Udhëheqja komunale dhe LDK dënojnë shpërthimin në Rezidencën e Presidentit Rugova

PODUJEVË: Udhëheqja komunale dhe LDK dënojnë shpërthimin në Rezidencën e Presidentit Rugova

Podujevë, 13 mars 2004 / TN - Zv. kryetari i komunës së Podujevës Agim Kikaj, në një komunikatë për mediat dhe publikun dënoi aktin kriminal të shpërthimit që ndodhi dje në orët e hershme të mëngjesit në Rezidencën e Kryetarit të Kosovës.

Ky akt është atak në institucionet demokratike të Kosovës dhe në procesin e lirisë, demokracisë dhe pavarësisë, thuhet në komunikatën e institucioneve komunale të Podujevës. “Shprehim indinjatën bashkë me qytetarët e komunës sonë e njëherit kërkojmë nga institucionet e ndjekjes dhe drejtësisë që tashmë të dëshmojnë më në fund nivelin e profesionalizmit dhe të efikasitetit në sjelljen para drejtësisë të bartësve të këtyre akteve kriminale”, përfundon komunikata e institucioneve komunale të Podujevës.

Ndërkaq Kryesia e degës e LDK-së, Forumi i Gruas dhe Forumi i Rinisë, të indinjuar nga akti kriminal i së enjtes, përmes komunikatës për opinion deklaruan se “U sulmua institucioni që paraqet njësinë dhe garancinë e qenies së shtetësisë, personalitetit dhe burrështetasit të përkushtuar për lirinë, pavarësinë dhe demokracinë në Kosovë”.

Dega e LDK-së kërkon nga kompetentët për sigurinë dhe rendin që më në fund të bëjnë diçka dhe të thonë deri kur do të zbulohen planifikuesit, urdhërdhënësit dhe kryesit e akteve kriminale të pasluftës në Kosovë. “Edhe kush tjetër duhet të qëllohet, në ag e në terr, që të hedhet dritë e qytetarët të mësojnë se kush e bën punën e dreqit”, thuhet në komunikatë në të cilën kërkohet që forca e ligjit dhe drejtësia të bie mbi kriminelët.

Aktin e shpërthimit në Rezidencën e Presidentit Rugova e dënuan edhe Bashkësia e degëve e PSHDK-së dhe shumë qytetarë, anëtarë dhe simpatizantë të LDK-së që vizituan dje dhe sot zyrën e Degës së LDK-së në Podujevë.