|  KULTURË  |  HISTORI  |   POLITIKË  |  OPINIONE  |  ADRESARI  |  ARKIVI  | 

Kryesia e Bashkësisë Islame të Kosovës: Ftojmë qytetarët tanë për gjakftohtësi dhe të angazhohen tej mundësive të tyre për të kontribuar për stabilizimin e gjendjes

Prishtinë, 17 mars 2004 / TN / BIK - Jemi thellë të tronditur dhe të indinjuar me tërë atë që ndodhi dhe ende është duke vazhduar në Mitrovicë dhe në lokalitete të tjera në Kosovë, gjendje kjo e cila rezultoi me disa të vrarë e të plagosur.

 

Prandaj, me qëllim të ruajtjes së qetësisë dhe paqes, me qëllim të mosderdhjes së gjakut edhe më tej, sepse edhe ashtu ky popull mjaft ka derdhur gjak, ftojmë qytetarët tanë për gjakftohtësi dhe të angazhohen tej mundësive të tyre për të kontribuar për stabilizimin e gjendjes.

 

Megjithë provokimet dhe gjendjen e rëndë në të cilën ndodhemi, apelojmë tek popullata e gjerë që maksimalisht të kontribuojë në uljen e tensionit, në vënien e rendit dhe sigurisë.

 

Kryesia e Bashkësisë Islame të Kosovës kërkon nga organet kompetente të rendit, në veçanti nga policia  e UNMIK-ut dhe KFOR, që të jenë në nivel të detyrës, të kryejnë misionin e tyre–t’u afrojnë qytetarëve siguri dhe qetësi në tërë vendin tonë dhe njëherit apelojmë që qytetarët t’i trajtojnë në mënyrë të njëjtë dhe të barabartë.

 

Kërkojmë, gjithashtu, nga Policia e UNMIK-ut që sa më parë të ndërmerr masat e duhura për lirimin e të gjitha rrugëve të Kosovës ndërkaq nga KFOR-i që të ndalojë hyrjen e bandave kriminale, të cilët  vetëm vrasin njerëz dhe shkaktojnë destabilizim. Për ne është e pakuptueshme se si UNMIK-u, KFOR-i, OSBE-je dhe mekanizma të tjerë vazhdojnë të tolerojnë ekzistimin e strukturave paralele serbe.

 

Kryesia e Bashkësisë Islame të Kosovës kërkon nga institucionet tona më të larta: nga Presidenti, nga Kuvendi, nga Qeveria dhe të tjera që në momentet e vështira dhe të rënda të jenë maksimalisht vigjilent dhe ta orientojnë popullin ashtu siç duhet.

 

Kryesia e Bashkësisë Islame të Kosovës ju shpreh ngushllimet më të thella familjeve dhe tërë fshatit Çabër për humbjen e më të dashurve të tyre. Gjithashtu, ju shpreh ngushëllime edhe familjeve të të vdekurve tjerë sot në Mitrovicë.