|  KULTURË  |  HISTORI  |   POLITIKË  |  OPINIONE  |  ADRESARI  |  ARKIVI  | 

OPINIONE

Koment

I padëshiruari për policinë shqiptare

11 mars 2004 / TN

 

Çerçiz LOLOÇI

 

Ministri i radhës i dikasterit të Rendit Publik, zoti Igli Toska ka shfrytëzuar një seancë debati me Fatos Nanon në Kuvendin e Shqipërisë, për të bërë një paradë të reformave që janë kryer në këtë ministri dhe për të ripërsëritur pothuaj të gjithë ministrat e mëparshëm që kanë qenë, as më shumë dhe as më pak, sesa "kobure" anti-opozitë në duart  e tre kryeministrave dhe për t'u flakur në momentin më të parë.

 

Pa u marrë me erudicionin foshnjor të këtij ministri që kërkon të "shitet" më shumë se çfarë është në të vërtetë, zoti Toska nuk ka thënë ende asgjë publikisht sesi është përfshirë në mitëmarrje dhe pse është shkarkuar nga Këshilli i Lartë i Drejtësisë, në kohën kur ishte gjyqtar në gjykatën e Faktit në Tiranë; po ky zotëri nuk ka treguar asnjë detaj nga veprimtaria e tij "ilegale", pra kur nuk ishte i përfshirë në administratën e lartë; megjithëse i akuzuar disa herë nga opozita dhe nga shtypi shqiptar si ish-anëtar i Komisionit Qëndror të Zgjedhjeve nuk ka treguar se sa përgjegjësi kolektive dhe individuale ka pasur ai në zgjedhjet e manipuluara dhe problematike të zhvilluara në Shqipëri.

 

Në një vend ku ka vakum institucional, nuk ka ligj kushtetues, nuk ka status të përcaktuar qartë për policinë e shtetit, titullari i ministrisë së Rendit është edhe më vështirë për t'i gjetur shkeljet ligjore dhe administrative; por kur këto ekzistojnë më në fund në Shqipëri, atëhere e kupton se personi që duhet larguar një orë e më parë nga ky dikaster është vetëm Igli Toska.

 

Për të qenë më konkret, por radhis disa nga faktet që e bëjnë të pamundur qëndrimin ende në këtë post të lartë dhe delikat:

 

Së pari: Kritikat që bëjnë institucionet ndërkombëtare për qeverinë shqiptare në pamjaftueshmërinë e luftës kundër trafiqeve të paligjshme, për shkallën e lartë të kriminalitettit dhe të abuzivizmit me pushtetin; adresohen në radhë të parë për ministrinë e Rendit. Nëse nuk ka ankesa për nivelet e larta të drejtimit të policisë që "paguajnë" dhe "paguhen" joligjërisht, pjesa më e konsiderueshme e policisë është në kushte mizerabël dhe me rroga shumë qesharake sa mund të tallen tinëzisht edhe xhepistët e zakonshëm.

 

Së dyti: Nuk ka asnjë dyshim se drejtorët dhe zyrtarë të tjerë të shkarkuar, të pezulluar, janë të nomenklaturëes së majtë, të emëruar drejtpërdrejt nga kryeministri dhe në të rrallë nga ministri, por të gjithë ata janë me përvojë dhe karrierë policore, të trajnuar edhe nga institucionet ndërkombëtare në fushën e policisë. Sa kohë që ndaj tyre nuk ka një akuzë prokurorie, nuk ka një dokument kompromentues nga shërbimi i brendshëm i Rendit dhe aq më tepër kur kanë fituar edhe të drejtën ligjore nga gjykatat e dy shkallëve për t'u rikthyer në punë; mbajtja jashtë policisë ngarkon me përgjegjësi vetëm Igli Toskën. (Disa prej të shkarkuarve kanë firmën e Toskës zëvendësministër, çka nuk mund të marrin formë ligjore sepse kjo nuk lejohet me ligjin kushtetues).

 

Së treti: në ministrinë e Rendit Publik ekziston një këshill emërtesash, por burime nga ky këshill pohojnë se asnjë prej të larguarve nuk është diskutuar në këtë emërtesë. Ligji për policinë e shtetit, një ligj me të vërtetë i standardeve të përparuara perëndimore, ka shumë penalitet që ruan strukturat e policisë nga arbitrariteti i eprorëve, qofshin kryeministra si zoti Fatos Nano, qofshin ministra të tipit "kamikaz" si Toska.

 

Së katërti dhe më kryesorja: Kur të gjitha insitucionet shqiptare kanë pësuar ndryshime dhe përsosje dhe ka një prirje për reforma të thella dhe të shumanshme, dikasteri i Ministrisë së Rendit është tërësisht jashtë tyre, ku për hir të militantëve dhe të hallexhinjve ka ende një numër më të madh uniformash blu sesa duhet të ketë në të vërtetë dhe ndërsa ka kaq shumë policë (kupto vende të reja pune, premtime deputetësh e plotësime hatëresh nepotike) atëhere edhe niveli i pagave do të jetë kaq i ulët dhde i pamjaftueshëm për të plotësuar nevojat më elementare të tyre dhe të familjeve.

 

A nuk është shqetësuese që gjenden në struktura policore uniforma të kërrusura dhe të demotivuara si "luftëtarët e Haxhi Qamilit" dhe janë hequr nga puna dhjetra oficerë policie, madje edhe studentë të shkollave policore jashtë vendit?

 

Policia e shtetit është një strukturë e domosdoshme e shtetit të së drejtës ku janë të intersuar të gjithë qytetarëtpor edhe krejt spektri politik, në mazhorancë apo në minorancë qoftë.