|  KULTURË  |  HISTORI  |   POLITIKË  |  OPINIONE  |  ADRESARI  |  ARKIVI  | 

Dy lajme nga Gjilani

Gjenerali amerikan Rick Erlandson takoi në Gjilan udhëheqjen e komunës

 

Gjilan, 16 mars 2004 - Komandanti i Brigadës Shumëkombëshe të Lindjes, gjenerali Rick Erlandson ka vizituar sot Gjilanin, ku është takuar me Lutfi Hazirin, kryetar dhe Xhemajl Hysenin, zëvendëskryetar të komunës dhe gjatë një bisede me ta është njoftuar me gjendjen dhe zhvillimet e përgjithshme në këtë komunë të sektorit lindor, e cila njëherësh është qendër e rajonit.

Lutfi Haziri tha se Gjilani cilësohet si qytet i paqes dhe i përparimeve në Kosovë, si për nga niveli i sigurisë, ashtu edhe në planin e integrimit të komuniteteve, të cilat sot përfaqësohen në të gjitha strukturat qeverisëse lokale.

Falë angazhimit të lidershpit të këtushëm, në komunën e Gjilanit është rritur toleranca ndëretnike, por dhe qytetarët gjithnjë e më tepër po kuptojnë se e ardhmja e tyre nuk mund të ndërtohet në urrejtje, por në paqe dhe mirëkuptim, tha Haziri.

Ne do të mbetemi të përkushtuar edhe në të ardhmen për të punuar në relaksimin e raporteve ndërmjet komuniteteve që jetojnë në komunën tonë, përmes projekteve të përbashkëta, të cilat krijojnë mundësi për stabilizim dhe riintegrim më të shpejtë të tyre.

U tha se një përparim i mirë mund të konsiderohet edhe integrimi i komuniteteve në biznesin privat, i cili punëson mbi 10 mijë punëtorë, nga të gjitha etnicitetet. Ndërkaq ndërmarrjet shoqërore në komunën e Gjilanit, e cila dikur identifikohej sidomos për nga prodhimtaria e tekstileve dhe e duhanit, tani ndodhen në bllokadë dhe në pritje të privatizimit.

Edhe komuna jonë, si një nga rajonet e mëdha të Kosovës, ku është i koncentruar një numër mjaft i madh i ndërmarrjeve shoqërore, është e interesuar që të bëhet sa më shpejt privatizimi i tyre dhe t`i hapen mundësi për punë biznesit privat, i cili do të krijojë edhe vende të reja pune.

Një projekt shumë i rendësishëm për rajonin dhe të ardhmen e tij, nga Lutfi Haziri u cilësu bashkëpunimi i komunave Gjilan, Kumanovë e Preshevë, një projekt ky që ka fituar përkrahjen edhe të Këshillit të Evropës, Paktit të Stabilitetit dhe Institutit Lindje-Përendim, për faktin se një rajon i ndjeshëm po dëshmon guxim dhe gatishmëri për të lënë anash të kaluarën dhe për të ndërtuar perpsektiva të reja.

Ndërtimi i rrugës Gjilan-Shurdhan-Stançiq-Kumanovë, e cila në pjesën e Zhegrës ka filluar të rregullohet para disa ditësh, sipas një projekti të Ministrisë së Komunikacionit dhe Transportit, do të përshpejtonte këto procese, kanë pohuar udhëheqësit e komunës, Lutfi Haziri e Xhemajl Hysnei, në bisedë me komandantin e kampit “Bondstill”, gjeneralin Rick Erlandson, i cili ka ardhur në këtë mision në Brigadën Shumëkombëshe të Lindjes, para disa ditësh.

Gjenerali Erlandson i ka përshëndetur përparimet që janë bërë në komunën e Gjilanit dhe e ka inkurajuar udhëheqjen e saj që të vazhdojë të punojë në këtë drejtim. (Ilmi Musliu)

 

 

Gjilan: Planifikohet ndërtimi i një banese kolektive për të pastrehët

 

Gjilan, 16 mars 2004 - Ka shumë shpresa për familjet e pastreha në komunën e Gjilanit që nga ky vit të kenë një banesë kolektive, ku do të mund të sistemohen. Komuna ka përgatitur projektin për këtë qëllim dhe shpreson se do të gjejë përkrahjen edhe të donatorëve ndërkombëtarë.

Alban Qerimi, ushtrues i detyrës së drejtorit në Gjeodezi, Kadastër, Pronë dhe Banim, ka thënë se vlera e projketit do të jetë mbi 1 milion €uro.

Janë disa familje nga rajoni i Gjilanit që tani për tani janë të vendosura në konviktin e nxënësve dhe problemi i tyre duhet të zgjidhet, sepse objekti ku ndodhen të strehura ka destinim tjetër.

Banesa kolektive P+4, do të ndërtohet në lagjen "Bregu i djegur" dhe sipas z. Qerimi, komuna ka planifikuar t`i ndajë nga buxheti i saj 280 mijë €uro dhe po kaq mjete i ka premtuar Ministria e Punës dhe Mirëqenies Sociale, ndërsa pjesa tjetër do të investohej nga donatori.

Ka shumë gjasa që projketi të mbështet nga CDF-i zviceran, me të cilin janë duke u zhvilluar bisedime, ka thenë Alban Qerimi. CDF-i ka financuar projekte të këtilla në disa qendra të Kosovës.

Shërbimet përkatëse, në bashkëpunim me Qendrën për punë sociale kanë evidentuar familjet e pastreha dhe në banesën kolektive do të kenë vend rastet më specifike, nga të gjitha komunitetet.

Do të jetë një ndërtesë bashkëkohore, ku në hapësirën e destinuar për banim do të mund të sistemohen më se 25 familje, ndërsa kati i parë i saj do të përbëhet prej hapësirës afariste, e cila do t`iu ndahet banuesve, në mënyrë që ata të kenë mundësi në të ardhmen për të vetekzituar.

Kriteret për seleksionimin e përfituesve do të jenë të rrepta dhe askush nuk do të ketë mundësi të sigurojë strehim në banesën e parë kolektive në Gjilan, nëse nuk meriton. (I.M.)