Përmbajtja:

• Presidenti Rugova dënon plagosjen e të riut serb

• Kryeministri Rexhepi dënon sulmin ndaj një serbi në një fshat afër Prishtinës

• Admirali Xhonson tha se pavarësisht nga angazhimet e NATO-s edhe në pjesë të ndryshme të botës, Kosova mbetet prioritet

• Pjesëtarët e KFOR-it shpëtojnë nga linçimi Bahti Miftarin në Çagllavicë

• Në maj mund të bëhet nënshkrimi i kontratës kolektive

• Në Prishtinë u mbajt një protestë kundër arrestimeve të eprorëve të TMK-së

• Një grup serbësh të Graçanicës sulmuan sot disa qytetarë shqiptarë

• Banorët e lagjes së Spitalit dhjetë ditëve pa ujë të pijes

• Nesër në Prishtinë LDK-ja organizon një protestë paqësore kundër dhunës

• Rreth 300 minatorët e "Trepçës" nuk pranuan ofertën që të fillojnë punën grupe-grupe

• Agjencia per Regjistrimin e Bizneseve shënoi njëvjetorin e punës

• Biblioteka Kombëtare e Universitare nënshkroi një marrëveshje me Kompaninë "Ex Libris"

• Komuniteti çam kërkon nga Parlamenti shqiptar që të votojë për njohjen e çështjes së tyre nga autoritetet e Greqisë

• Banka Botërore është e gatshme të ndajë mjete për ndërtimin e koridorit Durrës-Kukës-Morinë

• VMRO DPMNE paraqiti kandidatin për president të Maqedonisë

• Shtatë të vrarë në kufirin pakistano-afgan

• Kolin Pauell lavdëron Indinë dhe Pakistanin

• Në Irak vriten 4 pjesëtarë të Misionit ndërkombëtar baptist

• Nga shpërthimi i gazit në Rusi kanë vdekur 15 persona dhe rreth 50 të tjerë ndodhen nën rrënoja

• Nga forcat saudite është një lider i Al Kaidës me pseudonimin "poet"

• Tetë vetë të vdekur dhe rreth 50 të tjerë ndodhen nën rrënoja nga shpërthimi i gazit në Rusi

• Në luftimet ndërmjet forcave pakistaneze dhe luftëtarëve të fiseve, janë vrarë 5 persona

• Nga një shpërthim gazi në Rusi kanë humbur jetën 4 persona

• Nga Guatanamo janë liruar 23 afganë dhe 3 pakistanezë

• Policia spanjolle ka identifikuar 6 marokenë si autorë të shpërthimeve në Madrid

• Në Mosul është vrarë një grua irakiane përkthyese

• Irak: në qytetin Mosul vriten tre civilë amerikanë

• Zapatero tha se lufta në Irak dhe pushtimi aktual i atij vendi është një katastrofë

• Irakianët optimistë për të ardhmen

Presidenti Rugova dënon plagosjen e të riut serb

 

Prishtinë, 16 mars 2004 - Presidenti i Kosovës Ibrahim Rugova e dënon plagosjen e të riut të nacionalitetit serb, Jovica Iviq, që ndodhi të hënën mbrëma në Çagllavicë të Prishtinës.

Presidenti kërkon që ky akt kriminal të hetohet dhe përgjegjësit të nxirren para drejtësisë.

Presidenti i Kosovës thekson se duhet të ketë siguri për të gjithë qytetarët e Kosovës, ndërsa incidentet kriminale duhet të hetohen nga organet për zbatim të ligjit. Në pritje të kësaj, të gjithë qytetarët duhet të sillen në përputhje me dispozitat për sundim të ligjit.

 

 

Kryeministri Rexhepi dënon sulmin ndaj një serbi në një fshat afër Prishtinës

 

Prishtinë, 16 mars 2004 - Edhe gjatë ditës së sotme rruga Prishtinë- Shkup vazhdon të jetë e bllokuar nga serbët lokalë për shkak se mbrëmë me armë zjarri është plagosur një serb në Llapnasellë, pesë km larg Prishtinës.

Atje ndodhen forca të KFOR-it, të policisë së UNMIK-ut dhe të SHPK-së për të penguar ndonjë incident eventual ndërmjet qytetarëve.

Sulmin mbi një pjesëtar të kombësisë serbe e ka dënuar edhe kryeministri Bajram Rexhepi, duke e quajtur akt kriminal. Aktet e tilla nuk i shëbejnë paqes dhe zhvillimit të demokracisë në Kosovë dhe autorët e sulmeve të tilla duhet të nxirren para derjtësisë, thuhet në një deklaratë të Bajram Rexhepit, duke kundërshtuar njëherit bllokimin e rrugëve.

 

 

Admirali Xhonson tha se pavarësisht nga angazhimet e NATO-s edhe në pjesë të ndryshme të botës, Kosova mbetet prioritet

 

Prishtinë, 16 mars 2004 - Komandanti i krahut jugor të NATO-s admirali Gregori Xhonson gjatë qëndrimit të djeshëm në Prishtinë ka thënë se trupat e NATO-s do të mbesin të përkushtuara në Kosovë për vendosjen e një ambienti të qetë për të gjithë qytetarët. Kështu u shpreh admirali Xhonson në fund të vizitës në Prishtinë. Ai ka theksuar se pavarësisht nga angazhimet e NATO-s edhe në pjesë të ndryshme të botës, Balllkani, përfshirë këtu Kosovën mbetet prioritet. Në një takim që Presidenti Rugova pati me admiralin Xhonson, e ka njoftuar atë me të arritura dhe objektivat e institucioneve të Kosovës. Presidenti Rugova ka thënë se gjendja e sigurisë në Kosovë në përgjithësi është më e mirë dhe shtoi se ka incidente, sikur këto ditëve të fundit, por së bashku me KFOR-in, UNMIK-un dh SHPK-në do të merren masa që të kjijohet një ambient më i sigurt, tha presidenti Rugova.

 

Ai nënvizoi gjithashtu edhe përmbushjen e standardeve, duke insistuar në njohjen formal etë pavarësisë së Kosovës. "Kjo do të përshpejtonte proceset e brendshme dhe do të qetësonte këtë pjesë të botës", tha Presidenti Rugova.

 

Kryeadministratori i Kosovës Hari Holkeri, pas takimit me admiralin Xhonson tha se në këtë vjeshtë në Kosovë do të mbahen zgjedhjet parlamentare dhe theksoi se këto zgjedhje duhet të zhvillohen në një atmosferë të qetë. Ai tha se për këtë falenderon profesionalizmin e forcave paqeruajtëse të cilat janë të gatshme të vendosin sigurinë në gjithë Kosovën dhe për çdo kë, tha z. Holkeri.

Poashtu Xhonson është takuar edhe me Kryeministrin Bajram Rexhepi.

"Jam i informuar për disa shpërthime dhe bomba të vendosura në Prishtinë në vende të ndryshme, deri te rezidenca e Presidentit Ibrahim Rugova. Unë dua t'i siguroj qytetarët e Kosovës dhe ta bëj shumë të qartë se këto veprime janë të papranueshme dhe NATO-ja nuk do të tolerojë gjëra të këtilla, ngase këto shpërthime ishin të drejtuara jo vetëm kundër komunitetit ndërkombëtar në Kosovë por edhe kundër presidentit Rugova", ka theksuar admirali Gregori Xhonson.

 

Ai shtoi se këto dukuri janë pengesa edhe për implementimin e standardeve për Kosovën. Aktet e tilla duhet ndaluar edhe për faktin, ngase ato po dëmtojnë edhe progresin, që është arritur në Kosovë gjatë pesë vjetëve të pasluftës. Admirali Xhonson ka premtuar angazhimin e KFOR-it edhe në garantimin e zgjedhjeve të lira, tha Xhonson.

Komandanti i NATO-s për Evropën Juglindore, admirali Gregori Xhonson tha se forcat paqerujatëse nuk do të aplikojnë masa shtesë të sigurisë në Kosovë, por ato do të jenë vigjilente në kryerjen e detyrave të tyre. Ai shtoi se gjendja në Kosovë mbetet stabile dhe Kosova renditet ndër vendet me një shkallë të kënaqshme të sigurisë.

 

 

Pjesëtarët e KFOR-it shpëtojnë nga linçimi Bahti Miftarin në Çagllavicë

 

Prishtinë, 16 mars 2004 - Serbët lokalë në fshatrat Graçanicë, Çagllavisë afër Prishtinës mbrëmë dhe sot kanë shkaktuar disa incidente, duke sulmuar autoveturat e shqiptarëve që kalonin rrugës dhe shtëpinë e një shqiptari.

 

Serbët kanë sulmuar shtëpinë e Bahti Miftarit skaj Çagllavicës, duke thyer xhamat e derës dhe të dritareve, gjoja se nga ajo shtëpia dikush ka shtënë me armë! Pjesëtarët e KFOR-it e kanë nxjerrë pronarin e shtëpisë dhe e kanë shpëtuar nga linçimi.

Ndryshe fshati Llapnasellë, ku është plagosur një i ri serb, është etnikisht i pastër dhe është i banuar vetëm nga serbët dhe bën për të dyshuar se kush e ka plagosur atë, ndonëse serbët apriori kanë akuzuar shqiptarët.

 

 

Në maj mund të bëhet nënshkrimi i kontratës kolektive

 

Prishtinë, 16 mars 2004 - Në një takim të Këshillit konsultativ trepalësh mes Qeverisë, BSPK-së dhe OEK-së është arritur pajtimi që më 12 maj të jetë gati teksti për nënshkrimin e kontratave kolektive. Poashtu palët kanë rënë dakord që të bëhet pensionimi i parakohshëm, ndonëse nuk janë përcaktuar krejtësisht çështjet, duke lënë mundësinë që grupi i punës dhe Ministria e Punës të hartojnë një ligj për pensionimin e parakohshëm.

Në emër të Qeverisë, ministri i Punës Ahmet Isufi tha se duhet të bëhet dallimi në mes të pensionistëve të cilët kanë kontribuar në fondin pensional dhe atyre që marrin pensionin në bazë të moshës e që nuk bazohet në kontributet e mëhershme.

Në këtë takim të Këshillit Trepalësh është arritur pajtimi që të përgatitet teksti për "paktin social" si propozim orientues për dy vjet, tha Isufi.

U tha gjithashtu se kontrata kolektive është një marrëveshje nacionale në nivel të Kosovës e cila përfshin të gjitha kategoritë e punëtorëve në ekonominë shoqërore dhe private, ndërkohë që ajo për sektorin publik ende është në shqyrtim e sipër.

 

 

Në Prishtinë u mbajt një protestë kundër arrestimeve të eprorëve të TMK-së

 

Prishtinë, 16 mars 2004 - Sot në Prishtinë dhe në qytete të tjera të Kosovës, në organizim të shoqatave të dala nga lufta, po mbahen protesta kundër arrestimeve të ish-pjesëtarëve të UÇK-së e tani eprorë të TMK-së.

Në protestën e organizuar në Prishtinë u tha se pjesëmarrësit janë mbledhur për të shprehur revoltën e tyre kundër politikës së UNMIK-ut dhe politikës së gabuar të institucioneve të Kosovës që po ndërmarrin veprime kundër vlerave të luftës çlirimtare.

 

Folësit thanë se po bëhen abuzime në emër të drejtësisë dhe se ende po veprojnë shërbimet e UDB-së e të policisë serbe. U tha poashtu se po përdoret gjykata e Hagës pa kurrfarë bazash.

Gjithashtu gjatë protestës u kërkua nga UNMIK-u të rishqyrtojë politikën e tij ndaj Kosovës dhe ndaj luftës së UÇK-së dhe të mos merret me arrestimet e përgatitura nga ata që i ka luftuar UÇK.

 

 

Një grup serbësh të Graçanicës sulmuan sot disa qytetarë shqiptarë

 

Prishtinë, 16 mars 2004 - Sot, në Graçanicë në orën 7:20 të mëngjesit, disa qytetarë serbë sulmuan Ramiz Bytyçin nga fshati Shashkoc i Prishtinës, derisa ai po udhëtonte me kombibusin e tij për në Prishtinë, për t'i bartur arsimtarët nga Prishtina për t'i dërguar ata në shkollat fillore në Kishnicë e Shashkoc.

Serbët lokalë këtë sulm e kanë bërë në shenjë hakmarrjeje për plagosjen e mbrëmshme të një serbi në fshatin Llapnasellë.

Ramiz Bytyçi tha se grupi i serbëve e kishte gjuajtur kombibusin e tij me gurë dhe gjatë kësaj kohe lëndime të lehta kanë pësuar dy udhëtarë, njëri nga të cilët quhet Mehmet Emiri.

Po ashtu z. Bytyçi tha se pjesëtarët e Shërbimit Policor të Kosovës në Graçanicë nuk janë të interesuar që t'i parandalojnë eksceset e serbëve. Ndonëse ai rastin e ka paraqitur në stacionin policor në Graçanisë, pjesëtarët e këtushëm të SHPK-së atë e kanë pritur me përbuzje.

Ramiz Bytyçi një kontratë njëvjeçare me Kuvendin Komunal të Prishtinës për bartjen e arsimtarëve nga Prishtina në Kishnicë e Shashkoc dhe anasjelltas.

 

 

Banorët e lagjes së Spitalit dhjetë ditëve pa ujë të pijes

 

Prishtinë, 16 mars 2004 - Nga 16 deri më 25 mars të këtij viti në Lagjen e Spitalit, përkatësisht në rr. "Muharrem Fejza" në Prishtinë do të ndërpritet rrjeti i ujësjellësit, për shkak se në këtë lagje është duke u punuar rrjeti i ri i ujësjellësit.

Ndërmarrja e ujësjellësit "Prishtina", banorët e këtushëm do t'i furnizojë me ujë me anë të cisternave dy herë në ditë dhe luten qytetarët e këtushëm që për larje t'i përdorin puset e tyre.

 

 

Nesër në Prishtinë LDK-ja organizon një protestë paqësore kundër dhunës

 

Prishtinë, 16 mars 2004 - Lidhja Demokratike e Kosovës, sesër, më 17 mars, në orën 12:00 në Prishtinë organizon një protestë paqësore. Kjo protestë organizohet si reagim ndaj sulmit me bombë më 12 mars kundër institucionit të Presidentit të Kosovës dhe kundër dhunës dhe akteve të tjera kriminale, që po e rrezikojnë sigurinë, të ardhmen dhe pavarësinë e Kosovës.

Sulmi i 12 marsit në rezidencën e Presidentit të Kosovës dhe Kryetarit të LDK-së, Ibrahim Rugova, është dënuar njëzërit si një sulm i rëndë kriminal i drejtuar kundër institucionit më të lartë shtetëror të Kosovës dhe kundër angazhimeve shtetformuese, lirisë dhe pavarësisë së Kosovës.

 

 

Rreth 300 minatorët e "Trepçës" nuk pranuan ofertën që të fillojnë punën grupe-grupe

 

Stan Tërg, 16 mars 2004 - Rreth 300 minatorë të "Trepçës", të cilët kanë mbetur të papërfshirë në punë dhe nuk kanë përfituar pensionimin e parakohëshëm, nuk pranuan dje ofertën e stafit menaxhues që të fillojnë punën grupe-grupe.

 

Siç ishin marrë vesh para dy javësh me zyrtarët udhëheqës, minatorët u tubuan dje në lokalet e Minierës në Stan Tërg me ç'rast janë njoftuar për mënyrën e aktivizimit të tyre në punë nga Miftar Hyseni menaxher i minierës dhe Nazmi Mikullovfci menaxher i kombinatit "Trepça".

 

 

Agjencia per Regjistrimin e Bizneseve shënoi njëvjetorin e punës

 

Prishtinë, 16 mars 2004 - Agjencia per Regjistrimin e Bizneseve dhe markës tregtare që funksionon në kuadër të Ministrisë së Industrisë dhe Tregtisë dje në njëvjetorin e fillimit të punës bëri prezentimin e aktivitetit të deritashëm. Me këtë rast kryeshefi i kësaj agjencie Haxhi Ramaj tha se gjatë një viti ky Agjencion ka përmbyllur punën të cilën e bënte administrata e UNMIK-ut dhe njësia për regjistrim të bizneseve deri mars të vitit 2003.

 

Ai nënvizoi se deri më tash bizneset e reja të riregjistruar janë mbi 29 mijë ndërkaq bizneset e shuara për shkaqe të ndryshme janë 823. Sipas z. Ramaj, Agjencia ka punuar në mënyrë shumë korekte dhe në pajtim me dispozitat ligjore në fuqi.

 

 

Biblioteka Kombëtare e Universitare nënshkroi një marrëveshje me Kompaninë "Ex Libris"

 

Prishtinë, 16 mars 2004 - Biblioteka Kombëtare e Universitare e Kosovës nënshkroi dje një marrëveshje me Kompaninë "Ex Libris" nga Izraeli me selin në Londër nëpërmjet së cilës hyn në sistemin elektronik bibliotekar nga muaji prill i këtij viti.

"Biblioteka Kombëtare e Universitare e Kosovës në këtë mënyrë po hynë në mesin e bibliotekave më të njohura anekënd botës, të cilat e kanë instaluar këtë sistem", tha në fjalën e tij drejtori i kësaj biblioteke Salih Bashota me rastin e nënshkrimit të marrëveshjes ndërmjet Bibliotekës Kombëtare e Universitare me Kompaninë izraelite "Ex Libris" do të hyjë në botën e informacionit dhe të komunikimit modern si partnere e barabartë me bibliotekat nacionale evropiane e më gjerë.

Ndërkaq, përfaqësuesi i kompanisë "Ex Libris" duke folur për veprimtarinë e saj ndër të tjera tha se Biblioteka Kombëtare e Universitare duhet të arrijë një zhvillim të dukshëm në aspektin e informatikës.

 

 

Komuniteti çam kërkon nga Parlamenti shqiptar që të votojë për njohjen e çështjes së tyre nga autoritetet e Greqisë

 

Tiranë, 16 mars 2004 - Komuniteti çam në Shqipëri protestoi dje përpara Parlamentit, duke kërkuar prej deputetëve që të votojnë pro-Rezolutës së inicuar nga Partia e Ballit Kombëtar për njohjen e çështjes çame prej autoriteteve të Greqisë, si hap i parë për njohjen e pronave të tyre.

 

Protesta e detyroi byronë parlamentare që të kërkojë një interpelancë të ministrit të Punëve të Jashtme Kastriot Islami për çështjen çame përpara se të ndërmerret votimi për Rezolutën.

Protestuesit pastaj u zhvendosën para Ambasadës greke me parullat drejtuar autoriteteve të Athinës për të njohur çështjen çame dhe për të respektuar të drejtat e njeriut.

 

 

Banka Botërore është e gatshme të ndajë mjete për ndërtimin e koridorit Durrës-Kukës-Morinë

 

Tiranë, 16 mars 2004 - Drejtues të Bankës Botërore pohuan se janë të gatshëm që në mënyrë të përpjestuar me Qeverinë shqiptare dhe me investitorët privatë të ndajnë mjete për ndërtimin e koridorit Durrës - Kukës - Morinë. Banka Botërore ka ofruar një kredi prej 30 milion dollarësh për ndërtimin e kësaj rruge, e cila është në fazë parapërgatitore dhe implementimi i fondit fillon në muajin qershor të këtij viti.

 

 

VMRO DPMNE paraqiti kandidatin për president të Maqedonisë

 

Shkup, 16 mars 2004 - Sashko Kedev do të jetë kandidati presidencial i partisë më të madhe opozitare të Maqedonisë, VMRO DPMNE, u vendos mbrëmë në konventën e kësaj partie në Shkup. Ndërkohë pritet që partia në pushtet, Lidhja Social-Demokrate të zgjedhë kandidatin e saj të mërkurën.

Më herët kandidaturat e tyre i kanë paraqitur Arbër Xhaferi i Partisë Demokratike Shqiptare (PDSH), Gëzim Osdreni i Bashkimit Demokratik për Integrim (BDI) dhe Lube Boshkovski, si kandidat i pavarur.
Ministria e Drejtësisë bëri të ditur se deri më tani tetë kandidatë kanë filluar mbledhjen e 10 mijë nënshkrimeve që janë të nevojshme për të qenë kandidat presidencial.

 

 

Shtatë të vrarë në kufirin pakistano-afgan

 

Islamabad, 16 mars 2004 - Zyrtarët ushtarakë pakistanezë thanë se të paktën 7 persona u vranë gjatë luftimeve të ashpra midis forcave të sigurimit dhe pjestarëve të fiseve që dyshohet se strehojnë luftëtarë të al-Kaidës dhe talebanë afër kufirit me Afganistanin.

 

Një zëdhënës ushtarak u tha gazetarëve në Islamabad se katër paraushtarakë dhe tre ekstremistë, përfshirë një luftëtar të huaj, u vranë gjatë luftimeve. Ai tha se luftimet shpërthyen sot në mëngjes, kur trupat paraushtarake hynë në një fshat afër qytetit Wana, në rajonin fisnor të Vaziristanit jugor.

 

 

Kolin Pauell lavdëron Indinë dhe Pakistanin

 

Nju Delhi, 16 mars 2004 - Sekretari amerikan i Shtetit, Kolin Pauell, lavdëroi Indinë dhe Pakistanin lidhur me përpjekjet për zgjidhjen e mosmarrëveshjeve të tyre të vjetra rreth Kashmirit.

Pauell i bëri këto komente sot për gazetarët në Delhi pas bisedimeve me ministrin e Jashtëm indian Jashuant Sihna. Ai tha se ishte i kënaqur për faktin që numri i separatistëve myslimanë që kalojnë në Kashmirin indian ka rënë ndjeshëm.

Pauell tha se do të diskutojë për këtë çështje me Presidentin pakistanez Pervez Musharraf gjatë ndalesës tjetër të turneut në Azinë Jugore.

Sekretari Pauell tha se ka gjithashtu në plan të kërkojë nga zyrtarët pakistanezë më shumë informacione mbi rrjetin e përhapjes së armëve bërthamore të kryesuar nga shkencëtari pakistanez Abdul Kadeer Khan.

 

 

Në Irak vriten 4 pjesëtarë të Misionit ndërkombëtar baptist

 

Mosul, 6 mars 2004 - Tre amerikanë, pjesëtarë të Misionit ndërkombëtar baptist në Irak, janë vrarë dje me armë zjarri në Mosul, kurse dy të tjerë janë plagosur nga një automjet në lëvizje, ka bërë të ditur ky Mision, njofton Rojter.

 

Ata kishin qenë në Irak "për të hulumtuar nevojat për projekte të ndihmave humanitare në pjesën veriore të Irakut". Sipas njoftimeve më të reja të AP-së, njëri nga baptistët e plagosur ka vdekur sot (e martë), kështu që nga sulmi i djeshëm klanë vdekur katër baptistë.

 

 

Nga shpërthimi i gazit në Rusi kanë vdekur 15 persona dhe rreth 50 të tjerë ndodhen nën rrënoja

 

Arkangelsk, 16 mars 2004 - Ekipet e shpëtimit kanë nxjerrë trupat e pajetë të 15 personave, ndër të cilët dy fëmijë, nga rrënojat e ndërtesës shumëkatëshe në qytetin rus Arkangelsk, por besohet se nën rrënoja ndodhen edhe rreth 50 të tjerë, njofton Rojter. Në shpërthimin e gazit që ndodhi sot herët në mëngjes është shkatërruar plotësisht një pjesë e ndërtesës nëntëkatëshe në të cilën ndodheshin 36 banesa. Deri tash janë shpëtuar 22 persona të gjallë.

 

 

Nga forcat saudite është një lider i Al Kaidës me pseudonimin "poet"

 

Riad, 16 mars 2004 - Një militant jemenas, i vrarë dje së bashku me një militant tjetër, sauditin Ibrahim bin Abdul Aziz, në një shkëmbim zjarri me forcat e sigurimt saudit, ka qenë udhëheqës i operacioneve të Al Kaidës në Arabinë Saudite dhe vendet e tjera të Gjirit, kanë bërë të ditur burimet saudite të sigurimit, njofton AFP.

 

Militanti i vrarë është identifikuar të jetë Abu Hazim al-Shair, i njohur edhe si Kahlid Ali Haxh dhe me pseudonimin "poet", kanë thënë zyrtarët. "Ai ishte një figurë shumë e rëndësishme e Al Kaidës në Arabinë Saudite" , ka thënë një zyrtar antiterrorist saudit. Ai ishte i dyshimtë të ketë dhënë urdhër për sulmet në Riad, ku u vranë 52 njerëz në maj dhe nëntor 2003, citohet të ketë thënë një burim tjetër.

 

 

Tetë vetë të vdekur dhe rreth 50 të tjerë ndodhen nën rrënoja nga shpërthimi i gazit në Rusi

 

Arkangelsk, 16 mars 2004 - Ekipet e shpëtimit kanë nxjerrë trupat e pajetë të 8 personave nga rrënojat e ndërtesës shumëkatëshe në qytetin rus Arkangelsk, por besohet se nën rrënoja ndodhen edhe rreth 50 të tjerë, ka bërë të ditur Ministria ruse për situata emergjente. Ndër kohë rreth njëzet të mbijetuar janë transferuar në spoital.

Në shpërthimin e gazit që ndodhi sot në herët në mëngjes është shkatërruar plotësisht një pjesë e ndërtesës nëntëkatëshe në të cilën ndodheshin 36 banesa.

 

 

Në luftimet ndërmjet forcave pakistaneze dhe luftëtarëve të fiseve, janë vrarë 5 persona

 

Vana, Pakistan, 16 mars 2004 - Forcat paramilitare pakistaneze kanë sulmuar sot (e martë) luftëtarët e fiseve, që u kanë dhënë strehim militantëve të Al Kaidës afër kufirit malor afgan dhe gjatë përleshjeve të ashpra janë vrarë pesë persona, kanë bërë të ditur zyrtarët, njofton Rojter.

 

Një nga zyrtarët pakistanez ka saktësuar se janë janë vrarë dy paraushtarakë dhe janë plagosur katër të tjerë, ndërsa nga nga luftëtarët e fiseve strehuese janë vrarë të pakten tre vetë dhe janë plagosur disa të tjerë. Luftimet kanë ndodhur vetëm një ditë para vizitës së Kolin Pauellit në Pakistan.

 

 

Nga një shpërthim gazi në Rusi kanë humbur jetën 4 persona

 

Moskë, 16 mars 2004 - Të pakten katër vetë kanë humbur jetën dhe 11 të tjerë janë lënduar nga një shpërthim i dyshimtë gazi në qytetin Arkangels, nga i cili u shkatrërrua një pjesë e një blloku banesash nëntëkatëshe në veri të Rusisë, kanë bërë të ditur zyrtarët, njofton, BBCWorld.

 

Rreth 70 njerëz supozohet se ende janë të ngujuar nën rrënoja. Televizioni shtetëror ka dhënë pamje të përpjekjeve të ekipeve të shpëtimit dhe të aeroplanëve në dhënien e ndihmave. Shkaku i shpërthimit duket të jetë rrjedhja e gasit, kurse supozimet të jetë akt terrorist nuk është vërtetuar asgjë.

 

 

Nga Guatanamo janë liruar 23 afganë dhe 3 pakistanezë

 

Guantanamo, 16 mars 2004 - Njëzet e tre afganë dhe tre pakistanezë, që janë mbajtur në arrest në bazën e marinës amerikane në Gjirin Guatanamo, janë liruar, ka bërë të ditur ushtria amerikane. Ata kanë shkuar në Afganistan dhe në Pakistan, kanë thënë zyrtarët. Në njoftim thuhet se deri tash janë liruar gjithsej 119 të burgosur, kurse 12 janë transferuar për vazhdim të arrestimit në vendet e tyre.

 

 

Policia spanjolle ka identifikuar 6 marokenë si autorë të shpërthimeve në Madrid

 

Madrid, 16 mars 2004 - Policia spanjolle beson se ka identifikuar gjashtë militantë islamikë marokenë, që kanë kryer shpërthimet në Madrid, të cilat morën jetën e 200 njerëzve dhe ndihmuan opozitën socialiste të vijë në pushtet, kanë bërë të ditur sot (e martë) mediat spanjolle, njofton Rojter.

 

Në këto njoftime thuhet gjithashtu se policia beson se një nga marokenët, që tashmë është arrestuar, mund të ketë lidhje edhe me bombëvëniet e majit të kaluar në Kazablanka, ku u vranë 45 njerëz, përfshirë edhe 12 vetëvrasësit me bombë. Policia ende s=ka dhënë komentet e veta.

 

 

Në Mosul është vrarë një grua irakiane përkthyese

 

Mosul, Irak, 16 mars 2004 - Një grua irakiane përkthyese, që punonte për ushtrinë amerikane është vrarë sot (e martë), kurse babai i saj është plagosur rëndë në një sulm në qytetin verior Mosul, kanë bërë të ditur dëshmitarët dhe policia, njofton Rojter.

 

Në njoftim thuhet se përkthyesja po shkonte në punë në bazën kryesore ushtarake amerikane në Mosul, kur vetura e saj u godit me breshëri armësh të vogla zjarri në lagjen veriore al-Mutana.

Kjo vrasje është bërë vetëm një ditë pasi personat e armatosur kishin vrarë tre civilë amerikanë dhe kishin plagosur edhe dy të tjerë në Mosul.

 

 

Irak: në qytetin Mosul vriten tre civilë amerikanë

 

Mosul, 16 mars 2004 - Zyrtarë në qytetin verior irakian Mosul thonë se tre civilë amerikanë u vranë dhe dy të tjerë u plagosën të hënën në një incident të shtënash me armë zjarri.

Zyrtarë të policisë thonë se viktimat po udhëtonin në një makinë, kur persona të paidentifikuar hapën zjarr kundër tyre. Në njoftim thuhet se pesë amerikanët punonin për një organizatë vullnetare jo qeveritare. Deri tani nuk janë dhënë hollësi të tjera.

 

 

Zapatero tha se lufta në Irak dhe pushtimi aktual i atij vendi është një katastrofë

 

Madrid, 16 mars 2004 - Kryeministri i ri i Spanjës, Hoze Luis Rodriguez Zapatero, thotë se do t'i tërheqë trupat spanjolle nga Iraku nëse ato dhe forcat e tjera të koalicionit nuk vihen nën kontrollin e Kombeve të Bashkuara.

Zapatero tha se lufta e udhëhequr nga Shtetet e Bashkuara në Irak dhe pushtimi aktual i atij vendi është një katastrofë. Ai tha se ka në plan të sjellë në atdhe një mijë e 300 ushtarët spanjollë nëse forcat e koalicionit nuk vihen nën kontrollin e OKB-së brenda 30 qershorit, kur atje do të marrë pushtetin një qeveri kalimtare irakiane. Por ai tha se Spanja nuyk do të tërhiqet nga lufta kudnër terrorirzmit.

 

 

Irakianët optimistë për të ardhmen

 

Bagdad, 16 mars 2004 - Gati një vit pas luftës në Irak ka shenja se shumica e irakianëve janë në favor të një autoriteti qendror të fuqishëm për vendin e tyre në vend të një federate.

Gati 80 përqind e të pyeturve në një anketë kombëtare të komisionuar nga BBC-ja dhe transmetues të tjerë shprehin preferencë për një shtet unitar megjithëse kushtetuta kalimtare e nënshkruar javën e kaluar ofron një sistem federal.

Anketa jep një vizion disi optimist të Irakut. Më shumë se gjysma e të pyeturve, 57 përqind, thonë se jeta e tyre është më e mirë sesa përpara luftës.

  |  KULTURË  |  HISTORI  |   POLITIKË  |  OPINIONE  |  ADRESARI  |  ARKIVI  |