E enjte, 11 mars 2004

E enjte, 11 mars 2004

Përmbajtja:

Presidenti Rugova priti nënsekretarin e përgjithshëm të OKB-së, Gueno
President Rugova ngushëlloi Presidentin Moisiun
Presidenti Rugova tha se FR i LDK-së i ka bashkuar të rinjtë për liri, pavarësi e demokraci të Kosovës
Minatorët e Stan Tërgut dekorojnë kryeparlamentarin Daci
Në Kosovë ka arritur nënsekretari i përgjithshëm i OKB-së Zhan Mari Guine
Alarm i rremë për një mjet shpërthyes në qendër të Prishtinës
Arabia Saudite kërkon një mijë punëtorë shëndetësorë nga Kosova
Tri ministri angazhohen për një mjedis të shëndoshë në shkolla
Eksperti amerikan Kuhner thotë se pavarësia e Kosovës do të ndodhë brenda 3 deri 5 viteve
Sot në Prishtinë vrau veten policja Sadete Shulemaja
Vendet e Beneluksit kanë kthyer në shtëpi një grup shqiptarësh
Zyrtarët e policisë ndërkombëtare nuk komentuan kërcënimet dhe shpërthimet e fundit në Prishtinë
Mirush Kabashi prezentohet sonte në Beograd me shfaqjen "Mbrojtja e Sokratit"
Dy ish-gjeneralë kroatë të akuzuar për krime lufte janë nisur për Hagë
Pensionohet hetuesi i varrezave masive të shqiptarëve në Serbi
BE për zgjedhjet e ardhshme presidenciale në Maqedoni
Në Shkup u promovuan 69 oficerë të armatës maqedonase, prej tyre 36 shqiptarë
Në një aksident automobilistik vdiq i biri i Presidentit të Shqipërisë
Një grup sipërmarrësish italianë ka marrë përsipër ndërtimin e një pjese të autostradës Durrës – Prishtinë
Në Portin e Durrësit u zbuluan mbi 13 kilogram heoinë
Numri i të vrarëve në Madrid ka arritur në 186
Madrid: 173 të vrarë është bilanci më i ri nga një seri shërthimesh
Në Madrid janë vrarë 131 persona
Në Basra janë vrarë 2 gra irakiane që punonin me kontraktuesit e koalicionit
Në tri shpërthime në Madrid kanë vdekur 62 njerëz
Të pakten 15 njerëz kanë vdekur në një sërë shpërthimesh në Madrid
Vitin e kaluar janë vrarë 36 gazetarë në botë
Ministri i jashtëm izraelit në Kajro
Një ushtar amerikan ka vdekur nga plagët e marra

Presidenti Rugova priti nënsekretarin e përgjithshëm të OKB-së, Gueno


Poashtu ai tha se është biseduar edhe për standardet, të cilat do të përmbushen së bashku me UNMIK-un, duke theksuar se një pjesë e këtyre standardeve tashmë janë përmbushur, por të cilat duhet të vlerësohen së bashku. Presidenti Rugova tha se politikë nacionale e Kosovës është që të ketë marrëdhënie të mira me të gjithë fqinjët e saj dhe që ato të prëmirësohen së bashku me UNMIK-un.
Edhe me këtë rast Presidenti vuri në dukje se njohja formale e pavarësisë së Kosovës do t'i përshpejtonte proceset e brendshme ekonomike dhe demokratike dhe do të qetësonte këtë pjesë të Evropës. "Objektivi ynë madhor është integrimi në BE, në NATO dhe në miqësi të përhershme me SHBA-të.

Edhe ne si shumë vende të Evropës një pjesë të pavarësisë sonë do ta bartim në BE, ngase sot të gjitha ligjet tona janë kompatibile me BE-në, e që jan hartuar me ekspertët ndërkombëtarë", tha Presidenti Rugova, i cili e falmederoi zotin Gueno që personalisht është angazhuar prej katër vjet e gjysmë për Kosovën dhe e ka ndihmuar vendin tonë.
"Është kënaqësi dhe privilegj imi që të takoj Presidentin Rugova përsëri", tha në një prononcim zoti Gueno, duke shtuar se sa herë që vjen në Kosovë sheh një shkallë të progresit dhe të zhvillimeve. Ai tha se në këtë takim janë diskutuar shumë çështje që ndërlidhen me fusha të ndryshme.

"Ne jemi duke punuar së bashku që ju të ecni përpara dhe të shënoni progres", tha z.Gueni, duke përmendur Shërbimin Policor të Kosovës për të cilin tha se ka arritur të ndërtojë kapacitete të mira. Padyshim se edhe policia e UNMIK-ut, tha ai, është duke punuar me pjesëtarët e SHPK-së që t'i mbështesë ata në kryerjen e detyrave dhe përgjegjësive që i kanë.
Zoti Gueno tha në vazhdim se për njerëzit e Kosovës është shumë me rëndësi që të kenë punë, që të hapen vende të reja të punës, por është shumë me rëndësi për Kosovën inkurajimi i investimeve të huaja. Ai premtoi që UNMIK-u dhe OKB-ja do të bëjnë ç'është e mundur që ta shtyejnë përpara procesin e privatizimit, me procedurë transparante, proces ky që do të mbrojë interesat e popullit të Kosovës.
Ndërkaq, duke folur për çështjen e standardeve, Gueno tha se ato pashmangshëm janë të lidhura me ekonominë, sepse sa më shumë që të përmbushen këto standarde nga ana e Kosovës, aq më shumë do të kenë besim investitorët e huaj që të investojnë dhe në këtë mënyrë njerëzit do ta shohin ardhmërinë e tyre në Kosovë.

"Dhe ky është edhe thelbi i standardeve, kur në një shoqëri të gjithë respektojnë njëri-tjetrin dhe ku komunitetet jetojnë në harmoni me njëri-tjetrin dhe unë jam i ikurajuar nga ajo që e tha Presidenti se nën udhëheqjen e tij ai do t'i bëjë njerëzit e Kosovës të jenë së bashku", tha në fund zoti Gueno.


President Rugova ngushëlloi Presidentin Moisiun

Prishtinë, 11 mars 2004 - Presidenti i Kosovës Ibrahim Rugova, ka ngushëlluar Presidentin e Shqipërisë, Alfred Moisiun, me me rastin e vdekjes tragjike të birit të tij, Admir Moisiu.
Në telegramin e ngushëllimit të Presidentit Rugova thuhet:
"Me rastin e vdekjes tragjike të birit Tuaj, Admir Moisiu, Ju shpreh ngushëllimet e mia të sinqerta dhe të popullit të Kosovës.
Është e dhembshme vdekja e Admirit në moshë të re, por duhet të ndieheni krenar, sepse Ai e filloi karrierën e mbarë si nëpunës shteti në shërbim të Shqipërisë, në të mirë të saj.
Ju lutemi bëhuni të fortë në këto momente të rënda për Ju dhe familjen Tuaj. Ne qëndrojmë pranë Jush", thuhet në ngushëllimet e Presidentit Rugova drejtuar Presidentit të Shqipërisë, Alfred Moisiu.

Presidenti Rugova tha se FR i LDK-së i ka bashkuar të rinjtë për liri, pavarësi e demokraci të Kosovës

Prishtinë, 11 mars 2004 - Në Prishtinë sot me një solmenitet rasti Forumi i Rinisë së LDK-së shënoi 14-vjetorin e themelimit, e ku merrte pjesë edhe Presidenti i Kosovës Ibrahim Rugova, si dhe kryeparlamentari Nexhat Daci, ministra e deputetë të kësaj partie.
Duke folur në këtë solemnitet, Presidenti Rugova tha se FR i LDK-së për këto 14 vjet veprim ka zhvilluar një veprimtari dhe aktivitet të dendur e të suksesshëm, duke i bashkuar të rinjtë e Kosovës për liri, pavarësi e demokraci. Ky forum, tha më tutje Presidenti, gjithashtu kreu një funksion të madh në kultivimin dhe edukimin e të rinjve në frymën moderne të kulturës shtetërore dhe kombëtare.

Duke përkujtuar se data e themelimit të FR të LDK-së përkon me datën simbolike të 11 marsit të vitit 1981, Presidenti Rugova tha se atë kohë të rinjtë e Kosovës u ngritën për të kërkuar liri, pavarësi e demokraci për Kosovën.

Ndërkaq kryetari i FR të LDK-së Lulzim Zeneli, pasi përkujtoi se Forumi i Rinisë i LDK-së si organizatë politike e të rinjve u themelua më 11 mars të vitit 1990, tha se qëllimi i themelimit të FR-së ishte organizimi dhe pjesëmarrja e organizuar e të rinjve në lëvizjen politike dhe në rezistencën e përgjithshme të populli të Kosovës në mbrojtje të vlerave kombëtare.

Ai tha se shumë shpejt Forumi i Rinisë i LDK-së u bë organizatë masive e të rinjve në tërë Kosovën dhe u bë zë i fuqishëm dhe artikulues i kërkesave dhe politikave të brezit të ri, bartëse e organizimit, aktivitetit dhe angazhimit të të rinjve të Kosovës, komponentë e fuqishme e LDK-së në rrugën e jetësimit të plotë të lirisë, pavarësisë dhe demokracisë.

Zeneli theksoi se sot, më shumë se kurrë më parë, Forumi i Rinisë së LDK-së ka arritur të regjenerojë energji në kuadër të radhëve të saj, të sjellë frymë dhe potencial në koherencë të plotë me nevojen që shtrojnë proceset në vend, duke qenë gjithmonë në shërbim të politikave shtetërore e nacionale.

Duke folur për ciklin e përmbyllur të takimeve dhe debateve me të rinjtë në të gjitha qendrat e Kosovës, në kuadër të aktivitetëve për vitin 2004, Zeneli tha se në këto takime të rinjtë debatuan shumë drejt dhe në mënyrë të hapur, konfirmuan vendosmërinë për angazhime më proaktive në të gjitha segmentet.

"Në këto takime të rinjët afirmuan fuqinë e FR-së dhe vizionin e të rinjve të Kosovës në rrugën e prosperitetit dhe integrimit të vendit në Bashkimin Evropian", tha kryetari i FR të LDK-së.

Minatorët e Stan Tërgut dekorojnë kryeparlamentarin Daci

Mitrovicë, 11 mars 2004 - Një delegacion i minatorëve Miniera me Flotacion të Stan Tërgut është takuar dje me kryetartin e Kuvendit të Kosovës, Nexhat Daci dhe ka biseduar me të për problemet me të cilat ballafaqohen minatorët.

Me këtë rast minatorët e Stan Tërgut i kanë dorëzuar kryeparlamentarit Daci mirënjohjen për angazhimin e tij për çështjen e minatorëve, të ndarë me rastin e pesëmbëdhjetë vjetorit të Grevës së madhe të minatorëve.

Duke shprehur konsideratë për punën e madhe të minatorëve për çështjen e Kosovës, profesor Daci ka shprehur dyshim se e ka merituar këtë mirënjohje dhe ka shtuar se nuk është bërë sa është dashur për minatorët.

Duke bashëkndjerë sakrificat e mëdha të minartorëve dhe pozitën e rëndë materiale të familjeve të tyre, Daci është shprehur se në këtë fazë të tranzicionit, transformimi dhe rikonstruimi i ekonomisë lë pasoja të rënda, të cilat duhet të përballohen.

Në Kosovë ka arritur nënsekretari i përgjithshëm i OKB-së Zhan Mari Guine

Prishtinë, 11 mars 2004 - Nënsekretari i përgjithshëm i OKB-së Zhan Mari Gueno, udhëheqës i operacioneve paqeruajtëse civile dhe ushtarake në të gjitha vendet e botës, i shoqëruar nga zyrtarë të tjerë ka arritur dje pasdite në Kosovë, ku do të qëndrojnë katër ditë. Kjo vizitë cilësohet si inspektim i misionit të UNMIK-ut.

Zyrtarët e administratës ndërkombëtare thonë thonë se vizita e z. Gueno në Kosovë vlerësohet si shumë e rëndësishme sepse ai ka arudhur këtu për t'u njoftuar nga dora e parë në lidhje me të arriturat, dështimet dhe vështirësitë e administratës ndërkombëtare gjatë implementimit të Rezolutës 1244 të KS të OKB-së.

Kjo vizitë po ashtu nga zyrtarët e UNMIK-ut kuptohet si tentim për të shtyrë përpara procesin e standardeve dhe sidomos për të përfshirë në këtë proces përfaqësuesit e minoritetit serb, të cilët vazhdojnë të kundërshtojnë dokumentin e standardeve.

Gjatë vizitës katërditëshe në Kosovës nënsekretari i përgjithshëm të OKB-së Zhan Mari Guino do të takojë të gjithë udhëheqësit ndërkombëtarë dhe ata vendorë në Kosovë dhe do të vizitojë zona të ndryshme të banuara me shqiptarë dhe serbë.

Nënsekretari i përgjithshëm i OKB-së, Zhan Mari Guine është pritur mbrëmë nga Hari Holkeri dhe ka zhvilluar takime me komandantin e KFOR-it, gjeneralin italian Holger Kamerhof.

Alarm i rremë për një mjet shpërthyes në qendër të Prishtinës

Prishtinë, 11 mars 2004 - Sot rreth orës 12.00 policisë i arriti një telefonatë anonime për një mjet shpërthyes të vendosur afër hotelit "Grand" në qendër të Prishtinës. Ekipet e KFOR-it dhe policia e UNMIK-ut menjeherë kanë dalë në vendin e ngjarjes.

Pas një shpërthimi të kontrolluar është konstatuar se çanta e vendosur ishte e zbrazët dhe në të nuk ka pasur kurrfarë mjeti shpërthyes. Ky është rasti i katërt brenda javës në Prishtinë.

Arabia Saudite kërkon një mijë punëtorë shëndetësorë nga Kosova

Prishtinë, 11 mars 2004 - Zhvillimi i marrëdhënieve të mëtejshme në fushën e shëndetësisë dhe mundësia e punësimit të rreth 1000 punëtorëve shëndetësorë të Kosovës në Arabinë Saudite, ishte temë qendrore e takimit të zv.ministrit të Shëndetësisë së Arabisë Saudite dhe ministrit kosovar të Punës dhe Mirëqenies Sociale Ahmet Isufi.

Arabia Saudite kërkon një mijë punëtorë shëndetësorë të të gjitha profileve nga Kosova për të punësuar në këtë vend arab. Por, paraprakisht do të nënshkruhet një marrëveshje për punësimin e punëtorëve të cilët kanë të paktën dy vjet përvojë pune.

Ministrja e Shëndetësisë së Kosovës Resmije Mumxhi tha se punësimi do të bëhet në të gjitha fushat shëndetësore. Por ajo tha se Kosova nuk mund të dërgojë menjeherë 1000 punëtorë, që të mos dëmtohet ky shërbim në vend, por kjo do të bëhet gradualisht.

Zv.ministri i Shëndetësisë së Araabisë Saudite tha se vendi i tij është i gatshëm për një bashkëpunim ndërmjet dy ministrive. Ai shprehu gatishmërinë që të ndihmojë spitalet me pajisje dhe me barna.

Tri ministri angazhohen për një mjedis të shëndoshë në shkolla

Prishtinë, 11 mars 2004 - Ministria e arsimit, Ministria e shëndetësisë dhe Ministria e mbrojtjes së ambientit dhe planifikimit hapësinor nënshkruan sot një marrëveshje të përbashkët e cila ka për qëllim promovimin e një mjedisi të shëndoshë në shkolla.

Kjo marrëveshje do t'i shndërrojë shkollat në pika referuese të mbrojtjes së shëndetit, tha Isuf Zeneli, sekretar i përhershëm në Ministrinë e Arsimit, duke shtuar se në të përcaktohen detyrat e tri ministrive dhe në këtë mënyrë do të përmirësohen kushtet për ruatjen e shëndetit në kolektivin e shkollës.

Ndërkaq, Pleurat Sejdiu, sekretar në Ministrinë e shëndetësisë, theksoi rëndësinë nënshkrimit të marrëveshjes në bazë të së cilës nxënësit do të mund të përfitojnë njohuri të reja.

Zbatimin e kësaj marrëveshje do ta bëjë komiteti ndërministror, i cili do të formohet nga tri ministritë dhe atë do ta udhëheq koordinatori i programit.

Nënshkrimim e kësaj marrëveshjeje e kanë ndihmuar zyra e Organizatës Botërore të Shëndetësisë, IOM dhe UNICEF-i.

Eksperti amerikan Kuhner thotë se pavarësia e Kosovës do të ndodhë brenda 3 deri 5 viteve

Uashington, 11 mars 2004 - Eksperti amerikan Xhefri Kuhner për statusin e ardhshëm të Kosovës thotë se pavarësia e Kosovës do të ndodhë brenda 3 deri 5 viteve të ardhshme dhe për këtë nuk ka dyshim.

"Së pari për mirë apo për keq çështja e shqiptarëve të Kosovës ka qenë në mjaft raste e propaganduar e mbështetur dhe e pranuar nga shumë në Perëndim. Dhe mendoj se ideja e ndarjes së Kosovës është tepër e vështirë për t'u gëlltitur nga Perëndimi, gjithashtu është e pamundur për t'u pranuar nga shumica shqiptare", tha eksperti Kufner.

Ai tha se ndarja e Kosovës nuk është e vlefshme kur mbi 90 për qind e popullsisë është shqiptare dhe pothuajse çdo parti politike me një lloj peshe në Kosovë është zotuar për pavarësi të plotë dhe të drejtë. "Mendoj se këto faktet demografike dhe historike janë vërtet kundër serbëve dhe mendoj se thjesht është çështje kohe që Kosova të fitojë pavarësinë e plotë", sqaron Kufner.

Duke iu përgjigjur pyetjes se kur mund të shihet zgjidhja e çështjes së statusit të Kosovës dhe se çfarë do të jetë ky status Kuhner tha se "pavarësia e Kosovës do të ndodhë brenda tre deri pesë viteve të ardhshme dhe për këtë nuk ka dyshim".

Statusi i Kosovës duhet të zgjidhet dhe sa më herët që të zgjidhet aq më mirë do të jetë për rajonin, kështu mendojnë edhe në Perëndim, thotë eksperti amerikan Kuhner.

Sipas tij ndarja e Kosovës është një skenarë i papranueshëm për Perëndimin, pasi kjo do të hapte një proces të papëlqyeshëm në rajon. Kuhner pohon se ndarja e Kosovës mund të ketë ndikimi negativ në Maqedoni derisa vendet perëndimore nuk mbështesin një destabilizim të Maqedonisë për një numër arsyesh, tha ndër tjera për radion "Evropa e lirë" ky ekspert amerikan.

Sot në Prishtinë vrau veten policja Sadete Shulemaja

Prishtinë, 11 mars 2004 - Sot ka bërë vetëvrasje pjesëtarja e SHPK-së, policja Sadete Shulemaja. Rasti tragjik ka ndodhur rreth orës 8.00 në stacionin numër 1 të policisë në Prishtinë ku punonte policja 25-vjeçare. Ajo kishte qëlluar veten në kokë dhe nga plagët e marra vdiq në Qendrën Emergjente në Prishtinë.

Për momentin nuk dihen motivet që e shtynë policen e re t'ia marrë jetën vetes.

Vendet e Beneluksit kanë kthyer në shtëpi një grup shqiptarësh

Bruksel, 11 mars 2004 - Me një avion çarter të aviacionit luftarak belg nga Brukseli në Prishtinë janë transferuar një grup shqiptarësh nga Kosova dhe Shqipëria, të cilëve vendet e Beneluksit - Belgjika, Holanda dhe Luksembubrgu - ua kanë mohuar qëndrimin e mëtejshëm dhe ata janë kthyer në shtëpi, në kuadër të ritadhesimit, ka konfirmuar sot Ministria belge e Punëve të Brendshme.

Ministri i brendshëm belg Patrik Deval ka thënë se kthimi i shqiptarëve është bërë në bazë të një vendimi të miratuar në takimin e ministrave të punëve të brendshme dhe të drejtësisë të Bashkimit Evropian në nëntor të vitit të kaluar.

Zyrtarët e policisë ndërkombëtare nuk komentuan kërcënimet dhe shpërthimet e fundit në Prishtinë

Prishtinë, 11 mars 2004 - Zyrtarët e policisë ndërkombëtare nuk komentuan nëse kërcënime dhe shpërthime në Prishtinë kanë lidhje me vizitën e nënsekretarit të përgjithshëm të OKB-së në Kosovë, apo me zhvillimin e dialogut Prishtinë - Beograd.

Shpërthimet e fundit në Prishtinë, janë dënuar nga krerët ndërkombëtarë dhe vendorë, të cilët kërkojnë nga forcat e rendit që të jenë në veprim të vazhdueshëm për hetimin e këtyre rasteve dhe në forcimin e sigurisë për të gjithë qytetarët e vendit.

Mirush Kabashi prezentohet sonte në Beograd me shfaqjen "Mbrojtja e Sokratit"

Beograd, 11 mars 2004 - Në Festivalin e tretë ndërkombëtar të teatrit në Beograd sonte merr pjesë edhe një shfaqje nga Shqipëria. Aktori i njohur shqiptar Mirush Kabashi do të prezentohet me shfaqjen "Mbrojtja e Sokratit", sipas tekstit të autorit grek Kostas Varnalis. Kabashi është autor i adaptimit dhe regjisor i shfaqjes, në të cilën paraqiten edhe Inis Gjoni dhe Alfred Bualoti.

Dy ish-gjeneralë kroatë të akuzuar për krime lufte janë nisur për Hagë

Hagë, 11 mars 2004 - Dy ish-gjeneralë kroatë janë nisur me aeroplan për në Tribunalin e Kombeve të Bashkuara për krime lufte në Hagë për t'u përballur me akuzat për vrasjet kundër serbëve më 1995, njofton BBCWorld. Mladen Markaç dhe Ivan Çermak, që janë nisur vullnetarisht nga Zagrebi për në Amsterdam, kanë mohuar akuzat.

Pensionohet hetuesi i varrezave masive të shqiptarëve në Serbi

Beograd, 11 mars 2004 - Ministri i ri i brendshëm i Serbisë, Dragan Jociq, ka njoftuar për daljen në pension të një zyrtari të lartë të policisë.

Bëhet fjalë për Dragan Karleushën, i cili hetoi zbulimin e disa varrezave masive në Serbi ku ndodheshin trupat e qindra shqiptarëve të Kosovës.

Para dy vjetësh, Karleusha dëshmoi në gjykatën e Hagës dhe la të kuptohej se ish-presidenti jugosllav, Sllobodan Millosheviq, kishte qenë në dijeni të planeve për të mbuluar ekzistencën e trupave.

Shumë pak kohë pas fillimit të hetimeve, z. Karleusha u transferua nga hetimi në një departament tjetër të policisë.

BE për zgjedhjet e ardhshme presidenciale në Maqedoni

Bruksel, 11 mars 2004 - Komuniteti ndërkombëtar pret që Maqedonia të zhvillojë një proces normal zgjedhor presidencial edhepse, siç thuhet, rrethanat janë specifike.

Bashkimi Evropian thotë se partitë politike duhet të tregohen të kujdesshme sidomos në momentin kur Maqedonia do të aplikojë për anëtarësim.

"Këto janë momente të rëndësishme për Maqedoninë e cila është në prag të dorëzimit të aplikimit për anëtarësim në BE dhe partitë politike do të duhet të kenë këtë gjë parasysh," tha Sheena Thomson, zëdhënëse e BE-së në Shkup.

Në Shkup u promovuan 69 oficerë të armatës maqedonase, prej tyre 36 shqiptarë

Shkup, 11 mars 2004 - Në Shkup janë promovuar dje 69 oficerë, prej tyre 36 janë shqiptarë. Kështu me këta të diplomuar numri i përgjithshëm i nënoficerëve shqiptarë në armatën e Maqedonisë arrinë shifren prej 335 nënoficerësh. Kjo është 14.8 nga numri i përgjithshëm i nënoficerëve në Armatën e Maqedonisë, bëri të ditur zëvendësministri maqedonas i Mbrojtjes Rizvan Sylejmani.

Në një aksident automobilistik vdiq i biri i Presidentit të Shqipërisë

Tiranë, 11 mars 2004 - Një aksident i rëndë tragjik ka ndodhur dje rreth 14 kilometra larg qytetit të Tepelenës. Tre shtetas: Rrahman Jahta, shef i financave në Prokurorinë e Përgjithshme të Tiranës, Admir Moisiu Moisiu, 32 vjeçar, djali i Presidentit të Shqipërisë Alfred Moisiu, drejtor ekonomik në prokurorinë e përgjithshme, i martuar me dy fëmijë dhe shoferi i tyre i identifikuar me emrin Hasan Shijaku udhëtonin zyrtarisht nga Tirana drejt jugut të Shqipërisë për në Gjirokastër.

Në afërsi të vendit të quajtur "Burimi" për shkak të shpejtësisë, apo mosmanovrimit ata kanë rënë me një lartësi rreth 80 metra në "Ujin e ftohtë" në lumin Drino. Rrahman Jata është ende gjallë. Ky i fundit u nxor prej ujit dhe iu dha ndihma e parë mjekësore në spitalin e Tepelenës e më pas u transportua drejt Tiranës me helikopter.

Ndërkaq, rreth 200 forca policie e helikopterë dhe zhytës të ministrisë së rendit dhe NATO-s, kanë vazhduar kërkimin për gjetjen e dy trupave të tjerë pajetë me një gjatësi prej 15 kilometra përgjatë lumit Vjosa.

Pas përpjekjeve disaorëshe ekipet e zhytësve e kanë gjetur trupin e pajetë të Admirit, djalit të presidentit Moisiu në vendin ku bashkohen ujërat e lumit Drino me Vjosën, rreth një kilometër larg vendit të aksidentit, ka konfirmuar zëvendësi i Ministrisë së Rendit të Shqipërisë.

Një grup sipërmarrësish italianë ka marrë përsipër ndërtimin e një pjese të autostradës Durrës – Prishtinë

Tiranë, 11 mars 2004 - Një pjesë e autostradës Durrës - Prishtinë është marrë përsipër nga një grup sipërmarrësish italianë ta përfundojnë brenda dy vjet e gjysmë me një financim prej 250 milionë euro. Shqipëria do ta shlyjë këtë shumë brenda 11 viteve të ardhshme me anë të takses të posaçme për automjete.

Në Portin e Durrësit u zbuluan mbi 13 kilogram heoinë

Durrës, 11 mars 2004 - Një sasi prej mbi 13 kilogram heoinë u zbulua mbrëmë në mesnatë në Portin e Durrësit. Sasia e drogës së fortë ishte fshehur servatorin e autoveturës së një shtetasi italian. Kohët e fundit ka pasur disa raste të kapjes së drogës në Shqipëri. Pak ditë më parë 14 kg. heroinë u kapën nga policia në doganën e Kakavijës në kufirin me Greqinë.

Numri i të vrarëve në Madrid ka arritur në 186

Madrid, 11 mars 2004 - Sipas njoftimeve më të reja të mediave spanjolle numri i të vrarëve nga shpërthimet e fuqishme në Spanjë ka arritur në 186 dhe mbi 1000 të plagosur.

Duke iu drejtuar kombit, kryeministri spanjoll, Hoze Maria Aznar, tha se autorët e këtyre sulmeve do të kapen, por nuk akuzoi asnjë grup për këto sulme.

Sulmet në Madrid i kanë dënuar ashpër shumë liderë të vendeve evropiane si dhe të institucioneve të BE-së.

Madrid: 173 të vrarë është bilanci më i ri nga një seri shërthimesh

Madrid, 11 mars 2004 - Bilanci më i ri nga një seri shërthimesh në Madrid ka arritur në 173 të vrarë dhe 600 të plagosur, tha Ministria e Punëve të Brendshme të Spanjës. Më herët u njoftua për 131 të vrarë, njoftojnë mediat spanjolle.

Autoritetet spanjolle për këto sulme kanë bërë fajtor grupin separatist ETA, i cili figuron në listën e grupeve terroriste të SHBA-ve.

Mirëpo lideri nacionalist bask Arnaldo Otegi ka thënë se nuk beson se ETA është përgjegjëse për këto sulme më të reja në Madrid. Ai thotë se sulmet kanë mundur t'i kenë kryer "segmentet e rezistencës arabe".

Në Madrid janë vrarë 131 persona

Madrid, 11 mars 2004 - Nga shpërthimet e fuqishme në tre stacionet e trenit në Madrid janë vrarë 131 persona, ndërkaq mbi 400 të tjerë janë plagosur, në një sulm më të përgjakshëm të gjertanishëm të grupit separatist bask ETA, njofton Rojter.

"Kjo është një masakër", ka thënë zëdhënësi i qeverisë Eduardo Zaplana.

Ndërsa ekipet e shpëtimit i nxirrnin trupat e pajetë, njerëzit me lot në sy iknin nga vendi i ngjarjes.

Në Basra janë vrarë 2 gra irakiane që punonin me kontraktuesit e koalicionit

Bagdad, 11 mars 2004 - Dy gra irakiane, të cilat punonin me kontraktuesit e forcave të koalicionit amerikan në Irak janë vrarë derisa po ktheheshin në shtëpitë e tyre në qytetin Basra, ka bërë të ditur sot (e enjte) një zyrtar ushtarak, njofton Rojter. Ai nuk ka dhënë hollësi për rrethanat e vrasjes së këtyre grave.

Po kështu, nuk janë dhënë informacione për motivet e vrasjeve në Basra, ku për akte të tilla janë fajësuar grupet islamiste, të cilat kërkojnë forcimin e standardeve të moralit publik.

Në tri shpërthime në Madrid kanë vdekur 62 njerëz

Madrid, 11 mars 2004 - Tri shpërthime në stacion e hekurudhor të Madridit, që kanë ndodhur sot (e enjte) në kohën më të frekuentuar, kanë humbur jetën mbi 60 njerëz, ka bërë të ditur zëdhënësi i Ministrisë spanjolle të Brendshme, i cili, njëherësh, për këto shpërthime ka fajësuar grupin seperatist bask ETA, njofton Rojter. Mediat spanjolle saktësojnë numrin e të vdekurve në 62 sish. Ende nuk e ka marrë askush përgjegjësinë.

Të pakten 15 njerëz kanë vdekur në një sërë shpërthimesh në Madrid

Madrid, 11 mars 2004 - Të pakten 15 njerëz kanë humbur jetën dhe shumë të tjerë janë plagosur në një sërë shpërthimesh të njëpasnjëshme në tre trena në Madrid, për të cilat zëdhënësi i Qeverisë spanjolle ka fajësuar grupin seperatist bask ETA, njofton AFP.

Trenat kanë qenë afër stacionit kryesor hekurudhor Atocha të kryeqytetit dhe dy stacioneve të tjera periferike. Policia dhe zjarrfikësit kanë evakuar njerëzit nga ndërtesat përreth stacionit Atocha, ngase ekziston frika për shpërthime të tjera. Shpërthimet ndodhën vetëm tri ditë nga zgjedhjet e përgjithshme.

Vitin e kaluar janë vrarë 36 gazetarë në botë

Nju Jork, 11 mars 2004 - Gjatë vitit të kaluar janë vrarë 36 gazetarë anembanë botës, duke kryer detyrën e tyre. Një e treta e tyre janë vrarë në Irak, ka bërë të ditur sot Komiteti për Mbrojtjen e Gazetarëve me seli në Nju Jork.

Ministri i jashtëm izraelit në Kajro

Kajro, 11 mars 2004 - Ministri i Jashtëm izraelit, Silvan Shalom, udhëton sot për në Kajro për të zhvilluar bisedime me presidentin egjiptian Hosni Mubarak.Ky do të jetë takimi i nivelit më të lartë midis të dy vendeve që kur Ariel Sharoni erdhi në pushtet në vitin 2000.

Shalom dëshiron të dijë pikëpamjet e Egjiptit lidhur me një tërheqje të mundshme izraelite nga Rripi i Gazas.

Kajro ka hedhur poshtë tashmë një kërkesë izraelite për të ndihmuar në garantimin e sigurisë në Gaza pas tërheqjes.

Vizita e zotit Shalom në Egjipt është pjesë e përpjekjeve diplomatike në rajon.

Një ushtar amerikan ka vdekur nga plagët e marra

Bagdad, 11 mars 2004 - Një ushtar amerikan ka vdekur nga plagët e marra nga një sulm me bombë në verilindje të Bagdadit, ka bërë të ditur sot (e enjte) një zyrtar i lartë ushtarak amerikan, njofton Rojter.

Ai tha gjithashtu se në incidentin në fjalë, që ndodhi të mërkurën në perendim të qytetit Bakuba, kanë qenë plagosur tre ushtarë, por njëri syresh ka vdekur më vonë. Vdekja e këtij ushtari, ngre në 381 numrin e ushtarëve amerikanë të vrarë në aksione armiqësore, që nga ndërhyrja amerikane në Irak.