Përmbajtja:

• Vazhdojnë reagimet dhe dënimet ndaj sulmit të djeshëm në rezidencën e Presidentit Rugova

• Presidentit Rugova

• Daci kërkon masa shtesë të sigurisë në mbrotjen e udhëheqësve dhe të institucioneve të Kosovës

• Misioni i UNMIK-ut e ka marrë shumë seriozisht dhe do ta hetojë shpërthimin në rezidencën e presidentit Rugova

• Policia ndërkombëtare ka fajësuar për sulmet ndaj udhëheqësve politikë shqiptarë grupet kriminale

• Ministria e Arsimit dënon aktin kriminal në Rezidencën e Presidentit Rugova

• Podujevë: Udhëheqja komunale dhe e LDK-së dënojnë shpërthimin në Rezidencën e Presidentit Rugova

• Akti kriminal-terrorist ka për qëllim që të atakojë institucionin më të lartë të Kosovës

• Kryesia e degës së LDK-së në Dardanë shpreh revoltë për sulmin e djeshëm

• LDK dhe Komuniteti Shqiptaro-Amerikan në Çikago dënojnë aktin terrorist kundër Presidentit të Kosovës

• LDK në Zvicër: Akt qyqar e mizor ndaj Presidentit të Kosovës

• Shoqata shqiptaro-kanadeze Kosova dënon ashpër sulmin terrorist kundër Rezidencës së Presidentit të Kosovës

• LDK në Londër: Akt kriminal ndaj rezidencës së Presidentit të Kosovës

• Ministri i rendit Ingli Toska ka ngritur shkallën e gatishmërisë në gjithë Shqipërinë

• Arbër Xhaferi është kandidat i PDSH-së për president të Maqedonisë, ndërkaq PPD përkrah kandidatin e BDI-së

• Policia e Maqedonisë ka zbuluar një sasi të madhe armatimi në afërsi të kufirit me Kosovën

• Forcat izraelite kanë vrarë 2 palestinezë në Rripin e Gazës

• Në një qytet të Kalifornisë, policia ka gjetur trupat e pajetë të 7 personave

• Nga një shpërthim bombe kanë vdekur dy ushtarë amerikanë

• Në Spanjë miliona njerëz demonstruan kundër terrorit

• Zyrtarë të OKB-së dhe OSBE-së diskutojnë për efektivitetin e luftës kundër terrorizmit

• Kryeministri i ri i Haitit bën betimin

• Sulmi ndaj presidentit Rugova, një sulm i rrezikshëm ndaj Kosovës

Vazhdojnë reagimet dhe dënimet ndaj sulmit të djeshëm në rezidencën e Presidentit Rugova

 

Prishtinë, 13 mars 2004 - Me rastin e sulmit djeshëm kriminal ndaj rezidencës së Presidentit të Kosovës dhe njëherit kryetar i LDK-së, Ibrahim Rugova, në redaksinë tonë vazhdimisht po arrijnë reagime të degëve e nëndegëve të LDK-së, organizatave, shoqatave dhe individëve në dënimin e ashpër të këtij akti qyqar e mizor.

Kështu në reagimin e degës së LDK-së në Mitrovicë, të Forumit të Gruas dhe Forumit të Rinisë, sulmi ndaj Presidentit Rugova konsiderohet sulm kriminal i drejtuar kundër institucionit më të lartë të Kosovës, kundër Presidentit të Kosovës, kundër LDK-së, kundër lirisë dhe demokracisë, qetësisë, sigurisë në Kosovë dhe kundër pavarësisë së Kosovës.

Dega e LDK-së në Mitrovicë përkrah organizimin e protestave që do të organizohen në Prishtinë kundër sulmit në Rezidencën e Kryetarit Rugova si dhe kërkon nga organet kompetente zbulimin e kryesve dhe nxjerrjen e tyre para drejtësisë sa më parë.

Kryesia e LDK-së, ajo e FR dhe e FG të LDK-së në Vushtrri e dënojnë ashpër këtë sulm kriminal ndaj rezidencës së Presidentit Rugova, duke e cilsuar edhe si sulm ndaj institucioneve më të larta të Kosovës dhe popullit të saj. Njëherit kërkohet nga organet përkatëse që aktorët e kësaj vepre të shëmtuar të zbulohen dhe sa më parë të nxirren para drejtësisë.

Në reagimin e nëndegës së LDK-së në Shafhausen të Zvicrës, ky sulm cilsohet se akt barbar i drejtuar kundër Presidentit, LDK-së dhe institucionit më të lartë të vendit. "Aktet e tilla kriminale e qyqare po mundohen të vrasin lirinë dhe pavarësinë e Kosovës", thuhet në këtë reagim.

Poashtu edhe nëndega tjetër në qytetin Soluthufrn të Zvicrës, ngre zërin lart kundër "individëve, grupeve dhe bandave kriminale, të cilat çdo ditë po e dëmtojnë imixhin e Kosovës".

Në reagimin e nëndegës në Orlikon, po në Zvicër, thuhet se Presidenti i Kosovës u sulmua me qëllim që të pengohet në rrugën e tij të pandalshme drejt pavarësisë së Kosovës, duke i dhënë përkrahje të parezervë Presidentit Ibrahim Rugova.

Ndërkaq në reagimin e Forumit të Rinisë së LDK-së në Prizren sulmi kriminal ndaj Presidentit Rugova vlerësohet si "vazhdimësi e krimit të organizuar politik", duke shprehur përprahje të parezervë për Presidentin Rugova.

 

Daci kërkon masa shtesë të sigurisë në mbrotjen e udhëheqësve dhe të institucioneve të Kosovës

 

Prishtinë, 13 mars 2004 - Kryetari i Kuvendit të Kosovës Nexhat Daci është takuar dje pasdite me zëvendëskryeadministratorin e Kosovës Çarls Brajshou, udhëheqësin e Shtyllës së UNMIK-ut për Drejtësi dhe Polici, Zhan Kadi dhe komesionerin e policisë së UNMIK-ut Shtefan Feller.

 

Në këtë takim Daci ka kërkuar ndërmarrjen e masave shtesë të sigurisë, të cilat duhet të aplikohen menjëherë në ruajtjen dhe mbrotjen e udhëheqësve dhe institucioneve të Kosovës.

Kryeparlamentari Daci në këtë takim, pasi ka shpjeguar involvimin e strukturave të jashtme dhe të strukturave të tjera ekstreme në destabilizimin e Kosovës në dështimin e misionit të Kombeve të Bashkuara në Kosovë, me një shkresë përcjellëse kërkoi ndërmarrjen e masave shtesë të sigurisë të cilat duhet të aplikohen menjëherë në ruajtjen dhe mbrojtjen e udhëheqësve dhe institucioneve të Kosovës.

 

 

Misioni i UNMIK-ut e ka marrë shumë seriozisht dhe do ta hetojë shpërthimin në rezidencën e presidentit Rugova

 

Prishtinë, 13 mars 2004 - Në një deklaratë për shtyp të Zyrës së Misionit të UNMIK-ut thuhet se ky mision e ka marrë shumë seriozisht dhe se do ta hetojë këtë shpërthim në rezidencën e Presidentit Rugova si dhe vepriomet tjera ekstremiste që prekin sigurinë e kosovarëve deri në fund.

 

 

Policia ndërkombëtare ka fajësuar për sulmet ndaj udhëheqësve politikë shqiptarë grupet kriminale

 

Prishtinë, 13 mars 2004 - Policia ndërkombëtare ka fajësuar për sulmet ndaj udhëheqësve politikë shqiptarë grupet kriminale që veprojnë brenda Kosovës. Policia thotë se në listën e mëherëshme të udhëheqësve politikë janë që janë kërcënuar me vrasje nuk gjendet emri i presidentit të Kosovës Ibrahim Rugova dhe se rasti i sulmit në rezidencën e tij po hetohet.

 

Një zëdhënëse e policisë ndërkombëtare në Kosovë Anjela Xhozef i tha BBC-së se grupet terroriste të llojit të "Al Kaidës" nuk veprojnë në Kosovë. Ajo shtoi se në Kosovë vepron krimi i organizuar dhe sipas saj shumica e incidenteve vijnë nga këto grupe kriminale.

 

 

Ministria e Arsimit dënon aktin kriminal në Rezidencën e Presidentit Rugova

 

Prishtinë, 13 mars 2004 - Akt i paramenduar terrorist në institucionin më të lartë të Kosovësë, punonjësit e Ministrisë së Arsimit, Shkencës dhe Teknologjisë të Kosovës me indinjatë të thellë morën lajmin për sulmin kriminal të kryer mbi Rezidencën e Presidentit të Kosovës z.Ibrahim Rugova.

 

Ky akt vandal mbi institucionin më të lartë të vendit ka për qëllim frenimin e procesit të lirisë, demokratizimit dhe pavarësisë së Kosovës. Me akte të tilla të rënda kriminale synohet destabilizimi i Kosovës, krijimi i ndjenjës së pasigurisë dhe pengimi I shumë proceseve positive dhe progresit të arritur në Kosovë dhe veçmas pengimin e arritjes së standardeve.

Mirëpo, aktet e këtilla tinzare nuk mund ta ndalin rrugëtmin drejt pavarësisë së Kosovës të cilit proces po i prin me plotë sukses Presidenti Rugova.

MASHT dënon rëndë këtë akt dhe aktet e tjera kriminale dhe kërkon nga organet përgjegjëse të policisë dhe drejtësisë të marrin masa adekuate për t'i zbuluar akterët e krimit dhe për ti nxjerrë para drejtësisë.

 

 

Podujevë: Udhëheqja komunale dhe e LDK-së dënojnë shpërthimin në Rezidencën e Presidentit Rugova

 

Podujevë, 13 mars 2004 - Në një reagim të udhëheqjes komunale të Podujevës dënohet aktin kriminal i sulmit me bombë dje në Rezidencën e Presidentit të Kosovës.

"Ky akt është atak në institucionet demokratike të Kosovës dhe në procesin e lirisë, demokracisë dhe pavarësisë", në deklaratën e institucioneve komunale të Podujevës. "Shprehim indinjatën bashkë me qytetarët e komunës sonë e njëherit kërkojmë nga institucionet e ndjekjes dhe drejtësisë që tashmë të dëshmojnë më në fund nivelin e profesionalizmit dhe të efikasitetit në sjelljen para drejtësisë të bartësve të këtyre akteve kriminale", thuhet në deklaratë.

Ndërkaq, Kryesia e degës e LDK-së, Forumi i Gruas dhe Forumi i Rinisë, të indinjuar nga akti kriminal i së enjtes, përmes komunikatës për opinion deklaruan se u "sulmua institucioni që paraqet njësinë dhe garancinë e qenies së shtetësisë, personalitetit dhe burrështetasit të përkushtuar për lirinë, pavarësinë dhe demokracinë në Kosovë".

Dega e LDK-së kërkon nga kompetentët për sigurinë dhe rendin që më në fund të bëjnë diçka dhe të thonë deri kur do të zbulohen planifikuesit, urdhërdhënësit dhe kryesit e akteve kriminale të pasluftës në Kosovë.

 

 

Akti kriminal-terrorist ka për qëllim që të atakojë institucionin më të lartë të Kosovës

 

Ajova/SHBA, 13 mars 2004 - "Lajmin për sulmin ndaj Rezidencës së Presidentit të Kosovës e morëm me indinjatë. Ky akt kriminal - terrorist i drejtuar ndaj Jush ka për qëllim që të atakojë institucionin më të lartë të Kosovës, për të destabilizuar situatën dhe për të penguar proceset e fuqishme që po zhvillohen për Pavarësimin e Kosovës", thuhet në një letër të 8 kryetarëve të komunave të Kosovës që ndodhen në SHBA drejtuar Presidentit Rugova.

Më tutje në letër theksohet se "jo rastësisht dora e zezë e barbarisë drejtohet ndaj Presidencës, mirëpo e kanë të kotë këto qarqe kriminale, sepse kurrë nuk do të mund ta ndalojnë përkushtimin dhe ta ndryshojnë përcaktimin e qytetarëve të Kosovës për realizimin e aspiratave shekullore".

"Ne, kryetarët e komunave: Prishtinë, Podujevë, Fushë Kosovë, Viti, Therandë, Rahovec, Drenas, Kaçanik, që këto ditë ndodhemi në SHBA, e gjykojmë këtë veprim qyqar të mjeranëve që ia kanë shitur shpirtin djallit dhe që kaq barbarisht godasin vlerat më të shenjta të popullit të Kosovës", thuhet në fund të kësaj letre të përbashkët të kryetarëve të 8 komunave të komunës.

 

 

Kryesia e degës së LDK-së në Dardanë shpreh revoltë për sulmin e djeshëm

 

Dardanë, 13 mars 2004 - "Lajmi për hedhjen e bombës në Rezidencën e Presidentit të Kosovës Ibrahim Rugova, shkaktoi hidhërim dhe indinjatë tejet të madhe tek anëtarësia dhe simpatizantët e LDK-së, por edhe te të gjthë qytetarët tjerë të Dardanës.

 

Ata me të dëgjuar këtë lajmë, frekuentonin në vazhdimësi lokalet e LDK-së, të institucioneve komunale dhe kudo në rrugë dhe lokale, shprehninë shqetësimin dhe indinjatën e thellë. Në një mënyrë shprehnin një farë lehtësimi që ky atentat dështoi sa i përket dëmeve në njerëz, por nuk dështoi në anën tjetër sepse u godit rezidenca e e presidentit të Kosovës", thuhet në një deklaratë të Degës së LDK-së në Dardanë.

"Akti i djeshëm është më i shëmtuari i shërbëtorëve të huaj, i atyre që duan ta vrasin ardhmërinë e Kosovës. Përgjegjësinë duhet ta bartin në rend të parë përfaqësuesit e UNMIK-ut dhe të OSBE-së, të cilët me kalkulimet dhe tolerancën që po e dëshmojnë ndaj forcave antidemokratike, duke i dhënë hapësirë edhe disa OJQ-ve me qëllim të krijimit të një përshtypjeje sikur, LDK-ja është vetëm një pjesë e faktorit politik në Kosovë e jo forca kryesore politike në Kosovë e cila synon realizimin e aspiratave shekullore të popullit të Kosovës, pra njohjen ndërkombëtare të Pavarësisisë së Kosovës", thuhet në këtë deklaratë të kësaj dege.

 

 

LDK dhe Komuniteti Shqiptaro-Amerikan në Çikago dënojnë aktin terrorist kundër Presidentit të Kosovës

 

Çikago, 13 mars 2004 - Lidhja Demokratike e Kosoves dhe Komuniteti Shqiptaro-Amerikan për shtetin Ilinois me seli në Çikago, reagojnë ashpër dhe dënojnë aktin terrorist kundër Presidentit të Kosovës Ibrahim Rugova.

Gjersa institucionet eminente botërore i ndajne tituj më të çmueshëm në historinë diplomatike të shqiptarëve në Ballkan, një grup tradhtarësh dhe bashkëpunëtorësh të armiqve të Kosovës, përpiqen të minojnë rrugën e pavarësisë së Kosovës, për të cilën Presidenti i Kosovës Ibrahim Rugova është duke punuar maksimalisht.

 

Andaj, LDK-ja dhe Komuniteti Shqiptar në Çikago apelojnë tek institucionet vendore dhe ndërkombetare që të marrin masa urgjente në kapjen e kriminelëve dhe nxjerrjen e tyre para drejtësisë.

Anëtarësia e LDK-së, simpatizantët e Presidenti Rugova dhe të gjithë shqiptaro-amerikanët e Çikagos apelojne tek populli i Kosovës që me krenari të përkrahë Presidentin Rugova dhe fuqishëm të dënojnë individët apo grupet terroriste që nuk ia duan të mirën Kosovës.

Ne shqiptaret e Çikagos shprehim përkrahjen tonë të parezervë për institucionin e Presidentit dhe për Presidentin e Kosoves Ibrahim Rugova, thuhet në një reagim të LDK-së dhe të Komunitetit Shqiptar në Çikago.

 

 

LDK në Zvicër: Akt qyqar e mizor ndaj Presidentit të Kosovës

 

Cyrih, 13 mars 2004 - Lajmi për aktin qyqar e mizor që u bë në selinë e Presidentit të Kosovës Ibrahim Rugova tronditi të gjithë anëtarët dhe simpatizantët e LDK-së në Zvicër, thuhet në një reagim të degës së LDK-së në Zvicër.

 

Akti kriminal ndaj rezidencës së së Presidentit Rugova është akti më i rëndë kundër institucioneve të të Kosovës, e posaçërisht kudnër njeriut të parë të Kosovës.

 

Prandaj Dega e LDK-së në Zvicër dënon këtë akt dhe kërkon që siguria ndaj përsonaliteteve të larta, sidomos kur është fjala për Presidentin të bëhet një siguri më e madhe. Kërkojmë nga organet e sigurisë të UMNIK-ut dhe Policisë së Kosovës që ta zbardhin këtë akt kriminal dhe aktet e tjera të dhunës, - thuhet në një reagim të Degës së LDK-së në Zvicër.

 

 

Shoqata shqiptaro-kanadeze Kosova dënon ashpër sulmin terrorist kundër Rezidencës së Presidentit të Kosovës

 

Toronto, 13 mars 2004 - Kryesia dhe anëtarët e Shoqatës shqiptaro-kanadeze Kosova, me seli ne Toronto, dënojne ashpër sulmin terrorist kundër Rezidencës së Presidentit të Kosoves, Dr. Ibrahim Rugova.

Sulmi terrorist kundër Rezidencës së Presidentit Rugova është sulm kundër vlerave më demokratike dhe atyre institucionale, kundër lirisë dhe pavarësisë, për të cilat u bënë aq flijime. Njëheresh ishte ky sulm kundër njeriut, i cili bëri më së shumti që ëndrra për t'u liruar nga robëria serbe u bë realitet. Sulm kundër njeriut i cili i bëri shqiptarët të ndiehen më krenarë se kurrë m parë.

Kryesia dhe anëtarët e Shoqates shqiptaro-kanadeze Kosova, me seli ne Toronto, kërkojnë nga organet e rendit dhe të sigurisë në Kosovë që aktorët e këtij sulmi terrorist të kapen sa më shpejt dhe të nxirren para drejtësisë.

 

 

LDK në Londër: Akt kriminal ndaj rezidencës së Presidentit të Kosovës

 

Londër, 13 mars 2004 - Akti kriminal ndaj rezidencës se Presidentit të Kosovës dhe kryetarit të LDK-së Dr. Ibrahim Rugova janë të drejtuara kundër institucioneve, pavarësisë dhe ardhmërisë së Kosovës.

 

Ky akt i tmerrshëm është vazhdimësi e akteve kriminale të drejtuara kundër LDK-së dhe veprimntarëv të saj, akte këto të kryera nga grupe dhe individë të cilët dita ditës po dëshmojnë se janë dorë e zgjatur e Serbisë, thuhet në një reagim të Degës së LDK-së në Britani të Madhe.

Dega e LDK-së në Britani të Madhe së bashku me anëtarësinë thekson se aktet e tilla nuk do ta ndalin dhe frikësojnë LDK-në dhe aktivistët e saj në punën e tyre të devotshme për ndërtimin e shtetësisë së Kosovës.

 

LDK-ja do të vazhdojë me përkushtim, vendosëshmëri dhe të patrembur në ndërtimin dhe mbrojtjen e institucioneve të mirëfillta te Kosovës, thuhet në reagimin e Degës së LDK-së në Britani.

 

 

Ministri i rendit Ingli Toska ka ngritur shkallën e gatishmërisë në gjithë Shqipërinë

 

Tiranë, 13 mars 2004 - Ministri shqiptar i Rendit, Ingli Toska, urdhëroi ngritjen e shkallës së gatishmërisë dhe forcimin e sigurisë në gjithë Shqipërinë pas atentateve terroriste në Spanjë. Policia shqiptare po forcon kontrollin në objekte të rëndësisë së veçantë dhe në aeroporte, porte dhe stacione të autbusëve dhe trenave.

Një grup i posaçëm drejtuesish të lartë të Ministrisë së rendit përcaktohet të ndjek nga afër çdo zhvillim.

Sipas ministrit të rendit është forcuar ruajtja e familjeve diplomatike në Tiranë si dhe kontrolli në të gjitha pikat kufitare. Po ashtu është kërkuar që policia rajonale të forcojë hetimet për çdo lidhje të dyshimtë të shtetasve shqiptarë me elementë, apo organizata terroriste.

 

 

Arbër Xhaferi është kandidat i PDSH-së për president të Maqedonisë, ndërkaq PPD përkrah kandidatin e BDI-së

 

Shkup, 13 mars 2004 - Kryetari i Partisë Demokratike Shqiptare Arbër Xhaferi është kandidat për President të Maqedonisë. Kështu ka vendosur dje në Tetovë Kuvendi qendror i kësaj partie.

 

Ndërkaq, Partia për Prosperitet Demokratik, vendosi që të mos dalë me kandidatin e saj, por votat e veta t'i adresojë në llogari të kandidatit të partisë shqiptare në qeveri Bashkimit Demokratik për Integrim. Këto dy parti përkatësisht kanë vendosur që në zgjedhjet presidenciale në Maqedoni të dalin me një kandidat të përbashkët.

Ndërkaq BDI i udhëhequr nga Ali Ahmeti pasi që vendosi për të marrë pjesë në këto zgjedhje presidenciale pritet që të bëjë publik edhe emrin e personit me të cilin do të hyjë në këto gara.

 

 

Policia e Maqedonisë ka zbuluar një sasi të madhe armatimi në afërsi të kufirit me Kosovën

 

Shkup, 13 mars 2004 - Policia e Maqedonisë ka zbuluar një sasi të madhe armatimi në rrethinën e fshatit Bllacë e Poshtme afër kufirit me Kosovën. Në komunikatën e policisë thuhet se janë zbuluar 32 raketahedhës, 6 projektil, disa granata për mortaja dhe 8 mina të prodhimit jugosllav.

 

 

Forcat izraelite kanë vrarë 2 palestinezë në Rripin e Gazës

 

Gaza, 13 mars 2004 - Dy palestinezë janë vrarë nga forcat izraelite në një shkëmbim zjarri në Rripin e Gazës kur ata kishin sulmuar në një pozicion ushtarak afër pikës kufitare kalimtare Karni në hyrje të Izraelit, kanë bërë të ditur dy grupe militante palestineze, njofton AFP.

 

Në deklaratën e këtyre grupeve, njëri i lidhur me Hamasin, kurse tjetri një fraksion i Al Fatahut të Arafatit, thuhet se të vrarët janë Muhamed Sulejman Abush dhe Said Mahmud Narish, të dy të moshës 20-vjeçare. Armata izraelite ka thënë se ata janë vërejtur në zonën e ndaluar dhe i afroheshin gardhit të sigurimit, andaj është hapur zjarr kundër tyre dhe që të dy janë qëlluar.

Vdekja e tyre ngre në 3830 numrin e të vrarëve që kur ka filluar kryengritja palestineze në shtator 2000, prej tyre 2876 palestinezë dhe 886 izraelitë.

 

 

Në një qytet të Kalifornisë, policia ka gjetur trupat e pajetë të 7 personave

 

San Francisko, 13 mars 2004 - Në qytetin Fresno të Kalifornisë, policia ka gjetur trupat e pajetë të tri femrave, tre fëmijëve dhe një foshnjeje dhe sipas saj, kjo tragjedi duket të jetë rrjedhojë e një grindjeje familjare, njofton Rojter.

 

Trupat janë gjetur në dhomët e gjumit. Policia ka arrestuar Markus Uesonin, 57 vjeç, nën dyshimin për vrasje. Policia ka thënë se tri gratë e vdekura mund të jenë nëna të fëmijëve të vrarë, kurse Ueson mund të jetë baba i viktimave.

 

 

Nga një shpërthim bombe kanë vdekur dy ushtarë amerikanë

 

Bagdad, 13 mars 2004 - Një shpërthim bombe, që ndodhi sot (e shtunë) skaj një rruge në Tikrit, ka shkaktuar vdekjen e dy ushtarëve amerikanë dhe plagosjen e pesë të tjerëve, disa syresh rëndë, bën të ditur ushtria amerikane, njofton Rojter.

 

Bomba ka shpërthyer derisa ushtarët po patrullonin pak para agimit me një automjet të blinduar të tipit "Hamvi" në qendër të Tikritit, rreth 100 mila në veri të Bagdadit. Vdekja e tyre ngre në 385 numrin e ushtarëve të vrarë në detyrë aktive që kur ka filluar lufta në Irak më 20 mars të vitit të kaluar.

 

 

Në Spanjë miliona njerëz demonstruan kundër terrorit

 

Madrid, 13 mars 2004 - Rreth 8 milionë njerëz marshuan në rrugët e kryeqytetit të Spanjës dhe qytete të tjera të vendit për të shprehur zemërimin e tyre për sulmet terroriste që lanë të enjten në Madrid gati 200 të vdekur dhe shumë të plagosur.

Megjithë shiun e vazhdueshëm turma e madhe e njerëzve paralizoi jetën në kryeqytet.

Shumë prej protestuesve mbanin parrulla ku dënonin terrorizmin, të tjerë mbanin në duar qirinj që ndriçonin qiellin e mbrëmjes.

Një tjetër demonstratë e madhe u zhvillua në rajonin bask në veri të Spanjës që është edhe bastioni i ETA-s, organizata nacionaliste që kërkon pavarësinë e provincës.

Mijëra njerëz marshuan në heshtje duke dënuar terrorizimin dhe sulmet e fundit që morën jetë njerëzish të pafajshëm.

 

 

Zyrtarë të OKB-së dhe OSBE-së diskutojnë për efektivitetin e luftës kundër terrorizmit

 

Vjenë, 13 mars 2004 - Ekspertë të kundërterrorizmit thanë në një takim në Vjenë se komunitetit ndërkombëtar do t'i duhet kohë që të arrijë ta luftojë terrorizmin në mënyrë efektive, madje edhe atëherë, terroristët mund të jenë në gjendje të kryejnë sulme si ato të Madridit.

Zyrtarë të Kombeve të Bashkuara dhe OSBE-së përfunduan të premten një takim dyditor ku shprehën vendosmërinë për të intensifikuar përpjekjet e përbashkëta për të luftuar terrorizmin pas sulmeve në Spanjë.

Ambasadori i Spanjës në Kombet e Bashkuara, Inocencio Arias, është kreu i Komisionit të Këshillit të Sigurimit për kundërterrorizmit. Ambasadori Arias tha sot se mundësia për të luftuar grupet terroriste është e kufizuar.

 

 

Kryeministri i ri i Haitit bën betimin

 

Port-o-Prins, 13 mars 2004 - Kryeministri i ri i Haitit, Gerard Latortue, ka bërë betimin tradicional të marrjes së detyrës, në kryeqytetin Port-au-Prince që ishte vënë nën masa të forta sigurie.

Zoti Latortue, ish minstër i jashtëm dhe zyrtar i Kombeve të Bashkuara mbërriti të mërkurën në Haiti, prej mërgimit ku ka kaluar një pjesë të jetës që prej vitit 1988.

Kryeministri i ri kritikoi planet e Xhamajkës fqinje për të strehuar ish presidentin haitjan, Jean-Bertrand Aristide, duke thënë se kjo mund të kthente tensionin në vendin e tij.

  |  KULTURË  |  HISTORI  |   POLITIKË  |  OPINIONE  |  ADRESARI  |  ARKIVI  |