|  KULTURË  |  HISTORI  |   POLITIKË  |  OPINIONE  |  ADRESARI  |  ARKIVI  | 

Mitrovicë: Komiteti për Politikë dhe Financa i KK, ka mbajtur mbledhje të jashtëzakonshme, në të cilën ka  shqyrtuar gjendjen e rëndë në komunë

Për shkak të përdorimit të armëve të zjarrit nga ekstremistët serbë dhe të përdorimit të gazit lotsjellës e të plumbave të gomës nga KFOR-i dhe policia, kanë vdekur gjashtë qytetarë, janë plagosur rëndë 15 dhe lehtë rreth 100 sish, kurse ndihmën e mjekut e kanë kërkuar edhe mbi 200 të tjerë.    Mitrovicë, 17 mars 2004 / TN / H. SYLA - Komiteti për Politikë dhe Financa i Kuvendit të Komunës, ka mbajtur mbledhje të jashtëzakonshme, në të cilën ka  shqyrtuar gjendjen e krijuar, si pasojë e protestave që i filluan nxënësit e shkollave të mesme për shkak ngjarjes tragjike, kur tre fëmijë shqiptarë të Çabrës, duke ikur nga disa ekstremistë serbë që po i ndiqnin, gjetën vdekjen në lumin Ibër.

 

Komiteti për Politikë dhe Financa vlerëson se protestat e nxënësve në mëngjes, ishin të qeta, por këto kanë degjeneruar rreth orës 10,00, për shkak të reagimit të papërshtatshëm të pjestarëve të KFOR-it dhe të policisë, ndaj një grupi të vogël nxënësish që ishin tubuar afër urës kryesore, duke përdor gaz lotësjellës me koncentrim të fortë.

 

Anëtarët e Komitetit për Politikë dhe Financa, poashtu kanë konstatuar se pezmi i qytetarëve është grumbulluar edhe para ngjarjes tragjike në Çabër, për shkaë të mosveprimit të UNMIK-ut për të ushtruar pushtetin e vet të mirëfilltë në tërë territorin e komunës dhe të tolerimit të veprimeve të ekstremistëve serbë në pjesët tjera të vendit, prandaj edhe ka ardhur deri tek zhvillimet e këtilla destabilizuese me pasoja të rënda për qytetarët dhe qytetin.

 

Komiteti për Politikë dhe Financa bënë të ditur se edhe përkundër masave që ka ndërmarrë dhe apelit drejtuar qytetarëve përmes RTV Mitrovicës, transmetimet e së cilës i ka ndërpre UNMIK-u, pa dhënë ndonjë arësye, nuk ka arritur që t’i ndërpres protestat, për shkak se KFOR-i dhe policia nuk ofruan mundësinë e bashkëpunimit me institucionet legjitime të pushtetit lokal dhe arritjen eventuale të ndonjë marrëveshjeje për ndërprerjen e trazirave.

 

Në mbledhjen e KPF u konstatua se në protestat e dhunshme, për shkak të përdorimit të armëve të zjarrit nga ekstremistët serbë dhe të përdorimit të gazit lotsjellës e të plumbave të gomës nga KFOR-i dhe policia, kanë vdekur gjashtë qytetarë, janë plagosur rëndë 15 dhe lehtë rreth 100 sish, kurse ndihmën e mjekut e kanë kërkuar edhe mbi 200 të tjerë.

 

Komiteti për Politikë dhe Financa  bënë të ditur se për të qetësuar gjendjen në komunë, ka kërkuar ndihmën e institucioneve të vendit, të Presidencës, Parlamentit, Qeverisë dhe të TMK-së, duke i lutur këto që të jenë në kontakt edhe me kryeadministratorin e Kosovës Hari Hollkeri dhe komandantin e KFOR-it, Kamerhof.

 

Në fund, anëtarët e Komitetit për Politikë dhe Financa, kanë kërkuar nga faktorët ndërkombëtarë përgjegjës për siguri në komunë, që të shtojnë masat për mbrojtjen me vendosmëri të popullatës joserbe në pjesën veriore të qytetit, me qëllim që të mos ndodhin masakra sikur ato të viteve të mëparme të paslutës.

 

Në këtë mbledhje të KPF u vendos që të enjtën, më 18.03.2004, në orën 13,00, të mbahet mbledhja e jashtëzakonshme e Kuvendit të Komunës, në të cilën do të debatohet për gjendjen e krijuar dhe për masat që duhet ndërmarrë për stabilizimin e saj.