Mitrovicë: Zëvendëskryetari i Kuvendit të Komunës, M. Ibrahimi, reagon ashpër ndaj dy incidenteve të fundit të ekstremistëve serbë

Mitrovicë, 16 mars 2004 / TN / Hysni SYLA - Zëvendëskryetari i Kuvendit të Komunës, Mursel Ibrahimi, ka reaguar ashpër ndaj dy incidenteve të fundit që i kanë shkaktuar ekstremistët serbë në pjesën veriore të qytetit.

Zëvendëskryetari Ibrahimi me këtë rast dënon fuqimisht veprimin e ekstremistëve serbë, të cilët kanë penguar banorët shqiptarë të Suhadollit që t’i vendosin shenjat e sinjalizimit në mezhdat e pronave të tyre që kufizohen me pronat serbe në lagjen *Kroi i Vitakut*.

Poashtu, zëvendëskryetari Mursel Ibrahimi, dënon ashpër edhe vënjen e zjarrit nga ekstremistët serbë në tendën e Sadri Pecit, të vendosur në oborrin e shtëpisë së tij në lagjen “Kodra e Minatorëve”, të hënën në orët e mbrëmjes.

Zëvendëskryetari Ibrahimi vlerëson se që të dyja këto akte kriminale të ekstremistëve serbë, kanë prapavij politike dhe janë bërë me qëllim të tensionimit të gjendjes në këtë pjesë të qytetit dhe të spastrimit të mëtutjeshëm të saj nga banorët joserbë, në mënyrë që kështu t’i realizojnë synimet e tyre për ndarjen e qytetit, në kohën kur janë arritur rezlutate në relaksimin e gjendjes dhe kur po bëhen përpjekje të mëdha të të gjithë faktorëve për zgjidhjen e problemeve.

Zëvendëskryetari Mursel Ibrahimi kërkon nga faktorët përgjegjës për siguri që të marrin të gjitha masat e nevojshme për zbulimin e akterëve të këtyre akteve kriminale dhe për qitjen e tyre para organeve të drejtësisë, si dhe për pengimin e mëtutjeshëm të akteve të këtilla të dhunës, që kanë për qëllim pengimin e integrimit të qytetit dhe spastrimin etnik të lagjeve veriore nga shqiptarët.