Përmbajtja:

• Holkeri: Zgjedhjet parlamentare mbahen më 23 tetor me lista të mbyllura

• Zhan Mari Geno e vlerëson të papranueshme ekzistencën e strukturave paralele serbe në Kosovë

• Komandanti i krahut jugor të NATO-s Gregori Xhonson sot viziton Kosovën

• LDK edhe njëherë do të dëshmojë se janë njerëz të institucioneve të forta demokratike

• Grupi Ndërkombëtar i Krizave konstaton se nëse Kosova bëhet e pavarur nuk do të ketë asnjë problem

• Federata Panshqiptare Vatra thotë se organizatorët e sulmit ndaj Presidentit Rugova do të dështojnë me turp

• LDK në Nju Jork: Sulm terrorist mbi shtetësinë e Kosovës dhe mbi personalitetin e Presidentit Rugova

• Shoqata "Kosova": Rruga drejt pavarësisë së Kosovës nuk mundet të ndalet me akte qyqare e terroriste

• Kuvendi i Komunës së Mitrovicës dënon ashpër aktin kriminal të sulmit në rezidencën e Presidentit të Kosovës

• Në veri të Kosovës serbët kanë bllokuar pikën kufitare mes Kosovës dhe Serbisë

• Nowicki nuk merr pjesë në Konferencën I Për të Drejtat e Njeriut në Kosovë

• Afër Parisit prej 30 marsit e deri më 4 prill organizohet një festival i kulturës shqiptare

• Familja e Fatmir Haxhiut ia dhuroi Muzeut të Kosovës skicën e betejës së Fushë-Kosovës

• BDI dhe PPD kandidat të përbashkët në zgjedhjet presidenciale në Maqedoni do të kenë Gëzim Osdrenin

• Sot në Tiranë vazhdojnë bisedimet ndërmjet Shqipërisë dhe Bashkimit Evropian rreth asociim-stabilizimit

• Nga rrëshqitja e baltës në Kazahstan kanë humbur jetën 28 persona

• Në Kirkuk është vrarë një anëtar i asamblesë së qytetit dhe truproja e tij

• Policia ka çmontuar një bombë në një makinë afër konsullatës amerikane në Karaçi

• Forcat amerikane kanë vrarë 3 militantë dhe kanë arrestuar 13 të tjerë në Afganistan

• Helikopterët izraelitë kanë bombarduar sot dy fonderi metalike të Hamasit

• Dy palestinezë vetëvrasës kanë vrarë 11 izraelitë

• Spanjë: Socialistët fitojnë në zgjedhjet kombëtare

• Putin konfirmoi fitoren në zgjedhjet e djeshme në Rusi

• Situatë e tensionuar në Gjeorgji

• Gjermania kërkon një mbledhje të zyrtarëve të sigurimit të BE-së

• Planet i ri në sistemin tonë diellor?

• Ethet tropikale në Indonezi kanë marrë jetën e 452 njerëzve

Holkeri: Zgjedhjet parlamentare mbahen më 23 tetor me lista të mbyllura

 

Prishtinë, 15 mars 2004 - Zgjedhjet nacionale në Kosovë do të mbahen më 23 tetor në bazë të një sistemi proporcional. Kështu ka njoftuar dje shefi i UNMIK-ut, Hari Holkeri në konferencën e përbashkët me nënsekretarin e OKB-së Zhan Mari Gieno.

"Kam vendosur t'i pranoj rekomandiemt e grupit punues për zgjedhje me lista të mbyllura të kandidatëve, pasi në rrethana të tashme në Kosovë, ky është sistemi më i përshtatshëm, ndërkaq ky sistem do të bëjë të mundur përfaqësim më të mirë të gruas dhe minoriteteve", ka thënë Holkeri.

 

Sipas këtij sistemi, Kosova është vetëm një njësi zgjedhore dhe zgjedhësi voton për partitë dhe jo për kandidatët. Më pas partitë vendosin në bazë të votave të marra për deputetët e tyre në parlament.

 

Sipas këtij sistemi qytetarët nuk votojnë për kandidatë të përcaktuar me emër të cilët do të përfaqësonin votat e tyre në Parlament, por votojnë për partitë përkatëse.

 

 

Zhan Mari Geno e vlerëson të papranueshme ekzistencën e strukturave paralele serbe në Kosovë

 

Prishtinë, 15 mars 2004 - Nënsekretari i OKB-së Zhan Mari Geno, i cili dje i dha fund një vizite katërditëshe në Kosovë, tha se në Kosovë është arritur përparim i madh, por ende na presin shumë sfida. UNMIK-u po i ndihmon Kosovës dhe ende është herët të thuhet se ku do të arrijë procesi deri në në mesin e vitit 2005, theksoi Geno në konferencën me gazetarë.

 

Ai tha se ekzistimi i strukturave paralele serbe në Kosovë është i papranueshëm dhe ka kërkuar zhbërjen e tyre. "Mendoj se është absolutisht gabim të kemi pushtete të ndryshme, apo dualizëm pushtetesh, ngase Kosova duhet të administrohet nga vetë Kosova", tha Geno.

 

Ai po ashtu ka nënvizuar se plani për implementimin e standardeve kërkon edhe pak kohë. Njëherit konfirmoi mbështetjen e plotë ndaj vendimit të Holkerit për vazhdimin e privatizimit.

 

Sipas tij, procesi i privatizimit duhet të vazhdojë në mënyrë që Kosova të ketë një ekonomi më të zhvilluar dhe të qëndrueshme. Geno po ashtu ka theksuar se privatizimi vetëm nuk mund t'i zgjidhë të gjitha problemet ekonomike, por është njëra prej opcioneve më të mira që kemi.

Ai ka thënë se përparimi është i dukshëm sa i përket funksionimit të institucioneve dhe sigurisë në Kosovë, duke shtuar se Kosova po shndërrohet në një vend të ligjit që kërkon respektim të të gjithëve.

 

Geno ka nënvizuar se standardet nuk duhet të jenë ushtrime artificiale të shkruara në letër, por ato janë qëllime në vetëvete që tregojnë se Kosova po bëhet shoqëri e qëndrueshme, ku sundimi i ligjit do të zbatohet në praktikë.

Nënsekretari i OKB-së për operacione paqeruajtëse ka thënë se kjo periudhë është shumë e rëndësishme për Kosovën dhe ka vlerësuar lartë bashkëpunimin ndërmjet institucioneve vendore dhe atyre ndërkombëtare.

 

Sipas tij, përparimet brenda katër vjetëve në Kosovë janë të dukshme, por megjithkëtë ka pohuar se ende mbetet shumë punë për t'u bërë. Tashmë siguria është në një shkallë më të lartë, ndërkaq sa i përket kthimit të serbëve është vërejtur poashtu përparim.

 

 

Komandanti i krahut jugor të NATO-s Gregori Xhonson sot viziton Kosovën

 

Prishtinë, 15 mars 2004 - Komandanti i krahut Jugor të NATO-s, admirali amerikan Gregori Xhonson sot do të vizitojë Kosovën. Ai do të takohet me shefin e UNMIK-ut, Hari Holkeri, komandantin e KFOR-it Holger Kamerhof, me Presidentin e Kosovës Ibrahim Rugova dhe me Kryeministrin Bajram Rexhepi.

 

 

LDK edhe njëherë do të dëshmojë se janë njerëz të institucioneve të forta demokratike

 

Prizren, 15 mars 2004 - Dega e Lidhjes Demokratike të Kosovës në Prizren shënoi të shtunën 14-vjetorin e themelimit. Në këtë solemnitet përveç zyrtarëve lokalë, merrnin pjesë edhe kryetari i Kuvendit të Kosovës, Nexhat Daci, kryetari i Grupit parlamentar të Kosovës, Sabri Hamiti dhe shumë anëtarë të Lidhjes Demokratike të Kosovës nga qendra dhe nga qytetet e tjera të Kosovës.

 

Të pranishëm në kësë solemnitet rasti ishin edhe anëtarë të Kryesisë së Degës të Partisë Demokratike nga Kukësi.

Kryetari i komunës së Prizrenit, Eqrem Kryeziu, i cili në fillim shprehu indinjatë për aktin e sulmit të Presidencës, tha: "Kurrë nuk e kam pasur më vështirë se sot, kurrë nuk kam qenë në dilemë më të madhe rreth asaj se çka të them, por edhe këtë herë duhet ruajtur gjakftohtësia".

Ajo që i ka dhënë kurajo, që ia ka ruajtur gjakftoftësinë, shtoi zoti Kryeziu, është porosia e Presidentit Rugova që në emër të tij ta përshëndesë masën e madhe të anëtarëve të LDK-së pjesëmarrës në këtë shënim solemn të 14-vjetorit të Degës së LDK-së. Mëtej ai tha: "U vendosa karshi RTK-së.

 

Hedhja e bombës në presidencë nuk është lajmi i parë. Në lajmin e parë dalin disa nëpunës krejt të parëndësishëm". A do të thotë kjo, pyet Kryeziu, se RTK-ja do të ketë lajm të parë vetëm atëherë kur të ndodhë më e keqja? "A po zhvillohet në RTK lufta e klasave, duket se po. LDK-ja nuk do ta përkrahë kurrë luftën e klasave, sepse ky është krim i madh", tha Kryeziu.

Mëtej, duke folur për të arriturat e Kosovës, Eqrem Kryeziu theksoi se kjo është një mrekulli mahnitëse. LDK-ja është fenomen natyror, si rrezet e diellit. "Çfarëdo fortune të kalojë, dielli qëndron. Dhe kjo u arrit falë dy virtyteve të mëdha të presidentit tonë Ibrahim Rugovës e këto janë vendosmëria dhe ndershmëria.

 

Ne në këto letra do të vijojmë të luajmë, sepse rezidenca e Presidentit nuk mbrohet në lagjen e tij. Ajo mbrohet në Prizren, në Therandë, në Sharr, në Gjilan. LDK-ja do t'i fitojë edhe këto zgjedhje, sepse s'ka alternativë tjetër", tha në fund të fjalës së tij, Eqrem Kryeziu.

Duke folur në këtë solemnitet kryetari i Kuvendit të Kosovës Nexhat Daci tha: "Anija që nuk e ka përcaktuar timonin, nuk ndihmohet nga asnjë erë, sado e mirë qoftë ajo. LDK-ja 15 vjet më parë e ka caktuar këtë udhëheqës të anijes sonë, për t'i kapërcyer dallgët e stuhishme nëpër vite", tha Daci.

"LDK-ja është një shtëpi e madhe, këtë e dëshmoni ju, ndërsa unë them se ndiehem shumë mirë në këtë shtëpi, prandaj uroj veten dhe të gjithë juve që të ecim bashkarisht në këtë shtëpi", tha Daci.

 

Sabri Hamiti, anëtar i Këshillit të Përgjithshëm të LDK-së dhe kryetar i Grupit parlamentar të LDK-së në Kuvendin e Kosovës, në fjalën e tij theksoi se LDK-ja është një lëvizje nacionale shqiptare. "Është mirë që kjo të thuhet në Prizren, në qytetin e Lidhjes Shqiptare, se LDK-ja është trashëgimtare e Lidhjes Shqiptare të Prizrenit", tha Hamiti.

"Në Programin tonë është Pavarësia, më tej janë integrimet shqiptare dhe integrimet evropiane, as këtë nuk e fshehim", tha Sabri Hamiti. Ai pastaj shtoi se binomi demokraci, pavarësi është një binom i pashkëputur.

 

Lidhja Demokratike e ka mbjellë kulturën se askush nuk mund të bëhet udhëheqës pa votën e popullit. Ai tha se Lidhja Demokratike është për sistem zgjedhor direkt edhe për deputetë, edhe për kryetar. "Le të jetë një zonë e veçantë për një deputet, me emër e mbiemër dhe me biografi.

 

Këtë e do LDK-ja, ndërsa krejt turma tjetër do diçka tjetër. Lidhja Demokratike e Kosovës kurrë se ka dashur sistemin proporcional. LDK-ja kurrë nuk ka dashur që të falen vendet... Prandaj, ne edhe njëherë do të dëshmojmë se jemi njerëz të institucioneve të forta demokratike", tha në fund të fjalës Sabri Hamiti.

 

 

Grupi Ndërkombëtar i Krizave konstaton se nëse Kosova bëhet e pavarur nuk do të ketë asnjë problem

 

Prishtinë, 15 mars 2004 - Përfaqësuesi i Grupit Ndërkombëtar i Krizave, Nikollas Vajs ka thënë nëse Kosova bëhet e pavarur nuk do të ketë asnjë problem. Ai tha se shumë vende të Ballkanit si Maqedonia dhe Mali i Zi, që më herët e kanë kundërshtuar pavarësinë e Kosovës, kohëve të fundit, kanë filluar t'i ndryshojnë qëndrimet e tyre.

"Ne propozojmë që pasi të pavarësohet Kosova të mos ketë anëtarësim të plotë në disa organizata ndërkombëtare derisa kosovarët të dëshmojnë se janë duke punuar seriozisht në kthimin e refugjatëve dhe të krijojnë marrëdhënie të mira me vendet e rajonet", thotë Vajs.

 

Sipas Grupit Ndërkombëtar të Krizave shqiptarët e pranojnë idenë se mund të jetojnë në disa shtete dhe se nuk ka shumë shqiptarë që e pranojnë projektin për krijimin e Shqipërisë së bashkuar. Sipas Nikollas Vajs janë të pakët ata shqiptarë që janë të gatshëm të sakrifikojnë për Shqipërinë e bashkuar.

Ai shtoi se kryeministri serb Vojisllav Koshtunica është frymëzuar nga marrja e Bosnjes dhe kështu dëshiron ta mbajë edhe Kosovë, por sipas Grupit Ndërkombëtar të Krizave kjo ide nuk mund të aplikohet sepse këtë nuk e duan kosovarët dhe as bashkësia ndërkombëtare.

 

 

Federata Panshqiptare Vatra thotë se organizatorët e sulmit ndaj Presidentit Rugova do të dështojnë me turp

 

Nju Jork, 15 mars 2004 - "Me zemërim të thellë morëm vesh per aktin e shëmtuar terrorist ndaj rezidencës së Presidentit të Kosoves, z. Ibrahim Rugova, prijësit dhe luftetarit të vijës së parë të Pavarësisë dhe ndërtimit të saj demokratik", thuhet në një deklaratë të Fedaratës Panshqipatre Vatra me seli në Nju Jork.

"Një akt i tillë synon të vrasë ëndrrën shumëshekullore për liri e pavarësi të popullit shqiptar të Kosovës dhe të të gjithë shqiptarëve, kudo që jetojnë, të destabilizojë shtetin e ri që po lind, ta pengojë në rrugën e mbarë që ka nisur, dhe ta errësojë imazhin e saj para botes", thuhet në vazhdim të deklaratës.

"Ne jemi të bindur se çdo lloj veprimtarie e tillë e çoroditur dhe e neveritshme nuk mund ta ndalë e as ta pengojë marshimin triumfues të Kosovës drejt Pavarësisë dhe demokracisë dhe se organizatorët e tyre kanë dështuar e do të dështojnë gjithnjë me turp dhe do të gjejnë dënimin e merituar nga organet e drejtësisë.

Me këtë rast, i urojmë Presidentit Rugova shëndet e jetë tëe gjatë, mbarëesi e suksese në të mirë të popullit shqiptar të Kosovës dhe gjithë kombit shqiptar", thuhet në këtë deklaratë të Federatës Panshqiptare Vatra, të nënshkruar nga kryetari i saj, Agim Karagjozi.

 

 

LDK në Nju Jork: Sulm terrorist mbi shtetësinë e Kosovës dhe mbi personalitetin e Presidentit Rugova

 

Nju Jork, 15 mars 2004 - Dega e LDK-së për Nju Jork dhe rrethe përmes një deklarate thekson se "sulmi mbi Rezidencën e Presidentit të Kosovës dhe Kryetarit të LDK-së, Dr. Ibrahim Rugova është akt terrorist i drejtuar para së gjithash mbi shtetësinë e Kosovës dhe mbi përpjekjet dhe hapat e saj në ndërtimin dhe realizimin e pavarësisë së Kosovës".

"Ky sulm terrorist, deri tash më i rëndi mbi institucionet e vendit, mbi shtetësinë e Kosovës dhe mbi personalitetin e Presidentit Ibrahim Rugova, edhe njëherë dëshmon se armiqtë e Kosovës, të organizuar si struktura kriminale, synojnë përmes veprimeve të këtilla kriminale të destabilizojnë Kosovën, të shembin përpjekjet për demokratizimin e saj dhe të nxirosin imazhin për Kosovën duke goditur pikërisht institucionin dhe personalitetin më të lartë të saj, Presidentin Rugova, i cili është simbol i këmbëngulësisë politike e diplomatike për pavarësinë e Kosovës.

 

Dënojmë me indinjatë të thellë sulmin terrorist mbi institucionin më të lartë të vendit, mbi Presidencën, dhe mbi Presidentin Dr. Ibrahim Rugova dhe ftojmë të gjitha organet kompetente të zbatimit të ligjit, të rendit dhe të sigurisë, si ato vendore ashtu dhe ndërkombëtare, të bëjnë maksimumin e tyre në ndriçimin sa më të shpejtë e efikas të aktorëve dhe të grupeve kriminale të këtij akti terrorist si dhe në ndëshkimin e tyre të ligjshëm", thuhet në fund të kësaj deklarate.

 

 

Shoqata "Kosova": Rruga drejt pavarësisë së Kosovës nuk mundet të ndalet me akte qyqare e terroriste

 

Kolding, Danimarkë, 15 mars 2004 - "Lajmin për sulmin mbi institucionit më të lartë të shtetit të Kosovës, Presidentit të Kosovës, e morëm me zemërim dhe revoltë të madhe", thuhet në një reagim të shoqatës shqiptare/daneze "Kosova" në Danimarkë.

Ky akt terrorist i drejtuar kundër Presidentit Rugovan, tribunit më popullor që ka pas Kosova ndonjëherë, dhe i përgatitur nga ata që janë dorë e zgjatur e Serbisë, që shpesh dinë të qajnë ditën e të vrasin natën, ka për qëllim që të sulmojë institucionin më të lartë të Kosovës, për të destabilizuar Kosovën. Ajo pjellë bastarde ka për qëllim t'i pengojë proceset e fuqishme që po zhvillohen për pavarësimin e Kosovës.

"Ne shqiptarët që banojmë në qytetin Kolding të Danimarkës, e dënojmë këtë veprim të farës së keqe, që ia kanë shitur shpirtin armikut shekullor".

"Ju mbështesim fuqimisht dhe plotësisht jemi të bindur se rruga Juaj drejt njohjes formale të pavarësisë së Kosovës nuk mundet të ndalet me akte të tilla qyqare", thuhet në një reagim të shoqatës shqiptare/daneze "Kosova" në Danimarkë.

 

 

Kuvendi i Komunës së Mitrovicës dënon ashpër aktin kriminal të sulmit në rezidencën e Presidentit të Kosovës

 

Mitrovicë, 15 mars 2004 - Kryesia e Kuvendit të Komunës së Mitrovicës shpreh indinjatë të thellë dhe dënon ashpër aktin kriminal të hudhjes së bombës në rezidencën e Presidentit të Kosovës, Ibarhim Rugova.

 

Ajo vlerëson se "sulmi më i rëndë kriminal deri tash në një institucion demokratik të vendit, që ka dalë nga vota e lirë e popullit, ka për qëllim destabilizimin e vendit në momentin kur janë duke u bërë përpjekje maksimale të të gjithë faktorëve për përmbushjen e stanadrdeve që janë bazë për përcaktimin e statusit përfundimtar, përkatësisht për pengimin e njohjes së pvarësisë së Kosovës nga ndërkombëtarët".

Kryesia e Kuvendit të Komunës thekson se është koha e fundit që organet kompetente për siguri e rend të ndërmarrin të gjitha masat për zbulimin e këtij dhe të rasteve tjera kriminale, në mënyrë që akterët të dalin para organeve të drejtësisë dhe të marrin dënimin e merituar.

Kryesia e Kuvendit të Komunës i jep përkrahje të plotë Presidentit Ibrahim Rugova në ushtrimin me sukeses të plotë të funksionit më të lartë shtetëror të vendit, duke e cilësuar ate si figurën më ëmblematike të popullit të Kosovës.

 

 

Në veri të Kosovës serbët kanë bllokuar pikën kufitare mes Kosovës dhe Serbisë

 

Mitrovicë, 15 mars 2004 - Një grup serbësh nga veriu i Kosovës kanë bllokuar sot në mëngjes pikën kufitare mes Kosovës dhe Serbisë në vendin e quajtur Jarinje. Ata po protestojnë për shkak të hyrjes në fuqi të Urdhëresës së UNMIK-ut mbi doganat e Kosovës.

 

 

Nowicki nuk merr pjesë në Konferencën I Për të Drejtat e Njeriut në Kosovë

 

Prishtinë, 15 mars 2004 - Ombudspersoni i Kosovës z.Marek Antoni Nowicki, nuk do të marrë pjesë në Konferencën I Për të Drejtat e Njeriut në Kosovë, e cila do të mbahet prej 25-28 mars në Mitrovicë.

Ombudspersoni i Kosovës, shpreh pakënaqsinë e tij në lidhje me përcaktimin si pjesëmarrës të këtij takimi nga ana e organizatorit, pa konsultimin dhe miratimin e tij.

 

 

Afër Parisit prej 30 marsit e deri më 4 prill organizohet një festival i kulturës shqiptare

 

Sen Deni/Paris, 15 mars 2004 - Një festival me promovimin e kulturës së Kosovës do të mbahet në Francë (në Il Sen-Denis, afër Parisit), prej datës 30 mars deri më 4 prill 2004.

 

Rreth 80 artistë do të marrin pjesë gjatë këtij festivali, shumë prej tyrë janë nga Kosova që banojnë në Francë, por edhe të tjerë do të vijnë nga Kosova, Shkup dhe Tirana, siç është Faruk Begolli me teatrin "Dodona" dhe regjisori Bekim Lumi me ekipin e tij.

Poashtu me këtë rast do hapet një ekspozitë me piktura të Ismail Bozhlanit, pastaj ekspozita me motive nga Kosova të autores Mari Ponshële.

Gjithashtu parashihet të shfaqen edhe disa pjesë teatrale nga Prishtina, Shkupi dhe Tirana. Do të recitohen poezi të autorëve të njohur shqiptarë dhe do të ketë edhe muzikë klasike.

 

 

Familja e Fatmir Haxhiut ia dhuroi Muzeut të Kosovës skicën e betejës së Fushë-Kosovës

 

Prishtinë, 15 mars 2004 - Në Muzeun e Kosovës u organizua një ceremoni në të cilën familja e Fatmir Haxhiut nga Shqipëria ia dhuroi Muzeut të Kosovës skicën e betejës së Fushë-Kosovës, veprën historike - pikturën me shpatë në dorë dhe një varg pikturash me vlerë të madhe kulturore.

 

 

BDI dhe PPD kandidat të përbashkët në zgjedhjet presidenciale në Maqedoni do të kenë Gëzim Osdrenin

 

Tetovë, 15 mars 2004 - Bashkimi Demokratik për Integrim dhe Partia Prosperitetit Demokratik kandidat të përbashkët në zgjedhjet presidenciale në Maqedoni do të kenë Gëzim Osdrenin. Këtë lajm e bëri të ditur Ali Ahmeti. Gëzim Osdreni njihet si shef i Shtabit të Përgjithshëm të ish-UÇK-së në Maqedoni gjatë konfliktit të vitit 2001. Aktualisht ai kryen funksionin e sekretarit të përgjithshëm të BDI-së.

Kjo kandidaturë u caktua gjatë një mbledhjeje të zhvilluar dje në Tetovë ndërmjet Ali Ahmetit dhe kryetarit të Partisë për Prosperitet Demokratik Abdylmenaf Behxhetit. Përfaqësuesi i lart i BDI-së Xhevat Ademi ka thënë se të dy partitë janë pajtuar që z. Osdreni të jetë kandidat më i përshtatshëm për garën presidenciale.

 

 

Sot në Tiranë vazhdojnë bisedimet ndërmjet Shqipërisë dhe Bashkimit Evropian rreth asociim-stabilizimit

 

Tiranë, 15 mars 2004 - Raundi i ri i bisedimeve ndërmjet Shqipërisë dhe Bashkimit Evropian rreth nënshkrimit të marrëveshjes së asociim-stabilizimit do të vazhdojë sot në Tiranë.

 

Siç thuhet në njoftimin e Ministrisë për Integrim në fokus të takimit do të jetë bashkëpunimi dhe forcimi ekonomik ndërmjet Shqipërisë dhe Bashkimit Evropian.

 

 

Nga rrëshqitja e baltës në Kazahstan kanë humbur jetën 28 persona

 

Alma Ata, 15 mars 2004 - Nga rrëshqitja e baltës në Kazahstan kanë humbur jetën 28 persona, ndërkaq edhe 20 të tjerë konsiderohen të zhdukur, kanë njoftuar shërbimet e emergjencës.

 

Rrëshqitja e mbi një milion kubë metrash baltë pas një shiu të fuqishmë, të dielën ka zhdukur një ndërtesë dykatëshe dhe një barrakë rrëzë maleve Tien Shan afër Alma Atës. Zëdhënësi i shërbimeve emergjente ka deklaruar se në mesin e viktimave ndodhen edhe nëntë shtetas kinezë që po punonin në rindërtimin e një sanatoriumi.

 

 

Në Kirkuk është vrarë një anëtar i asamblesë së qytetit dhe truproja e tij

 

Kirkuk, Irak, 15 mars 2004 - Një anëtar arab i asamblesë së qytetit dhe një truproje e tij janë vrarë sot (e hënë) me armë zjarri nga persona të armatosur nga një makinë trjetër, njofton Rojter. Dëshmirtarët thonë se një veturë e kuqe i ka dalë para veturës, që barte asamblistin Agar al-Tavil dhe truprojën e tij.

 

Ajo është detyruar kështë të ndalet dhe ka rrëshqitur gjatë frenimit. Nga vetura e kuqe kanë dalë dy persona dhe kanë shtënë në viktimat me gjakftohtësi.

 

 

Policia ka çmontuar një bombë në një makinë afër konsullatës amerikane në Karaçi

 

Karaçi, 15 mars 2004 - Policia e Pakistanit ka çmontuar një bombë të madhe në një makinë, që është zbuluar sot (e hënë) afër konsullatës amerikane në Karaçi, vetëm dy ditë para se sekretari i Shtetit, Kolin Pauell, të vizitonte këtë vend, njofton Rojter. Kamerat e sigurimit të Misionit amerikan e kishin vërejtur personin , që kishte parkuar një kombi me bombë, duke dalë prej tij dhe i cili kishte biseduar me rojet.

 

 

Forcat amerikane kanë vrarë 3 militantë dhe kanë arrestuar 13 të tjerë në Afganistan

 

Kabul, 15 mars 2004 - Focat amerikane, në kuadër të një ofensive kundër talibanëve dhe Al Kaidës, kanë depërtuar në një vendstrehim në shpellë në jug të Afganistanit, ku fshiheshin militantët islamikë dhe gjatë këtij sulmi kanë vrarë tre militantë dhe kanë arrestuar 13 të tjerë, ka bërë të ditur sot (e hënë) një zëdhënës ushtarak amerikan në një konferencë shtypi në Kabul, njofton Rojter.

 

Ai ka shtuar se nga të arrestuarit janë tre komandantë talibanë. Ky operacion është zhvilluar në provincën Zabul dhe ishte pjesë e një operacioni më të gjerë, të quajtur "Stuhia malore" , ka thënë ai.

 

 

Helikopterët izraelitë kanë bombarduar sot dy fonderi metalike të Hamasit

 

Gaza, 15 mars 2004 - Në shenjë hakmarrjeje të sulmeve vetëvrasëse me bombë në një port izraelit, ku u vranë 11 izraelitë, helikopterët izraelitë kanë bombarduar sot (e hënë) dy fonderi metalike në Rripin e Gazës, ku prodhoheshin armë për Hamasin, grup ky që me kënaqësi ka marrë përgjegjësinë për sulmet e djeshme vetëvrasëse, njofton Rojter.

 

Helikopterët kanë sulmuar para agimit dhe kanë hedhur 10 predha dhe kanë plagosur një person.

 

 

Dy palestinezë vetëvrasës kanë vrarë 11 izraelitë

 

Ashdod, Izrael, 15 mars 2004 - Dy palestinezë vetëvrasës kanë sulmuar me bombë dje portin izraelit Ashdod, i cili është i ruajtur shumë për shkak të instalimeve strategjike dhe kështu kanë vrarë 11 izraelitë dhe kanë plagosur 18 të tjerë, njofton AP. Policia ka thënë se bombëhedhësit ndoshta janë përpjekur të hedhin veten në erë afër kimikateve për të shkaktuar edhe më shumë viktima.

Kryeministri izraelit, Ariel Sharon, ka anuluar takimin me homologun e tij palestinez, Ahmed Kurei, i cili ka qenë planifikuar për të martën. Bisedimet paraprake, të caktuara për sot, gjithashtu janë anuluar, ka thënë një ndihmës i Sharonit. Izraeli e ka ngritur gjendjen e gatishmërisë kundër terrorit në shkallën më të lartë.

 

 

Spanjë: Socialistët fitojnë në zgjedhjet kombëtare

 

Madrid, 15 mars 2004 - Në zgjedhjet e të dieles, vetëm tri ditë pas shpërthimeve terroriste në Madrid që shkaktuan vdekjen e 200 vetave, qytetarët spanjollë votuan kundër partisë në pushtet.

Pas numërimit të thuajse të të gjitha votave, del se socialistët fituan ndaj Partisë Popullore konservatore në pushtet, duke siguruar 43 përqind të votave. Konservatorët u radhitën në vend të dytë me 38 përqind.

Kreyeministri i zgjedhur, Hoze Luis Rodriguez Zapatero, e filloi fjalimin me rastin e fitores së partisë së tij, duke kërkuar mbajtjen e një minut heshtjeje për viktimat e sulmeve terroriste të javës së kaluar.
Ai tha se lufta kundër terrorizmit do të jetë përparësia e tij e menjëhershme dhe premtoi se do t'i bashkojë të gjitha partitë politike të vendit në këtë luftë.

 

 

Putin konfirmoi fitoren në zgjedhjet e djeshme në Rusi

 

Moskë, 15 mars 2004 - Presidenti rus, Vladimir Putin, thotë se do të mbrojë parimet demokratike dhe do të forcojë lirinë e shtypit gjatë mandatit të tij të dytë. Putin këto komente i bëri pas fitores së pritur në zgjedhjet presidenciale.

Me gjysmën e rezultateve të njohura, ai ka fituar rreth shtatëdhjetë përqind të votave, dhe kundërshtari i tij më i afërt, kandidati komunist Nikolay Kharitov, e pranoi atë.

Këto nuk ishin thjeshtë zgjedhjet më të parashikueshme të mbajtura ndonjëherë në një shtet jototalitar, por duhet të jenë ndër të paktat kur kandidati fitues ishte aq sigurt saqë ka shpallur paraprakisht se si do të duket qeveria e tij pas zgjedhjeve.

 

 

Situatë e tensionuar në Gjeorgji

 

Tbilisi, 15 mars 2004 - Forcat e armatosura të Gjeorgjisë janë në gjendje gatishmërie të lartë pasi presidenti i vendit, Mikhail Saakashvili nuk u lejua të hynte në Axhari në bregdetin e Detit të Zi.

 

Saakashvili dhe disa nga ministrat e tij u lagruan nga policia sapo ishin duke hyrë në rajonin gjysëm autonom. Ndaj kortezhit të presidentit u qëllua me të shtëna paralajmëruese duke bërë që ata të tërhiqeshin në qytetin pranë të Potit.

Incidenti ishte kulmi i një jave që ka parë luftë fjalësh midis presidentit të vendit dhe udhëheqësit axharian, Asllan Abashidze. Të shtunën zoti Saakashvili paralajmëroi udhëheqësin e Axharisë të respektojë ligjin gjeorgjian ose përndryshe do të përballet me pasoja.

 

 

Gjermania kërkon një mbledhje të zyrtarëve të sigurimit të BE-së

 

Berlin, 15 mars 2004 - Qeveria gjermane kërkoi një mbledhje të menjëhershme të zyrtarëve evropianë të sigurimit për të diskutuar mbi kërcënimin që përbën al-Qaida, e cila me sa duket kishte gisht në shpërthimet e së enjtes në Madrid ku gjetën vdekjen 200 vetë.

Ministri i brendshëm gjerman, Oto Shili tha të dielën se videokaseta e gjetur të shtunën ku merrej përgjegjësia për sulmet e Madridit, nënkupton se Evropa përballet me kërcënime të një cilësie të re nga terrorizmi islamik.

 

Ai i bëri thirrje publikisht kryeministrit të Irlandës së Veriut, Berti Ahern, vendi i të cilit mban kryesinë e radhës të Bashkimit Evropian, që të thërrasë një takim të zyrtarëve të lartë të sigurimit brenda javës së ardhshme.

 

 

Planet i ri në sistemin tonë diellor?

 

Uashington, 15 mars 2004 - Agjencia amerikane e hapësirës tha se do të bëjë të ditur zbulimin e një të papriture në sistemin diellor, një objekt për të cilin disa mendojnë se mund të jetë planeti i dhjetë.

Zyrtarë të NASA-s thanë dje se do të bëjnë të njohur zbulimin e objektit më të largët që sillet rreth diellit. Disa ekspertë mendojnë se i ashtuquajturi objekt është një planet i ri i emërtuar Sedna, sipas perëndeshës eskimeze të detit. Objekti është 10 miliardë kilometra larg Tokës.

Parashikohet që Sedna, elementet përbërës të së cilës mendohet të jenë akulli dhe guri, ka një diametër prej dy mijë kilometrash. Ky do të ishte objekti më i madh i zbuluar në sistemin diellor që nga zbulimi i Plutonit 74 vjet më parë. Sedna është pak me e vogël se Plutoni.

 

 

Ethet tropikale në Indonezi kanë marrë jetën e 452 njerëzve

 

Xhakartë, 15 mars 2004 - Ethet tropikale të sivjetme në Indonezi, që kanë shkaktuar vdekjen e 452 njerëzve, kanë filluar të tregojnë shenja të rënies, ka deklaruar sot (e hënë) një zyrtar i Ministrisë së shëndetësisë, njofton Rojter.

 

Ai ka thënë se shkalla më e keqe kaluar dhe pritet që epidemia të vihet nën kontroll. Në prill gjendja pritet të jetë normale. Që nga 1 janari janë evidentuar 34, 463 raste sëmundjeje nga epidemia e etheve.

  |  KULTURË  |  HISTORI  |   POLITIKË  |  OPINIONE  |  ADRESARI  |  ARKIVI  |