Përmbajtja:

• Hari Holkeri i hodhi poshtë propozimet e Koshtunicës për kantonizimin e Kosovës

• Përfaqësuesi i fondacionit gjerman "Fridrih Nauman" ka thënë se Kosova është në prag të pavarësisë

• Tryezë kushtuar sfidave të privatizimit në Kosovë

• Kuvendi mblidhet më 17 mars, serbët paralajmërojnë tërheqjen nga parlamenti?

• Zëvendëssekretari i përgjithshëm i OKB-së për misionet paqeruajtëse Zhan Mari Gieno të mërkurën viziton Kosovën

• Në Prishtinë u mbajt takimi i grupve të punës për çështjen e personave të zhdukur

• Dilemat e OSBE-së lidhur me listat e hapura kanë të bëjnë me përfaqësimin e femrave në parlament

• Gjilani fillon përgatitjet për rilevimin aerofotogrametrik

• Busek: Evropa të përgatitet për statusin e Kosovës

• Mbrëmë shpërthim në Prishtinë, por pa viktima

• Të premtën Serbia ia dorëzon UNMIK-ut mbetjet e trupave të pajetë të 40 shqiptarëve të zhvarrosur

• Në Prishtinë u organizua tryeza me temën: "Suficiti dhe tregu financiar"

• Franca ka përshëndetur takimin e parë ndërmjet Prishtinës dhe Beogradit

• Edhe shqiptarët e Amerikës zgjedhin missin e tyre

• Në Beograd nisi një proces gjyqësor kundër gjashtë serbëve të akuzuar për krime lufte në Kroaci

• Zgjedhjet presidenciale në Maqedoni do të mbahen më 14 prill

• Në Slloveni zbulohet një grup trafikantësh me njerëz

• Zgjedhjet për president të Maqedonisë duhet të mbahen më 14 prill

• Partitë shqiptare në Maqedoni nuk bien dakord për kandidatin e përbashkët presidencial

• Policia e Maqedonisë arrestoi 60 pjesëtarë të njësitit policor të Ministrisë së Punëve të Brendshme

• Konservatorët përgatiten të marrin pushtetin në Greqi

• Këshilli i të Urtëve do të caktojë kryeministrin e Haitit

• Një palestineze e re është vrarë

• Sergej Llavrov ministër i ri i punëve të jashtme të Rusisë

Hari Holkeri i hodhi poshtë propozimet e Koshtunicës për kantonizimin e Kosovës

 

Beograd, 9 mars 2004 - Kryeadministratori i Kosovës Hari Holkeri deklaroi dje në Beograd se iniciativa e kryeministrit të Serbisë Vojisllav Koshtunica që Kosova të ndahet në etnitete apo kantone nuk ndodhen në tavolinën e bisedimeve. Deklaratat e Koshtunicës për ndarjen e Kosovës sipas Rezolutës 1244 nuk janë tema shqyrtimi, tha z. Holkeri para gazetarëve pas takimit që zhvilloi me kryeministrin serb në Beograd.

 

"Natyrisht që jemi të gatshëm që të dëgjojmë të gjitha idetë dhe qëndrimet e Qeverisë së Serbisë dhe kam kuptuar se deklarata e Kryeministrit në parlament ka qenë vetëm si një hyrje në diskutim", ka thënë Holkeri. Ai tha se ka ardhur në Beograd të bisedojë me Kryeministrin e Qeverisë serbe dhe e ka parë të nevojshme në takim për të vendosur kontaktet e punës.

 

Holkeri ka theksuar se aktualisht në Kosovë po punohet në implementimin e standardeve, por serbët ende nuk po bashkohen në këtë proces. Holkeri thotë se standardet për Kosovën duhet të përmbushen, në të kundërtën bisedimet për statusin final do të shtyhen, duke shtuar se mospjesëmarrja e serbëve të Kosovës në planin për zbatimin e standardeve është një gabim i madh.

 

 

Përfaqësuesi i fondacionit gjerman "Fridrih Nauman" ka thënë se Kosova është në prag të pavarësisë

 

Beograd, 9 mars 2004 - Përfaqësuesi i fondacionit gjerman "Fridrih Nauman", Volf Kristian Paes, ka deklaruar dje në Beograd se bashkësia ndërkombëtare nuk ka qëndrim të qartë për statusin e Kosovës, por megjithatë Kosova është në prag të pavarësisë.

 

Ai ka thënë se bartja e sa më shumë kompetencave nga administrata ndërkombëtare tek institucionet vendore do të thotë se zgjidhja gjithnjë e më shumë anon kah pavarësia e Kosovës, ka thënë Paes me rastin e prezentimit të një studimi për gjendjen e pakicës serbe në Kosovës.

 

 

Tryezë kushtuar sfidave të privatizimit në Kosovë

 

Prishtinë, 9 mars 2004 - Problemet aktuale dhe sfidat për vazhdimin e procesit të privatizimit në Kosovë, ishte tema e tryezës së sotme që u mbajt në Prishtinë.

 

Në këtë tryezë, ku morën pjesë përfaqësues të UNMIK-ut, Qeverisë, Parlamentit, Fondit Monetar Ndërkombëtar, Agjencisë Kosovare të Mirëbesimit, si dhe ekspertë vendorë dhe ndërkombëtarë, u debatua për privatizimin dhe rifillimin e këtij procesi të rëndësishëm për Kosovën. Tryeza kishte për qëllim që të bashkojë aktivitetet e shoqërisë civile për integrime Euro-Atlantike.

 

 

Kuvendi mblidhet më 17 mars, serbët paralajmërojnë tërheqjen nga parlamenti?

 

Prishtinë, 9 mars 2004 - Në seancën e ardhshme të Kuvendit të Kosovës, që do të mbahet më 17 mars, do të shqyrtohen 13 projektligje. Kështu vendosi sot Kryesia e Kuvendit. Në rend dite do të jetë shqyrtimi i parë i 10 projektligjeve dhe shqyrtimi i dytë i tre të tjerëve.

Poashtu do të diskutohen edhe mundësitë për kontroll parlamentar në zbatimin e ligjeve të miratura, tha Fatmir Sejdiu, anëtar i Kryesisë. "Në seancën e ardhshme do të debatohen 13 projektligje, tri prej tyre do të kenë shqyrtimin e dytë, ndërkaq pjesa tjetër shqyrtimin e parë", tha Sejdiu. Sipas tij në këtë fazë parlamenti do të ketë parasysh që në këtë dinamikë të intensifikohet edhe më tepër puna.

 

"Një çështje që sigurisht do të jetë në proces të punës së mëtejshme është çështja e kontrollit parlamentar të domosdoshëm për çështjen e zbatimit të ligjeve", tha Sejdiu, duke theksuar se Kuvendi do t'i japë një shkresë udhëzuese komisioneve të kuvendit të cilat korrespondojnë me njësitë përkatëse të ekzekutivit, në mënyrë që të përcillet zbatimi i ligjeve".

Anëtari serb i Kryesisë, Oliver Ivanoviq, paralajmëroi mundësinë e bojktimit të punës së Kuvendit dhe të kryesisë nëse nuk arrihet ndonjë kompromis lidhur me muralet në hollin e Kuvendit. Vendimi për të mbetur apo për të bojkotuar punën e parlamenntit do të merret sot në një takim të koalicionit serb "Kthimi", tha Ivanoviq.

 

 

Zëvendëssekretari i përgjithshëm i OKB-së për misionet paqeruajtëse Zhan Mari Gieno të mërkurën viziton Kosovën

 

Prishtinë, 9 mars 2004 - Zëvendëssekretari i përgjithshëm i OKB-së për misionet paqeruajtëse Zhan Mari Gieno të mërukrën do të vizitojë Kosovën, ku do të njoftohet me punën e administratës ndërkombëtare. Gieno disa herë i ka raportuar Këshillit të Sigurimit të OKB-së mbi punën e UNMIK-ut. Zhan Mari Gieno e kryeson Drejtorinë e OKB-së për operacionet paqeruajtëse.

 

 

Në Prishtinë u mbajt takimi i grupve të punës për çështjen e personave të zhdukur

 

Prishtinë, 9 mars 2004 - Sot në Prishtinë u mbajt takimi i grupve të punës për çështjen e personave të zhdukur ndërmjet Prishtinës dhe Beogradit. Fransua Stam, përfaqësues i Kryqit të Kuq Ndërkombëtar, tha se ky ishtë një takim njohës në mes të delegacioneve.

 

"Në emër të bashkësisë ndërkombëtare kemi paraqitur idetë tona lidhur me rëndësinë e kësaj çështjeje, andaj presim që të dalim me rezultate pozitive nga këto grupe punuese", tha z.Stam.

 

"Kemi paraqitur përgjegjësitë tona në këtsë proces, si dhe përgjegjësitë që i kanë të dyja palët në këto grupe", theksoi Stam, duke shtuar se në fund do të dalin me rezultate konkrete, në mënyrë që mekanizmi dhe sistemi që do të paraqetet të ketë sa më shumë informacione lidhur me personat e zhdukur.

Ai tha se ende nuk është caktuar axhenda e ardhshme, por edhe pasi të jetë caktuar, ajo të mbetet sekrete për media, pasi është çështje shumë e ndieshme dhe nuk dëshirojnë që familjarët të iritohen me ndonjë spekulim.

Delegacioni i Kosovës është përfaqësuar nga Hoze Baraibar, shefi Zyrës për personat e zhdukur të UNMIK-ut, Ragim Zekolli, Arsim Gërxhaliu dhe Milorad Todoroviq, koordinator në qeverinë e Kosovës për çështje të kthimit.

Takimi i ardhshëm do të mbahet në fund të muajit prill në Beograd.

 

 

Dilemat e OSBE-së lidhur me listat e hapura kanë të bëjnë me përfaqësimin e femrave në parlament

 

Prishtinë, 9 mars 2004 - Zëdhënësi i OSBE-së Sen Lindholm tha se dilemat e OSBE-së lidhur me listat e hapura kanë të bëjnë pikërisht me përfaqësimin e femrave në parlament. "Ne duam të sigurohemi që niveli i caktuar i femrave të jetë i përfaqësuar në parlament, ndërkaq me lista të hapura është vështirë të sigurohemi nëse ndonjë femër do të mund të zgjedhet", tha Sven Lindholm.

 

Rregullorja e vjetër për zgjedhjet obligonte partitë politike që 30 për qind nga numri i kandidatëve dhe 30 për qind e vendeve të fituara në Parlament t'u takonin grave.

 

 

Gjilani fillon përgatitjet për rilevimin aerofotogrametrik

 

Gjilan, 9 mars 2004 - Edhe në komunën e Gjilanit nisin përgatitjet në terren për rilevim aerofotogrametrik. Kjo u bë e ditur në një takim pune mes kryeshefit ekzekutiv, z. Enver Muja dhe shefave te sektoreve të Drejtorisë për Gjeodezi, Kadastër, Pronë dhe Banim ku u bisedua rreth rëndësisë së madhe që ka për komunën e Gjilanit një aerofotgrafim i tillë i cili këtu është realizuar para 35 vitesh.

Ndërkohë ka pasur lëvizje të mëdha të mexhdave dhe të titullarëve të pronave, të cilët, siç u tha, e kanë rastin që duke bashkëpunuar ngushtë me Komisionin qendror komunal si dhe më nënkomisionet nëpër lokalitetet përkatëse (53 komunat kadastrale), përmes këtij aerofotografimi ta bëjnë edhe bartjen e pasurive të patundshme, pa shpenzime vetanake gjatë fazës së dytë të këtij projekti, kur edhe do të fillojë identifikimi i pronave dhe pronarëve.

Njëkohësisht u tërhiqet vërejtja qytetarëve se përmes këtij projekti nuk mund dhe nuk do të legalizohen uzurpimet e ndërkohshme, qofshin të pronës komunale apo të asaj private. Bartësit e këtij projekti në krye me kryeshefin ekzekutiv presin një bashkëpunim të ngushtë me qytetarët, titullarë të pronave, por edhe me subjektet juridike, si titullarë të pronave shoqërore, në mënyrë që ky aksion i rëndësishëm i Kosovës, sa i përket kësaj sfere, në tri dekadat e fundit, të përmbyllet me sukses.

 

 

Busek: Evropa të përgatitet për statusin e Kosovës

 

Bruksel, 9 mars 2004 - Koordinatori i Paktit të Stabilitetit për Ballkanin, Erhard Busek thotë se Evropa duhet të përgatitet për diskutimet rreth statusit të ardhshëm të Kosovës për të cilat thuhet se mund të fillojnë brenda një viti.

Në një intervistë dhënë Shërbimit Botëror të BBC-së, i pyetur se çfarë kishte menduar kur kishte thënë se Bashkimi Europian duhet të tregojë më shumë imagjinatë ndaj Kosovës, zoti Busek tha:
"Mendoj se kjo është plotësisht e drejtë.

 

Amerikanët kanë një linjë të qartë. Ata janë në favor të një statusi të veçantë të Kosovës dhe opinioni i shteteve anëtare të Bashkimit Evropian ështe mjaft i përçarë, ose ende nuk shprehet fuqishëm. Por është e sigurtë se Kosova është në Evropë.

 

Ajo është problem evropian dhe mendoj se duhet të arrijmë një mirëkuptim të përbashkët se në cilin drejtim shkojmë dhe kur do të jetë kjo", tha Busek, duke shtuar se kur filluan bisedimet e Vjenës në fund të vitit të kaluar, u krijua përshtypja se në fillim të vitit 2005 mund të fillojnë diskutimet rreth statusit. "Prandaj duhet të jemi të përgatitur për këtë," tha Erhard Busek, koordinatori i Paktit të Stabilitetit.

 

 

Mbrëmë shpërthim në Prishtinë, por pa viktima

 

Prishtinë, 9 mars 2004 - Mbrëmë rreth orës 20,00 në lagjen Kodra e Diellit në Prishtinë ka ndodhur një shpërthim, por s'ka pasur të lënduar. "Te xhambazët" ka shpërthyer një granatë dore në rrugë afër një veture. Janë shkaktuar vetëm dëme materiale. Pas shpërthimit menjeherë kanë dalë pjesëtarët e policisë dhe të KFOR-it, të cilët po i zhvillojnë hetimet.

 

 

Të premtën Serbia ia dorëzon UNMIK-ut mbetjet e trupave të pajetë të 40 shqiptarëve të zhvarrosur

 

Beograd, 9 mars 2004 - Në vendkalimin kufitar Merdare, midis Kosovës e Serbisë, të premtën do t'i dorëzohen autoriteteve të UNMIK-ut mbetjet e trupave të pajetë të 40 shqiptarëve të zhvarrosur në tri varreza masive në Serbi.

 

UNMIK-ut deri më tash i janë dorëzuar gjithsej 197 kufoma të identifikuara të zhvarrosura në tri varrezat masive në Serbi, ka thënë shefi i Byrosë për personat e rrëmbyer e të pagjetur pranë Qendrës bashkërenduese për Kosovën, Gvozden Gagiq.

 

"Presim se deri në fund të këtij viti do të identifikojmë të pakten gjysmën nga 600 kufomat e zhvarrosura, por ende të paidentifuikuara, dhe do t'ia dorëzojmë UNMIK-ut", ka thënë Gagiq.

 

 

Në Prishtinë u organizua tryeza me temën: "Suficiti dhe tregu financiar"

 

Prishtinë, 9 mars 2004 - Ministria e Ekonomisë dhe Financave organizoi dje në Prishtinë një tryezë me temën: "Suficiti dhe tregu financiar" në të cilën morën pjesë përfqësues të Kuvendit të Kosovës, të institucioneve vendore e ndërkombëtare financiare, të Bankës Botërore dhe ekspertë të ekonomisë së financave. Tryeza kishte për qëllim identifikimin e problemeve ekzistuese në tregun financiar të Kosovës.

Ministri i Ekonomisë dhe Financave Ali Sadriu tha se mjetet e suficitit buxhetor duhet të orientohen në sektorë, që do të ndihmonin dinamizimin e zhvillimit ekonomik të Kosovës.

Në konferencën me gazetarë, që u mbajt pas përfundimit të tryezës, ministri Sadriu bëri të ditur se raporti mbi buxhetin e vitit 2003 do të publikohet më 31 mars. Ai po ashtu ka theksuar se përveç suficitit të Qeverisë, ekzistojnë edhe suficite të tjera siç është ai i Posttelekomit të Kosovës që kapë shumën pre 140 milion eurosh që nuk është as në funksion të zhvillimit të Telekomit dhe as në funksion të zhvillimit të Kosovës në përgjithësi.

Ndërkaq lidhur me destinimin e mjeteve të suficitit të ndara nga kryeadministratori i Kosovës Hari Holkeri, z. Sadriu tha se nuk pajtohet me ndarjen e 30 milionë eurove nga suficiti që është bërë në mbledhjen e fundit të Këshillit Ekonomik Fiskal. Ai ka shtuar se z. Holkeri këtë e ka bërë pa konsultimin e institucioneve të Kosovës.

 

 

Franca ka përshëndetur takimin e parë ndërmjet Prishtinës dhe Beogradit

 

Paris, 9 mars 2004 - Ministria franceze e Punëve të Jashtme nëpërmjet një komunikate ka përshëndetur takimin e parë për çështje teknike që u mbajt në Prishtinë në kuadër të dialogut Prishtinë - Beograd për çështje të energjetikës.

 

"Ne i përshëndesim përpjekjet e udhëheqësve politikë, të cilët si në Prishtinë ashtu edhe në Beograd i mbajtën angazhimet e marra në Vjenë më 14 tetor të vitit të kaluar", thuhet ndër të tjera në komunikatën e Ministrisë franceze të Punëve të Jashtme.

 

 

Edhe shqiptarët e Amerikës zgjedhin missin e tyre

 

Nju Jork 9 mars 2004 - Për herë të parë në Nju Jork u mbajt spektakli i bukurisë shqiptare "Miss shqiptarja në Amerikë". Juria, në krye me fotografin me renome botërore, Fadil Berishën, me titullin e shqiptares më të bukur në Amerikë e nderoi 21- vjeçaren nga Mitrovica, Lejla Shallci. Vendi i dytë, apo çmimi shoqëruesja e parë e Miss-it i takoi Albulena Xhemajlit nga Prishtina, e cila fitoi edhe çmimin Miss Fotozhenia. Ndërsa vendi i tretë apo shoqëruesja e dytë u zgjodh Krenare Thaçi, gjithashtu nga Prishtina. Ky spektakël ka tërhequr vëmendjen e shumë bukurosheve shqiptare në Amerikë që të konkurrojnë për kurorën e bukurisë, të cilat me shumë vetëbesim ecnin në sfilatat e sallës së restoranit që ishte përgatitur enkas që këto bukuroshe të kenë hapësirë të mjaftueshme që të paraqiten para jurisë dhe para publikut që ishte i pranishëm në këtë mbrëmje.

 

Hapja dhe mbyllja e këtij spektakli u bë nga aktori Xhevat Limani, ndërsa udhëheqës artistik ishin aktorja dhe modelja Valbona Çoba dhe modeli me famë botrore Nevruz Mehmeti që bëri prezantimin në gjuhën angleze.

Kryetari i jurisë Fadil Berisha, i cili kontribuoi shumë në realizimin e këtij spektakli, u shpreh se ishte shumë i kënaqur me përfundimin e spektalit, duke shtuar se të gjitha vajzat ishin të mrekullueshme, por mendimi i tij ishte se vajza që fitoi më të vërtet meritoi vendin e parë. Ndërkaq, këngëtarët Sinan Vllasaliu dhe Vjollca Luka me shumë disponim dhe kënaqësi argëtonin të pranishmit.

Bukuroshja që fitoi çmimin e parë në këtë spektakël automatikisht merr pjesë në Miss Shqipëria 2004 dhe Miss Kosova 2004. Çmimi i parë ishte një vlerë e të hollave prej 3000 dollarësh, çmimi i dytë 1000 ndërsa çmimi i tretë ishtë 500 dollarë.

 

 

 

Në Beograd nisi një proces gjyqësor kundër gjashtë serbëve të akuzuar për krime lufte në Kroaci

 

Beograd, 9 mars 2004 - Në Beograd sot filloi një proces gjyqësor kudnër gjashtë serbëve të akuzuar për krime lufte në qytetin kroat Vukovar para 12 vjetëve.

 

Ky është procesi i parë i madh i këtij lloji që zhvillohet në Serbi.

Të pandehurit bëjnë pjesë në një grup prej tetë personash që akuzohen se kanë marrë pjesë në vrasjen e rreth 200 vetëve në Vukovar në nëntor 1991.

 

 

Zgjedhjet presidenciale në Maqedoni do të mbahen më 14 prill

 

Shkup, 9 mars 2004 - Zgjedhjet e jashtëzakonshme presidenciale në Maqedoni do të mbahen më 14 prill, ka njoftuar sot kryetari i parlamentit maqedons dhe ushtruesi i detyrës së Presidentit të vendit Lupço Jordanovski.

 

 

Në Slloveni zbulohet një grup trafikantësh me njerëz

 

Lubjanë, 9 mars 2004 - Policia e qyteteve sllovene të Lubjanës dhe Mariborit ka zbuluar një grup ndërkombëtar për trafikimin e njerëzve i cili nëpërmjet Kroacisë dhe Sllovenisë ka organizuar kalime ilegale të kufijve për qytetarët e Serbisë, Malit të Zi, Turqisë dhe Kosovës.

 

Policia ka mbledhur fakte për 40 vepra penale të kalimit ilegal të kufijve, ndërkaq kallëzime penale janë bërë kundër 42 trafikantëve me njerëz.

 

 

Zgjedhjet për president të Maqedonisë duhet të mbahen më 14 prill

 

Shkup, 9 mars 2004 - Parlamenti i Maqedonisë në një mbledhje të jashtëzakonshme ka marrë vendim për ndryshimin e ligjit për ta përshpejtuar zgjedhjen e presidentit të vendit. Këto ndryshime para se gjithash kanë të bëjnë me formimin e komisionit shtetëror të zgjedhjeve dhe komisioneve komunale.

 

Sipas ministrit të Drejtësisë Ixhet Mehmeti, fushata presidenciale do të zgjasë prej 10 deri në 12 ditë.

 

Ndërkaq në seancën e djeshme të Parlamentit të Maqedonisë kryeparlamentari duhet të marrë vendimin përfundimtar se kur do të mbahen zgjedhjet e parakohshme.

Ndërkohë thuhet se zgjedhjet duhet të mbahen më 14 prill të këtij viti.

 

 

Partitë shqiptare në Maqedoni nuk bien dakord për kandidatin e përbashkët presidencial

 

Shkup, 9 mars 2004 - Partitë shqiptare në Maqedoni nuk bien dakord për kandidatin e përbashkët presidencial. Në zgjedhjet e parakohshme presidenciale këto parti do të dalin me kandidatë të veçantë.

 

Kështu Partia Demokratike Shqiptare ka bërë të ditur se në këto zgjedhje do të dalë me kandidat të veçantë, duke refuzuar në këtë mënyrë kërkesën e Partisë së Properitetit Demokratik që subjektet politike shqiptare të dalin me një kandidat të përbashkët.

 

Ndërkohë përfaqësuesi i PPD-së qëndron pas idesë për kandidat të përbashkët, pasi sipas tij me këtë shqiptarët do të vendosin se kush do të jetë president i Maqedonisë.

Nga ana tjetër partia shqiptare në qeveri Bashkimi Demokratik për Integrim bëri të ditur se brenda javës do të vendosë rreth pozicionit të saj sa i përket zgjedhjeve presidenciale.

 

 

Policia e Maqedonisë arrestoi 60 pjesëtarë të njësitit policor të Ministrisë së Punëve të Brendshme

 

Shkup, 9 mars 2004 - Policia e Maqedonisë arrestoi dje 60 pjesëtarë të njësitit policor të Ministrisë së Punëve të Brendshme, të cilët kishin bllokuar rrugën para ndërtesës së qeverisë. Rezervistët të cilët protestonin bllokuan komunikacionin dhe krahas paralajmërimit nga policia që të tërhiqen. Gjatë arrestimeve nuk ka pasur incidente dhe policia informaoi se përveç arrestimit dhe paralajmërimit sanksione të tjera nuk do të ndërmerren.

 

 

Konservatorët përgatiten të marrin pushtetin në Greqi

 

Athinë, 9 mars 2004 - Kryeministri i ardhshëm i Greqisë, Kostas Karamanlisi, ka në plan të bëjë të njohur përbërjen e kabinetit të tij të martën, ndërkohë që konservatorët përgatiten të marrin pushtetin për herë të parë pas 10 vjetësh.

Partia Demokracia e Re e zotit Karamanlis fitoi me rezultat të thellë ndaj socialistëve në pushtet në zgjedhjet parlamentare të së diels.

Konservatorët fituan rreth 45 përqind të votave në krahasim me 40 përqind për Lëvizjen Panhelene Socialiste. Socialistët e kanë qeverisur Greqinë për 19 nga 23 vitet e fundit.

 

Sipas sistemit grek, konservatorët do të kenë të paktën 165 vende, një shumicë mjaft e fortë në parlament. Socialistët do të kontrollojnë 116 vende ndërkohë që disa parti të tjera, përfshirë komunistët dhe nacionalistët e ekstremit të djathtë do të kontrollojnë vendet e tjera.

 

 

Këshilli i të Urtëve do të caktojë kryeministrin e Haitit

 

Port-o-Prens, 9 mars 2004 - Në Haiti, i ashtuquajturi Këshill i të Urtëve prej 7 vetësh do të caktojë sot kryeministrin e vendit.

Kryeministri i ri do të përpiqet të formojë një qeveri të përkohshme të përbërë nga partia Lavalas e ish-presidentit Zhan Bertran Aristid dhe një koalicion i opozitës.

Në bazë të një plani të mbështetur nga Kombet e Bashkuara, qeveria e re do të merret me organizimin e zgjedhjeve.

Ndërkohë në Haiti pritet të arrijë sot një ekip i Kombeve të Bashkuara i cili do të vlerësojë gjendjen në përgatitje për dislokimin e paqeruajtësve të OKB-së gjatë tre muajve të ardhshëm.

 

 

Një palestineze e re është vrarë

 

Tel Aviv, 9 mars 2004 - Një palestineze e re është vrarë sot gjatë një operacioni ushtarak izraelit në qytetin Xhenin në Bregun Perëndimor, njoftuan burimet palestineze.

Palestinezja e re është vrarë kur policët dhe ushtarët kufitarë me mbështetjen e transporterëve të blinduar hynë në pjesën lindore të qytetit. Gjatë shkëmbimit të zjarrit që vazhdoi u plagosën edhe dy vetë.

 

 

Sergej Llavrov ministër i ri i punëve të jashtme të Rusisë

 

Moskë, 9 mars 2004 - Presidenti i Rusisë ka emëruar sot ministër të ri të punëve të jashtme ambasadorin e gjertanishëm rus në OKB Sergej Llavrov.

Shefi i gjertanishëm i diplomacisë ruse Igor Ivanov është emëruar sekretar i Këshillit të Presidentit për Siguri Kombëtare, njofton AP.

  |  KULTURË  |  HISTORI  |   POLITIKË  |  OPINIONE  |  ADRESARI  |  ARKIVI  |