Përmbajtja:

• Në rezidencën e Presidentit Rugova sot në mëngjes është hedhur një mjet shpëthyes - ka vetëm dëme materiale

• Presidenti Rugova ka ngushëlluar kryeministrin e Spanjës

• Kryeministri Rexhepi dënoi sulmin në rezidencën e Presidentit të Kosovës

• Në Kosovë u kthyen eshtrat e 40 shqiptarëve nga Serbia

• Ministrja Mumxhi dënon aktin e rëndë kriminal ndaj Presidentit Rugova

• LDK: Ky është një sulm i rëndë kriminal i drejtuar kundër institucionit më të lartë shtetëror të Kosovës

• AAK e dënon sulmin në shtëpinë e kryetarit të Kosovës

• Zhan-Mari Guine pati mbrëmë një seri takimesh me drejtuesit e forcave politike dhe me krerët fetarë në Kosovë

• Diplomati britanik në Mitrovicë: Grupi i Kontakti dhe KS i të OKB-së nuk e përkrahin kantonizimin apo ndarjen e qytetit

• LDK në Gjilan: Sulmi ndaj Presidentit Rugova - sulm në emblemën e Pavarësisë së Kosovës

• Dega e LDK-së për Beneluks dënon ashpër sulmin terrorist ndaj Presidentit të Kosovës

• Dega e LDK-së në Austrisë shpreh indinjatë të thellë ndaj sulmit të sotëm në rezidencën e Presidentit Rugova

• Sulmi në Rezidencën e Presidentit të Kosovës ka indinjuar bashkatdhetarët shqiptarë dhe opinionin në Norvegji

• FR i LDK-së në Zvicër shpreh indinjatë ndaj aktit kriminal që ndodhi në rezidencën e Presidentit të Kosovës

• Kryesia e Degës së LDK-së në Gjermani dënon sulmin kriminal ndaj Presidentiit të Kosovës

• Reagim i Forumit të Gruas të LDK ndaj sulmit kriminal në Rezidencën e Presidentit të Kosovës

• Mark Krasniqi dënon sulmin kriminal në Rezidencën e Presidentit të Kosovës, Ibrahim Rugova

• LDK-ja më 17 mars organizon një protestë

• Udhëheqja e komunës së Prishtinës dënon ashpër sulmin kriminal ndaj Rezidencës së Presidentit të Kosovës

• Dega e LDK-së në Suedi sulmin mbi rezidencën e Presidentit Rugova e cilson akt kriminal-terrorist

• Ministri Zef Morina shpreh indinjatë të thellë ndaj sulmit në rezidencën e Presidentit Rugova

• Reagim i Forumit të Rinisë të LDK-së për aktin kriminal në rezidencën e Presidentit Rugova

• Prodi përsëriti në takimin me Rexhepin dëshirën e Komisionit Evropian për ta ndihmuar Kosovën

• Problemet ekonomike ndërmjet Kosovës dhe Maqedonisë do të zgjidhen deri në fund të këtij viti

• KMG: Shqipëria një vend i vështirë për shtypin e pavarur

• Edhe BDI me kandidat të vetin për president të Maqedonisë

• Tiranë: Afati për deklarimin e pasurive po afron

• Çoviq thotë se po përgatitet terreni që në vitin e ardhshëm të shpallet pavarësia e Kosovës

• Shkarkohet presidenti koreano-jugor

• Në sulmet e djeshme në Madrid kanë vdekur edhe shtetas të 11 vendeve të huaja

• Në Spanjë sot janë paralajmëruar demostrata masive

• Sot në mesditë, e gjithë Spanja mbajti një minutë heshtje në shenjë nderimi për viktimat

• Shtatë minatorë kanë humbur jetën në një minierë në Çeki

• Në Irak janë vrarë dy ushtarë amerikanë

• Al Kaida merr përgegjësinë për sulmet në Spanjë?

• Një amerikane arrestohet për spiunazh në favor të Irakut

• Spanja nuk përjashton asnjë mundësi lidhur me shpërthimet e Madridit

Në rezidencën e Presidentit Rugova sot në mëngjes është hedhur një mjet shpëthyes - ka vetëm dëme materiale

 

Prishtinë, 12 mars 2004 - Në rezidencën e Presidentit të Kosovës, Ibrahim Rugova, sot në orët e hershme të mëngjesit është hedhur një mjet shpërthyes, i cili ka shkaktuar vetëm dëme materiale. Janë dëmtuar xhamat e përparme të dritareve të ndërtesës dhe nuk ka të lënduar. Pjesëtarëtë e policisë së UNMIK-ut dhe të SHPK-së menjeherë kanë dalë në vendin e ngjarjes dhe po i kryejnë hetimet, por për momentin nuk është dhënë asnjë njoftim zyrtar nga policia. Mësohet se bëhet fjalë për një bombë dore, e cila është hedhur nga një veturë në lëvizje në orën 5.20, që ka shpërthyer në oborrin e rezidencës e cila ndodhet në lagjen Velania. Muhamet Hamiti, zëdhënës i Presidentit të Kosovës këtë akt e ka quajtur "sulm të rëndë kriminal mbi institucionin më të lartë të vendit".

 

Shefi i UNMIK-ut Hari Holkeri i ka telefonuar Presidentit Rugova, me të mësuar lajmin për sulmin mbi rezidencën e tij, ndërkaq shefi i SHPK-së kolonel Sheremet Ahmeti e ka vizituar Presidentin Rugova.

 

 

Presidenti Rugova ka ngushëlluar kryeministrin e Spanjës

 

Prishtinë, 12 mars 2004 - Presidenti i Kosovës Ibrahim Rugova i ka dërguar një mesazh ngushëllimi Kryeministrit të Spanjës Hoze Maria Aznar, me rastin e sulmeve të djeshme terroriste në Madrid, ku humbën jetën rreth 200 veta dhe u plagosën shumë të tjerë, duke shprehur solidaritetin me popullin e Spanjës.

"Me rastin e sulmit terrorist në stacionin e trenit në Madrid, ku humbën jetën shumë qytetarë të vendit Tuaj, Ju shpreh ngushëllimet e mia të sinqerta dhe të popullit të Kosovës.

Sulmet terroriste mbi njerëzit e pafajshëm janë të pajustifikueshme dhe duhet dënuar nga bota e qytetëruar", thuhet në mesazhin e ngushëllimeve të Presidentit Rugova drejtuar Kryeministrit spanjoll Aznar, duke e lutur që ngushëllimet e tij t'ua përcjellë edhe familjeve të viktimave.

 

 

Kryeministri Rexhepi dënoi sulmin në rezidencën e Presidentit të Kosovës

 

Prishtinë, 12 mars - Kryeministri i qeverisë së Kosovës Bajram Rexhepi, pas kthimit nga Brukseli në aeroportin e Prishtinës, ka dënuar sulmin në rezidencën e Presidentit të Kosovës Ibrahim Rugova, duke e quajtur akt terrorist që ka për qëllimn të destabilizojë gjendjen e sigurisë në Kosovë.

"Ky sulm sa është i shëmtuar aq është edhe kriminal dhe krijohet përshtypja e se dikush qëndron kujdestar që t'i dëmtojë institucionet e Kosovës, ta dëmtojë imazhin e Kosovës në kohën kur, me një angazhim maksimal, të vendorëve dhe të ndërkombëtarëve, mundohemi të krijojmë një ambient të qetë", deklaroi kryeministri Rexhepi.

 

 

Në Kosovë u kthyen eshtrat e 40 shqiptarëve nga Serbia

 

Podujevë/Merdar, 12 mars 2004 - Sot në vendkalimin kufitar Merdar mes Kosovës dhe Serbisë, autoritetet serbe ua dorëzuan përfaqësuesve të UNMIK-ut eshtrat e 40 shqiptarëve të zhvarrosur në varrezat masive në Serbi. Në këtë vendkalim kishin dalë shumë familjarë për të pritur trupat e pajetë të të dashurve të tyre.

Shefi për pesronat e zhdukur Hoze Baraibar tha se nuk është i kënaqur fare me kthimin e trupave të pajetë e as me mënyrën e kthimit, siç po bëhet deri më tash.

"Ne nuk jemi aspak të kënaqur me këtë proces. Ne kemi biseduar me autorititet serbe që ky proces të përshepjtohet", tha Baraibar.

Deri më tash nga Serbia në Kosovë janë kthyer eshtrat e 290 trupave të shqiptarëve të vrarë e të varrosur në Serbi.

 

 

Ministrja Mumxhi dënon aktin e rëndë kriminal ndaj Presidentit Rugova

 

Prishtinë, 12 mars 2004 - Ministrja e Shëndetësisë Resmie Mumxhi dënon me indinjatë aktin kriminal në rezidencën e Presidentit Rugova.

"Shprehim indinjatën tonë të thellë dhe e gjykojmë aktin e sulmit të rëndë kriminal që ngjau sot në mëngjes ndaj rezidencës dhe Institucionit të Presidentit", theksohet në deklaratën e ministres Mumxhi.

"Aktet e tilla i dënojmë dhe i gjykojmë si të neveritshme dhe kërkojmë nga organet e hetuesisë që sa më shpejt ta zbardhin rastin dhe kryesit të marrin dënimin e merituar", thuhet në këtë deklaratë të ministres së Shëndetësisë Resmie Mumxhi.

 

 

LDK: Ky është një sulm i rëndë kriminal i drejtuar kundër institucionit më të lartë shtetëror të Kosovës

 

Prishtinë, 12 mars 2004 - Kryesia e Lidhjes Demokratike të Kosovës (LDK) dënon ashpër sulmin e mëngjesit të sotëm në Rezidencën e Presidentit të Kosovës dhe Kryetarit të LDK-së Dr.Ibrahim Rugova.
Për LDK-në, ky është një sulm i rëndë kriminal i drejtuar kundër institucionit më të lartë shtetëror të Kosovës, është sulm kundër vlerave demokratike dhe institucionale, sulm kundër angazhimeve shtetformuese, kundër lirisë dhe pavarësisë së Kosovës.

Ky sulm në Rezidencën e Presidentit të Kosovës, vjen pas një varg paralajmërimesh për akte kriminale dhe sulme ndaj veprimtarëve të LDK-së, çka është një sinjal tejet shqetësues për popullin e Kosovës dhe të ardhmen e saj.

LDK apelon te të gjithë organet dhe institucionet vendore dhe ndërkombëtare që të shtojnë masat e sigurisë dhe të marrin hapa konkretë në drejtim të krijimit të një ambienti të qetë dhe të sigurtë për të gjithë qytetarët e Kosovës e sidomos për krerët e institucioneve të vendit .

LDK kërkon nga organet kompetente nga organet e hetuesisë, policia e UNMIK-ut, SHPK-ja, që të marrin masa adekuate në zbardhjen sa më të shpejtë të këtij sulmi dhe në zbulimin e autorëve të këtyre akteve kriminale - thuhet në një deklaratë të Kryesisë së LDK-së.

 

 

AAK e dënon sulmin në shtëpinë e kryetarit të Kosovës

 

Prishtinë, 12 mars 2004 - Kryesia e Aleancës për Ardhmërinë e Kosovës, nëpërmjet një komunikate për media e ka dënuar sulmin e sotëm në shtëpinë e Presidentit të Kosovës, Ibrahim Rugova.

AAK konsideron që sulmi është i drejtuar kundër institucioneve të Kosovës, paqes, sigurisë dhe stabilitetit të gjithëmbarshëm në vend. Sulmi, gjithashtu, është edhe një sfidë tjetër ndaj ngathtësisë së organeve të rendit dhe të sigurisë, nga ata që janë kundër Kosovës dhe të ardhmes sonë të gjithëmbarshme.

AAK kërkon nga organet e rendit që të jenë efikase dhe në funksion të zbulimit dhe kapjes sa më të shpejtë të akterëve të këtij sulmi dhe nxjerrjes së tyre para drejtësisë.

 

 

Zhan-Mari Guine pati mbrëmë një seri takimesh me drejtuesit e forcave politike dhe me krerët fetarë në Kosovë

 

Prishtinë, 12 mars 2004 - Në orët e pasditës së djeshme zëvendëssekretari i përgjithshëm për misione paqeruajtëse i OKB-së Zhan -Mari Guino, ka zhvilluar bisedime me të gjithë ministrat e Qeverisë së Kosovës, pastaj me Kryesinë e Kuvendit të Kosovës, si dhe me krerët më të lartë të konfesioneve fetare në Kosovë. Ai tha se është inkurajuar me tolerancën fetare që ekziston në Kosovë.

 

Duke folur pas takimeve me kryetarin e Bashkësisë Islame të Kosovës Naim Tërnavën dhe ipeshkvin e Ipeshkvisë së Kosovës Mark Sopin, Gueno tha se është me rëndësi që njerëzit pa dallim feje dhe kombësie të jetojnë dhe punojnë së bashku.

Në orët e vona Guino ka zhvilluar një takim të veçantë me përfaqësuesit e forcave kryesore politike në Kosovë, përfshirë këtu edhe përfaqësuesit e të gjitha komuniteteve.

Në të gjitha këto takime ai tha se Kosova ka nevojë për tërheqjen e kapitalit të huaj. UNMIK-u dhe OKB-ja do të bëjnë gjithëçka që munden në mënyrë që procesi i privatizimit të zhvillohet me transparencë dhe në mënyrë të drejtë.

 

Standardet më të larta theksoi Guine nënkuptojnë besimin më të madh të investitorëve. Kjo është edhe domethënia e standardeve për Kosovën, pra një shoqëri në të cilën do të respektohet sejcili dhe në të cilën komunitetet do të bashkëjetojnë shoqërisht. Këto komente Guino i bëri pas takimit me grupin e Kontaktit në Prishtinë.

Ndërkaq pas takimit me z. Guina, kryetari i Kuvendit të Kosovës tha se i ka thënë këtij funksionari të lartë të OKB-së se Kosova është një një sendviç të veprimit, siç janë bllokimi i privatizimit dhe skajshmëria tjetër është veprimi i strukturave paralele në Kosovë që e pamundësojnë jetën normale dhe të qetë në vendin tonë.

 

 

Diplomati britanik në Mitrovicë: Grupi i Kontakti dhe KS i të OKB-së nuk e përkrahin kantonizimin apo ndarjen e qytetit

 

Mitrovicë, 12 mars 2004 - Patrik Dejvid, sekretar i dytë i Misionit të Britanisë së Madhe pranë OKB-së në Nju Jork ka vizituar dje Kuvendin komunal të Mitrovicës dhe ka biseduar me zv.kryetarin e komunës, Mursel Ibrahimi dhe kryeshefin e ekzekutivit, Mustafë Pllana, të cilët e kanë njoftuar diplomatin britanik me gjendjen e rëndë ekonomiko-sociale në komunën e Mitrovicës.

Udheqësit komunalë kanë thënë se administrata e UNMIK-ut nuk ka vepruar me vednosmëri për realizimin e pushtetit të saj për vendosjen e plotë të pushtetit të UNMIK-ut në pjesën veriore të
qytetit, të kontrolluar nga ekstremistët serbë.

 

Kjo ka bërë, thanë ata, që strukturat paralele serbe të veprojnë ende, gjë që ka penguar të gjitha përpjekjet e pushtetit lokal për integrimin e qytetit.

Diplomati britanik është njoftuar edhe me gjendjen e rëndë ekonomiko-sociale në komunë dhe me kërkesën për investime të donatorëve për realizimin e projekteve të ndryshme me qëllim të zbutjes së kësaj gjendjeje.

Udhëheqësit komunalë i kanë njoftuar diplomatin britanik edhe me qëndrimin e Kuvendit të Komunës lidhur me iniciativën e ESI-it për bashkimin e pjesës veriore të komunës, asaj të Zveçanit, qëndrim ky që është kundër kësaj iniciative, sepse cenon rëndë interesat e qytetarëve të komunës, pa marrë parasysh përkatësinë e tyre etnike.

Diplomati britanik ka thënë se është i interesuar që Mitrovica të jetë një qytet i lirë e i bashkuar, ku të gjithë qytetarët e saj do të ndiheshin të sigurtë.

Poashtu, ai ka thënë se Grupi i Kontakti dhe Këshilli i Sigurimit të OKB-së nuk e përkrahin kantonizimin apo ndarjen e qytetit.

 

   

LDK në Gjilan: Sulmi ndaj Presidentit Rugova - sulm në emblemën e Pavarësisë së Kosovës

 

Gjilan, 12 mars 2004 - Dega e LDK të Gjilanit, me tërë strukturën e saj organizative është e indinjuar thellë nga sulmi barbar e terrorist mbi emblemën e Pavarësisë së Kosovës, Ibrahim Rugovën, që ndodhi sot në orët e para të mëngjesit e që fatmirësisht nuk pati pasoja në njerëz dhe në vetë njeriun e parë të Kosovës, thuhet në një deklaratë të degës së LDK-së në Gjilan.

"Ky akt terrori që drejtpërsëdrejti synoi njeriun që më së shumti dha dhe bëri për Kosovën, ka shqetësuar çdo njeri normal dhe të ndërgjegjshëm në komunë e Gjilanit.

 

Barbaria e akteve terroriste me motive politike po prek në institucionin e parë të shtetësisë së Kosovës dhe kjo duhet të na shkundë mirë e mirë të gjithë neve që kemi synuar dhe vazhdojmë së synuari pavarësinë e Kosovës.

Duke mos u trembur dhe duke mos u ndalur apo tërhequr prej qëllimeve tona nga sulme të tilla të cilat po dihet mirë prej nga e kanë burimin dhe prej ku adresohen sepse qe një kohë të gjatë po zihen e pë përzhihen nëpër masmediat e verdha të Kosovës".

"Organet përgjegjëse të sigurisë në Kosovë nuk kanë pse dërgojnë sinjale përmes shtypit dhe emisarëve të tyre në terren që të ruhemi apo që ta dijmë se jemi cak sulmi.

 

 

Dega e LDK-së për Beneluks dënon ashpër sulmin terrorist ndaj Presidentit të Kosovës

 

Bruksel, 12 mars 2004 - Kryesia e Degës së LDK-së për Beneluks, në emër të anëtarëve dhe simpatizantëve të shumtë në Belgjikë, Holandë dhe Luksemburg, dënon ashpër sulmin terrorist ndaj Rezidencës së Presidentit të Kosovës, Ibrahim Rugova.

Presidenti Ibrahim Rugova është përsonalitetit më i shquar në botën shqiptare, laureat i titujve dhe çmimeve më prestigjioze ndërkombëtare që janë një kontribut dhe ndihmesë e madhe për njohjen sa më të shpejtë të shtetit të pavarur të Kosovës.

Një akt i tillë, ndaj institucionit më të rëndësishëm, Presidentit të Kosovës, nuk mund të jetë tjetër pos vepër e grupeve kriminele që po veprojnë për destabilizimin e Kosovës, në llogari të armiqve shekullorë të Kosovës dhe të çështjes shqiptare në përgjithësi.

Kryesia e Degës së LDK-së për Beneluks, shpreh përkrahjen dhe admirimin për Presidentin e KosovësIbrahim Rugova, dhe për të gjitha institucionet kombëtare e ndërkombëtare, që angazhohen për një Kosovë të lirë, demokratike, shtet të Pavarur dhe të integruar në Bashkimin Evropian dhe Aleancën Veriatlantike, thuhet në një deklaratë të Degës së LDK-së për vendet e Beneluksit.

 

 

Dega e LDK-së në Austrisë shpreh indinjatë të thellë ndaj sulmit të sotëm në rezidencën e Presidentit Rugova

 

Vjenë, 12 mars 2004 - "Me indinjatë të thellë morëm lajmin për sulmin kriminal të kryer mbi Rezidencën e Presidentit të Kosovës dhe Kryetarit të LDK-së, Ibrahim Rugova!

 

Ky sulm barbar është politik i drejtuar kundër Presidentit të Kosovës, Ibrahim Rugova, Lidhjes Demokratike të Kosovës si dhe institucionit më të lartë të vendit, me qëllim të destabilizimit politik të Kosovës dhe pengimin e procesit të pavarësimit të saj", thuhet në reagimin e degës së LDK-së në Austri, duke e dënuar ashpër këtë akt të shëmtuar.

"Akte të tilla kriminale e zbehin imazhin e Kosovës dhe popullit të saj para faktorit ndërkombëtar dhe botës demokratike", thuhet në këtë reagim dhe kërkohet që policia e UNMIK-ut dhe SHPK-ja, që sa më shpejt të zbulojnë autorët e këtyre akteve kriminale dhe të nxirren para drejtësisë.

  

Ata duhet ta kryejnë misionin e vet duke mos e toleruar terrorizmin që ka lëshuar rrënjë edhe në Kosovë, edhe para syve të tyre. Anëtarësia e LDK-së dhe strukturat e saja do të dijnë si të ruhen dhe si të veprojnë ndaj akteve të këtilla kriminale", thuhet në këtë deklaratë të degës së LDK-së në Gjilan.

 

 

Sulmi në Rezidencën e Presidentit të Kosovës ka indinjuar bashkatdhetarët shqiptarë dhe opinionin në Norvegji

 

Oslo, 12 mars 2004 - Sulmi sotëm në Rezidencën e Presidentit të Kosovës Dr. Ibrahim Rugova, ka indinjuar thellë bashkatdhetarët shqiptarë dhe opinionin në Norvegji.

"Kryesia e Degës së LDK-së reagon fuqishëm ndaj aktit kriminal në fjalë dhe denon aktet e dhunës që për fat të keq po ndodhin në vendin tonë.

 

Vlerësojmë gjithashtu se aktet e tilla terroriste vështirësojnë proceset demokratike në Kosovë, por jemi të bindur se rruga e Presidentit Rugova drejt njohjes formale të pavarësisë ashtu dhe demokratizimin dhe zhvillimin e Kosovës nuk mund të ndalen nga akte të tilla sa të dënueshme aq dhe qyqare", thuhet në një reagim të Degës së LDK-së në Norvegji.

 

 

FR i LDK-së në Zvicër shpreh indinjatë ndaj aktit kriminal që ndodhi në rezidencën e Presidentit të Kosovës

 

Cyrih, 12 mars 2004 - Kryesia e Forumi i Rinisë së LDK-së, Dega në Zvicër dënon ashpër këtë akt kriminal. Ky sulm është i drejtuar kundër shtetit dhe pavarësisë së Kosovës dhe kundër institucioneve demokratike e të ardhmes së vendit tonë.

Është për t'u çuditur se si është e mundur që UNMIKU dhe forcat e tjera ndërkombëtare dhe vendore edhe pse në dijeni të ndërrmarrjeve të këtilla dhe akteve tjera, të cilat janë paralajmëruar disa herë kundër LDK, në gjithë Kosovën, nuk arritën t'i parndalojnë!

Kryesia e FR të LDK-së shpreh përkrahje të parezervë ndaj presidentit Ibrahim Rugova dhe Kryesisë së LDK-së.

 

 

Kryesia e Degës së LDK-së në Gjermani dënon sulmin kriminal ndaj Presidentiit të Kosovës

 

Shtutgart, 12 mars 2004 - Kryesia e Degës, nëndegët dhe aktivet e LDK-së në Gjermani, së bashku me anëtarësinë e gjerë dhe simpatizantët e shumtë në Gjermani, janë të indinjuar thellë nga akti kriminal ndaj rezidencës së Presidentit të Kosovës, Ibrahim Rugova, njëherit edhe kryetar i LDK-së.

Aktet e tilla, të shtuara ditëve të fundit në Kosovë, padyshim bëhen nga një dorë e zgjatur e shërbimeve sekrete kriminale serbe që veprojnë në Kosovë apo jashtë saj dhe kanë për qëllim krijimin e një situate të pasigurisë në Kosovë dhe që vështirëson të gjitha proceset e filluara drejt pavarësisë së plotë të Kosovës.

Kryesia e Degës së LDK-së në Gjermani këtë sulm, duke e vlerësuar atë si një akt kundër institucioneve tona demokratike.

Dega e LDK-së në Gjermani, kësaj radhe sikurse edhe në sulmet e kërcnimet ndaj aktivistëve të saj, mbetet e palëkundur në pozitat e saj, në çuarjen e aktivitetit përpara, në përkrahjen e parezervë ndaj presidentit Ibrahim Rugova, Kryesisë qendrore të LDK-së në Kosovë dhe të gjitha atyre forcave kombëtare që angazhohen dhe e duan një Kosovë të qetë e stabile, thuhet në një komunikatë të Kryesisë së Degës së LDK-së në Gjermani.

 

 

Reagim i Forumit të Gruas të LDK ndaj sulmit kriminal në Rezidencën e Presidentit të Kosovës

 

Prishtinë, 12 mars 2004 - Forumi i Gruas i LDK dënon ashpër sulmin e sotëm në Rezidencën e Presidentiti të Kosovës, Ibrahim Rugova, duke e vlerësuar si sulm kriminal ndaj institucionit më të lartë shtetëror, Presidentit të Kosovës.

Ky sulm është i drejtuar kundër Shtetit dhe Pavarësisë së Kosovës dhe kundër institucioneve demokratike e të ardhmes së vendit.

Akti kriminal i sotëm në Rezidencën e Presidencës është edhe një akt i sulmeve të paralajmëruara dhe të paparalajmëruara kundër LDK, Presidentit të Kosovës dhe Kryetar i LDK, Ibrahim Rugova, dhe drejtuesve të tjerë të LDK në gjithë Kosovën.

Forumi i Gruas i LDK kërkon masa urgjente nga institucionet përkatëse të Kosovës dhe ndërkombëtare në shtimin e sigurisë për institucionet dhe drejtuesit e tyre, si edhe zënjen e kryesve të akteve kriminale dhe vënjen e tyre para drejtësisë.

 

 

Mark Krasniqi dënon sulmin kriminal në Rezidencën e Presidentit të Kosovës, Ibrahim Rugova

 

Prishtinë, 12 mars 2004 - Kryetari i Partisë Shqiptare Demokristiane të Kosovës akademik Mark Krasniqi dënon sulmin e kryer kriminal në Rezidencën e Presidentit të Kosovës, Ibrahim Rugova. Në reagimin e PSHDK-së ndër të tjera thuhet:

"Me indinjatë të thellë morëm lajmin për sulmin e sotëm kriminal të kryer mbi Rezidencën e Presinedentit të Kosovës z.Ibrahim Rugova, të cilin njëkohësisht e konsideroj sulm mbi institucionin më të lartë të vendit.

 

Në emrin tim dhe të Kryesisë së PSHDK-së, e dënoj ashpër këtë akt të pashembullt dhe kriminal, i cili është bërë me qëllim për ta frenuar procesin e pavarësisë së Kosovës, për realizimin e së cilës angazhohet me decenie të tëra Presidenti Rugova.

 

Konsederoj se aktet e tilla nuk mund ta ndalin rrugëtimin tonë drejt shtetit të pavarur të Kosovës të cilës rrugë po i prin me plotë sukses Presidenti Rugova", thuhet në reagimin e PSHDK-së.

"Kërkojmë nga organet e hetuesisë dhe drejtësisë të marrin masa adekuate për t'i zbuluar akterët e krimit dhe për ti nxjerrë para drejtësisë, ndërsa nga organet e UNMIK-ut kërkojmë urgjentisht të bëjnë sigurinë e personaliteteve më të larta të vendit", theksohet në një komunikatë të PSHDK-së të nënshkruar nga Mark Krasniqi.

 

 

LDK-ja më 17 mars organizon një protestë

 

Prishtinë, 12 mars 2004 - Në mbledhjen e sotme të Kryesisë së LDK-së me kryetarët e degëve u dënua ashpër sulmi i sotëm në Rezidencën e Presidentit të Kosovës dhe Kryetarit të LDK-së, Dr.Ibrahim Rugova, si një sulm i rëndë kriminal i drejtuar kundër institucionit më të lartë shtetëror të Kosovës dhe kundër angazhimeve shtetformuese, lirisë dhe pavarësisë së Kosovës.

Në këtë takim u vendos njëzëri që, më 17 mars 2004 (e mërkurë), në orën 12:00, në Prishtinë, të mbahet një protestë paqësore, si reagim ndaj sulmit të sotëm ndaj institucionit të Presidentit të Kosovës dhe kundër dhunës dhe akteve të tjera kriminale, që po e rrezikojnë sigurinë, të ardhmen dhe pavarësinë e Kosovës, thuhet në një njoftim të Kryesisë së LDK-së.

 

 

Udhëheqja e komunës së Prishtinës dënon ashpër sulmin kriminal ndaj Rezidencës së Presidentit të Kosovës

 

Prishtinë, 12 mars 2004 - Udhëheqja e Kuvendit Komunal të Prishtinës, dënon ashpër sulmin kriminal që ndodhi sot në orët e hershme të mëngjesit ndaj Rezidencës së Presidentit të Kosovës, dr. Ibrahim Rugova. Në reagimin e udhëheqjes së Kuvendit Komunal të Prishtinës, thuhet:

"Kuvendi Komunal i Prishtinës dënon ashpër sulmin e sotëm kriminal ndaj Rezidencës së presidentit të Kosovës, Ibrahim Rugova. Ky sulm kriminal i drejtuar kundër institucionit të familjes dhe institucionit më të lartë shtetëror të Kosovës, është sulm edhe kundër vlerave shtetformuese, si dhe sulm kundër lirisë dhe pavarësisë së Kosovës.

Ky është akt gjithësesi është edhe më i ulët, kur të kihet parasysh se në këtë objekt jeton edhe familja e Presidentit të Kosovës", thuhet në fund të reagimit të udhëheqjes së Kuvendit Komunal të Prishtinës.

 

 

Dega e LDK-së në Suedi sulmin mbi rezidencën e Presidentit Rugova e cilson akt kriminal-terrorist

 

Stokhlom, 12 mars 2004 - Sulmin e sotëm ndaj Rezidencës së Presidentit të Kosovës, e dënoi edhe Kryesia e Degës së LDK-së në Suedi, duke e cilsuar si një akt kriminal-terrorist i drejtuar kundër Presidentit të Kosovës, Ibrahim Rugova si dhe institucionit më të lartë të Kosovës, me qëllim të destabilizimit politik të Kosovës, pengimit të zhvillimit demokratik në Kosovë si dhe të zbehjes së imazhit të Kosovës para faktorit ndërkombëtar.

Ky sulm kundër Rezidencës së Presidentit të Kosovës, Dr. Ibrahim Rugova, është një sulm politik kriminal-terrorist kundër institucionit më të lartë të Kosovës të zgjedhur me anë të votës së lirë të popullit të Kosovës dhe kundër Lidhjes Demokratike të Kosovës.

 

 

Ministri Zef Morina shpreh indinjatë të thellë ndaj sulmit në rezidencën e Presidentit Rugova

 

Prishtinë, 12 mars 2004 - Ministri i Transportit dhe Postë-Telekomunikacionit, Zef Morina, shpreh indinjatë të thellë ndaj sulmit të sotëm në ambientin e rezidencës së Presidentit të Kosovës, Dr Ibrahim Rugova.

"Në emër të MTPT dhe në emrin tim shpreh indinjatën më të thellë për këtë sulm kriminal, të kryer nga ata që nuk e duan Kosovën dhe pavarësinë e saj. Shpërthimin në Rezidencën e Presidentit të Kosovës e kosnideroj atentat në personalitetin të Presidentit, Ibrahim Rugova, përkatësisht në institucionin më të lartë të vendit", thuhet në deklaratën e ministrit Morina.

"Ata që e kryen këtë sulm të rëndë kriminal, qyqar e barbar dëshirojnë që në këtë mënyrë të pengojnë proceset dhe angazhimin tonë permanent për ta bërë sa më parë Kosovën e pavarur", thotë Morina.

 

 

Reagim i Forumit të Rinisë të LDK-së për aktin kriminal në rezidencën e Presidentit Rugova

 

Prishtinë, 12 mars 2004 - Kryesia e Forumit të Rinisë të LDK-së në takimin e rregullt të sotëm me kryetar të Degëve, dënoi ashpër sulmin e sotëm në Rezidencen e Presidentit të Kosovës dhe Kryetarit të LDK-së, Ibrahim Rugova.

FR i LDK-së kërkon nga institucionet kompetente zbardhjen sa më të shpejtë të aktit kriminal dhe që kryerësit e veprave të tilla të nxirren sa më parë para organëve të drejtesisë.

Për të rinjtë e LDK-së është tejet shqetësues dhe brengosës mosefikasiteti dhe neglizhenca e organeve të hetuesisë dhe të rendit në zbardhjen dhe parandalimin e këtyre veprave kriminale, thuhet në reagimin e Kryesisë së FR të LDK-së.

 

 

Prodi përsëriti në takimin me Rexhepin dëshirën e Komisionit Evropian për ta ndihmuar Kosovën

 

Bruksel, 12 mars 2004 - Kryeministri i Kosovës Bajram Rexhepi gjatë qëndrimit në Bruksel dje në selinë e Komisionit Evropian në Bruksel e zhvilloi një takim me Romano Prodin, ku u diskutuan çështjet e implementimit të standardeve si dhe vazhdimit të dialogut me Beogrdin, përfshirë edhe mekanizmat përcjellëse të stabilizim-asociimit.

Romano Prodi e vuri theksin në mënyrë të veçantë në nevojë për stabilitet që ka Kosova, për përmirësimin e situatës së sigurisë, sidomos të pakicave, si dhe për venien në jetë plotësisht të standardeve si rruga më e shpejtë për hapjen e bisedimeve për zgjidhjen e statusit të saj.

 

Prodi po ashtu ka ripërsëritur dëshirën e Komisionit Evropian për të ndihmuar ekonomikisht dhe politikisht Kosovën, sidomos nëpërmjet vënies në jetë të mekanizmit të posaçëm përcjellës që Komsioni Evropian ka hartuar posqërisht për Kosovën si alternativë e marrëveshjeve të asociim stabilitetit.

Pas këtij takimi, kryeministri Rexhepi citohet të ketë thënë se propozimi i Iniciativës Evropiane për Stabilitet për zgjidhjen e çështjes së Mitrovicës, nuk mund të hidhet poshtë pa u këshilluar në hollësi së bashku me autoritetet lokale, qendrore dhe ndërkombëtare në Kosovë. Bëhet fjalë për një projekt që ofron propozime konkrete dhe mënyrat se si të tejkalohet situata në qytetin e ndarë të Mitrovicës.

 

 

Problemet ekonomike ndërmjet Kosovës dhe Maqedonisë do të zgjidhen deri në fund të këtij viti

 

Prishtinë, 12 mars 2004 - Afaristët e Kosovës dhe ata të Maqedonisë dje organizuan në Prishtinë një takim ndërmjet prodhuesve kryesisht të agrokulturës nga Maqedonia me të interesuar për partneritet nga afaristët kosovarë.

 

Nga Kosova ishin të tubuar kryesisht prodhues të cilët kërkonin tregtarë nga Maqedonia, ndërkaq vizitorët nga Maqedonia të kundërtën.

Në këtë takim u theksua se problemet ekonomike ndërmjet dy vendeve definitivisht do të zgjidhen deri në fund të këtij viti.

Me këtë rast është kërkuar nga qeveria maqedonase që urgjentisht të fillojë negociatat për hartimin e marrëveshjes për tregti të lirë me Kosovën.

 

 

KMG: Shqipëria një vend i vështirë për shtypin e pavarur

 

Nju Jork, 12 mars 2004 - Në një raport të Komitetit për Mbrojtjen e Gazetarëve, organizate me qendër në Nju Jork, thuhet se lufta e vazhdueshme politike dhe gjendja e dobët ekonomike vazhdojnë ta bëjnë Shqipërinë një vend kaotik dhe të vështirë për shtypin e pavarur.

Raporti shprehet me tone kritike për gjendjen e medias në Shqipëri gjatë vitit që kaloi. Aty thuhet se gjatë 2003-shit, gazetarët shqiptarë u bënë objekt i trysnisë së qeverisë, i padive për shpifje, i pushimeve nga pronarët e politizuar dhe i privimeve nga informacioni qeveritar, sidomos kur hetonin për korrupsionin dhe krimin e organizuar.

Për më tepër, thuhet në raport, standardet e ulta profesionale, theksi tek sensacioni dhe ndikimi financiar i partive mbi shumë mjete të shtypit, u japin gazetarëve pak besueshmëri në publik dhe shpesh e detyrojnë shtypin të vetcensurohet.

Gjatë vitit 2003, thotë raporti i Komitetit për Mbrojtjen e Gazetarëve, qeveria e kryeministrit Fatos Nano, u mbulua pozitivisht nga tre stacionet televizive kombëtare, Televizioni Shtetëror Shqiptar, Televizioni i pavarur Arbëria dhe Televizioni i pavarur Klan, sepse partia e tij socialiste ruajti një ndikim të fortë mbi Radiotelevizionin Shqiptar dhe Këshillin Kombëtar për Radion dhe Televizionin.

Në disa raste, thuhet në raport, qeveria ka vepruar me dorë të fortë për zbatimin e rregulloreve mbi mdiat. Në muajin gusht, Këshilli Kombëtar mbylli stacionin e pavarur Alba TV për mos pagim të tarifës së transmetimit. Sipas burimeve të Komitetit për Mbrojtjen e Gazetarëve, kjo i frikësoi drejtuesit e mediave të tjera duke krijuar një klimë vetëcensure, thuhet në një njoftim të Z.A.

 

 

Edhe BDI me kandidat të vetin për president të Maqedonisë

 

Tetovë, 12 mars 2004 - Partia shqiptare në Qeverinë e Maqedonisë, Bashkimi Demokratik për Integrim, do të dalë me kandidatin e saj për president. Ky vendim është marrë në një takim të Kryesisë së kësaj force të zhvilluar në Tetovë, të enjten në mbrëmje. Nuk është bërë publik emri i kandidatit, por këtë do ta caktojë kryetari i saj Ali Ahmeti.

Ndërkaq, edhe partia tjetër shqiptare në opozitë, ajo për Prosperitet Demokratik, pritet që sot pas dite të marrë vendim se cili do të jetë kandidati i vet për zgjedhjet e ardhshme, pasi dështoi nisma e saj që shqiptarët të dalin me një kandidat të vetëm.

Më herët, edhe forca kryesore opozitare e shqiptarëve në Maqedoni, Partia Demokratike, bëri të ditur se së shpejti do të shpallë emrin e kandidatit të saj.

 

 

Tiranë: Afati për deklarimin e pasurive po afron

 

Tiranë, 12 mars 2004 - Rreth pesë mijë zyrtarë dhe funksionarë të lartë në Shqipëri duhet të deklarojnë pasuritë personale brenda muajit mars, në bazë të një ligji të ri që synon të sjellë një kontribut më shumë në luftën kundër korrupsionit.

Me anë të një publiciteti nëpër televizione, një shoqatë joqeveritare ka filluar numërimin në zbritje për ditët që u kanë mbetur funksionarëve të lartë të shtetit, deputetëve dhe qeveritarëve, deri në 31 mars.

Deri atëherë, ata duhet të kenë dorëzuar të plotësuar një formular me rreth 20 fletë pranë inspektoriatit të lartë për deklarimin e pasurive.

 

 

Çoviq thotë se po përgatitet terreni që në vitin e ardhshëm të shpallet pavarësia e Kosovës

 

Beograd, 12 mars 2004 - Drejtuesi i ashtuquajtur të "Qendrës koordinuese për Kosovën" Nebojsha Çoviq në një konferencë shtypi në Beograd ka kërkuar nga qendrat e vendosjes ndërkombëtare të deklarohen lidhur me statusin e ardhshëm të Kosovës.

 

Çoviq citohet të ketë thënë se koha po punon kundër interesave serbe dhe se shihet qartë se bashkësia ndërkombëtare dhe UNMIK-u nëpërmjet planit të zbatimit të standardeve të Kosovës po përpiqen që të ndryshojnë Rezolutën 1244 dhe të mundësojnë pavarësinë e Kosovës.

 

Ai ka theksuar se tashmë ka filluar faza e zgjidhjes së statusit përfundimtar të Kosovës. Çoviq apeloi tek organet serbe të shtetit të kundërshtojnë standardet e Kosovës, ngase sipas tij, ato nuk përfillin interesat e Serbisë dhe serbëve dhe kjo do të thotë se pas realizimit të standardave Kosova do të jetë e pavarur.

 

 

Shkarkohet presidenti koreano-jugor

 

Seul, 12 mars 2004 - Ka patur një zhvillim dramatik në Asamblenë Kombëtare të Koresë së Jugut ku presdienti Roh Mu Hjun ka humbur një votë që e pezullon atë të vazhdojë të kryejë detyrën e presdientit. Pushteti i tij pezullohet deri në një vendim përfundimatr nga Gjykata Kushtetuese e vendit.

Seanca filloi me shkëmbime grushtash midis deputetëve të dy grupimeve politike, ndërsa roje të sigurisë nxorën jashtë sallës përkrahësit e presdientit të cilët qanin dhe thërrisnin 'ndaloni grushtin e shtetit'. Lëvizja për të shkarkuar presdientin është e paparashikuar.

 

 

Në sulmet e djeshme në Madrid kanë vdekur edhe shtetas të 11 vendeve të huaja

 

Madrid, 12 mars 2004 - Në mesin e viktimave në sulmet e djeshme terroriste në Madrid ka pasur edhe shtetas të 11 vendeve të huaja, ka bërë të ditur sot kryeministri spanjoll Hoze Maria Aznar.

 

 

Në Spanjë sot janë paralajmëruar demostrata masive

 

Madrid, 12 mars 2004 - Demonstrata masive në të cilat njerëzit do të shprehin zemërimin për gjakun e derdhur dhe solidaritetin me viktimat dhe familjet e tyre janë paralajmëruar të mbahen në gjithë vendin.   Në gazeta sot flitet për masakrën e Madridit duke e quajtur atë si Nëntë Shtatori i Spanjës. Hetimi zyrtar dhe spekulimet publike se kush ishte pas sulmeve vazhdojnë. Agjencitë sekrete thonë se ka të gjitha tiparet e al-Kaidas, por gjithashtu edhe të grupit separatist bask ETA që lufton për një atdhe të pavarur në Spanjën veriore.

   

  

Sot në mesditë, e gjithë Spanja mbajti një minutë heshtje në shenjë nderimi për viktimat

 

Madrid, 12 mars 2004 - Të premtën në mesditë, e gjithë Spanja mbajti një minutë heshtje në shenjë nderimi për viktimat e shpërthimeve dhe udhëheqës nga e gjithë Evropa arritën në Madrid për t'u bashkuar me një numër të madh spanjollësh të mbledhur në kryqytet për një tubim kundër terrorit.

Në Spanjë është shpallur një periudhë zie tri-ditëshe dhe fushata për zgjedhjet kombëtare është pezulluar, por qeveria thotë se votimi do të zhvilliohet të dielen, siç ishte planifikuar.

 

 

Shtatë minatorë kanë humbur jetën në një minierë në Çeki

 

Pragë, 12 mars 2004 - Shtatë minatorë kanë humbur jetën të enjtën nga shembja e galerisë në një minierë në lindje të Çekisë, kanë njoftuar sot mediat vendore.

Fatkeqësia ka ndodhur në një thellësi prej 680 metrash në minierën Dul Lazi afër qytetit Ostrava, në lindje të vendit.

Shtatë minatorë kanë humbur jetën, ndërkaq katër të tjerë i kanë nxjerrë ekipet e shpëtimit vetëm me lëndime të lehta.

 

 

Në Irak janë vrarë dy ushtarë amerikanë

 

Bagdad, 12 mars 2004 - Nga një shpërthim bombe në një rrugë, afër vendbanimit Habania, që gjendet afër qyteteve kryengritëse Ramadi dhe Falluxha, 70 kilometra në perendim të Bagdadit, kanë humbur jetën dy ushtarë amerikanë dhe një tjetër është plagosur, njofton BBCWorld.

 

Automjeti i ushtarëve amerikanë, që është goditur me bombë, shërbente si eskortë e autokolonës, bëjnë të ditur raportet e Komandës qendrore amerikane. Vrasja e këtyre ushtarëve ngre në 267 numrin e trupave amerikane, të vrarë në aksione në Irak që kur është shpallur e përfunduar lufta më një maj.

 

 

Al Kaida merr përgegjësinë për sulmet në Spanjë?

 

Madrid, 12 mars 2004 - Në një letër që mendohet se është shkruar nga bashkëpunëtorët e Al-Qaidës, merret përgjegjësia për serinë e shpërthimeve të djeshme në Madrid ku u varanë 198 vetë dhe u plagoswn mbi 1400 vetë.

Në letrën që i është dërguar redaksisë së gazetës arabe al-Quds al-Arabi në Londër, thuhet se skuadrat e vdekjes kanë penetruar në Spanjë, një nga shtyllat më të fuqishme të aleancës.

Letra i atribuohet Brigadave Abu Hafas al-Masri, të cilat kanë marrë përgjegjësinë për sulmet terroriste të së kaluarës në emër të al-Qaidës. Por deklaratat e kësaj organizate se ishte autore e ndërprerjes së energjisë elekrtike në një pjesë të madhe të Shteteve të Bashkuara dhe Kanadasë vitin e kaluar, nuk rezultuan të sakta.

 

 

Një amerikane arrestohet për spiunazh në favor të Irakut

 

Bagdad, 12 mars 2004 - Prokurorët amerikanë thonë se një shtetase amerikane është arrestuar për veprimtari spiunazhi në favor të Irakut. Ajo është Susan Lindauer, e cila u arrestua në qytetin e saj Takoma Park të Merilendit, pranë Washingonit.

Në aktpadinë ndaj zonjës Lindauer thuhet se ajo ka kryer veprimtari si agjente e zbulimit irakian si dhe transaksione të ndaluara financiare me qeverinë e ish-diktatorit irakian Sadam Hussein.

 

 

Spanja nuk përjashton asnjë mundësi lidhur me shpërthimet e Madridit

 

Madrid, 12 mars 2004 - Kryeministri spanjoll, Hoze Maria Aznar, tha se Spanja do të hetojë të gjitha mundësitë në kuadër të përpjekjeve për të gjetur personat që kryen shpërthimet e bashkërenduara të ditës së djeshme në Madrid.

Kryeministri Aznar u tha të premtën gazetarëve se nuk do të përjashtohet asnjë mundësi dhe premtoi se Spanja do të publikojë të gjithë informacionin që mbledh rreth shpërthimeve që shkaktuan vdekjen e të paktën 198 vetave nga 11 vende. Por, numri i viktimave vazhdon të rritet.

  |  KULTURË  |  HISTORI  |   POLITIKË  |  OPINIONE  |  ADRESARI  |  ARKIVI  |