|  KULTURË  |  HISTORI  |   POLITIKË  |  OPINIONE  |  ADRESARI  |  ARKIVI  | 

OPINIONE

VRASËSIT E PAVARËSISË SË KOSOVËS VIJNË DITËN DHE NATËN

Mevlude Saraçi

13 mars 2004 / TN   Akti kriminal që ndodhi në orët e hershme të mëngjesit të së premtës me rastin e hudhjes së granatës mbi rezidencën e presidentit të Kosovës  Dr. Ibrahim Rugova, i tronditi të gjithë qytetarët e Kosovës.   Mevlyde SARAÇI / Deputete në Kuvendin e Kosovës   Kush duhet t’i mbrojë institucionet e Kosovës dhe krerët e tyre Kosova e pasluftës mbi supet e veta barti shumë probleme dhe sulme terroriste, atentate dhe plagosje, shkatërrime të objekteve, hudhje të materialeve shpërthyese e çka jo. Mbase tani pas pesë vitesh të pasluftës Kosova  po pretendon të bëhet një shtet i paqes dhe demokracisë, i lëvizjes së lirë të qytetarëve, i dashurisë dhe shpresës.

 

E dje?

 

Ndodhi akti më kriminal mbi institucionin më të lartë të Kosovës, mbi rezidencën e presidentit të Kosovës Dr. Ibrahim Rugova, institucion ky i pranuar ndërkombëtarisht dhe i ndërtuar mbi bazën e votave të popullit të Kosovës. Pse kështu?

 

Ata që ngrenë dorën mbi institucionin e presidentit dhe familjes së tij, ngrenë dorën dhe hodhën bombë mbi lirinë dhe pavarësinë e Kosovës, mbi mundin, sakrificën dhe gjakun e derdhur për liri e pavarësi, mbi të tanishmen dhe të ardhmen e Kosovës.

 

Ata janë dorë e zgjatur e Serbisë që e kriminalizoi këtë popull si në inkuizicion. Ata janë soj krimineli dhe emër tjetër nuk kanë. Ata duhet t’i denoncojë vetë populli i Kosovës dhe t’i dërgojë në theqafje se këtu nuk kanë vend.

 

Sigurimin e institucioneve dhe të krerëve të tyre duhet ta bëjë KFOR-i, UNMIK-u, SHPK-ja, por mbi të gjitha duhet ta bëjë vetë populli i Kosovës. Duhet të jemi vigjilent në çdo moment dhe të përcjellim çdo lëvizje rreth nesh. Nuk mjafton të deklarohemi se jemi të indinjuar për rastet që po ndodhin por duhet punuar pa ndërprerë për të realizuar një qetësi për të gjithë, për të zhvilluar shtetin e Kosovës dhe për të arritur një shkallë të lartë të demokracisë - Kujt po i pengojnë institucionet e Kosovës?

 

Kosova martire me djersë e gjak arriti të krijojë institucionet e saj të cilat sot duhet ruajtur si sytë e ballit. Fundja për këto u vramë para, gjatë dhe pas luftës. Atyre që u konvenon destabilizimi i vendit ata janë kriminelë. Ata që mundohen të vrasin votën e popullit le ta dijnë mirë se nuk do të arrijnë. Nëse është nevoja përsëri do të sakrifikohemi dhe të flijohemi, por institucionet tona do të jetojnë sepse ato janë ardhmëria jonë dhe e fëmijëve tonë.

 

Bombat nuk janë rastësi. Ato janë një paralajmërim i keq për faktin se ky vit është edhe vit i zgjedhjeve të dyta nacionale, është vit vendimtar i arritjes së standardeve si kusht për statusin e ardhshëm të Kosovës, si kusht për pavarësinë dhe pranimin e Kosovës si shteti më i ri në botë. Por, pavarësisht prej kësaj ne do të qëndrojmë dhe nuk do të dorëzohemi. Do t’i mbrojmë këto institucione dhe krerët e tyre siç mbrohen në tërë botën e civilizuar e demokratike.

 

Ata që janë përgjegjës për sigurinë në Kosovë duhet të jenë përgjegjës edhe për sigurinë e institucioneve dhe këtë duhet ta bëjnë sa më parë. Nuk ka më vend për modesti. Shteti është shtet dhe duhet të mbrohet. Populli e ka thënë fjalën e vet dhe do ta thotë prap. Nuk do të mundet askush të krijojë panikë dhe të na largojë nga rruga e pavarësisë me kurrfarë çmimi.

 

Por kur hudhen bomba mbi institucionet më të larta nuk mund të qëndrojmë aq gjakftohtë dhe të rrijmë duarkryq. Dhuna duhet të denoncohet. Fundja presidenti i Kosovës është zgjedhur me votën demokratike dhe kjo votë duhet të mbrohet nga vetë populli i Kosovës bashkë me përgjegjësit e sigurisë në Kosovë.

 

Prandaj duhet t’i zbulojmë vrasësit e lirisë dhe të pavarësisë së Kosovës që vijnë ditën dhe natën, duhet të zbulohen edhe ideatorët dhe projektuesit e këtyre akteve kriminale.Është ora e fundit ta bëjmë këtë veprim.