu seancën e vet të rregullt për shkak të zhvillimeve dramatike në Mitrovicë. Të gjitha gupet palamentare janë pajtuar që të shprehin këtë mesazh të përbashkët në emër të Kuvendit të Kosovës, duke theksuar se Kuvendi do të ndjekë ituatën aktuale dhe do të sillet sipas nevojave të zhvillimeve dhe përgjegjësive që ka ky institucion.
Kuvendi i Kosovës shpreh indinjatë të thellë e mospajtim me zhvillimet e sotme dramatike në Mitrovicës dhe gjendjen e sigurisë të krijuar atje.
Kuvendi i Kosovës shpreh mospajtim me pavendosmërinë e UNMIK-ut për të krijuar sigurinë e qytetarëve të Kosovës.
Tolerimi i strukturave paralele serbe dhe bandave kriminale që nxisin dhe vrasin qytetarët e Kosovës, është politikë e gabuar që do ta destabilizojë Kosovën.
"Ftojmë krerët e institucioneve demokratike të Kosovës dhe krerët e UNMIK-ut dhe të KFOR-it të takohen urgjentisht, të marrin masa për qetësimin e gjendjes dhe ta informojnë Kuvendin e Kosovës me të dhëna të sakta për situatën e krijuar dhe masat e marra.
Ftojmë KFOR-in që të zhbllokojë rrugët në brendësinë e Kosovës dhe t'i kontrollojë në mënyrë rigoroze kufijtë e Kosovës, në mënyrë që të pamundësohet hyrja e bandave kriminale nga Serbia në territorin e Kosovës dhe veprimi i tyre.
Institucionet e Kosovës dhe populli i Kosovës nuk do të tolerojnë veprimin e mëtejmë të strukturtave paralele dhe bandave vrasëse në Mitrocvicë e gjetiu në Kosovë", thuhet në një deklaratë të Kuvendit të Kosovës.


BE-ja dënon dhunën ndëretnike në Kosovë

Bruksel, 17 mars 2004 - Zëdhënësja e përfaqësuesit të Bashkimit Evropian për Sigurinë e politikën e jashtme Havier Solana, Kristina Gajak tha se BE-ja dënon fuqishëm shpërthimin e dhunës ndëretnike në Kosovë.
Zoti Solana shpresh keqardhje të thellë për njoftimet e humbjes së jetëve atje," tha zonja Gajak për BBC-në. "Këto akte kriminale janë plotësisht të papranueshme dhe kërcënojnë shumë përparimin e Kosovës drejt një të ardhmeje më të mirë," tha zonja Gajak në emër të zotit Solana.
BE-ja dëshiron që autorët të sillen para drejtësisë, tha ajo.
Përfaqësuesi i lartë i BE-së për sigurinë thekson gjithashtu se siguria për të gjitha grupet etnike është element kyçe i politikave për zbatimin e standarte të përfaqësuesit të posaçëm të sekretarit të pëgjithshëm, Harri Holkeri.
BE-ja u bën thirrje të gjithë udhëheqësve politikë që të bashkohen me dënimin e dhunës dhe në luftimin e saj.
"BE-ja dhe Havier Solana, në veçanti, i fton ata që të punojnë së bashku me UNMIK-un dhe KFOR-in për të siguruar stabilitetin e Kosovës," tha zonja Gajak.


Situatë e tensionuar dhe jashtë kontrollit në Çagllavicë, ka edhe të plagosur

Prishtinë, 17 mars 2004 - Policia e UNMIK-ut thotë se janë përleshur shqiptarët dhe serbët në Çagllavicë, vetëm dy kilometra larg Prishtinës.
Sipas së policisë së UNMIK-ut, Anxhela Xhozef situata në Çagllavicë ka dalë jashtë kontrollit. Sipas saj në Çagllavicë dy shtëpi të banorëve serbë janë hedhur në erë. "Situata në Çagllavicë është jashtë kontrollit të policisë dhe ne po provojmë të rimarrim kontrollin," tha zonja Xhozef për BBC-në.
Një marshim proteste i shqiptarëve në Prishtinë, vazhdoi edhe në rrethinat e tij duke u drejtuar nga Çagllavica megjithë barrikadat e policisë ndërkombëtare dhe të KFOR-it. Zëdhënësja e policisë ndërkombëtare thotë se rreth 700-800 protestues kishin qëlluar me gurë duke vazhduar rrugën drejt fshatit, ku para disa netësh u plagos një i ri serb.
Burimet serbe nga Çagllavica thonë se në këtë fshat i është dhënë flaka katër shtëpive, ndërkohë që ushtarët e KFOR-it kanë hedhur gaz lotsjellës, por kjo nuk i ka ndaluar shqiptarët. Thuhet se ka edhe të plagosur. Mbi këtë rajon vazhdimisht fluturojnë helikopterë të KFOR-it.


Situatë e tensionuar edhe afër fshatit Çagllavicë

Prishtinë, 17 mars 2004 - Një gjendje e tensionuar sot po mbretëron edhe në dalje të Prishtinës, përkatësisht afër fshatit serb Çagllavicë, ku një masë e madhe e qytetarëve shqiptarë tentojnë të shpërthejnë bllokadën e policisë.

Por forca të mëdha të policisë nuk po lejojnë të përleshen shqiptarët dhe serbët e tubuar në Çagllavicë, të cilët për dy ditë me radhë po mbajnë të bllokuar aksin rrugor Prishtinë-Shkup.
Serbët dje kanë sulmuar autoveturat e shqiptarëve në shenjë revolte për shkak të plagosjes së një serbi dy ditë më parë.


Në Mitrovicën veriore janë vrarë një grua dhe një burrë serb

Mitrovicë, 17 mars 2004 - Një grua dhe një burrë serb janë vrarë sot në pjesën veriore të Mitrovicës. Sipas mediave serbe ky burrë serb është vrarë në rrethana ende të pasqaruara te "tre rrokaqiejt" në veri të qytetit gjatë një përleshjeje mes serbëve dhe shqiptarëve. Gruaja serbe 36-vjeçare është qëlluar me armë zjarri në ballkonin e saj rreth orës 13.00.


Mitrovicë: Njoftohet për tre të vdekur dhe mbi 250 të plagosur

Mitrovicë, 17 mars 2004 - Në konfliktet e sotme në Mitrovicë jozyrtarisht njoftohet për tre a katër të vdekur dhe 20 të plagosur nga armët e zjarrit. E tëra ka filluar sot në mëngjes pas lajmit për vdekjen tragjike të tre fëmijë në Çabër të Zubin Potokut.

Fillimisht në rrugë dolën e nxënësit e shkollave e pastaj edhe qytetarë të Mitrovicës, të cilët tentuan të kalojnë në pjesën veriore të qytetit të ndarë.

Kanë ndërhyrë forcat paqeruajtëse dhe policia e UNMIK-ut duke hedhur gaz lotsjellës dhe duke gjuajtur me plumba gome dhe granata trulluese për të penguar masën e mllefozur të shqiptarëve të kalojë lumin Ibër.

Konflikte ka pasur në fshatin Suhodll e Çabër dhe rreth tre rrokaqiejve.
Shërbimi i emergjencës në pjesën jugore të Mitrovicës është i angazhuar për trajtimin e plagosurve, por vështirë po ia dalin për shkak të numrit të madh të pacientëve që kërkojnë ndihmë.


Protestë në Prishtinë: Aktet kriminale dëmtojnë lirinë, paqen dhe sigurinë e qytetarëve të Kosovës

Fillimisht u dënua ngjarja tragjike e mbytjes së tre fëmijëve shqiptarë në Çabër të Zubin Potokut dhe nga pjesëmarrësit me një minutë heshtje u nderuan tre fëmijët që humbën jetën mbrëmë tragjikisht në lumin Ibër.
Në këtë protestë foli Nimon Alimusaj, anëtar i Kryesisë së LDK-së, i cili tha në fillim të fjalë së tij se "akti i rëndë kriminal terrorist në Rezidencën e Presidentit të Kosovës, Dr.Ibrahim Rugova për LDK-në dhe gjithë qytetarët që e duan Kosovën, e morën si lajmin më shqetësues dhe më tmerrues të periudhës së Kosovës së lirë".
"Këtë akt të rëndë kriminal ne e marrim edhe si kambanë alarmi se në Kosovë edhe sot e gjithë ditën ka kriminelë, të cilët të trimëruar, të frymëzuar e të përkrahur edhe nga shërbime sekrete të huaja që sillen rrotull Kosovës, tash kanë marrë atë shkallë guximi sa të përgatisin vrasjen e figurave më të larta të LDK-së dhe të institucioneve të Kosovës, të cilët e shtyen dhe po e shtyejnë aq fuqishëm çështjen e Kosovës përpara, kanë marrë atë shkallë guximi sa të trokisin me eksploziv para selisë së UNMIK-ut dhe, më në fund, të trokisin edhe para dyerve të Rezidencës së Presidentit të Kosovës, të institucionit më të lartë shtetëror të këtij vendi", tha Alimusaj.
Ky akt i rëndë terrorist, tha në vazhdim ai, ishte motivi që Kryesia e Lidhjes Demokratike të Kosovës, Forumi i Gruas i LDK-së, Forumi i Rinisë i LDK-së dhe të gjitha degët e saja dhe të përkrahur nga disa subjekte politike qytetare ta organizojnë këtë protestë, që të shprehin publikisht edhe njëherë shqetësimin e madh dhe revoltën kundër dhunës politike, e cila tashmë po merr trajtën e krimit politik kundër figurave udhëheqëse të institucioneve të niveleve të ndryshme dhe preki majën më të lartë të institucionit tonë, Presidencën e Kosovës.

"Një mbrojtje e tillë do të thoshte mbrojtje e stabilitetit, e paqes, e demokracisë dhe e sigurisë së Kosovës, kjo do të thoshte mbrojtje e vullnetit të popullit dhe e përpjekjes së tij për njohjen sa më të shpejtë të pavarësisë së Kosovës, kjo do të thoshte përpjekje për ta mbajtur Kosovën si mjedis tejet të sigurtë dhe të qetë për të gjithë. Tevona, kjo do të ishte synim i të gjithë qytetarëve të Kosovës dhe dëshirë e kërkesë e të gjithë miqve të Kosovës", tha ai.
Në vazhdim të fjalës së tij, Nimon Alimusaj u bëri thirrje policisë së UNMIK-ut, të KFOR-it dhe të SHPK-së që të ndërmarrin masa të duhura për parandalimin e akteve të tilla terroriste dhe të kapin autorët e veprimeve të tilla që ta gëzojnë besimin e plotë të qytetarëve të Kosovës, ndërkaq nga qytetarët e Kosovës kërkoi që të kenë kurajo qytetare që t'i denoncojnë sa më fuqishëm këto akte të dhunës në të gjitha nivelet e shoqërisë sonë.

Njëherit u bëri thirrje të gjitha subjekteve politike dhe qytetare të Kosovës që të vazhdojnë ta denoncojnë dhunën haptazi dhe të veprojnë institucionalisht kundër saj, si dhe të gjitha mediave që të denoncojnë pandërprerë krimin, dhunën dhe gjuhën e ashpër të urrejtjes, ndërkaq nga anëtarët dhe simpatizantët e LDK-së dhe nga qytetarët kërkoi që të jenë edhe më të vendosur me veprime të përditshme në realizimin e aspiratave të popullit të Kosovës për liri, pavarësi e demokraci dhe për integrimin e saj në Bashkësinë Evropiane, NATO dhe miqësi të përhershme me SHBA-të.
"Jam shumë i sigurtë se Kosova do ta mposhtë dhunën dhe nuk do ta humbin luftën në paqe, për çka përpiqen agjentura të ndryshme kriminele që kalurojnë gjithandej rreth e rreth Kosovës", tha në fund të fjalës së tij anëtari i Kryesisë së LDK-së dhe deputeti i Kuvendit të Kosovës, Nimon Alimusaj, duke e përmbyllur fjalën e tij me fjalët: "Zoti e bekoftë Kosovën dhe popullin e qytetëruar të saj".
Poashtu në këtë protestë folën edhe deputetja e LDK-së Nekibe Kelmendi dhe Gani Geci.
Protesta kaloi e qetë dhe pa incidente.


Sot po i zhvillon punimet seanca e rregullt e Kuvendit të Kosovës

Prishtinë, 17 mars 2004 - Sot po i zhvillon punimet seanca e rregullt e Kuvendit të Kosovës, e cila në rend dite ka shqyrtimin e 13 projektligjeve. Fillimisht shefat e tri grupeve kryesore parlamentare i dënuan aktet e dhunës së ditëve të fundit në Kosovë, duke kërkuar të debatohet urgjentisht në Kuvend për situatën e sigurisë në vend. Ata kërkuan nga përgjegjësit për sigurinë në vend që t'i raportojnë Kuvendit të Kosovës dhe të merren qëndrime të qarta.
Shefi i Grupit parlamentar të LDK-së Sabri Hamiti, ai i PDK-së Arsim Bajram dhe i AAK-së Bujar Dugolli bënë kritika për punën e UNMIK-ut sidomos për punën e policisë për mosndriçimin e rasteve të krimeve që kanë ndodhur në Kosovë. Ata theksuan se këto janë akte që cenojnë qëndrueshmërinë e gjendjes, prishjen e imazhit të Kosovës, por njëherit thanë se ndikojnë edhe në mospërmbushjen e standardit të dytë që ka të bëjë me rendin dhe ligjin.
Me këtë rast u vendos që në një nga seancat e ardhshme të debatohet për situatën e sigurisë në vend, edhe pse kjo është fushë e rezervuar për administratën e UNMIK-ut dhe KFOR-in.
Ndryshe seancën e sotme po e bojktojnë duputetët serbë të koalicionit "Kthimi".


Degët e LDK-së në Perëndim dënojnë ashpër çdo akt të dhunës dhe të krimit në Kosovë dhe përkrahin protestën e sotme në Prishtinë

Stokholm, 17 mars 2004 - Degët e LDK-së në Perëndim, në lidhje me protestën kundër dhunës në Kosovë që mbahet sot, kanë lëshuar këtë deklaratë, përmes së cilës dënojnë ashpër çdo akt të dhunës dhe të krimit, të cilat trondisin Kosovën duke u sulmuar personalitetet më të shquara të Kosovës, të LDK-së dhe aspirantët më të devotshëm të Pavarësisë së Kosovës, e sidomos rastin e fundit ku u sulmua me bomba Institucioni më i lartë i Kosovës, Rezidenca e Presidentit të Kosovës, Dr. Ibrahim Rugova.
- Akte të tilla të dhunës politike në Kosovë, zbehin imazhin e Kosovës para faktorit ndërkombëtarë, rrezikojnë sigurinë dhe të ardhmen e Kosovës, si dhe dëmtojnë rëndë procesin e njohjes formale të Pavarësisë së Kosovës.
Me këtë rast, Degët e Lidhjes Demokratike të Kosovës në Gjermani, Zvicër, Beneluks, Suedi, Norvegji, Danimarkë, Angli, Austri, Francë, Nju Jork, Çikago, Detroid dhe Kanadë, me moton "Edhe ne jemi me ju", përkrahin fuqimisht protestën e paralajmëruar të Lidhjes Demokratike të Kosovës, e cila mbahet sot, 17 mars 2004 2004 në Prishtinë, në shenjë reagimi kundër sulmit me bomba ndaj Rezidencës së Presidentit të Kosovës, Dr. Ibrahim Rugova.
Degët e LDK-së në diasporë, kërkojnë nga UNMIK-u, Shërbimi Policor i Kosovës, Policia e UNMIK-ut dhe KFOR-i që të bëjnë çmos që akterët e këtij akti të shumtuar kriminal-terrorist si dhe urdhërdhënësit e tyre, të zbulohen sa më parë dhe të arrestohen dhe t'u shqiptohen dënimet e merituara.
Poashtu, përmes kësaj deklarate, kërkojmë nga UNMIK-u, SHPK-ja, Policia e UNMIK-ut dhe KFOR-i që të angazhohen më tepër në zbulimin e vrasjeve politike të cilat kanë ndodhur para dhe pasluftës në Kosovë, me ç'rast edhe do të zbulohen dhe arrestohen të gjithë ata të cilët qëndrojnë pas vrasjeve të:

Ahmet Krasniqit, Ali Ukajt, Enver Malokut, Shefki Popovës, Shaban Manajt, Xhemajl Mustafës, Ismet Rracit, Shkelzen Hysenit, Haki Ymerit, Ekrem Rexhës, Bekim Kastratit, Besim Dajakut, Smajl Hajdarajt, Ukë Bytyqit, Bafti Bajramit, Bajram Bytyqit, Tahir Zemajt, Hasan Zemajt, Enis Zemajt, Sebahate Tolajt, Isuf Haklajt, dhe të tjerë,- thuhet në fund të kësaj deklarate të degëve të LDK-së në diasporë.


Udhëheqja komunale e Mitrovicës shpreh indinjatë të thellë për vdekjen tragjike të dy fëmijëve në Çabër

Mitrovicë, 17 mars 2004 - Zëvendëskryetari i Kuvendit të Komunës, Mursel Ibrahimi dhe kryeshefi i Ekzekutivit Mustafë Pllana, kanë shpreh indinjatë të thellë për ngjarjen tragjike që ka ndodhur të martën pasdite në Çabër, ku si pasojë e kërcënimit dhe ndjekjes nga ekstremistë serbë, kanë humbur jetën në lumin Ibër dy fëmijë, ndërkohë që për fatin e një fëmije tjetër nuk dihet ende asgjë.
Udhëheqësit komunalë kanë qëndruar mbrëmë në fshatin Çabër dhe kanë vizituar familjet e viktimave, si dhe kanë biseduar me udhëheqjen e fshatit, të cilëve u kanë shprehur dhembjen dhe pikllimin e qytetarëve të komunës me rastin e kësaj ngjarjeje tronditëse.
Udhëheqësit e Kuvendit të Komunës kanë dënuar ashpër veprimin e ekstremistëve serbë, si pasojë e të cilit ka ndodhur tragjedia e rëndë dhe kanë kërkuar nga organet kompetente për siguri e rend që të fillojnë menjëherë hetimet për kapjen dhe nxjerrjen para organeve të drejtësisë të personave përgjegjës për këtë tragjedi.
Zëvendëskryetari Musel Ibrahimi dhe kryeshefi i Ekzekutivit, Mustafë Pllana, kanë kërkuar nga familjarët e viktimave dhe nga çabrasit që të ruajnë gjakftohtësinë në këto momente të rënda, në mënyrë që organet kompetente të kryejnë punën e tyre ashtu si duhet, si dhe u kanë ofruar ndihmën eventuale për tejkalimin e gjendjes së krijuar.


Sot në Pejë është vrarë Smajl Elezaj

Pejë, 17 mars 2004 - Smajl Elezaj, drejtori i ndërmarrjs "Mofast" në Pejë, sot në orën 8.00 të mëngjesit është qëlluar për vdekje me një plumb. Dorasi pas këtij akti të kryer është arratisur.

Ngjarja ka ndodhur afër shkollës fillore "Asdreni" në Pejë, mu në kohën kur nxënësit po hynin në shkollë dhe i ka tronditur pa masë. Në vendin e ngjarjes kanë dalë forcat e policisë dhe po i kryejnë hetimet.
Smajl Elezaj është babai i ish-pjesëtarit të UÇK-së Avni Elezaj, i cili është vrarë para dy vjetësh në Pejë.


Sot në Prishtinë mbahet një protestë paqësore kundër dhunës

Prishtinë, 17 mars 2004 - Në organizim të Lidhjes Demokratike të Kosovës, sot në orën 12:00 në sheshin "Sëknderbeu" në qendër të Prishtinës mbahet një protestë paqësore.
Kjo protestë organizohet si reagim ndaj sulmit me bombë më 12 mars kundër institucionit të Presidentit të Kosovës dhe kundër dhunës dhe akteve të tjera kriminale, që po e rrezikojnë sigurinë, të ardhmen dhe pavarësinë e Kosovës.
LDK u ka bërë thirrje të gjithë anëtarëve, simpatizantëve dhe qytetarëve të Kosovës që të dalin në mënyrë sa më masive në këtë protestë për të mgritur zërin kundër akteve kriminale dhe kundër dhunës në përgjithësi që janë kundër lirisë, pavarësisë dhe demokracisë në Kosovë.


Dy fëmijë shqiptarë nga fshati Çabër janë mbytur në lumin Ibër një tjetër ende konsiderohet i zhdukur

Çabër/Mitrovicë, 17 mars 2004 - Dy fëmijë nga fshati Çabër i komunës së Zubin Potokut janë mbytur në lumin Ibër dhe një tjetër ende konsiderohet i zhdukur. Tashmë dihet se fëmija i mbytur në lumin është Egzon (Zaim) Deliu, 12 vjeçar, trupi i pajetë i të cilit është gjetur rreth 400 metra larg vendit të ngjarjes.

Ndërkaq, ende nuk dihet identiteti i fëmijës tjetër, trupi i pajetë i të cilit është gjetur sot në mëngjes. Që nga mbrëmë konsiderohen të zhdukur Avni Sheremet Veseli (11) dhe Florent Çerkin Veseli (8). Trupi i pajetë i njërit prej tyre është gjetur sot në mëngjes, mirëpo ende nuk është bërë identifikimi.
Ngjarja ka ndodhur dje pasdite rreth rreth 16.00, kur një grup fëmijësh të fshatit Çabër ishin duke lozur në anën tjetër të lumit Ibër, që ndan fshatin Çabër i banuar me shqiptarë nga fshati serb Zubç. Një serb pasi pasi i kishte fyer fëmijët shqiptarë në baza nacionale, i kishte ndjekur me qen.

Nga frika katër fëmijë kishin kërcyer në lumin Ibër dhe vetëm njëri ka arritur të kapërcejë lumin, kurse tre të tjerë i kanë rrëmbyer valët e lumit, tha sot përë QIK-un Gazmend Rama, aktivist politik i fshatit Çabër.
Edhe policia ndërkombëtare ka bërë të ditur se tre fëmijë janë zhdukur në fshatin Çabër. Zëdhënësja e policisë ndërkombëtare në Mitrovicë, Trejsi Bejker ka deklaruar: "E gjithë ajo që dimë deri më tash tre fëmijë janë zhdukur në fshatin Çabër, ndërkaq një fëmij tjerë është gjetur me lëndime dhe pas trajtimit mjekësor është liruar.

Ndërkohë policia është vënë në kërkim të fëmijëve të zhdukur", duke mos komentuar rrethanat e zhdukjes së fëmijëve dhe as përkatësinë e tyre etnike.


Koordinatori i Kosovës në Paktin e Stabilitetit tha se Maqedonia duhet të shikojë Kosovën si partner ekonomik

Bukuresht, 17 mars 2004 - Besim Beqaj, koordinator i Kosovës në Paktin e Stabilitetit, tha në Bukuresht se Maqedonia duhet të shikojë Kosovën si partner ekonomik shumë të rëndësishëm, sepse nëse nuk arrihet të nënshkruhet marrëveshja e tregtisë së lirë atëherë lindë nevoja për gjetjen e formës për bllokimin e hyrjes së produkteve maqedonase në Kosovë.


Përfaqësues të Kosovës dhe të vendeve të Ballkanit Perëndimor do të takohen më 26 dhe 27 mars në Lucern të Zvicrës

Lucern - Zvicër, 17 mars 2004 - Përfaqësues politikë të Kosovës dhe të vendeve të tjera të Ballkanit Perëndimor do të takohen më 26 dhe 27 mars në Lucern të Zvicrës për të diskutuar politikat dhe të ardhmen e Ballkanit në një tryezë të organizuar nga Projekti për Marrëdhënie Ndëretnike.

Tryeza është sponsoruar nga parlamenti federal për çështje të jashtme të Zvicrës dhe në të do të marrin pjesë përfaqësues nga Shqipëria, Maqedonia,Rumania, Serbia, Mali i Zi, Zvicra dhe Shtetet e Bashkuara të Amerikës, ndërkaq shumica e pjesëmarrësve do të jenë nga Kosova.


Zëvendësministri i jashtëm i Rusisë të enjtën viziton Kosovën

Moskë, 17 mars 2004 - Zëvendësministri i jashtëm i Rusisë Sergej Razov të enjtën do ta vizitojë Kosovën. Razov do të takohet me shefin e UNMIK-ut, Hari Holkeri dhe udhëheqësit e institucioneve të Kosovës, me të cilët do të bisedojë për implemenmtimin e planit - Standardet për Kosovën. Zyrtari rus sot do të qëndrojë në Serbi dhe Mal të Zi.


SP e Pensionistëve dhe Invalidëve të Punës nënshkroi një marrëveshje për kthimin e borxhit nga Serbia

Prishtinë, 17 mars 2004 - Sindikata e Pavarur e Pensionistëve dhe Invalidëve të Punës së Kosovës nënshkroi dje një marrëveshje katërapalëshe për afatizimin dhe kthimin e borxhit që ka Serbia ndaj pensionistëve dhe invalidëve të punës në Kosovë.

Marrëveshjen përveç Sindikatës së Pensionistëve e nënshkroi edhe KMDLNJ, Bashkimi i Sindikatave të Pavarura të Kosovës dhe Oda Ekonomike e Kosovës, ndërkaq pritet që ajo të nënshkruhet edhe nga kryeministri Bajram Rexhepi dhe përfaqësuesit e UNMIK-ut.
Kjo marrëveshje nënkupton marrjen e të gjitha veprimeve që duhet aplikuar në mënyrë që Serbia të detyrohet të realizojë obligimin ndaj pensionistëve dhe invalidëve të punës së Kosovës.


Mbrëmë në veri të Mitrovicës ndodhi një shpërthim i fuqishëm, i cili nuk shkaktoi viktima në njerëz

Mitrovicë, 17 mars 2004 - Mbrëmë pas orës 19.00 në tre rrokaqiejt në veri të Mitrovicës ndodhi një shpërthim i fuqishëm i cili nuk shkaktoi viktima në njerëz.

Ky shpërthim ka tronditur banorët e tre rrokaqiejve. Sipas zëdhënses së policisë së UNMIK-ut, Trejsi Bejker nuk ka shkaktuar viktima e as dëme materiale. Policia ka rrethuar vendin e ngjarjes dhe tash për tash nuk ka të arrestuar lidhur më këtë shpërthim.


UNMIK-u është i vetëdijshëm për shkallëzimin e situatës së sigurisë pas incidenteve të fundit në Kosovë

Prishtinë, 17 mars 2004 - Sipas zëdhënses së policisë të UNMIK-ut, Angjela Xhozef të gjithë pjesëtarët e policisë ndërkombëtare janë njoftuar me ngritjen e masave të sigurisë dhe se në rend të parë nga ata kërkohet që të shtojnë kujdesin për sigurinë e tyre personale, ose së dyti kërkohet që të shpeshtojnë lëvizjet e tyre rreth ndërtesave nëpër të cilat është i vendosur stafi i misionit të OKB-së në Kosovë.
Zonja Xhozef ka thënë se u është rekomandaur policëve që të jenë të kujdesshëm dhe nëse ata vërejnë gjëra të dyshimta rreth ndërtesave të UNMIK-ut të ndërmarrin masa të domosdoshme dhe të njoftojnë edhe pjesëtarët e KFOR-it që t'u vijnë në ndihmë.

UNMIK-u ka thënë Xhozef është i vetëdijshëm për shkallëzimin e situatës së sigurisë pas incidenteve të fundit dhe se këto masa sipas saj janë më tepër masa preventive për ndonjë të papritur që mund të ndodhte.
Njoftohet se disa zyrtarë të lartë vendorë kanë kërkuar nga policia e UNMIK-ut që t'i shtojnë masat e sigurisë për mbrojtjen e personaliteteve të rëndësishme vendore, përfshirë këtu nga posti i ministrave e deri te Presidenti i Kosovës.


Në Termocentralin Kosova A ka shpërthyer një zjarr, për fat nuk është lënduar askush

Prishtinë, 17 mars 2004 - Në Termocentralin Kosova A ka shpërthyer një zjarr, por për fat nuk është lënduar asnjë punëtor. Në momentin e shpërthimit të zjarrit në ndihmë ishte thirrur edhe Brigada lokale e zjarrfikësve, por zjarri ishte shuar para se ata të arrinin në vendin e ngjarjes.

Zjarri shpërtheu në kabllot e vendosura në gjeneratorin e bllokut A-4 dhe po të mos intervenohej me shpejtësi pasojat do të ishin më të mëdha, ngase gjeneratori është dashur që të ftohet me hidrogjen. Sipas burimeve të KEK-ut hetimet do të fillojnë menjëherë për të përcaktuar shkakun e zjarrit dhe për të llogaritur vlerën e dëmit si dhe për të caktuar afatet për riparimin e dëmit.


Komisioni Parlamentar për Tregti dhe industri prezentoi pakon e tri projektligjeve për energjetikën

Prishtinë, 17 mars 2004 - Komisioni Parlamentar për Tregti dhe Industri në bashkëpunim me USAID-in dhe menaxhmentin e KEK-ut ka prezentuar dje pakon e tri projektligjeve për energjetikën.

Synimi i këtyre tri projektligjeve është krijimi i bazës ligjore për prodhimin dhe furnizimin adekuat me energji, tërheqjen e investimeve dhe shpërbërjen e monopolit në tregun e energjisë. Kuvendi i Kosovës do të shqyrtojë sot këtë pako ligjore.


Krimineli serb Sasha Cvjetan është dënuar me 20 vjet burg për krime lufte në Kosovë

Beograd, 17 mars 2004 - Ish-pjesëtari i njësitit "Skorpion" të policisë së Serbisë, Sasha Cvjetan, është dënuar sot (e merkurë) me 20 vjet burg për krime lufte në popullsinë civile shqiptare. Gjykata ka konstatuar se Cvjetan në mars të vitit 1999 ka vrarë me paramendim 14 shqiptarë dhe ka marrë pjesë në plagosjen edhe të pesë shqiptarëve të tjerë.


Një ish-ushtar afrikanojugor është vrarë afër shtëpisë së Nelson Mendeles në Kejptaun

Kejptaun, 17 mars 2004 - Një ish-ushtar afrikanojugor është vrarë sot(e merkurë) afër shtëpisë së Nelson Mendeles në Kejptaun pasi ai kishte hapur zjarr në rojet e sigurimit, njofton BBCWorld.

Zëdhënësi i policisë ka thënë se tre persona kanë shkuar te shtëpia e z. Mendela dhe kanë kërkuar të bisedojnë me të ose me arkipeshkopin e Dezmond Tutu. Fillimisht ata kanë thënë se kanë një informacion rreth komplotit kundër zgjedhjeve të ardhshme dhe pastaj kanë filluar të shtijnë me armë zjarri.
Ish-presidenti i Afrikës së Jugut nuk ishte në rezidencën e tij në atë kohë. Sipas një deklarate të të ministrisë së Mbrojtjes, i vrari ishte ish-anëtar i Forcave Nacionale të Mbrojtjes, që ishte përjashtuar sivjet. Policia ka ndaluar dhe po merr në pyetje dy persona, që kanë marrë pjesë në incident.


39 të vrarë në kufirin pakistano-afgan

Islamabad, 17 mars 2004 - Gjatë luftimeve të ashpra pranë kufirit afgan midis forcave qeveritare paraushtarake dhe pjestarëve të fiseve që dyshohet se strehojnë luftëtarë të al-Kaidës dhe talebanë afër kufirit me Afganistanin, janë vrarë edhe shtatë ushtarë pakistanezë, kështu që numri i të vrarëve në këto luftime është ngritur në 39 të vrarë, kurse më herët njoftohej për 32 sish.

Përleshjet shpërthyen sot në mëngjes, kur trupat paraushtarake hynë në një fshat në rajonin fisnor të Vaziristanit jugor.


Një civil është vrarë dhe 17 të tjerë janë plagosur në një shkëmbim zjarri në Gaza

Gaza, 17 mars 2004 - Një civil është vrarë dhe 17 të tjerë janë plagosur në një shkëmbim zjarri të sotëm (e merkurë) ndërmjet agjentëve të shërbimit të inteligjencës ushtarake palestineze dhe personave të armatosur dhe të maskuar në qytetin Gaza, kanë thënë dëshmitarët dhe burimet mjekësore, njofton AFP.
Përleshjet kanë shpërthyer afër selisë së shërbimit të inteligjencës pasi pjesëtarët e tij kishin ndalur për kontroll identiteti automjetin e personave të maskuar. Një nga bashkëudhëtarët e makinës kishte hedhur një granatë në agjentët e sigurimit.

Personat e tjerë të maskuar ishin mbledhur shpejt në vendngjarje dhe kështu kishin filluar luftimet ndërmjet tyre. Burimet spitalore kanë thënë se shumica e të plagosurve janë nga radhët e agjentëve të sigurimit. I vrari është civil, kanë shtuar ata. Sulmuesit kanë ikur këmbë nga vendi i ngjarjes.


Pauell ka arritur në kryeqytetin afgan për një vizitë njëditëshe

Kabul, 17 mars 2004 - Sekretari amerikan i Shtetit, Kolin Pauell, ka arritur në në kryeqytetin afgan për një vizitë njëditëshe, ku do të zhvillojë bisedime me presidentin Hamid Karzai, njofton AFP.

Pauell më parë ka vizituar Nju Delhin, kurse pas Kabulit do të vizitojë edhe Islamabadin, ku do të ketë bisedime me liderët pakistanezë. Bisedimet me Karzain do të fokusohen në regjistrimin e votuesve për zgjedhjet e ardhshme dhe luftën gjysmëvjeçare kundër luftëtarëve të Al Kaidës si dhe aktet terroriste të rrjetit të Osama bin Ladenit.


Forcat izraelite kanë vrarë 3 palestinezë në dy sulme raketore në Rafah

Gaza, 17 mars 2004 - Forcat izraelite kanë shkrepur sot (e merkurë) një predhë në kampin e refugjatëve Rafah në Gaza, që ishte sulmi i dytë brenda disa orësh, dhe kështu kanë vrarë një djalosh civil 17-vjeçar, kanë bërë të ditur dëshmitarët, njofton Rojter.

Ndërkaq, në një sulm tjetër raketor gjatë natës kundër personave të armatosur palestinez në kampin Rafah janë vrarë dy palestinezë, nga të cilët njëri militant dhe tjetri civil. Izraeli ka nisur ofensivën raketopre dje(të martën) kundër militantëve palestinezë në qytetin Gaza, ku u vranë dy persona. Këto operacione janë përgjigje në dy sulmet vetëvrasëse me bombë në portin izraelit Ashdod, ku u vranë 10 izraelitë.


Irak: 11 të vrarë brenda 24 orësh

Bagdad, 17 mars 2004 - Persona të armatosur në Irak vranë të paktën 11 veta brenda 24 orësh, në sulmet kundër civilëve amerikanë dhe evropianë si dhe kundër irakianëve që punojnë për koalicionin e drejtuar nga Shtetet e Bashkuara.
Tre nga sulmet ndodhën në qytetin verior Mosul. Zyrtarët thonë se të paktën dy policë irakianë u vranë dhe dy të tjerë u plagosën të martën nga persona që hapën zjarr nga një makinë kundër një makine të policisë.
Po të martën, persona të armatosur hapën zjarr kundër një makine në të cilën ndodhej një grua që punonte si përkthyese për personelin ushtarak amerikan. Një person u vra, por ka njoftime kundërthënëse nëse viktima ishte vetë përkthyesja apo një nga të afërmit e saj.


Sipas një ankete në Irak, 56% jetojnë më mirë

Bagdad, 17 mars 2004 - Sipas një ankete të opinionit publik, organizuar nga grupe të mediave perëndimore, 56 përqind e irakianëve thonë se tani jetojnë më mirë sesa para luftës. Por më pak se 50 përqind e tyre thonë se ishin dakord me luftën e udhëhequr nga Shtetet e Bashkuara për përmbysjen e Sadam Huseinit.
Sipas anketës, ndërsa shumë irakianë thanë se jetesa e tyre është përmirësuar, 85 përqind mbeten të shqetësuar rreth gjendjes së sigurisë. Pak më shumë se 50 përqind e të pyeturve u shprehën kundër pranisë së forcave të koalicionit, por vetëm 15 përqind e tyre thonë se këto forca duhet të largohen tani nga Iraku.
Shumica e irakianëve thanë se duan që vendi i tyre të jetë demokratik, i bashkuar dhe me një qeveri qëndrore. Anketa e opinionit u organizua nga rrjeti televiziv amerikan ABC, rrjeti britanik BBC, dhe rrjeti gjerman ARD.


32 të vrarë në kufirin pakistano-afgan

Islamabad, 17 mars 2004 - Pakistani njofton se të paktën 32 persona u vranë gjatë luftimeve të ashpra pranë kufirit afgan midis forcave qeveritare paraushtarake dhe pjestarëve të fiseve që dyshohet se strehojnë luftëtarë të al-Qaidës dhe talebanë afër kufirit me Afganistanin.
Një zëdhënës ushtarak u tha gazetarëve në Islamabad se 8 pjesëtarë të forcave paraushtarake pakistaneze dhe 24 ekstremistë u vranë gjatë luftimeve. Të paktën 15 paraushtarakë u plagosën. Zëdhënësi tha se përleshjet shpërthyen sot në mëngjes, kur trupat paraushtarake hynë në një fshat në rajonin fisnor të Vaziristanit jugor.


Bush bën thirrje për unitet

Uashington, 17 mars 2004 - Presidenti Bush i ka bërë thirrje aleatëve të Amerikës të rrinë të bashkuar në luftën kundër terrorizmit. Ai tha se vrasësit gjakftohtë nuk duhen lejuar të trondisin vullnetin e botës së lirë.
Në komentet e tij të para, të detajuara mbi sulmet me bomba në Madrid ku 200 vetë humbën jetën, zoti Bush tha se kishte rëndësi që vendet të vazhdonin të ishin të vendosura për të bërë që terrorizmi të mos fitojë.
"Unë mendoj se terroristët do të vrasin jetë të pafajshme për të bërë botën të frikësohet. Mendoj se ata janë vrasës gjakftohtë. Dua të them se ata kanë vrarë njerëz të pafajshëm për të tronditur vullnetin tonë. Kjo është çfarë ata duan të bëjnë. Por ata kurrë nuk do të trondisin vullnetin e SHBA-së.

Ne i kuptojmë rreziqet. Dhe do të punojmë me miqtë tanë për të sjellë terroristët para drejtësisë. Ata nuk kanë vrarë vetëm në Spanjë. Ata kanë vrarë në SHBA. Ata vranë në Turqi dhe në Arabinë Saudite. Ata vrasin kudo që munden. Dhe ka rëndësi që bota e lirë të mbetet e fortë dhe e vendosur."