Përmbajtja:

• Presidenti Rugova dënon shpërthimet e fundit në Prishtinë
• Shefat e zyrave të huaja diskutuan me Holkerin rreth planit të standardeve
• Në Prishtinë do mbahet takimi i katërt i mekanizmit përcjellës të stabilizim-asociimit
• Nesër shënohet 14-vjetori i themelimit të FR të LDK-së
• Grupi i punës i Komisionit zgjedhor rekomandon sistemin me lista të mbyllura në zgjedhjet e përgjithshme
• Ushtria amerikane paguan qira për tokat e shfrytëzuara në Kosovë
• Holkeri thotë se UNMIK-u dhe bashkësia ndërkombëtare do të vazhdojnë dialogun Prishtinë – Beograd
• U nënshkruan 12 kontrata të shitjes së ndërmarrjeve shoqërore nga raundi i dytë
• UNMIK-u është duke i shtuar masat e sigurisë në objektet e veta
• Mbrëmë dy shpërthime në Prishtinë
• Së shpejti edhe në Bullgari me pasaportë të UNMIK-ut dhe targa KS
• Kryesia e Kuvendit të Kosovës hodhi poshtë kërkesën për të hequr muralet nga korridoret e sallës
• Koalicioni serb "Kthimi" në Kuvendin e Kosovës kan vendosur që të braktisë parlamentin dhe të gjitha institucionet?
• Inspektorët komunalë të Prizrenit kanë filluar një aksion për rrënimin e dyqaneve pa leje
• Punëtorët e fabrikës "Përparimi" në Skënderaj kanë protestuar të pakënaqur me mospërmbushjen e kërkesave të tyre
• U promovua libri "Krimet serbe në komunën e Lipjanit, 1912-1999"
• Policia maqedonase ka arrestuar ish-komandantin e UÇK Izair Samiun
• Në Nasiria janë vrarë 4 policë irakianë
• Xherald Latort është emëruar kryeministër i Haitit
• Arafati nderon Abasin dhe e quan "martir"
• Forcat izraelite kanë vrarë katër militantë palestinezë
• Në Irak janë vrarë 2 amerikanë bashkë me përkthyesin e tyre irakian
• Sharon dhe Kurei do të takohen më 16 mars
• Në Kashmir janë vrarë 4 civilë dhe janë plagosur 50 të tjerë
• Në një burgun në Irak ka vdekur Muahamed Abas, udhëheqës i Frontit për Çlirimin e Palestinës
• Sulme vetëvrasëse në Stamboll
• Shefi i CIA-s thotë se informacioni i zbulimit rreth Irakut nuk është shtrembëruar
• Katër britanikët që u liruan nga baza në Guatanamo arrestohen nga policia në Londër
• Dënim me vdekje për snajperin e zonës së Uashingtonit

Presidenti Rugova dënon shpërthimet e fundit në Prishtinë

 

Prishtinë, 10 mars 2004 - Presidenti i Kosovës Ibrahim Rugova e dënon ashpër vendosjen e mjeteve shpërthyese këtyre ditëve në kryeqytetin e Kosovës, Prishtinë, dy prej të cilave kanë shkaktuar dëme materiale.

Presidenti i Kosovës kërkon nga policia e UNMIK-ut, nga SHPK-ja, dhe nga KFOR-i të jenë në veprim të vazhdueshëm për hetimin e ketyre rasteve dhe në forcimin e sigurisë për të gjithë qytetarët e vendit tonë.

Presidenti Rugova kërkon që kufijtë e Kosovës të kontrollohen më rreptë, sepse shërbimet sekrete të infiltruara në Kosovë nga disa vende fqinje punojnë në destabilizimin e Kosovës.

Presidenti kërkon që qytetarët të jenë vigjilentë dhe të bashkëpunojnë me organet e rendit.

Këto akte kriminale tentojnë të destabilizojnë gjendjen në Kosovë në vitin e zgjedhjeve nacionale, thuhet në një njoftim të zyrës së Presidentit të Kosovës.

 

 

Shefat e zyrave të huaja diskutuan me Holkerin rreth planit të standardeve

 

Prishtinë, 10 mars 2004 - Shefat zyrave të huja diskutuan sot me shefin e UNMIK-ut Hari Holkeri rreth zhvillimeve aktuale në Kosovë. Në këtë takim janë diskutuar sidomos standardet, dialogu me Beogradin, procesi i privatizimit, por edhe çështje të tjera të rëndësishme politike.

Diplomatët e pesë vendeve perendimore kanë vlerësuar pozitivisht ecurinë e gjertanishme në procesin e standardeve dhe se çështjet rreth implementimit të tyre po ecin si duhet.

"Procesi i standardeve po shkon në drejtimin e duhur. Vlerësimet e deritashme të Grupit të Kontaktit për draft planin për implementimin e standardeve janë pozitive", u shpreh shefi i Zyrës italiane, Paskuale Salcano. Ai tha se tashmë janë drëguar komentet e tyre rreth planit për implementim dhe tani po bëhet vlerësimi i tyre dhe se ato janë pozitive, tha Salcano.

Shefja e zyrës amerikane, Marsi Ris, pas takimit me Holkerin, ka vlerësuar pozitivisht edhe fillimin e dialogut për çështje praktike me Beogradin. "Fillimi i dialogut është arritje shumë e rëndësishme.

 

Shpresoj se do të ketë vazhdim të suksesshëm. Shpresoj që do të ketë vazhdim të suksesshëm", tha zonja Ris.

 

 

Në Prishtinë do mbahet takimi i katërt i mekanizmit përcjellës të stabilizim-asociimit

 

Prishtinë, 10 mars 2004 - Në takimin e sotëm të rregullt Qeveria e Kosovës ka diskutuar për takimin e katërt që do të mbahet në Prishtinë të mekanizmit përcjellës të stabilizim-asociimit.

Në këtë takim parashihet që të bëhet prezentimi nga përfaqësues të Komisionit Evropian të bazuar në axhendën e samitit të Selanikut në qershor të vitit të kaluar, në të cilën është theksuar rëndësia dhe inkuadrimi më i madh të shteteve të Ballkanit në procesin e stabilizim-asociimit, tha zëdhënësja e qeverisë Mimoza Kusari.

Poashtu një vend të posaçëm në këtë takim do të zënë proceset e imklementimit të standardeve për Kosovën. Me këtë rast do të flasin edhe dy koordinatorët përgjegjës për standardet - Kan Ros nga UNMIK-u dhe Ilir Deda nga qeveria e Kosovës. Do të diskutohet për sektorin e bujqësisë, ndërkaq diskutimi për arsimin dhe planifikimin hapësinor është shtyrë për më vonë.

Ndërkohë zëdhënësja e qeverisë Mimoza Kusari bëri të ditur se kryeministri Bajram Rexhepi sot do të udhëtojë në Bruksel, ku do të takohet me kryetarin e Komisionit Evropian Romano Prodi.

 

 

Nesër shënohet 14-vjetori i themelimit të FR të LDK-së

 

Prishtinë, 10 mars 2004 - Nesër, më 11 mars, Forumi i Rinisë i LDK-së organizon një ceremoni solemne me rastin e 14-vjetorit të themelimit. Takimi do të mbahet në sallen e hotelit "Grand" në Prishtinë dhe fillon në orën 12.00.

 

Në këtë ceremoni do të jetë i pranishëm edhe Presidenti i Kosovës Ibrahim Rugova dhe përfaqësues tjerë të LDK-së dhe të institucioneve të Kosovës.

 

 

Grupi i punës i Komisionit zgjedhor rekomandon sistemin me lista të mbyllura në zgjedhjet e përgjithshme

 

Prishtinë, 10 mars 2004 - Grupi i punës i Komisionit Zgjedhor të Kosovës ka rekomanduar sistem të mbyllur për zgjedhjet e përgjithshme që pritet të mbahen sivjet, tha zëdhënësi i OSBE-së Sven Lindholm. Por, ai tha se vendimi përfundimtar do të merret nga shefi i UNMIK_ut Hari Holkeri.

Bëhet e ditur se tani sistemin me lista të mbyllura e kanë përkrahur të gjitha partitë politike, madje edhe PDK-ja e cila deri më tash ka kundërshtuar këtë sistem.

Edhe pse ende kjo çështje është e hapur dhe pret të nënshkruhet nga kryeadminstratori i Kosovës, Hari Holkeri, OSBE-ja është në gjendje që t'i mbulojë ato pavarësisht se a do të vendoset ndërrimi i sistemit, tha Sven Lindholm.

Ndërkaq, Marsi Ris, shefe e Zyrës Amerikane lidhur me këtë çështje ka thënë: "Ne po dëgjojmë nga njerëzit dhe kërkesat e tyre në lidhje me zgjedhjet se çfarë ata preferojnë. Në demokraci duhet të ketë diskutime të hapura. Por, Qeveria e SHBA-ve nuk ka ndonjë preferencë për sistemin zgjedhor".

Kështu thotë përfaqësuesja amerikane në Prishtinë, ndërkaq drejtori i USAID-it Dejll Fajfer, ndonëse inkompetent për t'u marrë me këtë çështje, ka deklaruar ditë më parë se në Kosovë duhet të aplikohet sistemi me lista të hapura, sepse kjo na qenka më demokratike!

Kohëve të fundit çështja e sistemit zgjedhor është politizuar tejmase nga disa OJQ dhe grupe të ndryshme, të cilat kanë kërkuar me këmbëngulje që në zgjedhjet e vjeshtës të aplikohet sistemi me lista të hapura, duke u kërcënuar madje edhe me bojkotimin e zgjedhjeve! Në këtë drejtim prijnë sidomos disa rrjete të grave të dirigjuara nga donatorë të dyshimtë.

 

 

Ushtria amerikane paguan qira për tokat e shfrytëzuara në Kosovë

 

Gjilan, 10 mars 2004 - Ashtu siç kishte paralajmëruar në dhjetor të vitit 2003, ushtria amerikane në Kosovë ka filluar këto ditë t`u paguajë qiranë pronarëve të tokave në sektorin e lindjes, të cilat ajo i shfrytëzon nga qershori 1999.

Në një njoftim nga kampi "Bondstill" thuhet se pas ofertës për kompensim të pronarëve vendorë të tokave, të cilat shfrytëzohen nga ushtria amerikane, qytetarët e Gjilanit dhe të Ferizajt kanë dorëzuar aplikacionet.
Zyrtarët ushtarakë e kanë vlerësuar të kënaqshëm programin, duke saktësuar se nga 29 shkurti e këtej janë kompensuar nëntë pronarë të tokave, kurse edhe për 22 të tjerë, kjo do bëhet brenda këtij muaji, kanë thënë ata.

Sipas zyrës për informim të kampit "Bondstill" në kuadër të këtij programi janë shpërndarë 318 fletapikacione, 51 raste janë ndihmuar në përpilimin e autorizimeve ligjore dhe janë grumbulluar 14 dëshmi. Gjashtë kërkesa janë refuzuar.

Komandanti i Brigadës Shumëkombëshe të Lindjes, gjenerali Rik Erlandson ka thënë se ushtria amerikane e ka mirëpritur me kënaqësi aplikimin për kompensim nga të gjitha etnicitetet. Programi për qëllim që të kompensojë pronarët e tokave, të cilat janë dëmtuar, zaptuar apo shfrytëzuar nga forcat e SHBA-ve, nga 10 qershori i vitit 1999, ka thënë gjenerali Erlandson.

KFOR-i amerikan është forca e vetme ushtarake në Kosovë, deri tani, që ka filluar të bëjmë kompensim e pronarëve.

 

 

Holkeri thotë se UNMIK-u dhe bashkësia ndërkombëtare do të vazhdojnë dialogun Prishtinë – Beograd

 

Prishtinë, 10 mars 2004 - Kryeadministratori i Kosovës ka përshëndetur dialogun për çështje teknike ndërmjet Prishtinës dhe Beogradit në takimin e djeshëm ku është biseduar për çështjen e të zhdukurve. Ai ka thënë se administrata e UNMIK-ut dhe bashkësia ndërkombëtare do të vazhdojnë dialogun Prishtinë - Beograd.

 

 

U nënshkruan 12 kontrata të shitjes së ndërmarrjeve shoqërore nga raundi i dytë

 

Prishtinë, 10 mars 2004 - Duke ndjekur udhëzimet e kryeadministratorit të Kosovës Hari Holkeri, shefi i Shtyllës së Katërt të UNMIK-ut dhe drejtori i Bordit të AKM-së, Nikolas Lambsdorf ka nënshkruar dje 12 kontrata të shitjes së ndërmarrjeve shoqërore nga raundi i dytë i tenderëve të procesit të privatizimit.

 

Kjo e ngrit numrin e ndërmarrjeve të ratifikuara në 16. Kontratat për shitjen e këtyre 12 ndërmarrjeve janë miratuar dhe ekzekutohen pas vendimit të marrë në Bordin e AKM-së më 16 tetor të vitit të shkuar.

 

 

UNMIK-u është duke i shtuar masat e sigurisë në objektet e veta

 

Prishtinë, 10 mars 2004 - Administrata e UNMIK-ut është duke i shtuar masat e sigurisë në objektet e veta, njoftoi Sunil Narula, shefi i Zyrës për Informim në UNMIK. Ai theksoi se shtimi i masave të sigurisë nuk lidhet me rastin e së shtunës, kur policia ndërkombëtare çmontoi 4.3 kilogram eksploziv në afërsi të selisë së UNMIK-ut porse ka rastisur me këtë rast.

 

 

Mbrëmë dy shpërthime në Prishtinë

 

Prishtinë, 10 mars 2004 - Mbrëmë në orën 21.30 minuta afër ndërmarrjes "Albi Komerc" dhe Ngrohtores së qytetit në Prishtinë ka ndodhur një shpërthim i fuqishëm. Sipas zëdhënsit të Shërbimit Policor të Kosovës Refki Morina në këtë shpërthim nuk patur viktima në njerëz, por vetëm dëme materiale.

Poashtu mbrëmë rreth orës 22. 10 minuta policia ka marrë një thirrje anonime telefonike se në afërsi të hotelit "Grand" është vendosur një mjet shpërthyes. KFOR- i dhe policia e UNMIK-ut pas bllokimit të kësaj pjese të qytetit kanë arritur të zbulojnë mjetin shpërthyes dhe në mënyrë të kontrolluar kanë bërë shpërthimin e tij.

 

 

Së shpejti edhe në Bullgari me pasaportë të UNMIK-ut dhe targa KS

 

Prishtinë, 10 mars 2004 - Vendimi i Qeverisë bullgare për njohjen e dokumenteve të lëshuara nga UNMIK-u, ku përfshihet edhe njohja e targave të automjeteve dhe policave të sigurimit, ishte arsyeja e vetme e vizitës në Prishtinë të një delegacioni të Ministrisë së Punëve të Brendshme të Bullgarisë, i cili kryesohej nga sekretari i përgjithshëm i kësajë ministrie Bojko Borisov.

Në një prononcim për RTV21, shefi i Zyrës diplomatike të Bullgarisë në Prishtinë Nikollai Kolev tha se delegacioni bullgar ka zhvilluar takim të përbashkët me zv.kryeadministratorin Çarlls Brajshou, komisionerin e policisë së UNMIK-ut Shtefan Feller, komandantin e KFOR-it Holger Kamerhof dhe kolonelin e SHPK-së Sheremet Ahmeti. Në këtë takim u bisedua për çështjen e sigurisë rajonale e në këtë kontekst edhe për luftimin e përbashkët të krimit të organizuar.

Një ndër çështjet tjera për të cilat u bisedua ishte njohja e dokumenteve të UNMIK-ut, pasi tashmë ekziston edhe vendimi i Qeverisë bullgare për njohjen e këtyre dokumentave. Të dy palët janë pajtuar që në fund të këtij muaji, të zhvillohet një takim tjetër në Bullgari, ndërmjet palës kosovare dhe asaj bullgare që kjo çështje të zgjidhet përfundimisht.

Nikollai Kolev apelon tek kosovarët që të kenë durim pasi procedura e njohjes së dokumenteve të UNMIK-ut, mund të zgjasë pak më shumë, duke marrë parasysh se pos dokumenteve të udhëtimit do të njihen të gjitha dokumentet tjera të lëshuara nhga UNMIK-u, përfshirë këtu edhe targat e regjistrimit.

 

 

Kryesia e Kuvendit të Kosovës hodhi poshtë kërkesën për të hequr muralet nga korridoret e sallës

 

Prishtinë, 10 mars 2004 - Kryesia e Kuvendit të Kosovës ka hedhur poshtë kërkesën e koalicionit serb "Kthimi" për të hequr muralet nga korridoret e e sallës së re të Kuvendit të Kosovës. Anëtarët e Kryesisë kanë përsëritur qëndrimin se në Kuvend ka vend edhe për piktura nga historia e etnieve të tjera. Për shkak të muraleve në sallën e re të Kuvendit përfaqësuesit e koalicionit serb "Kthimi" nuk po marrin pjesë në seancat plenare.

 

 

Koalicioni serb "Kthimi" në Kuvendin e Kosovës kan vendosur që të braktisë parlamentin dhe të gjitha institucionet?

 

Prishtinë, 10 mars 2004 - Deputetët e koalicionit serb "Kthimi" në Kuvendin e Kosovës mbrëmë kanë vendosur që të braktisin jo vetëm parlamentin, por edhe të gjitha institucionet nëse shefi i UNMIK-ut Hari Holkeri nuk i detyron drejtuesit e Kuvendit që të heqin muralet. Ky vendim është marrë në një takim të këtij koalicioni në Shtërpcë.

 

 

Inspektorët komunalë të Prizrenit kanë filluar një aksion për rrënimin e dyqaneve pa leje

 

Prizren, 10 mars 2004 - Inspektorët komunalë të Prizrenit kanë filluar një aksion për rrënimin e dyqaneve pa leje afër tregut të plaçkave. Vetëm gjatë ditës së djeshme janë rrënuar 22 dyqane.

 

Kryeinspektori në Kuvendin komunal të Prizrenit Shaban Veseli tha se aksioni është ndërmarrë në bashkëpunim me policinë dhe KFOR-in dhe janë rrënuar ato dyqane për të cilat edhe është planifikuar.

 

Ai pohoi se ky aksion do të vazhdojë edhe ditëve të ardhshme për derisa të rrënohen 41 lokale të parapara. Megjithatë pronarët e lokaleve shprehën revoltën e tyre me vendimet e Kuvendit komunal të Prizrenit. Ata thonë se ky aktivitet po e dëmton ekonominë e Prizrenit edhe përkundër vështirësive me të cilat përballet ajo.

 

 

Punëtorët e fabrikës "Përparimi" në Skënderaj kanë protestuar të pakënaqur me mospërmbushjen e kërkesave të tyre

 

Skënderaj, 10 mars 2004 - Punëtorët e fabrikës së materialit ndërtimor "Përparimi" në Skënderaj kanë protestuar në shenjë pakënaqësie për shkak të mospërmbushjes së kërkesave të tyre.

 

Ata janë kërcënuar se në qoftë se nuk u plotësohen dhjetë kërkesat e parashtruara do të hynë në grevë urie dhe nëse nuk marrin kompensimin e tyre në rast të privatizimit të kësaj fabrike.

 

Protestuesit patën një takim me drejtorin e fabrikës dhe kryetarin e Komunës së Skënderajt, të cilëve iu tërhoq vërejtja se po qe se nuk do të përmbushen këto kërkesa për një afat sa më të shkurtër këta punëtorë do të hyjnë në grevë të urisë.

 

 

U promovua libri "Krimet serbe në komunën e Lipjanit, 1912-1999"

 

Prishtinë, 10 mars 2004 - Dje në Bibliotekën Kombëtare dhe Universitare të Kosovës u promovua libri "Krimet serbe në komunën e Lipjanit, 1912-1999" të publicistit, Shefki Ukaj.

 

Kjo monografi pasqyron aktet e dhunës e të gjenocidit serb në komunën e Lipjanit. Ky studim karakterizohet me konstatime dhe vlerësime më të qëndrueshme që mbështeten mbi të dhënat autentike, të verifikuara nga shumë aspekte, u tha në këtë promovim.

Pjesëmarrësit e këtij promovimi vlerësuan lartë botimin e librit dhe punën e palodhshme të autorit. Nsërkaq, autori i librit, Shefki Ukaj, duke i falenderuar pjesëmarrësit, tha se qëllimi i botimit të librit ishte të shënohen rrethanat, shkaqet dhe epilogu i tmerrit që i ushtruan ato vite hordhitë serbe ndaj popullatës shqiptare.

 

 

Policia maqedonase ka arrestuar ish-komandantin e UÇK Izair Samiun

 

Shkup, 10 mars 2004 - Policia maqedonase ka arrestuar dje në Shkup ish-komandantin e Ushtrisë Çlirimtare Kombëtare, Izair Samiu, i njohur si komandant "Baci".

 

Ai është arrestuar me kërkesë të Gjykatës Themelore të Tetovës pasi gjatë vitit 2002 është dënuar me dy vjet burg për shkak të armëmbajtjes pa leje. Samiu është pronar i ndërtesës se re të Universitetit të Tetovës dhe njëherësh emri i tij gjendet në listën e zezë të Bashkimit Evropian.

Po ashtu njoftohet se Samiu është arrestuar nën dyshimin se ka lidhje me grupin Armata Kombëtare Shqiptare.

 

 

Në Nasiria janë vrarë 4 policë irakianë

 

Bagdad, 10 mars 2004 - Katër policë irakianë janë vrarë sot në mesnatë gjatë një shkëmbimi zjarri në Nasiria, në juglindje të Bagdadit, ka bërë të ditur sot (e merkurë) një zyrtar i koalicionit, njofton Rojter. Shkëmbimi i zjarrit ka zgjatur mbi një orë dhe ka marrë fund me ndërhyrjen e karabinerisë italiane në zyret e milicisë së sigurimit në vendngjarje. Një polic italian dhe dy policë irakianë janë plagosur gjatë incidentit.

 

 

Xherald Latort është emëruar kryeministër i Haitit

 

Haiti, 10 mars 2004 - Ish-ministri i Jashtëm haitian, Xherald Latort, është emëruar sot ( e merkurë) nga Këshilli për kryeministër të përkohshëm të vendit, njofton BBCWorld. Ai do të përpiqet të stabilizojë vendin dhe të organizojë zgjedhjet pasi Zhan Bertran Aristid javën e kaluar ka ikur jashtë. Para së gjithash, ai duhet të ringjallë rendin dhe ligjin. Duke marrë postin, z. Latort ka bërë thirrje për unitet.

 

 

Arafati nderon Abasin dhe e quan "martir"

 

Ramallah, 10 mars 2004 - Lideri palestinez Jaser Arafat i ka bërë nderime Abu Abasit, udhëheqësit të Frontit për Çlirimin e Palestinës (PLF), i cili vdiq të hënën në një burg amerikan në Irak, duke e quajtur "martir".

Në një deklaratë të cilën e transmeton agjencia palestineze e lajmeve VAFA, Arafati dhe udhëheqja palestineze e kanë bërë publike vdekjen e "luftëtarit martir Abas, ish-anëtarin e Këshillit Ekzekutiv të PLO-së dhe sekretar i përgjithshëm i PLF-së".

Ata i bënë nderime "luftëtarit të jashtëzakonshëm dhe liderit nacional i cili ia kushtoi jetën në shërbim të popullit dhe atdheut të tij".

Ithtarët e Abasit deklaruan sot se "amerikanët i konsiderojnë përgjegjës për vdekjen e tij".

 

 

Forcat izraelite kanë vrarë katër militantë palestinezë

 

Jerusalem, 10 mars 2004 - Forcat izraelite kanë vrarë sot katër militantë palestinezë në qytetin Xhenin në Bregun Perëndimor, thanë burimet palestineze. Ata ishin anëtarë të brigadave të martirëve Al Aksa, milici që ka lihdje me lëvizjen e Jaser Arafatit, njofton AP.

 

 

Në Irak janë vrarë 2 amerikanë bashkë me përkthyesin e tyre irakian

 

Varshavë, 10 mars 2004 - Dy amerikanë, që punonin për koalicionin amerikan, janë vrarë me armë zjarri mbrëmë, bashkë me përkthyesin e tyre irakian, pasi makina e tyre ishte ndaluar në një pikë kontrolli nga njerëz të veshur me uniformë policësh irakianë, ka bërë të ditur sot (e merkurë) zëdhënësi i policisë ushtarake polake, njofton AP.

 

Incidenti ka ndodhur në vendbanimin Hillah në pjesën qendrore të Irakut. Njoftimi është dhënë me telefon nga kampi Babilon i forcave shumëkombëshe në Irak. Trupat polake kanë arrestuar pesë irakianë dhe kanë gjetur trupat e pa jetë të viktimave në makinë.

 

 

Sharon dhe Kurei do të takohen më 16 mars

 

Kairo, 10 mars 2004 - Kryeministri izraelit, Ariel Sharon dhe ai palestinez, Ahmed Kurei, do të takohen më 16 mars, ka deklaruar sot (e merkurë) ministri i Jashtëm italian, Franko Fratini, pas bisedimeve me presidentin egjiptian, Hosni Mubarak, njofton Rojter.

"Presidenti Mubarak ka arritur t'i bindë Sharonin dhe Ahmed Kurein të takohen më 16 mars. Unë i shpreh presidentit Mubarak mirënjohjen e Italisë", ka thënë Fratini.

 

 

Në Kashmir janë vrarë 4 civilë dhe janë plagosur 50 të tjerë

 

Srinagar, 10 mars 2004 - Policia indiane në Kashmirin e administruar nga India ka thënë se në një shpërthim të sotëm (e merkurë) të një granate janë vrarë katër civilë dhe janë plagosur 50 të tjerë, njofton Rojter. Incidenti ka ndodhur në një fshat të distriktit Budgam, afër kryeqytetit veror, Srinagar.

 

Më herët, thuhet po në këtë njoftim, trupat indiane kanë vrarë dy militantë të dyshimtë, të cilët kishin sulmuar në një ndërtesë të departmentit shtetëror të informimit.

 

 

Në një burgun në Irak ka vdekur Muahamed Abas, udhëheqës i Frontit për Çlirimin e Palestinës

 

Ramallah, 10 mars 2004 - Muahamed Abas, udhëheqës i Frontit për Çlirimin e Palestinës, organizator i rrëmbimit të anijes italiane Achille Lauro më 1985, ka vdekur nga vdekja natyrore në burgun amerikan në Irak, kanë bërë të ditur sot (e merkurë) zyrtarët amerikanë dhe palestinezë, njofton Rojter. Një zyrtar amerikan ka thënë se ai ka pasur sulm në zemër.

 

Sulme vetëvrasëse në Stamboll

 

Stamboll, 10 mars 2004 - Dy sulmues vetëvrasës me bombë kanë sulmuar një ndërtesë të një sekti masonik në qytetin turk të Stambollit, duke vrarë një dhe plagosur pesë persona të tjerë.
Guvernatori i qytetit, u tha gazetarëve se një nga sulmuesit u vra në sulm dhe tjetri u plagos.

Sulmuesit hapën zjarr nga armë automatike dhe pastaj shpërthyen mjetet shpërthyese në hyrje të ndërtesës, ku afro dyzet persona darkonin.

Asnjë grup nuk e ka marrë përsipër sulmin deri tani.

 

 

Shefi i CIA-s thotë se informacioni i zbulimit rreth Irakut nuk është shtrembëruar

 

Uashgington, 10 mars 2004 - Drejtori i Agjencisë Qendrore amerikane të Zbulimit (CIA), Xhorxh Tenet, u përball përsëri me pyetje të vështira nga një komisionin i Senatit në lidhje me informacionin e zbulimit rreth Irakut të paraluftës.

Tenet u pyet nga anëtarë të komisionit të Senatit për Forat e Armatosura në lidhje me sigurinë kombëtare dhe informacionin e Cias për armët e shkatërrimit në masë në Irak.

Senatori demokrat, Eduard Kenedi i shtetit Maseçusets pyeti nëse Tenet i kishte bërë sfidë Presidentit Bush lidhur me deklaratat që ai bëri para luftës në lidhje me kërcënimin urgjent që Iraku paraqiste për Shtetet e Bashkuara.

 

Drejtori i CIA-s tha se puna e tij është të sigurojë informacion për hartuesit e politikës, të cilët më pas vlerësojnë rrezikun dhe marrin vendime. Pyetjes nëse mendonte që hartuesit e politikës i kishin shtrembëruar faktet për të justifikuar luftën në Irak, zoti Tenet iu përgjigj me një jo të prerë.

 

 

Katër britanikët që u liruan nga baza në Guatanamo arrestohen nga policia në Londër

 

Londër, 10 mars 2004 - Katër të burgosur britanikë të liruar nga baza detare amerikane në Guantanamo të Kubës arritën të martën në Londër dhe u arrestuan menjëherë nga policia britanike.

Policia i arrestoi ata në bazë të ligjit britanik kundër terrorizmit. Prokurorët do të vendosin nëse kanë prova të mjaftueshshme sa për t'i gjykuar ata nën akuzat për terrorizëm.

Një i burgosur i pestë që u lirua po të martën, u ndalua për t=u marrë në pyetje në një bazë ajrore britanike dhe më pas u lirua pa ngritjen e akuzave kundër tij.

 

 

Dënim me vdekje për snajperin e zonës së Uashingtonit

 

Uashington, 10 mars 2004 - Një gjykatës dha dënimin me vdekje për Xhon Alen Muhamed, një nga dy personat e shpallur fajtorë për rolin e tyre në vrasjet me snajper në vitin 2002 në zonën e Uashingtonit.

Shpallja fajtor dhe dënimi i tij u bënë për vrasjen e zotit Dean Myers, një njeri që po mbushte makinën me benzinë në Manasas të shtetit Virgjinia. Mohamad dhe bashkëpunëtori i tij, Li Bojd Malvo, akuzohen për vrasjen e gjithsej 10 vetëve gjatë incidenteve me snajper në tetor 2002.

  |  KULTURË  |  HISTORI  |   POLITIKË  |  OPINIONE  |  ADRESARI  |  ARKIVI  |