Dy lajme nga Podujeva

Dy lajme nga Podujeva

KFOR-i redukton trupat dhe përgatitet ti kalojë përgjegjësitë tek vendorët për tri pika


“Me organizimin e ri të Bashkësisë shumëkombëshe të Qendrës, trupat e KFOR-it çek e sllovak që aktualisht numrojnë 500 pjestarë do të reduktohen për 80 trupa”, tha nënkoloneli Kopecki i cili njoftoi se kontigjenti i ri që do të marrë detyrat më 15 prill do të ketë dy njësi në kuadër të “Task Force” njëra që do ta mbikqyrë vijën kufitare dhe do të operojë në qytetin e Podujevës, kurse njësiti i dytë do të kryejë detyrat në Podujevë dhe detyrat që do ti jipen nga komandanti i “Task Force”.

Në pyetjen tonë se cilat pika planifikon ti lirojë KFOR-i çek e sllovak, komandanti Josef Kopecki tha se do të lirohet pika ushtarake në Kërpimeh, kurse pika në Sekiraqë do të kontrollohet në kuadër të aktivitetit të KFOR-it në vijën kufitare. “Janë duke vazhduar bisedat për lirimin e kishës ortodokse serbe në Podujevë meqë ne kemi bërë vlerësimin e sigurisë së saj me UNMIKU-n, autoritetet komunale, SHPK-në mirëpo do të vendosë komandanti i KFOR-it në Kosovë”, deklaroi Kopecki.

Ai tha se lirimi i pikave të propozuara lidhet me përparimet që janë bërë në aspektin e sigurisë në Podujevë dhe KFOR-i e sheh të panevojshme prezencën ushtarake. Sipas z. Kopecki, KFOR vlerëson se nuk ka aktivitetet kriminale pos atyre që ndodhin në gjithë botën. Komandanti i KFOR-it tha se pika e Kërpimehut do të lirohet, kurse për kishën dueht të përkujdesen komuna në bashkëpunim me UNMIK-un dhe KFOR-in.

Komandanti i stacionit policor Reinmann Bernd vlerësoi të qetë situatën në Podujevë dhe njoftoi se protesta e ditëve të kaluar ishte e qetë dhe kaloi pa incidente. Bernd vlerësoi punën e SHPK-së me rastin e vërshimeve dhe tha se pjesëmarrja e SHPK-së dhe ndihma ofruar popullatës është shenjë e kalimit të kompetencave tek vendorët.


MASHT-i mbajti trajnim për zbatimin e reformave në arsim me theks të veçantë për rolin e drejtorit të shkollës


Temë kryesore e këtij takimi të punës ishte zbatimi i reformave në arsim, me theks të veçantë roli i drejtorit të shkollës në procesin e zbatimit të ndryshimeve në shkolla. Sekretari i përhershëm në MASHT z. Jusuf Zeneli tha se qëllimi është që politikat e zhvilluara në Ministrinë e arsimit ti bartim drejtëpërdrejtë tek drejtorët e shkollave në funksion të zbatimit të reformave.

“Meqë ka përfunduar cikli i emërimit të drejtorëve të shkollave, ne kemi parë nevojën e domosdoshme për një trajnim të drejtorëve dhe kjo është faza e parë e cila paraqet një ligjëratë të përgjithshme politikat e përgjithshme të sistemit arsimor me theks të veçantë në rolin e drejtorit i cili është figura kyqe në zbatimin e reformave të arsimit në shkollë” tha Zeneli.

Ai tha se MASHT-i nuk është i kënaqur me zbatimin e reformave në Kosovë përgjithësisht, në veçanti në Podujevë sepse rezultatet e testit kombëtar për klasën e nëntë tregojnë se nuk është gjendja mirë në arsimin llapjan. Zeneli e ilustroi këtë me rezultatet e testit prej 51% pozitiv në gjuhë dhe shkenca shoqërore dhe 41% në Matematikë dhe shkenca natyrore të nxënësve të klasëve të nënta në Podujevë.

Sekretari i përhershëm në Ministrinë e Arsimit, shkencës dhe teknologjisë Jusuf Zeneli ligjëroi para drejtorëve të shkollave fillore dhe të mesme të Podujevës për rolin e drejtorit të shkollës e cila me reforma është shndërruar në institucion të nxënies. Ndërkaq lidhur me zbatimin e ndryshimeve në arsim një bisedë interaktive me drejtorët e shkollave fillore dhe të mesme të Podujevës e mbajti Drejtori i Departamentit të arsimit në MASHT z. Xhavit Rexhaj.

Drejtori i Drejtorisë për arsim i Podujevës Mr. Shpejtim Bulliqi deklaroi se trajnimi i drejtorëve ka shtjelluar mjaft mirë obligimet, detyrat dhe përgjegjësitë e drejtorëve të shkollave me qëllim të zbatimit sa më funksional të reformave që janë duke u zhvilluar në sistemin arsimor.