Përmbajtja:

• Presidenti Rugova tha se gratë e Kosovës janë mjaft aktive në të gjitha institucionet e vendit

• Presidenti Rugova përgëzoi liderin e partisë fituese në zgjedhjet në Greqi

• Hari Holkeri sot do të qëndrojë për vizitë në Beograd

• Takimi për zbardhjen e fatit të personave të zhdukur mbahet nesër në selinë e UNMIK-ut

• Gjykata Supreme për "rastin Drini" ia ka kthyer lëndën për rigjykim Gjykatës së qarkut në Prizren

• Sektori Jug-Perëndimor i KFOR-it nuk do ta zvogëlojë numrin e ushtarëve në Kosovë

• Policia e UNMIK-ut thotë se serbin Trifunoviq nga Cërnica e ka vrarë bashkëfshatari i tij

• Ka hyrë në prodhim të rregullt Blloku I i "Kosovës B"

• U bë ndarja e çmimit tradicional për kameramanin e vitit

• Policia maqedonase ka vrarë dy shqiptarë në një fshat afër Tetovës

• Në Shqipëri do të mbahen manovrat ushtarake shqiptaro-amerikane

• Ish-diktatori jugosllav Millosheviq kalon në partinë e Sheshelit

• Partia opozitare fiton zgjedhjet në Greqi

• Këshilli Qeveritar i Irakut ka miratuar unanimisht kushtetutën e përkohëshme

• Shpërthime në qendër të Bagdadit

• Rritet prania e grave në parlamentet e vendeve të botës

• Trupat izraelite kanë vrarë një tineixher palestinez

• Në Haiti janë vrarë të pakten 6 persona

• Të paktën 15 veta kanë humbur jetën në përmbytjet në Turqi

• Shtatë fëmijë kanë vdekur në përplasjen e autobusit në Vietnam Hanoi, 8 mars 2004

• Këshilli Qeverisës sot do të nënshkruajë kushtetutën e përkohshme

• Gara për Shtëpinë e Bardhë po intensifikohet

• 14 të vrarë në kampet e refugjatëve palestinezë

• Agjencia Ndërkombëtare për Energjinë Atomike thotë se Irani dhe Libia janë që të dy fajtorë

Presidenti Rugova tha se gratë e Kosovës janë mjaft aktive në të gjitha institucionet e vendit

 

Prishtinë, 8 mars 2004 - Duke folur në solemnitetin me rastin e shënimit të 14-vjetorit të themelimit të Forumit të Gruas të LDK-së, Presidenti Ibrahim Rugova tha se gratë e Kosovës kanë arritur të jenë të pranishme dhe mjaft aktive në të gjitha institucionet e Kosovës.

 

Presidenti Rugova ka theksuar se Forumi i Gruas i LDK-së për 14 vjet radhazi ishte një nga shtyllat më të rëndësishme të jetës politike dhe shtetërore të Kosovës. Ai shtoi se gratë e Kosovës sot kanë arritur të jenë të pranishme dhe aktive në të gjitha institucionet në nivel nacional e lokal.

Duke përshëndetur Ligjin për barazi gjinore të miratuar në Kuvendin e Kosovës që është bërë më iniciativën e këtij Forumi, presidenti Rugova ritheksoi kërkesën e tij për njohjen formale të pavarësisë së Kosovës.

"Edhe në këtë tubim solemn dëshiroj të theksoj se njohja formale e pavarësisë së Kosovë do t'i shpejtonte proceset demokratike dhe ekonomike brenda vendit tonë, pra një Kosovë demokratike e integruar në Bashkimin Ëvropian, në NATO dhe në miqësi permanente me Shtetet e Bashkuara të Amerikës", ka thënë me këtë rast presidenti Rugova.

Ndërkaq, Melihate Tërmkolli, kryetare e Forumit të Gruas të LDK-së tha se ky forum është një mekanizëm i fuqishëm në kuadër të LDK-së dhe si i tillë edhe mëtej e tillë do të angazhohet për realizimin e aktiviteteve që do të ndihmojnë ndërtimin e institucioneve të reja në Kosovën e pasluftës.

"Ne do të kemi një aktivitet të dendur në drejtim të organizimit sa më të mirë të zgjedhjeve nacionale dhe jo vetëm ana organizative, por edhe një pjesëmarrje sa më kualitative të grave në këto zgjedhje nacionale, pavarësisht nga sistemi zgjedhor që do të miratohet", ka thënë znj.Tërmkolli.

Në fund të këtij manifestimi u shfaq edhe një program kulturo-artistik.

 

 

Presidenti Rugova përgëzoi liderin e partisë fituese në zgjedhjet në Greqi

 

Prishtinë, 8 mars 2004 - Presidenti i Kosovës, Dr. Ibrahim Rugova, i ka dërguar sot (e hënë) një mesazh urimi zotit Kostas Karamanlis, udhëheqës i partisë "Nea Demokratia" (Demokracia e Re), për fitore në zgjedhjet e përgjithshme në Greqi.

"Me rastin e fitores Tuaj në zgjedhjet e përgjithshme të Greqisë, Ju shpreh urimet e mia të përzemërta.

Shpresoj se nën udhëheqjen Tuaj do të forcohen edhe më shumë marrëdhëniet miqësore në mes të dy vendeve tona, Kosovës dhe Greqisë", thuhet në përgëzimet e Presidentit Rugova drejtuar liderit të partisë fituese greke, Kostas Karamanlis.

 

 

Hari Holkeri sot do të qëndrojë për vizitë në Beograd

 

Prishtinë, 8 mars 2004 - Shefi i UNMIK-ut, Hari Holkeri sot do të qëndrojë për vizitë në Beograd. Gjatë kësaj vizite z. Holkeri do të takohet me kryeministrin e Serbisë, Vojisllav Koshtunica dhe shefin e qendrës kordinuese për Kosovë Nebojsha Çoviqin.

 

 

Takimi për zbardhjen e fatit të personave të zhdukur mbahet nesër në selinë e UNMIK-ut

 

Prishtinë, 8 mars 2004 - Takimi i grupeve të punës në kuadër të dialogut mes Prishtinës dhe Beogradit për zbardhjen e fatit të personave të zhdukur, do të mbahet nesër në selinë e UNMIK-ut në Prishtinë, ka konfirmuar shërbimi për media i UNMIK-ut.

Problemi që ka të bëjë me personat e zhdukur është temë shumë e rëndë për të dyja palët, por edhe pritet një atmosferë pozitive dhe konstruktive, deklaroi për BBC-në zëdhënësja e UNMIK-ut Izabela Karlovic.

"Çdo gjë është e gatshme dhe nuk presim kurrfarë preblemesh. Me takimin për personat e zhdukur do të kryesojë Fransua Stam, shef i operacioneve të Kryqit të Kuq Ndërkombëtar për Amerikën Veriore, Evropën perëndimore, veriore dhe jugore, i cili gjatë katër viteve të kaluara është marrë intensivisht me zbardhjen e fatit të personave të zhdukur", tha zëdhënësja Karlovic.

Palën kosovare do ta udhëheqë Ragip Zekolli, i cili është emëruar nga kryeministri Bajram Rexhepi, ndërkaq palën serbe Vladimir Bozhoviq nga Qendra Koordinuese serbe.

 

 

Gjykata Supreme për "rastin Drini" ia ka kthyer lëndën për rigjykim Gjykatës së qarkut në Prizren

 

Prizren, 8 mars 2004 - Në Prizren sot u bë e ditur se në bazë të një vendimi të Gjykatës Supreme të Kosovës është anuluar aktgjykimi i shkallës së parë të Gjykatës së qarkut në Prizren të tre akuzuarve për "rastin Drini" dhe çështja penale është rikthyer në rigjykim. Sipas kryetarit të Gjykatës së qarkut në Prizren, Engjëll Çetta, të akuzuarit Sali Veseli, Abit Aziraj dhe Xhemali Beqiraj do të paraqiten përsëri para trupit gjykues në Prizren.

Të përkujtojmë se Gjykata e qarkut në Prziren e pat dënuar vetëm Sali Veselin me 10 vjet burgim për veprën penale nxitje në vrasje të Ekrem Rexhës (komandant Drini), kurse dy të tjerët ishin liruar.
Ditë më parë është liruar nga burgu edhe Sali Veseli dhe tani ai mbrohet në liri.

 

 

Sektori Jug-Perëndimor i KFOR-it nuk do ta zvogëlojë numrin e ushtarëve në Kosovë

 

Prishtinë, 8 mars 2004 - Duke folur për situatën e sigurisë në Sektorin e tij të përgjegjësisë, komandanti i Brigadës Shumëkombëshe Jug-Perëndim të KFOR-it, Alberto Primiçeri ka thënë se situata në këtë sektor është mjaft e qetë, por edhe jostabile. Ai ka thënë se në këtë zonë nuk sheh kërcënime serioze kundër serbëve dhe ka shtuar se as te shqiptarët dhe as te serbët nuk ekziston vullneti për dialog.

 

Gjenerali italian Primiçeri ka thënë se kundër rikonstrukturimit në brigadën e tij deri në fund të zgjedhjeve në Kosovë nuk do të ketë ndonjë zvogëlim drastik të numrit të ushtarëve, duke shtuar se reduktimi i paqeruajtësve ndërkombëtarë do të shkojë paralelisht me bartjen e komptencave te policia. Gjenerali italian Primiçeri ka thënë gjithashtu se rruga e përmbushjes së standardeve është rruga më e drejtë e Kosovës kah Evropa.

 

 

Policia e UNMIK-ut thotë se serbin Trifunoviq nga Cërnica e ka vrarë bashkëfshatari i tij

 

Gjilan, 8 mars 2004 - Policia e UNMIK-ut në Gjilan ka konfirmuar se Trajan Trifunoviqin nga fshati Cërnicë, nuk e kanë vrarë shqiptarët, por bashkëfshatari i tij Boshko Dimiq. Trifunoviqi ishte vrarë në dhjetor të vitit 2002 derisa po ruante bagëtinë, ndërkaq KFOR-i menjëherë kishte arrestuar si të dyshimtë dy shqiptarë të Cërnicës: Fazli Sylejmanin dhe Fatmir Dervishin, të cilët ishin mbajtur mëse gjashtë muaj në paraburgim.

Akuzat ndaj dy të dyshimtëve shqiptarë u kundërshtuan nga prokurori në qershorin e kaluar, tha zëdhënësi i policisë në Gjilan, rreshteri Ismet Hashani. Ai shtoi se në shtëpinë e Dimiqit KFOR-i kishte gjetur një pushkë e cila nëpërmjet analizave të balistikës është konstatuar se kjo ishte arma që ishte përdorë për të vrarë Trajan Trifunoviqin.

Zëdhënësi Hashani thotë se ndaj Boshko Dimiqit, i cili është duke u mbajtur në paraburgim pas konfiskimit të armës së tij prokuroria ka ngritur akuza për vrasjen e Trajan Trifunoviqit.

Kjo nuk është hera e parë në rajonin e Gjilanit kur viktima është serb menjëherë vrasja iu atribuohet shqiptarëve e të cilat më vonë janë konfirmuar se kanë ndodhur nga vetë serbët.

 

 

Ka hyrë në prodhim të rregullt Blloku I i "Kosovës B"

 

Prishtinë, 8 mars 2004 - Dje ka hyrë në prodhim të rregullt Bllok I i Kosovës B. Aktualisht gjendja energjetike vlerësohet të jetë stabile. Reduktimet sipas zyrtarëve të KEK-ut momentalisht nuk ka apo ato janë kohë pas kohe nga një orë.

 

Mirëpo në rast të dështimit të konsumit reduktimet mund të paraqitën sërish. Në stabilizimin e situatës ka ndikuar hyrja në prodhim të rregullt të bllokut të riparuar të Termocentralit Kosova B -1 si dhe importi, thotë zëdhënësi i KEK-ut. Blloku B-1 meqenëse ka hyrë dje në funksion, prodhon energji me kapacitete jo të plota.

 

 

U bë ndarja e çmimit tradicional për kameramanin e vitit

 

Prishtinë, 8 mars 2004 - RTK-ja bëri ndarjen e çmimit tradicional për kamermanin e vitit, që mban emrin e pionieri të kamerës në Kosovë "Rudolf Sopi". Në zhanrin e informatikës fitues i këtij çmimi është kameramani i RTK-së Bashkim Rudari, në zhanrin e dokumentarit është Milot Krasniqi, kamerman i KTV-së, ndërkaq në zhanrin artistik fitues është Yll Çitaku, kameraman i pavarur.

 

 

Policia maqedonase ka vrarë dy shqiptarë në një fshat afër Tetovës

 

Tetovë, 8 mars 2004 - Policia maqedonase njofton se në një përleshje ndërmjet policisë dhe një grupi të armatosur në afërsi të fshatit Zhiravjan të Tetovës janë vrarë dy shqiptarë dhe është plagosur një tjetër. Njoftohet se fjala është për dy persona të armatosur të cilët gjatë natës kanë plaçkitur nëpër fshatrat e Tetovës.

 

Sipas burimeve të Ministrisë së Punëve të Brendshme maqedonase gjatë tentimit të kontrollimit policor të automjetit në të cilin ishin të dyshimtët, ata kanë hapur zjarr ndaj policisë. Kjo e fundit i është kundërpërgjigjur zjarrit dhe ka vrarë dy prej tre personave që kanë ndodhur në automobil.

 

Dy personat e vrarë janë transferuar në Qendrën mjekësore të Tetovës, ndërkaq personi tretë i cili ka marrë plagë të rënda është dërguar në Spitalin e Shkupit.

 

 

Në Shqipëri do të mbahen manovrat ushtarake shqiptaro-amerikane

 

Tiranë, 8 mars 2004 - Prej sot deri më 12 mars të këtij viti në Shqipëri do të mbahen manovrat ushtarake shqiptaro-amerikane, në të cilat do të marrin pjesë 6.300 trupa ushtarake. Qëllimi i këtyre stërvitjeve është ushtrimi i kapaciteti luftarak të grupit ekspeditor goditës, duke përfshirë trupat detare dhe marincat amerikan.

 

 

Ish-diktatori jugosllav Millosheviq kalon në partinë e Sheshelit

 

Novi Sad, 8 mars 2004 - Ish-diktatori jugosllav dhe lideri i Partisë Socialiste dhe i akuzuari i Hagës Sllobodan Millosheviq që nga fundi i kësaj jave mund të braktisë radhët e socialistëve dhe të kalojë në Partinë Radikale Serbe të Vojisllav Shehelit. Kështu deklaroi avokati Svetozar Vujaçiq për gazetën e Novi Sadit "Dnvenik", duke u mbështetur në një "burim të sigurt", i afër me Millosheviqin.

"Millosheviq është shumë i zhgënjyer me të gjitha ngjarjet në Partinë Socialiste, sepse është vënë në lojë, ngase ka pranuar të jetë bartës i listës, por me kusht që në atë listë të jenë gjashtë-shtatë njerëz të cilët i kishte propozuar ai, gjë që nuk është respektuar, e kishte kërkuar që Milorad Vuçeliq të jetë shef i Klubit të deputetëve.

 

Tani Millosheviqi është i zemëruar, kështu që më 12 mars do ta thotë atë që ka për ta thënë. Në bazë të informacioneve të mia pres që të braktisë PS dhe të kalojë në PRS, ku e pret një vend nderi", ka deklaruar avokati Vujaçiq.

 

 

Partia opozitare fiton zgjedhjet në Greqi

 

Athinë, 8 mars 2004 - Opozita konservatore e Greqisë siguroi një fitore të ndjeshme në zgjedhjet e djeshme parlamentare, duke i dhënë kështu fund sundimit të socialistëve për më shumë se 10 vjet.
Përkrahësit vërshuan nëpër rrugë në gjithë Greqinë, pasi Partia Demokracia e Re e Greqisë siguroi një fitore të ndjeshme në zgjedhjet e djeshme parlamentare.

Partia Demokracia e Re do të marrë shumicën dërmuese në parlamentin prej 300 anëtarësh.
Tani që zgjedhjet dhe fushata një mujore tepër e ashpër kanë marrë fund, partisë Demokracia e Re dhe udhëheqësit të saj Kostas Karamanlis, do t'u duhet të fillojnë menjëherë nga puna.

Megjithëse u duk qartë që elektorati grek kishte dëshirë të festonte mbrëmë vonë, 47 vjeçari Karamanlis dhe qeveria e tij e re përballen me një detyrë shumë të madhe, duke filluar që nga sot për të zgjidhur çështje të rëndësishme, përfshirë ribashkimin e Qipros dhe përgatitjet për Lojrat Olimpike të kësaj vere.

 

 

Këshilli Qeveritar i Irakut ka miratuar unanimisht kushtetutën e përkohëshme

 

Bagdad, 8 mars 2004 - Në një mbledhje të sotme në mëngjes (e hënë) të Këshillit Qeveritar të Irakut, të 25 anëtarët e tij, kanë miratuar unanimisht me ngritje dore kushtetutën e përkohëshme, njofton AP.

 

Në mbledhjen e Këshillit kanë marrë pjesë edhe administratorët e lartë amerikanë dhe britanikë, L. Pol Bremer dhe Xheremi Grinstok. Vërejtjet e klerikut të lartë shiit në kushtetutë kanë mbetur të pandryshuara. Pas miratimit, anëtarët e Këshillit e kanë nënshkruar dokumentin në një ceremoni publike.

 

 

Shpërthime në qendër të Bagdadit

 

Bagdad, 8 mars 2004 - Shpërthime të fuqishme kanë jehuar sot (e hënë) në qendër të Bagdadit vetëm disa minuta para se, siç pritet, të nënshkruhet kushtetuta e përkohshme e vendit, njofton Rojter. Armata amerikane ka thënë se s'ka informacione për shpërthimet.

 

Forcat e sigurimit janë në gjendje gatishmërie të lartë par shkak të mundësisë së sulmeve guerile për të penguar ceremoninë e nënshkrimit.

 

 

Rritet prania e grave në parlamentet e vendeve të botës

 

Gjenevë, 8 mars 2004 - Pjesëmarrja e grave në parlamentet vendeve të botës ka shënuar një nivel rekord, tregojnë shënimet statistikore të Unionit Interparlamentar me rastin e 8 mars 2004it, Ditës ndërkombëtare të Gruas.

 

Në fillim të vitit 2003 në parlamentet evropiane kishte 14.8 për qind gra, ndërkaq në fillim të vitit 2002 kishte 14.3 për qind. Nga 181 vende me kuvende kombëtare, të cila çdo vit i studion Unioni, 94 për qind e tyre të paktën kanë një grua në parlament.

 

Vetëm 14 vende në botë kanë 30 për qind gra, gjë që, konsideron Unioni, është minimumi që gratë të mund të kenë ndonjë ndikim në punën e paralmenteve.

Kosova hyn në mesin e 14 vendeve në botë, ku gratë janë të përfaqësuara me 30 për qind, pra dyfishi mesatares evropiane.

 

 

Trupat izraelite kanë vrarë një tineixher palestinez

 

Gaza, 8 mars 2004 - Trupat izraelite kanë vrarë sot (e hënë) një tineixher palestinez afër vendbanimit hebrait Morag në Rripin e Gazës, kanë bërë të ditur burimet mjekësore palestineze, njofton AFP. Khaled Madi, 16-vjeçar, është qëlluar në shpinë nga ushtarët derisa ai po punonte në fushën që i përkiste familjes së tij, kanë thënë dëshmitarët.

 

Vrasja e tij ngre në 3820 numrin e përgjithshëm të të vrarëve që kur ka filluar intifada apo kryengritja palestineze në shtator 2000. Nga të vrarët, 2866 janë palestinezë dhe 886 izraelitë.

 

 

Në Haiti janë vrarë të pakten 6 persona

 

Port-o-Prens, 8 mars 2004 - Të pakten gjashtë persona janë vrarë në Haiti në një marsh të mijëra kundërshtarëve presidentit të rrëzuar Zhan Bertran Aristid, njofton BBCnews. Persona të armatosur kanë hapur zjarr në turmën prej 10 mijë njerëzish, që manifeastonin në kryeqytetin Port-au-Prins largimin e z. Aristid. Dëshmitarët kanë fajësuar policinë ithtare të Aristidit.

 

 

Të paktën 15 veta kanë humbur jetën në përmbytjet në Turqi

 

Ankara, 8 mars 2004 - Të paktën 15 veta kanë humbur jetën në përmbytjet pas shirave të stuhishme dhe shkrirjes së borës, gjatë dy ditëve të fundit në lindje dhe juglindje të Turiqsë. Viktima e fundit është një vajzë shtatëvjeçare, trupi i së cilës është gjetur 700 metra larg nga shtëpia e saj. Në vendin Silifke janë rrënuar rreth 10 mijë shtëpi.

 

 

Shtatë fëmijë kanë vdekur në përplasjen e autobusit në Vietnam Hanoi, 8 mars 2004

 

- Në përplasjen e autobusit të shkollës në jug të Vietnamit gjatë fundjavës kanë humbur jetën 7 fëmijë, ndërkaq janë plagosur 15 të tjerë, njoftojnë sot agjencitë e lajmeve.

 

 

Këshilli Qeverisës sot do të nënshkruajë kushtetutën e përkohshme

 

Bagdad, 8 mars 2004 - Anëtarë të Këshillit Qeverisës të Irakut, i emëruar nga Shtetet e Bashkuara, kanë në plan të nënshkruajnë sot kushtetutën e përkohshme.

Anëtarët kryesorë shiitë të Këshillit Qeverisës thanë se do ta nënshkruajnë kushtetutën, megjithë rezervimet e shprehura më parë.

Pesë anëtarët shiitë ngritën të premten kundërshtime të reja, pasi udhëheqësi më i lartë i besimit shiit në Irak, Ajatollahu i Madh, Ali Sistani tha se ai besonte se kushtetuta e përkohshme i jepte shumë pushtet pakicës kurde.

Anëtarët e Këshillit ndryshuan qëndrim dhe thanë se do ta nënshkruajnë dokumentin, pa ndryshime, pas bisedimeve me Ajatollahun Ali Sistani.

 

 

Gara për Shtëpinë e Bardhë po intensifikohet

 

Uashington, 8 mars 2004 - Ndoshta dy kandidatët e partive më të mëdha politike për president të SHBA-ve nuk do të vihen përballë njeri tjetrit për të debatuar çështje të ndryshme deri nga muaji shtator apo tetor. Por ata kanë filluar tashmë t'i bëjnë sfidë njeri tjetrit në intervista të veçanta dhe në ndalesa të ndryshme në kuadër të fushatës.

Presidenti Bush po i referohet tani senatorit të Masaçusets, Xhon Keri, si kundërshtar i tij. Dhe kandidati shumë i mundshëm i Partisë Demokrate po i shton kritikat ndaj presidentit Bush lidhur me politikën e jashtme dhe ekonominë.

 

 

14 të vrarë në kampet e refugjatëve palestinezë

 

Gaza, 8 mars 2004 - Zyrtarët palestinezë thonë se të paktën 14 vetë u vranë dhe dhjetra u plagosën gjatë një operacioni ushtarak izraelit në dy kampe refugjatësh në Rripin e Gazës.

Mes viktimave ka të paktën 3 fëmijë dhe 9 anëtarë të njohur të grupeve ekstremiste palestineze.

Izraeli thotë se ekstremistët ishin anëtarë të grupit Hamas, një organizatë që ka kryer sulme të shumta vetë-vrasëse kundër Izraelit.

Dëshmitarët thonë se dhjetra tanke izraelite dhe mjete të tjera të blinduara hynë në dy kampet e refugjatëve në orët e para të mëngjesit, të mbështetur nga helikopterë Apaçi. Në kampe shpërthyen përleshje të ashpra, ndërsa ushtarët filluan kërkimet shtëpi më shtëpi.

 

 

Agjencia Ndërkombëtare për Energjinë Atomike thotë se Irani dhe Libia janë që të dy fajtorë

Vjenë, 8 mars 2004 - Agjencia Ndërkombëtare për Energjinë Atomike thotë se Irani dhe Libia janë që të dy fajtorë se kanë shkelur për një kohë të gjatë Traktatin për Mospërhapjen e Armëve Bërthamore.

Drejtori i Përgjithshëm i Agjencisë, Mohammed ElBaradei, tha se do të diskutojë sot rreth shkeljeve të Iranit dhe Libisë në një mbledhje të Këshillit të Agjencisë në Vjenë.

Ndërkohë, Agjencia njoftoi se Libia ka vendosur të pranojë inspektime të objekteve të saj bërthamore nga ekspertët e OKB-së, të cilët do të bëjnë kontrolle të imta dhe pa shumë paralajmërim.

Libia ka deklaruar se do të eliminojë programin e saj të fshehtë të armëve bërthamore.

  |  KULTURË  |  HISTORI  |   POLITIKË  |  OPINIONE  |  ADRESARI  |  ARKIVI  |