Dy fjalë rreth të vërtetës së krijimit të së përditshmes "Pavarësia"

OPINIONE

Dy fjalë rreth të vërtetës së krijimit të së përditshmes "Pavarësia"

9 mars 2004 / TN

Jam krenar që kam punuar në "Bota sot". Kështu do të duhej të ndiheshin të gjithë ata që sot nuk janë më në këtë gazetë. Kështu duhet të ndihen edhe nëse mendojnë se u është bërë e padrejtë. Ngase një gazetë e nderuar si "Bota sot", duhet të nderohet përgjithmonë nga të gjithë ata që e kanë kaluar një pjesë të jetës në të. Kjo edhe është rregull e jetës. Rregull për ata që marrin vesh diçka nga burrëria.

Shkruan: Nazmi LUKAJ

Siç më ka lajmëruar një mik imi nga diaspora, në një faqe interneti, qenka shkruar se "Bota sot" ka mbetur me 4 gazetarë, për shkak të përplasjeve të brendshme dhe ”për shkak të sjelljeve të këqija të editorit Mazrekaj me gazetarët”. Njëri nga ata që sot është në stafin e "Pavarësisë", jam edhe unë, andaj dua ta shpreh mendimin tim rreth të vërtetës së krijimit të kësaj gazete, që do të startojë më 11 mars.

Është e vërtetë që disa nga ne, shpeshherë, kemi pasur përplasje me Bajrush Morinën, redaktorin përgjegjës të "Bota sot". Më së shumti jam përplasur unë, për arsye se Bajrushi ka një ves të keq- nuk i duron gazetarët e mirë rreth vetes. Por, nuk pajtohem me akuzat e vazhdueshme që i bëhen Bajrush Morinës si njeri i Rrahman Morinës etj., sepse Bajrush Morina, me shkrimet e tij, ka bërë shumë për çështjen kombëtare.

Për sa e njoh unë, Bajrushi është atdhetar. Shkrimet i ka pasur në këtë frymë. Krejt çka kam vërejtje tek ai, është se nuk e duron konkurrencën. ( Ndoshta edhe nuk kam të drejtë se është xheloz, por, ja, kështu, më është dukur mua). E, sulmet që i bëhen këtij në kuptimin e degradimit kombëtar, nuk i bëjnë nder askujt.

Sepse Bajrushi është atdhetar i mirë. Megjithatë, xhelozia e tij nuk ka qenë shkaku që ta themelojmë "Pavarësinë", që gjithashtu është një gazetë e djathtë, si "Bota sot", por do të ketë një frymë tjetër, ashtu si ne e kemi projektuar. As Llukman Halili, i cili është përmendur padrejtësisht si shkaktar që ne e kemi themeluar "Pavarësinë".

Si ai, padrejtësisht, është përmendur edhe Xhevdet Mazrekaj, sepse, aq sa ka mundur, ka qenë i arsyeshëm me ne. Ndaj Tij, unë nuk kam asnjë vërejtje, sepse ka qenë larg Kosovës, dhe shumë çështje tonat nuk ka mundur të na i zgjidhë aq shpejt. Unë mendoj, madje, se Xhevdet Mazrekaj dhe gazeta e tij "Bota sot" kanë luajtur një rol të rëndësishëm kombëtar para dhe pas luftës. Për këtë, tek unë mbetet njeri i respektuar.

Ndërsa "Bota sot" shumë e dashur. Ne që e kemi themeluar "Pavarësinë", këtë s'e kemi bërë që duam ta rrënojmë "Botën sot", sepse aty e kemi kaluar një pjesë të jetës sonë. Për ne, "Bota sot" mbetet një kapitull shumë me vlerë i punës sonë. E vërteta e themelimit të kësaj gazete qëndron diku tjetër-Kosovës i duhet edhe një gazetë e djathtë, por me një frymë tjetër, që ne e kemi projektuar.

Pra, për këtë qëllim, e kemi themeluar "Pavarësinë", e jo për shkak të konflikteve me editorin Mazrekaj, as për Bajrush Morinën, e as për Llukman Halilin. Një shembull: Edhe Mero Baze dikur ka qenë punëtor i Ylli Rakipit në "Albania", por pastaj e ka themeluar gazetën e vet, sepse ka menduar që në opinion të dalë me diçka që e ka projektuar vetë. Kështu, duhet të kuptohet edhe akti ynë. Nuk di a pajtohen me mua krejt kolegët e tjerë, por, kështu, së paku, mendoj unë.

Në "Bota sot" kam pasur shumë miq të mirë. Atyre u dëshiroj punë të mbarë, sidomos Gani Mehmetajt, Shefki Ukajt e Rrustem Rugovës, të cilët gjithmonë i kanë çmuar lart shkrimet e mia. Punë të mbarë i dëshiroj edhe Bajrush Morinës, Avdullah Bytyçit e të tjerëve.

Punë të mbarë i dëshiroj edhe editorit Xhevdet Mazrekaj, kurse "Botës sot" jetë të gjatë dhe suksese. Jam krenar që kam punuar në këtë gazetë, e cila ka bërë shumë për çështjen kombëtare para dhe pas luftës. Besoj se me Buçpapajt, të cilët i konsideroj nga analistët më të mirë andej e këndej kufirit, me Gani Mehmetajn etj., dhe me ca pena të reja të inkuadruara në të, "Bota sot" do ta vazhdojë hapërimin e saj të gjatë në shërbim të kombit.

Nga ana ime, editorit Mazrekaj dhe stafit në Prishtinë i dëshiroj suksese. Dhe, i kisha lutur të gjithë ata që bëjnë shkrime në frymën e përplasjes sonë me “Botën sot", të mos luajnë më me këtë letër. Sepse ne këtë nuk e dëshirojmë kurrë. Unë, po e përsëris, jam krenar që kam punuar në "Bota sot". Kështu do të duhej të ndiheshin të gjithë ata që sot nuk janë më në këtë gazetë.

Kështu duhet të ndihen edhe nëse mendojnë se u është bërë e padrejtë. Ngase një gazetë e nderuar si "Bota sot", duhet të nderohet përgjithmonë nga të gjithë ata që kanë kaluar një pjesë të jetës në të. Kjo edhe është rregull e jetës. Rregull për ata që marrin vesh diçka nga burrëria.