E shtune, 6 mars 2004

E shtune, 6 mars 2004

Përmbajtja:

Qeveria e Kosovës kundërshton vendimin e Holkerit që Lambsdorf t'i nënshkruajë kontratat për shitjen e 11 ndërmarrjeve
Urimet e ministrit të Arsimit me rastin e Ditës së Mësuesit
Lindholn thotë se me lista të hapura mund të dëmtohet struktura gjinore e Kuvendit të Kosovës
Melihate Tërmkolli hedh poshtë kritikat e Ombudspersonit të Kosovës në lidhje me Ligjin për barazi gjinore
Engel: Pavarësia është e ardhmja e vetme e arsyeshme për Kosovën
Departamenti amerikan i Shtetit kundërshton idenë për ndarjen e Kosovës
L.Zeneli: Në Kosovën e pavarur, demokratike e të zhvilluar të gjithë të rinjtë duhet ta gjejnë perspektivën e tyre
Bordi i AKM-së është jofunksional
Mali i Zi do të ndahet nga Serbia ndoshta pa pritur marsin e vitit 2005
Policia e ka deaktivizuar një mjet shpërthyes afër Ambasadës amerikane në Tiranë
Në Afganistan janë vrarë një inxhinier turk dhe një roje sigurimi
Në një shkëmbim zjarri në Irak, janë plagosur 4 ushtarë britanikë
Në një shpërthim janë vrarë 2 policë palestinezë
Ushtarët izraelitë kanë vrarë një palestinez
Kushtetuta e përkohshme mund të nënshkruhet të hënën
Libia zotëron 20 tonelata gaz helmues iprit
"Tigrat" përjashtojnë një komandant të tyre

Qeveria e Kosovës kundërshton vendimin e Holkerit që Lambsdorf t'i nënshkruajë kontratat për shitjen e 11 ndërmarrjeve

Prishtinë, 6 mars 2004 - Kryeministri i Kosovës Bajram Rexhepi megjithëse është shprehur i pakënaqur me heshtjen e shefit të UNMIK-ut në lidhje me kërkesat e Qeverisë rreth privatizimit, dje i vlerësoi pozitivisht disa nga vendimet e UNMIK-ut për privatizimin.

Mirëpo, BSPK dhe Qeveria e Kosovës kanë kundërshtuar vendimin e pardjeshëm të kryeadministratorit të Kosovës Hari Holkeri për autorizimin e shefit të Shtyllës së Katërt të UNMIK-ut Nikolas Lambsdorf, që ky i fundit t'i nënshkruajë kontratat për shitjen e 11 ndërmarrjeve shoqërore.
Zëdhënësja e Kryeministrit, Mimoza Kusari tha se qeveria edhe mëtej mbron qëndrimin e saj rreth privatizimit dhe shtoi se qeveria ende qëndron prapa kërkesës së vet që duhet të bëhet edhe shkarkimi i drejtoreshës së AKM-së Maria Fuçi.


Urimet e ministrit të Arsimit me rastin e Ditës së Mësuesit

Prishtinë, 6 mars 2004 - Me rastin e 7 Marsit - Ditës së Mësuesit, Ministri i Arsimit, i Shkencës dhe i Teknologjisë, Rexhep Osmani uron të gjithë mësimdhënësit, nxënësit e studentët e Kosovë.

Me suksese të reja në detyrën e tyre fisnike për ngritjen e nivelit arsimor e kulturor të brezit të ri kosovar, që është një faktor i rëndësishëm i zhvillimit të përgjithshëm të Kosovës, thuhet në përgëzimet e ministrit Osmani me rastin e 7 Marsit.


Lindholn thotë se me lista të hapura mund të dëmtohet struktura gjinore e Kuvendit të Kosovës

Prishtinë, 6 mars 2004 - Zëdhënësi i OSBE-së Sven Lindholm ka thënë me zgjedhjet me lista të hapura mund të dëmtohej struktura gjinore e Kuvendit të Kosovës. "Debati është është zhvilluar rreth asaj se disa parti politike dhe organizata të tjera kanë kërkuar lista të hapura, mirëpo ne duam të sigurohemi për nivelin adekuat të përfaqësimit të femrave në Kuvend", tha Lindholm.

Ai ka përkujtuar se sipas rregullores secila nga subjektet politike duhet të ketë një nivel prej 30 për qind të përfaqësimit të femrave në Parlamentin e Kosovës. Ai tha se OSBE-ja ia ka dhënë rekomandimet kryeadministratorit Holkeri dhe atij i mbetet të vendosë lidhur me koncensusin, i cili kryesisht ka ekzistuar përveç çështjes së listave nëse ato duhet të jenë të mbyllura apo të hapura.
Ndërkaq, zëdhënësi i UNMIK-ut Sunil Narula, ka thënë se kryeadministratori i Kosovës Hari Hokeri ende nuk e ka nënshkruar rregulloren për zgjedhjet. "Nuk ka ndodhur asgjë e re dhe nuk mund të parashohim modelin zgjedhor, para se të dalë rregullorja", ka thënë z. Narula.


Melihate Tërmkolli hedh poshtë kritikat e Ombudspersonit të Kosovës në lidhje me Ligjin për barazi gjinore

Prishtinë, 6 mars 2004 - Melihate Tërmkolli, kryetare e Komisionit të Kuvendit të Kosovës për Barazi Gjinore, hedh poshtë kritikat e Ombudspersonit të Kosovës të bëra ditë më parë në lidhje me Ligjin për barazi gjinore.
"Duke mos dashur të polemizoj me z.Nowicki do të përpiqem të paraqes vetëm disa fakte për të cilat z.Nowicki mund të polemizojë e të shkruajë në gazeta gjithë jetën e tij dhe ato prapëseprapë të mbesin fakte", thotë në përgjigjen e saj Melihate Tërmkolli.
"Po, është e vërtetë se ju z Nowicki keni ndërhyrë në mënyrë flagrante në kompetencat e institucioneve të Kosovës edhe ashtu të cunguara. Keni ndërhyrë në mëvetësinë e punës së Kuvendit të Kosovës, duke kontestuar kompetencat e tij dhe duke nënçmuar nivelin e punës së tij.

Për më tepër keni bërë edhe një gaf në mesin e gafeve që jo rrallëherë i publikoni në mjetet e informimit. Në emër të gjoja përmirësimit të gabimeve tuaja keni rrëshqitur në gabime të reja duke fyer dhe akuzuar përfaqësuesit e Kuvendit të Kosovës dhe mekanizmat e tij punues".
Më tutje zj. Tërmkolli pyet Novickin se në cilin kod dhe në cilin ligj është mbështetur ai për ta përligjur fyerjen dhe akuzën si të drejtë të tij? Poashtu ajo thotë se Novicki ka ushtruar presione dhe ndërhyrje të palejuara për funksionin e institucionit të Ombudspersonit.
"Është çështje juaja pse nuk keni marrë pjesë në asnjë takim me Komisionin për Barazi Gjinore të Kuvendit të Kosovës, ndërsa ju përkujtoj se keni qenë të ftuar së paku tri herë për të biseduar për ligjin. Dhe merrni kurajon dhe guximin ta thoni të kundërtën në media. Guxim paksa i tepruar z.Nowicki.

Është çështje juaja pse nuk keni bërë asnjë vërejtje në Projektligjin për Barazi Gjinore ndërsa ju përkujtoj se Projektligjin e keni marrë për të paraqitur vërejtje dhe propozime së paku dy muaj para se ligji të hynte në procedurat e Kuvendit", thekson znj.Tërmkolli, duke nënviziuar se "z. Nowicki padashje apo nga mosdija keni ngatërruar institucionin e Avokatit për Barazi Gjinore me Ombudspersonin, institucion krejtësisht i ndryshëm si për nga funksioni ashtu edhe për nga mënyra e punës dhe gjerësia e interesimeve".


Engel: Pavarësia është e ardhmja e vetme e arsyeshme për Kosovën

Shkup, 6 mars 2004 - Kongresisti amerikan Eliot Engel tha se kundërshton idenë e kryeministrit të ri serb Vojisllav Koshtunica për ndarjen në kantone të Kosovës. Populli i Kosovës ka të drejtë të përcaktojë të ardhmen dhe mbështet një referendum për popullin e Kosovës. Këto komente Engel i bëri dje në Shkup ku mori pjesë në varrimin e Presidentit maqedonas Boris Trajkovski.
Engel tha se e mbështet pavarësinë për Kosovën dhe se pavarësia është e ardhmja e vetme e arsyeshme për Kosovën. Kosova asnjëherë nuk mund të jetë pjesë e Serbisë apo e Jugosllavisë sepse kjo nuk është e mundëshme më, duke pasur parasysh atë që ndodhi në vitin 99 dhe para kësaj, tha ai.
Engel tha se ministritë dhe administrimi duhet dorëzuar më shpejt kosovarëve, ndërkohë që standardet para statusit mund të funksionojë nëse ka një datë për referendumin e popullit të Kosovës. Ai poashtu i vë theksin nevojës së përshpejtimit të proceseve të privatizimit në Kosovë.


Departamenti amerikan i Shtetit kundërshton idenë për ndarjen e Kosovës

Uashington, 6 mars 2004 - Uashingtoni nuk përkrah deklaratat e Koshtunicës për ndarjen e Kosovës. Zëdhënësi i Departamentit amerikan të Shtetit, Riçard Bauçer ka deklaruar se tash nuk duhet të bëhen kurrëfarë deklaratash lidhur me statusin final të Kosovës, pasi çdo qëndrim rreth statusit është i parakohëshëm më parë se të arrihet përmbushja e standardeve, të cilat i kanë përcaktuar Këshilli i Sigurimit dhe Kombet e Bashkuara.
Drejtori i Institutit Amerikan për Iniciativa Ballkanike, Daniel Server deklaroi se nëse Serbia insiston në ndarjen e Kosovës dhe nëse nuk bashkëpunon me Tribunalin e Hagës, nuk do të pranohet në Programin Partneritet për Paqe dhe as në Bashkimin Evropian.


L.Zeneli: Në Kosovën e pavarur, demokratike e të zhvilluar të gjithë të rinjtë duhet ta gjejnë perspektivën e tyre


Ai konstatoi se gjatë gjithë debateve të zhvilluara në terren ka ardhur në përfundim se rinia e Kosovës ka halle dhe shqetësime të njëjta, pavarësisht se ku jeton dhe vepron.

"Preokupimet e rinisë sonë janë preokupime që shqetësojnë një brez të tërë, shqetësojnë një shoqëri e më gjerë", tha Zeneli. Ai shtoi se brengat, kërkesat dhe shqetësimet e kësaj gjenerate janë të kuptueshme dhe krejt të pranueshme, por edhe obliguese për FR të LDK-së, si organizatë rinore politike, si dhe për vetë institucionet qeverisëse, si në rang komunal ashtu edhe në atë qendror.

Qëllimi i këtij takimi, tha kryetari i FR të LDK-së, është për të bashkëbiseduar me të rinjtë për të gjitha hallet dhe brengat që i kanë ata dhe për të shqyrtuar mundësitë për tejkalimin e tyre sa më të shpejt dhe sa më mirë. Ai tha se një nga problemet që e shqetëson brezin e ri është papunësia duke premtuar përkujdesje më të madhe dhe më shumë ndihmë institucionale.
"Edhe ne bashkë me ju punojmë që ëndrrën tonë për një Kosovë të pavarur, demokratike e të zhvilluar ta kthejmë në një realitet të prekshëm, ku do ta gjenin perspektivën e tyre të gjithë të rinjtë pa dallim", tha Zeneli.
Duke e quajtur vitin e sivjemë, "vit të sfidave të mëdha në rrafshin politik dhe ekonomik", ai tha se do të bashkëbisedohet me të rinjtë për të krijuar një paltformë se si të përballohen sfidat e brezit të ri të LDK-së, por edhe të Kosovës.
Në diskutimin e tij, Lulzim Zeneli theksoi se sivjet mbahen zgjedhjet partiake, si dhe ato nacionale, të cilat, siç tha, do të jenë një sfidë që duhet tejkaluar me shumë kujdes dhe me një ide e vizion të qartë, duke shtuar se të rinjtë janë ata që me angazhimin e tyre në proceset e gjithëmbarshme në Kosovë do të vendosin se në ç'drejtim do të shkojnë rrjedhat.
Takimi po vazhdon me debatet e të rinjve të Prishtinës rreth preokipimeve të tyre aktuale.


Bordi i AKM-së është jofunksional

Prishtinë, 6 mars 2004 - Zëdhënësi i Shtyllës së Katërt Kris Litie thotë se Bordi i AKM-së është jofunksional dhe për këtë arsye Hari Holkeri e ka udhëzuar z. Nikolas Lambsdorf që të vazhdojë procesin e privatizimit me disa udhëzime të reja. Ai ka shtuar se kjo është një rrugë përpara. "Ne duhet të shesim kompanitë, duhet të vazhdojmë me tenderët dhe të ecim para në privatizim", ka thënë zëdhënësi Litie.


Mali i Zi do të ndahet nga Serbia ndoshta pa pritur marsin e vitit 2005

Podgoricë, 6 mars 2004 - Qëndrimi i Koshtunicës ashpër është kritikuar nga presidenti i Unioni Serbi Mali i Zi Svetozar Maroviq. Ai ka paralajmëruar për pasoja direkte nëse qeveria serbe nuk bashkëpunon me Tribunalin e Hagës.

Zëdhënësi i Partisë Demokratike të Socialistëve në Mal të Zi, Predrag Sekuliq ka folur për mundësinë e ndarjes në mënyrë paqësore të Malit të Zi nga Serbia ndoshta edhe para muajit mars të vitit 2005.


Policia e ka deaktivizuar një mjet shpërthyes afër Ambasadës amerikane në Tiranë

Tiranë, 6 mars 2004 - Policia shqiptare ka deklaruar se ka gjetur një mjet shpërthyes afër Ambasadës amerikane në Tiranë, të cilën më pas e kanë deaktivizuar me sukses. Zëdhënësi i policisë ka thënë me këtë rast se nuk pati të lënduar, ndërkaq hetimet rreth rastit po vazhdojnë.

Shqipëria ka shtuar masat e sigurisë në ambasadat perëndimore dhe institucionet ndërkombëtare në këtë vend që nga sulmi me bombë vetëvrasëse në Stamboll në nëntor, ku u vranë 62 persona.


Në Afganistan janë vrarë një inxhinier turk dhe një roje sigurimi

Kabul, 6 mars 2004 - Një inxhinier turk dhe një roje sigurimi vendës janë vrarë me armë zjarri sot (e shtunë) në një sulm në jug të Afganistanit, njofton BBCWorld. Për vrasjen e tyre, zyrtarët kanë fajësuar militantët islamikë.
Po kështu, bëhet e ditur se një tjetër punëtor turk dhe një tjetër afgan, roje sigurimi, janë kidnapuar në provincën Zabul. Të dy turqit kanë punuar për një projekt amerikan në rindërtimin e autostradës Kabul-Kandahar.


Në një shkëmbim zjarri në Irak, janë plagosur 4 ushtarë britanikë

Bagdad, 6 mars 2004 - Katër ushtarë britanikë janë plagosur në një shkëmbim zjarri të djeshëm afër vendbanimit al-Amarah në Irak, njofton BBCnews. Ministria britanike e Mbrojtjes ka thënë se kundër patrullës është hapur zjarr me pushkomitralozë dhe granata raketore afër fshati Qal At Sahil.

Televizioni Al Xhazira ka thënë se në këtë incident janë vrarë dy civilë irakianë dhe se në të është involvuar milicia shite. Ushtarët britanikë janë dërguar në spital, ndonëse nuk është thënë se janë në gjendje për rrezik jete.


Në një shpërthim janë vrarë 2 policë palestinezë

Gaza, 6 mars 2004 - Dy policë palestinezë janë vrarë sot (e shtunë) dhe 5 të tjerë janë plagosur pasi automjeti i tyre është hedhur në erë afër vendkalimit kufitar Erez ndërmjet Rripit të Gazës dhe Izraelit, kanë thënë dëshmitarët, të cilët kanë shtuar se mund të jetë sulm vetëvrasës, njofton AFP.

Fill pas shpërthimit, trupat izraelite kanë hapur zjarr, por nuk është e qartë nëse policët palestinezë janë vrarë nga plumbat e tyre apo nga shpërthimi.


Ushtarët izraelitë kanë vrarë një palestinez

Jerusalem, 6 mars 2004 - Ushtarët izraelitë kanë vrarë sot (e shtunë) një palestinez gjatë një konfrontimi në qytetin Tulkarm në Bregun Perendimor, kanë bërë të ditur një burim ushtarak izraelit dhe banorët vendës, njofton Rojter.

Vendësit kanë thënë se i vrari është një polic i paarmatosur palestinez në uniformë, i cili po shkonte në shtëpi. Po kështu, në të njëjtin njoftim thuhet se në pjesën veriore të Rripit të Gazës janë plagosur të pakten tre policë palestinezë afër vrendkalimit kufitar Erez me Izraelin, kanë bërë të ditur burimet e sigurimit palestinez.


Kushtetuta e përkohshme mund të nënshkruhet të hënën

Bagdad, 6 mars 2004 - Këshilli Qeverisës i Irakut shfaqi shpresën për të nënshkruar kushtetutën e përkohshmwe të vendit të hënën, pasi ceremonia e djeshme e nënshkrimit u shty për shkak të kundërshtimeve në momentet e fundit nga pesë anëtarë shiit të Këshillit Qeverisës.
Këshilli Qeverisës lëshoi sot në mëngjes një deklaratë, në të cilën thuhej se këshilli shpreson të zgjidhë çështjet e mbetura nëpërmjet dialogut. Politikanët shiitë kundërshtuan dy klauzola, njëra kishte të bënte me përbërjen e presidencës së vendit dhe tjetra me të drejtat e vetos kundër një kushtetute të përhershme.


Libia zotëron 20 tonelata gaz helmues iprit

Tripoli, 6 mars 2004 - Libia bëri deklaratën e saj të parë mbi armët bërthamore, duke thënë se në arsenalin e saj të armëve kimike përfshihen më shumë se 20 tonë gaz helmues, iperit.
Libia i tha gjithashtu Organizatës për Ndalimin e Armëve Kimike me seli në Hagë se kishte mbyllur një uzinë armësh kimike dhe se zotëronte dy depo armësh të tilla. Në të njëjtën kohë, Libia kishte pranuar se ishte angazhuar në zhvillimin e gazit nervor sarin.
Drejtori i përgjithshëm organizatës i cilësoi pohimet si të mira për Libinë, rajonin dhe komunitetin ndërkombëtar dhe shtoi se ato përbëjnë një hap konkret drejt asgjësimit të plotë të armëve të shkatërrimit në masë.


"Tigrat" përjashtojnë një komandant të tyre

Kolombo, 6 mars 2004 - Rebelët Tigrat e Tamilit në Sri Lanka kanë përjashtuar nga radhët e tyre një prej komandantëve të tyre me akuzën për tradhti. Komandanti në fjalë, që vepron në lindje të ishullit, ishte shkëputur prej kohësh nga lëvizja.
Kreu i krahut politik të tigrave dhe forcat që ende janë besnikë të udhëheqjes, thonë se kolonel Karuna, është i vetëm dhe nuk ka mbështetës.