Përmbajtja:

• Presidenti Rugova priti një delegacion të Parlamentit Evropian

• Ministri i Arsimit i përgjigjet Ombudspersonit të Kosovës

• Delegacioni i Parlamentit Evropian u takua me Holkerin, Rexhepin dhe Novickin

• U zhvillua raundi i parë i bisedimeve mes Prishtinës dhe Beogradit

• Krerët e institucioneve të Kosovës dhe ai i UNMIK-ut nesër në Shkup marrin pjesë në ceremoninë e varrimit të Trajkovskit

• Ballkani mbetet një ndër përparësitë në politikën e jashtme amerikane

• Një doktor amerikan për rritjen e rasteve të vetëvrasjes në Kosovë

• Zyrtarët e NATO-s dhe BE-së reagojnë ndaj deklaratave të kryeministrit serb për kantonizimin e Kosovës

• Qeveria holandeze financon një projekt për riintegrimin e komunitetit në Gjilan

• Në Kosovë arriti një delegacion i Parlamentit Ëvropian në krye me euro-deputeten Doris Pak

• Ndarja e Kosovës për administratën e UNMIK-un është e papranueshme

• Amnesti Interneshënell thekson skandalin e Batajnicës ku mbi 700 shqiptarë janë varrosur në varrezat e fshehta

• Sot do të mblidhet Këshilli Ekonomik Fiskal për të diskutuar rreth mjeteve financiare që janë ndarë për shumë projekte

• UPS i Universitetit të Prishtinës shpalli zgjedhjet për kuvendin dhe kryetarin e këtij unioni

• Në Shkup mbërriti trupi i Presidentit maqedonas dhe të shoqëruesve të tij

• Një nxënës palestinez është vrarë dhe katër të tjerë janë plagosur

• Gjykata gjermane ka anuluar dënimin kundër një marokeni në lidhje me sulmet e 11 shtatorit

• Policia indiane ka vrarë 4 kryengritës në Asam

• Guerilët kanë sulmuar me mortaja dhe kanë plagosur 3 vetë

• Të paktën 13 minatorë kanë humbur jetën në një minierë në Indonezi

• Në Jemen është arrestuar një lider i Al Kaidës dhe 12 militantë të tjerë

• Senatori Xhon Keri kandidat i demokratëve për president

• SHBA mund të mbështesin një rezolutë, që kritikon të drejtat e njeriut në Kinë

• Rebelët ulin armët në Haiti

• Disidenti i shquar kinez është liruar nga burgu

Presidenti Rugova priti një delegacion të Parlamentit Evropian

 

Prishtinë, 4 mars 2004 - Presidenti i Kosovës Ibrahim Rugova priti sot një delegacion të Parlamentit Evropian, i cili ndodhet për një vizitë triditëshe në Kosovë, e udhëheq eurodeputetja Doris Pak. Presidenti Rugova tha se në këtë takim është biseduar për situatën aktuale në Kosovë dhe për progresin e arritur, si dhe për objektivat për zhvillimin ekonomik, për procesin e privatizimit, integrimin e minoriteteve dhe për bashkëpunimin me UNMIK-un në lidhje me transferin e kompetencave, sidomos në fushën e ekonomisë.

 

Edhe në këtë takim presidenti Rugova ka kërkuar njohjen sa më të shpejtë të pavarësisë së Kosovës, sepse kjo do t'i përshpejtonte të gjitha proceset demokratike dhe ekonomike të Kosovës.

 

"Pra një Kosovë e pavarur, prosperuese, e integruar në NATO në BE dhe në miqësi të përhershme me SHBA-të", tha Presidenti Rugova, duke shtuar se "Kosova e integruar në BE është perspektiva e Kosovës dhe e vendeve të tjera të kësaj pjese të Evropës". Ai falenderoi zonjën Pak, të cilën e quajti mike të Kosovës dhe e cila tash 15 vjet interesohet për Kosovën dhe tash ka rastin ta shohë progresin e arritur dhe ta ndihmojë edhe në të ardhmen.

"Ne jemi këtu për shkak të miqësisë së vjetër me Kosovën. Ne duam që të dijmë se cila është pikëpamja e Presidentit për të ardhmen e Kosovës", tha Doris Pak pas takimit me Presidentin Rugova.

"Nuk është e mjaftueshme të themi se ne do ta kemi pavarësinë. Unë mendoj se të gjithë politikanët në këtë rajon duhet të punojnë për këtë, nëse me të vërtetë e duan atë atëherë duhet të tregojnë gatishmërinë dhe aftësinë për të drejtuar këtë vend", theksoi zonja Pak.

Ajo tha se delegacioni që kryeson ajo do të takohet me kolegët deputetë të Parlamentit të Kosovës, për të parë më përafër se ku janë problemet e shoqërisë së Kosovës. "Ne kemi ardhur me disa propozime për ta, që do të realizohen në të mirë të qytetarëve të Kosovës", tha zonja Pak, e cila bëri vërejtje pse në rezidencën e Presidentit nuk ishte vendosur flamuri evropian.

"Unë pashë shumë flamuj, por nuk e pashë flamurin evropian. Sido që të jetë, e ardhmja e Kosovës është në Evropë, por një gjë e tillë merr kohë, dhe unë shpresoj se të gjithë politikanët këtu do të punojnë për këtë, dhe ne do të ecim përpara sa më shpejt që të jetë e mundur", tha në fund Doris Pak.

Në pyetjen e një gazetari se kohë më parë në një takim në Budapest zonja Pak kishte shfaqur një opinion negativ për Presidentin Rugova, zonja Pak u përgjegj: "Kjo është çështje e mediave, unë po them se nuk e kam bërë".

 

 

Ministri i Arsimit i përgjigjet Ombudspersonit të Kosovës

 

Prishtinë, 4 mars 2004 - Ministri i Arsimit Rexhep Osmani i është përgjegjur Ombudspersonit të Kosovës Marek Antoni Novicki, i cili përmes një letre kishte reaguar lidhur me rastin e një nxënëseje në gjimnazin "Sami Frashëri" në Prishtinë, së cilës i është ndaluar mbajtja e shamisë në shkollë.

Ministri Osmani thotë se nxënësja nuk është përjashtuar nga shkolla, por asaj i është tërhequr vërejtja se mbajtja e shamisë në shkollë është në kundërshtim me Ligjin mbi Arsimin Fillor dhe të Mesëm në Kosovë.

Po ashtu, Osmani në letër përkujton se "Rregullorja e Kodit të Mirësjelljes së Nxënësve në Shkollë", parasheh që nxënësit duhet ta mbajnë uniformën shkollore gjatë tërë kohës sa janë në shkollë.

"Drejtoresha e shkollës vetëm ia ka tërhequr vërejtjen nxënëses lidhur me këtë çështje dhe ajo nuk është përjashtuar, prandaj mendojmë se nuk ka asnjë arsye që ankesa e saj është drejtuar te ju", thekson në letrën e tij ministri Rexhep Osmani.

 

 

Delegacioni i Parlamentit Evropian u takua me Holkerin, Rexhepin dhe Novickin

 

Prishtinë, 4 mars 2004 - Delegacioni i Parlamentit Evropian, i cili ndodhet për një vizitë triditëshe në Kosovë, i udhëhequr nga zonja Doris Pak, u takua sot me shefin e UNMIK-ut Hari Holkeri, kryeministrin Bajram Rexhepi, Ombudspersonin Novicki dhe me Presidentin Rugova.

Eurodeputetja Doris Pak tha se problemet kryesore në Kosovë janë strukturat paralele, provatizimi etj. Ajo tha se ardhmja e Kosovës është në Bashkimin Evropian, por, sipas saj, kjo do të marrë kohë.

 

Ajo vlerësoi se mesi i vitit 2005 nuk do të sjellë asgjë për Kosovën nëse politikanët "rrinë dhe vetëm presin". Zonja Pak tha se duhet të punohet për standardet, sepse "ato nuk janë të nevojshme për ne, por për qytetarët e Kosovës".

Sipas një kumtese të Ombudspersonit të Kosovës me delegacionin e Parlamentit Evropian "është biseduar për situatën aktuale të të drejtave të njeriut në Kosovë, posaçërisht për problemet me të cilat balafaqohën komunitetet joshqiptar dhe kushtet e tyre, po ashtu edhe për kthimin e të zhvendosurve".
Pasdite delegacioni takohet me kryeparlamentarin Daci dhe me deputetët e Kuvendit të Kosovës.

 

 

U zhvillua raundi i parë i bisedimeve mes Prishtinës dhe Beogradit

 

Prishtinë, 4 mars 2004 - Në Prishtinë sot në selinë e UNMIK-ut, u zhvillua raundi i parë i bisedimeve me një delegacion nga Serbia për çështje praktike të interesit të përbashkët. Bisedimet në mes grupeve punuese për energjetikë mes përfaqësusesve të Prishtinës dhe Beogradit përfunduan me konstatimin se ato do të vazhdojnë më 1 prill në Beograd.

Bisedimet u zhvilluan në nivel ekspertësh, ndërsa ndërmjetësues ishte përfaqësuesi i posaçëm i Bashkimit Evropian, Xholi Dikson.

Ndryshe, Dikson takimin e vlerësoi si të "frytshëm dhe shumë produktiv". Sipas tij, takimi kishte më shumë karakter njohës në të cilën delegacionet prezentuan temat dhe metodat e punës që priten të diskutohen.

Por ai u shpreh se është shumë i lumtur që dialogu i filluar në Vjenë po vazhdon tani me këtë takim. Dikson tha se në Beograd pritet të diskutohet për bashkëpunim në fushën e energjetikës dhe mbrojtjen e ambientit.

 

 

Krerët e institucioneve të Kosovës dhe ai i UNMIK-ut nesër në Shkup marrin pjesë në ceremoninë e varrimit të Trajkovskit

 

Prishtinë, 4 mars 2004 - Presidenti i Kosovës Ibrahim Rugova, kryeminisitri Bajram Rexhepi dhe shefi i UNMIK-ut Hari Holkeri do të marrin pjesë nesër në Shkup në ceremoninë e varrimit të Presidentit të Maqedonisë Boris Trajkovski, i cili javën e kaluar vdiq tragjikisht në një aksident ajror. Më herët të gjitha ata kanë ngushëlluar krerët e institucioneve të larta të Maqedonsië për vdekjen e Presidentit maqedonas.

Trajkovski do të varroset në varrezat e qytetit në Shkup dhe pjesëmarrjen e tyre në ceremoninë varrimit tashmë e kanë paralajmëruar me dhjetra burrë shtetesh të Evropës dhe të botës, si dhe shumë ministra e zyrtarë të lartë të vendeve të ndryshme.

 

 

Ballkani mbetet një ndër përparësitë në politikën e jashtme amerikane

 

Uashington, 4 mars 2004 - Ndihmës sekretarja amerikane e Shtetit Elisabet Xhons në një seancë dëshmish përpara Komisionit të marrëdhënieve ndërkombëtare të Dhomës së Përfaqësuesve, komentoi për zhvillimet në vendet e Evropës Juglindore, përfshirë Shqipërinë, Kosovën dhe Maqedoninë.

Përsa i përket Ballkanit, si pjesë problematike e Evropës dhe ku Shtetet e Bashkuara kanë forca ushtarake, Ballkani natyrisht që është një ndër përparësitë në politikën e jashtëme amerikane.

Zonja Xhons tha se Shtetet e Bashkuara duan të shpejtojnë ditën kur forcat e Natos të mund të kthehen në shtëpitë e tyre dhe kur këto vende të mund të marrin përgjegjësinë për sigurimin e brendshëm dhe të jashtëm.

Si në Bosnje edhe në Kosovë, komuniteti ndërkombëtar po punon për të krijuar kushtet që ta pakësojë rolin e tij duke ia dhënë kontrollin autoriteteve vendase. Në Maqedoni, tha ajo, ky proces ka përfunduar.

Përsa i përket Kosovës, zonja Xhons tha se Shtetet e Bashkuara e ka përqendruar vemendjen tek standardet e qeverisjes së mirë dhe tek demokracia shumë-etnike. Populli i Kosovës, tha ajo, e di se komuniteti ndërkombëtar do t'i kushtojë vemendje të veçantë standardeve që kanë të bëjnë me tolerancën, lirinë e lëvizjes dhe me kthimin e të zhvendosurve.

Ajo tha se institucionet vendase në Kosovë po marrin përgjegjësitë konkrete dhe forca policore shumëkombëshe ka fituar respektin e njerëzve.

Ligjvënësi Eliot Engel shtroi shqetësimin se vënia e standarteve para statusit për Kosovën është një formulë për të vonuar të ardhmen e Kosovës.

Ai kritikoi administratën duke thënë se Shtetet e Bashkuara kanë plane për një shtet palestinez por nuk kanë një plan për Kosovën. Nënsekretarja amerikane e Shtetit tha se në listën e përparësive për Ballkanin janë sidomos përpjekjet për të luftuar krimin e organizuar. Në Shqipëri, tha ajo, ndihma amerikane ka rezultuar në disa suksese në luftën kundër korrupsionit dhe krimit të organizuar.

Vitin tjetër, Shtetet e Bashkuara, në bashkëpunim me Italinë dhe Greqinë, do ta angazhojnë Shqipërinë në një nismë të rëndësishme kundër trafikut sidomos të fëmijëve.

Përsa u përket ndihmave për Ballkanin gjatë vitin financiar 2005, administrata i ka kërkuar Kongresit pothuajse të njëjtin nivel fondesh për Kosovën (72 milion dollarë), për Serbinë 87 milionë dhe për Bosnjen (41 milionë), ndërsa ulje do të pësojnë ndihmat për Kroacinë, Malin e Zi dhe Maqedoninë, njofton Z.A.

 

 

Një doktor amerikan për rritjen e rasteve të vetëvrasjes në Kosovë

 

Uashington, 4 mars 2004 - Lufta në Kosovë shkaktoi shumë trauma, por edhe sot pesë vjet më pas, shenjat e tyre janë të pranishme. Gjendja e keqe ekonomike dhe mungesa e perspektivës janë gjithashtu elemente që pengojnë kapërcimin e traumave.

 

Një organizatë nga Uashingtoni, Qendra për Kurimin e Mendjes dhe Trupit, po bashkëpunon me specialistët në Kosovë për t'u ardhur në ndihmë njerëzve me shqetësime psikologjike. Drejtori i saj doktor Xhems Gordon, ka qenë mbi 10 herë në Kosovë shpreh shqetësimin për një dukuri më parë pothuajse të panjohur në Kosovë: rritjen e rasteve të vetëvrasjes. Në një intervistë për "Zërin e Amerikës", doktor Gordon shpjegoi se si kujtimet e luftës, ashtu edhe pasiguria për të ardhmen janë shkaqe për problemet psikologjike.

"Që nga përfundimi i luftës, kemi parë një rritje të konsiderueshme të problemeve të ndryshme psikologjike, si ndjenja ankthi, depresioni dhe stres pastraumatik. Këto probleme janë shumë të përhapura dhe bëhen shumë më të mprehta kur gjendja ekonomike është e keqe dhe nuk ka shumë shpresë", thotë doktor Gordon.

Sipas tij, para luftës, për vite me radhë dukej sikur shoqëria, lidhjet e ngushta, familjet e mëdha, i mbronin njerëzit emocionalisht. "Qëkur mbaroi lufta, jo vetëm që pati humbje të mëdha, përsa u takon të vrarëve, por gjithashtu ka një ndjesi shkëputjeje, mungesë lidhjesh. Shumë familje të mëdha u ndanë, shpesh për arsye ekonomike, kanë ndoshur ndryshime të mëdha në kulturën e jetesës".

 

Gordon thotë se të gjitha këto kanë luajtur rol në shtimin e rasteve të vetëvrasjeve, që dikur ishin shumë të pakta. "Tani përqindja e vetëvrasjeve është e krahasueshme me ato të shumë vendeve të tjera, madje e përafërt me atë në Shtetet e Bashkuara, ku përqindja e vetëvrasjeve është mjaft e lartë", tha doktor Xhems Gordon.

 

 

Zyrtarët e NATO-s dhe BE-së reagojnë ndaj deklaratave të kryeministrit serb për kantonizimin e Kosovës

 

Bruksel, 4 mars 2004 - Zyrtarët e NATO-s dhe Bashkimit Evropian kanë reaguar ndaj deklaratave të kryeministrit të ri serb Vojisllav Koshtunica për kantonizimin e Kosovës. "Është e qartë se nuk i takon Kushtunicës që të vendosë nëse Kosova do të jetë e ndarë në kantone.

 

Gjithashtu është i qartë qëndrimi ynë se jemi kundër ndarjes së vendit", është shprehur një zyrtar i lartë i NATO-s, duke reaguar në paraqitjen e kryeministrit të ri serb ndaj Kosovës.

 

Ai i porositi serbët se Këshilli i Sigurimit i OKB-së mund të vendosë për Kosovën. Veprimet e këtilla, përkatësisht përbërja e Qeverisë së Serbisë, ndikimi i socialistëve të Millosheviqit në këtë qeveri, si dhe qëndrimet rreth Tribunalit të Hagës, kontribuojnë jashtëzakonisht në largimin e Serbisë nga bashkësia ndërkombëtare, sidomos nga partneriteti për paqe, që deri para pak kohësh dukej shumë afër, porositi ky zyrtar nga Aleanca Veriatlantike.

Ndërkaq, zëdhënësja e Havier Solanës, Kristina Galak, tha se ndarja, kantonizimi dhe ide të këtilla nuk janë aspak në nivel të mendimit me atë evropian rreth asaj se çfarë do të duhej të ishte ardhmëria e Kosovës.

"Bashkimi Evropian përkrah qartë Rezolutën 1244, implementimin e politikës së standardeve dhe përkrah hapjen e debatit për statusin përfundimtar të Kosovës pas realizimit të standardeve", tha zëdhënësja e Solanës.

 

 

Qeveria holandeze financon një projekt për riintegrimin e komunitetit në Gjilan

 

Gjilan, 4 mars 2004 - Dy përfaqësues të Qeverisë holandeze, znj. Marie Balt dhe z. Karel Brands kanë vizituar të mërkurën komunën e Gjilanit, ku do të realizohet një projekt për riintegrimin e komunitetit, i financuar nga Holanda dhe janë takuar me banorët e lagjes "Abdullah Presheva" si dhe me kryetarin e komunës, Lutfi Haziri.

Në këtë lagje, ku jetojnë bashkarisht shqiptarët dhe komuniteti rom, tanimë kanë filluar parapërgatitjet për ndërtimin dhe meremetimin e afro 70 shtëpive për të zhvendosurit që janë shprehur të gatishëm të kthehen nga komuna e Bujanocit, si dhe për komunitetin vendor.

Z. Haziri ka falënderuar qeverinë holandeze për përkrahjen që i ka dhënë dhe po i jep Gjilanit në programin e stabilizimit të komunitetit dhe konkretisht tani në projektin për lagjen "Abdullah Presheva", i cili do të realizohet nga ARC-ja, në bashkëpunim me komunën.

Qeveria holandeze është ndër donatorët më të mëdhenj të projekteve në Gjilan edhe në vitin 2004.
Znj. Marie Balt tha se gjatë vizitës në këtë lagje ka vërejtur dëshirën e madhe të njerëzve për jetë më të mire dhe ka shfaqur shpresën e saj se programi, për të cilin janë ndarë një milion e 500 mijë Euro, do të krijojë kushte për riintegrimin edhe të komuniteteve që tani gjenden në Serbi ose Maqedoni.

Sipas ARC-së, nga projekti për riintegrim do të përfitojnë afro 70 familje shqiptare e rome në këtë lagje të Gjilanit.

"Dëshirojmë të krijojmë kushte më të mira jetese për të gjithë banorët e kësaj lagje, në mënyrë që ata të mund të bashkëjetojnë në paqe dhe harmoni. Bashkarisht do të ndërtojmë paqe për të gjithë dhe me ndihmen e të gjithëve", ka thënë para disa ditësh Birame Sarr ngas ARC-ja.

 

 

Në Kosovë arriti një delegacion i Parlamentit Ëvropian në krye me euro-deputeten Doris Pak

 

Prishtinë, 4 mars 2004 - Mbrëmë në Kosovë ka arritur një delegacion i Parlamentit Ëvropian, i kryesuar nga eurodeputetja Doris Pak, të cilët do të qëndrojnë tri ditë në Kosovë. Nga Brukseli njoftohet se kjo vizitë konsiderohet si demonstrim i përkushtimit të Parlamentit Evropian për situatën në Kosovë.

Njoftohet se standardet, zhbllokimi i procesit të privatizimit, gjendja e pakicave dhe procesi i kthimit të të zhvendosurve pritet të jenë në fokus të interesimit të parlamentarëve evropianë. Parlamentarët evropian sot do të kenë takime me shefin e UNMIK-ut Hari Holkerin, presidentin e Kosovës Ibrahim Rugova, me kryetarin e Kuvendit Nexhat Daci, kryeministrin Bajram Rexhepi dhe me personalitetet të tjera të Kosovës.

 

 

Ndarja e Kosovës për administratën e UNMIK-un është e papranueshme

 

Prishtinë, 4 mars 2004 - Ndarja e Kosovës për UNMIK-un është e papranueshme, ka thënë zëdhënësi i UNMIK-ut, Sunil Narula, duke iu referuar fjalimit të kryeministrit të Serbisë Vojisllav Koshtunica, i cili e paraqiti kantonizimin si zgjidhje për Kosovën. Narula ka shtuar se definimi i statusit të Kosovës do të bëhet nga ana e KS të OKB-së. Ngjashëm u shpreh edhe edhe zëdhënësja tjetër e UNMIK-ut, Izabela Karlovic:

"Deklarimet e tilla nga kushdoqoftë, nuk do të çojnë peshë në zgjidhjen e statusit të Kosovës sepse sa i përket statusit të Kosovës Kombet e Bashkuara do të jenë ato që do të kujdesen si për kohën ashtu edhe për zgjidhjen e tij dhe askush tjetër".

 

 

Amnesti Interneshënell thekson skandalin e Batajnicës ku mbi 700 shqiptarë janë varrosur në varrezat e fshehta

 

Londër, 4 mars 2004 - Organizata për të drejtat e njeriut Amnesti Interneshënell me seli në Londër ka shprehur shqetësime për mospërmbushjen e obligimeve që Unioni Serbi - Mali i Zi i mori për sipër kur u pranua në Këshillin e Evropës në mars 2003.

 

Kjo organizatë thotë se është e dëshpruar me refuzimin e autoriteteve të Beogradit për mosdorëzimin e katër të akuzuarve për krimet e luftës nga Tribzunali i Hagës. Në raportin e Amnesti Interneshënell veçanërisht theksohet skandali i Batajnicës, ku mbi 700 shqiptarë civilë ishin varrosur në varrezat e fshehta, në një pronë të Ministrisë së Punëve të Brendshme të Serbisë.

 

 

Sot do të mblidhet Këshilli Ekonomik Fiskal për të diskutuar rreth mjeteve financiare që janë ndarë për shumë projekte

 

Prishtinë, 4 mars 2004 - Përfaqësuesi i administratës së UNMIK-ut Krist Pier Lidier ka thënë se sot do të mblidhet Këshilli Ekonomik Fiskal për të diskutuar rreth mjeteve financiare që janë ndarë për shumë projekte ekonomike në Kosovë.

 

 

UPS i Universitetit të Prishtinës shpalli zgjedhjet për kuvendin dhe kryetarin e këtij unioni

 

Prishtinë, 4 mars 2004 - Komisioni Qendror i Zgjedhjeve të Unionit të Pavarur të Studentëve të Universitetit të Prishtinës ka bërë shpalljen e zgjedhjeve për kuvendin dhe kryetarin e këtij Unioni. Kandidati për kryetar duhet të përmbushë disa kritere, ndër të tjera edhe do të dëshmojë se nuk i përket asnjë grupacioni apo partie politike.

Sipas kryetarit të Komisionit Qendror Zgjedhor Nysret Mjekiqit të drejtë pjesëmarrje në këto zgjedhje kanë të gjithë studentët e Universitetit të Prishtinës të cilat sipas tij duhet të jenë në moshën 27 vjeç, të kenë të mbaruar vitin e parë të studimeve.

Pasi të kryhen zgjedhjet në fakultete dhe shkolla të larta me datën 30 të këtij muaji do të mbahet mbledhja e Kuvendit të ri zgjedhor të UPS të UP, ku do të zgjedhet kryetari i ri i Kuvendit dhe ai i Unionit të Pavarur të Studentëve.

 

 

Në Shkup mbërriti trupi i Presidentit maqedonas dhe të shoqëruesve të tij

 

Shkup, 4 mars 2004 - Dje mbërriti në Shkup trupi i Presidentit maqedonas Boris Trajkovski dhe të tetë të vdekurve të tjerë në aksidentin ajror. Para selisë së Parlamentit disa mijëra qytetarë ishin mbledhur në pritje të arkivolit me trupin e presidentit. Në parlament trupi i pajetë i Trajkovskit do të ekspozohet para publikut i cili mund t'i japë lamtumirën e fundit të enjtën prej orëve të mëngjesit deri në mbrëmje.

Ceremonia e varrimit do të bëhet në ditën e premte. Ndërkohë Ministria e Punëve të Jashtme të Maqedonisë ka njoftuar se pjesëmarrjen e tyre për në ceremoninë e varrimit të presidentit Trajkovski e kanë paralajmëruar kryetarët, kryeministrat dhe ministrat e punëve të jashtme nga 47 vende të botës.

 

 

Një nxënës palestinez është vrarë dhe katër të tjerë janë plagosur

 

Gaza, 4 mars 2004 - Një nxënës palestinez është vrarë dhe katër të tjerë janë plagosur kur ushtria izraelite hapi zjarr në Rafah në Rripin e Gazës, njofton AFP.

Mohamed Othamane i vrarë 14-vjeçar dhe katër të miturit e plagosur ndodheshin në oborrin e shkollës, kur u qëlluam nga zjarri izraelit.

Edhe një i mitur tjetër palestinez është plagosur më herët nga zjarri izraelit afër shkollës në Rafah.

 

 

Gjykata gjermane ka anuluar dënimin kundër një marokeni në lidhje me sulmet e 11 shtatorit

 

Hamburg, 4 mars 2004 - Një gjykatë gjermane ka anuluar të vetmin dënim të shqiptuar në lidhje me sulmet e 11 shtatorit 2001 në SHBA, njofton BBCWorld. Gjykata Federale Kriminale ka vendosur që rasti t'i kthehet gjykatës më të ulët "për rigjykim dhe vendim" kundër marokenit Mounir al-Motasadik. Vitin e kaluar gjykata kishte konstatuar se Motasadik kishte qenë anëtar i një qelule të Al Kaidës në Universitetin e Hamburgut.

 

 

Policia indiane ka vrarë 4 kryengritës në Asam

 

Nju Delhi, 4 mars 2004 - Policia indiane ka thënë se ka vrarë katër kryengritës në shtetin verilindor Asam, njofton BBCnews. Polica thotë gjithashtu se kanë zënë një sasi të konsiderueshme armësh në dy vendstrehime të kryengritësve në këtë zonë. Kryengritësit kanë hyrë në Asam nga Butani.

 

 

Guerilët kanë sulmuar me mortaja dhe kanë plagosur 3 vetë

 

Mosul, Irak, 4 mars 2004 - Guerilët kanë shkrepur sot (e enjte) të pakten pesë rrathë mortajash dore në një stacion policie dhe në një xhami në qytetin verior të Irakut, Mosul dhe kështu janë plagosur tre persona, ndër të cilët një oficer policie, kanë bërë të ditur burimet policore, njofton Rojter. Njëri nga të plagosurit është në gjendje të rëndë. Sulmuesit kanë ikur me makinë.

 

 

Të paktën 13 minatorë kanë humbur jetën në një minierë në Indonezi

 

Xhakartë, 4 mars 2004 - Të paktën 13 minatorë kanë humbur jetën në minierën e arit në Bogor në Indonezi, pasi që më parë ishte vënë zjarri me qëllim për të dalë nga miniera minatorët e punësuar ilegalisht.

Të 13 trupat janë nxjerrë të mërkurën në mbrëmje nga miniera në malin Pongor, rreth 60 km në jug të Xhakartës. Besohet se në minierë janë bllokuar edhe 80 minatorë të tjerë.

 

 

Në Jemen është arrestuar një lider i Al Kaidës dhe 12 militantë të tjerë

 

Abixhan, 4 mars 2004 - Forcat e sigurimit të Jemenit kanë arrestuar sot (e enjte) një lider vendor të rrjetit të Al Kaidës gjatë një operacioni në provincën jugore të Abixhanit, kanë bërë të ditur zyrtarët, njofton BBCWorld. I dyshimti është Abdul Rauf Nasib dhe është arrestuar në zonën e largët Lauder së bashku me 12 militantë të tjerë. Trupat kanë qenë të mbështetura me tanke dhe helikopter.

 

 

Senatori Xhon Keri kandidat i demokratëve për president

 

Uashington, 4 mars 2004 - Senatori Xhon Keri siguroi emërimin e Partisë Demokrate si kandidat për President të SHBA-ve, pasi fitoi në nëntë nga dhjetë shtetet që mbajtën dje zgjedhje paraprake, ose konferenca zgjedhore.

Rivali kryesor i tij, senatori Xhon Eduards nuk fitoi dje në asnjë nga shtetet dhe do të shpallë sot tërheqjen nga gara. Presidenti Bush i telefonoi senatorit Keri për ta uruar, duke thënë se shpreson për një garë të fortë në zgjedhjet e nëntorit.

Analistët kanë filluar ndërkohë të shprehin hamendje për njeriun që zoti Kerry do të zgjedhë si kandidat për postin e nënpresidentit. Këshilltarët e zotit Edauards thonë se ai mund ta pranojë postin nëse i ofrohet.

 

 

SHBA mund të mbështesin një rezolutë, që kritikon të drejtat e njeriut në Kinë

 

Uashington, 4 mars 2004 - Shtetet e Bashkuara prishën një traditë jozyrtare vitin e kaluar duke mos sponsorizuar një rezolutë mbi Kinën, me shpresë që Pekini të vazhdonte atë që zyrtarët amerikanë thanë se ishte një përparim gradual por i pashembullt i gjendjes së të drejtave të njeriut në vitin 2002.

Por departamenti i shtetit, në raportin e tij vjetor mbi të drejtat e njeriut, që publikoi javën e kaluar, tha se Kina u zbraps në fushën e të drejtave të njeriut vitin e kaluar, duke cituar mes të tjerash arrestimin e veprimtarëve të demokracisë dhe shtypjen e vazhdueshme të tibetianëve dhe të anëtarëve të lëvizjes shpirtërore Falun Gong.

 

 

Rebelët ulin armët në Haiti

 

Port o Prens, 4 mars 2004 - Gjendja në Haiti vazhdon të jetë e tensionuar dhe plotë zhvillime dramatike.Udhëheqësi i rebelëve në Haiti, Gaj Filip, i ka urdhëruar luftëtarët e tij që të ulin armët.

Filip, i cili të martën e shpallii veten të jetë në kontroll të vendit, tha se është pajtuar që të çarmatoset për shkak se forcat ndërkombëtare të sigurisë kanë premtuar të garantojnë sigurinë për qytetarët e Haitit.

 

 

Disidenti i shquar kinez është liruar nga burgu

 

Peking, 4 mars 2004 - Një disident i shquar kinez, Vang Juçaj, është liruar nga burgu dhe është nisur të shkojë në SHBA, njofton BBCWorld. Z.Vang, një nga themeluesit e Partisë Demokratike të jashtëligjshme të Kinës është dënuar me 11 vjet burg më 1998. Ai është nisur për në San Francisko, ku do t'i jipet së pari ndihma mjekësore.

  |  KULTURË  |  HISTORI  |   POLITIKË  |  OPINIONE  |  ADRESARI  |  ARKIVI  |