|  KULTURË  |  HISTORI  |   POLITIKË  |  OPINIONE  |  ADRESARI  |  ARKIVI  | 

Gjilan: Reagime rreth rastit Trifunoviq në Cërnicë

Gjilan, 14 mars 2004 / TN - Në Cërnicë kanë ndodhur gjatë katër-pesë viteve të fundit disa incidente dhe akte tjera të dhunës, ndërsa policia dhe KFOR-i nuk kishin arritur deri tani t`i zbulojnë aktorët në asnjë rast. Strukturat përgjegjëse për siguri, si dënim për këtë gjendje, e kishim mbajtur nga disa ditë në izolim kolektiv tërë fshatin, por edhe kanë arrestuar e paraburgosur disa shqiptarë lokalë. Çka dëshmojnë hetimet rreth rastit Trifunoviq?

Rasti i Trajan Trifunoviqit, i cili, sipas hetimeve të policisë rezulton se është vrarë nga pushka e gjetur në pronësi të bashkëfshatarit të tij, Boshko Dimiq, dëshmon se fajtorët nuk duhet kërkuar apriori te shqiptarët, sa herë që mund të vritet ndonjë serb diku në Kosovë.

Udhëheqësit komunalë të Gjilanit, Lutfi Haziri edhe Xhemajl Hyseni, gjatë një takimi të mëhershëm me liderët e fshatit Cërnicë, kishin kërkuar prej tyre dhe qytetarëve që të bashkëpunojnë më hetuesit në zbardhjen e të gjitha akteve të dhunës, ndërsa policisë dhe KFOR-it iu kishin kërkuar që të mos dënohej fshati kolektivisht, sepse kjo ishte e padrejtë. 

Rreth rastit Trifunoviq, zëvendëskryetari i dytë i komunës, Bozhidar Periq, i cili asokohe, rreth 15 muaj më parë, i kishte fajësuar shqiptarët për këtë vrasje, tani është përgjegjur se nuk i beson plotësisht ekspertizës ballistike.

”Nuk kam asnjë informacion rreth ekspertizës ballistike, por me sa di unë, Boshko Dimiq është në liri”, ka thënë Periq. Z. Periq beson pak se vrasjen mund ta ketë kryer bashkëfshatari i Trajan Trifunoviqit, por thotë se Boshko Dimiq duhet të përgjigjet nëse e ka kryer veprën.

“Ne nuk kemi besim të plotë as në polici e as në gjykatë, sepse asnjë vrasje e serbëve pas luftës në Kosovë, deri tashti nuk është vërtetuar” ka pohuar Bozhidar Periq, zëvendëskryetar i dytë i komunës.

Xhemajl Hyseni, zëvdëskryetar i komunës ka thënë se rasti i Trifunoviqit dëshmon se organet e hetuesisë më në fund do t`i zbardhin të gjitha vrasjet enigmatike të serbëve që kanë ndodhur pas luftës. Duhet t`i lejojmë organet gjyqësore që ta kryejnë punën e vetë si duhet dhe t`i zbardhin krimet e t`i dënojnë kriminelët, pa përjashtim, por nuk duhet të ketë më fajësi kolektive të shqiptarëve për secilin rast që mund të ndodhë, ka thenë Hyseni.

Kryetari i komunës, Lutfi Haziri, pas eksplodimit të një granate në shtëpinë e një serbi në Cërnicë, nuk e kishte përjashtuar mundësinë se mund të ishte fjala për probleme të brendshme ndërmjet vetë komunitetit serb. Ndërkaq rreth rastit Trifunoviq, ai ka thenë se duke iu falenderuar organeve të sigurisë janë gjetur faktet e para që mund t`i argumentojnë dyshimet tona se incidentet mund të ishin probleme të brendshme të komunitetit serb.

Ne dëshirojmë që të ndriqohen edhe rastet tjera që kanë ndodhur në Cërnicë dhe të dyja komunitetet të lirohen nga akuzat dhe fajësia kolektive dhe të mos e mbajnë peng të ardhmen e përbashkët, ka thenë Haziri. (i.m.)